Diferencies ente revisiones de «España»
Sin resumen de edición Etiquetes: Edición de móvil Edición de la web pa móvil |
Actualización: Cambiu de presidente del gobiernu de Rajoy a Sánchez. |
||
| Llinia 1: | Llinia 1: | ||
{{otrosusos|España (dixebra)}} |
{{otrosusos|España (dixebra)}} |
||
{{Infobox_País | nome_oficial = |
{{Infobox_País | nome_oficial = Reino de España<br />Regne d'Espanya<br />Espainiako Erresuma<br />Reialme d'Espanha |
||
| nome_común = España |
| nome_común = España |
||
| de = d' |
| de = d' |
||
| imaxe_bandera = |
| imaxe_bandera = Flag of Spain.svg |
||
| imaxe_escudu = Escudo de España (colores THV).svg |
| imaxe_escudu = Escudo de España (colores THV).svg |
||
| imaxe_escudu_tamañu = 120px |
| imaxe_escudu_tamañu = 120px |
||
| Llinia 18: | Llinia 18: | ||
| gobiernu = [[Monarquía parllamentaria]] |
| gobiernu = [[Monarquía parllamentaria]] |
||
| dirixentes_títulos = [[Llista de monarques d'España|Rei]]<br />[[Llista de presidentes d'España|Presidente]] |
| dirixentes_títulos = [[Llista de monarques d'España|Rei]]<br />[[Llista de presidentes d'España|Presidente]] |
||
| dirixentes_nomes = [[Felipe VI d'España]]<br />[[ |
| dirixentes_nomes = [[Felipe VI d'España]]<br />[[Pedro Sánchez Pérez-Castejón]] |
||
| fundación = Unificación |
| fundación = Unificación |
||
| fundación_fitos = • Fecha |
| fundación_fitos = • Fecha |
||
Revisión a fecha de 13:44 1 xun 2018
.svg)
España[22], oficialmente Reinu d'España, (Reino de España n'español) ye un país miembru de la Xunión Europea, costituyíu n'Estáu social y democráticu de Derechu so la forma d'una monarquía parllamentaria, y compuestu de 17 comunidaes autónomes y 2 ciudaes autónomes.
El so territoriu, con capital en Madrid, ocupa la mayor parte de la Península Ibérica, al qu'han d'amestase los archipiélagos de les Islles Baleares (nel mar Mediterraneu occidental) y el de les Islles Canaries (nel océanu Atlánticu nororiental), asina como nel norte del continente africanu les ciudaes autónomes de Ceuta y Melilla, amás de los distritos y posesiones menores de les islles Chafarines, el peñón de Vélez de la Gomera y el peñón d'Alhucemas. L'enclave de Llivia, nos Pirineos, completa'l conxuntu de territorios xunto cola islla d'Alborán, les islles Columbretes y una serie d'islles y isllotes frente a les sos propies costes.
Tien una estensión de 504.645 km², siendo'l cuartu estáu más estensu del continente, tres Rusia, Ucraína y Francia. Con una altitú media de 650 metros sobre'l nivel del mar, ye'l segundu país más montañosu d'Europa, tres Suiza. La so población ye de 46.951.532 habitantes, según datos del padrón municipal de 2010.
D'alcuerdu cola Costitución Española, el castellanu o español ye la llingua oficial del Estáu. En 2006, yera la llingua materna del 89% de los españoles. Otres llingües, tamién españoles, son reconocíes como cooficiales n'estremaes comunidaes autónomes, conforme a los estatutos d'autonomía. La Constitución reconoz que les modalidaes llingüístiques d'España son ún de los patrimonios culturales, oxetu d'especial respetu y proteición.
El territoriu peninsular comparte llendes terrestres con Francia y col Principáu d'Andorra al norte, con Portugal al oeste y col territoriu británicu de Xibraltar al sur. Nos sos territorios africanos, comparte llendes terrestres y marítimes con Marruecos. Comparte con Francia la soberanía sobre la islla de los Faisanes na boca del ríu Bidasoa y cinco faceríes pirenaiques.
Etimoloxía
El nome d'España deriva d'Hispania, nome col que los romanos conseñaben xeográficamente al conxuntu de la Península Ibérica, términu esti a la so vez, deriváu del nome Iberia, preferíu polos autores griegos pa referise al mesmu espaciu. Sicasí, el fechu de que'l términu Hispania nun ye de raigame llatina tien llevao a la formulación de delles teoríes sobre'l so aniciu, dalgunes d'elles controvertíes.
«Hispania» provién del feniciu i-spn-ya, un términu cuyu usu ta documentao dende'l segundu mileniu enantes de Cristu, n'iscripciones ugarítiques. Los fenicios constituyeron la primer civilización non ibérica que llegó a la península pa esparder el so comerciu y que fundó, ente otres, Gadir, anguaño Cádiz, la ciudá habitada más antigua d'Europa Occidental. Los romanos tomaron la denominación de los vencíos cartaxineses, interpretando'l prefixu i como "costa", "islla" o "tierra", con ya col sinificáu de "rexón". El lexema spn, que n'hebréu se pue lleer como saphan, tornóse como "coneyos" (en realidá damanes, unos animales del tamañu del coneyu espardíos per África y el Creciente Fértil). Los romanos, poro, diéron-y a Hispania'l sinificáu de "tierra abondante en coneyos", un usu recoyíu por Cicerón, César, Pliniu'l Vieyu, Catón, Titu Liviu y, en particular, Cátulu, que se refier a Hispania como península cuniculosa (en dalgunes monedes acuñaes na época d'Adrianu figuraben personificaciones d'Hispania como una dama sentada y con un coneyu a los sos pies). Abondando nel orixe feniciu del términu, Isidoru de Sevilla, nes sos Etimoloxíes, postula que tien el so orixe n'Ispani, el topónimu feniciu-púnicu de Sevilla, ciudá a la que los romanos denominaron Hispalis.
Sobre l'orixe feniciu del términu, l'historiador y hebraísta Cándido María Trigueros propunxo na Real Academia de les Bones Lletres de Barcelona en 1767 una teoría estremada, basada nel fechu de que l'alfabetu feniciu (al igual que l'hebréu) carecía de vocales. Asina spn (sphan n'hebréu y araméu) sinificaría en feniciu "el norte", una denominación que tendríen tomao los fenicios al llegar a la península Ibérica bordeando la costa africana, viéndola al norte de la so ruta, polo que i-spn-ya sedría la "tierra del norte". Pola so parte, según Jesús Luis Cunchillos na so Gramática fenicia elemental (2000), la raigame del términu span ye spy, que sinifica "forxar o batir metales". Asina, i-spn-ya sedría «la tierra na que se forxen metales».
Aparte de la teoría d'orixe feniciu, la más aceptada (magar el sinificáu precisu del términu sigue siendo oxetu d'alderiques, a lo llargo de la hestoria propuxéronse estremaes hipótesis, basaes en semeyances aparentes y sinificaos más o menos rellacionaos. Nel entamu de la Edá Moderna, Antonio de Nebrija, na llinia d'Isidoru de Sevilla, propunxo'l so orixe llariegu como deformación de la pallabra ibérica Hispalis, que sinificaría la ciudá d'occidente, y que, al ser Hispalis la ciudá cimera de la península, los fenicios, y, posteriormente los romanos dieron el so nome a tol so territoriu. Posteriormente, Juan Antonio Moguel propunxo nel sieglu XIX que'l términu Hispania podría provenir de la pallabra eusquera Izpania que vendría a sinificar que xebra la mar al tar compuesta por les voces iz y pania o bania que sinifica "dixebrar" o "partir". Al respective, Miguel de Unamuno declaró en 1902: "La única torga qu'alcuentro [...] ye que, según dalgunos paisanos míos, el nome España deriva del vascuence 'ezpaña', llabiu, aludiendo a la posición que tiene la nuesa península n'Europa".
Otres hipótesis camentaben que tanto Hispalis como Hispania yeren derivaciones de los nomes de dos reis llexendarios d'España, Hispalo y el so fíu Hispano o Hispan, fíu y nietu respectivamente d'Hércules.
De magar el periodu visigodu, el términu Hispania, hasta entós usáu xeográficamente, entamó a emplegase tamién con una connotación política, como amuesa l'usu de la espresión Laus Hispaniae pa describir la hestoria de los pueblos de la península nes cróniques d'Isidoru de Sevilla. Esisten delles teoríes sobre cómo xurdió'l propiu xentiliciu "español"; según una d'elles, el sufixu "-ol" ye característicu de les llingües romances provenzales y poco frecuente nes llingües romances falaes entós na península, polo que cunta que tendría sío importao de magar el sieglu IX col desendolcu del fenómenu de les pelegrinaciones medievales a Santiagu de Compostela, polos numberosos visitantes francos que percorrieron la península, favoreciendo que col tiempu se divulgara l'adaptación del nome llatín hispani a partir del "espagnol" o "espanyol" col qu'ellos designaben a los cristianos de l'antigua Hispania. Posteriormente, tendría sío'l llabor de divulgación de les élites formaes les que promocionaron l'usu d'"español" y "españoles": la pallabra españoles apaez venticuatro vegaes nel cartulariu de la catedral de Huesca, manuscritu de 1139-1221, mientres que nel capítulu Estoria de Espanna de la Crónica General redautada ente 1260 y 1274 por iniciativa d'Alfonsu X el Sabiu, emplegóse esclusivamentel xentiliciu espannoles, adaptación ya al castellanu d'entós que progresivamente evolucionó hasta ser la llingua oficial d'España.
Hestoria
Edá Antigua
Los iberos foron los primeros pueblos de los que se tien constancia escrita qu'ocuparen la península Ibérica. Sábese qu'había poblaciones protoiberes, por restos arqueolóxicos. Los griegos y fenicios foron los que dexaron los primeros escritos, anque nunca entraron en contactu con ellos. Los vascones entraríen nesta categoría.
Anguaño, defínense los iberos polos sos rasgos culturales. Según esti criteriu, los turdetanos o túrdulos, qu'ocuparon les tierres del antiguu reinu de Tartessos, considéranse iberos; mientres que, según criterios etnográficos o llingüísticos, nun lo seríen. La bibliografía sobre los iberos ufre con frecuencia datos contradictorios y esto débese a que, a vegaes, adóptase un criterio y otres, otro.
Ente los años 1200 e.C. y 800 e.C. tomaron forma na so configuración posterior les comunidaes prerromanes del noroeste y la cornisa cantábrica, entrando na Edá del Fierru. Les poblaciones qu´ocupaben una amplia estaya ente estos dos pueblos conócense como celtíberos. Abulta que les montañes en que vivíen los vascones xamás foron dafechu romanizaes, polo que se camienta l'orixe d'esta población inciertu, y seguro mui antiguu, como la so llingua, baraxándose la posibilidá de que se tratara d'una población protoibérica.
Alrodiu del añu 1100 e.C., los fenicios llegaron a la península y fundaron, 80 años dempués de la guerra de Troya, Gadir, la Gades romana, que güei ye Cádiz. Ello asitia la fundación nel 1104 e.C. y conviértela na ciudá d'Europa Occidental de la que se tienen referencies más antigües de la so fundación. A la so vez, los griegos fundaron les sos colonies na costa mediterránea d'Iberia, nome que dieron a la península.
Entre la primer y segunda de les Guerres Púniques ente Roma y Cartagu, los cartaxineses invadieron la península. Les sos colonies más importantes afitáronles na islla d'Ibiza y en Cartaxena, nome que debiera facer referencia a la nueva Cartagu y absorbieron otres ciudaes nun entamu fenicies como Cádiz o Málaga. Derrotada Cartagu, Roma entamaría una paulatina ocupación de la península, que se prolongaría a lo largu de cuasi 200 años. Nes primeres décades de la ocupación los romanos tuvieron que facer frente al largu sitiu de Numancia, ciudá celtíbera allugada nes orielles del Dueru, nes prosimidades de la anguaño Soria, que se prolongaría por cuasi 30 años, y a la guerra de guerrillas plantegada pol caudillu lusitanu Viriato.
Tres la muerte de Viriato (139 e.C.), la llucha de los pueblos prerromanos escontra Roma volveríase más disgregada y esporádica, anque nun finaría dafechu hasta los tiempos del emperador Augustu col relativu sometimientu de cántabros y astures. La ocupación remataría col plenu dominiu de la península baxo'l poder romanu y la so conversión en provincia baxo'l nome d'Hispania. El nome d'Hispania deriva d'Ispania y esti a la so vez escurque d'una pallabra púnica, col significáu de tierra de coneyos, anque hai otres posibilidaes (ver Etimoloxía nel puntu 1 d'esti mesmu artículu). Por primer vegada apaez con sentíu hestóricu en Titu Liviu 59 e.C., que fala d'Hispania y de hispani (hispanos, con sentíu unitariu).
Los habitantes d'Hispania adoptaron la cultura romana, la so llingua y les sos lleis, adquiriendo gran importancia dientro del imperiu, puesto qu'inclusive tres emperadores romanos, Traxanu, Adrianu y Teodosiu, además del filósofu Luciu Ánneo Séneca y otros personaxes importantes, nacieron na península.
Edá Media
Nel añu 409, suevos, alanos y vándalos invadieron la península Ibérica. Pocos años dempués, nel 416, los visigodos entraron n'Hispania como aliaos de Roma, espulsando a alanos y vándalos de la península y arrequexando a los suevos en la Gallaecia.
La primer idea d'Hispania/España como estáu materialízase cola monarquía visigoda. Los visigodos aspiraban a la unidá territorial de toa Hispania y consiguiéronla coles socesives derrotes a los suevos, vascones y bizantinos. La unidá relixosa vendría cola reconciliación de católicos y arrianos y colos concilios de la Ilesia Visigoda, un órganu nel que, aconceyaos, el rei y los obispos de toles diócesis del reinu sometíen a consideranza mientes de natura tanto política como relixosa, con vocación de llexislar en tol territoriu nacional. Asina, San Isidoru de Sevilla na so Historia Gothorum congratúlase porque Suintila "foi'l primero que poseyó la monarquía del reinu de toa España qu'arrodia l'océanu, cosa qu'a dengún de los sos antecesores-y foi concedida...". La monarquía visigoda afitó además una capital que centralizaba tanto'l poder políticu como'l relixosu en Toletum. Sicasí, el carácter electivu de la monarquía visigótica determinó cuasi siempre una enorme inestabilidá política caracterizada por continues rebeliones y asesinatos.
Nel añu 689 los árabes llegan al África más noroccidental. L'añu 711, tres la victoria de los árabes frente a los godos na batalla de Guadalete, entamó la Conquista musulmana de la Península Ibérica, convirtiéndose ésta nun emiratu o provincia del imperiu árabe llamada al-Ándalus con capital na ciudá de Córdoba.
L'avance musulmán foi veloz. Nel 712 cayó Toledo, la capital visigoda. Dende entós, foron avanzando pal norte, y toles ciudaes foron capitulando o conquistaes. Nel 716 controlaben tola península, anque nel norte yera más bien nominal que militar. Los visigodos resistieron dalgunos años más na Septimania, hasta'l 719. De magar entós, dirixeron los sos esfuerzos hacia l'otru llau de los Pirineos, escontra'l reinu Carolinxu. Esto permitió revueltes na poco controlada zona noroeste de la península.
Dempués de la cayida del reinu visigodu la península quedó dominada hasta la cordal Cantábrica, onde taben los pueblos astures, cántabros y vascones, poco sometíos al reinu godu; y dada la so escasa importancia, nun sofrieron abondo la presión del Islam, que sostituyera na península Ibérica al poder exercíu pol reinu godu. Munchos de los señores godos o hispanorromanos convirtiéronse al Islam, conservaron les sos posiciones y poder.
Nel añu 718 na anguaño Asturies un noble llamáu Pelayu sublevóse escontra los musulmanes. La sublevación fracasa y ye prindao. Hacia'l 722 vuelve a intentalo y tien llugar lo que la hestoriografía denominó la batalla de Cuadonga, onde Pelayo y un grupu d'astures (ente los que s'alcontraben, según dalgunos hestoriadores, nobles visigodos; l'orixe de Pelayu ye tamién inciertu) vencieron a una espedición de castigu musulmana. Esti fitu sirviría pa marcar el momentu de fundación del Reinu d'Asturies y dar aniciu al periodu conocíu como la Reconquista, atolenáu como'l restablecimientu del poderíu cristianu na península Ibérica.
Na parte nororiental de la península y na Septimania goda, los godos que fuxeren al reinu de los francos pidieron ayuda a estos. Asina Carlomagnu anició una serie de campañes militares col determín d'afitar un territorio de distensión militar, más conocíu como marca. La Marca Hispánica constituyóse nel entamu del sieglu IX pa evitar la penetración de los musulmanes nel territoriu del Reinu de los Francos. Asina foi como los francos axebraron esi territoriu n'estremaos condaos, onde señores feudales d'orixe francu o godu representaben al rei de los francos; teniendo, poro, un desenrollo dalgo estremáu al qu'esperimentaron los reinos cristianos ibéricos occidentales. Estos condaos en plenu procesu de feudalización emanciparíense de facto del domiñu francu dempués de la crisis carolinxa del sieglu IX, al entamar a tresmitise hereditariamente los condaos; magar hasta 988, los condes de Barcelona renovaron el pautu de vasallaxe colos reis francos.
Los sieglos VIII y IX sinificaríen un creciente poderíu musulmán na península, magar de la oposición de los núcleos cristianos del norte. Na fin del sieglu VIII, l'omeya Abderramán I, afuyíu de Siria, fai d'al-Ándalus, no políticu, un emiratu independiente del Califatu de Damascu.
Nel sieglu X, Abderramán III torna al-Ándalus en califatu independiente de Damascu, ya con autonomía relixosa y non solo política, como hasta entós. Ye una época de puxu cultural, gracies a les innovaciones nes ciencias, les artes y les lletres; con una especial atención que dedicaron al desenrrollo de les ciudaes. Les ciudaes más importantes foron Valencia, Zaragoza, Toledo, Sevilla y Córdoba. Ésta, nel sieglu X, con al-Hakam II, llegó a ser la mayor ciudá d'Europa Occidental, cuntando con 500.000 habitantes y mayor centru cultural de la época. Sicasí, la decadencia de los territorios musulmanes entamó nel sieglu XI, cuando comenzaron les pugnes ente les estremaes families reales musulmanes y el califatu s'esgayó nun mosaicu de pequeños reinos, llamaos de taifes.
Mentanto, cerca de los Pirineos apaecieron otros dos reinos cristianos: Navarra y Aragón. Al avanzar l'espardimientu cristianu pola península, el qu'hasta entós fora reinu d'Asturies, cola so capital fincada n'Uviéu dende'l reináu d'Alfonsu II el Castu, trensformóse en reinu de Lleón en 910 con García I al repartir Alfonsu III el Grande los sos territorios ente sos fíos. Años dempués, en 914, muertu'l rei, xube al tronu Ordoñu II de Lleón, qu'aglutina baxo la so corona a los territorios de Galicia, Asturies y Lleón, fixando definitivamente nesta ciudá la so capital y confirmando la so supremacía como reinu de Lleón.
L'avance de les conquistes hacia'l sur y la aglutinación en tornu a Lleón d'un territoriu cada vez más amplio trai consigo la nacencia de «sounidaes» políticu-territoriales nel so interior: ye'l casu del Castiella. Esti será adquirío pol rei navarru Sanchu III el Mayor, que lu dexará a la so muerte n'herencia al so fíu Fernandu. Casáu esti cola hermana del rei lleonés, formará una coalición navarro-castellana que, tres una guerra y la muerte del rei de Lleón na batalla de Tamarón permitió-y acceder al tronu d'ésti. Sicasí, a la so muerte los territorios vuelven a ser repartíos ente los sos fíos: son el reinu de Lleón, el reinu de Galicia, Castiella, que tamién adquier el rangu rexu y la ciudá de Zamora. A lo largu de los sieglos siguientes, estos territorios pasarán a manos del mesmu o d'estremaos monarcas en socesives ocasiones, conformando la Corona de Castiella, con unes úniques Cortes.
Los estremaos territorios conservaben el so carácter de reinu y delles particularidaes xurídiques (el rei qu'aglutinaba baxo la so corona toos estos territorios entitulábase Rei de Lleón, de Castiella, de Galicia... añidiendo socesivamente los de los nuevos territorios que se diben conquistando), ensin que sicasí conservaren una autonomía semeyada a la de la Corona d'Aragón. Asinamesmu, nacerá de Lleón otra unidá territorial de gran trescendencia posterior: Portugal, que se costituyirá como reinu. Cal señalar, a lo cabero, como ún de los momentos más destacaos los reinaos d'Alfonsu VI y Alfonsu VII en Lleón l'adopción del títulu d'emperador, el primeru como "emperador de les dos relixones", el segundu como "emperador d'España".
El devenir de los reinos cristianos peninsulares nes décades siguientes pasará pola costitución de cuatro unidaes monárquiques: la denominada Corona de Castiella, conceptu qu'implica la esistencia d'un solu monarca sobre dellos y estremaos reinos y territorios (Lleón y la propia Castiella, además de Galicia y otros); la Corona de Aragón, que se costituyera mediante la xunión dinástica en 1137 del reinu d'Aragón y el condáu de Barcelona; el reinu de Navarra y el reinu de Portugal. Asina como toa una serie de reinos de taifa musulmanes.
Nel sieglu XIII, la Corona de Castiella, la más puxante de les hispániques, enantó los sos dominios hacia'l sur peninsular, mientres que la d'Aragón añidiría los reinos de Valencia y de Mallorca col rei Xagó I el Conquistador, y posteriormente formaríen parte d'esta Corona: Cerdeña, Sicilia y otros territorios del Oriente mediterraneu.
Na fin d'esti periodu, 1402, y en competencia con Portugal, la Corona de Castiella anició la conquista de les islles Canaries hasta entós habitaas esclusivamente polos guanches. La ocupación al entamu foi llevada a cabo por parte de señores normandos que rendíen vasallaxe al rei Henrique III de Castiella. Esti procesu de conquista nun finará hasta 1496 y será rematao por la propia acción de la corona castellana.
Mientres na Corona d'Aragón, la gran mortandá provocada pol andanciu de la Gran Peste de 1348, asina como de les males colleches qu'entamaron col ciclu de 1333 («lo mal any primer»), provocaron una gran inestabilidá tanto social como económica.
A la muerte del Rei Martín I l'Humanu (1410), los representantes de los Estaos que costituyíen la Corona d´Aragón, escoyeron nel Compromisu de Caspe a Fernandu d'Antequera, de la castellana Casa de Trastámara como futuru rei Fernandu I nel que recayíen por herencia materna los drechos dinásticos. Magar d'una revuelta protagonizada pol Conde d'Urxel, Fernandu I foi coronáu y entamó'l reináu de los Trastámara na Corona d'Aragón.
Dempués del espardimientu pol Reinu de Nápoles nel periodu d´Alfonsu V el Magnánimu, la Corona de Aragón sofrió una crisis nel Principáu de Cataluña provocada poles disputes ente Xuan II, fíu de Fernandu d'Antequera, y la Xeneralidá de Cataluña y el Conseyu de Cientu (Consell de Cent), por mor de la prindada del so fíu y herederu Carlos de Viana; asina como poles tensiones de les clases sociales ente la Busca y la Biga y les revueltes de los campesinos de Remensa, que coincidieron cola Guerra Civil Catalana (1462 - 1472) y debilitaron a Cataluña, que perdió d'esi mou la hexemonía na Corona aragonesa.
En contrapartida Valencia convirtióse nel puertu marítimu que centralizó la espansión comercial de la Corona de Aragón. Amuesa de la so puxanza ye qu'algamó los 75.000 habitantes a mediaos del sieglu XV. Paralelamente, la capital llevantina esperimenta un puxu cultural conocíu como Sieglu d'Oru Valencianu.
Aragón, ensin salida al mar, quedó como proveedor de cereal, ganáu y llana del restu de los estaos de la Corona. La so economía yera fundamentalmente agrícola y los privilexos de los ricoshomes y nobles impidieron el desendolcu d'una burguesía competente, polo que'l so pesu nel marcu d'equilibrios ente los estaos de la Corona aragonesa amenorgó.
Con la xuba al tronu de Fernandu'l Católicu, segundu fíu y herederu de Xuan II, (1479) les tensiones sociales amenorgaron; cola robla de la Sentencia Arbitral de Guadalupe (1486) afitóse una nueva estructura nel campu catalán p'acabar cola conflictividá del mediu rural.
Edá Moderna
Na fin de la Edá Media, col matrimoniu de Sabela I de Castiella y Fernandu II d'Aragón, estas dos coronas peninsulares aliáronse, conquistando'l reinu musulmán de Granada en 1492 y, posteriormente, el de Navarra en 1512 que continuó siendo un reinu, acuñando moneda propia y con aduanes nel ríu Ebro hasta les guerres carlistes del sieglu XIX. Los reis navarros abellugáronse nes sos posesiones allende los Pirineos y posteriormente convertiríense en rei de Francia.
Tamién entamaron una política matrimonial con Portugal que finó en 1580, cuando Felipe II d'España xubió al so tronu, meciendo por cabera vez baxo un mesmu soberanu tola península Ibérica.
En 1492, decrétase la espulsión de los xudíos que nun tuvieren aceptao la conversión al cristianismu, semeyando a Felipe IV de Francia. El 12 d'ochobre d'esi mesmu añu Cristóbal Colón, en nome de los Reis Católicos, llega, por primer vegada, a América coles sos naves (en memoria d'esti fitu afitóse'l doce d'ochobre como'l día de la Fiesta Nacional d'España, antaño nomada tamién de la Hispanidá). Entama la carrera pola esploración y conquista de les tierres americanes, a la que se meceríen posteriormente otros países como Portugal, Francia y Inglaterra entamando la colonización europea d'América partiendo a islles del Caribe hasta mesoamérica a cargu de Francisco Hernández de Córdoba y dempués Hernán Cortes.
La Monarquía Española conviértese, nun procesu aniciáu a la fin de la Reconquista, na nación más poderosa y influyente del mundu. Nel reináu de los Reis Católicos entama tamién una tímida espansión norteafricana, conquistándose delles ciudaes, ente elles Melilla (1497).
Tres la muerte de Sabela la Católica, en 1504, la so fía Xuana asocédela nel tronu de Castiella. Xuana taba casada con Felipe I, al que llamaron el Fermosu, fíu del Archiduque d'Austria y Emperador del Sacru Imperiu Romano-Xermánicu. Felipe muerre bien mozu y a Xuana incapacítase-y por lloca. El so fíu Carlos I d'España hereda les Corones de Castiella y Aragón, además del sacru Imperiu Romano-Xermánicu y les posesiones de la Casa de Borgoña. Na so madurez, decide retirase a la vida relixosa recluyéndose nel Monesteriu de Yuste (Cáceres) en 1556. El so fíu Felipe II hereda la Corona Hispánica con toles sos posesiones y el so hermanu Fernandu I d'Habsburg u'l Sacru Imperiu Romano-Xermánicu.
Felipe II d'España corónase rei de Portugal en 1580 col nome de Felipe I de Portugal. L´ordinal «segundu» caltúvolu pa respetar la vía castellana (Felipe I de Castiella foi Felipe'l Fermosu). Nel so reináu prodúcense la gran victoria de Lepantu en 1571 cola que se consiguió arrebater l'espardimientu de los turcos nel Mediterraneu y la desastrosa aventura de la Grande y Felicísima Armada en 1588.
España, y en mayor midida Castiella, dada la prohibición de comercio pa la Corona de Aragón, sigue prosperando baxo la dinastía Habsburgu, per aciu del comerciu coles colonies americanes; pero al tiempu sostenta guerres escontra Francia, Inglaterra y les Provincies Xuníes.
Cuando'l caberu rei de la dinastía de los Habsburgu, Carlos II d'España, morrió ensin descendencia; Felipe de Borbón, sobrín nietu de Carlos II y nietu del rei de Francia, Lluis XIV, asocediólu nel tronu col nome de Felipe V d'España, siendo aceptáu y xuráu por tolos territorios d'España. A los pocos años de reináu, prodúzse la Guerra de Socesión Española.
Ente 1707 y 1716, los Decretos de Nueva Planta de Felipe V suprimen o amenorgan los fueros y vezos de los reinos y territorios que llucharan escontra él na Guerra de Socesión.
Dalgunos quieren ver nestos decretos una unificación llegal d'España, pero, per un llau, los decretos, al ser estremaos pa Valencia, Aragón (onde primero foi igual que'l de Valencia, pero llueu foi modificáu), Baleares y Cataluña, afectaron de miente estremada a cada territoriu, y además, tanto Navarra como les Provincies Vasques y el Valle d'Arán, que nun faltaran al so xuramentu de llealtá a Felipe V, siguieron calteniendo los sos fueros. En 1713, España robla'l Tratáu d'Utrecht col que pierde les sos posesiones europees y, poro, dexa de ser la primer potencia mundial. El restu del sieglu XVIII, foi'l sieglu de la Ilustración. Fernandu VI y Carlos III, fíos y socesores de Felipe V, faen una política de renovación que modernizó España, no que se conoz como Despotismu Ilustráu. Nesti sieglu, anque España continúa siendo una importante potencia, Francia y el Reinu Xuníu pasan a ocupar un protagonismu cada vez mayor nel escenariu internacional.
Edá Contemporánea
La Edá Contemporánea nun entamó mui bien pa España, en 1805, na Batalla de Trafalgar la escuadra hispano-francesa foi derrotada ante Gran Bretaña, colo que significa la fin de la supremacía española nos mares mundiales a favor de Gran Bretaña, mientres Napoleón que tomara'l poder tres trunfar la Revolución Francesa, aprovechando les disputes ente Carlos IV y el so fíu Fernandu, ordenó l'unvéu del so exércitu escontra España en 1808, col pretestu d'invadir Portugal y cuntando cola complicidá de Manuel Godoy, a quien prometiera'l tronu d'una de les partes nes que camentaba axebrar el país vecín; imponiendo al so hermanu Xosé I nel tronu. Ello ocasiona la Guerra de la Independencia Española qu'avagaría 5 años. Nesi tiempu ellaboróse la primer Constitución española, y una de les primeres del mundu, nes nomaes Cortes de Cádiz. Foi promulgada'l 19 de marzu de 1812, festividá de San Xosé, polo que popularmente se la conocía como La Pepa. Tres la derrota de les tropes de Napoleón na batalla de Vitoria en 1813; Fernandu VII vuelve al tronu d'España.
Nel reináu de Fernandu VII la monarquía española esperimentará'l pasu del vieyu réxime al estáu Lliberal. Tres la so llegada a España, Fernandu VII deroga la Constitución de 1812 y escorrexa a los lliberales constitucionalistes, dando entamu a un terriu absolutismu. Mentanto Guerra d'Independencia Hispanoamericana continuará'l so cursu, y magar del esfuerciu bélicu de los defensores de la monarquía española, al rematar el conflictu únicamente les islles de Cuba y Puerto Ricu, n'América, siguirán formando parte del territoriu estatal d'España qu'al finar la década ominosa y col encontu lliberal a la Pragmática Sanción de 1830 a la so vez organizaráse nuevamente en monarquía parlamentaria. D'estamiente entrambos procesos revolucionarios darán orixe a los nuevos estaos nacionalaes esistentes anguaño, y la fin del reináu de Fernandu VII señala tamién la estinción del Absolutismu en tol mundu hispánicu.
La muerte de Fernandu VII abri un nuevu periodu de fuerte inestabilidá política y económica, el so hermanu Carlos María Isidro encontáu nos favoratibles absolutistas, rebélase escontra la designación de Sabela II, fía de Fernandu VII, como heredera y reina constitucional, y escontra la derogación de la Llei Sálica de la dinastía Borbón, qu'impedía la socesicón de muyeres a la corona, españando la Primera Guerra Carlista. El reináu de Sabela II caracterízase pola alternancia nel poder de progresistas y moderaos magar esta alternancia se motiva más por pronunciamientos militares d'entrambos signos que por una pacífica cesión del poder en función de los resultaos electorales.
La revolución de 1868, nomada La Gloriosa, obligó a Sabela II a abandonar España. Convocáronse Cortes Costituyentes que se pronunciaron pol réxime monárquicu y, a iniciativa del Xeneral Prim, úfrese la corona a Amadéu de Saboya, fíu del rei d'Italia. El so reináu foi breve pol cansanciu provocáu polos políticos del momentu y el refugu d'importantes sectores de la sociedá, además de pola pérdida del so cimeru encontu, el mentáu Xeneral Prim, asesináu enantes de qu'Amadéu llegara a pisar n'España. Siguidamente proclamóse la I República, que tampoco gozó de llarga vida, anque sí mui axitada: n'once meses tuvo cuatro presidentes (Figueras, Pi y Margall, Salmerón y Castelar); nesti convulsu periodu produciéronse graves tensiones territoriales llegándose a producir fenómenos tan pintorescos como la declaración de la ciudá de Cartaxena como "Cantón independiente" y finó colos pronunciamientos de los xenerales Martínez Campos y Pavía, que sumió'l Parlamentu.
La Restauración proclama rei a Alfonsu XII, fíu de Sabela II. España esperimenta una gran estabilidá política per aciu del sistema de gobiernu preconizáu pol políticu conservador Antonio Cánovas del Castillo. Básase nel turnu de los partíos Conservador (Cánovas del Castillo) y Lliberal (Sagasta) nel gobiernu. En 1885 morrió Alfonsu XII y encargóse la rexencia a la so viuda María Cristina, hasta la mayoría d'edá del so fíu Alfonsu XIII, nacíu tres la muerte del so pá. La rebelión independentista de Cuba en 1895 afala a los Estaos Xuníos a intervenir na zona y tres el tracamundiáu incidente del españíu del acorazáu Maine el 15 de febreru de 1898 nel puertu de L'Habana, declara la guerra a España. Cola derrota, España perdió les sos últimes colonies (Cuba, Filipines, Guam y Puertu Ricu) n'ultramar.
Sieglu XX
El sieglu XX entama con una gran crisis económica y la sosiguiente inestabilidá política. Hai un paréntesis de prosperidá comercial, afaláu pola neutralidá española na Primer Guerra Mundial. La socesión de crisis gubernamentales, la marcha desfavoratible de la guerra nel Rif, l'axitación social y el descontentu de parte del exército, desembocan nel Güelpe d'Estáu del xeneral Primo de Rivera, el 13 de setiembre de 1923. Afitó una dictadura militar que foi aceptada por gran parte de les fuerces sociales y pol propiu rei Alfonsu XIII.
Na dictadura suprímense llibertaes y drechos. L'abegosa coyuntura económica y el crecimientu de los partíos republicanos fai la situación cada vez más insostentable. En 1930, Primo de Rivera presentó la so dimisión al rei y marchó a París, onde morrió al pocu tiempu. Asocediólu na xefatura del Directoriu´'l xeneral, Dámaso Berenguer; y, dempués, por breve tiempu, l'almirante Aznar. Esti periodu fue nomáu Dictablanda.
Decidíu a buscar un desenguedeyu a la situación política y afitar la Costitución, el rei afala la cellebración d'eleiciones municipales el 12 d'abril de 1931, éstes dieron una rotunda victoria a les candidatures republicano-socialistes nes grandes ciudaes y capitales de provincia, magar el númberu total de conceyales yera mayoritariamente monárquicu. Hubo manifestaciones organizaes desixendo l'afitamientu de la República, lo que lleva al rei a abandonar el país. Una vez que'l rei abandonó les sos obligaciones, proclamóse la II República'l 14 d'abril.
Na República prodúxose una gran axitación política y social, marcada por una acusada radicalización d'izquierdes y dreches. Los líderes moderaos foron boicotiaos y cada parte pretendió crear una España a la so midida. Nos dos primeros años, gobernó una coalición de partíos republicanos y socialistes. Nes eleiciones cellebraes en 1933, trunfaron les dreches y en 1936, les izquierdes. La creciente ola de violencia incluyó quema d'ilesias, la sublevación monárquica de Sanjurjo, la revolución de 1934 y bien d'atentaos escontra líderes políticos rivales.
El 17 de xunetu de 1936 subleváronse les guarniciones del África Española, dando aniciu la Guerra Civil. España quedó dixebrada en dos zones: una baxo l'autoridá del gobiernu republicanu y otra controlada polos sublevaos, na que'l xeneral Francisco Franco foi nomáu Xefe d'Estáu. L'encontu alemán y italianu a los sublevaos, muncho más firme que'l pegoyu de la Xunión Soviética y Méxicu a la España republicana, y los continuos enfrentamientos ente les facciones republicanes, permitieron la victoria de los sublevaos l'1 d'abril de 1939.
La victoria del xeneral Franco supunxo l'afitamientu d'un réxime autoritariu. El desendolcu d'una fuerte represión sobre los vencíos, obligó al exiliu a miles d'españoles y condergó a otros tantos a la muerte o al internamientu en campos de trabayu. Magar que Franco caltuvo al país non belixerante na II Guerra Mundial, el so non disimuláu sofitu a les potencies del Exe afaló a un aisllamientu internacional de calter políticu y económicu. Sicasí, los condicionamientos de la guerra fría ente Estaos Xuníos y la Xunión Soviética y los sos respectivos aliaos fixeron que'l réxime franquista sía toleráu poles potencies "occidentales" y a la fin reconocío por les mesmes finando el so aisllamientu. Robláronse alcuerdos con Estaos Xuníos permitiendo l'asitiamientu de bases militares conxuntes hispano-estaoxunidenses n'España.
En 1956, Marruecos, que fora protectoráu español y francés, adquirió la so independencia y púnxose en marcha un plan d'afitamientu económicu del país. En 1969, Franco nomó a Xuan Carlos de Borbón, nietu d'Alfonsu XIII, príncipe d'España, el so socesor a título de Rei. Magar que'l réxime caltuvo una férrea represión escontra cualesquier oposición política, el desendolcu industrial y económico español resultó mui importante na dictadura.
El dictador morrió'l 20 de payares de 1975. Xuan Carlos I foi proclamáu rei dos díes dempués. Abrióse un periodu conocíu como Transición. Remató col afitamientu d'una Monarquía Parlamentaria en 1978, dempués de la renuncia a los sos drechos históricos realizada por D. Xuan de Borbón, pá del rei. Tres les primeres eleiciones democrátiques, Adolfo Suárez, del partíu Unión de Centru Democráticu (centro-drecha), foi elexíu presidente de Gobiernu. Llevó a cabu importantes reformes polítiques y entamó les negociaciones pa la entrada d'España na Comunidá Económica Europea. Dimitió en 1981. Nesti periodu la banda terrorista vasca ETA cometió un gran númberu d'atentaos, especialmente escontra miembros del exércitu y de les fuerces de seguridá, asina como otros de calter indiscrimináu. Na sesión de votación d'investidura del socesor de Suárez, Leopoldo Calvo-Sotelo (UCD), el 23 de febreru (23-F), tuvo llugar un intentu de güelpe d'Estáu aniciáu por altos mandos militares. El Congresu de Diputaos foi tomáu pol teniente coronel Tejero. L'intentu foi albortáu el mesmu día, teniendo llugar la intervención del rei Xuan Carlos en defensa del orde constitucional. En 1981 roblóse en Bruxeles el protocolu d'aferimientu a la OTAN dando aniciu al procesu d'inxertadura na Alianza que remató na primavera de 1982, demientres el gobiernu d'UCD.
Nes eleiciones siguientes (1982), venció'l Partido Socialista Obrero Español, con Felipe González como presidente de gobiernu. Caltúvose nel poder nes trés siguientes llexislatures. En 1986 España incorporóse a la Comunidá Económica Europea, precursora de la Xunión Europea y esi mesmu añu cellebróse un referéndum nel que se consultó al pueblu sobre la permanencia o non na OTAN. El PSOE defendió'l sí. En 1992 España apaeció de forma llamativa nel escenariu internacional cola cellebración de los Xuegos Olímpicos en Barcelona, la declaración de Madrid como Ciudá Cultural Europea y la cellebración en Sevilla de la Esposición Universal EXPO 92.
Nesti periodu prodúxose una fonda modernización de la economía y la sociedá españoles, caracterizada poles reconversiones industriales y la sostitución del modelu económicu tardofranquista por otro de corte más lliberal -lo qu'afaló a trés importantes fuelgues xenerales-, la xeneralización del pensamientu y los valores contemporáneos a la sociedá española, el desendolcu del estáu de les autonomíes, la tresformación de les Fuerces Armaes y l'enorme desendolcu de les infraestructures civiles. Sicasí, hubo tamién una situación d'eleváu desemplegu y hacia la fin del mesmu prodúxose una importante entrulladura económica, que nun entamó'l so recobramientu hasta 1993 —cuando la tasa de desemplegu amenorgó del 23% al 15%—, y se destapó'l casu GAL de terrorismu d'estáu.
Les eleiciones de 1996 dieron la victoria al Partíu Popular, con José María Aznar como presidente, cargu qu'exerció per dos llexislatures, algamando nes eleiciones xenerales de 2000 la mayoría absoluta que caltuvo hasta 2004, onde'l PSOE declaró vencedor.
Sieglu XXI
El sieglu XXI entamó colos efectos del 11 de setiembre de 2001, que llevaron a España a venceyase en dos conflictos: la ocupación d'Afganistán y la invasión d'Iraq. Esti últimu conflictu y la xestión del atentáu del 11 de marzu de 2004 en Madrid provocaron un distanciamientu ente'l gobiernu y parte de la opinión pública española. Too ello desembocó na eleición d'un nuevu gobiernu del PSOE, tres les eleiciones xenerales cellebraes el 14 de marzu de 2004.
L'euro, moneda oficial na llamada «Zona Euro» d'Europa dende 1999, convirtióse na moneda de cambiu oficial l'1 de xineru de 2002, reemplazando a la peseta. Los ciudadanos entamaron a usalu na vida cotidiana, magar de les protestes pola xuba encubierta de los precios que supunxo esti cambiu de moneda. Ente 1993 y 2007 prodúxose una importante espansión de la economía española, basada fundamentalmente nel sector de la construcción, que quedó acenada poles consecuencies globales de la crisis económica de 2008.
Na fin del sieglu XX España recibió a una gran cantidad d'inmigrantes de países llatinoanoamericanos como Ecuador, Colombia, Arxentina, Bolivia, Perú o República Dominicana, asina como d'estremaes zones d'África, Asia y Europa. El fuerte crecimientu económicu de tipu espansivu que presentó'l país dende 1993 requirió una gran cantidá de mano d'obra. Según anunció'l direutor del Bancu d'España en febreru de 2007, España podría asitiase como la séptima mayor economía del mundu.
El Partíu Socialista Obreru Español ganó les eleiciones cellebraes el 14 de marzu de 2004, convirtiéndose José Luis Rodríguez Zapatero nel quintu presidente del gobiernu de la democracia.
Con Zapatero como Presidente del Gobierno retírense les tropes españoles que permanecíen n'Iraq. Ello ocasionó un considerable enfriamiento de les rellacionies diplomátiques colos Estaos Xuníos. Roblóse la Constitución Europea y realizóse'l referéndum de la Constitución Europea, nel que los ciudadanos españoles aprueben el tratáu. Tamién s'aprobó'l matrimoniu homosexual, ente otres reformes de calter social prometíes nel programa electoral de los socialistes.
El miércoles 22 de marzu de 2006 la organización terrorista ETA anunció'l so segundu altu al fuegu, frayáu'l sábadu 30 d'avientu d'esi mesmu añu col allugamientu d'una furgoneta bomba na recién estrenada Terminal 4 del Aeropuertu de Barajas, atentáu nel que dos persones perdieron la vida.
Les eleiciones del 9 de marzu de 2008 dieron la victoria de nuevo al PSOE y renovaron el gobiernu de José Luis Rodríguez Zapatero. Los socialistes ganaron los comicios con 169 escaños (5 más que nes eleiciones de 2004) frente a los 154 del Partíu Popular (6 más que nes eleiciones de 2004). Los partíos nacionalistes sofrieron un importante descensu, a esceición de CIU que caltuvo los sos 10 diputaos. Izquierda UXunida perdió'l so grupu parlamentariu propiu nel Congresu de los Diputaos, al algamar solo 2 escaños. Les eleiciones de 2008 postiaron y reforzaron el bipartidismu.
Gobiernu y política
España ye una monarquía parlamentaria, con un monarca hereditariu qu´exerce como Xefe d'Estáu —el Rei d'España—, y un parlamentu bicameral, les Cortes Xenerales.
División de poderes
El poder executivu fórmalu un Conseyu de Ministros presidíu pol Presidente del Gobiernu, qu'exerce como Xefe de Gobiernu. Ye'l monarca quien propón al Presidente del Gobiernu tres les eleiciones xenerales y quien lu caltién nel cargu mientres conserve l'enfotu del Congresu de los Diputaos.
El poder llexislativu afítase nes Cortes Xenerales, que son el órganu supremu de representación del pueblu español. Les Cortes Xenerales compónense d´una cámara baxa, el Congresu de los Diputaos, y una cámara alta, el Senáu. El Congresu de los Diputaos cuenta con 350 miembros elexíos por votación popular, en llistes zarraes y per aciu de representación proporcional escoyíos por circuscripciones provinciales, pa servir en llexislatures de cuatro años. El sistema nun ye absolutamente proporcional pola mor de qu´esiste un númberu mínimu d´escaños por circuscripción (3) y se usa un sistema proporcional soncemente correxíú pa favorecer les llistes mayoritaries (el Sistema d'Hondt). El Senáu cunta anguaño con 259 escaños, de los cuales 208 son escoyíos direutamente per aciu del votu popular, por circuscripciones provinciales, en cadaguna de les cuales elíxense 4 senadores, siguiendo un sistema mayoritariu (3 pa la llista mayoritaria, 1 pa la siguiente), esceptu nes islles, Baleares y Canaries (nes que la circuscripción ye la islla) y los otros 51 son designaos polos órganos autonómicos pa servir, tamién, por periodos de cuatro años.
El poder xudicial ta formao pol conxuntu de Xulgaos y Tribunales, integráu por Xueces y Maxistraos, que tienen la potestá d´alministrar xusticia en nome del Rei (víase Poder Xudicial d'España).
Estáu de les Autonomíes
España ye anguaño lo que se noma un "Estáu d´Autonomíes", un estáu formalmente unitariu pero que furrula como una federación descentralizada de comunidaes autónomes, cada una d´elles con estremaos niveles d´autogobiernu. Les diferencies dientro d´esti sistmea débense a que´l procesu de trespasu de competencies del centru a la periferia foi atalantao nun entamu como un procesu asimétricu, que garantizara un mayor grau d´autogobiernu solo a aquelles comunidaes que buscaben una triba de rellación más federalista col restu d´ESpaña –comunidaes autónomes de réxime especial– (Andalucía, Cataluña, Galicia, Navarra y País Vascu). Por otru llau, el restu de comunidaes autónomes –comunidaes autónomas de réxime común– dispondría d´un menor autogobiernu. Sicasí, taba albidrao qu´a midida que foran pasando los años, estas comunidaes foran adquiriendo gradualmente más competencies.
Anguaño, España ta considerada como ún de los países europeos más descentralizaos, ya que tolos sos estremaos territorios alministran de miente llocal los sos sistemas sanitarios y educativos, asina como dalgunos aspectos del presupuestu públicu; dalgunos d´ellos como´l País Vascu y Navarra, además alministran la so financiación pública cuasi ensin cuntar (escepción fecha del cupu) cola supervisión del gobiernu central. Nel casu de Cataluña Navarra y el País Vascu, tán equipaos colos sos propios cuerpos policiales, dafechu operativos y enxebre autónomos que reemplazan les funciones de la Policía Nacional nestos territorios, salvo en Navarra tovía en procesu de trespasu (víase Mossos d'Esquadra, Ertzaintza, y Policía Foral de Navarra).
Defensa
La responsabilidá de la defensa nacional recai nes Fuerces Armaes que tienen asignaes per aciu del artículu octavu de la Costitución Española "la misión de garantizar la soberanía e independencia de España, defender su integridad territorial y el ordenamiento constitucional".
Les Fuerces Armaas Españoles axebráronse tradicionalmente en trés armas: Exércitu de Tierra, Armada y Exército del Aire. A estes armes súmase la Guardia Real, un cuerpu protocolariu esgayáu que realiza llabores fundamentalmente de seguridá.
España forma parte de les naciones más importantes del EUFOR, y del Eurocuerpu, asina mesmu ocupa una posición destacada na estructura de la OTAN, na qu´inxirió en 1982. Además de ser la sexta flota naval más poderosa y poseer el cuerpu d'Infantería de Marina más antiguu del mundu.
Política internacional
España forma parte d'organizaciones globales como les Naciones Xuníes (dende'l 14 d'avientu de 1955), la Organización del Tratáu del Atlánticu Norte (dende´l 30 de mayu de 1982) y la Organización pa l'Andecha y el Desendolcu Económico; continentales como la Xunión Europea (dende´l 1 de xineru de 1986), la Organización pa la Seguridá y la Facendera n´Europa, el tratáu de la Xunión Europea Occidental y de la Axencia Europea de Defensa; y organizaciones que estrechan llazos hestóricos y culturales del vínculu transatlánticu como la Xunión Llatina, la Comunidá Iberoamericana de Naciones, y la ABINIA.
El gobiernu español contribúi a la financiación de la ONU nun 2,52% del so presupuestu añal (2006).
Drechos humanos
Na robla y ratificación de la Convención escontra la Tortura y Otros Tratos o Penes Crueles, Inhumanos o Degradantes (CAT) y na Convención Internacional sobre la Eliminación de toles Formes de Discriminación Racial (CERD), España reconoció la competencia de recibir y procesar comunicaciones individuales por parte del Comité pa la Eliminación de Discriminación Racial perteneciente a la Comisión de Drechos Humanos.
Organización territorial
España ye una nación organizada territorialmente en 17 comunidaes autónomes y 2 ciudaes autónomes. El Títulu VIII de la costitución afita la organización territorial del Estáu en municipios, provincies y comunidaes autónomes, éstes con competencies pa xestionar los sos propios intereses con un ampliu nivel d´autonomía, poderes llexislativos, presupuestarios, alministrativos y executivos nes competencies esclusives que l´Estáu-yos garantiza al traviés de la Costitución de cada Estatutu d´autonomía. Anque Navarra nun se costituyó propiamente en Comunidá Autónoma, siendo una Comunidá Foral, y nun teniendo desenrrollao un Estatutu d´Autonomía, sinon articulando un ameyoramientu de los sos fueros tradicionales, ye considerada comunidá autónoma a tolos efectos, según la interpretación del Tribunal Costitucional.
Cada comunidá autónoma ta formada por una o delles provincies, faciendo un total de 50.
Dende 2003 adoptóse Nomenclatura de les Unidaes Territoriales Estadístiques, o unidaes NUTS, de trés niveles, con fines meramente estadísticos basaos nes normatives europées y fixados pol Eurostat. Les 50 provincies españoles y les dos ciudaes autónomes alcuéntranse clasificaas nos niveles NUTS-3; les 17 comunidaes autónomes alcuéntranse clasificaas nos niveles NUTS-2; y pa los niveles NUTS-1 creyóronse los grupos de comunidaes autónomes.
Reclamaciones territoriales y territorios en disputa
España reclama hestóricamente la retrocesión de la colonia (anguaño Territoriu Británicu d'Ultramar) de Xibraltar, magar amosóse últimamente favoratible a fórmulas de soberanía compartida. La reclamación entamó dende´l momentu en que tropes angloholandeses tomaron la plaza en nome del archiduque Carlos durante la Griesca de Socesión Española (1704), pasando posteriormente a manos britániques per aciu del Tratáu d'Utrecht (1713). La reclamación, que incluyó operaciones militares, foi particularmente intensa durante´l sieglu XVIII, sumió durante´l XIX y primer metada del XX y foi llevada pol gobiernu franquista a Naciones Xuníes durante la década de 1960. Ellí, encuadrada nos procesos descolonizadores, España obtuvo l´encontu a la so postura al reconocer les resoluciones al efectu (2231 y 2353) que´l procesu descolonizador debía respetar el drechu a la integridá territorial d´España y que los intereses, y non los deseyos de los xibraltareños, debíen ser respetaos (Víase Hestoria de Xibraltar). España nun reconoz, sicasí, la soberanía británica sobre l´istmu qu´amece´l continente col peñón..
Otramiente, Portugal nun reconoz la soberanía española sobre la fastera, na provincia de Badajoz, d'Olivenza, qu´inclúi los municipios d´Olivenza y Táliga (magar nun reclama activamente la so soberanía), cedida por Portugal a España per aciu del tratáu de Badajoz (1801). Les resoluciones del Congresu de Viena son interpretaes de forma diverxente por entrambos países. Mientres Portugal camienta qu´aquelles obligaben a España a devolver Olivenza, España cuida que se trata d´una cenciella declaración de bonos deseyos, ensinn capacidá resolutiva, razón pola qu´Olivenza siguió amecida a España. A la fin, España nun reconoz les pretensiones de soberanía de Portugal sobre les islles Xabaces.
Tamién la soberanía sobre´l deshabitáu isllte de Perejil alcuéntrase disputada con Marruecos. Anque desaloxada tres l´incidente de la islla Perejil (2002), por alcuerdu ente entrambos países nun s´alcuentra asitiada ellí denguna fuerza militar o policial, ensin que denguna de les partes tenga renunciao a les sos pretensiones de soberanía. Otramiente, Marruecos reclama informalmente la cesión de los territorios de Ceuta y Melilla, asina como les denominaes places de soberanía nel continente africanu. Dalgunos movimientos irredentistes en Marruecos, como´l partíu Istiqlal, reclaman l´inxerimientu nel nomáu "Gran Marruecos" de les islles Canaries.
Independentismu
Esisten n´España estremaos movimientos polítocos de signu independentista, venceyaos a nacionalismos periféricos, como por exemplu´l vascu, el gallegu o´l catalán, que reclaman la independencia de España de los territorios nos que son activos. Estos movimientos danse cimeramente en Cataluña, Galicia, Navarra y el País Vascu, onde esisten partíos esplícitamente independentistas como la Unión do Povo Galego, Esquerra Republicana de Catalunya, Aralar o EA, asina como los seguidores de la llamada izquierda abertzale que nun se desvenceyan d´ETA (la so postrera denominación formal ye Batasuna, partíu ilegalizáu n´España pero llegal en Francia). Outramiente, partíos como´l BNG, PNV y CiU oscilen ente postures autonomistes y abiertamente independentistes. Amás esisten otros nacionalismos de menor influencia como'l castellán y l'andaluz y partíus políticos que los refrenden como'l PCAS y *EULV-CA (IULV-CA).
Xeografía
Asitiada n'Europa Occidental, ocupa la mayor parte de la península Ibérica y, fuera d'ella, dos archipiélagos (el de les islles Canaries nel océanu Atlánticu y el de les islles Baleares nel mar Mediterraneu) y dos ciudaes, Ceuta y Melilla, nel norte d'África.
Además, tien posesiones menores non continentales como les islles Chafarines, el peñón de Vélez de la Gomera y el peñón d'Alhucemes, toos frente a la costa africana. La islla d'Alborán, les islles Columbretes y una serie d'islles y isllotes alcuéntranse frente a les costes peninsulares.
N´estensión territorial ye´l cuartu país d'Europa, por detrás de Rusia (que ye'l mayor, inclusive teniendo en cuenta solo´l territorio conteníu n´Europa, ver cita 10), Ucrania y Francia, y el segundu de la Xunión Europea.
Les llendes físiques d´España son les siguientes: al oeste, Portugal y l'océanu Atlánticu; el mar Mediterraneu al este; l'estrechu de Xibraltar, océanu Atlánticu y mar Mediterraneu al sur; y los Pirineos, xunto col golfu de Vizcaya y el mar Cantábricu al norte.
Clima
España tien un clima mui estremao a lo llargo de tol so territoriu. Predomina el calter mediterraneu en cuasi tola so xeografía. Les costes del sur y mediterráneas tienen un clima nomáu mediterraneu de costa que tamién tien el Valle del Guadalquivir: temperatures suaves, precipitaciones abondantes cuasi tol añu exceptu en branu.
A midida que nos adentramos nel interior el clima ye más estremu, alcontrámonos col clima mediterraneu continental, qu´abarca cuasi tola Península, temperatures baxes n´iviernu, altes en branu y precipitaciones irregulares (dependiendo de la posición xeográfica). Polo xeneral, les comunidaes occidentales reciben más precipitaciones que les orientales. Asina pues, Galicia y el Cantábrico tienen un clima oceánicu, caracterizáu pola abondancia de precipitaciones durante tol añu, especialmente n´iviernu, y unes temperatures fresques.
El clima de montaña puede observase n´altitudes altes, Cordillera Cantábrica, Pirineos, altos puntos de la C. Ibérica, Sistema Central y Cordilleras Béticas, asina como n´altitudes altes en Canaries, onde se dan temperatures baxes (iviernos fríos o mui fríos) y precipitaciones xeneralmente abondantes.
Los climas áridos o semiáridos (menos de 300 mm añales) alcontrámoslos en ciertos puntos peninsulares del este: Almería (afamáu´l desierto de Tabernas) o´l Cabu de Gata (onde se rexistran menos de 200 mm añales), Granada (Guadix), Murcia, Alicante y Valle del Ebru onde l´efectu foehn ye´l principal causante de tan baxes precipitaciones.
El calter sotropical ye característicu de les Islles Canaries, con unes temperatures calecíes durante tol añu y poques precipitaciones (más abondantes nes islles occidentales). Sicasí, esti clima tamién se da nes costes sureñes de la península (Málaga, Granada, Almería), onde tienen temperatures relativamente amoroses durante tol añu, anque les precipitaciones son dalgo más abondantes qu´en Canaries.
Sistemas montañosos
El relieve d'España caracterízase por ser eleváu abondo, con una altitú media de 660 metros, y montañoso si se compara col restu de países d´Europa, con escepción de Suiza, Austria y los microestaos d´Andorra y Liechtenstein, cuya altitú promediu ye mayor abondo. Na España peninsular, el relieve articúlase alreor d´un gran Tesu Central qu´ocupa la mayor parte del centru de la Península Ibérica y que tien una altitú media de 660 metros. Fuera de la meseta, ta la depresión del ríu Guadalquivir, asitiada nel suroeste de la península, y la del ríu Ebru, nel noreste de la mesma. Los cimeros sistemas montañosos son: Pirineos, sistema Ibéricu, cordal Cantábrica, sistema Central y cordales Bétiques (Sobética y Penibética)
Demografía
España tenía 47.190.493 habitantes en xineru de 2011. La densidá de población, de 93,49 hab/km², ye menor que la de la mayoría d´otros países d´Europa Occidental y la so distribución a lo llargu del territoriu ye mui irregular: les zones más densamente poblaes concéntranse na costa y alreor de Madrid, mientres que´l restu del interior s´alcuentra mui soncemente ocupáu.
Árees metropolitanes
L'aniciu d'entidaes alministratives qu´agrupen a los municipios que costitúin un área metropolitana ta nes manes de les comunidaes autónomes. Hasta´l momentu, nun esiste denguna área metropolitana regulada por un órganu alministrativu. Asina, por exemplu, l´Área Metropolitana de Barcelona foi suprimida en 1987 pola Xeneralidá de Cataluña. Dalgunes árees metropolitanes coinciden, sicasí, con comarques, cuya regulación ta tamién en manes de les comunidaes autónomes.
Asina ya too, según estudios non oficiales, les árees metropolitanes en sentíu demográficu que sobrepasaben en 2006 los 500.000 habitantes son les siguientes:
- Área metropolitana de Madrid (5.883.521 habitantes)
- Área metropolitana de Barcelona (3.150.380 habitantes)
- Área metropolitana de València (1.810.663 habitantes)
- Área metropolitana de Sevilla (1.438.451 habitantes)
- Área metropolitana de Málaga (965.371 habitantes)
- Área metropolitana de Bilbao (949.939 habitantes)
- Área metropolitana central d'Asturies (857.495 habitantes)
- Área metropolitana de Alacant-Elx (725.395 habitantes)
- Área metropolitana de Zaragoza (688.643 habitantes)
- Área metropolitana de Vigo (659.632 habitantes)
- Área metropolitana de Granada (650.661 habitantes)
- Área metropolitana de la Bahía de Cádiz (621.712 habitantes)
- Área metropolitana de Las Palmas de Gran Canaria (618.496 habitantes)
- Área metropolitana de Murcia (576.383 habitantes)
Demografía
46.063.511 habitantes en 2008, según el Institutu Nacional d'Estadística (INE), distribuyíos per Comunidaes Autónomes según la siguiente tabla:
| Comunidaes Autónomes | Habitantes 2003 | Habitantes 2007 | Var |
|---|---|---|---|
| Andalucía | 7.340.052 | 8.039.399 | 
|
| Aragón | 1.189.909 | 1.295.215 |
|
| Principáu d'Asturies | 1.076.567 | 1.074.632 | 
|
| Islles Baleares | 845.630 | 1.029.139 |
|
| Canaries | 1.716.276 | 2.020.947 |
|
| Cantabria | 531.159 | 572.503 |
|
| Castiella-La Mancha | 1.734.261 | 1.975.179 |
|
| Castiella y Llión | 2.479.118 | 2.525.157 |
|
| Cataluña | 6.261.999 | 7.197.174 |
|
| Comunidá Valenciana | 4.120.729 | 4.874.811 |
|
| Estremadura | 1.069.420 | 1.088.728 |
|
| Galicia | 2.731.900 | 2.771.341 |
|
| Comunidá de Madrid | 5.205.408 | 6.061.680 |
|
| Rexón de Murcia | 1.149.329 | 1.391.147 |
|
| Comunidá Foral de Navarra | 543.757 | 605.022 |
|
| País Vascu | 2.098.596 | 2.141.116 |
|
| La Rioxa | 264.178 | 308.566 |
|
| Ceuta | 75.241 | 76.343 |
|
| Melilla | 66.263 | 68.795 |
|
Referencies
- ↑ «Constitución española de 1978» (en castellanu). Boletín Oficial del Estáu.
- ↑ URL de la referencia: http://mtcr.info/partners/. Data de consulta: 4 avientu 2017.
- ↑ URL de la referencia: https://www.interpol.int/Member-countries/World. Editorial: Interpol. Data de consulta: 7 avientu 2017.
- ↑ URL de la referencia: http://www.nuclearsuppliersgroup.org/en/participants1. Editorial: Grupu d'abastecedores nucleares. Data de consulta: 7 avientu 2017.
- ↑ URL de la referencia: https://www.opcw.org/about-opcw/member-states/. Editorial: Organización pa la Prohibición d'Armes Químiques. Data de consulta: 7 avientu 2017.
- ↑ URL de la referencia: http://eatc-mil.com/8/About-us. Data de consulta: 8 avientu 2017.
- ↑ URL de la referencia: http://mcce-mil.com/wp-content/uploads/glance/MCCE-AT-A-Glance-September-2017.pdf. Editorial: Centro de Coordinación de Movimientos Europeos. Data de consulta: 8 avientu 2017.
- ↑ URL de la referencia: http://www.occar.int/185. Editorial: Organización para la Cooperación Conjunta en Materia de Armamento. Data de consulta: 8 avientu 2017.
- ↑ URL de la referencia: https://www.iho.int/srv1/index.php?option=com_wrapper&view=wrapper&Itemid=452&lang=en. Editorial: Organización Hidrográfica Internacional. Data de consulta: 8 avientu 2017.
- ↑ URL de la referencia: https://www.iea.org/countries/membercountries/. Editorial: Axencia Internacional de la Enerxía. Data de consulta: 8 avientu 2017.
- ↑ URL de la referencia: http://www.unesco.org/eri/cp/ListeMS_Indicators.asp.
- ↑ URL de la referencia: http://www.upu.int/en/the-upu/member-countries.html. Data de consulta: 4 mayu 2019.
- ↑ URL de la referencia: https://www.itu.int/online/mm/scripts/gensel8. Data de consulta: 4 mayu 2019.
- ↑ URL de la referencia: https://www.touteleurope.eu/les-pays-membres-de-l-espace-schengen.html.
- ↑ URL de la referencia: https://www.dhs.gov/visa-waiver-program-requirements. Data de consulta: 7 marzu 2020.
- ↑ URL de la referencia: https://public.wmo.int/en/members/spain. Data de consulta: 26 mayu 2020.
- ↑ URL de la referencia: https://www.who.int/choice/demography/by_country/en/. Data de consulta: 21 xunetu 2020.
- ↑ URL de la referencia: https://www.wcoomd.org/-/media/wco/public/global/pdf/about-us/wco-members/list-of-members-with-membership-date.pdf. Data de consulta: 16 marzu 2024. Páxina: 5. Supports qualifier: data de principiu.
- ↑ URL de la referencia: https://holocaustremembrance.com/countries/spain. Data de consulta: 17 marzu 2024. Tipo de referencia: official member page. Supports qualifier: data de principiu.
- ↑ Aplícase a esta parte: masculín singular.
- ↑ Aplícase a esta parte: femenín singular.
- ↑ Cartafueyos Normativos. Nomes de los países del mundu y de les sos capitales y xentilicios, Academia de la Llingua Asturiana, 2010; ISBN 987-84-8168-500-8
Wikimedia Commons tien conteníu multimedia tocante a España.
Países de la Xunión Europea | ||
|---|---|---|
 | ||
| Estaos | Albania · Alemaña · Andorra · Austria · Bielorrusia · Bélxica · Bosnia y Herzegovina · Bulgaria · Chequia · Croacia · Dinamarca · Eslovaquia · Eslovenia · España · Estonia · Finlandia · Francia · Grecia · Hungría · Irlanda · Islandia · Italia · Letonia · Liechtenstein · Lituania · Luxemburgu · Macedonia del Norte · Malta · Moldavia · Mónacu · Montenegru · Noruega · Países Baxos · Polonia · Portugal · Reinu Xuníu · Rumanía · Rusia · San Marín · Serbia · Suecia · Suiza · Turquía · Ucraína · Vaticanu · Xeorxa · Xipre |  |
|---|---|---|
| Dependencies | ||
| Rexón autónoma | ||
| Países con status discutíu | ||