Noruega

De Uiquipedia
Saltar a: navegación, buscar
Italian traffic signs - old - lavori in corso.svg

Artículu en desendolcu. Polo menos hai un wikipedista trabayando nel desendolcu d'esti artículu. Puen alcontrase errores y nun s'encamienta tenelu como referencia. Enantes de facer un cambéu bultable del artículu notifícalu nel alderique.



Kongeriket Norge
Kongeriket Noreg
Reinu de Noruega
Bandera de Noruega Escudu de Noruega
Bandera de Noruega Escudu de Noruega
Lema nacional: Nengún (Lema real: Alt for Norge, «Tou por Noruega»)
Himnu nacional: Ja, vi elsker dette landet
Situación de Noruega
Capital
 • Población
 • Coordenaes
Oslo
634.463 Hab (2014)
59°54' N 10°45' E
Ciudá más poblada {{{ciudá_más_poblada}}}
Llingües oficiales {{{llingües_oficiales}}}
Llingües reconocíes {{{llingües_reconocíes}}}
Forma de gobiernu Monarquía constitucional
Harald V
Erna Solberg
Constitución
Independencia

 • Declarada
 • Reconocida
17 de mayu de 1814
De la xunión con Suecia
7 de xunu de 1905
26 d'ochobre de 1905
Superficie
 • Total
 • % agua
Llendes
Costes
Puestu 67º
385.186 km²
6%
2.542 km
25.148 km
Población
 • Total
 • Densidá
Puestu 116º
5.109.056 habitantes (2014)
13,23 hab/km²
PIB (PPA)
 • Total (2007)
 • PIB per capita
Puestu 46º
US $ 212.038 millones
US $ 45.453 (2007)
Moneda Corona noruega (kr, NOK) = 100 ore
Xentiliciu Noruegu, -a, -o
Zona horaria
 • en Branu
CET (UTC+1)
CEST (UTC+2)
Dominiu d'Internet .no
Códigu telefónicu +47
Prefixu radiófonicu 3YA-3YZ
Códigu ISO 578 / NOR / NO
Miembru de: ONX, EFTA, CBSS, OTAN, OCDE, OSCE, Conseyu Nórdicu, XE¹ .
Sitiu web del Gobiernu:
{{{web_gobiernu}}}
¹ Estáu asociáu

Noruega, oficialmente Reinu de Noruega (en bokmål Kongeriket Norge, en nynorsk Kongeriket Noreg), ye un país d'Escandinavia, n'Europa del norte. Ye un estáu soberanu y unitariu de calter monárquicu, qu'el territoriu de so compriende la fastera occidental de la península escandinava, la islla de Jan Mayen y l'archipiélagu árticu de Svalbard[1]. Les islles antártica de Pedru I y la subantártica de Bouvet son territorios dependientes de Noruega y, poro, nun se-yos considera parte del reinu. Noruega tamién reclama una fastera de l'Antártida nomada tierra de la reina Maud. Hasta 1814 el reinu incluyía tamién les islles Feroe (dende 1035), Groenlandia (dende 1261) ya Islandia (dende 1262).

Noruega tien una estensión de 385.252 km² y una población (2014) de 5.109.056 habitantes[2]. No que cinca a les sos llendes, comparte con Suecia la so frontera oriental, con una llonxitú de 1.609 km, y llenda tamién con Rusia y Finlandia al noreste. Al sur llenda col estrechu de Skagerrak, que la separta de Dinamarca. La so fachada occidental y septentrional, costera, mira pal océanu Atlánticu Norte y pal mar de Barents.

El actual xefe del estáu (xineru 2015) ye'l rei Harald V. La primera ministra, dende 2013, ye Erna Solberg, que sustituyó nel cargu a Jens Stoltenberg. El país ye, dende 1814, una monarquía constitucional con separación de poderes ente la Corona y el so conseyu, el parllamentu (Storting) y el tribunal supremu del país. Ente 1661 y 1814 el país foi una monarquía absoluta, y anantes d'eso el rei compartía'l poder cola aristocracia. Nacíu de resultes de la batalla de Hafrsfjord (872), el reinu noruegu ye ún de los más vieyos del mundu; tien habío monarquía ininterrumpidamente demientres 1.100 años, y la so llista de reis y condes inclúi a más de sesenta persones.

El país sodivídese política y alministrativamente en dos niveles, los condaos (fylke) y los conceyos (kommune). La minoría Sami tien, amás, della autonomía de xestión nos sos territorios tradicionales, qu'exercen al traviés del parllamentu Sami. Noruega caltién perbones rellaciones colos miembros de la Xunión Europea, cola que tién alcuerdos d'asociación, magar que la so población refugó por dos vegaes en referéndum entrar a formar parte d'ella, y tamién colos Estaos Xuníos. Ye miembru fundador de la Organización de les Naciones Xuníes, la OTAN, el Conseyu d'Europa, el Tratáu Antárticu y el Conseyu Nórdicu; miembru del Área Económica Europea, la Organización Mundial del Comerciu y la Organización pa la Cooperación y el Desarrollu Económicu (OCDE); y forma parte del área Schengen de llibre circulación de persones.

El país combina la economía de mercáu col nomáu modelu nórdicu d'Estáu del bienestar, con sanidá gratuita universal y un ampliu sistema de seguridá social. El país tien grandes reserves de petróleu, gas y minerales, y esporta tamién agua fresca, enerxía elléctrica, pescáu y madera. Una cuarta parte del so productu internu brutu vién-y del petróleu y el gas. Ye'l mayor productor d'estos hidrocarburos fuera d'Oriente Mediu, y esto permíte-y que la de so seya la cuarta mayor renta per cápita del mundu nos llistaos ellaboraos pol Bancu Mundial y el Fondu Monetariu Internacional[3]. Tien ocupao, de 2001 a 2006 y de 2009 a 2014, el primer puestu nel ránking de los países en función del so Índiz de Desarrollu Humanu[4].

Alredor del 994, de resultes de la cristianización d'Escandinavia, acabáronse dos sieglos d'espediciones de saquéu viquingues a les zones del sur y el oeste d'Europa. Noruega, en cuenta d'eso, entamó la so espansión territorial hacia partes de les islles de Gran Bretaña ya Irlanda, ocupando tamién les islles Feroe, Islandia y Groenlandia. El cumal de la so espansión alcontrámoslo en 1265, momentu nel que la combinación de la rivalidá coles ciudaes de la Lliga Hanseática y los estragos que fizo la peste debilitaron el país. En 1397 formó, con Suecia y Dinamarca, la Xunión de Kalmar, que, magar que foi abandonada por Suecia en 1523, persistió colos otros dos reinos axuntaos nún hasta casi trés sieglos dempués. En 1814 una Asamblea constituyente adoptó una constitución, pero Noruega siguió xunida con Suecia porque, de resultes del tratáu de Moss, dambos países teníen el mesmu rei, Carlos XIII de Suecia. Los conflictos nesta xunión foron permanentes y, en 1905 Noruega disolvió la xuntura tres d'un referéndum. Esi mesmu añu elixió a un rei propiu, acabando asina con cinco sieglos de tar gobernada por un rei que nun vivía nel país. Pesie a qu'el país declarose neutral, l'Alemaña nazi ocupó'l país demientres cinco años na Segunda Guerra Mundial. En 1949 Noruega abandonó la neutralidá y integrose, como miembru fundador, na Organización del Tratáu del Atlánticu Norte. El descubrimientu de petróleu nes sos agües territoriales na década de 1960 permitió a la economía del país espolletar enforma, hasta convertise nún de los países más ricos del mundu.

Historia[editar | editar la fonte]

Prehistoria[editar | editar la fonte]

Los primeros habitantes de Noruega pertenecíen a la cultura d'Ahrensburg (11.000-10.000 edC), una cultura del Paleolíticu superior desarrollada demientres el Dryas reciente, que foi el caberu periodu d'enfriamientu del final de la glaciación Weichsel. Esa cultura recibe'l so nome del pueblu homónimu, asitiáu a 25 km al noreste de la ciudá alemana d'Hamburgu, aú s'alcontraron puntes de flecha y cachabes. Les güelgues más antigües en territoriu noruegu atopáronse na fastera del país más averada a la costa, na qu'el xelu entamó a fundise ente'l 11.000 y el 8.000 edC. Los afayos más vieyos que se conserven son ferramientes de piedra, dataes ente'l 9.500 y el 6.000 edC, alcontraes al norte del país, en Finnmark, y al suroeste, en Rogaland. A partir d'eso ellaborose una teoría según la cual dambos xacimientos correspondíen a dos cultures diferentes: la Komsa, na zona al norte del Círculu Polar Árticu, y la Fosna dende Trøndelag al fiordu d'Oslo, más al sur. Sicasí, les evidencies alcontraes dende la década de 1970 dexáronla desfasada.

Petroglifos de la Edá de Piedra atopaos n'Alta (Noruega)

Los afayos más recientes de restos d'aquella dómina a lo llargu de toa la costa amuesen a los historiadores que les diferencies ente les zones pueden entendese simplemente como un desarrollu de distintos tipos de ferramientes, pero toes dientro la mesma cultura. La fauna costera permitió la sobrevivencia de grupos de pescadores y cazadores, que pudieron entrar na costa meridional del país alredor del 10.000 edC. Col pasar de los sieglos diríen avanzando hacia'l norte pela costa, aportando a la rexón ártica bien de tiempu dempués. Dellos sostienen que quiciás dalgunos pudieren aportar tamién al traviés de la costa de la península de Kola, desxelada tamién, pero hai perpoca evidencia d'ello.

Na fastera meridional del país hai restos d'estructures d'habitación dende'l 5.000 edC, que permiten a los arqueólogos facese una idea meyor de cómo yera la vida d'estos cazadores y pescadores. Les sos ferramientes son feches de piedra, y muncho más ellaboraes según va pasando el tiempu. Atopáronse tamién petroglifos (diseños simbólicos grabaos en piedra), especialmente a la vera de zones de caza y pesca; nellos represéntense animales de la dómina (renos, páxaros, focas, salmón, abadexu, ballena...). Los grabaos d'Alta, en Finnmark, son los mayores d'Escandinavia, y foron fechos de forma continuada ente l'añu 4.200 y el 500 edC. Facíanse al nivel del mar, lo que mos permite ver cómo foi la progresión de la llínia de costa de la que diba emerxendo del mar tres de la cabera era glacial.


Edá del Bronce[editar | editar la fonte]

Ente'l 3.000 y el 2.500 edC aportaron al este de Noruega nuevos pobladores de la nomada cultura de la cerámica cordada. Estos colonos yeren agricultores protoindoeuropeos que plantaben granu y curiaben de vaques y oveyes. La población de cazadores-pescadores de la costa occidental foi poco a poco siendo sustituyida por estos granxeros, que nostante caltuvieron la caza y la pesca como formes de complementar los sos medios de vida.

Estensión aprosimao de la cultura de la cerámica cordada.

Dende'l 1.500 edC foi introduciéndose el bronce, magar qu'entá siguieron usándose instrumentos de piedra. La mayoría los xacimientos amuesen pieces de bronce, como broches y armes, que namái los xefes de los grupos podíen permitise tener. Son típicos d'esti periodu los grandes túmulos funerarios que se construyíen a la vera del mar na zona más septentrional del país y ellí y tamién nel interior nes tierres del sur. Continuaron faciendo petroglifos, magar que los motivos representaos cambiaron; desapaecen los animales que-yos sirvíen d'alimentu a los noruegos de la Edá de Piedra y apaecen el Sol, animales, árboles, oveyes o armes, amás de persones, toos ellos con figures perestilizaes.

Edá del Fierro[editar | editar la fonte]

Hai perpocos restos en Noruega de la primer Edá del Fierro (los caberos 500 años edC). Sabemos que los muertos yeren sometíos a cremación, y qu'el so axuar funerariu nun yera bayurosu. Nos primeros cuatro sieglos de la nuestra era los noruegos tuvieron contactos comerciales cola Galia romana. Atopáronse alredor de 70 calderes de bronce, que avezaben usase como urnes funeraries. Estos contactos con xentes del sur traxeron el conocimientu de la escritura, fecha coles lletres nomaes runes; les inscripciones rúniques más antigües del país remóntense al sieglu III. Nesti tiempu la población tenía aumentao, lo que puede conocese combinando estudios topográficos, arqueolóxicos y etimolóxicos. Les raíces de pallabres más vieyes, como nes, vik, y (cabu, bahía y granxa, respectivamente), rellaciónense colos asentamientos más antiguos, quiciás de la Edá del Bronce, mentantu que los asentamientos con nomes qu'inclúin sufixos como vin (práu) o heim (asentamientu) remóntense namái al sieglu I, y piénsase que surdieron p'agospiar a la creciente población de la dómina.

Espada de Sæbø, (ca. 800).

La época de les migraciones[editar | editar la fonte]

Conozse con esti nome al periodu de grandes migraciones qu'hebo n'Europa ente los sieglos IV-VIII na transición ente l'Antigüedá tardía y la Alta Edá Media. No que concierne a Noruega, hay bayura de restos de la dómina del fundimientu del Imperiu romanu occidental (sieglu V). Atopáronse delles tumbes de xefes de grupu con un importante axuar d'armes y oxetos d'oru, y tamién fortaleces defensives construyíes a la vera los cantiles. Hai restos de grandes edificios, d'ente 18 y 27 m de llargu y col teyáu sosteníu por postes de madera, nos que convivíen varies xeneraciones de persones de la mesma familia col ganao, toos embaxu'l mesmu techu. Dende esti sieglu pueden encontrase nicios de la esistencia de protoestaos: les obres de calter defensivu necesiten cooperación y lliderazgu, polo que podemos sospechar la esistencia d'estructures preestatales con dalgún tipu d'organización alministrativa y defensiva.

Esos estaos taríen basaos n'estructures de clan o tribu (p.ex. los Horder de Hordaland, nel occidente del país). Pal sieglu IX caún d'estos pequeños estaos teníen things (asamblees) nes que negociaben y resolvíen les disputes. Los llugares de reunión d'esos thing, nos que solía haber un santuariu al aire llibre (hörgr) o un templu (hov), avezaben a tar nes granxes más grandes o más antigües, que pertenecíen a los xefes o a los granxeros más ricos. Los thing rexonales aconceyaben n'unidaes entá mayores, formando asamblees de propietarios rurales de varies rexones; yeren los nomaos lagting, nos que se desarrollaben les normes que rexíen la vida de les comunidaes. El llugar d'aconceyamientu del Gulating taba en Sognefjord, y puede tener sío el centru d'una confederación aristocrática, nomada Gulatingslag, qu'axuntaba a los clanes de los fiordos ya islles de la fastera occidental de Noruega. Los cabezaleros de la rexón de Trondheim (Trondheimsfjord) aconceyaben nel Frostating, que vio aumentada la so zona d'influyencia al comprender la rexón costera que va del Romsdalsfjord a les islles Lofoten. Na fastera oriental del país, na rexón del llagu Mjøsa, organizose'l Eidsivating, qu'aconceyaba n'Eidsvoll. La rexón averada a Oslo, finalmente, rellacionose en delles dómines con Dinamarca, pero notres desarrolló'l so propiu lagting, nomáu Borgarting, qu'aconceyaba en Sarpsborg.

La dómina de los viquingos[editar | editar la fonte]

El barcu de Gokstad (Muséu de los Barcos Viquingos, Oslo).

La era viquinga caracterízase pola espansión ya emigración de los marineros viquingos. Acordies cola tradición Harald I (Harald Hårfagre) unificó a estos pueblos embaxu'l so mandu nel añu 872, tres de la batalla de Hafrsfjord, en Stavanger, convirtiéndose asina nel primer rei de la Noruega xunida. Magar que la data del 872 seique seya arbitraria, parez afitáu que la xuntura foi primeru del añu 900[5]. El reinu de Harald espardíase principalmente peles fasteres costeres del sur del país. Foi un gobernante duru, y ya en tiempu d'elli, acordies coles sagues, munchos noruegos colaron del país pa vivir n'Islandia, les islles Feroe, Groenlandia y partes de Gran Bretaña ya Irlanda. Asina, les actuales ciudaes irlandeses de Dublín, Limerick y Waterford foron fundaes por colonos noruegos[6]. La mitoloxía y les tradiciones autóctones de Noruega foron siendo sustituyíes poles cristianes demientres los sieglos X y XI, nún procesu atribuyíu a los nomaos reis misioneros, Olaf I y Olaf II (Santu Olaf). El primer rei cristianu del país, sicasí, foi Haakon I, nomáu Haakon el buenu, a mediaos del sieglu X, magar que los sos intentos por esparder el cristianismu ente la población foron refugaos por esta. Más sero Olaf I, nacíu ente'l 963-969, axuntó una flota de 390 barcos p'atacar Inglaterra. A la so vuelta a Noruega, en 995, aportó a Moster, aú construyó una ilesia cristiana, la primera del país. D'ellí coló al norte, a Trondheim, onde foi aclamáu rei pol Eyrathing nesi mesmu añu de 995[7] .

El feudalismu nun llegó a desarrollase en Noruega y Suecia na forma na que se desendolcó nel restu d'Europa. La corona, amás, viose obligada a facer cada vegada mayores concesiones a la Lliga Hanseática no que cincaba a la economía del país y el so comerciu esterior, una y bones los préstamos que-y facía a la corona y la gran deuda d'esta pa cola lliga forciaron a los socesivos reis a dexar el monopoliu de l'actividá económica en manes de la Hansa[8]. Esto alterió la estructura social del país: el campesináu viose perafectáu por esta situación, que torgó amás la formación de la nueva clase burguesa, que nun llegó a esistir realmente nel país nesta dómina.

La xunión de Kalmar[editar | editar la fonte]

Tres de la muerte de Haakon V, en 1319, Magnus Erikson, un neñu de trés años, heriedó'l tronu, convirtiéndose nel rei Magnus VII de Noruega[9]. Al tiempu, les maniobres pa convirtilu nel rei de Suecia, nuna dómina na qu'el cargu de rei de Suecia y Dinamarca yera electivu, tuvieron ésitu, y Magnus convirtiose d'esta forma en rei de Suecia y Noruega.

Territoriu de la Xunión de Kalmar (1500)

En 1349 la Peste Negra afectó enforma al país, matando al 50-60% de la so población y llevándolu a la decayencia social y económica. El país quedó na probeza, y magar que la tasa de mortalidá de la peste foi asemeyada a la que tuvo nel restu d'Europa, la recuperación llevó-y muncho más tiempu a un país de población tan escasa y espardida. Primero de la peste vivíen nel país mediu millón de persones, y tres del pasu d'esta munches granxes quedaron improductives. Por embargu, la escasez de manu d'obra fizo que les condiciones del arrendamientu de tierres ameyoraran muncho pa los pocos campesinos que sobrevivieron a la enfermedá.

Magnus VII gobernó Noruega hasta 1350, cuando foi sustituyíu pol so fíu Haakon VI. Esti casó en 1363 con Margarita, fía del rei Valdemar IV de Dinamarca, y tres de la so muerte, en 1379, el so fíu Olaf, que daquella tenía dos años, convirtiose en rei col nome d'Olaf IV. Esti fora elixíu yá rei de Dinamarca el 3 de mayu de 1376, y asina los dos reinos xuntáronse nuna xunión personal que foi dirixida, demientres Olaf foi guaje, por so madre, la reina Margarita. Esta trabayó enforma pa consiguir qu'el so fíu fora tamién elixíu polos nobles suecos como rei, y tuvo a piques de consiguilo. Nun pudo porque Olaf morrió de sópitu. Dinamarca nomó a la reina gobernanta temporal, y el 2 de febreru de 1388 Noruega coronola tamién como reina.

Margarita persabía qu'el so poder taría más afitáu si consiguía alcontrar un rei que gobernara nel so nome, y escoyó pal cargu a un nietu de la so hermana, Eric de Pomerania. Nún conceyu de tolos pueblos escandinavos cellebráu en Kalmar Erik foi coronáu rei de los trés países; asina nació la Xunión de Kalmar.

La xunión con Dinamarca[editar | editar la fonte]

Suecia separtose de la Xunión de Kalmar en 1521, y Noruega quixo facer lo mesmo. Sicasí, la rebelión que tentó de consiguilo foi derrotada, y Noruega siguió axuntada con Dinamarca hasta 1814, 436 años en total. Demientres la época del romanticismu nacionalista del sieglu XIX dio en llamase a esti periodu la nueche los 400 años, porque tol poder real, l'alministración y la vida cultural ya intelectual del reinu taben concentraos en Copenhague. Nostante, estos sieglos foron de gran prosperidá y progresu pa Noruega, especialmente no que cinca al comerciu esterior, y nellos recuperose tamién de la catástrofe demográfica que provocara la Peste Negra. En términos económicos la economía de Dinamarca y la de Noruega complementábense, aportando la primera el cereal y otros alimentos a Noruega y esta pescáu, madera y metales a Dinamarca.

Cola llegada del protestantismu al país, en 1536, disolviose l'arzobispáu de Trondheim, y la ilesia noruega perdió la so independencia, convirtiéndose en tributaria de la de Dinamarca. La corte danesa quedose colos sos ingresos y les sos posesiones, y desaniciose tamién el vezu de peregrinar a visitar el templu de Nidaros, aú se guardaben les reliquies de Santu Olaf. Con ello perdiose muncho del contactu de Noruega cola vida cultural y económica del restu d'Europa.

En 1661 Noruega recuperó la so categoría de reinu independiente, magar que siguía xuníu a Dinamarca. Sicasí, nesti sieglu XVII, tres de varies guerres perdíes con Suecia, el so territoriu menguó cola perda de les provincies de Båhuslen, Jemtland y Herjedalen, que viose compensada parcialmente pola alquisición, a costa de la propia Suecia y de Rusia, de les provincies de Troms y Finnmark nel norte del país. P'acabar el sieglu una gran fame, en 1695-96 mató al 10% de la población[10]. Y nun foi la única nin la cabera: ente 1740 y 1800 la collecha perdiose nueve vegaes, provocando otra vuelta escasez y muerte[11]

La xunión con Suecia[editar | editar la fonte]

Dempués qu'el reinu de Dinamarca-Noruega fora atacáu pol Reinu Xuníu na batalla de Copenhague (1807) aliose col emperador francés Napoleón Bonaparte, lo que llevó al país a un estáu de miseria y fame nel añu 1812. Esi aliniamientu del reinu danés col bandu que había perder la guerra fizo que, n'acabando esta, perdiera'l territoriu continental de Noruega, que pasó, al traviés del tratáu de Kiel, a manes del rei de Suecia, que determinó tamién que les antigües provincies noruegues d'Islandia, Groenlandia y les islles Feroe quedaran formando parte del reinu danés.

El parllamentu noruegu reuníu pa proclamar la constitución de 1814 (cuadru de Henrik Wergeland).

Noruega aprovechó la oportunidá pa declarar la so independencia. Adoptó una constitución basada na estaunidense y na francesa, y elixió al príncipe danés Christian VIII como'l so rei el 17 de mayu de 1814. Esta fecha conmemórase añalmente cola cellebración del día de la constitución noruega nel nomáu Syttende Mai (17 de mayu). La dixebra, sicasí, duró perpoco. Esti refugu noruegu a la decisión de les grandes potencies de xuncila a Suecia provocó la guerra sueco-noruega de 1814. L'exércitu suecu nun yera fuerte abondo pa valtar la resistencia noruega, pero Noruega nun tenía fondos pa caltener una guerra llarga, y les grandes potencies intervinieron. Barcos rusos y británicos bloquiaron la costa noruega y los dos bandos foron obligaos a negociar la convención de Moss. Acordies colos términos d'ella Christian abdicó de la corona noruega y autorizó al parllamentu d'esi país a facer los cambeos constitucionales necesarios pa permitir la unión personal que Noruega foi forciada a aceptar. El 4 de payares de 1814 Carlos XIII de Suecia foi proclamáu pol parllamentu como rei de Noruega, entamando así la dómina de la unión personal de dambos países[12]. Por esti alcuerdu Noruega caltenía la so constitución lliberal y toes les sos instituciones independientes, sacando les d'asuntos esteriores.

La recuperación de los estrozos causaos poles guerres napoleóniques llevó tiempu, y el crecimientu económicu foi pequeñu hasta 1830. Entonces entamó la medría, y tamién el periodu del nacionalismu románticu noruegu, nel qu'esti pueblu buscó definir y espresar el so carácter nacional distintivu. El movimientu cubrió toles estayes culturales: lliteratura, con figures como Henrik Wergeland, Bjørnstjerne Bjørnson, Peter Christen Asbjørnsen o Jørgen Moe; pintura, con nomes como los de Hans Gude y Adolph Tidemand; o música, con Edvard Grieg como figura más destacada. Y tamién en política llingüística: los intentos pa definir un estándar pal llinguaxe escrito dieron llugar a les dos formes oficiales actuales d'escribir el idioma noruegu: el Bokmål y el Nynorsk.

Retratu a caballu del rei Carlos XIV Xuan pintáu por Fredric Westin.

El segundu rei suecu-noruegu foi Carlos XIV Xuan de Suecia (nomáu Carlos III Xuan en Noruega), que xubió al tronu en 1818. Reinó hasta 1844, y foi un home de personalidá complexo. Protexó la constitución y les llibertaes de los sos reinos nuna dómina de recuperación del puxu del absolutismu n'Europa, lo que-y valió fama de ser un rei lliberal. Sicasí, yera implacable na so llucha pa desmontar los movimientos políticos reformistes, y especialmente col movimientu independentista noruegu, y nun dudaba n'usar a la policía secreta o restrinxir la llibertá de prensa cuando yera necesario p'algamar el so oxetivu[13].

El periodu románticu que siguió al reináu de Carlos III Xuan foi una dómina de cambeos sociales y políticos importantes. En 1854 reconocióse-yos a les muyeres el derechu d'heriedar propiedaes igual que los homes, y en 1863 finó'l tiempu nel qu'una muyer soltera tenía una condición asemeyada a la de los menores y reconocióse-yos a les femes el derechu de poder optar a delles ocupaciones, siendo l'exemplu más principal d'esto la posibilidá de convertise en mayestres d'escuela[14]. Pesie a estos cambeos, a mediaos del sieglu XIX Noruega taba perlloñe de ser una auténtica democracia. Namái los funcionarios, los propietarios y los burgueses de les ciudaes teníen derechu al votu, y esto provocaba dél descontentu social.

La sociedá noruega siguía siendo, sicasí, conservadora. La vida, especialmente la económica, taba dominada por la aristocracia de los profesionales qu'ocupaben la mayoría de los puestos más importantes del gobiernu[15]. Nun había una burguesía fuerte que desixera cambeos nesti control aristocráticu, y eso fizo que la marea revolucionaria que percorrió Europa en 1848 nun afectara muncho a Noruega. L'únicu movimientu asemeyáu a los que protagonizaron les revueltes nel continente foi el dirixíu por Marcus Thrane. Esti yera un socialista utópicu qu'apelló a les clases trabayadores a que provocaran un cambéu d'abaxu arriba na estructura social. Pa esi fin organizó en 1848 una sociedá de trabayadores en Drammen. Nunos meses tenía más de 500 miembros y yá publicaba'l so propiu periódicu, y en dos años organizáranse 300 sociedaes, con más de 20.000 miembros en total, en tol país. La mayoría d'ellos yeren xente de les clases baxes del campu y de la ciudá, que sintieron per primer vegada la necesidá de facer causa común[16]. La revuelta que provocaron foi dominada con facilidá, y Thrane foi apresáu y condenáu a trés años de cárcel por crímenes escontra la seguridá del estáu. De la que salió d'ella coló pa los Estaos Xuníos.

En 1898 entró en vigor nel país el sufraxu universal masculín; el femenín habría esperar hasta 1913.

Independencia[editar | editar la fonte]

La xunión con Suecia permitiera caltener a los noruegos el so propiu parllamentu, sistema xudicial y gobiernu. Los dos pueblos teníen rellaciones amistoses, y los reis tentaron d'actuar en provechu de los sos dos reinos. Sicasí, los asuntos esteriores taben en manes del ministru suecu, y col pasu del tiempu foi viéndose que los intereses de les dos naciones diben siendo diferentes. La política noruega taba cada vegada más dominada por políticos lliberales qu'estendíen la democracia parllamentaria, mentantu que la sueca, más conservadora, siguía permitiéndo-y al rei gran discrecionalidá pa exercer el poder. Nel ámbetu económicu la economía noruega, más dependiente del comerciu que la sueca, más industrializada, víase perxudicada poles midíes proteccionistes del so vecín, y dambos países miraben pa comerciar a diferentes países (pal Reinu Xuníu los noruegos y p'Alemaña los suecos). La restricción del llibre comerciu ente los dos países en 1895 fizo que l'interés económicu de la xunión amenorgárase, y entamó un conflictu qu'había llevar a la dixebra: el conflictu de los cónsules. Los sucesivos gobiernos noruegos insistíen en qu'el país había tener les sos propies oficines consulares nel estranxeru, en cuenta del consuláu únicu designáu pol gobiernu suecu. Esto refugábenlu de contino el gobiernu suecu y el rei, que víen nello una restricción del derechu real a determinar la política esterior. Les posiciones foron faciéndose más distantes, y los dos países aumentaron el so gastu militar, construyendo amás Noruega delles fortificaciones na frontera con Suecia.

A primeros de 1905 el navieru y políticu Christian Michelsen formó un gobiernu de coalición ente conservadores y lliberales, col oxetivu espresu d'establecer un cuerpu consular noruegu distintu del suecu. La llei foi aprobada pol parllamentu pero, como s'esperaba, foi refugada pol rei Óscar II. El gobiernu dimitió y, como'l rei nun quixo formar un gabinete nuevu, españó una crisis constitucional el 7 de xunu de 1905, cuando'l parllamentu noruegu votó por unanimidá disolver la xunión con Suecia col pretestu de qu'el rei abandonara les sos funciones como rei de Noruega al refugar formar un nuevu gobiernu. Esti día ye'l que Noruega considera como'l día que ganó la so independencia, magar que yá yera llegalmente independiente de facto dende 1814.

Xuramentu de Haakon VII como rei nel Storting.

El gobiernu suecu, embaxu la influyencia de los social-demócrates, aceptó negociar la dixebra si se cellebraba un referéndum, daqué qu'el gobiernu noruegu yá tenía previsto. Esti cellebrose'l 13 d'agostu, con un resultáu de 368.208 votos (99.95%) en favor de la independencia, y namái 184 a la escontra. La participación fora del 85% del censu, y magar que les muyeres entá nun podíen votar, les feministes recoyeran al tiempu 279.878 firmes a favor de la disolución de la xunión.

El 31 d'agostu entamaron les negociaciones, y la bona voluntá de les dos partes permitió que, magar que se foran disponiendo los exércitos de los dos países en posición en previsión d'una posible guerra, finaran el 23 de setiembre. El 9 d'ochobre l'alcuerdu foi aceptáu pol parllamentu noruegu, y el 13 d'ochobre pol suecu. El 26 d'ochobre Óscar II renunció, nel so nome y nel de los sos descendientes, al tronu noruegu. El parllamentu convocó un segundu referéndum, pal 12 y 13 de payares, nel qu'el 79% de los votantes apoyó la opción monárquica frente a la republicana. El gobiernu ofreció-y el tronu al príncipe Carl de Dinamarca, que lu aceptó el 18 de payares y convirtiose en rei, col nome de Haakon VII, el 27 de payares.

Noruega na dómina de les dos guerres mundiales[editar | editar la fonte]

Imáxenes de la Operación Weserübung, nome clave de la ocupación de Dinamarca y Noruega pol exércitu nazi na II Guerra Mundial.

Demientres la Primera Guerra Mundial Noruega remaneció neutral. Pesie a ello, ye cierto que Noruega foi presionada enforma pol Reinu Xuníu pa que-y emprestara, a bon preciu, una parte cada vegada mayor de la gran flota mercante noruega, y tamién pa que se xuniera al bloquéu comercial escontra Alemaña. Asina, barcos mercantes noruegos coles tripulaciones de so viéronse forciaes a navegar con bandera británica, corriendo'l riesgu de ser fundíos polos submarinos alemanes. De resultes dellos marinos noruegos perdieron la vida na contienda, y el dañu a la flota foi talu que pasó de ser la cuarta a la sesta del mundu por volumen al final de la Gran Guerra[17].


Na Segunda Guerra Mundial el país tamién proclamó la so neutralidá, pero eso nun impidió qu'Alemaña la invadiera'l 9 d'abril de 1940, y pesie a qu'el país nun se preparara militarmente pa esa circunstancia la resistencia prollongose per dos meses. L'exércitu noruegu replegose pal norte y llanzó una ofensiva sofitada por soldaos británicos, la conocida como batalla de Narvik, pero foi forciáu a rendise'l 10 de xunu dempués de que Gran Bretaña retirara l'axuda que-y prestaba pa desviala a Francia, qu'entamaba d'aquella a ser invadida por Alemaña.

El rei Haakon y el gobiernu colaron pa Rotherhithe, cerca Londres, y sofitaron la llucha al traviés de discursos na radio y del apoyu que dieron a les acciones militares clandestines nel país. D'otra banda, el mesmu día de la ocupación el cabezaleru del pequeñu partíu nacionalsocialista noruegu, Vidkun Quisling, tentó de facese col poder, pero foi obligáu a retirase polos invasores. El poder quedó en manes del comandante militar alemán, el Reichskommissar (comisariu del Reich) Josef Terboven, magar que Quisling incorporose dempués, como ministru presidente, a un gobiernu colaboracionista controláu por Alemaña. Amás, hasta 15.000 noruegos colaron voluntariamente a lluchar al exércitu alemán y a les Waffen SS[18]. La parte de la población del país que sofitaba a Alemaña yera menor que la que lo facía en Suecia, pero ensin dubia yera mayor de lo qu'anguaño se considera. Ente ellos había personalidaes importantes como Knut Hamsun, favoratible, pola so ideoloxía nacionalista y patriótica, a la idea d'una Unión Xermánica compuesta por diversos estaos.

Soldáu faciendo guardia nel campu d'entrenamientu de la Royal Norwegian Air Force en Toronto (Canadá).

Pero tamién hebo munchos noruegos, y descendientes de noruegos, lluchando nos exércitos aliaos y nel Exércitu Noruegu Llibre. En xunu de 1940 un grupo de 13 barcos de guerra, 5 aviones y 500 soldaos de la marina noruega colaron pal Reinu Xuníu siguiendo al so rei. Ellos foron el guañu del exércitu nel esiliu, que contaba, pal final de la guerra con 58 barcos y 7.500 marineros na so rama naval, cinco escuadrones de cazas na rama aérea y fuercies de tierra. Dientro del país, demientres los cinco años d'ocupación, hebo tamién un movimientu de resistencia que s'enfrentó a los ocupantes cola desobediencia civil y con acciones terroristes como la destrucción de la planta d'agua pesada de Norsk Hydro y l'almacén de Vemork, lo qu'alterió'l desarrollu del programa nuclear alemán. Tamién foi importante la contribución de la marina mercante noruega a la victoria. Pal tiempu de la invasión yera la cuarta mayor del mundu, y participó en toes les operaciones de guerra d'esti bandu, dende la evacuación de Dunkerque hasta'l desembarcu de Normandía. N'alcordanza de toos estos socesos cada mes d'avientu Noruega regala un árbol de Navidá a Gran Bretaña n'agradecimientu pola so axuda y por agospiar al so rei y gobiernu demientres la guerra. L'árbol plántase en Trafalgar Square, en Londres.

Historia reciente[editar | editar la fonte]

El petróleu ye, dende los años 80, la principal fuente d'ingresos del país.

De 1945 a 1962 el Partíu Llaborista tuvo mayoría absoluta nel parllamentu. El gobiernu, dirixíu pol primer ministru Einar Gerhardsen, embarcose nún programa inspiráu poles idees keynesianes que ponía l'énfasis na industrialización financiada pol estáu y na collaboración ente les organizaciones empresariales y los sindicatos. Caltuviéronse munches de les midíes de control estatal de la economía implantaes demientres la guerra, y magar qu'el racionamientu de productos llácteos llevantose en 1949 siguió habiendo control del preciu y racionamientu de viviendes y coches hasta 1960. En política esterior la alianza con Gran Bretaña y los Estaos Xuníos estrechose, porque magar qu'el oxetivu del Partíu Llaborista yera la economía socialista taba enforma distanciáu del comunismu, especialmente dempués del güelpe d'estáu comunista de Checoslovaquia de 1948. El país entamó a recibir axuda estaunidense en 1947, xuniose en 1948 a la Organización pa la Cooperación y el Desarrollu Económicu y foi miembru fundador de la Organización del Tratáu del Atlánticu Norte en 1949.

Edificiu de la Oficina del Primer Ministru y del Ministeriu de Xusticia tras l'españiu del coche bomba nel atentáu del 25 de xunetu de 2011.

En 1969 la Phillips Petroleum Company descubrió petróleu nel campu Ekofisk, al oeste del país, y en 1973 el gobiernu fundó la compañía petrolifera estatal, Statoil. Sicasí, la producción de crudu nun dio beneficiu netu al país hasta l'entamu de la década de 1980, cuando s'amortizaran les grandes inversiones de capital que foran necesaries pa poner en funcionamientu la estracción de petróleu. Noruega foi un miembru fundador de l'Asociación Europea de Llibre Comerciu. Cellebráronse, en 1972 y 1994, dos referenda p'axunise a la Comunidá Económica Europea, que ganaron por poca diferencia los contrarios a esa xuntura.

En 1981 xubió al poder un gobiernu conservador dirixíu por Kåre Willoch, que camudó la política económica ya implantó un programa de recortes d'impuestos, lliberalización económica, desregulación de mercaos y midíes anti-inflacionistes. La so socesora al frente del gobiernu, la llaborista Gro Harlem Brundtland, caltuvo delles de les polítiques del so antecesor, magar qu'enfotándose tamién en cuestiones como la seguridá social, l'aumentu de los impuestos, la ecoloxía y el feminismu. Pa finales de la década de 1990 el país tenía pagao toa la so delda esterna, y entamó a acumular el so superávit presupuestariu nún fondu soberanu qu'en 2015 ye'l mayor del mundu. Cuántu d'esi beneficiu tien de gastase pol gobiernu y cuántu tien de guardase nel fondu soberanu ye una de les cuestiones polítiques más discutíes nel país.

En 2011 el país quedó ablucáu polos atentaos realizaos por Anders Behring Breivik, que punxo un coche bomba nel distritu gubernamental d'Oslo y dempués foi a la islla d'Utoya, aú había una reunión de les xuventúes del Partíu Llaborista, y entamó a disparar indiscriminadamente. El resultáu final de la xornada foi 77 muertos y 319 firíos. Finalmente, les eleiciones parllamentaries de 2013 llevaron a los conservadores del Partíu Conservador y del Partíu del Progresu al poder.

Xeografía[editar | editar la fonte]

Noruega compriende la parte occidental de la península escandinava, nel norte d'Europa. La so llínia costera, peraccidentada y rota por grandes fiordos y miles d'islles, enmarca pel noroeste la estrencha faza de terrenu que forma'l territoriu continental del país, separtáu de Suecia polos montes Kjolen. El país comparte 1.619 km de frontera con Suecia, 727 con Finlandia y 196 con Rusia al este. Pel norte, el oeste y el sur el país ta arrodiáu por dellos mares: el mar de Barents, el mar Noruegu, el mar del Norte y el estrechu de Skagerrak.

Reine, nel archipiélagu Lofoten.

Nos sos 323.802 km² de territoriu continental domina'l terrén montañosu, con bayura de formaciones naturales diferentes que son resultáu de l'aición de los glaciares prehistóricos. Los más nomaos d'ente ellos son los fiordos, canales profundas na tierra que foron inundaes pol mar al final de la edá del xelu. El mayor ye'l Sognefjord, que colos sos 204 km ye'l más llargu del mundu, y tamién el más profundu. Tamién ta en Noruega el llagu con más profundidá del continente, el Hornindalsvatnet[19]. El permafrost, capa de suelo a la temperatura de conxelación del agua, cubre les rexones montañoses más altes, y tamién na meseta del interior del condáu de Finnmark; y pueden atopase munchos glaciares.

Vista del Sognefjord.

El suelu tien una mayoría de roca granítica y gneis, magar que nun ye raro topar pizarra, arenisques o arcilla, y tamién depósitos de sedimientu marín nes zones más baxes. Los niveles de temperatura y lluvia del país son mayores de los que podíen esperase pola so situación latitudinal, especialmente na fastera costera, pola aición de la corriente del Golfu. Nel so territoriu continental estrémense cuatro estaciones, con inviernos que son más fríos y secos nel interior que na faza costera. La fastera más septentrional del país tien un clima subárticu marítimu, y Svalbard un clima árticu, cola tundra como bioma dominante.

Per aciu del so gran rangu latitudinal y su variada topografía y clima el país agospia un númberu mayor d'hábitats distintos que cualisquier otru país europeu. Hai hasta 60.000 especies animales diferentes (sacante bacteries y virus) nel país y les sos agües axacentes.

Clima[editar | editar la fonte]

Les fasteres meridional y occidental del país, completamente espuestes a los frentes atlánticos, tienen más precipitaciones ya inviernos más templaos que les rexones orientales y más septentrionales. La parte del país asitiada al este de les cadenes montañoses costeres tienen menos precipitación, d'agua o nieve, añal que les occidentales. Les tierres baxes na rodiada d'Oslo tienen los veranos más templaos y soleyeros del país, pero tamién inviernos fríos con nieve abondante.

Por aciu de la so llatitú, hai grandes variaciones nes hores de lluz solar al día nes diferentes estaciones. De finales de mayu a finales de xunetu el Sol nun llega a desapaecer completamente nel horizonte al norte del Círculu Polar Árticu, y nel restu del país hai hasta 20 hores de lluz solar al día. Y de finales de payares a finales de xineru, pol contraiu, el sol nun llega a asomar perriba la llínia del horizonte nel norte, y hai perpoques hores de lluz solar nel restu del país.

Demografía[editar | editar la fonte]

Economía[editar | editar la fonte]

Política[editar | editar la fonte]

Cultura[editar | editar la fonte]

Natura[editar | editar la fonte]

Referencies[editar | editar la fonte]

  1. El tratáu de Svalbard, firmáu'l 9 de febreru de 1920, reconoz la soberanía absoluta de Noruega sobre l'archipiélagu nomáu d'aquella Spitsbergen y anguaño Svalbard. National Research Council (U.S.). Polar Research Board (1986). Antarctic treaty system: an assessment. National Academies Press. ISBN 978-0-309-03640-5.
  2. Estadístiques de población noruegues na web d'Statistics Norway
  3. Los países más ricos del mundu, artículu de la revista Forbes (febreru 2012).
  4. Ránking del IDH na web del Programa de Desarrollu de les Naciones Xuníes.. Foi tamién, de 2010 a 2012, el país más democráticu del mundu según la medición del Democracy Index Democracy Index 2013, artículu de The Huffington Post del 21 de marzu de 2013.
  5. Karen Larsen, A History of Norway (Princeton University Press: Princeton, 1948) p. 83.
  6. RF Foster: The Oxford History of Ireland, Oxford University Press, 1989
  7. Karen Larsen, A History of Norway (Princeton University Press: Princeton, 1948) p. 95.
  8. Karen Larsen, A History of Norway (Princeton University Press: Princeton, 1948) p. 201.
  9. Karen Larsen, A History of Norway (Princeton University Press, 1948) p. 192.
  10. Elizabeth Ewan, Janay Nugent (2008). Finding the family in medieval and early modern Scotland. Ashgate Publishing, p.153. ISBN 0-7546-6049-4
  11. Alan Macfarlane (1997). The savage wars of peace: England, Japan and the Malthusian trap, p.63. ISBN 0-631-18117-2
  12. Karen Larsen, A History of Norway (Princeton University Press, Princeton, 1948) p. 572.
  13. Franklin D. Scott, Sweden: the Nation's History (University of Minnesota Press, Minneapolis, 1977) p. 380.
  14. Karen Larsen, A History of Norway (Princeton University Press, Princeton, 1948) p. 432.
  15. Karen Larsen, A History of Norway (Princeton University Press, Princeton, 1948) p. 412.
  16. Karen Larsen, A History of Norway (Princeton University Press, Princeton, 1948) p. 433.
  17. Karen Larsen, A History of Norway (Princeton University Press: Princeton, 1948) p. 510.
  18. Norwegian volunteers in the Wehrmacht and SS (Voluntarios noruegos na Wehrmacht y les SS)
  19. Minidatos sobre Noruega. Disponible n'español nesta web.


Noruega
Wikimedia Commons tien archivos rellacionaos con:


Países d'Europa
Albania | Alemaña | Andorra | Austria | Bielorrusia | Bélxica | Bosnia y Hercegovina | Bulgaria | República Checa | Croacia | Dinamarca | Eslovaquia | Eslovenia | España | Estonia | Finlandia | Francia | Grecia | Hungría | Irlanda | Islandia | Italia | Letonia | Liechtenstein | Lituania | Luxemburgu | República de Macedonia | Malta | Moldavia | Mónaco | Montenegro | Noruega | Países Baxos | Polonia | Portugal | Reinu Xuníu | Rumanía | Rusia | San Marino | Serbia | Suecia | Suiza | Turquía | Ucraína | Vaticanu | Xeorxa | Xipre

Dependencies: Akrotiri y Dhekelia | Gibraltar | Guernsey | Islles Feroe | Islla de Man | Jersey | Svalbard ya Islla Jan Mayen

Rexón autónoma: Islles Åland

Países con status discutíu: Abkhasia | Kosovo | Osetia del Sur | Transnistria