Corriente del Golfu

Coordenaes: 35°N 70°W / 35°N 70°O / 35; -70
De Wikipedia
Corriente del Golfu
Situación
Tipu Corriente marina
Parte de Giro del Atlántico Norte (es) Traducir
Asitiáu en Océanu Atlánticu
Coordenaes 35°N 70°W / 35°N 70°O / 35; -70
Datos
Noamáu por golfu de Méxicu
Cambiar los datos en Wikidata

La Corriente del Golfu, conxuntamente cola so prollongación septentrional, la corriente del Atlánticu norte, ye una corriente marina rápida y d'agua templao del océanu Atlánticu que naz nel golfu de Méxicu, percorriéndolu hasta l'estremu de la península de Florida, y sigue dempués la costa de los Estaos Xuníos y Terranova anantes de cruciar l'océanu Atlánticu. El efeutu de corriente de frontera provoca que la corriente vaiga acelerándose en direición norte tres de separtase de la costa este d'América del Norte. Nes coordenaes 40°0′N 30°0′W, aproximadamente, dixébrase en dos: el so brazu septentrional, la corriente del Atlánticu norte, diríxese a Europa del norte, mentantu que'l meridional, la corriente de Canaries, diríxese a la costa d'África occidental.

La corriente del Golfu inflúi nel clima de la costa este de Norteamérica, de Florida a Terranova, y nel d'Europa occidental. Hai dél consensu, en que'l clima d'estes rexones ye más caldiu de lo qu'habría ser pola so llatitú gracies a la corriente del Atlánticu norte. La so esistencia ye la responsable, tamién, del desarrollu de toa triba de furacanes y ciclones, neto na atmósfera que dientro'l mar. La corriente tien un anchor de 100 km, y una fondura d'ente 800 m y 1.200 m. La velocidá de la corriente ye mayor más cerca de la superficie, y la so velocidá máxima ye d'aproximadamente 2,5 metros por segundu.

Historia[editar | editar la fonte]

Carta de la corriente del Golfu de Benjamin Franklin, na versión espublizada en Filadelfia en 1786 (Biblioteca del Congresu d'Estaos Xuníos).

El descubrimientu européu de la corriente del Golfu remóntase a la espedición de Juan Ponce de León de 1512. De magar, foi rutinariamente usada polos barcos españoles que navegaben del Caribe hacia España[1]. Una nota nel diariu de viaxe de Ponce de León, del 22 d'abril de 1513, diz d'ella: «Una corriente tala que, inclusive con bien de vientu a favor, nun podíen avanzar per ella, sinón qu'ella los arrastraba, y parez qu'ellos navegaben bien. Al final determinose que la corriente yera más poderosa que'l vientu»[2]. L'humanista Pedro Mártir d'Anglería tamién fala della nes sos obres.

Benjamin Franklin interesose nel funcionamientu de los patrones de circulación oceánica del Atlánticu. En 1768, n'Inglaterra, sintió una quexa estraña del Conseyu Colonial d'Aduanes: ¿Por qué los paquetes de corréu británicos tardaben delles semanes más en llegar a Nueva York dende Inglaterra de lo que tardaba un mercante inglés n'aportar a Newport (Rhode Island), y ello pese a que los barcos que salíen de Londres teníen que baxar el ríu Támesis y percorrer la Canal de la Mancha anantes de cruciar al Atlánticu, mentantu que los paquetes pa Inglaterra desembarcábense en Falmouth (Cornualles)?[3] Franklin entrugó-y a Timothy Folger, primu de so y capitán balleneru na islla de Nantucket, buscando una rempuesta. Folger desplicó-y que los mercantes avezaben a cruciar la corriente, que daquella nun tenía nome pero que los balleneros identificaben pol comportamientu de les ballenes y los cambios na temperatura y el color de l'agua, mentantu que los barcos-correo teníen que lluchar escontra ella. Franklin fizo que Folger ficiéra-y un borrador del percorríu de la corriente nuna carta marina, y que añediera notes escrites sobre cómo esquivala mientras se navegaba d'Inglaterra a América. Franklin unvió-y la carta a Anthony Todd, secretariu de Correos (British Post Office)[3]. La carta de la corriente del Golfu de Franklin espublizose en 1769 en Londres, pero la mayoría de los capitanes marítimos británicos ignoráronla davezu. Una copia espublizose en París alredor de 1770-1773, y el propiu Franklin espublizó una tercer versión en Filadelfia en 1786[4]. Nella (ver semeya) el recuadru de la esquina superior izquierda representa'l patrón migratoriu d'un arenque y non una corriente oceánica.

Propiedaes[editar | editar la fonte]

El tueru principal de la coriente del Golfu ye una corriente de frontera formada por un procesu d'intensificación occidental, provocáu principalmente pola fuercia del vientu[5]. La corriente del Atlánticu norte, por embargu, ye una corriente productu de la circulación termohalina. En 1958 l'oceanógrafu Henry Stommel comprobó que «hai perpoca agua del golfu de México nel fluxu de la corriente»[6]. El tresporte d'agua templao en direición noreste al traviés del Atlánticu fai qu'Europa occidental, y especialmente la Europa septentrional, tengan un clima más templáu que'l que-yos correspuendería por llatitú[7].

Formación y comportamientu[editar | editar la fonte]

Percorríu de la corriente del Golfu al oeste d'Irlanda, cuando'l so brazu septentrional conviértese na corriente del Atlánticu norte.

Un ríu d'agua marina, nomada corriente ecuatorial del norte, flúi en direición oeste dende la costa d'África central. Cuando esta corriente interactúa cola costa nororiental d'América del Sur dixébrase en dos rames: una entra nel mar Caribe, mentantu que la segunda, la corriente de les Antilles, flúi al norte y al este de les Indies occidentales. Estes dos rames xúntense otra vuelta al norte de los estrechos de Florida.

Los vientos alisios soplen en direición oeste nos trópicos[8], y en llatitúes medies los vientos de poniente soplen en direición este[9]. Esti patrón de vientos produz una tensión na superficie oceánica nes llatitúes subtropicales, con una rotación negativa hacia l'Atlánticu norte[10]. El subsiguiente balance de Sverdrup va en direición al ecuador[11].

Como resultáu de la conservación de la vorticidá potencial provocada polos vientos de direición norte nes llatitúes subtropicales de la periferia occidental y l'incrementu de la vorticidá relativa de l'agua que se desplaza en direición norte, el tresporte ye balanceáu por una corriente estrecha y rápida en direición a los polos. Esta flúi a lo llargu de la llende occidental de la cuenca oceánica, superando los efeutos de la friición cola corriente de frontera occidental, y ye conocida como corriente del Labrador[12]. La conservación de la vorticidá potencial tamién provoca la formación de curves nel recorríu de la corriente del Golfu, que ruempen delles veces por un cambéu de posición de la corriente, lo que lleva a la formación de remolinos diferentes, d'agua frío y templao[13]. Esti procesu conxuntu, conocíu como intensificación occidental, provoca que les corrientes de la fastera occidental d'una conca oceánica, como la corriente del Golfu, seyan más fuertes que les de la so llende oriental.

La corriente del Golfu ye, por estos procesos, una corriente oceánica fuerte. Tresporta un volume de 30 millones de m³ d'agua (30 sverdrups) por segundu al traviés de los estrechos de Florida. Nel estremu meridional de Terranova esti volume yá ye de 150 millones de m³ por segundu[14], un volume 250 veces mayor que l'agua que desagüen, en conxuntu, tolos ríos que desemboquen nel Atlánticu xuntos (0,6 sverdrups por segundu). Es, pese a ello, más débil que la corriente circumpolar antártica[15]. La fuercia de la corriente, y la so proximidá a la costa, faen que les playes de la costa este de los Estaos Xuníos seyan más vulnerables a les variaciones importantes del nivel de la mar, que producen tases importantes d'erosión costera[16].

La corriente del Golfu tien un anchor mediu de 100 km, con profundidaes d'ente 800 m y 1.200 m. La velocidá de la corriente ye mayor cerca la superficie, con una velocidá máxima d'alredor de 2,5 metros por segundu. De la que viaxa hacia'l norte l'agua templao tresportada pola corriente sufre un enfriamientu por evaporación. Esti enfriamientu ye provocáu pol vientu: el movimientu d'esti sobre l'agua provoca evaporación, enfriando l'agua y aumentando la so salinidá y densidá. Cuando se forma xelu marín la sal queda fuera d'elli, nún procesu conocíu como esclusión de la salmoria[17]. De resultes de los dos procesos l'agua de la corriente, en llatitúes altes, ye más denso y más frío, o, por meyor dicir, agua qu'entá ye líquida pese a la so baxa temperatura. Nel Atlánticu norte l'agua vuélvese tan denso qu'entama a fundise perbaxu de capes d'agua ménos salao y menos denso. Esta sumersión de l'agua frío y denso conviértela en parte de la masa d'agua frío y profundo del Atlántico norte[18], una corriente que viaxa hacia'l sur.

N'abril de 2018 dos estudios espublizaos en Nature[19][20] demostraron que la corriente del Golfu ye anguaño más débil qu'en dengún momentu nos caberos 1.600 años[21].

Referencies[editar | editar la fonte]

  1. Fernández-Armesto, F., Pathfinders: A global history of exploration, p. 194. W.W. Norton & Company, 2006. ISBN 978-0-393-06259-5
  2. History of the Gulf Stream, artículu de Jerry Wilkinson na web keyshistory.org.
  3. 3,0 3,1 Tuchman, B.W., The First Salute: A View of the American Revolution, páxs.221-2. Nueva York, Ballantine Books, 1988.
  4. Richardson, P.L., Adams, N.T., "Uncharted Waters: Nantucket Whalers and the Franklin-Folger Chart of the Gulf Stream". Historic Nantucket, 2018;68(1):17-24.
  5. Wunsch, C., "What is the Thermohaline Circulation?". Science, 2002;298 (5596):1179-81. doi: 10.1126/science.1079329.
  6. Stommel, H., The Gulf Stream: A Physical and Dynamical Description, p. 22. University of California Press, 1958.
  7. Bischof, B., Mariano, A.J., Ryan, E.H., "The North Atlantic Drift Current", artículu na web del National Oceanographic Partnership Program.
  8. "Trade winds", entrada nel glosariu de meteoroloxía de la American Meteorological Society (online).
  9. "Westerlies", entrada nel glosariu de meteoroloxía de la American Meteorological Society (online).
  10. Tomczak, M., Godfrey, S., Regional Oceanography: An Introduction, p. 42. 2001. ISBN 81-7035-306-8.
  11. Earthwide. Lesson 6: Unraveling the Gulf Stream Puzzle on a Warm Current Running North (2007), na web de la Universidá de California en San Diego.
  12. Colling, A., Ocean circulation, p. 96. Butterworth-Heinemann, 2001. ISBN 978-0-08-053794-8.
  13. Schwartz, M.L., Encyclopedia of Coastal Science, p. 1037. Springer Science & Business Media, 2006. ISBN 978-1-4020-3880-8.
  14. Gyory, J., Mariano, A.J., Ryan, E.H., The Gulf Stream, na web del National Oceanographic Partnership Proyect.
  15. Smith, R., Desflots, M., White, S., Mariano, A.J., Ryan, E.H., The Antarctic Circumpolar Current, na web del National Oceanographic Partnership Project.
  16. Theuerkauf, E.J. et al, "Sea level anomalies exacerbate beach erosion". Geophysical Research Letters 41.14 (2014):5139-5147.
  17. Russel, R., Thermohaline Ocean Circulation, na web windows2universe.org.
  18. Behl, R., Atlantic Ocean water masses, California State University Long Beach (1997).
  19. Thornalley, D.J.R., Oppo, D.W., Ortega, P., Robson, J.I., Brierley, C.M., Davis, R. et al. "Anomalously weak Labrador Sea convection and Atlantic overturning during the past 150 years". Nature 2018;556 (7700):227-230.
  20. Caesar, L., Rahmstorf, S., Robinson, A., Feulner, G., Saba, V., "Observed fingerprint of a weakening Atlantic Ocean overturning circulation". Nature 2018;556 (7700):191-196.
  21. "Gulf Stream current at its weakest in 1,600 years, studies show". The Guardian, 11 d'abril de 2018.