Ilesia Católica

De Wikipedia
Saltar a navegación Saltar a la gueta
Wikipedia:Wikipedia:Llista d'artículos que toa Wikipedia tien que tener/Archivu
El Cristu na Cruz, símbolu de la Ilesia Católica

La Ilesia Católica, tamién conocida como Ilesia Católica Romana, ye la mayor de les ilesies cristianes, con más de 1.270 millones de fieles bautizaos en tol mundu[1]. Ye la más antigua de les instituciones internacionales de funcionamientu ininterrumpíu[2], y como talo tien xugao un papel destacáu na historia y el desarrollu de la civilización occidental[3]. La Ilesia ta formada por cuasi 3.500 diócesis, tamién llamaes ilesies locales, espardíes per tol mundu y gobernada, caúna, por un obispu. El Papa, Vicariu de Cristu y socesor del apóstol San Pedru, ye l'obispu de Roma, el cabezaleru de toa la Ilesia Católica[4], depositariu del ministeriu universal de Pedru y responsable de la xunidá y la corrección doctrinal de les enseñances de la Ilesia. El gobiernu de la organización ta centralizáu na Santa Sede, allugada na pequeña nación independiente de Ciudá del Vaticanu, asitiada metanes Roma, y de la qu'el papa ye'l so xefe d'estáu.

Les creyencies cristianes del catolicismu fúndense no recoyío nel Credu de Nicea. La Ilesia Católica enseña que hai namái una ilesia, santa, católica ya apostólica, fundada por Xesucristu na Gran Comisión[5][6]; y que los sos obispos son los sucesores de los apóstoles de Cristu y el papa, el primeru d'ente ellos, ye'l socesor de San Pedru, a quien Cristu-y dio la primacía sobro los demás apóstoles[7]. Caltién que mantiene les práctiques de la fe cristiana orixinal, qu'esta-y foi tresmitida pola tradición sagrada[8] y que ye, pola mor de la guía del Espíritu Santu, infalible. Pesie a la so xunidá coesisten nella bayura de tendencies teolóxiques ya espirituales[9][10], espeyaes na esistencia d'una Ilesia Llatina (tamién nomada Ilesia d'Occidente o Ilesia Católica Romana), 23 Ilesies católiques orientales y cientos d'instituciones monástiques, delles mendicantes, delles de clausura y delles terciaries.

Fachada de la basílica de San Pedru, en Roma. L'edificiu asiéntase nel llugar nel que, según la tradición, ta la tumba del apóstol San Pedru.

De los sos siete sacramentos el principal d'ellos ye la Eucaristía, que se cellebra llitúrxicamente na misa[11]. La Ilesia enseña que, al traviés de la consagración por un sacerdote, el pan y el vinu del sacrificiu eucarísticu conviértense nel cuerpu y la sangre de Xesucristu: ye la doctrina de la transubstanciación. La Vírxe María ye venerada nesta ilesia como Ma de Dios y Reina de los Cielos[12], y la so imaxe ye oxetu de veneración en milenta imáxenes espardíes per santuarios marianos de tol mundu. Les sos enseñances inclúin la creyencia na misericordia divina, na santificación al traviés de la fe y l'espardimientu del Evanxeliu, y tamién la doctrina social de la Ilesia, que pon l'enfotu na axuda voluntaria a los enfermos, los probes y los aflixíos al traviés de les obres de misericordia corporales ya espirituales. La Ilesia Católica ye'l mayor proveedor non gubernamental d'educación y sanidá del mundu[13].

El so pensamientu dirixó primeru ya influyó dempués la filosofía, la cultura, l'arte y la ciencia occidental. Anguaño, los sos fieles estiéndense per tol mundu, y de magar el sieglu XX la mayoría vive nel hemisferiu sur como resultáu, d'una banda, de la progresiva secularización d'Europa, y d'otra de la persecución que sufren los cristianos nel Oriente Mediu. La Ilesia Católica yera una cola Ilesia Ortodoxa hasta'l Cisma d'Oriente de 1054, resultáu de diferencies insalvables ente les dos ilesies sobre la cuestión de l'autoridá del papa sobro los demás obispos. Hasta'l conciliu d'Éfesu de 431 la Ilesia del Oriente almitía la idea de la primacía papal, y tamién les Ilesies ortodoxes orientales hasta'l conciliu de Calcedonia de 451: le estremadura ente toes elles foi resultáu de diferencies teolóxiques, non organizatives. Al cisma d'Oriente siguiolu, nel sieglu XVI, la Reforma protestante, que supunxo la ruptura de parte de los obispos, sacerdotes y fieles cola Ilesia y dio llugar al nacimientu ya espoxigue del protestantismu. Dende finales del sieglu XX la Ilesia ye percriticada poles sos enseñances sobre la sexualidá, pola so negativa a ordenar sacerdotises muyeres y pol so manexu de los casos d'abusu sexual nos que participaran sacerdotes.

La Ilesia dirixe miles d'ilesies, hospitales y orfanatos alredor del mundu, y ye, amás del mayor proveedor non gubernamental d'educación y asistencia sanitaria nel mundu, responsable de bien d'actividaes humanitaries n'estayes perdiferentes: infancia, refuxaos, probes... Foi, por últimu, responsable de la fundación de la mayoría de les primeres universidaes que se crearon, y sigue siendo anguaño un importante proveedor d'educación superior.

Nome[editar | editar la fonte]

San Ignaciu d'Antioquía ye l'autor de la primer referencia escrita na qu'apaez la espresión "católica" pa referise a los siguidores de Xesús (Ignaciu, el portador de Dios, cuadru de Ioann Apakass, sieglu XVII, conserváu nel muséu Pushkin de Moscú).

L'usu más antiguu conserváu del términu católica (del griegu καθολικός, romanizáu katholikos), que significa lliteralmente universal, pa referise a la Ilesia ye del añu 110[14]: apaez na Carta d'Ignaciu a los Esmirneanos, escrita por san Ignaciu d'Antioquía[15], el mesmu autor del que se sepa qu'usó, alredor del añu 100, el términu Cristiandá (en griegu Χριστιανισμός) pa referise a los discípulos de Xesús. Nes Llectures Catequétiques, escrites alredor del 350 por san Cirilu de Xerusalén, el nome Ilesia Católica entamó a usase pa estremar a esti grupu d'otros grupos relixosos que tamién se nomaben "la ilesia" a ellos mesmos[16][17]. La noción católica, d'universalidá, foi afitada en 380 nel edictu De fide Catolica, promulgáu por Teodosio I, el caberu emperador en gobernar al tiempu les metaes occidental ya oriental del Imperiu romanu, cuando estableció a esta ilesia como relixón oficial del imperiu.

De magar el cisma d'Oriente de 1054 la Ilesia d'Oriente adoptó pa sigo'l axetivu ortodoxa como'l so epítetu distintivu, magar qu'el so nome oficial sigue siendo Ilesia Ortodoxa Católica[18], y la Ilesia Occidental que vive en comunión cola Santa Sede tomó católica como'l so epítetu distintivu, y conservolo tres de la Reforma Protestante de finales del sieglu XVI. El términu católica romana aparez ocasionalmente en documentos tanto de la Santa Sede, especialmente cuando se dirixe a determinaes conferencies episcopales nacionales, como de delles diócesis.

El nome Ilesia Católica, aplicáu al conxuntu d'esta ilesia, ta oficializáu neto nel Catecismu de la Ilesia Católica (1990) que nel Códigu de Derechu Canónicu (1983). Y foi utilizáu nos documentos del Conciliu de Trento (15451563)[19], del Conciliu Vaticanu I (18691870)[20] y el Conciliu Vaticanu II (1962–1965)[21], amás de milenta otros documentos oficiales[22].

Organización[editar | editar la fonte]

La Ilesia Católica sigue, na so organización de gobiernu, un sistema episcopal, llideráu por obispos, persones ordenaes, esto ye, que recibieron el sacramentu del orde sacerdotal, a les que se-yos da una xurisdicción formal de gobiernu, xeneralmente territorial, dientro la ilesia[23][24]. Hai trés niveles dientro'l cleru: l'episcopáu, compuestu por obispos con xurisdicción sobro un área xeográfica nomada diócesis o eparquía; el presbiteriáu, formáu por sacerdotes ordenaos polos obispos y que trabayen dientro les diócesis llocales o n'órdenes relixoses; y el diaconáu, compuestu por diáconos qu'axuden a obispos y sacerdotes n'estremaes funciones del so ministeriu. El cabezaleru de la Ilesia ye l'obispu de Roma, el papa, que la so xurisdicción ye nomada Santa Sede. Parallelamente a la estructura diocesana hai bayura d'instituciones relixoses que funcionen autónomamente, dalgunes embaxu la xurisdicción del so obispu llocal pero les más de les veces suxetes namái a l'autoridá del papa. La mayoría d'estes instituciones son namái d'homes o de muyeres, pero hai dalgunes nes que conviven persones de los dos sexos. Arriendes de les persones ordenaes hai seglares, persones non ordenaes, qu'axuden en diferentes funciones llitúrxiques demientres el cultu.

Santa Sede, papáu, Curia Romana y Colexu Cardenaliciu[editar | editar la fonte]

"Darete les llaves del Reinu de los cielos. Lo qu'arreyes na tierra, arreyaráse en cielu, lo que desarreyes na tierra, desarreyarase en cielu", díxo-y Xesús a Pedru nel evanxeliu de San Matéu (16:1919). Les dos llaves cruciaes, una dorada ya otra platiada, del escudu de la Santa Sede simbolicen les llaves de Simón Pedro y representen el poder del papáu pa facer y desfacer. La tiara papal, con trés corones, simboliza'l triple poder del papa como "pa de los reis", "gobernador del mundu" y "vicariu de Cristu". La cruz dorada asitiada sobre la bola del mundu que corona la tiara simboliza la soberanía de Xesucristu.

El cumal de la xerarquía de la Ilesia Católica ocúpalu l'obispu de Roma, que recibe'l nome de papa (del llatin papa, pa)[23]. L'actual, de nome Franciscu, ye'l 266ᵘ papa, y foi escoyíu nún cónclave papal el 13 de marzu de 2013.

El oficiu del papa ye'l papáu. La Ilesia Católica considera que Cristu instituyó'l papáu al dá-y les llaves del cielu a san Pedru. La xurisdicción eclesiástica papal ye nomada Santa Sede (Sancta Sedes en llatín) o Sede Apostólica (esto ye, la sede del apóstol Pedru)[25][26]. Al serviciu directu del papa ta la Curia Romana, el cuerpu de gobiernu central de la Ilesia, que trabaya nos asuntos cotidianos rellacionaos cola so organización.

El papa ye, tamién, soberanu de la Ciudá del Vaticanu[27], un enclave dientru de Roma que ye una entidá xurídicamente distinta de la Santa Sede. Ye na so condición de cabezaleru de la Santa Sede, y non como soberanu de la Ciudá del Vaticanu, como'l papa recibe embaxadores d'otros estaos a los qu'unvia tamién los sos propios representantes diplomáticos. La Santa Sede tamién concede órdenes, condecoraciones y medalles; un exemplu d'elles son les órdenes de caballería que surdieron na Edá Media.

La basílica de San Pedru, el templu más famosu de Roma, asítiase nel llugar nel que la tradición considera que ta la tumba de Pedru, pero esta nun ye la catedral del papa. La so catedral como obispu de la diócesis de Roma ye l'archibasílica de San Xuan de Letrán. Esta asítiase na ciudá de Roma, en territoriu italianu, magar que tien privilexos d'extraterritorialidá qu'esti país-y concedió a la Santa Sede.

La dignidá de cardenal ye un rangu honoríficu concedíu polos papes a determinaos clérigos, que pueden ser miembros de la Curia Romana, obispos de grandes ciudaes del mundu o teólogos importantes. El papa puede acudir en busca de conseyu y d'axuda pal gobiernu de la Ilesia al Colexu Cardenaliciu, formáu por tolos cardenales del mundu. Esti colexu ye'l que, cuando un papa muerre o abdica, aconceya pa elixir un nuevu papa. Tolos cardenales menores de 80 años formen, nesa circunstancia, un colexu electoral qu'aconceya de siguío hasta nombrar un nuevu papa[28]. Magar qu'esti conceyu, nomáu cónclave papal, puede escoyer a cualisquier católicu de sexu masculín como papa dende 1389 tolos papes foran primero cardenales[29].

Códigu de Derechu Canónicu[editar | editar la fonte]

El Códigu de Derechu Canónicu (en llatín jus canonicum) ye'l sistema de lleis y principios llegales ellaboraos y fechos cumplir poles autoridaes xerárquiques de la Ilesia Católica pa regular la so organización y gobiernu y pa dirixir les actividaes de los católicos na so xera de desendolcar la misión de la ilesia[30]. El sistema de lleis de la Ilesia Llatina foi el primer sistema llegal del mundu occidental[31] y ye'l más antiguu con un funcionamientu ininterrumpíu nel mundu[32]; les 23 ilesies católiques orientales, pela so banda, gobiérnense acordies a les ordenances propies del canon llexislativu oriental, que recueye y adapta les lleis antigües que rixeron de siempres estes ilesies[33]

Les lleis eclesiástiques positives, basaes directa o indirectamente na presuposición de la esistencia d'una llei divina inmutable, la llei natural, deriven so autoridá formal, no que cinca a les lleis qu'afecten al conxuntu de la Ilesia, del papa: esti ye'l supremu llexislador (el Supremu Pontífice), qu'axunta na so persona la totalidá de los poderes llexislativu, executivu y xudicial[34]. Les lleis más específicas, o non xenerales, deriven la so autoridá formal de la promulgación fecha por un llexislador de rangu inferior al supremu llexislador, seya ordinariu o delegáu por elli. Los cánones o lleis d'esti códigu nun afecten namái a cuestiones de naturaleza moral o doctrinal, sinón a toes aquelles propies de la condición humana. Esti códigu organízase con tolos elementos habituales d'un sistema llegal maduru[35]: lleis, xulgaos, abogaos, xueces[35], un códigu llegal completu y perfectamente articuláu pa la Ilesia Llatina[36] y otru pa les ilesies católiques orientales[36], directrices pa la interpretación de les lleis[37] y castigos[38].

El Códigu de Derechu Canónicu regula la vida y la organización de la vida de la Ilesia Católica, y ye independiente de la llei civil de cada estáu. Nos asuntos nos que ye competente namái almite la preeminencia de la llei civil en cuestiones específiques como la tutela de menores[39]; la llei civil, pela so banda, consiente la preeminencia del derechu canónicu en materies específiques como el matrimoniu canónicu[40]. Los testos anguaño en vigor (2020) son el Códigu de Derechu Canónicu (Codex Iuris Canonici) de 1983, na Ilesia Llatina[41], y el Códigu de los Cánones de les Ilesies Orientales (Codex Canonum Ecclesiarum Orientalium) de 1990, nes ilesies orientales[42].

Ilesia Llatina ya ilesies orientales[editar | editar la fonte]

Fachada de l'archibasílica de San Xuan de Letrán, la catedral del papa na so condición d'obispu de la diócesis de Roma.

Nos primeros años de la historia del catolicismu desarrolláronse, neto na fastera occidental d'Europa que na oriental, diverses modalidaes de cristianismu. La mayoría de les de tradición oriental nun tán, de magar el Gran Cisma de 1054, en comunión cola Ilesia Católica, pero hai delles ilesies particulares autónomes que sí: toes elles son ilesies sui iuris, esto ye, ilesies independientes y de propiu derechu, autónomes pa decidir el futuru de so. La Ilesia católica, anguaño, confórmenla la Ilesia Llatina, la única que sobrevivió de les de tradición occidental, con más de 1.000 millones de fieles, y 23 ilesies autónomes de tradición oriental, les Ilesies Católiques Orientales, que tienen una feligresía conxunta de 17,8 millones de fieles (2017)[43][44].

La Ilesia Llatina ye gobernada pol papa y polos obispos diocesanos nombraos directamente por elli. El papa exerce el papel de patriarca na Ilesia Llatina, que representa la forma orixinal de la Cristiandá occidental, aquella practicada na fastera occidental del Imperiu romanu, heriede de creyencies y vezos orixinaos n'Europa y el noroeste d'África nos primeros sieglos de la historia de la Cristiandá y qu'anguaño son compartíos parcialmente por otres ilesies non católiques que los oríxenes de so remóntense al tueru protestante[45]. Les ilesies católiques orientales, pela so banda, siguen les tradiciones y la espiritualidá propies de la Cristiandá oriental, magar que tienen caltenío siempre la so obediencia al papa o decidieron volver a ella nos sieglos que siguieron al Gran Cisma. Estes ilesies son comunidaes de cristianos católicos con vezos llitúrxicos y espirituales que nun espeyen diferencies doctrinales cola Ilesia Llatina, sinon que son reflexu de distintes influencies históriques y culturales.

El Códigu de los Cánones de les Ilesies Orientales define una ilesia sui iuris (independiente y de plenu derechu) como un grupu de fieles cristianos que comparten una xerarquía sacerdotal que tien el reconocimientu del papa como suprema autoridá en cuestiones de doctrina dientru d'esa ilesia[46]. Esta definición ye una innovación recoyida nel Códigu citáu pa facer notar la relativa autonomía d'estes ilesies[47], que tán en comunión completa col papa, esto ye, reconocen la so supremacía, pero tienen estructures de gobiernu ya tradiciones llitúrxiques estremaes de les de la Ilesia Llatina. El términu ilesia sui iuris nun apaez como talo recoyíu nel Códigu de Derechu Canónicu pa denomar a la Ilesia Llatina, pero hai un reconocimientu tácitu d'esa equivalencia.

Delles ilesies católiques orientales tán dirixíes por un patriarca, elexíu pol sínodu de los obispos d'esa ilesia[48]; otres tán mandaes por un arzobispu principal[49], otres por un obispu metropolitanu[50] y otres organícense como eparquíes individuales[51]. Caúna de les ilesies ye autónoma pa decidir sobro la so propia organización, los sos ritos llitúrxicos, el so calendariu llitúrxicu y dellos otros aspectos, y ta suxeta namái a la obediencia, en cuestiones de doctrina, a l'autoridá del papa. La Curia Romana tien un departamentu específicu, la Congregación pa les Ilesies Orientales, encargáu de les rellaciones con eses ilesies[52]. El papa, en xeneral, nun intervién nel nomamientu d'obispos o sacerdotes de les ilesies católiques orientales, sinon que delega nes estructures de gobiernu d'elles, pero podría facelo si lo considerara necesariu o comeniente.

Diócesis, parroquies, organizaciones ya institutos[editar | editar la fonte]

Mapa de les sodivisiones territoriales (provincies eclesiástiques y archidiócesis) nes que s'organiza la Ilesia Católica.

Los distintos países, rexones o grandes ciudaes organícense n'ilesies particulares, nomaes diócesis na Ilesia Llatina y eparquíes nes ilesies católiques orientales, dirixíes caúna por un obispu. Delles diócesis formen una provincia eclesiástica: el obispu d'una d'elles, la diócesis metropolitana, recibe'l nome d'arzobispu o obispu metropolitanu, y ye'l cabezaleru de los demás obispos de la provincia. Los obispos d'un país concretu formen parte d'un conceyu nomáu conferencia episcopal nacional, sodividida en conferencies episcopales rexonales en dellos países. En 2014 la Ilesia Católica tenía un total de 2.998 diócesis[1].

Cada diócesis sodivídese en parroquies, atendíes caúna por ún o más sacerdotes, diáconos o laicos con funciones pastorales[53]. Les parroquies son les responsables del cultu regular de los sacramentos y de l'atención pastoral de los fieles del so territoriu[54]. En 2016 había 221.700 parroquies católiques nel mundu[55].

Na Ilesia Llatina los homes pueden ser, tres de recibir la ordenación sacramental, diáconos o sacerdotes. Homes y muyeres pueden ser ministros laicos, facultaos pa distribuyir la Comunión, y tamién llectores nos oficios sagraos y molacinos. Históricamente namái homes y neños podíen exercer la función de molacín, pero de magar la década de 1990 permitióse-yos tamién a muyeres y neñas exercer esta función[56].

Los católicos que recibieron l'orde sacerdotal, y tamién laicos, pueden dedicase a la vida consagrada, de forma individual como freru o virxe consagrada, o formando parte d'un institutu, relixosu o secular, de vida consagrada, nos que toma unos votos que confirmen el so deseyu de siguir los trés preceutos evanxélicos de castidá, probeza ya obediencia[57]. Exemplos d'institutos de vida consagrada son los benedictinos, los carmelites, los dominicos, los franciscanos, les misioneres de la caridá, los lexonarios de Cristu o les hermanes de la misericordia[57]. El términu "institutu relixosu" ye un términu modernu que compriende los antiguos de "órdenes relixoses" y "congregaciones relixoses", qu'antaño teníen un estatus estremáu nos códigos de derechu canónicu. Anguaño los téminos "orde relixosa" y "institutu relixosu" intercámbiense, nel usu coloquial, pa facer referencia a una mesma realidá.

Miembros de la Ilesia Católica[editar | editar la fonte]

Númberu de católicos por país (2011).

El catolicismu ye la segunda confesión relixosa con mayor númberu de fieles nel mundu, namái per detrás del sunismu, rama mayoritaria del Islam[58]. L'estatus de miembru de la ilesia católica, definíu pol bautismu, compártíenlu, al final de 2018, 1.329 millones de persones, esto ye, el 18% de la población mundial[59]. No que cinca al pesu d'esta confesión dientro de les ilesies cristianes, cuasi la metá de los cristianos del mundu son católicos[60]. La so distribución pel mundu sigue, nes caberes décades, un patrón de descensu de católicos n'Europa y ascensu del so númberu nos continentes del hemisferiu sur. Asina, actualmente viven n'Europa el 21,5% de los católicos, el 17,8% n'África, el 11,1% n'Asia, el 48,3% n'América y el 0,9% n'Oceanía[59].

Hai diferentes tipos de ministros católicos: clérigos ordenaos (sacerdotes), laicos con funciones ministeriales, misioneros y catequistes. A finales de 2014 había nel mundu 465.595 clérigos ordenaos, de los que 5.237 yeren obispos, 415.792 sacerdotes (diocesanos, los cures, o relixosos, los flaires) y 44.566 diáconos permanentes[61]. Ente los ministros non ordenaos había 3.157.568 catequistes, 347.679 misioneros laicos y 39.951 laicos con funciones ministeriales. Esi mesmu añu, los católicos comprometíos cola vida relixosa o consagrada en comunidá yeren 54.559 homes y 705.529 muyeres. Estes persones nun recibieron el sacramentu del orde, y xeneralmente nun se-yos considera ministros a nun ser que pertenezcan a dalguna de les categoríes ministeriales anteriormente nomaes[61].

Doctrina[editar | editar la fonte]

La doctrina católica tien desarrolláose al traviés de los sieglos, definiéndose a partir de les enseñances directes de los primeros cristianos, de les definiciones, conseñaes nos documentos de los concilios ecuménicos y nes bules papales, de lo que son les creyencies católiques ortodoxes, y del debate teolóxicu. La ilesia percree que ye continuamente guiada pol Espíritu Santu cuando discute cuestiones teolóxiques, y que ye, gracies a la so proteición, infalible no que cinca a cuestiones doctrinales[62][63].

La Ilesia cree que la revelación tien una fonte única, Dios, que la tresmite de dos formes, al traviés de les Sagraes Escritures y al traviés de la Tradición Apostólica[64][65], que son infaliblemente interpretaes pol maxisteriu de la Ilesia[66]. Les Sagraes Escritures, la biblia católica, son un conxuntu de 73 llibros, 46 del Vieyu Testamentu y 27 del Nuevu Testamentu, directamente inspiraos por Dios a los sos autores. La Tradición Apostólica ye'l conxuntu d'enseñances y creyencies presentes na Ilesia de magar el tiempu de los apóstoles[67]. Sagraes Escritures y Tradición Apostólica reciben el nome conxuntu de depósitu de la fe (depositum fidei en llatín), y son interpretaes pol maxisteriu de la Ilesia, l'autoridá interpretadora de la divinidá qu'exercen el papa y el colexu episcopal[68]. El resultáu de los sos trabayos interpretativos ye'l Catecismu de la Ilesia Católica, qu'afita les creyencies de la Ilesia y ye espublizáu pola Santa Sede[69][70].

La naturaleza de Dios[editar | editar la fonte]

Representación, nún diagrama cenciellu, del conocíu como Escudu de la Trinidá (Scutum Fidei), símbolu que desplica el calter unitariu y trinitariu de la divinidá cristiana. Esti emblema considerábase, a finales de la Edá Media, el escudu d'armes de Dios.

La Ilesia Católica afirma qu'hai un únicu y eternu Dios, que esiste como pericóresis, como un ser únicu con una única sustancia y esencia, una mesma naturaleza divina, formada por trés hipóstasis o persones: el Padre, el Fíu ya l'Espíritu Santu, que conformen conxuntamente la Santísima Trinidá[71].

Los católicos creen que Xesucristu ye la "Segunda Persona" de la Trinidá, Dios Fíu. Dios, al traviés del poder del Espíritu Santu, y en un actu conocíu como Encarnación, xuntó la so naturaleza divina cola humana al traviés de la concepción de Cristu nel vientre de la Virxe María. Cristu, poro, ye completamente divín y completamente humanu, al puntu de tener inclusu alma humana. La Ilesia enseña que la misión de Cristu na tierra incluyía la prédica de les sos enseñances y l'exemplu prácticu d'elles pa que los sos siguidores, al traviés del rellatu de les sos andances fechu nos cuatro evanxelios, pudieran tener cuenta d'elles y aplicales. Xesús, creyen los católicos, tuvo llibre de pecáu demientres tuvo vivu, y permitió ser inxustamente crucificáu como un sacrificiu de so pa llograr la reconciliación, conocida como Misteriu Pascual[72], de la humanidá con Dios. Neto la pallabra griega "Cristu" que la pallabra hebrea "Mesíes" signifiquen l'unxíu, faciendo referencia a la creyencia cristiana de que la muerte y resurrección de Xesús representen el cumplimientu de les profecíes mesiániques del Vieyu Testamentu[73].

La Ilesia Católica enseña dogmáticamente que "l'Espíritu Santu procede eternamente del Padre ya'l Fíu, non como dos principios separtaos sinón como un solu principiu". Y tamién qu'el Padre, como "el principiu ensin principiu", ye'l orixe del Espíritu Santu, pero tamién que Elli, como Padre del únicu Fíu, ye col Fíu el principiu únicu del que procede l'Espíritu Santu[74]. Esta creyencia esprésase na conocida como cláusula Filioque, añadida a la versión llatina del credu de Nicea de 381 pero non incluyida nes versiones en griegu d'esi credu, que foron les usaes na Cristiandá oriental[75].

La naturaleza de la Ilesia[editar | editar la fonte]

La Ilesia Católica defínese como "la única iglesia verdadera"[5][76], "el sacramentu universal de salvación pa la raza humana"[77] y "la única relixón verdadera"[78]. Acordies col Catecismu, la Ilesia Católica ye descrita nel credu de Nicea como "una, santa, católica y apostólica"[79]: estos cuatro atributos conócense en conxuntu col nome de Notes de la Ilesia. Esta considera qu'el so fundador ye Xesús[80][81]: el Nuevu Testamentu recueye dellos eventos consideraos inicios del so deseyu d'establecer una ilesia, como les sos actividaes proselitistes y enseñances y el so unviu de los apóstoles como testigos del so ministeriu, sufrimientu y resurrección. Na Gran Comisión, tres de resucitar, instruyó a los apóstoles pa que continuaran col so llabor. La venida del Espíritu Santu sobro los apóstoles, nel acontecimientu conocíu como Cincuesma, ye interpretada como l'entamu del ministeriu públicu de la Ilesia Católica[82]. Esta afirma que tolos obispos consagraos formen parte d'una llínia de sucesión ininterrumpida colos apóstoles de Cristu, la llamada socesión apostólica[82]. En particular, l'obispu de Roma ye consideráu el socesor del apóstol Simón Pedru, y d'esi fechu derívase la so supremacía sobre'l restu la Ilesia[83].

El dogma católicu establez que la Ilesia representa "la presencia continuada de Xesús na tierra",[84] y que ella y naide namái qu'ella tien los medios completos pa la salvación[85]. Al traviés de la pasión (sufrimientu) de Cristu, que finó na so crucifixión según lo recoyío nos evanxelios, Cristu fizo una ofrenda de so a Dios Padre pa reconciliar a la humanidá con Dios[86]. La resurrección de Xesús convirtiolu en "el primer nacíu d'ente los muertos"[87], el primeru ente munchos hermanos: aquellos que se reconcilien con Dios y sigan los mandatos de Cristu han poder entrar nel reinu de Dios[88]. La Ilesia ve la so lliturxa y sacramentos como una forma de perpetuar les gracies algamaes al traviés del sacrificiu de Cristu pa fortalecer la rellación del creyente con Cristu y como axuda pa vencer al pecáu[89].

Referencies[editar | editar la fonte]

  1. 1,0 1,1 «L'Annuario Pontificio 2015 e l' "Annuarium Statisticum Ecclesiae" 2014».
  2. Noll MA, The New Shape of World Christianity, p. 191. IVP Academic, Downers Grove, 2009.
  3. O'Collins, Introducción.
  4. Constitución dogmática de la Ilesia Lumen Gentium. Conciliu Vaticanu II, 21 de payares de 1964.
  5. 5,0 5,1 Vatican congregation reaffirms truth, oneness of Catholic Church, na web de l'archidiócesis de Baltimore (archbalt.org).
  6. Bokenkotter T, A Concise History of the Catholic Church, p. 7. Nueva York, Double Day, 2004. ISBN 978-0-307-42348-1.
  7. Evanxeliu de San Matéu, 16:19.
  8. Catecismu de la Ilesia Católica, párrafu 890.
  9. Catecismu de la Ilesia Católica, párrafu 835.
  10. Gunton C, "Christianity among the Religions in the Encyclopedia of Religion", en Religious Studies, Vol. 24, núm. 1, p. 14 (1988).
  11. Catecismu de la Ilesia Católica, artículos 1322-7.
  12. The four Marian dogmas, na web Catholic News Agency.
  13. Agnew J, Deus Vult: The Geopolitics of Catholic Church. Geopolitics, 2004;15(1):39-61. doi:10.1080/14650040903420388.
  14. MacCulloch, Christianity, p. 127.
  15. La cita concreta, tornada al asturianu, ye: "Auquiera qu'apaezca l'obispu, qu'estea allí la xente, asina como auquiera que pueda tar Xesús ta la ilesia universal [katholike]."
  16. Thurston H, "Catholic", en Knight K (ed.). The Catholic Encyclopedia. New York, Robert Appleton Company, 1908.
  17. San Cirilu de Xerusalen, Llectura XXVIII, 26.
  18. Entrada Eastern Orthodoxy na web de la Enciclopedia Británica, britannica.com.
  19. Cánones y decretos del conciliu de Trento, na web history.hanover.edu.
  20. Decretos del Primer Conciliu Vaticanu na web papalencyclicals.net.
  21. Decretos del Conciliu Vaticanu II na web papalencyclicals.net.
  22. Entrada Roman Catholic na Catholic Encyclopedia (newadvent.org).
  23. 23,0 23,1 Catecismu de la Ilesia Católica, artículos 880-3.
  24. Van Hove A, Hierarchy, na Catholic Encyclopedia. New York, Robert Appleton Company, 1913.
  25. Pelikan J, Christian Tradition: A History of the Development of Doctrine, Volume 4: Reformation of Church and Dogma (1300-1700), p. 114. University of Chicago Press, 1985. ISBN 978-0-226-65377-8
  26. Feduccia R (ed), Primary Source Reading in Catholic Church History, p. 85. Saint Mary's Press, 2005. ISBN 978-0-88489-868-9
  27. Vatican City State - State and Government, na web vatican.va.
  28. Duffy, p. 416.
  29. Duffy, p. 417-8.
  30. Della Rocca, Diritto canonici, p. 3. ISBN 978-8813107123.
  31. Berman HJ, Law and revolution: The formation of the Western legal tradition, pp. 86, 115. ISBN 978-0674517769.
  32. Wacks R, Law: A very short introduction (2ª ed.), p. 13. Oxford University Press, 2015. ISBN 978-0198745624.
  33. Códigu de los Cánones de les Ilesies Orientales, canon 2.
  34. Códigu de Derechu Canónicu de 1983, canon 331.
  35. 35,0 35,1 Peters E, A catechist's introduction to canon law, na web canonlaw.info (3 de xineru de 2013).
  36. 36,0 36,1 Della Rocca F, Diritto canonici, p. 49. ISBN 978-8813107123
  37. Códigu de Derechu Canónicu de 1983, cánones 7-22.
  38. Pink T, Conscience and coertion, na web firstthings.com. «El Códigu de Derechu Canónicu de 1983 entá recueye que la Ilesia tien una capacidá coercitiva sobro los bautizaos, con autoridá pa dirixilos y castigalos, con castigos temporales o espirituales, si son culpables d'apostasía o herexía.»
  39. Beal JP, New commentary on the Code of Canon Law, p. 85. Paulist Press, 2000. ISBN 978-0-8091-4066-4.
  40. Agreement between the Holy See and the Republic of Malta on the recognition of civil effects to canonical marriages and to the decisions of the ecclesitical authorities and tribunal about the same marriages, na web vatican.va (3 de febreru de 1993).
  41. Códigu de Derechu Canónicu de 1983, cánones 1-6.
  42. Códigu de los Cánones de les Ilesies Orientales de 1990, canon 1.
  43. Eastern Catholic Churches Statistics, na web cnewa.org.
  44. Yurkus KR, The Other Catholics: A Short Guide to the Eastern Catholic Churches, na web catholiceducation.org.
  45. General Essay on Western Christianity, na web philtar.ac.uk, del Departamentu de Relixón y Filosofía de la Universidá de Cumbria.
  46. Códigu de los Cánones de les Ilesies Orientales, títulu 2.
  47. Kuzhinapurath T, Malankara Catholic Church, Church sui iuris: Juridical Status and Power of Gobernance.
  48. Códigu de los Cánones de les Ilesies orientales, cánones 55-150.
  49. Códigu de los Cánones de les Ilesies orientales, cánones 151-4.
  50. Códigu de los Cánones de les Ilesies orientales, cánones 155-76.
  51. Códigu de los Cánones de les Ilesies orientales, cánones 177-310.
  52. Congregation for the Oriental Churches, na web vatican.va.
  53. Barry, p. 52.
  54. Códigu de Derechu Canónicu de 1983, canon 519.
  55. Laudato Si, na revista Vermont Catholic 2016-17;8(4):73.
  56. Acta Apostolicae Sedis 86 (1994), pp. 541–542.
  57. 57,0 57,1 Códigu de Derechu Canónicu de 1983, cánones 573-746.
  58. Catholic Church, na web yourdictionary.com.
  59. 59,0 59,1 Pubblicazione dell'Annuario Pontificio e dell'Annuario Statistico della Chiesa, 25.03.2020, nota de prensa de la Santa Sede.
  60. Chryssides GD, Wilkins MZ, Christians in the Twenty-First Century, p. 9. Routledge, 2014. ISBN 9781317545583
  61. 61,0 61,1 Pontifical Yearbook 2016 and the Annuarium Statisticum Ecclesiae 2014: dynamics of a Church in transformation, 05.03.2016, nota de prensa de la Santa Sede.
  62. Catecismu de la Ilesia Católica, párrafu 889.
  63. Constitución Dogmática de la Ilesia Lumen Gentium, capítulu III, párrafu 25.
  64. Catecismu de la Ilesia Católica, párrafos 80-81.
  65. Constitución Dogmática de la Ilesia Lumen Gentium, capítulu 2, párrafu 14.
  66. Catecismu de la Ilesia Católica, párrafos 888-92.
  67. Schreck, pp. 15-19.
  68. Schreck, p. 30.
  69. Marthaler, prefaciu.
  70. Carta apostólica Laetamur Magnopere, pola qu'el papa Xuan Pablo II aprueba y promulga la cabera versión del Catecismu de la Ilesia Católica (15 d'agostu de 1997).
  71. Catecismu de la Ilesia Católica, párrafos 232-7, 252.
  72. Catecismu de la Ilesia Católica, parte 1ª, sección 2ª, capítulu 2u, artículu 4u.
  73. Kreeft, pp. 71-72.
  74. Catecismu de la Ilesia Católica, párrafu 248.
  75. Catecismu de la Ilesia Católica, párrafos 245-8.
  76. Levada WC, Responses to Some Questions Regarding Certain Aspects of the Doctrine on the Church. Congregación pa la Doctrina de la Fe, 29 de xunu de 2007.
  77. Constitución Pastoral de la Ilesia nel mundu modernu Gaudium et spes, artículu 45.
  78. Declaración sobre la llibertá relixosa Dignitates humanae, párrafu segundu.
  79. Catecismu de la Ilesia Católica, párrafu 811.
  80. Kreeft, p. 98.
  81. Bokenkotter, p. 30.
  82. 82,0 82,1 Barry, p. 46.
  83. Catecismu de la Ilesia Católica, párrafu 880.
  84. Schreck, p. 131.
  85. Catecismu de la Ilesia Católica, párrafu 816.
  86. Catecismu de la Ilesia Católica, párrafu 608.
  87. Carta a los Colosenses, 1:18.
  88. Barry, p. 26.
  89. El misteriu pascual nos sacramentos de la Ilesia. Compendium del Catecismu de la Ilesia Católica, preguntes 233-5. Libreria Editrice, Ciudá del Vaticanu, 2005.

Bibliografía[editar | editar la fonte]

  • Barry, Rev. Msgr. John F. One Faith, One Lord: A Study of Basic Catholic Belief. Gerard F. Baumbach, Ed.D, 2001. ISBN 0-8215-2207-8.
  • Bokenkotter, Thomas. A Concise History of the Catholic Church. Doubleday, 2004. ISBN 0-385-50584-1.
  • Catecismu de la Ilesia Católica. Libreria Editrice Vaticana, 1994.
  • Duffy, Eamon, Saints and Sinners, a History of the Popes. Yale University Press, 1997. ISBN 0-300-07332-1.
  • Kreeft, Peter. Catholic Christianity. Ignatius Press, 2001. ISBN 0-89870-798-6.
  • MacCulloch, Diarmaid. Christianity: The First Three Thousand Years. Viking, 2010. ISBN 978-0-670-02126-0. Publicáu orixinalmente, col nome, A History of Christianity, por Allen Lane.
  • Marthaler, Berard. Introducing the Catechism of the Catholic Church, Traditional Themes and Contemporary Issues. Paulist Press, 1994. ISBN 0-8091-3495-0.
  • O'Collins, Gerald; Farrugia, Maria. Catholicism: The Story of Catholic Christianity. Oxford University Press, 2003. ISBN 978-0-19-925995-3.
  • Schreck, Alan. The Essential Catholic Catechism. Servant Publications, 1999. ISBN 1-56955-128-6.

Enllaces esternos[editar | editar la fonte]