Saltar al conteníu

Piratería berberisca

De Wikipedia
Barbaria, mapa de Jan Janssonius (c. 1650) de la costa del norte d'África, un territoriu conocíu nesi sieglu como Barbaria.
Pirata berberiscu, óleu de Pier Francesco Mola (1650). Muséu del Louvre.

Los pirates berberiscos, corsarios berberiscos o corsarios otomanos foron pirates y corsarios musulmanes qu'operaben dende les sos bases nel norte d'África, especialmente nos puertos de Salé, Rabat, Arxel, Túnez y Trípoli. Esta fastera de territoriu yera conocida na dómina, como Berberia (el país de los bereberes), y por eso aplicábase esti xentiliciu a los pirates afincaos nella[1]. Estendieron la so actividá per tol Mediterraneu, y tamién nel Atlánticu, moviéndose hacia'l sur a lo llargo la costa del África occidental, y hacia'l norte per toles costes europees hasta Islandia, pero yeren especialmente activos nel Mediterraneu occidental. Estos pirates, amás d'atacar barcos mercantes, desarrollaben razzias, ataques a les ciudaes y villes costeres europees: principalmente n''Italia, Francia, España y Portugal, pero tamién nes islles Britániques[2], Países Baxos ya Islandia[3]. El principal oxetivu de los sos ataques yera consiguir esclavos, que llueu vendíense nel comerciu d'esclavos del Imperiu otomanu. Podíen atopase, en Barbaria, esclavos de munchos oríxenes étnicos y de diferentes relixones: xudíos, cristianos, musulmanes...[2]

Magar que los ataques pirates entamaron bien ceo tres de la conquista musulmana de la Península Ibérica na década del 710, el nome de «pirates (o corsarios) berberiscos» úsase davezu pa referise a los que desarrollaron la so actividá del sieglu XVI endelantrre, cuando la frecuencia y la gravedá de los ataques pa consiguir esclavos aumentaron. Nesa dómina Arxel, Túnez y Trípoli pertenecíen al Imperiu otomanu, bien como provincies directamente alministraes por elli o como dependencies autónomes conocíes como Estaos Berberiscos. Salé y otros puertos de Marruecos, que nun pertenecíen al imperiu, foron tamién la base de pirates de comportamientu asemeyáu.

Estos pirates capturaron miles de barcos mercantes, y atacaron repetidamente ciudaes y villes costeres que, de resultes, foron munches vegaes abandonaes, especialmente n'España ya Italia. Calcúlase qu'ente 100.000 y 250.000 habitantes de la Península Ibérica foron capturaos nestos ataques. L'historiador estauxunidense Robert Davis atribúi-yos a los corsarios la captura y posterior esclavización, ente 1580 y 1680, de 850.000 persones, y de más de 1,25 millones ente 1530 y 1780[2]. Sicasí, otros historiadores, como David Earle, discrepen con estes cifres, que consideren desaxeraes[4].

Dellos d'estos pirates y corsarios yeren europeos, individuos marxinaos o renegaos (conversos del cristianismu), como John Ward y Zymen Danseker[3]. Foron tamién perfamosos, a entamos del sieglu XVI dos hermanos turcos, los hermanos Barbarroxa (Jeireddín y Aruj), qu'ocuparon Arxel en nome del Imperiu otomanu nesa dómina. Los pirates d'orixe européu llevaron consigo técniques avanzaes de construcción de barcos y navegación alredor de 1600, y esto permitió a los corsarios estender la so actividá pel océau Atlánticu. Nos siguientes años, los centrales del sieglu XVII, foi cuando l'actividá de los corsarios berberiscos algamó'l so cumal.

Sicasí, muncho dempués de que los romanos abandonaran la navegación en barcos remeros en favor de veleros con una potente artillería, munchos de los barcos de los pirates siguíen siendo galeres tripulaes por cien o más homes armaos con espades (los terciados) y otres armes pequeñes. Los navíos berberiscos nunca nun formaben flotilles de combate, y cuando veíen una fragata europea escapaben d'ella[5]. L'actividá de los pirates entamó a menguar a finales del sieglu XVII, cuando les flotes de los países europeos más poderosos entamaron a presionar a los Estaos Berberiscos pa que pararan los ataques a los sos barcos desde la costa. La midida foi efectiva, pero solo pa los países que teníen una armada poderosa, y los ataques a los barcos y les costes de los países cristianos militarmente más débiles siguieron hasta entamos del sieglu XIX. Asina, ente 1801 y 1815 hubo dellos incidentes, incluyendo dos guerres berberisques qu'enfrentaron a los Estaos Berberiscos con Estaos Xuníos, Suecia y el reinu de Sicilia. Tres de les guerres napoleóniques y el Congresu de Viena (1814-15) les potencies europees acordaron acabar definitivamente cola piratería berberisca, daqué qu'asocedió finalmente tres la conquista francesa d'Arxelia en 1830 y la posterior pacificación, dende mediaos del sieglu, del país.

Referencies

[editar | editar la fonte]
  1. ↑ Murray, Hugh. Lea and Blanchard: The Encyclopædia of Geography: Comprising a Complete Description of the Earth, Physical, Statistical, Civil, and Political.
  2. ↑ 2,0 2,1 2,2 Robert Davis (2011-02-17). «British Slaves on the Barbary Coast». BBC. Consultáu'l 27 March 2019.
  3. ↑ 3,0 3,1 Review of Pirates of Barbary by Ian W. Toll, The New York Times, 12 Dec. 2010
  4. ↑ Carroll R, "New book reopens old arguments about slave raids on Europe". Artículu de The Guardian, 11 de marzu de 2014. ISSN 0261-3077.
  5. ↑ Conlin, Joseph R, The American Past: A Survey of American History, Volume I: To 1877, p. 206.

Enllaces esternos

[editar | editar la fonte]
Sacáu de «https://ast.wikipedia.org/w/index.php?title=Piratería_berberisca&oldid=4055760»