Cristóbalo Colón

De Uiquipedia
(Redirixío dende Cristóbal Colón)
Saltar a: navegación, buscar
Uiquipedia:Llista d'artículos que toa Wikipedia tien que tener
Uiquipedia:Llista d'artículos que toa Wikipedia tien que tener
Cristóbal Colón

Cristóbal Colón (1451- 20 de mayu de 1506). Marineru posiblemente ñacíu en Xénova (anque dellos hestoriadores dicen que yera del Reinu d'Aragón, el Reinu de Galicia o'l Reinu de Portugal ente otros) que, al serviciu de la corona del Reinu de Castiella, alcontró una ruta segura -dende occidente- a América pa España (hasta entós desconocida o non documentada) el 12 d'ochobre de 1492.

La hestoria más espardida del viaxe ye la de que Cristóbal Colón taba convencíu d'algamar les costes del llonxanu oriente (les Indies) viaxando a la escontra, pal oeste, y que yera posible facer el viaxe pela mar con posibilidaes d'ésitu. Daquella namás que se conocía esi camín arrodiando África, y esa yera una vía embaxo'l control de Portugal, que nun dexaba pasar a naves que nun foren propies. La forma redonda de la Tierra yera bien conocida na dómina, anque polo visto la teoría de Colón al rodiu de que pudiera facese'l viaxe basábase en cálculos fallíos al rodiu'l tamañu del planeta, qu'indicaben que yera más pequeña de lo qu'en realidá ye.

Otres teoríes dicen que Colón tuviere conocencia d'un continente nuevu por lleendes escuchaes en países nórdicos, escomencipiando la tarea de topalu pa la so conquista.

Lo que ye seguru ye que Colón amás de topar el nuevu continente, tornó a Europa y llueu a América hasta cuatro vegaes, faciendo una serie de viaxes periódicos con seguridá dende Europa hasta América, ensin saber nunca que los viaxes taben faciéndose a un continente nuevu, y non a unu vieyu. Anque se conoz que los Viquingos llegaren a América al rodiu del sieglu XI, ye de magar los viaxes de Colón y otros exploradores que lu socedieren cuando s'establecieron venceyes permanentes, reclamando pa sí les potencies imperiales europees el territoriu americanu. Amás entamóse l'intercambiu ente dambos continentes de productos como la pataca, el tomate, el maíz y d'animales como los caballos.

Nel so primer viaxe topó la islla de San Salvador (o Guanahani como yera nomada polos ñativos) depués de dos meses de travesía, visitando depués Cuba y La Española. Volvió a España siete meses depués de cuando marchara. Nel so viaxe cabero namás que tardó un mes y cuatro díes en dar coles costes d'América.

Los llogros de Cristobal Colón nesa dómina compárense a los viaxes a la Lluna fechos nel sieglu XX.

La República de Colombia tien el so nome n'homenaxe a Colón.