Sahel

De Wikipedia
Saltar a: navegación, buscar
La rexón africana del Sahel, un cinturón de tierra d'hasta 1000 km d'anchor que s'estiende a lo llargu de 5.400 km, dende l'océanu Atlánticu al mar Roxu.

El Sahel[1] ye una rexón ecoclimática y bioxeográfica de transición, n'África, ente'l desiertu del Sáhara al norte y la sabana sudanesa al sur. De clima semiáridu, estiéndese peles llatitúes meridionales d'África del norte, ente l'océanu Atlánticu y el mar Roxu. La pallabra árabe sāḥil (ساحل,) significa costa, litoral, mentantu que la pallabra Sáhara deriva de la pallabra árabe pa denomar el desiertu[2]. Tomaos conxuntamente, dambos nomes evoquen la imaxe de la vexetación d'El Sahel como una llínia de costa frente al océanu de sable que ye'l Sahara.

El Sahel compriende, d'oeste a este, partes del norte de Senegal, el sur de Mauritania, el centru de Malí, el norte de Burkina Faso, la fastera más meridional d'Arxelia, Níxer, l'estremu septentrional de Nixeria, el centru d'El Chad, el centru y el sur de Sudán, l'estremu septentrional de Sudán del Sur, Eritrea, amás de Camerún, la República Centroafricana y l'estremu septentrional d'Etiopía[3]

Históricamente, conocíase a la fastera occidental d'El Sahel como rexón de Sudán. Los árabes denomaben bilad as-sudan, "la tierra de los negros", a la fastera de tierra asitiada ente'l desiertu del Sáhara y les rexones costeres del oeste d'África, la rexón de Guinea.

Xeografía[editar | editar la fonte]

Camellos bebiendo agua nuna poza n'El Chad.
Viesca saheliana, a la vera la carretera Bamako-Kayes (Mali), na temporada de lluvies.

El Sahel estiéndese per una faza de tierra d'un anchor d'ente varios cientos y mil kilómetros a lo llargu de tol territoriu africanu, d'este a oeste, dende'l mar Roxu al océanu Atlánticu; la so estensión ye de 3.053.200 km². Ye una ecorrexón de transición con una cubierta vexetal de praderíes semiárides, sabana, estepa y sebe espinosa asitiada ente la sabana sudanesa al sur y el Sáhara al norte.

La so topografía ye perllana: l'altor sobre'l nivel de la mar sepártase raramente del rangu d'ente los 200 y los 400 metros. Sicasí, hai delles mesetes aisllaes y cordeleres nel so territoriu, pero considérense exorrexones distintes porque la so flora y fauna estrémense enforma de les de la llanura que les arrodia. La cantidá de lluvia añal varía ente los 100-200 mm na fastera septentrional y los alredor de 600 de la meridional.

Flora y fauna[editar | editar la fonte]

El Sahel ta cubiertu, mayoritariamente, por praos y sabana, con delles árees d'arbustos y viesca. La cubierta de yerba ye bastante continua en tola rexón, con especies de ciclu añal que sequen demientres la llarga estación seca. Ente los árboles más comunes rescamplen delles especies d'acacia: l'Acacia tortilis ye la más común, y abonden tamién Acacia senegal y Acacia laeta. Aparte d'elles, alcuéntrense fácilmente exemplares de Commiphora africana, Balanites aegyptiaca, Faidherbia albida, y Boscia senegalensis. Na fastera septentrional del Sahel alternen arbustos del desiertu (Panicum turgidum y Aristida sieberana) con fazas de sabana y praos.

El Sahel tien sío l'hábitat de grandes manaes de mamíferos herbívoros como delles especies de gacela, oryx y antílopes, que conviven con carnívoros como'l perru xabaz africanu, delles especies de guepardu y otres de llión. La caza incontrolada y la competencia pola xinta col ganáu tien disminuyíu enforma la población de munches d'eses especies, hasta'l puntu de que dalgunes tán dafechu estinguíes. Los humedales del Sahel, por últimu, son puntu importante de parada de les aves migratories que crucien el continente nos sos viaxes añales.

Clima[editar | editar la fonte]

El Sahel tien un clima semiáridu tropical: caldiu y secu, con abondes hores de sol añales y ventosu. El so clima ye, en resumen, asemeyáu, magar que menos estremu, qu'el del desiertu del Sáhara que marca la so llende septentrional.

El Sahel recibe de poca a perpoca cantidá de precipitación añalmente. La estepa tien una estación seca perllarga, y una estación de lluvies corta. Les precipitaciones, amás, son estremadamente irregulares, y varíen enforma d'estación n'estacion: la mayoría de la lluvia cae nún o dos meses, mentantu qu'el restu del añu ye completamente secu. La rexón recibe, según la zona, ente 100 y 600 mm de precipitación añal. Les variaciones de lluvía cayida úsense davezu pa facer una sodivisión del clima del Sahel:

- clima saharianu-sahelianu, con precipitaciones añales medies de 100-200 mm (como en Khartum (Sudán)
- clima sahelianu, con precipitaciones añales medies d'ente 200 y 600 mm (como en Kiffa, Mauritania)
- clima sahelianu-sudanés, con precipitaciones añales medies de 200-400 mm (como en Niamey, Níxer).

La humedá relativa de la estepa ye baxa o mui baxa: nun sobrepasa'l 10-25% na temporada seca, y ta ente'l 25 y el 75% na temporada húmeda, con sitios que nun tienen en tol añu niveles d'humedá superiores al 35%.

No que cinca a les temperatures, el Sahel ye una zona de calor intensu y constante, ensin grandes variaciones de temperatura a lo llargo l'añu. Nos periodos caldios les temperatures medies diurnes tán ente los 36-42ºC (y más inclusu nes rexones más caluroses), con 25-31ºC pela nueche; nos "fríos", la temperatura media ta ente los 27-33ºC, y la temperatura baxa media ta ente los 15 y los 21ºC. En toes les fasteres del Sahel, pola so llatitú tropical, la temperatura media media ta perriba de los 18ºC.

El Sahel ye, no que cinca a les hores de sol añales, una rexon perasoleyada, con intervalos d'ente 2.700 hores añales de sol (el 61% de les hores de día del añu) y 3.500 hores (más del 79% de les hores de día del añu). Estos valores avérense a los de zones desértiques, como'l desiertu d'Arabia, magar qu'el Sahel ye estepa y non desiertu. La nubosidá ye, pela so banda, perbaxa. Asina, Niamey (Níxer) tien 3.082 hores de sol añales, Gao (Mali) 3.385 y Yamena (El Chad) 3.205 hores de sol al añu[4][5][6][7].

Cultura[editar | editar la fonte]

La población d'El Sahel fórmenla, tradicionalmente, grupos de seminómades que cultiven la tierra y curien el ganáu nun sistema de treshumancia, quiciás la forma más sostenible d'usar les tierres del Sahel. La diferencia ente'l norte, secu pero con un suelu más ricu en nutrientes, y el sur, más húmedu pero con más vexetacion, aprovéchase faciendo al ganáu pastiar na nutritiva pación del norte demientres la temporada húmeda, llevándolu dempués varios cientos de kilómetros al sur pa que coman la yerba, más abondante pero menos nutritiva, demientres la estacion seca. La tendencia creciente a l'asentamientu permanente de población y ganau nes árees fértiles tien creao conflictos ente estes poblaciones y los pástores nómades.

En El Sahel occidental son frecuentes la poligamia y el matrimoniu con neñes, y tamién ye practicada la mutilación sexual femenina[8].

Historia[editar | editar la fonte]

Los anicios de l'agricultura[editar | editar la fonte]

Los primeros intentos de domesticar plantes pal so cultivu n'África asocedieron na rexón d'El Sahel alredor del 5.000 e.C., cuando entama'l cultivu del sorgu y del arroz africanu. Nesta dómina domésticáronse tamién les pites de Guinea.

Alredor del 4.000 e.C. el clima del Sáhara y El Sahel entamó a ser cada vuelta más secu, y a un ritmu rápidu. Esto fizo secase rios y llagos, y causo una desertificación creciente que, al amenorgar la cantidá de tierra fértil disponible, provocó la migración de les comunidaes d'agricultores a rexones más húmedas del oeste d'África[9].

Los reinos del Sahel[editar | editar la fonte]

Llámense reinos del Sahel a una serie de monarquíes que dominaron esta rexón ente los sieglos IX-XVIII. La riqueza d'estos estaos provenía del control de les rutes comeciales tressaharianes, y especialmente del comerciu d'esclavos col mundu islámicu. La clave del so dominiu taba na posesión de grandes rebaños d'animales (camellos, caballos...) lo suficientemente rápidos pa permitir el control de grandes estensiones de territoriu y útiles na guerra. Toos estos reinos taben descentralizaos, de forma que les ciudaes que los componíen teníen un altu gráu d'autonomía. Los primeros reinos sahelianos importantes surdieron dempués del añu 750, y controlaben varies ciudaes importantes de la rexón de la cuenca del ríu Níxer, como Tombuctú, Gao y Djenne.

Los reinos del Sahel nunca nun pudieron espardese hacia'l sur, hacia la rexón viescosa habitada polos Ashanti y los Yoruba, porque la so forma de guerrear a caballu nun yera adecuada pa lluchar metanes la viesca y porque los caballos y camellos morríen pol calor y les enfermedaes.

Periodu colonial[editar | editar la fonte]

El Sahel occidental foi incorporáu por Francia, a finales del sieglu XIX, a la so colonia nomada África Occidental Francesa; El Chad, pela so banda, foi añedíu en 1900 al África Ecuatorial Francesa. Toos esos territorios foron descolonizaos en 1960.

La parte oriental d'El Sahel, la qu'anguaño ocupen Sudán y Sudán del Sur, nun foi colonizada polos europeos, sinón que foi conquistada pol gobernador d'Exiptu Mehmet Alí en 1820. Como parte del Sultanatu d'Exiptu, quedó embaxu de l'alministración británica en 1914. El Sahel sudanés formó parte del Sudán independiente dende 1956, y en 2011 Sudán del Sur algamó la so independencia de Sudan.

Referencies[editar | editar la fonte]

  1. «Definition grid different of Sahel (British and World English)». Consultáu'l 9 de marzu de 2017.
  2. (1834) A System of Modern Geography. E. Huntington & Co., 287.
  3. "Sahel: $1.6 billion appeal to address widespread humanitarian crisis". United Nations Office for the Coordination of Humanitarian Affairs. Consultáu'l 9 de marzu de 2017.
  4. «Niamey Climate Niamey Temperature - Niamey.Climatemps.com».
  5. «Timbuktu Climate Timbuktu Temperature - Timbuktu.Climatemps.com».
  6. «Gao Climate Gao Temperature - Gao.Climatemps.com».
  7. «N’Djamena Climate N’Djamena Temperature - N-Djamena.Climatemps.com».
  8. «UNICEF WCARO - Overview - Violence against children».
  9. (2005) Oxford Atlas of World History. New York: Oxford University Press, 22–23.