Guinea

De Wikipedia
Saltar a: navegación, buscar
République de Guinée
Bandera de Guinea Escudu de Guinea
Bandera de Guinea Escudu de Guinea
Lema nacional: Travail - Justice - Solidarité
Trabayu - Xusticia - Solidariedá
Himnu nacional: Liberté
Situación de Guinea
Capital
 • Población
 • Coordenaes
Conakry
2.000.000 hab. (2002)
9° 30’ N 13° 40’ O
Ciudá más poblada Conakry
Llingües oficiales francés (oficial)¹
Forma de gobiernu República
Lansana Conté
Cellou Dalein Diallo
Independencia
• Fecha
de Francia
2 d'ochobre de 1958
Superficie
 • Total
 • % agua
Llendes
Costes
Puestu 77º
245.857 km² km²
irrelevante
3.399 km
320 km
Población
 • Total
 • Densidá
Puestu 84º
9.452.670
38,5 hab/km²
PIB (PPA)
 • Total (2005)
 • PIB per capita
Puestu 113º
US$ 18.945'000.000
US$ 1.986
Moneda Francu guineanu (GNF)
Xentiliciu Guineanu, -a, -o
Zona horaria
 • en Branu
GMT
nun aplica
Dominiu d'Internet .gn
Códigu telefónicu +224
Prefixu radiófonicu 3XA-3XZ
Códigu ISO 324 / GIN / GN
Miembru de: ONX, XA
Sitiu web del Gobiernu:

{{{web_gobiernu}}}

¹ Fálense tamién fula, kissi, kpelle, maninka, susu y toma

Guinea, oficialmente la República de Guinea (en francés: République de Guinée), ye un país d'África occidental. Conocíu antiguamente como Guinea Francesa, llámase-y delles veces anguaño Guinea-Conakry pa estremalu del so vecín Guinea-Bissau. Conakry ye la so capital y tamién la ciudá más grande del país.

El so territoriu, que s'esparde per 245.857 km², tien forma de media lluna. El so estremu occidental llenda col Océanu Atlánticu, y dende ellí el país se curva pal este y pal sur. Llenda con Guinea-Bissau y Senegal al norte, Mali al norte y noroeste, la Costa de Marfil al sureste, Liberia al sur y Sierra Lleona al oeste.

Nelli viven 24 grupos étnicos. Los más importantes son los fula, mandinka y susu.

Historia[editar | editar la fonte]

El territoriu qu'anguaño ye Guinea tuvo ocupáu bien de tiempu por dellos de los más importantes imperios del oeste d'África. Quiciás el primeru que tuvo estes tierres foi el imperiu de Ghana (790-1076), una entidá que, dempués d'espolletar enforma gracies al comerciu, foi perdiendo puxu pola presión que sobre elli ficieron los almorávides, que traxeron l'islam a la zona, y poles engarradielles dinástiques.

Foi sustituyíu nel control de la zona, nos sieglos XII-XIII, pol reinu de Sosso, que desapaeció dempués de la batalla de Kirina (c.1235). Nella foron derrotaos pol imperiu islámicu de Mali. Esti tuvo el so momentu cimeru nel reináu del mansa (emperador) Kankou Moussa, que fizo un viaxe a La Meca en 1324 que lu fizo perfamosu en tol islam. Poco dempués de la so muerte entamó el declive del imperiu, que foi suplantáu polo que yeran los sos estaos vasallos nel sieglu XV. El más exitosu d'ellos foi l'imperiu Shongai, que se fizo colo que foran el territoriu y les riqueces del imperiu Mali y que foi prósperu hasta que, a la muerte del emperador Askia Daoud en 1582, hebo una guerra civil ente los candidatos a la so sucesión. Esto debilitó el país, invadíu trés años dempués por xentes de Marruecos. Estos, nostante, nun foron quién a caltener xuníu el territoriu, que se dixebró en dellos pequeños reinos.

El país entró na historia mundial nel sieglu XVI, cuando el tráficu d'esclavos, que yera vezu na zona, entamó a integrase no que se conoz como'l sistema de comerciu triangular. Nelli, les manufactures europees yeren cambiaes n'África por esclavos, que dempués yeren vendíos n'América, que pagaba coles materies primeres (colleches d'algodón y otros productos) que valíen pa facer manufactures n'Europa. Demientres trés sieglos, del XVI al XVIII, el sistema funcionó ensin perda de soberanía pa los territorios africanos.


El periodu colonial entama cola llegada de los primeros militares franceses a mediaos del sieglu XIX. Estos aseguraron el control de la zona al derrotar, en 1898, al exércitu del mansa Samory Touré, señor del estáu de Ouassolou. Gracies a la so victoria too lo que güei ye Guinea, y les tierres d'alredor, pasaron a ser franceses. Les llendes actuales de Guinea son el resultáu de los acuerdos multinacionales que, a finales del sieglu XIX y entamos del XX, afitaron les llendes de Liberia, de la colonia portuguesa de Guinea (güei Guinea-Bissau), de la colonia inglesa de Sierra Lleona y de la que mos ocupa. El país, nel dominiu francés, formaba el territoriu de Guinea, dirixíu por un gobernador que rendía cuentes al gobernador xeneral del África Occidental Francesa, qu'integraba toles colonies franceses de la zona y tenía la capital en Dakar.


En 1958 se fundó la V República francesa, y se-yos dio a les colonies la opción d'algamar la autonomía dientro d'una nueva comunidá de naciones francófones o d'algamar la independencia. Munches colonies quixeron más lo primero, pero Guinea prefirió ser independiente. El Partíu Democráticu de Guinea (PDG) de Ahmed Sékou Touré, que tenía 56 de los 60 escaños de l'asamblea territorial dende les elecciones de 1957, proclamó la independencia y fizo al so líder presidente. L'alministración francesa, y la mayoría de los franceses, marcharon, y con ellos munches de les perres que había nel país. Guinea entamó a adoptar polítiques socialistes, y a alliniase cola Xunión Soviética primero y, poco dempués, con China. Ello nun foi inconveniente, sicasí, pa que recibiera inversiones de países capitalistes como los Estaos Xuníos y, dempués de que Valéry Giscard d'Estaing fora elexíu presidente, tamién de Francia.

Pocos años dempués de la independencia Touré convirtió el país nun sistema de partíu únicu. Con un programa qu'amestaba el socialismu a l'africana en casa y el panafricanismu nes rellaciones esteriores, Touré entamó a convertise nun tiranu qu'encarcelaba a los opositores y perseguía la prensa llibre. Al mesmu tiempu nacionalizó tierres, quitó-yos el poder a los xefes tribales y rompió rellaciones col gobiernu y les empreses franceses. Pa finales de los 70 la situación económica del país volviose tan imprevisible como la política esterior, na que' país s'apoyaba delles veces na Unión Soviética y delles otres nos Estaos Xuníos. Cola escusa, real o inventada, de conspiraciones pa derrocalu Touré represalió a tolos opositores, matando dellos y forciando a los demás a esiliase.

En 1970 fuerzas rebeldes, procedentes de la Guinea portuguesa (Guinea-Bissau), invadieron Guinea. Y ficiéronlo col apoyu de Portugal, que quería acabar con Touré pol apoyu qu'esti-yos daba a los guerrilleros del Partido Africano da Independência da Guiné e Cabo Verde. Dellos díes de llucha bastaron pa ver que los invasores nun diben a ser quién p'acabar col réximen, y fuxeron del país. Touré siguió gobernando hasta la so muerte, el 26 de marzu de 1984, nun hospital estaunidense nel que lu operaran del corazón.

El poder pasó a manes del primer ministru Louis Lansana Beavogui, pero namái que-y duró una selmana. El 3 d'abril una xunta militar dirixida por Lansana Conté y Diarra Traoré dio un golpe que convirtió al primeru en presidente y al segundu en primer ministru. La primera acción del nuevu gobiernu foi denunciar los abusos del réxime anterior, soltar a 250 presos políticos y pedir a los 200.000 esiliaos que volvieran al país. Amás, renegó del socialismu, pero nun fizo nada nin por ameyorar la probitú de la xente nin por establecer una democracia.

Diba ser en 1992 cuando anunciara el fin del réxime militar. Prometió elecciones presidenciales en 1993 -que ganó- y parlamentaries en 1995; nestes el so Partíu de la Unidá y el Progresu sacó 71 de los 114 escaños. El so poder, sicasí, siguió siendo absolutu. En setiembre de 2001 metió na cárcel por ocho meses al líder de la oposición, Alpha Condé, que dempués d'eso marchó pal esiliu a Francia. En 2001 Touré convocó un referéndum pa que se-y permitiera al presidente selo más de dos vegaes consecutives, y lu ganó. En 2003 empezó'l so tercer mandatu, anque les elecciones foron boicoteaes pola oposición, que siguió siendo perseguida. Así, en xineru de 2005 Alpha Condé sobrevivió a un intentu d'asesinatu. Nostante, la situación seguía empeorando, con unos niveles de probitú y de desintegración que se xuníen a la inestabilidá que xeneraba la guerra nos estaos vecinos de Liberia y Sierra Leona. Les protestes de la población forciaron a Conté a nomar un nuevu primer ministru en 2007.

Lansana Conté morrió el 23 d'avientu de 2008, lo que desencadenó un golpe d'estáu. Una xunta militar, autonomada Conseil National de la Démocratie et du Dévelopement y dirixida pol capitán Moussa Dadis Camara, se fizo col gobiernu del país. Les sos tropes disolvieron a tiros una manifestación cellebrada el 28 de setiembre de 2009, aunque prometieron elecciones libres pa finales de 2010.


Gobiernu y política[editar | editar la fonte]

Guinea ye una república popular y revolucionaria. El xefe l'estáu ye'l presidente, que ye elexíu cada siete años y que dempués noma un primer ministru. Pesie a que la llei diz que'l presidente namái que puede selo dos vegaes, l'últimu presidente, Lansana Conté, mantúvose nel cargu dende'l 5 d'abril de 1984. Foi reelexíu por última vez el 21 d'avientu de 2003 col 95% de los votos. A la so muerte, el 22 d'avientu de 2008, tenía que sustituyilu'l presidente del parlamentu Aboubacar Somparé, que taba obligáu a convocar elecciones en 60 díes. Nun pudo facelo, porque una xunta militar, dirixida pol capitán Moussa Dadis Camara, dio un golpe d'estáu.

El poder llexislativu ta representáu por un parlamentu unicameral, l'Asamblea Nacional Popular, na que s'axunten 114 diputaos que s'escueyen cada 5 años. Nel país hai, dende que se permitió'l multipartidismu n'abril de 1992, unos cuarenta partidos. Nostante, a munchos d'ellos (como el FRAD, principal partíu de la oposición) se-yos torgó'l derechu de presentase a les últimes elecciones. El parlamentu ta suspendíu pola xunta militar, que prometió elecciones llibres pa finales del 2010.

El poder xudicial tien, como institución cimera, la Corte d'Apelaciones.

Xeografía[editar | editar la fonte]

Mapa de la República de Guinea

Guinea tien una estensión de 245.839 km², 3.399 km de perímetru de fronteres y 322 km de costa. Ta arrodiáu pol Océanu Atlánticu, Costa de Marfil, Guinea-Bissau, Liberia, Mali, Senegal y Sierra Lleona, y se divide en cuatro rexones xeográfiques principales:

  • les tierres baxes de Basse-Coté, que formen parte de la ecorrexón conocida como mosaicu de selva y sabana de Guinea, que separta les selves costeres d'esi golfu de la nomada sabana sudanesa occidental. Nella amiéstense selva, sabana y praderes, y tamién manglares a la oriella la mar, y ta habitada principalmente polos susu. Inclúi la capital del país, Conakry;
  • una zona montañosa, conocida como Fouta Djallon, que traviesa'l país de Norte a Sur y que ta habitada polos peul;
  • la rexón conocida como Haute-Guinea, perteneciente al Sahel, zona de transición ente'l desiertu del Sáhara y la zona de sabana, que s'alcuentra al noreste del país y ta habitada polos malinké;
  • la zona selvática qu'ocupa el sureste del país y que ta habitada por dellos grupos étnicos distintos.

La montaña más alta del país ye'l Monte Nimba (1.752 m d'altor). Nella, y nes otres montañes del país, nacen los ríos que traviesen Mali, Gambia y Senegal, y tamién los que, naciendo na fastera occidental del Fouta Djallon, desemboquen al Atlánticu en Sierra Leone y Costa de Marfil.

Organización político-alministrativa[editar | editar la fonte]

Rexones de la República de Guinea

Guinea se divide en 8 rexones alministratives que se sodividen en 33 prefectures. Les rexones son les siguientes:

Rexón Población Capital
Kankan 540.427 Kankan
Kindia 520.807 Kindia
Nzérékoré 660.400 Nzérékoré
Labé 480.740 Labé
Faranah 440.500 Faranah
Mamou 434.600 Mamou

Amás d'elles, ta la rexón de Conacri, qu'acueye a 1.931.184 habitantes y comprende la ciudá capital y la so rodiada y ta dirixida por un gobernador. Dende 1991 ta dividida en 5 municipios o communes (Kaloum, Dixinn, Ratoma, Matam y Matoto), cada una col so alcalde.

Economía[editar | editar la fonte]

Artículu principal: Economía de Guinea

El territoriu de Guinea ye bayurosu en recursos naturales. Amás de guardar el 25% de les reserves mundiales conocíes de bauxita, nel so subsuelu hai tamién oru, diamantes y otros minerales, como l'alúmina. Esta y la bauxita son, anguaño, les principales esportaciones del país. La industria ta poco desarrollada, y inclúi más que nada fábriques de procesamientu d'alimentos y tabaco. L'agricultura da trabayu al 80% de la fuerza de trabayu del país que yera, cuando taba gobernáu polos franceses y nos primeros años de vida independiente, un gran esportador de bananes, piñes, café, cacagüeses y aceite de palma.


Demografía[editar | editar la fonte]

La población estimada del país ye de 10.211.4374 habitantes. Cuasi dos millones d'ellos viven en Conakry, que ye la capital, el centru económicu y la sé de les principales instituciones educatives y culturales.

L'idioma oficial del país ye'l francés. Fálense tamién, nes rexones qu'ocupen los distintos grupos étnicos, el maninka o malinké, el susu, el pular o fulani, el kissi el kpelle y el loma.

Nel país conviven unos 24 grupos étnicos. El más numberosu d'ellos ye'l de los fulani, tamién nomaos fula o peul; son el 40% de la población, y viven sobre too na zona del Fouta Djallon. Otru 30% de la población son de la etnia mandinka, mandingo o malinké; viven principalmente al este del país, nes prefectures de Kankan y Kissidougou. Un 20% más de los habitantes guineanos son de la etnia soussou susu, y viven al oeste del país, alredor de la capital y de les ciudaes de Forécariah y Kindia. El 10% restante de la población lu formen dellos grupos étnicos más pequeños (kpelle y kissi ente más otros). Los habitantes non africanos son unos 10.000, y son mayormente franceses y libaneses.

La relixón dominante ye l'islam, una y bones cuasi'l 85% de la población ye musulmana. Los más d'ellos son sunníes, anque hai tamién un númberu creciente de chiites.Los cristianos, un grupu qu'inclúi católicos, anglicanos y dellos grupos evanxélicos (bautistes, adventistes del séptimu día...). Hai tamién una activa comunidá de testigos de Xehová, y tamién, ente los foriatos, pequeños grupos de Baha'i, hindús y budistes. L'otru 5% de la población caltién les creyencies animistes tradicionales.

Cultura[editar | editar la fonte]

Guinea tien, como munchos de los países de la zona, una tradición musical bayurosa. D'ente la de los diversos grupos étnicos del país ye la de los Mandé la música más conocida nel país, nel África occidental y, en dellos casos, como'l de Mory Kanté col so discu 10 Cola Nuts nos años 80 a nivel internacional. Los Mandé falan, na so mayoría, maninka, y ye tradicional la esistencia, dientro d'esi grupu, de los djelis, una especie de trovadores viaxeros qu'entreteníen a los poderosos.

Nos tiempos modernos la guitarra ye l'instrumentu más importante. Sicasí, comparte protagonismu con dellos instrumentos tradicionales: el ngoni, un instrumentu de cuerda que recuerda'l banjo; el kora, un instrumentu de cuerda que ye como un amiestu d'arpa y llaúd; y el balafon, un instrumentu de percusión idiófonu fechu de madera.

Balafon

En cuantes a los deportes, el deporte nacional ye'l tenis de mesa. La selección de fútbol nunca se clasificó pa la fase final d'un mundial, y participó namái qu'ocho veces na fase final de la Copa d'África. Quedó subcampeón en 1976, y foi cuartufinalista en 2004, 2006 y 2008.



África
Angola | Arxelia | Benín | Botsuana | Burkina Fasu | Burundi | Cabu Verde | Camerún | República Centroafricana | Chad | Islles Comores | El Congo | República Democrática d'El Congo | Costa de Marfil | Djibouti | Eritrea | Etiopía | Exiptu | Gabón | Gambia | Ghana | Guinea | Guinea-Bissau | Guinea Ecuatorial | Kenia | Lesotho | Liberia | Libia | Madagascar | Malaui | Mali | Marruecos | Mauriciu | Mauritania | Mozambique | Namibia | Níxer | Nixeria | Ruanda | São Tomé y Príncipe | Islles Seychelles | Senegal | Sierra Lleona | Somalia | Sudáfrica | Sudán | Sudán del Sur | Suazilandia | Tanzania | Togo | Túnez | Uganda | Zambia | Zimbabue

Dependencies: Islles Kerguelen | Mayotte | Reunión | Sáhara Occidental | Socotra | Tromelin

Bandera de la OCI Organización pa la Cooperación Islámica Bandeira de la OCI
Afghanistán | Albania | Arabia Saudita | Arxelia | Azerbaiján | Bahrain | Bangladesh | Benín | Brunéi | Burkina Fasu | Camerún | Chad | Islles Comores | Costa de Marfil | Djibouti | El Líbanu | Emiratos Árabes Xuníos | Exiptu | Gabón | Gambia | Guinea | Guinea-Bissau | Guyana | Indonesia | Irán | Iraq | Kazakhstán | Kirguistán | Kuwait | Libia | Malasia | Maldives | Mali | Marruecos | Mauritania | Mozambique | Níxer | Nixeria | Omán | Pakistán | Palestina | Qatar | Senegal | Sierra Leone | Siria | Somalia | Sudán | Surinam | Taxiquistán | Togo | Túnez | Turkmenistán | Turquía | Uganda | Uzbequistán | Xordania | Yemen

Países observadores: Bosnia y Hercegovina | República Centroafricana | Rusia | Tailandia | República Turca de Xipre del Norte