África

De Wikipedia
Wikipedia:Wikipedia:Llista d'artículos que toa Wikipedia tien que tener/Archivu
África
Africa satellite orthographic.jpg
Situación
Africa (orthographic projection).svg
Tipu continente
Parte de Ostfeste (es) Traducir
Coordenaes 21°05′38″N 7°11′17″E / 21.09375°N 7.1881°E / 21.09375; 7.1881Coordenaes: 21°05′38″N 7°11′17″E / 21.09375°N 7.1881°E / 21.09375; 7.1881
África alcuéntrase en Tierra
África
África
África (Tierra)
Datos
Puntu más altu Kibo (es) Traducir
Superficie 30 271 000 km²
Población 1 200 000 000, 1 100 000 000[1], 200 000 000 y 1 275 920 972
Fusu horariu UTC−01:00, UTC±00:00, UTC+01:00, UTC+02:00, UTC+03:00 y UTC+04:00
Cambiar los datos en Wikidata

África ye un continente, el segundu mayor y más pobláu, tres d'Asia en dambos casos, del planeta. Ocupa, con una estensión d'alredor de 30,3 millones de km2 (incluyíes les islles axacentes), el 6% de la superficie total del planeta, y un 20% de la so área terrestre[2]. Vivíen nelli, en 2021, 1.400 millones de persones, un 18% de la población mundial[3]. La so población ye la más xoven d'ente la de tolos continentes[4][5], con una mediana d'edá, en 2012, de 19,7 años, cuando la mundial yera de 30,4 años[6]. Pesie a la so bayura de recursos naturales, el continente ye'l más probe per cápita y el segundu, tres d'Oceanía, con menor riqueza total. Ente les causes d'esta situación los investigadores tienen citao, ente más otres, la xeografía, el clima, el tribalismu[7], el colonialismu, la Guerra Fría[8], el neocolonialismu, la falta de democracia y la corrupción[7].

El continente ta arrodiáu pol mar Mediterraneu al norte, l'ismu de Suez y el mar Roxu al noreste, l'océanu Índicu al sureste y l'océanu Atlánticu al oeste. El continente inclúi la islla de Madagascar y dellos otros archipiélagos de menor estensión, y organízase políticamente en 54 estaos soberanos, ocho territorios y dos estaos independientes de facto pero con reconocencia internacional nula o llimitada. El país más grande ye Arxelia, y el más pobláu Nixeria. La institución supranacional de cooperación del continente ye la Xunión Africana, que tien la so sede n'Adis Abeba.

África ye trevesada pol ecuador, y tamién pol meridianu cero, y estiéndese por delles zones climátiques estremaes. La fastera central estiéndese ente los trópicos, pero los sos estremos septentrional y meridional, respeutivamente, tienen clima templáu. Esta diversidá climática favorez que tenga una gran biodiversidá, pero la so fauna ta sometida a un gran númberu d'amenaces, derivaes de la desertificación, la deforestación, la escasez d'agua y la contaminación, una serie de problemes que han empeorar por culpa'l calentamientu global. El Grupu Intergubernamental d'Espertos sobre el Cambéu Climáticu de les Naciones Xuníes considera qu'África ye'l continente más vulnerable al cambéu climáticu[9][10].

África, especialmente l'África oriental, ye considerada'l llugar d'orixe de la Humanidá. La presencia de los primeros homínidos remóntase nel tiempu unos siete millones d'años, nuna llínia temporal qu'entama col Sahelanthropus tchadensis y sigue colos Australophitecus africanus y afarensis, l'Homo erectus y lHomo habilis hasta llegar al Homo ergaster. Los restos más antiguos del ser humanu modernu, lHomo sapiens, atopáronse n'Etiopía, África del Sur y Marruecos, y tienen una antigüedá respeutiva de 233.000, 259.000 y 300.000 años[11][12]. Los antropólogos consideren, amás, que'l fechu de ser el continente que más tiempu lleva habitáu fae que seya'l xenéticamente más diversu[13][14][15].

Delles de les primeres civilizaciones humanes, como l'Exiptu Antiguu y Cartago, desarrolláronse n'África del Norte. El continente, tres d'una llarga y complexa historia, na que se socedieron civilizaciones, migraciones ya intercambios comerciales, ye'l llar de gran variedá d'etnies, cultures ya llingües. Los caberos 400 años la influyencia europea tien sío perimportante na historia del continente. Los contactos comerciales entamaron nel sieglu XVI, y de resultes del comerciu d'esclavos, hebo una importante diáspora de población d'orixe africanu a América. Desde finales del sieglu XIX les naciones europees colonizaron cuasi tol continente, habiendo un momentu nel qu'Etiopía y Liberia yeren los únicos estaos independientes d'elli[16]. El procesu descolonizador entamáu tres del final de la Segunda Guerra Mundial dio la so forma actual a la mayoría de los actuales estaos del continente.

Etimoloxía[editar | editar la fonte]

Afri yera una pallabra llatina usada pa referise a los habitantes de la fastera del norte d'África conocida polos romanos naquella dómina, la asitiada al oeste del ríu Nilu, y en sentíu ampliu facía referencia a toes les tierres allugaes al sur del Mediterraneu[17].[18] El nome parez que facía referencia orixinariamente a una tribu libia, l'antecesora de los actuales bereberes. Pensábase que'l términu facía referencia a la pallabra fenicia afar, que significaba "polvu"[19], pero una hipótesis ellaborada en 1981[20] afirma que'l so orixe ta na pallabra bereber ifri (en plural ifran), que significa "cueva", usada pa denomar a xente que vivía en cueves[21]. La mesma pallabra[21] puede atopase nel nome de los Banu Ifran d'Arxelia y Tripolitania, una tribu bereber orixinaria de Yafran (o Ifrane)[22], y tamién na ciudá marroquina d'Ifrán.

Nel Imperiu romanu Cartago convirtiose, tres de la derrota de los cartaxineses tres la Tercer Guerra Púnica en 146 e.C., na capital de la provincia nomada entonces Africa Proconsularis, que comprendía la fastera costera de l'actual Libia[23]. El sufixu llatinu -ica usábase a veces pa referise al territoriu ocupáu por un pueblu (p.ex., Asturica, la tierra de los astures). Nel Imperiu bizantín el territoriu yera nomáu Exarchatus Africae, y cuando los musulmanes conquistáronlu caltuvieron, nel nome que-y dieron, una forma d'esi nome romanu: Ifriqiya.

Los romanos nomaben África a les tierres asitiaes al oeste d'Exiptu, y "Asia" a Anatolia y les tierres asitiaes más al este. Toloméu (85-165) definió claramente la separación ente los dos continentes, indicando qu'Alexandría marcaba'l meridianu cero y que la frontera ente Asia y África marcábenla l'ismu de Suez y el mar Roxu. Cuando, nos sieglos vinientes, los europeos foron esplorando'l continente por completu, el nome foi aplicáu al conxuntu.

Hebo otres hipótesis etimolóxiques sobre l'orixe del nome "África":

  • L'historiador xudíu del sieglu I Flaviu Xosefu (Ant. 1.15) afirmó que'l territoriu foi nomáu asina por Efraím, ñetu d'Abrahán según el llibru del Xénesis (Gen. 25:4), una y bones los sos descendientes invadieran Libia.
  • Isidoru de Sevilla, autor del sieglu VII, suxer, nes sos Etimoloxíes (XIV.5.2), que "África vien de la pallabra llatina aprica, que significa «soleyeru»".
  • Massey, en 1881, defendió qu'África deriva de la pallabra exipcia af-rui-ka, que quier dicir "volvese hacia l'apertura del Ka". El Ka ye'l doble enerxéticu de cada persona, y la "apertura del Ka" fae referencia a una tumba o al llugar de nacencia. África sedría, pa los exipcios, el so llugar de nacencia[24].
  • Michèle Fruyt propunxo, en 1976, que taba rellacionáu cola pallabra llatina africus, "vientu del sur", que sedría d'orixe umbru y significaría orixinalmente "vientu de lluvia"[25].
  • Robert R. Stieglitz, de la Universidá de Rutgers, afirmó en 1984 que: "El nome África, deriváu del llatín aphir-ic-a, ye análogu a la pallabra hebrea ophir («ricu»)[26].
  • Ibn Khallikan y otros historiadores, nel sieglu XIII, afirmaron que'l nome fae referencia a un rei del reinu d'Himyar nomáu Afrikin ibn Kais ibn Saifi y conocíu como "Afrikus, fíu d'Abraham", que foi quien conquistó les tierres bizantines del norte d'África que sedríen dempués Ifriqiya[27][28][29].

Historia[editar | editar la fonte]

Prehistoria[editar | editar la fonte]

Lucy, un esqueletu d'Australopithecus afarensis descubiertu'l 21 de payares de 1974 nel valle d'Awash, na depresión d'Afar (Etiopía).

África ye considerada, pola mayoría de los paleoantropólogos, como'l continente de población más antigua de la Tierra, aquelli nel que orixináronse les especies humanes. Dende mediaos del sieglu XX los antropólogos descubrieron munchos fósiles, y evidencia d'ocupación humana, d'hasta 7 millones d'años d'antigüedá. Los restos fósiles de delles especies de primates qu'evolucionaron pa dar llugar al home modernu nel continente remóntense, acordies cola datación radiométrica realizada, a: 3,9–3 millones de años los d'Australopithecus afarensis[30]; a 2,3–1,4 millones d'años los de Paranthropus boisei[31]; y a 1,9–0,6 millones d'años los d'Homo ergaster[32].

Tres de la evolución, desarrollada n'África, del Homo sapiens ente el 350.000 y el 260.000 BP[33][34][35][36], el continente tuvo pobláu principalmente por grupos de cazadores-recolectores[37][38]. Estos primeros humanos modernos colaron d'África, poblando'l restu del mundu, demientres una migración qu'entamó alredor del 50.000 BP. Nella los humanos abandonaron el continente al traviés o del estrechu de Bab-el-Mandeb (sobre'l mar Roxu)[39][40], o del de Xibraltar[41][42] o del ismu de Suez[43]. Datáronse tamién, nesa dómina, otres migraciones dientro'l continente, habiendo evidencias d'asentamientos humanos tempranos n'África del Sur y del Suroeste, África del Norte y El Sáḥara[44].

L'aparición de la civilización[editar | editar la fonte]

El tamañu d'El Sáḥara tien sío, históricamente, pervariable, con grandes variaciones nel so tamañu, llegando inclusu a desapaecer, en rellación coles condiciones climáticas globales[45]. Al final del periodu de les glaciaciones, alredor del 10.500 eC, El Sáḥara yera un gran valle fértil, pobláu por xentes que llegaron del África subsaḥariana. Estes poblaciones, de les qu'hai evidencia de la so presencia en grupos grandes en Tassili n'Ajjer (Arxelia) hace unos 10.000 años, dexaron amuesa de pintures rupestres que representen paisaxes con abondante vexetación[46]. Por embargu, el calecimientu del clima, y la seca que traxo apareyada, ficieron que pal 5000 eC la rexón fora siendo cada vegada más seca y hostil al poblamientu humanu. Alredor de 3.500 eC, per aciu d'una inclinación de la órbita terrestre, El Sáḥara esperimentó un procesu de desertificación aceleráu[47]. La población coló de la zona, emigrando hacia'l valle del Nilu inferior (al norte de la Segunda Catarata), aú formaron asentamientos permanentes o semipermanentes. Hebo posteriormente una gran recesión climática, qu'amenorgó la cantidá de lluvia nel África central y oriental. De magar, el clima secu ye'l dominante nel África oriental y, de forma creciente demientres los 200 caberos años, n'Etiopía.

Examplu d'arte rupestre d'El Sáḥara en Fezán (Libia).

Parez que la domesticación del ganáu asocedió primero que'l desarrollu de l'agricultura, y coesistió coles cultures de cazadores-recolectores. Tiense especulao que la domesticación del ganáu asocedió nel norte d'África, na rexón saḥariana y del Nilu, alredor de 6.000 eC[48]; domesticáronse, ente más otres especies, el burru y una pequeña cabra de cuernu roscáu de la que se conserven restos abondantes dende Arxelia hasta Nubia. La cerámica, pela so banda, aparez de forma independiente na rexón de Malí, na sabana del África occidental[49][50].

No que cinca a l'agricultura, parez que, nes estepes y sabanes d'El Sáḥara ya'l Sahel, na fastera norte del África occidental, pueblos antecedentes de les actuales cultures Mandé y Nilusahariana entamaron a pañar miyu xabaz[51] ente'l 8.000 y el 6.000 eC. Más sero, collecháronse tamién calabaces, melonares d'agua, ricín y algodón[52]. El sorgu domesticose por primer vegada nel Sudán oriental alredor del 4000 eC, no que ye una de les más antigües evidencias de agricultura na hestoria de la Humanidá. Esti cultivu foi espardiéndose de magar per toa África, anantes de difundise a la India alredor del 2.000 eC[53].

Nesta fastera del África occidental foron surdiendo asentamientos construyíos en piedra, como'l d'Oualata, nos que hai restos de cerámica y de sorgu. Hai, tamién, evidencia de pesca, nos numberosos ríos y llagos formaos de resultes del aumentu de les lluvies[54], con arpones fechos con güesos d'animal. Esti aumentu de las lluvias fizo, tamién, aumentar la estensión de la viesca húmeda y la sabana arbolada dende Senegal a Camerún. Ente 9.000 y 5.000 eC los pueblos de llingües nixerocongoleses domesticaron la palmera aceitera y otres del xéneru Raphia, amás de dellos tipos de fabes (carilla, vigna), ocra y nueces de cola. Pa poder llimpiar la viesca y pañar estes plantes, que crecíen nella, los pueblos citaos inventaron hachos de piedra pulimentada[55].

Datos[editar | editar la fonte]

  • Estensión: 30.170.427 km²
  • Población: Non menos de 900.000.000 millones d'habitantes
  • Densidá: 23,94 hab/km²

Economía[editar | editar la fonte]

Na so condición d'ex-colonies, los más de los países africanos caltienen estreches rellaciones económiques cola Xunión Europea (XE). Creóse una organización supranacional al estilu de la XE que se noma Xunión Africana.

Xeografía humana[editar | editar la fonte]

África ye'l trubiecu de la humanidá y d'ellí remanecen toles especies de seres humanos que s'espardieron pel restu de continentes.

Llingües[editar | editar la fonte]

Los idiomes oficiales son l'inglés, el francés, l'árabe y el portugués en más d'un país. Los idiomes africanos namái tán reconocíos n'Etiopía (l'amháricu), el somalín en Somalia, el suaḥili en Kenia y Tanzania, el setswana en Botsuana, el malgaxe na República de Madagascar, y media docena d'idiomes na República Sudafricana.

Relixón[editar | editar la fonte]

La mayor parte del continente profesaba l'animismu, anguaño en retrocesu frente al islam, que ye mayoritariu nel norte, mentantu que'l cristianismu lo ye nel sur d'El Sáḥara, con una minoría del xudaísmu y el cristianismu (catolicismu y protestantismu).


África
Angola | Arxelia | Benín | Botsuana | Burkina Fasu | Burundi | Cabu Verde | Camerún | República Centroafricana | Chad | Comores | El Congu | República Democrática d'El Congu | Costa de Marfil | Eritrea | Etiopía | Exiptu | Gabón | Gambia | Ghana | Guinea | Guinea-Bisáu | Guinea Ecuatorial | Kenia | Lesothu | Liberia | Libia | Madagascar | Malaui | Malí | Marruecos | Mauriciu | Mauritania | Mozambique | Namibia | Níxer | Nixeria | Ruanda | Santu Tomé y Príncipe | Seixeles | Senegal | Sierra Lleona | Somalia | Suazilandia | Sudáfrica | Sudán | Sudán del Sur | Tanzania | Togu | Tunicia | Uganda | Xibuti | Zambia | Zimbabue

Dependencies: Islles Kerguelen | Mayotte | Reunión | El Sáḥara Occidental | Socotra | Tromelin

Referencies[editar | editar la fonte]

  1. URL de la referencia: http://www.prb.org/pdf13/2013-WPDS-infographic_MED.pdf.
  2. Sayre, April Pulley (1999), Africa, Twenty-First Century Books. ISBN 0-7613-1367-2.
  3. World Population Prospects 2022: Demographic indicators by region, subregion and country, annually for 1950-2100. United Nations Department of Economic and Social Affairs, Population Division.
  4. Swanson, Ana (17 August 2015). 5 ways the world will look dramatically different in 2100. https://www.washingtonpost.com/news/wonk/wp/2015/08/17/5-ways-the-world-will-look-dramatically-different-in-2100/. Consultáu 'l 26 September 2017. 
  5. Harry, Njideka U. (11 September 2013). «African Youth, Innovation and the Changing Society». Huffington Post. http://www.huffingtonpost.com/njideka-u-harry/african-youth-innovation-_b_3904408.html. Consultáu 'l 27 September 2013. 
  6. Janneh, Abdoulie (April 2012). «item,4 of the provisional agenda – General debate on national experience in population matters: adolescents and youth». United Nations Economic Commission for Africa.
  7. 7,0 7,1 Collier, Paul; Gunning, Jan Willem. "Why Has Africa Grown Slowly?". Journal of Economic Perspectives. 1999;13(3):3–22. doi:10.1257/jep.13.3.
  8. Fwatshak, SU, "The Cold War and the Emergence of Economic Divergences: Africa and Asia Compared", en Contemporary Africa. Springer, 2014, pp. 89-125. doi:10.1057/9781137444134_5. ISBN 978-1-349-49413-2.
  9. (2007) Parry, M.L.: Chapter 19: Assessing Key Vulnerabilities and the Risk from Climate Change. ISBN 978-0-521-88010-7.
  10. Niang, I., O.C. Ruppel, M.A. Abdrabo, A. Essel, C. Lennard, J. Padgham, and P. Urquhart, 2014: Africa. In: Climate Change 2014: Impacts, Adaptation, and Vulnerability. Part B: Regional Aspects. Contribution of Working Group II to the Fifth Assessment Report of the Intergovernmental Panel on Climate Change [Barros, V.R., C.B. Field, D.J. Dokken et al. (eds.)]. Cambridge University Press, Cambridge, United Kingdom and New York, NY, USA, pp. 1199–1265. https://www.ipcc.ch/site/assets/uploads/2018/02/WGIIAR5-Chap22_FINAL.pdf Archived 2020-06-19 at the Wayback Machine
  11. Schlebusch CM; Malmström H; Günther T; Sjödin P; Coutinho A; Edlund H; et al. "Southern African ancient genomes estimate modern human divergence to 350,000 to 260,000 years ago". Science. 2017;358(6363):652–655. doi:10.1126/science.aao6266. PMID 28971970.
  12. Vidal CM.; Lane CS.; Asfawrossen A; et al. "Age of the oldest known Homo sapiens from eastern Africa". Nature. 2022;601 (7894): 579–583. doi:10.1038/s41586-021-04275-8. PMC 8791829. PMID 35022610.
  13. «The genetic diversity in Africa is greater than in any other region in the world» (19 July 2018).
  14. «New study confirms that Africans are the most genetically diverse people on Earth. And it claims to pinpoint our center of origin.».
  15. «Africa is most genetically diverse continent, DNA study shows» (9 June 2009).
  16. El Gobiernu Xuníu Egba, una entidá de gobiernu de la etnia Egba, foi llegalmente reconocida polos británicos como independiente hasta que foi incorporada a la Colonia y Protectoráu de Nixeria en 1914. «From Crime to Coercion: Policing Dissent in Abeokuta, Nigeria, 1900–1940». The Journal of Imperial and Commonwealth History 47 (3):  páxs. 474–489. 4 May 2019. doi:10.1080/03086534.2019.1576833. ISSN 0308-6534. https://www.tandfonline.com/doi/abs/10.1080/03086534.2019.1576833. Consultáu 'l 5 de xunetu de 2022. 
  17. Georges, Karl Ernst (1913–1918), «Afri», en Georges, Heinrich (en de), Afri (8th edición), Hannover, http://latin_german.deacademic.com/1644, consultáu 'l 20 September 2015 
  18. Lewis, Charlton T.; Short, Charles (1879), «Afer», Afer, Oxford, https://www.perseus.tufts.edu/hopper/text?doc=Perseus%3Atext%3A1999.04.0059%3Aentry%3DAfer, consultáu 'l 20 September 2015 
  19. Venter & Neuland, NEPAD and the African Renaissance (2005), p. 16
  20. Desfayes, Michel (25 de xineru de 2011). «The Names of Countries». «África. Del nome de l'antigua tribu de Tunicia, los "Afri" (axetivu: "Afer"). El nome úsase entá nos topónimos arxelinos Ifira y Ifri-n-Dellal, na Gran Cabilia. Una tribu bereber yera nomada Beni-Ifren na Edá Media, y Ifurace yera'l nome d'una tribu tripolitana del sieglu VI. El nome vien de la pallabra bereber ifri, 'cueva'. El trogloditismu yera frecuente nel norte d'África, y enta esiste nel sur de Tunicia. Herodoto escribió que los garamentes, un grupu étnicu del norte d'África, vivíen en cueves. "Africa" foi un términu inventáu polos romanos, y Ifriqiyeh ye l'arabización del nome llatinu. The Ancient Greek called troglodytēs an African people who lived in caves. Africa was coined by the Romans and 'Ifriqiyeh' is the arabized Latin name. (Información tomada de Decret & Fantar, 1981).»
  21. 21,0 21,1 «The Berbers». Journal of the Royal African Society 2 (6):  páxs. 161–194. 1903. doi:10.1093/oxfordjournals.afraf.a093193. https://zenodo.org/record/1782363. Consultáu 'l 30 August 2020. 
  22. Edward Lipinski, Itineraria Phoenicia Archived 2016-01-16 at the Wayback Machine, Peeters Publishers, 2004, p. 200. ISBN 90-429-1344-4
  23. «Africa African Africanus Africus». Consultos.com.
  24. «Nile Genesis: the opus of Gerald Massey». Gerald-massey.org.uk (29 October 1907).
  25. «D'Africus ventus a Africa terrain». Revue de Philologie 50:  páxs. 221–38. 1976. 
  26. «Long-Distance Seafaring in the Ancient Near East». The Biblical Archaeologist 47 (3):  páxs. 134–142. 1984. doi:10.2307/3209914. 
  27. Hallikan, 'Abu-l-'Abbas Sams-al-din 'Ahmad ibn Muhammad Ibn. Kitab Wafayat Ala'yan. Ibn Khallikan's Biographical Dictionary Transl. by (Guillaume) B(aro)n Mac-Guckin de Slane (n'inglés).
  28. al-Andalusi, Sa'id (2010). Science in the Medieval World (n'inglés). ISBN 9780292792319.
  29. Upton, Roger D.. Travels in the Arabian Desert: With Special Reference to the Arabian Horse and Its Pedigree (n'inglés).
  30. Kimbel, William H. and Yoel Rak and Donald C. Johanson. (2004) The Skull of Australopithecus Afarensis, Oxford University Press US. ISBN 0-19-515706-0
  31. Tudge, Colin. (2002) The Variety of Life., Oxford University Press. ISBN 0-19-860426-2
  32. Sayre, April Pulley, Africa. Twenty-First Century Books, 1999. ISBN 0-7613-1367-2.
  33. Schlebusch CM; Malmström H; Günther T; Sjödin P; Coutinho A; Edlund H; et al. "Southern African ancient genomes estimate modern human divergence to 350,000 to 260,000 years ago". Science, 2017;358(6363):652–655. doi:10.1126/science.aao6266. PMID 28971970.
  34. Sample, Ian. "Oldest Homo sapiens bones ever found shake foundations of the human story". Artículu na web de The Guardian (7 de xunu de 2017).
  35. Zimmer, Carl. "Scientists Find the Skull of Humanity's Ancestor — on a Computer – By comparing fossils and CT scans, researchers say they have reconstructed the skull of the last common forebear of modern humans". Artículu de The New York Times (10 de setiembre de 2019).
  36. Mounier A, Lahr M, "Deciphering African late middle Pleistocene hominin diversity and the origin of our species". Nature Communications, 2019;10(1):3406. doi:10.1038/s41467-019-11213-w.
  37. Mokhtar, G. (1990) UNESCO General History of Africa, Vol. II, Abridged Edition: Ancient Africa, University of California Press. ISBN 0-85255-092-8
  38. Eyma, A.K. and C.J. Bennett. (2003) Delts-Man in Yebu: Occasional Volume of the Egyptologists' Electronic Forum No. 1, Universal Publishers. p. 210. ISBN 1-58112-564-X
  39. Wells, Spencer (December 2002) The Journey of Man Archived 2011-04-27 at the Wayback Machine. National Geographic
  40. Oppenheimer, Stephen. The Gates of Grief Archived 2014-05-30 at the Wayback Machine. bradshawfoundation.com
  41. «Ancient genomes from North Africa evidence prehistoric migrations to the Maghreb from both the Levant and Europe». Proceedings of the National Academy of Sciences 115 (26):  páxs. 6774–6779. 26 June 2018. doi:10.1073/pnas.1800851115. PMID 29895688. Bibcode2018PNAS..115.6774F. 
  42. «15. Strait of Gibraltar, Atlantic Ocean/Mediterranean Sea».
  43. «Getting "Out of Africa": Sea Crossings, Land Crossings and Culture in the Hominin Migrations». Journal of World Prehistory 19 (2):  páxs. 119–132. 2005. doi:10.1007/s10963-006-9002-z. http://www.ffzg.unizg.hr/arheo/ska/tekstovi/out_of_africa.pdf. Consultáu 'l 26 December 2013. 
  44. (2013) World History: Journeys from Past to Present, páx. 2–20. ISBN 978-1-134-72354-6.
  45. (2013) The Sahara: Past, Present and Future. ISBN 978-1-317-97001-9.
  46. «OSL dating of quaternary deposits associated with the parietal art of the Tassili-n-Ajjer plateau (Central Sahara)». Quaternary Geochronology 10:  páxs. 367–73. 2012. doi:10.1016/j.quageo.2011.11.010. 
  47. "Sahara's Abrupt Desertification Started by Changes in Earth's Orbit, Accelerated by Atmospheric and Vegetation Feedbacks" Archived 2014-03-07 at the Wayback Machine, Science Daily
  48. Diamond, Jared. (1999) Guns, Germs and Steel: The Fates of Human Societies. New York: Norton, p. 167. ISBN 978-0813498027
  49. «Early Pottery in Northern Africa – An Overview». Journal of African Archaeology 8 (2):  páxs. 219–238. 2010. doi:10.3213/1612-1651-10171. 
  50. Simon Bradley, A Swiss-led team of archaeologists has discovered pieces of the oldest African pottery in central Mali, dating back to at least 9,400BC Archived 2012-03-06 at the Wayback Machine, SWI swissinfo.ch – the international service of the Swiss Broadcasting Corporation (SBC), 18 January 2007
  51. (2018) Plants and People in the African Past, páx. 503–528. ISBN 978-3-319-89838-4.
  52. Ehret (2002), pp. 64–75.
  53. «Evidence for Sorghum Domestication in Fourth Millennium BC Eastern Sudan: Spikelet Morphology from Ceramic Impressions of the Butana Group». Current Anthropology 58 (5):  páxs. 673–683. 2017. doi:10.1086/693898. https://www.journals.uchicago.edu/doi/abs/10.1086/693898?journalCode=ca. Consultáu 'l 20 May 2022. 
  54. «Katanda Bone Harpoon Point» (inglés) (22 January 2010).
  55. Ehret (2002), pp. 82–84.

Enllaces esternos[editar | editar la fonte]