Escultura

De Wikipedia
Saltar a: navegación, buscar
Italian traffic signs - old - lavori in corso.svg

Artículu en desendolcu. Polo menos hai un wikipedista trabayando nel desendolcu d'esti artículu. Puen alcontrase errores y nun s'encamienta tenelu como referencia. Enantes de facer un cambéu bultable del artículu notifícalu nel alderique.


La escultura ye l'arte que consiste en representar oxetos, figures en trés dimensiones con barru, con piedra, con bronce...[1] Ye la rama de les artes visuales qu'opera en trés dimensiones, y una de les artes plástiques. Los primeros escultores que ficieron figures con intención de pervivencia usaron dos técniques principales, la talla (quitando material de la pieza usada como base) y el modeláu (añediéndo-y material, como arcilla), sobro una base xeneralmente de piedra, metal, cerámica o madera. Dende'l modernismu, sicasí, los movimientos artísticos tienen fecho escultura sobre cuasi cualisquier material de base y coles más estremaes técniques. Anguaño materiales de toa triba (plásticu, fibra de vidriu...) son tallaos, soldaos, modelaos, moldeaos, fundíos...

La escultura en piedra aguanta'l pasu del tiempu muncho meyor qu'otres obres artístiques feches en materiales más perecederos, lo que fai que, aparte de la cerámica, la mayoría los restos artísticos de les cultures antigües seyan escultures. Sicasí, ye imposible de saber si había o non una tradición nelles d'escultura en madera, que taría perdida por completu casu que la hubiera, y tamién perdiéronse les pintures que cubríen la mayoría de les escultures antigües, qu'aportaron a nós ensin adornos pictóricos.

La escultura xugó un papel fundamental na devoción relixosa de munches cultures, y hasta tiempos recientes les grandes escultures, imposibles de pagar por individuos a títulu personal, foron un símbolu de prestixu habitual de los rexímenes políticos y de les grandes organizaciones relixoses.

La escultura occidental nació na Antigua Grecia, que produció bien d'obres mayestres de la escultura nel so periodu clásicu. Demientres la Edá Media, la escultura gótica centrose na representación de la pasión y l'agonía de Xesucristu, mentantu que la recuperación de los modelos clásicos nel Renacimientu produció escultures perfamoses como'l David de Michelangelo. La escultura modernista afuxó de los procesos tradicionales de creación d'escultura, y tamién del énfasis d'esta na representación del cuerpu humanu, abriendo la puerta a la escultura fabricada por adición d'oxetos sobre una base y inclusu a la presentación d'oxetos atopaos casualmente, na so forma orixinal, como obres d'arte.

Tipos d'escultura[editar | editar la fonte]

La principal distinción ye la qu'estrema la escultura de bultu redondu, modelada en toa la so circunferencia y non xunida a denguna otra superficie (sacante, delles veces, una base o pedestal), y los relieves, xunidos polo menos en parte a otra superficie de fondu. El relieve aveza a soclasificarse, en función del so gráu de proyección dende'l muru nel que se sofita, en baxurrelieve, alturrelieve y, delles veces, en mediurrelieve. El relieve ye la forma avezada de representación escultórica de grupos con delles figures o con una estructura narrativa, difíciles de conseguir na escultura exenta, y ye la técnica habitual de representación tanto de la escultura arquitectónica, la que se presenta como adornu n'edificios, como de la escultura decorativa de pequeñu tamañu (cerámica, xoyería, adornos de metal...). La escultura en relieve puede decorar tamién esteles, llábanes verticales xeneralmente de piedra que tamién inclúin munches veces inscripciones.

Otra distinción básica ye la qu'estrema les escultures feches con técniques de talla, qu'estraen material del bloque de sustancia (madera, piedra) usáu como base, y les feches con técniques de modeláu, que formen o constrúin la obra a partir del material de base. Delles técniques como'l fundíu o la estampación usen una matriz intermedia que contién el diseñu col que se producirá la obra; munches d'eses técniques permiten la producción de delles copies de la mesma obra.

El términu escultura aveza a usase principalmente pa describir pieces de gran tamañu, nomaes a veces escultures monumentales, seyan exentes o xuníes a un edificiu. Sicasí, na so definición estricta había aplicase tamién a munchos tipos de trabayos de pequeñu tamañu desarrollaos en trés dimensiones y creaos coles técniques citaes, como medalles, monedes...

La construcción d'estatues pergrandes, nomaes colosales n'alcordanza del Colosu de Rodas, construyíu na islla griega homónima nel sieglu III edC, atraxo a los gobernantes de toes les dómines; la mayor anguaño esistente ye'l Buda del Templu de Primavera del condáu chinu de Lushan (provincia de Henan), que mide 128 m d'altor. Gustó-yos tamién muncho a los gobernantes, a lo llargo la historia y hasta tiempos recientes, la estatua ecuestre, que representa a un home a caballu. Otru tipu d'escultura n'honor d'un personaxe notable ye'l bustu, que representa el pechu y la cabeza d'una persona. Dellos tipos más pequeños d'escultures conmemoratives son les estatuines, estatues d'un tamañu inferior a 40 cm, y los relieves en plaquetes, medalles o monedes.

L'arte modernu y contemporáneu añedió munches formes non tradicionales d'escultura, incluyendo escultures sonores, escultures de lluz, arte cinéticu, arte ambiental, escultura ambiental, land art, arte in situ... que dan a la escultura un llugar importante como la forma predominante d'arte que puede atopase nos espacios públicos.

Propósitu y función de la escultura[editar | editar la fonte]

Ún de los propósitos más habituales de la escultura ye la so asociación con imáxenes sagraes o dalgún otru tipu de significáu relixosu. La representación de personaxes sagraos yera avezada en munches cultures antigües. Delles veces les estatues yeren pergrandes, como asocedía na Grecia clásica, pero nun ye esta la única forma na que se presentaben. Les imáxenes sagraes qu'había nel interior de los templos exipcios persábese, magar que nun llegó denguna a nós, que teníen que ser muncho más pequeñes, inclusu nos templos de mayor tamañu. Tamién nel hinduismu la forma más frecuente d'escultura ye la representación anicónica en pequeñu tamañu (lingam) del dios Shivá. El budismu foi quien llevó la representación escultórica d'imáxenes relixoses al este d'Asia; ellí parez que nun había previamente esi vezu, magar que quiciás oxetos anicónicos como'l bi o'l cong tuvieran significancia relixosa.

Gran Esfinxe de Giza, exemplu tempranu d'arquitectura monumental.

La tenencia de pequeñes escultures como posesiones o adornos personales remóntase al primer arte prehistóricu, mentantu que l'usu d'escultures de gran tamañu como arte públicu, cola intención principal d'impresionar al que la vía y poner de manifiestu el poder del gobernante, remóntase a lo menos hasta la Gran Esfinxe de Giza, fai unos 4.500 años. Pa los arqueólogos y los historiadores del arte l'apaición, y delles veces tamién la desapaición, del vezu de facer escultures monumentales ye un datu importante, magar que l'establecimientu del momentu nel que apaició esa costumbre ye difícil d'establecer, porque supónse que primero d'ellos habría escultures en madera (los tótem son exemplu d'ello) y otros materiales perecederos de les que nun quedó restu dengún[2]. La posesión de la capacidá de organización de los recursos humanos y materiales necesaria pa crear escultures monumentales, que precisen del treslláu de materiales pesaos y de disponer de dineru pa pagar a los escultores, considérase un signu de la esistencia d'una cultura avanzada en términos d'organización social. El reciente ya inesperáu descubrimientu de figures de bronce de la China antigua en Sanxingdui, delles d'un altor de más de 4 m, camudó munches de les idees que se teníen sobre los primeros tiempos de la civilización china, una y bones nun s'atoparan nunca escultures d'esi tamañu pertenecientes a esa cultura. Por embargu, la construcción d'escultures de gran tamañu nun ye signu inequívocu de la posesión d'una cultura avanzada. Dalgunas que lo yeren ensin dubia, como la civilización del valle del Indo, parez que nun la desarrollaron, magar que producíen sellos y estatuines persofisticaes. La cultura del Mississippi parecía alcontrase en camín de progresar hacia la so construcción, construyendo yá pequeñes figures de piedra, cuando colapsó. Y dalgunes civilizaciones, como l'Antiguu Exiptu o la cultura de la Islla de Pascua, parecen tener dedicao gran cantidá de recursos a la construcción d'escultures monumentales pergrandes dende los sos primeros estadíos culturales.

Estatua femenina en terracota del sieglu IV edC. Muséu del Louvre, París.

El vezu de coleccionar escultura, contemporánea o de periodos antiguos, remóntase dos milenios en China, Grecia y América central, y munches colecciones taben disponibles n'eshibición semipública muncho primero de que surdiera'l conceptu modernu de muséu. Nel sieglu XX la relativamente escasa cantidá de temes trataos na escultura de gran tamañu medró, y entamaron a facese escultures abstractes y otres que trataben temes, o taben feches con meteriales, de la realidá cotidiana. La mayoría les escultures, anguaño, fáense pa ser espuestes temporalmente en museos y galeríes, y problemes como'l coste del so tresporte y almacenaxe son cada vegada un factor más importante a tener en cuenta a la hora de construyiles. Amás, les pequeñes figures decoratives, especialmente feches en cerámica, son (pesie al so refugu polos artistes modernes y contemporáneos) tan populares anguaño como na dómina del Rococó, na Grecia antigua (na que la fabricación de estatuines de terracota yeren una importante industria na ciudá boecia de Tanagra) o na América precolombina.

La escultura de retratu entamó n'Exiptu, aú la paleta de Narmer (sieglu XXXII edC) amuesa una imaxe del rey Narmer. Consérvense también 18 estatues de Gudea, que foi rei de la ciudá iraquina de Lagash del 2144 al 2124 edC. Na Grecia antigua y en Roma la erección d'una estatua de retratu nún llugar públicu yera ún de los mayores honores que se podíen recibir, y les élites enfotábense en que-y la ficieran, o tamién en que na so imaxe apareciera grabada nuna moneda. Los Ptolomeos foron los qu'entamaron la tradición helenística d'incluyir la imaxe del gobernante nes monedes, y los romanos entamaron a incluyir nelles retratos de gobernantes muertos nel sieglu I edC. Xuliu César foi el primeru qu'apaeció nelles en vida, y dempués fízose habitual la representación del emperador. Notres cultures (Exiptu, Oriente Prósimu) les estatues públiques taben reservaes pal gobernante, mentantu que la figura de los otros poderosos namái podía ser representada nes sos tumbes. Na América precolombina yera vezu tamién que solo los reis (o gobernantes en xeneral) tuvieran escultures de retratu, entamando poles xigantesques cabeces llantaes polos olmeques fai 3.000 años. La escultura de retratu nel este d'Asia yera esclusivamente relixosa: los clérigos más importantes, especialmente si fundaran un monasteriu, yeren recordaos con estatues de so, pero nun les había de los gobernantes. La tradición mediterránea clásica recuperose, a lo primero namái con estatues nes tumbes y con imáxenes nes monedes, na Edá Media, y espardiose enforma nel Renacimientu, qu'inventó nueves formes escultóriques como les medalles conmemoratives con la efixie d'una persona.

Netsuke d'un tigre con dos cachorros (Xapón, sieglu XIX), de marfil con incrustaciones de concha.

Los animales foron, xunta cola figura humana, los primeros elementos representaos na escultura, y tienen sío populares de magar. Delles veces represéntense de forma realista, pero ye más habitual que seyan monstruos imaxinarios; dafechamente, en China los animales y los monstruos son cuasi los únicos elementos representaos, esculpíos en piedra, nel esterior de tumbas y templos. El mundu vexetal ye importante namái en xoyería y en relieves decorativos. Sicasí, estos caberos formen cuasi tol repertoriu decorativu del arte bizantín y del arte islámicu, y son tamién importantes en munches cultures euroasiátiques, nes que motivos como la palmeta o la vide lleven siendo representaos demientres más de dos milenios.

Una forma d'escultura presente en munches cultures prehistóriques de tol mundu son les répliques a gran tamañu, y en materiales preciosos, de ferramientes o armes, de les que se piensa que yeren pa un usu ceremonial o pa esponeles o quiciás como ofrendes relixoses. El xade foi usáu en China, el México olmeca y la Europa neolítica, mentantu qu'en Mesopotamia facíense cacíes de gran tamañu en piedra. N'Europa y China, finalmente, usábase'l bronce pa construyir grandes haches y espades.

Materiales y técniques[editar | editar la fonte]

Los materiales usaos n'escultura son variaos, y foron cambiando a lo llargo la historia. Los materiales clásicos, perduraderos, son los metales (principalmente'l bronce), la piedra y la cerámica, con alternatives más barates pero menos perdurables como la madera, el güesu y el cuernu. Úsense tamién materiales preciosos, como l'oru, la plata, el xade o'l marfil, pa pieces pequeñes y luxoses, y ocasionalmente en oxetos grandes como les crisoelefantines. Otros materiales, más fáciles d'atopar y más baratos, usáronse pa construyir pieces de consumu ampliu: madera duro (de carbayu, boxe o tilar), terracota y otros materiales cerámicos, cera y metales de fundición sencilla como'l zinc o l'estañu. Sicasí, permunchos otros materiales tienen formao parte d'esculturas, mesmo nes dómines antigües qu'anguaño.

Les escultures avecen a tar pintaes, magar qu'el tiempu o les males restauraciones fagan desapaecer la so cubierta. Tienen usáose munches técniques diferentes pa pintar sobro escultures: pintura al temple y al óleu, doráu, aerosol, esmalte...[3]

Munchos escultores tienen andao a la gueta de nueves formes y nuevos materiales pa facer arte. Asina, les escultures más famoses de Pablo Picasso inclúin pieces de bicicleta, y Alexander Calder y otros modernistes usaron davezu l'aceru pintáu. Dende la década de 1960 los acrílicos y otros plásticos son ampliamente utilizaos, mentantu qu'artistes como Andy Goldsworthy constrúin escultures perecederes n'entornos naturales y a partir de materiales naturales. Hai, tamién, formes d'escultura, como la fecha en xelu, arena o con gas, feches aposta pa nun durar. Cristal vidriáu, ferramientes, maquinaria, oxetos de consumu... nos caberos tiempos aprovéchese cualisquier cosa pa facer escultura, inclusive oxetos atopaos casualmente.

Piedra[editar | editar la fonte]

La escultura en piedra ye una actividá perantigua. Dende bien ceo l'home avezó a dá-yos forma a les roques esculpiéndoles, esto ye, quitándo-yos fragmentos de forma controlada pa obtener la forma deseyada. Lo duradero del material pétreu permitionos alcontrar restos de dalguna forma de trabayu de la piedra inclusu nes sociedaes humanes más antigües. Nes fasteres del mundu con bayura de piedra bona pa esculpir (Exiptu, Grecia, India, la mayoría d'Europa) l'abondancia de restos ye enforma mayor. Los petroglifos, diseños simbólicos grabaos na roca fechos por desgaste de la so capa más superficial, son quiciás la forma más temprana d'escultura. Aveza a llamase, d'otra banda, escultura monumental a los trabayos en piedra de gran volume, y escultura arquitectónica a la que forma parte, estructural o como decoración, de los edificios. Hai tamién trabayos talles con intención artística de piedres semiprecioses (xade, ágata, ónix, cuarzu, sardu, cornalina), y en piedres llandies y fáciles de trabayar pa facer pequeñes pieces como l'alabastru o'l yesu.

La copia fiel d'un orixinal en piedra, perimportante pa que les estatues de la Grecia clásica aportaran a nos (cuasi toes les que conocemos son copies) fízose al traviés de los tiempos por diversos métodos. El "punteáu" facíase construyendo una trama de cuadraos de cuerda suspendíos d'un marcu de madera alredor del orixinal. Tres de facelo midíase la posición de la trama de cuerda y la so distancia a una serie predeterminada de puntos de la estatua; dempués usábase esa información pa dir esculpiéndose la piedra na que se diba facer la copia. Esti métodu foi perfeccionándose col paso de los sieglos: los copistes de la Grecia clásica usaben munchos menos puntos-guía que los de sieglos posteriores, lo que fai que delles veces l'acabáu de les copies seya sensiblemente diferente[4]. Anguaño la copia d'estatues faise con un esculpidor automáticu controláu por ordenador que permite reproducciones exactes del orixinal.

Metal[editar | editar la fonte]

Cabeza de muyer en bronce (Benín).

El bronce (xunto con otres aleaciones del cobre) ye'l metal d'usu más antiguu y el más popular pa la fabricación d'escultures de metal fundíu. Les aleaciones de cobre tienen una propiedá poco habitual, y perútil pal so usu una escultura: la d'espandese una migayina xustu enantes de solidificase, lo que fai qu'ocupen hasta los requexos más pequeños del molde sobro'l que se vierte'l metal fundíu. D'otra banda la so resistencia y ductilidá ye una gran ventaxa a la hora de facer escultures que reflexen movimientu, especialmente en comparanza con otros materiales cerámicos o pétreos. Otros metales usaos na escultura son: l'oru, el metal más llandiu y preciosu, d'usu común en xoyería; y la plata, llandia bastante como para que pueda, amás de fundise, ser trabayada con martiellos y otres ferramientes.

N'escultura llámase fundición a un grupu de procesos pelos cuales un material líquidu (bronce, cobre, cristal, aluminiu, fierro...) viértese nún molde que tien un güecu de la forma deseyada, y lluéu déxase solidificar. La fundición sólida sepártase dempués del molde, y si ye necesario acábense los detalles de la pieza trabayándola yá en frío. Ye un métodu utilizáu principalmente pa facer escultures de formes complexes que sedríen percomplicaes o percares de facer n'otros materiales. La pieza de fundición más antigua que se conserva ye una rana de cobre fecha en Mesopotamia alredor del añu 3200 edC.

Cristal[editar | editar la fonte]

Copa de Licurgu, del sieglu IV, fecha en vidriu dicroicu (Muséu Británicu (Londres).

El cristal, como materia prima pa facer escultures, puede trabayase de bien de formes estremaes, magar qu'el so usu pa pieces de gran tamañu ye perreciente. Puede esculpise, magar qu'esto ye perdifícil; la Copa de Licurgu ye un pieza cuasi única. El modeláu en caliente puede consiguise vertiendo cristal fundíu en moldes creaos presionando la forma deseyada n'arena, grafitu esculpíu o moldes de yesu o sílice. El fundíu de cristal en fornu faise caleciendo cachos de cristal nún fornu hasta qu'esti tea líquidu, y lluéu echando esti nún molde preparáu a la vera'l fornu. El cristal, finalmente, puede ser sopláu y/o esculpíu en caliente con delles ferramientes pa facer oxetos macizos o güecos.

Cerámica[editar | editar la fonte]

La cerámica ye ún de los materiales emplegaos dende más antiguo pa esculpir. Munches veces, amás, l'arcilla ye'l material nel que munches estatues que van ser fundíes en metal son modelaes orixinalmente. Los escultores, seya cualu seya'l material definitivo que vaigan usar pa la so obra, avecen a facer bocetos en miniatura de les futures obras en materiales llandios y perecederos como'l yesu, la cera, l'arcilla ensin cocer o la plastilina[5]. Munches cultures tienen producío pieces cerámiques que combinen la so funcionalidá como recipiente pa contener oxetos con una forma escultórica, y también tienen producío piecines decoratives pequeñes de cerámica con función esclusivamente ornamental. Por último, los sellos y los moldes foron usaos pola mayoría les antigües civilizaciones, dende la Roma antigua y Mesopotamia hasta China[6].

Madera[editar | editar la fonte]

El talláu de la madera practicose perende a lo llargo de la historia, pero consérvense perpoques pieces pola so fraxilidá frente al empodrecimientu, l'ataque de los insectos y el fuéu. De resultes, ye anguaño un elementu escondíu y desconocíu pa nos na historia del arte de munches cultures[7]. La escultura en madera albentestate nun resiste'l pasu del tiempu; poro, tenemos perpoca idea del desarrollu de la tradición totémica. Y esto ye importante pal estudiu del arte de munches partes del mundu: munches de les principales escultures de China y Xapón tán feches en madera, y tamién la gran mayoría de la escultura d'África y Oceanía.

La madera ye llixero, y poro perútil pa fabricar máscares y otres escultures que tienen que ser carretaes, y puede amás trabayase con gran detalle ensin muncha dificultá. Avezábase a pintar les pieces tres d'esculpiles, pero la pintura aguanta peor entá que la madera, y tien perdíose na mayoría de les pieces antigües de madera que se conserven. Pa ello, xeneralmente, aplicábase una capina de yesu sobro la madera, que sirvía de base sobre la que pintar.

L'estatus social de los escultores[editar | editar la fonte]

Autorretratu del escultor alemán Adam Kraft, que representose a sigo mesmu na ilesia de San Llorienzu de Nuremberg na década de 1490.

Los escultores tienen sío xeneralmente, en toes les cultures, artesanos y non artistes que nin siquiera firmaben el so trabayu. Por exemplu, en China, la escultura yera muncho menos prestixosa que la pintura caligráfica (sumi-e), y ocupaba un llugar secundariu dientru de les artes[8]. Inclusu na Grecia clásica, donde había escultores famosos como Fidias, parez qu'el so estatus social yera asemeyáu al d'otros artesanos, y quiciás nin siquiera, pesie a firmar les sos obres, recibíen un bon pagu por elles. Na Edá Media, dellos artistes como Gislebertus (sieglu XII) firmaben les sos obres y, especialmente a partir del sieglu XIII n'Italia, yeren reclamaos por diferentes ciudaes pa que trabayaran nelles. Rescamplen, ente más otros, los nomes d'Arnolfo di Cambio y los Pisano, Nicola y el so fíu Giovanni. Nesa dómina los orfebres y xoyeros, que trabayaben l'oru y munches vegaes yeren banqueros al empar, pertenecíen a gremios poderosos y esfrutaben d'un nivel económicu altu y d'un gran reconocimientu social, que-yos permitía inclusu ocupar cargos n'alministración. Munchos escultores, amás, practicaben al tiempu otres disciplines artístiques: Andrea del Verrocchio yera tamién pintor, y Giovanni Pisano, Michelangelo y Jacopo Sansovino yeren arquitectos.

Sicasí, entá na dómina del Renacimientu lo físico del trabayu del escultor facía que Leonardo da Vinci y otros tuvieran una idea de la escultura como daqué inferior al resto de les artes. Diba haber qu'esperar hasta que la gran reputación de Michelangelo ficiera cayer esta idea nel escaezu. L'altor estéticu del so trabayu, y el de otros como Leone Leoni y Giambologna, permitió-yos arriquecese y progresar socialmente, llegando dalgunos a ennoblecese y a entrar nos círculos principescos de les ciudaes italianes. La mayoría de la escultura decorativa destinada a adornar edificios siguió siendo considerada un trabayu artesanal, pero l'escultor que producía pieces individuales algamó el mesmu estatus y prestixu qu'el pintor. Dende'l sieglu XVIII, o quiciás yá enantes, la escultura, magar que facer una escultura lleva más tiempu y ye más abegoso que pintar un cuadru, empezó a atraer l'atención d'estudiantes de clase media. L'apaición de muyeres escultores, sicasí, foi más tardía que la de les muyeres pintores, y malpenes hai dalguna aisllada primero del sieglu XX.

Historia de la escultura[editar | editar la fonte]

Prehistoria[editar | editar la fonte]

Los exemplos más antiguos d'escultura pertenecen a la cultura Auriñaciense, qu'ocupó xeográficamente Europa y el suroeste d'Asia al entamu del Paleolíticu Superior. Amás de producir dalgunes de les más antigües pintures rupestres, los auriñacienses construyeron ferramientes de piedra trabayaes mui fino, colgadielles, pulseres, abalorios de marfil, xiblates de güesu y pequeñes figures tridimensionales[9].

L'honor de ser la más antigua escultura fecha con intención artística dispútenselo la Venus de Schelklingen y la representación antropomórfica d'un home-lleón tallada nún colmillu de mamut atopada n'Alemaña. La figura, de 30 cm d'altor, datose alredor del 35.000-40.000 BP[10].

La mayoría del arte prehistóricu qu'aportó a nosotros confórmenlo pequeñes escultures tresportables, ente les que rescamplen un grupu de figures femenines nomaes les Venus paleolítiques alcontraes n'Europa central: la más famosa d'elles ye la Venus de Willendorf (24.000-26.000 BP)[11]. La escultura nomada Swimming Reindeer (Renos naladores, 13.000 BP) ye una de les meyores del grupu de talles en güesu o cuernu d'animales del Magdaleniense; más numberoses nesa dómina, por embargu, son los grabaos en piedra, consideraos escultures por dalgunos especialistes[12]. Dos de los de mayor tamañu atópense na cueva francesa de Tuc d'Audobert. Ellí, fai 12.000-17.000 años, un escultor usó una ferramienta de piedra asemeyada a una espátula y los sos deos pa imprimir sobro una parede caliza un par de grandes bisontes n'arcilla.

Al entamu del Mesolíticu la escultura figurativa pierde importancia, y ye más raro atopala hasta la dómina del Imperiu romanu. Pesie a la esistencia d'oxetos como'l calderu de Gundestrup, de la Edá del Fierro, o del carru solar de Trundholm, de la Edá del Bronce, son perpoques les escultures figuratives en comparanza coles que resultaron del vezu de facer decoraciones en relieve sobre oxetos con utilidá funcional[13]

Civilizaciones clásiques del Oriente Próximu[editar | editar la fonte]

En Mesopotamia, nel periodu d'Uruk (4000-3100 edC), produciéronse sofisticaos trabayos escultóricos como'l vasu sagráu de Warca y dellos sellos cilíndricos de gran valir. La lleona Guennol ye una espectacular figurina en piedra caliza esculpida n'Elam en 3000-2800 edC, que ye parte muyer y parte lleona[14]. Un poco posteriores nel tiempu son una serie de figures de sacerdotes y devotos, fechos n'alabastru y de unos 30 cm de tamañu, con grandes güeyos. Les escultures de los imperios sumeriu y acadiu caracterícense por tener güeyos grandes con mirada penetrante y barbes llargues. Alcontráronse tamién pieces destacaes nel cementeriu real d'Ur, ente les que rescamplen les nomaes "Cabra pastiando nún matu" y "Toru de cobre", amás d'una cabeza de toru inserta núna de les arpes d'Ur, dataes alredor del 2500 edC[15].

Dende esi momentu hasta l'ascensu del Imperiu neoasiriu nel sieglu X edC l'arte mesopotámicu sobrevive en varios formatos: sellos cilíndricos, escultures pequeñes de bultu redondu, y relieves de tamaños estremaos, incluyendo pieces corrientes de cerámica modelada d'usu domésticu, delles de calter relixosu y delles qu'aparentemente nun lo tienen[16]. El relieve de Burney ye una placa de terracota (sieglos XIX-XVIII edC) con un relieve más trabayáu de lo que yera vezu y d'un tamañu relativamente grande (50 X 35 cm) na qu'apaece una diosa alada desnuda que los sos pies, con forma de garres d'aigla, descansen enriba de dos lleones, y que ta escoltada por dos curuxones[17]. Esteles de piedra, ofrendes votives y otres estatues que cellebren victories o festeyen les fiestes apaecen davezu nes ruines de los templos, magar que xeneralmente ensin inscripciones que mos ayuden a pescudar el so significáu. Rescamplen ente elles la nomada estela de les utres (2600-2400 edC), exemplu tempranu d'escultura fecha por impresión sobro una piedra, y l'obeliscu negru de Shalmaneser III (850 edC), de caliza prieto y con venti relieves grabaos nelli[18].

La conquista de toa Mesopotamia y munchu del territoriu que l'arrodia polos asirios crearon l'estáu más grande y ricu que conociera enxamás la rexón, que dedicó bien de recursos a llevantar grandes escultures nos palacios y nos llugares públicos, pa facer evidente'l so esllendor y tamién, de xuru, pa competir col brillu del arte del imperiu vecín, l'exipciu. Los asirios desarrollaron un estilu arquitectónicu basáu na producción de baxorrelieves en piedra, pergrandes y nos que se representaben con gran detalle escenes de guerra o caza, pa decorar los palacios; puede vese una amplia colección d'ellos nel Muséu Británicu. Por embargu, producieron perpoques escultures de bultu redondu, sacando les xigantescas figures guardianes nomaes lamassu. Estos yeren dioses con cuerpu de toru o lleón con cabeza humana que s'esculpíen n'alturrelieve peles dos cares d'un bloque de piedra rectangular. Hai que mencionar, pa finar, que continuaron, inclusu enantes d'algamar el cumal del so poder, la tradición de los sellos cilíndricos con diseños perdetallaos[19].

Antiguu Exiptu[editar | editar la fonte]

Bustu de Nefertiti esculpíu por Thutmose alredor del 1345 edC (Muséu Exipciu de Berlín).

Magar que les escultures monumentales del Antiguu Exiptu son conocíes perende nun podemos escaecer los abondantes exemplos d'escultura de pequeñu tamañu, d'un refinamientu y un valir artísticu perimportante, que produció esta cultura. Los exipcios usaron una técnica especial de relieve, el relieve fundíu, mui afayaízu pa los llugares nos que la lluz del Sol incide directamente. Nelli la imaxe tállase nel bloque del material que fai de soporte, creando, pol desgaste del material qu'arrodia a la imaxe, que queda asina resaltada, un volume "interior". Les pieces así tallaes precisen situase en frente de la pieza pa poder observala. Les figures tallaes nos relieves aseméyense, na so estructura figurativa, a les qu'apaecen na pintura, coles piernes cortaes (si ye que la figura nun ta sentada) y la cabeza de lláu calteniendo'l pechu de frente. Amás, hai un conxuntu estándar de proporciones pa formar les figures, usándose 18 "puños" pa dir dende'l suelu a la llínia del pelo na frente[20]. Esti canon apaez bien ceo, pues utilízase yá na paleta de Narmer (Dinastía I), magar que nun se respeta en figures secundaries de la composición qu'apaecen realizando dalgún trabayu, como los prisioneros, o nos cadabres[21]. Ye convención tamién que les estatues de sexu masculín seyan más escures que las de sexu femeninu. Estatues-retratu de midíes y composición mui estandarizada apaecen bien ceo, na Dinastía II (enantes de 2780 edc)[22]. Amás, sacante nel nomáu periodu artísticu d'Amarna, nel reináu d'Akenatón[23] y en momentos concretos como demientres reinó la Dinastía XII, les representaciones idealizaes de los gobernantes camudaron perpoco dende esti final del III Mileniu hasta dempués de la conquista griega[24].

Los faraones exipcios siempres teníen la consideración de dioses, y la representación d'otros dioses ye muncho menos frecuente n'estatues de gran tamañu, sacante cuando representen al faraón cola forma d'otru dios. Esos otros dioses, por embargu, represéntense a menudu en pintures y relieves. Una representación típica d'un faraón alcontrámoslo na filera de cuatro estatues colosales asitiaes a la vera'l templu d'Abu Simbel; toes elles representen a Ramsés II, y son singulares namái pol so gran tamañu[25], una y bones respuenden a un esquema típicu de representación de la figura del soberanu. Les representaciones de los dioses, o de les sos personificaciones animales, ye perfrecuente, y alcuéntrase inclusu n'oxetos cerámicos d'usu domésticu.

La mayoría de les escultures de bon tamañu que se conserven proceden de templos o tumbes. Pa la dómina de la Dinastía IV (2680-2565 edC) yá s'afitara la idea de la construcción de les nomaes estatues Ka. Estes figures colocábense nes tumbes pa sirvir como llugar de descansu eternu del "ka", l'alma del difuntu. Gracies a ello tenemos munches estatues, de diseñu menos estandarizáu que les de los faraones, de les que guardaben l'alma de los altos cargos de l'alministración y de les sos muyeres. Munches d'elles presenten la singularidá de que son de madera, una y bones Exiptu ye ún de los pocos llugares del mundu qu'el clima de so permite que la madera nun pudra en miles d'años. Nes tumbes, amás d'esta estatua, había tamién pequeñes estatues que representaban los esclavos, animales, edificios y oxetos qu'el difuntu había necesitar pa siguir cola so rutina vital nel más allá, y más sero les figurines nomaes ushebti[26].


Europa[editar | editar la fonte]

Grecia[editar | editar la fonte]

Grecia antigua[editar | editar la fonte]
Detalle de la cabeza de l'Auriga de Delfos, estatua de bronce del sieglu V edC.

El primer signu distintivu de la escultura de la Grecia antigua desarrollose nel periodu cicládicu, a entamos de la Edá del Bronce (III Mileniu edC), nel que se realizaben figures en mármole, xeneralmente femenines y de pequeñu tamañu, nún estilu xeométrico elegantemente simple. La figura más típica representa a una muyer de pie colos brazos cruciaos, pero hailes en diferentes poses, incluyendo una percomplicada de facer que representa una muyer tocando un arpa sentada nuna siella[27]

Les siguientes civilizaciones, la minoica y la micénica, conocieron, pola influencia de la cultura siria y la exipcia, un mayor desarrollu de la escultura, magar que nun habría grandes avances hasta'l periodu arcaicu griegu, dende el 650 edC pa en delantre, cuando apaez y evoluciona la figura del kuros. Los kuroi (plural de kuros) son estatues de gran tamañu, alcontraes en templos y tumbes, que representaben homes xóvenes desnudos; el so equivalente femeninu, con muyeres vistíes y peinaos percomplicaos, yeren los kore (plural korai). Dambos tipos d'estatua compartíen, na espresión del so rostru, lo que se conoz como sorrisa arcaica. Créyese que teníen funciones diverses: quiciás delles veces representaben a divinidaes, mentantu qu'otres facíen referencia a la persona enterrada nuna tumba. El so estilu ta nidiamente influyíu polos estilos siriu y egipciu, pero los escultores griegos yá teníen nesi momentu la técnica suficiente pa esperimentar pela so cuenta dientru d'esi estilu.

Demientres el sieglu VI edC la escultura griega desarrollose rápidamente. Volviose más naturalista, y entamaron a representarse munches poses distintes n'escenes narratives, magar qu'entá siguiendo siempre convenciones anatómiques idealizaes. Añedíeronse-y frontones a los templos. Los del Partenón, n'Atenes, d'alredor del 520 edC, foron usaos, dempués del saquéu de la ciudá polos perses en 480 edC, como rellenu pa construyir nuevos edificios, lo que permitió recuperalos, na década del 1880, sin que tuvieran sofrío los daños que tendríen de tener pasao 2.500 años albentestate. Otros restos escultóricos d'esta dómina vienen de Paestum (Italia), la islla de Corfú, Delfos y el templu d'Afaya (na islla d'Aegina)[28].

Grecia clásica[editar | editar la fonte]
Alturrelieve del altu clasicismu que pertenecía a los mármoles d'Elgin, que decoraben el Partenón, c. 447433.

Hai perpocos restos orixinales de la primer etapa del periodu clásicu, qu'aveza a nomase estilu severu. Esti estendiose nel tiempu dende alredor del 500-480 edC hasta'l 450 edC. Ye vezu nelli la producción d'estatues de bultu redondo en bronce. Les poses relativamente ríxides del periodu anterior reláxense, y ye frecuente agora representar les figures aposta en posiciones asimétriques o en vistes oblicues. Esto combinose con un meyor entendimientu de l'anatomía y de lo que yeren les proporciones armóniques nes figures esculpíes pa buscar por primer vegada, como oxetivu, la representación naturalista de la figura humana. El mayor grupu de restos d'esta dómina alcontrose nes escavaciones entamaes en 1829 nel Templu de Zeus Olímpicu n'Olimpia; tán dataos alredor del 460 edC, y consérvense nel Louvre.

El periodu del altu clasicismu estendiose namái per unes poques décades, del 450 al 400 edC, pero tuvo una influencia perimportante nel arte y caltién un prestixu especial pesie a les perpoques obres orixinales que se conserven de la dómina. Los trabayos más conocíos son los mármoles del Partenón, relizaos (dende'l gobiernu de Plutarcu) por un equipu d'escultores dirixíu pol más famosu de los escultores de la Grecia clásica, Fidias. Esti, que trabayó dende'l 465 al 425, cobró sonadía na so época pola construcción de: la estatua de Zeus n'Olimpia (c. 432, una de les siete maravíes del mundu antiguu; Atenea Partenos, la imaxe divina que s'asitiaba nel Partenón (438 edC); y Atenea Promacos, una imaxe colosal de la diosa fecha en bronce que s'allugaba a la vera'l Partenón. Toes eses figures, magar que se perdieran, son conocíes por munches reproducciones. Tamién se-y atribuín delles estatues de bronce a tamañu natural conocíes namái por copies posteriores, pero que la so identificación ye problemática; un exemplu d'elles ye'l Hermes Ludovisi.

El altu clasicismu continuó desarrollando'l realismu y la sofisticación na representación de la figura humana, y ameyoró la representación de la ropa, qu'usó p'añedir impactu visual a les poses dinámiques (en movimientu). Les espresiones faciales, por embargu, yeren davezu, perconteníes, inclusu n'escenes de guerra. La composición de los grupos de figures nos relieves y nos frontones combinaba complexidá ya harmonía d'una forma qu'influyó pa siempres el arte occidental. El relieve podía ser mui altu, lo que si bien-y daba a la escultura mayor vistosidá -y dificultá pa la so realización- facíala tamién más vulnerable a los daños[29]. El clasicismu tardíu desarrolló la forma estatuaria que representaba, en bultu redondu, una muyer desnuda -piénsase qu'esto foi una innovación fecha por Praxiteles- y desarrolló poses cada vegada más complicaes y sutiles, y un mayor nivel d'espresión nos rostros. Dambes tendencies seríen desarrollaes con mayor profundidá nel periodu helenísticu[30].

Periodu helenísticu[editar | editar la fonte]
Altar de Pergamon (entamos del s. II edC), exemplu cimeru del estilu pergamín.

El periodu helenísticu aveza a considerase qu'entama, por convención, nel añu 323 edC, añu de la muerte d'Alexandru Magnu, y que fina o bien na fecha de la conquista de Grecia pola república romana (146 edC) o cola derrota definitiva del caberu de los estaos qu'asocedieron al imperiu alexandrinu na batalla d'Actium (31 edC), que marca tamién el final de la etapa republicana na historia de Roma[31]. Ye, poro, más estensu que los otros periodos, y estrémense nelli a lo menos dos etapes principales: un periodu inicial d'esperimentación, el nomáu estilu pergamín, con figures exuberantes que tienen cierta sentimentalidá y inclusu vulgaridá; y otru, nel sieglu II edC, de vuelta al clasicismu, con fitures más austeres, simples ya elegantes. Sicasí, y pesie a esta división teórica, hai que dicir que ye perdifícil datar les escultures d'esta época, especialmente cuando, como pasa cola mayoría de les conservaes, son copias d'un orixinal perdíu. L'estilu pergamín nun se rellaciona especialmente cola ciudá de Pergamon (na actual Turquía), de la que toma'l nome. Recíbelo porque dellos de los reis d'esti estáu, perricu na dómina, fueron dellos de les primeres persones que coleccionaron y encargaron copies d'escultures griegues clásiques. Encargaron, además, trabayos nuevos, ente los que rescamplen: l'altar de Pergamon, exemplificador del nuevu estilu, que los sos restos consérvense'n Berlín; el mausoléu d'Halicarnasu (otra de les siete maravíes del mundu antiguu); la escultura Laocoonte y los sos fíos, exemplu tardíu d'esti estilu; y la escultura orixinal, en bronce, de Gálata amorrentando, de la que sábese que yera parte d'un conxuntu d'escultures encargaes en Pergamon nel añu 228 edC. El grupu nomáu Toru Farnesiu, quiciás un orixinal en mármole del sieglu II edC, ye otru exemplu, ún de los más grandes y complexos, de les escultures d'esti periodu[32].

La escultura helenística amplió enforma los temas que se representaben na escultura, en parte de resultes d'un arriquecimientu xeneral del mundu griegu, que permitió el surdimientu d'una clas social de xente perrica que teníen grandes cases decoraes con escultures, que yeren tamién abondantes nos templos y nos espacios públicos. Más barates, y d'usu perestendíu, foron les figurines de Tanagra y otres de pequeñu tamañu que se producíen tanto con temática relixosa (figures de dioses) como con otros temes seculares: animales, muyeres elegantemente vistíes... Los escultores diben siendo técnicamente más finos, y yeren capaces de representar fielmente bayura d'espresiones faciales de los distintos estaos d'ánimu, y tamién a distintes races y xente de toa edá. La escultura de la dómina, por últimu, ye un reflexu tamién de la relaxación moral de la dómina, que vía normal representar escenes bien alloñaes de los temes heroicos que se representaben nos sieglos anteriores. Exemplu d'ellu ye'l Faunu Barberini, que representa un sátiru tumbáu a la pámpana durmiendo, quiciás borrachu[33].

Tres de les conquistes d'Alexandru Magnu la cultura helenística foi la dominante nes cortes reales de la mayoría de los estaos del Oriente Prósimu y en dellos del Asia Central, y tamién foi teniendo cada vegada más adaptación ente les élites europees, y especialmente n'Italia, aú les colonies griegues controlaben la mayoría del territoriu de la metá meridional de la península. L'arte helenísticu, y los sos artistes, espardieron la so fama bien lloñe y de forma bien intensa, y foi especialmente influyente na república remona y tamién nel arte del budismu, qu'entró en contactu con elli nel territoriu más oriental del conquistáu por Alexandru. El nomáu sarcófagu d'Alexandru, alcontráu en Sidón (Líbanu), foi probablemente fecho ellí al entamu d'esti periodu por artistes griegos expatriaos por encargu d'un gobernador persa. Dicir, por últimu, que la riqueza del periodu favoreció'l desarrollu d'una producción masivu a gran escala d'escultures de luxu (xoyería d'oru o plata) de pequeñu tamañu.

La escultura n'Europa tres de los griegos[editar | editar la fonte]

Roma[editar | editar la fonte]
Sección de la columna de Traxanu (113) con escenes de la guerra de la Dacia.

L'arte romanu tempranu recibió la influyencia del arte griegu y del de los etruscos, que taba a la so vez perinfluenciáu pol griegu, que-yos llegaba al traviés de los intercambios comerciales con esa cultura. Una de les figures más típiques del arte etruscu yeran les efixies de tamañu cuasi real, feches en terracota, que se colocaben enriba de los sarcófagos y que representaben al difuntu recostáu sobre un coldu na postura avezada na dómina pa xintar. De la que la puxante República romana entamó a conquistar territoriu griegu, a lo primero'l sur d'Italia y dempués tol mundu helenísticu sacante'l so estremu más oriental, l'imperiu partu, la escultura oficial y la encargada polos patricios convirtiéronse nuna estensión del estilu helenísticu. Los elementos específicamente romanos son malos d'esbillar, especialmente porque la mayoría les escultures griegues qu'aportaron a nós son en realidá copies romanes de los orixinales griegos[34]. Pal sieglu II edC "la mayoría los escultores que trabayaben en Roma" yeren griegos[35], los más d'ellos esclavizaos tres de la conquista de ciudaes como Corintu (146 edC); pol so calter d'esclavos los sos nomes perdiéronse. Un gran númberu d'estatues griegues foron tamién trayíes a Roma mercaes o, munches vegaes, como botín de les conquistes, y los templos avezaron a decorase con elles[36]

Puede rastrexase, sicasí, un estilu propiamente italianu. El retratu escultóricu ye una de les formes más importantes de la escultura romana. Yera vezu, nes tumbes de los romanos acomodaos, colocar bustos col retratu del difuntu. Amás, magar que nun se conserven restos de la tradición de carretar máscares col rostru de los antepasaos nos funerales de les families importantes, que dempués se guardaben na casa familiar, piénsase que munchos de los bustos que se conserven deben tener sío esi tipu d'estatua. La famosa cabeza de bronce de Lucius Junius Brutus nun tien una cronoloxía afitada, pero considérasela como un superviviente del estilu itálicu na dómina de la República[37]. D'otra banda, nes monedes del final de la época republicana represéntense cabeces col semblante seriu y enérxicu, y na época imperial utilizose la escultura con una nidia función propagandística. Unviábense monedes y bustos a tolos requexos del Imperiu pa que los allugasen nes basíliques de les ciudaes como representación del poder imperial; inclusu Londinium (Londres) tenía una estatua cuasicolosal de Nerón, magar que abondo más pequeña qu'el Colosu de Nerón, que tenía 30 m d'altor y taba en Roma[38].

Relieve d'estilu grecorromanu nel Ara Pacis (13 edC).

Los romanos nun avezaron a facer estatues de bultu redondu representando fazañes heroiques, históriques o mitolóxiques, perfrecuentes en Grecia. Dende mui ceo, por embargu, producieron relieves que recoyíen fechos históricos, con formes escultóriques qu'algamaron el so cumal na columna trunfal romana, qu'amosaba relieves narrativos continuos que la percorríen n'espiral. Consérvense entá en Roma la columna de Traxanu (113) y la columna de Marcu Aureliu (193), y tamién l'Ara Pacis (altar de la Paz, 13 edC), que representa l'estilu oficial grecorromanu na so forma más clásica y refinada. Otros exemplos son los relieves, más antiguos, reaprovechaos nel arcu de Constantinu y que formen la base de la columna d'Antoninu Píu (161)[39].

Los relieves de Campana yeren versiones en terracota, más barates, de los relieves en mármole qu'amuesen el gustu de los romanos pol relieve. Un gustu estendíu tamién, dende la dómina imperial, a los sarcófagos. Toes les formes d'escultura de luxu de pequeñu tamañu siguieron teniendo ésitu, con pieces de grandísima calidá, como la nomada copa Warren, en plata, la copa de Licurgu, fecha en cristal, y cameos de gran tamañu como'l caméu de Gonzaga, la Gemma Augustea y el nomáu gran caméu de Francia. P'aquellos que nun podíen permitise estes pieces, producíense en gran cantidá pequeñes figurines de cerámica de bona calidá pa qu'adornaran la so casa con elles[40] .

Tres una fase "barroca", nel sieglu II, el arte romanu, nel sieglu III, abandonó, o quiciás nun foi capaz yá de producir, escultures d'estilu clásicu. Les causes del cambiu entá son oxetu de discutiniu ente los especialistes, pero lo cierto ye qu'inclusu los más principales d'ente los monumentos imperiales tienen relieves achaplaos, con figures de grandes güeyos representaes de frente en composiciones simples que ponen l'enfotu nel poder ensin preocupase pola estética. El constraste puede vese claramente nel arcu de Constantinu (315), que combina secciones esculpíes nel nuevu estilu con otres d'estilu clásicu reutilizaes, y nel nomáu retratu de los cuatro tetrarques (c. 305), que taba na nueva capital imperial, Constantinopla. Ernst Kitzinger observa en dambos monumentos les mesmes "proporciones rechonches, movimientos angulares, una ordenación de les partes al traviés de la simetría y la repetición, y una representación de los rasgos y les ropes mediante incisiones en cuenta de mediante'l modeláu... La marca distintiva del estilu, auquiera qu'apaezca, consiste nuna dureza, pesadez y angularidá feches aposta; esto ye, un rechazu cuasi completu de la tradición clásica"[41].

Esta revolución nel estilu adelantose por pocu tiempu al periodu nel que l'estáu romanu, y bona parte de la so población, adoptaron el cristianismu como la so relixón, lo que supunxo'l final de la escultura dedicada a los dioses paganos. Les estatues de gran tamañu representaron, de magar, namái a los emperadores. Por embargu, los cristianos ricos siguieron encargando relieves pa los sos sarcófagos, y desarrollose una escultura de pequeñu tamañu en marfil que, siguiendo l'estilu del antiguu dípticu consular, representaba temes piadosos[42].

Escultura altumedieval y bizantina[editar | editar la fonte]
Placa de marfil, probablemente de la cubierta d'un llibru (Reims, finales del sieglu IX), con dos escenes de la vida de Remixu de Reims y el bautismu de Clodovéu I.

Los primeros cristianos nun facíen escultures relixoses monumentales, pero continuaron les tradiciones romanes no que cinca a facer bustos con retratos y a decorar los sarcófagos con relieves. Tamién readaptaron la tradición de los dípticos consulares, pequeños oxetos en materiales valiosos qu'entamaron a decorase con escenes piadoses. Toa esta triba d'oxetos formen tamién el repertoriu arquitectónicu de les civilizaciones bárbares qu'aportaron a Europa na dómina altomedieval, como demuestran los oxetos alcontraos nel tesoru funerariu de Sutton Hoo (sieglu VI), les xoyes del arte escita y les producciones escultóriques, qu'amiesten motivos cristianos con figures animales, qu'apaecen nel nomáu arte insular, el desarrolláu nes islles Britániques dempués de que los romanos colaran d'elles. Siguiendo la tradición bizantina l'arte carolinxu utilizó'l marfil pa facer paneles colos que facer les cubiertes de los sos manuscritos ilustraos, amás de remates de báculos y otres pieces pequeñes.

L'arte bizantín, magar que produció preciosos relieves en marfil y desarrolló enforma la escultura como elementu decorativu nos edificios, nun volvió a facer escultures monumentales, y parez que tampoco escultures exentes de ciertu tamañu[43]. Por embargu, n'Europa occidental, nos periodos carolinxu y otonianu entamó otra vuelta la producción d'estatues monumentales p'adornar les cortes reales y les catedrales. Esta moda espardiose y asina, pa finales del sieglu X y nel XI tenemos rexistros escritos qu'indiquen la esistencia d'escultures de tamañu natural nes ilesies anglosaxones. Magar que denguna d'elles sobrevivió piénsase que seríen, como la Vírxe dorada d'Essen, pieces de madera recubiertes de llámines de metales preciosos. Como dicíemos, nun sobrevivió denguna, y los restos d'escultures de ciertu tamañu non venceyaes a estructures arquitectóniques anteriores al añu 1000 son perescasos. La más destacada ye la Cruz de Gero (965-70), un exemplu de lo qu'había ser ensin dubia'l más común de los tipos d'escultures, el crucifixu. Les piedres rúniques del mundu escandinavu, les piedres pictes d'Escocia y les grandes cruces de la Gran Bretaña cristiana, d'otra banda, son muestres de les tradiciones esculturales de los países septentrionales d'Europa que pervivieron tres de la so cristianización.


Románicu[editar | editar la fonte]
Lleón de Brunswick (1166), primera estatua de gran tamañu (1,78 m d'altor y 2,79 m de llargor) fecha en fundición hueca dende l'Antigüedá

De magar el añu 1000 hubo, de resultes de la medría de les actividaes productives y comerciales, que traxeron un crecimientu económicu xeneralizáu, un resurdimientu de la producción artística en tol continente, y el nuevu estilu románicu, el primeru en ser utilizáu en tola Europa occidental, habría de ser el vehículu espresivu d'esi nuevu arte. Les nueves catedrales ya ilesies de peregrinación decorábense cada vegada más con elementos arquitectónicos qu'incluyíen relieves en piedra, y apaecieron decoraciones escultóriques en sitios nuevos, como los tímpanos, sobro les puertes de les ilesies, o los capiteles, qu'entamaron a decorase con elementos figurativos y narrativos. Dalgunos de los exemplos cimeros d'esta nueva decoración escultórica son les abadíes franceses de la Madeleine (en Vézelay) y de Moissac, o'l monasteriu español de Santu Domingu de Silos[44].

L'arte románicu caracterizábase por un estilu rotundu, mesmo na pintura que na escultura. Nun hai capiteles de mayor valir artísticu que los d'esta dómina, na que munches veces incluyíense nellos escenes completes con delles figures. Los grandes crucifixos de madera fueron una innovación apaecida n'Alemaña al entamu d'este periodu, y tamién les estatues exentes de la Virxe, pero l'elementu escultóricu que define a esti periodu ye l'alturrelieve. Les composiciones nun solíen tener gran profundidá, y teníen de ser flexibles pa poder adautales a la forma de los capiteles y los tímpanos. De resultes, la tensión ente un marcu qu'imponía restricciones a les figures y estes, que delles veces escapaben d'elli, ye un tema recurrente nel arte románicu. Un arte nel que malpenes se trabayaba'l retratu, y nel que les figures avezaben a ser de tamañu diferente según la importancia de la persona representada.

Los oxetos en materiales preciosos, como'l marfil o'l metal, yeren, muncho más que les escultures monumentales, una señal d'estatus social, y ello fai que conozamos más nomes d'orfebres que de pintores o arquitectos. El trabayu del metal, incluyíos los esmaltes, sofisticáronse enforma; consérvense varios relicarios espectaculares, como'l relicariu de los trés Reis Magos, el mayor del arte occidental, obra de Nicolás de Verdún conservada na catedral de Colonia. El candelabru de Gloucester y la pila bautismal de la ilesia de San Bartuelu (Liexa) son exemplos cimeros, perdiferentes n'estilu, del trabayu del metal. El primeru, fechu nún bronce con un conteníu en plata inusualmente altu, tien una complexa y enrevesada decoración na que s'axunten figures humanes, de monos y de besties fantástiques con motivos vexetales, mentanto qu'el segundu ye l'amuesa más perfecha del arte mosanu más clásicu. Les puertes de bronce, una columna trunfal y otros adornos de la catedral de Hildesheim, les puertes de la catedral de Gniezno (Polonia), y les pueertes de la basílica de San Zeno, en Verona (Italia) son otros de los principales oxetos que se conserven. Los aguamaniles, pequeñes duernes nes que botar agua pa llavase, tienen apaecío n'Europa nel sieglu XI; solíen ser de llatón, y decorábense xeneralmente con figures zoomórfiques fantástiques. Consérvense tamién muches impresiones en cera de los sellos usaos en cartularios y documentos, y monedes, magar que les d'esta dómina nun tienen un gran interés estéticu[45].

La nomada Cloisters Cross ye un crucifixu de marfil d'un tamañu inusualmente grande que tien una complexa decoración qu'inclúi figures de profetes y que tien atribuyíose a ún de los perpocos artistes qu'el so nome ye conocíu, el Maestru Hugo. N'orixe taba, como munches otres pieces, parcialmente colloreáu. Les figurines d'axedrez de Lewis (sieglu XII) son un exemplu perbién conserváu d'escultura de pequeñu tamañu en marfil, un material usáu na dómina pa facer plaques, cruces pectorales, báculos y otros oxetos similares.


Góticu[editar | editar la fonte]
Virxe col Neñu, escultura francesa en marfil del sieglu XIII. El cuerpu de la Virxe cúrvase p'adautase a la forma del colmillu.

El periodu góticu defínese esencialmente pola arquitectura gótica, que tien una cronoloxía estremada, tanto no que cinca al so entamu como al so final, col desarrollu escultóricu de la dómina. Les fachaes de les grandes ilesias, especialmente alredor de les puertes, siguieron teniendo grandes tímpanos, pero tamién fileres de figures esculpíes na so rodiada. Les estatues de la portada occidental (la Portada Real) de la catedral de Chartres (c. 1145) amuesen una elegante pero descomanada elongación columnar, mentantu que les de la portada del brazu meridional del cruceru, tamién de cronoloxía "gótica" magar qu'esculpíes ente 1215-1220, amuesen un estilu más naturalista, con una mayor separación del muru que va detrás d'elles y ciertes semeyances cola tradición clásica. Podemos siguir el rastru d'estes tendencies nel portal occidental de la catedral de Reims, un poco posteriores, con figures cuasimente exentes, y dempués nos edificios góticos de tol continente européu[46].

N'Italia los escultores Nicola y Giovanni Pisano (pa y fíu respectivamente) desarrollaron un estilu qu'aveza a ser llamáu protorrenacentista, con influyencies evidentes de los sarcófagos romanos y composiciones sofisticaes y con munchos personaxes. Dalgunes obres destacaes de so son el púlpitu de la catedral de Siena (1265-68), la Fontana Maggiore (gran fonte) de Perugia y el púlpitu de la ilesia de San Andrés en Pistoia (1301)[47]. Tamién vemos una revisión del estilu clásicu nel nomáu góticu internacional, estilu siguíu por Claus Sluter y los sos discípulos en Borgoña (Francia) y Flandes alredor de 1400[48]. La escultura gótica tardía prollongose nel tiempu entá más nel norte d'Europa, con retablos de madera de gran tamaño con un esculpíu cada vegada más perfectu y gran cantidá de figures de gran expresividá. La mayoría de los que sobrevivieron a les foles d'iconoclastia de la Edá Moderna consérvense n'Alemaña. L'estilu góticu, al que foron incorporándose gradualmente influyencies del Renacimientu italianu, pervivió na escultura hasta bien entráu'l sieglu XVI na obra d'escultores como Tilman Riemenschneider o Veit Stoss[49].

Les efixies a tamañu natural, en piedra o alabastru, pa poner nes tumbes ficiéronse populares ente los ricos y poderosos, qu'engrandecieron enforma les sos tumbes, de forma que dalgunes, como les de Scaliger en Verona, yeren tan grandes que tuvieron que ser sacaes fuera de la ilesia. Pal sieglu XV desarrollárase una industria d'esportación de relieves pa altares fechos en alabastru de Nottingham (Inglaterra). Paneles con varies figures esculpíes vendíense per buena parte d'Europa a les parroquies que nun yeren riques abondo como pa pagar un retablu de piedra. Púnxose de moda, tamién, l'adquisición, xeneralmente por el públicu femenín, de pequeñes escultures, les más d'elles de tema laicu, lo que permitió'l desarrollu d'una próspera industria en París y otros llugares. Xoyeros, espeyos con caxa y peñes en marfil, amás de pequeños polípticos devocionales y figures de la Virxe, yeren regalos comunes nesta dómina na que los perricos coleccionaben xoyes extravagantemente decoraes y esmaltes, tantu de tema relixosu como laicu, que fundíen pa viender el metal nel casu d'andar cortos de perres[50].


Renacimientu[editar | editar la fonte]
Tumba del papa Xuliu II, de Michelangelo (c. 1545), con estatues de Raquel y Lea (les dos muyeres de Xacob) a la manzorga y la mandrecha de Moisés.

Aveza a considerase, como fecha d'iniciu de la escultura renacentista, el famosu concursu entamáu pa diseñar unes puertes pal baptisteriu de Florencia, en 1403. Dos de los diseños concursantes, el ganador unviáu por Lorenzo Ghiberti y otru de Filippo Brunelleschi entá se conserven. Les puertes de Ghiberti entá siguen nel so llugar, magar qu'el so brillu artísticu foi eclipsáu pol segundu par diseñáu pol autor pa la otra entrada del baptisterio, les nomaes Puertes del Paraísu. Estes, feches ente 1425 y 1452, son esllumantes composiciones de sabor clásicu con gran variedá de profundidaes nos sos relieves y un tratamientu perdetalláu de los fondos[51]. Demientres estos años de la so construcción, un ayudante de Ghiberti, Donatello, entamó la so carrera escultórica propia realizando los sos primeros trabayos: el David en mármole (1408-09) y bronce (década de 1440), y la so estatua ecuestre de Gattamelata, amás de dellos relieves[52]. Otra de les figures más destacaes de la dómina foi Andrea del Verrocchio, del que destaca la so estatua ecuestre de Bartolomeo Colleoni, anguaño en Venecia[53]. El so discípulu Leonardo da Vinci diseñó en 1482 una estatua ecuestre p'asitiar na ciudá de Milán, que nun llegó a realizase porque'l so modelu n'arcilla foi destruyíu por soldaos franceses en 1499[54].

Nesti periodu cobró gran fuercia la costumbre d'encargar escultures. Los rícos facíanlo p'adornar les sos cases, y l'estáu pa colocales en llugares públicos. Especialmente n'Italia, au les escultures públiques constitúinse nún de los elementos de referencia nel paisaxe de los centros urbanos. La escultura relixosa, al tiempu, abandonó los llugares públicos pa instalase dientro les ilesies. La escultura de retratu, especialmente bustos, fízose perpopular n'Italia alredor de 1450; rescamplen nesti campu el napolitanu Francesco Laureana, especializáu en figures de muyeres xóvenes con pose reflesiva, y Antonio Rossellino y otros, dedicaos a facer bustos, de rasgos mui marcaos, de homes de negocios, pero tamién de nenos[55]. La medalla con retratu, inventada por Pisanello, fízose mui popular ente les muyeres, y tamién desarrollose una nueva forma d'escultura en metal fundíu, les plaquettes con decoración en relieve.

Michelangelo foi un escultor activu ente 1500 y 1520, y autor de grandes obres mayestres como'l David, la Pietá o'l Moisés. La influyencia d'estes y otres de les sos obres, como la tumba del papa Xuliu II y la capilla de los Médici, nos autores posteriores nun puede obviase. El so David tien una pose peculiar, el nomáu contrapposto, tomada directamente de la escultura clásica, y diferénciase de les versiones previas d'esti tema en que representa al rei israelín primero de la so llucha con Goliat y non dempués d'ella. Asina, en vez d'apaecer con xestu victoriosu, como nos Davides de Donatello o Verrocchio, el de Michelangelo apaez tensu y concentráu, preparáu pa la batalla[56].


Manierismu[editar | editar la fonte]
Mercuriu y Psique, escultura en bronce fecha en 1593 pal emperador Rodolfu II por Adriaen de Vries.

Neto que na pintura, la escultura, nel manierismu italianu inicial, foi n'esencia un intentu d'atopar un estilu orixinal que sobrepasara los llogros del nomáu Altu Renacimientu (década de 1490-1527). Nel campu escultóricu esto yera, cenciellamente, ameyorar la obra de Michelangelo. Dafechamente, muncha de la evolución d'esti estilu produciose al traviés de proyectos fechos pa enllenar güecos na Piazza della Signoria de Florencia, au taba'l David de Michelangelo. Baccio Bandinelli, autor de la obra Hércules y Caco, utilizó un proyectu del propiu Michelangelo, al que-y encargaran una obra que complementase al David na decoración de la plaza. Pesie a que l'autor definitivu nun ye anguaño mui popular, y que la estatua foi ridiculizadada por Benvenuto Cellini, que comparó al so musculosu Hércules con "un sacu de melones", la obra inclúi un elementu novedosu: la introducción de paneles con relieve nel pedestal de les estatues[57]. No que cinca a Cellini, la so obra Perséu cola cabeza de Medusa ye, ensin dubia, una obra maestra, comparable a los Davides de Michelangelo y y Donatello. Taba diseñada con ocho ángulos de visión, dalgo que ye otra de les caracteríctiques de la escultura manierista[58]. Primeru qu'escultor fora orfebre, y el so famosu Saliera (saleru), fechu n'oru parcialmente esmaltáu pal rei Franciscu I de Francia, foi la so primer escultura, que marca quiciás el cumal del so talentu. Los exemplos anteriores son una buena amuesa de la estensión de los temes seculares, especialmente figures mitolóxiques, como motivos representaos nes estatues de gran tamañu; previemente esos temes apaecíen namái n'escultures de pequeñu tamañu.

Les figures pequeñes en bronce, qu'adornaben los gabinetes de la xente rica que tenía'l vezu de coleccionar obres d'arte, yeren otru tipu d'escultures popular na dómina del Renacimientu. Ente los autores d'estes estatues, xeneralmente de temática mitolóxica y con bayura de figures desnudes, destaca Giambologna, autor flamencu establecíu en Florencia que, amás d'estes obres, facía tamién escultures de tamañu natural. Dos d'elles axuntáronse a la colección d'escultures de la Piazza della Signoria. Elli, y los sos seguidores, mos dexaron dellos exemplos de la nomada figura serpentinata, escultura na qu'apaecen dos figures entrellazaes que permite la so visión dende tolos ángulos[59].

Barrocu y Rococó[editar | editar la fonte]

Na escultura barroca los grupos de figures asumen una nueva importancia, y trátase la figura humana con una concepción diferente del movimientu: les figures rodeen n'espiral un vórtex central vacíu, o muévense hacia fuera pa ocupar l'espaciu que las arrodia. La escultura barroca aveza a tener multiples puntos de visión ideales, y en xeneral sigue la tendencia, entamada nel Renacimientu, d'abandonar el relieve en favor de la escultura de bultu redondu diseñada pa ser colocada en metá d'un espaciu ampliu. Asina, les fontes esculturales como la Fontana dei Quiatro Fiumi, fecha en 1651 por Bernini en Roma, o les de los xardines del Palaciu de Versalles son una especialidá barroca. La figura principal d'esti estilu escultóricu foi Gian Lorenzo Bernini, autor d'obres maestres como L'éxtasis de Santa Teresa (1647-52)[60]. Munches de les obres barroques, d'otra banda, añedíen elementos extraesculturales, como iluminación oculta o fontes d'agua, o fusionaben escultura y arquitectura pa crear una esperiencia nueva al espectador. Los artistes considerábense a sigo mesmos como continuadores de la tradición clásica, magar qu'admiraben más la escultura romana tardía y la helenística que la que nosotros tenemos anguaño por clásica[61].

La Reforma protestante provocó la desapaición cuasi total de la escultura relixosa na mayoría de la Europa septentrional, y magar que la escultura de tema secular, especialmente bustos y monumentos funerarios continuó, el Sieglu d'oru neerlandés nun tien dengún elementu escultural significativu sacante nel campu de la orfebrería[62]. Na Europa católica, por embargu, y en parte como reacción directa escontra la Reforma, la escultura tuvo un papel tan destacáu como'l que tuviera a finales de la Edá Media. Les estatues de gobernantes y nobles foron cada vegada más populares. No que cinca al rococó, l'estilu yera más afayaízu pa los trabayos de pequeñu tamañu, y alcontró la so forma escultural ideal na porzolana, y tamién en figures pa decorar interiores, d'ilesies o cases particulares, en madera o yesu[63].

Neoclasicismu[editar | editar la fonte]

L'estilu neoclásicu, que recuperó na segunda metá del sieglu XVIII la cultura clásica grecorromana, dió-y gran importancia a la escultura. Rescamplen les figures de Jean-Antoine Houdon, que demostró'l potencial de la escultura pal retratu, y Antonio Canova, que los sos desnudos exemplifiquen el carácter idealista d'esti movimientu artísticu. El periodu neoclásicu foi ún de los meyores momentos pa la escultura pública, magar que los prototipos "clásicos" que tomaben de modelu yeren en xeneral copies romanes d'escultures helenístiques. Amás de Canova o Houdon, podemos citar ente los autores neoclásicos europeos más importantes al inglés John Flaxman y al danés Bertel Thorvaldsen. Esti movimientu artísticu difundiose tamién a los Estaos Xuníos, au alcanzó'l so cumal unos años más tardes que n'Europa, y au destaca ente los demás artistes neoclásicos la figura de Hiram Powers.


Asia[editar | editar la fonte]

L'arte greco-budista[editar | editar la fonte]

Una de les representaciones más antigües de Buda (sieglos I-II). Muséu Nacional de Tokyo.

L'arte greco-budista ye la manifestación artística del greco-budismu, un sincretismu cultural ente les cultures de la Grecia clásica y el budismu que se desarrolló, nel Asia central, nel periodu de cuasi un mileniu que trescurrió ente les conquistes d'Alexandru Magnu (sieglu IV edC) y l'avance del Islam nel sieglu VII. L'arte greco-budista caracterízase por presentar el fuerte realismu idealista del arte helenísticu. A elli pertenecen les primeres representaciones de Buda con forma humana, que definieron el canon artísticu (y especialmente l'escultural) de la representación d'esta divinidá nel arte budista nel continente asiáticu de magar. Pesie a que la cronoloxía ye incierta, parez que los estilos artísticos helenísticos sobrevivieron nesta parte del mundu varios sieglos dempués d'haber desaniciaose na cuenca mediterránea. L'apropiación del arte helenísticu nesta zona, sicasí, nun foi integral, sinón que se tomaron dellos elementos d'elli y obviáronse otros. Los más imitaos foron la figura de pie, xeneralmente con una pose relaxada y una pierna flexonada, y los cupidos alaos o "victories", que se ficieron perpopulares en toa Asia como apsares (espíritus femeninos de les ñubes y les agües na mitoloxía budista ya hinduista). La decoración vexetal d'estilu griegu tamién foi perinfluyente, y esistieron versiones indies del capitel corintiu[64].

Los oríxenes del arte greco-budista hai que buscalos nel reinu helenísticu greco-bactrianu (250 edC-130 edC), allugáu no qu'anguaño ye Afganistán. Dende esi focu la culturar helenística irradió al socontinente indiu col establecimientu del pequeñu reinu indo-griegu (180 edC-10 edC). Embaxu'l gobiernu de los indo-griegos, y dempués de los kushan, la interacción ente les cultures griega y budista floreció na rexón de Gandhara (norte del actual Paquistán) pa después espardese a la India ya influenciar el arte de la rexón de Mathura (nel actual estáu indiu d'Uttar Pradesh) y más tarde l'arte hinduista del imperiu gupta, dende'l que s'espardió pel restu d'Asia. La influyencia helenística tamién llegó al norte, al Asia Central, influyendo enforma nel arte de la cuenca del Tarim (rexón autónoma de Xinjiang, China) y de les cueves de Dunhuang (provincia de Gansu, China), y finalmente na representación escultórica de la figura humana en China, Corea y Xapón[65].


China[editar | editar la fonte]

Estatua de Guanyin en madera policromada. Dinastía Liao (9071125).

Los vasos rituales de bronce de les dinastíes Shang y Zhou fabricáronse per demientres un mileniu, entamando alredor del 1500 edC, y exercieron una influyencia continuada nel arte chinu de magar. Son vasos de bronce fundíos con una decoración complexa de tipu zoomórficu, na que s'evita l'usu de la figura humana. La única escepción son les grandes figures recientemente descubiertes en Sanxingdui[66]. Esti espectacular exércitu de figures de terracota foi fechu pa la tumba de Qin Shi Huang, primer emperador de la China unificada (221-210 edC), como una versión a gran tamañu de les figures que se colocaben, de bien tiempu atrás, nes tumbes de los poderosos pa permití-yos esfrutar, nel más allá, del mesmu estilu de vida que teníen cuando vivíen. La colocación de pequeñes figures en cerámica o madera nes tumbes pervivió dellos sieglos más, alcanzando'l so cumal, no que cinca a la calidá de les pieces, nel tiempu de la dinastía Tang[67]. Tamién persistió en China la tradición de facer estatues de cerámica de gran tamañu, mesmo coles figures de cerámica con decoración sancai que dempués con estatues de Buda, coles estatues de tamañu cuasi natural de luohans (los perfectos, xente que yá alcanzaron el Nirvana) en cerámica o figures de gran tamañu pa decorar templos y palacios[68].

La producción de pequeñes figures, o grupos d'elles, de temática budista algamó una gran calidá en diversos materiales, rescamplando los trabayos en relieve sobre metal o xade[69]. Nos periodos más tempranos de la historia imperial ficiéronse munches escultures a partir de roca sacada de complexos de cueves que facíen les veces de canteres, y tamién practicose la escultura na propia roca, con figures xeneralmente pintaes. Los escultores de toa triba yeren consideraos artesanos y, poro, consérvense los nomes de perpocos d'ellos[70]. Dende la dinastía Ming pa en delantre la producción d'estatuines de temática secular o relixosa en porzolana y otros materiales convirtiose nuna importante fonte d'ingresos pal país al traviés de la so esportación.


Xapón[editar | editar la fonte]

El Gran Buda del templu Tōdai-ji (c. 752)

Haza'l final del periodu Jōmon, periodu de la prehistoria xaponesa que compriende ente'l 12.000 y el 300 edC, aparecen yá delles figures que podemos calificar como escultures. Tenemos vasos de cerámica con decoración en forma de llama, y tamién figures dogū (representaciones d'humanoides y animales) en cerámica finamente trabayada que presenten los característicos güeyos con forma de "gafes pa la nieve". Demientres el periodu Kofun (sieglos III-VI) colocábense figures haniwa, esquemátiques y con pocu detalle, d'homes y animales, feches en terracota, a la vera de les tumbes de persones importantes de la comunidá. La llegada del budismu al archipiélagu xaponés, nel sieglu VI, acompañose de la llegada d'un nuevu estilu escultóricu, refináu y sofisticáu, con formes y estilos chinos modificaos tres del so pasu pela península coreana. El templu de Hōryū-ji (sieglu VII) y los sos elementos interiores sobrevivieron al pasu del tiempu abondo meyor que cualisquier otru templu budista contemporáneu suyu, lo que mos permite contemplar una "Trinidá Shaka" en bronce del añu 623, una figura que representa al Buda "históricu" escoltáu por dos bodhisattvas y tamién los Reis Guardianes de les Cuatro Direcciones, los cuatro dioses budistes que se representen mirando pa los cuatro puntos cardinales[71].

La imaxe de madera (sieglu IX) de Shakyamuni, el Buda "históricu", entronizáu nún edificiu ausiliar del templu Murō-ji, ye un exemplu típicu de la escultura de los anicios del periodu Heian. Represéntase a un Buda corporientu, vistíu con una túnica gruesa con pliegues decoraos n'estilu hompa-shiki (los pliegues recuerden a les foles del mar) y con una espresión facial austera. La escuela Kei d'escultores, especialmente Unkei, crearon y desarrollaron más tarde un nuevu estilu, más realista, de representación de la figura humana na escultura.

Prácticamente toes les grandes escultures de Xapón de magar foron budistes, con dalgunos equivalentes sintoístes, y la decayencia del budismu nel archipiélagu nel sieglu XV traxo apareyada la perda d'importancia de la escultura monumental, que quedó reducida a una función de decoración arquitectónica[72]. Por embargu, los trabayos escultóricos de pequeñu tamañu desarrolláronse hasta algamar un nivel perimportante de sofisticación técnica y refinamientu n'oxetos como los inrō (pequeñes caxes pa guardar oxetos) y los netsuke (cierres del obi, cuerda de la que colgaba'l inrō dende'l cinturón del kimonu) y fundes en metal pa les espades. Nel sieglu XIX desarrollose una industria d'esportación de pequeñes figurines de bronce, marfil o porzolana de gran refinamientu y creciente complexidá técnica na so ellaboración.


India[editar | editar la fonte]

La primer escultura conocida nel socontinente indiu débese a la civilización del valle del Indo (3000-1700 e.C.), y atopose nos enclaves arqueolóxicos de Mohenjo-daro y Harappa, nel Paquistán. Ente les figures que s'alcontraran rescampla la famosa estatuina de bronce que representa a una baillarina. Pesie a ello, les figurines en bronce o piedra son escases, mentantu que son muncho más abondantes les figurines de cerámica y los sellos en piedra, munches veces con representaciones de animales o dioses ellaboraes con gran procuru. Tres de la desapaición d'esa cultura, pasen bien de sieglos con perpocos restos d'escultura, hasta la llegada de la era budista. La única esceición relevante son un garapiellu de figures de cobre dataes, magar que provisionalmente, nel 1500 e.C. y atopaes en Daimabad[73].

La gran tradición india d'escultura monumental en piedra aparez relativamente tarde con respeutu a otres grandes cultures, nún momentu nel que la civilización india yá tenía desarrolláose por bastante tiempu. Habrá ser nel reináu d'Ashoka (c. 268-232 e.C.) cuando se llevanten los pilares d'Ashoka, una serie de columnes (consérvense 19) repartíes per tol territoriu que controlaba, y qu'incluyía bona parte del socontinente, nes que se inscribíen los edictos d'esti rei. Les columnes teníen, nel so cumal, escultures d'animales, principalmente lleones; entá queden seis en pie anguaño[74]. Consérvense tamién grandes cantidaes d'escultures figuratives, la mayoría d'elles en relieve, n'estupes de la dómina budista temprana; rescamplen, pola so importancia y monumentalidá, les de Sanchi. Piénsase qu'estes figures pudieran tener evolucionao a partir d'una tradición de figures asemeyaes en madera que compartieron el budismu y l'hinduísmu[75].

Les escultures (hinduistes, xainistes y budistes) de Mathura, de los sieglos I-III, amuesen un amiestu de rasgos de les tradiciones propies de la India y de les influyencies occidentales qu'aportaran al socontinente al traviés del arte grecobudista de Gandhara, y constitúin la base de la escultura relixosa india posterior[76]. El so estilu difundiose per bona parte de la India na dómina del imperiu gupta (c. 320-550) y dempués nel que puede considerase como "periodu clásicu" de la escultura india, que compriende'l periodu que media ente les escultures d'Ellora y les d'Elephanta y quiciás un poco dempués, esto ye, ente los sieglos V-X. Les escultures posteriores de gran tamañu son de temática cuasi exclusivamente relixosa, y tán tallaes con un diseñu bastante conservador; los dioses represéntense a menudu en pose frontal, de pie... magar que los espíritus sirvientes como los apsaras y yakshi suelen esculpise en poses sensuales, curvilínees. La talla aveza a ser perdetallada, con relieves complexos per detrás de la figura principal, tallada n'alturrelieve. Los renomaos bronces de la dinastía Chola (c. 850-1250) del Sur de la India, diseñaos munchos d'ellos pa ser pasiaos en procesión, incluin les figures de Shiva y Nataraja[77]. Anteriores a ellos nel tiempu son le talles en granitu de Mahabalipuram, dataes na dómina de la dinastía Pallava (275-897)[78].

Sureste asiáticu[editar | editar la fonte]

La escultura d'esta rexón xeográfica caracterízase, en xeneral, por presentar abondante ornamentación, como puede vese nes grandes escultures, budistes ya hinduistes, de la escultura khmer (sieglos X-XIII) conservaes n'Angkor Wat, el xigantescu complexu budista de Borobudur, na islla de Xava (sieglu IX) o los monumentos hinduistes de Bali[79]. Estos dos caberes inclúin munchos relieves amás de les figures de bultu redondu. Asina, en Borobudur hai 2.672 paneles decoraos en relieve amás de 504 estatues de Buda y munches otres de guardianes, y bien de figures formando parte d'estupes.

En Tailandia y Laos la escultura llimitose, en bona medida, a la representación d'imáxenes de Buda, a menudo bañaes n'oru, de gran tamañu en templos y monasterios y piquiñines pa guardar nes cases. D'otra banda, la escultura tradicional en Myanmar desarrollose anantes del nomáu periodu Bagan (849-1297). Ehí, como nos otros países de la rexón, la mayoría de les escultures de madera del periodu Bagan y del Ava perdiéronse.

En dómines posteriores percíbese la influyencia china na escultura en Vietnam, Laos y Camboya; consérvense abondos más exemplos d'escultures de madera en toa la rexón.

L'Islam[editar | editar la fonte]

L'Islam ye anicónicu, esto ye, prohibe la representación de figures humanes ya animales, lo que fae que la so escultura seya mayoritariamente d'arabescos tallaos en relieve o calaos, con base en temes vexetales que delles veces tienden a la xeometrización abstracta. Sicasí, na escultura islámica más antigua conservada, la de la fachada de Mshatta (década del 740), entá aparecen animales, acompañaes d'una decoración tupida d'arabescos, n'alturrelieve. Alcuéntrense tamién figures humanes y animales, la mayoría en baxurrelieve y acompañaos de decoración n'arabescos, en munches pieces posteriores en materiales como cerámica, marfil o metal[80].

Les figures d'animales en bultu redondu admitíense tamién pa escultures destinaes al usu priváu siempre que l'oxetu tuviera una utilidá práctica clara. Asina, l'arte islámicu medieval incluyía munches figures con forma d'animal en metal utilizaes como aguamaniles, quemadores d'inciensu o como base de sofitu de fontes. Rescamplen ente ellos los famosos lleones de l'Alhambra de Granada y la que ye la mayor fitura animal conocida del arte islámicu medieval, el grifu de Pisa. Nel mesmu sen, tamién había representaciones de figures animales tallaes en piedres semiprecioses usaes como mangos de puñal o copes, especialmente nel conocíu como arte Mugal (sureste d'Asia, sieglos XVI-XIX). En xeneral, el gráu d'aceptación d'esta relaxación de les estrictes normes islámiques varió nel tiempu y nel espaciu, siendo la España islámica, Persia ya India los llugares onde más s'espardieron estes representaciones animales, especialmente na corte y el so entornu[81].


África[editar | editar la fonte]

Máscara de Gabón

Históricamente, la mayoría de la escultura africana, sacante dalgunes escultures monumentales del Antiguu Exiptu, creose en madera y otros materiales perecederos, lo que fae que namái se conserven figures de los caberos sieglos, munches d'elles en cerámica, en diverses zones del continente. Les máscares son elementos importantes nel arte de munchos pueblos, y tamién les figures humanes, xeneralmente perestilizaes. Hay bayura d'estilos nel continente, a menudu variando dientro del mesmu contestu d'orixe dependiendo del usu del oxetu. Sicasí, hai grandes tendencies rexonales evidentes; asina, l'apaición de la escultura ye más habitual entre "grupos de agricultores sedentarios de les cuenques fluviales de los ríos Níxer y Congo", nel oeste d'África.[82]. Ye relativamente infrecuente que se represente nelles directamente la imaxe d'un dios o diosa, pero la mayoría de les máscares yeren feches pa ser emplegaes en ceremonies relixoses. Anguaño, son feches pa los turistes; ye lo que dalgunos nomen arte d'aeropuertu[83]. Les máscares africanes influyeron enforma nel arte modernista européu, qu'alcontró inspiración na so falta de preocupación pola representación naturalista de la realidá.

El reinu nubiu de Kush, nel actual Sudán, tenía contactos estrenchos, y delles veces violentos, con Exiptu, y produció escultures monumentales con estilos derivaos de los del so vecín septentrional. Nel oeste d'África les escultures más antigües conocíes pertenecen a la cultura Nok, que s'espardió ente'l 500 e.C. y el 500 per tierres de l'actual Nixeria; son figures d'arcilla que representen figures humanes con cuerpos allargaos y formes angulares. Les cultures de la zona posteriores a ella desarrollaron el modeláu en bronce pa facer relieves colos que decorar palacios, como los famosos bronces de Benín, y tamién escultures de cabeces de reis, d'estilu naturalista, como les que se conservan alredor de la ciudá yoruba d'Ife, feches en terracota y metal ente los sieglos XII-XIV. Los pesos d'Akan, fechos n'oru, son un tipu de pequeñes escultures de metal producíes ente 1400 y 1900; dalgunos aparentemente representen refranes, un elementu narrativu poco habitual nel arte africanu. Consérvense tamién dalgunes vestimentes reales qu'incluyíen espectaculares elementos esculpíos n'oru[84].

Munches figures producíes nel África occidental utilícense'n rituales relixosos, y a menudu tán cubiertos de vistíos que se-yos ofrenden. Los pueblos de fala mandé ellaboren pieces de madera con cuerpos planos y brazos y piernes en forma de cilindru. Nel África central, por embargu, les principales característiques distintives inclúin caras con forma de corazón que se curven haza l'interior feches a partir de círculos y puntos.

Les poblaciones de la rexón de los Grandes Llagos nun tienen sonadía pola so escultura. Nostante, hai que mencionar les escultures feches sobro troncos finos, una especie de tótems tallaos con formes humanes y decoraos con formes xeométriques y remataes con figures d'animales, persones ya otros oxetos. Estes pértigues asítiense a la vera de les tumbes, y asóciense cola muerte y'l mundu de los antepasaos. D'otra banda, nel xacimientu nomáu Gran Zimbabwe, que compriende los restos de la que fora la capital del reinu de Zimbabwe na Edá de Fierro final, mos dexó edificios imponentes y de mayor valir que les sos estatues, pero los sos ocho páxaros de Zimbabwe, fechos n'esteatita y montaos enriba de monolitos, parecen haber tenío una significación especial. Los escultores zimbabuenses de l'actualidá, heriedes de los autores d'aquellos, tienen algamao un reconocimiento internacional importante coles sos escultures n'esteatita. No que cinca a l'África del Sur, les figures más antigües conservaes, n'arcilla, son de los años 400-600, y son cabeces cilíndriques nes que s'amiesten rasgos humanos y animales.

América[editar | editar la fonte]

L'América precolombina[editar | editar la fonte]

La escultura n'América Llatina desarrollose en dos áreas separtaes y diferenciaes: Mesoamérica nel norte, y Perú nel sur. En dambes áreas la escultura foi, al principiu, en piedra, entamando a usase posteriormente, cuando les civilizaciones de la zona foron siendo tecnolóxicamente más eficientes, en terracota y metal[85]. La rexón mesoamericana produció más escultura monumental, con obres que van de los xigantesques figures feches con bloques de piedra de les cultures olmeca y tolteca a los esquisitos baxurrelieves que caractericen a les cultures maya y azteca. Na rexón andina, por el contrario, les escultures yeren piquiñines, pero tamién de gran calidá artística.

N'América del Norte, pela so banda, usose la madera pa esculpir tótems, máscares, cacía, canoes y bayura d'oxetos pa usos diferentes, con diferencies importantes nel so diseñu y decoración ente les diferentes cultures y rexones. L'estilu más desarrolláu ye'l de la rexón pacífica noroccidental, na que un grupu d'estilos formales ellaboraos y perestilizaos sentaron les bases d'una tradición escultórica que continúa anguaño. Amás de los famosos tótems, les fachaes de les cases incluíen talles de conteníu relixosu y mortuoriu. Ente los inuit, nel estremu más occidental del continente, la tradición de talla d'oxetos en marfil y esteatita entá continúa anguaño[86].

Realismu y modernismu tempranu (sieglu XIX y primer terciu del XX)[editar | editar la fonte]

Oviri (Xabaz), escultura (75 x 19 x 27 cm)de cerámica parcialmente vidriada de Paul Gauguin (1894). Musée d'Orsay, París.

La escultura clásica del sieglu XIX caracterizábase por un compromisu col naturalismu (Antoine-Louis Barye) o por una grandiosidá maxestuosa (Lord Leighton). Esta tradición clásica dixebrose en diferentes caminos cola llegada del sieglu XX, pelo l'estudiu de los modelos vivos y la tradición postrenacentista siguíen siendo parte fundamental de toes elles.

Auguste Rodin foi el más famosu de los escultores europeos del entamu del sieglu XX[87]. Ye avezao referise a él, y tamién a los sos discípulos, qu'incluyíen a Camille Claudel y Hugo Rheinhold, como escultores impresionistes, que buscaben modelar nes sos obres un momentu fugaz de la vida corriente.

El clasicismu modernu amosó menos interés pol naturalismu, y muncho más pola estilización formal. Los escultores enfotáronse más nos ritmos de los volúmenes y los espacios y a les cualidaes de les superficies, dexando de lláu l'interés porque la escultura tuviera un conteníu narrativu o por tallar de forma fiel los detalles anatómicos o de vestuariu. Púnxose'l focu más en reflexar aspectos psicolóxicos que nel realismu físicu, y atropáronse pa les escultures influyencies d'estilos artísticos de tol mundu.

Ente los principales autores del clasicismu modernu podemos citar a Aristide Maillol, Alexander Matveyev, Joseph Bernard, Antoine Bourdelle, Georg Kolbe, Libero Andreotti, Gustav Vigeland, Jan Stursa o Constantin Brâncuși. Na década de 1930 el clasicismu modernu convirtiose nel estilu "nacional" de dos grandes rexímenes totalitarios, l'Alemaña nazi y la Unión de Repúbliques Socialistes Soviétiques, que s'apropiaron del trabayu d'escultores anteriores a la so aparición, como ye'l casu de Kolbe y Wilhelm Lehmbruck n'Alemaña[88] o Matveyev en Rusia. Demientres los setenta años d'esistencia de la URSS, toes les xeneraciones d'escultores foron aprendíos nel estilu distintivu del país, el nomáu realismu socialista, que supunxo una vuelta al énfasis decimonónicu nel melodrama y el naturalismu.

La enseñanza de los cánones clásicos desapaeció de la educación artística n'Europa occidental hacia 1970, y estes corrientes del clasicismu modernu foron marxinalizaes dientro ha historia del modernismu. Sicasí, el clasicismu siguió siendo la base de la educación artística nes academies soviétiques hasta 1990, poniendo los cimientos pa l'apaición d'un arte figurativu espresivu nel este d'Europa y en delles partes d'Oriente Mediu. Pal añu 2000, pesie a que la tradición europea clásica entá atrae al públicu, sigue pendiente una revisión de los programes educativos que ponga en valor el so desarrollu contemporáneu.

Dalgunos de los clasicistes modernos adoptaron un estilu más decorativu, averáu al art decó (Paul Manship, Jose de Creeft, Carl Milles); otros optaron por un estilu más espresivu y con una mayor estilización abstracta (Anton Hanak, Wilhelm Lehmbruck, Ernst Barlach, Arturo Martini), y otros más tomaron como modelu la escultura del Renacimientu (Giacomo Manzù, Venanzo Crocetti).

Modernismu[editar | editar la fonte]

Figura flotante, de Gaston Lachaise (1927), Escultura en bronce, númberu 5 d'una serie de 7, National Gallery of Australia

Los movimientos escultóricos del modernimsu inclúin, ente más otros, el cubismu, l'abstracción xeométrica, el movimientu De Stijl, el suprematismu, el constructivismu, el dadaísmu, el surrealismu, el futurismu, el formalismu, l'espresionismu abstractu, el Pop-Art, el minimalismu, el Land Art y l'Installation Art.

Figura recostada, de Henry Moore (1951). Fitzwilliam Museum, Cambridge.
CUBI VI, de David Smith (1963). Israel Museum, Xerusalén.

Al entamu del sieglu XX Pablo Picasso revolucionó l'arte de la escultura al entamar a crear les sos "construcciones", l'equivalente escultural del collage pictóricu, nes qu'amestaba diversos oxetos y materiales ensin rellación ente ellos nuna pieza escultórica única. La llegada del surrealismu fizo qu'entamaren a llamase "escultures" a coses que primero nun teníen consideración tala. Exemplu d'ello son les nomaes "escultures involuntaries", feches con diverses técniques. Asina, el coulage consistía en facer escultures vertiendo dalgún material fundíu (cera, metal o inclusu chocolate) n'agua frío, dexando que ficiera figures caprichoses. Nos años siguientes Picasso fizo bien de trabayos en cerámica, provocando, cola so reinterpretación del arte cerámicu de diverses partes del mundu, un renacimientu de l'alfarería, con figures destacaes como George E. Ohr, Peter Voulkos, Kenneth Price y Robert Arneson. Marcel Duchamp creó l'estilu nomáu arte atopáu (del francés objet trouvé), nel que se trabaya sobre productos manufacturaos con intención artística, fabricando pieces como Fonte (1917).

De forma asemeyada, el trabayu de Constantin Brâncuși al entamu del sieglu abrió'l camín pal desarrollu posterior de la escultura abstracta. Rebelándose escontra'l naturalismu de Rodin y los sos contemporáneos, Brâncuși buscó espresar les esencies de los oxetos representaos, como puede vese nes elegantes y refinaes formes de la so serie d'escultures Páxaros nel espaciu (1924)[89].

La influyencia de Brâncuși, colos sos conceptos de reducción y abstracción, puede rastrexase al traviés de les décades del 1930 y 1940 n'artistes como Gaston Lachaise, Jacob Epstein, Henry Moore, Alberto Giacometti, Joan Miró, Julio González, Pablo Serrano o Jacques Lipchitz[90]. Na segunda d'eses décades la escultura abstracta recibió un nuevu emburrión de manes d'Alexander Calder, Len Lye, Jean Tinguely y Frederick Kiesler, pioneros del arte cinéticu.

L'espoxigue de la demanda d'arte públicu en forma d'escultures n'alcordanza de los desastres de les dos guerres mundiales y de los que morrieron nelles fizo que la escultura modernista paeciera desaparecer demientres unos años, pero a partir de la década del 1950 les comisiones encargaes de la construcción d'escultures públiques entamaron a aceptar el modernismu, qu'entamó a facese visible nos espacios urbanos. Asina, Picasso recibió l'encargu de facer una maqueta pa construyir una escultura pública de 15 m d'altor, la nomada Chicago Picasso (1967), que preside la plaza Daley d'esa ciudá estaunidense. Nel so diseñu, ambiguu y controvertíu, ye difícil saber cuála ye la figura representada: una muyer, un caballu, un páxaru... o quiciás una figura totalmente abstracta.

Nos caberos años de la década del 1950, y na del 1960, los escultores abstractos entamaron a esperimentar con bayura de nuevos materiales pa crear el so trabayu, nel qu'adoptaron tamién enfoques novedosos de la creación escultórica. La imaxinería surrealista, l'abstracción antropomórfica, l'usu de nuevos materiales y la combinación de superficies y oxetos variaos nuna única pieza convirtiéronse no avezao na mayoría de la nueva escultura modernista. Tamién surdieron proyectos de colaboración ente diseñadores, artistes y arquitectos qu'integraron la escultura d'esteriores nel entornu arquitectónicu. La obra d'autores como Isamu Noguchi, David Smith, Alexander Calder, Jean Tinguely, Richard Lippold, George Rickey, Louise Bourgeois y Louise Nevelson ye bona prueba d'ello.

La década del 1960 tuvo dominada pol espresionismu abstractu, l'abstracción xeométrica y'l minimalismu, que reduz la escultura a les sos característiques más esenciales y fundamentales. Rescamplen, ente les obres d'esti periodu, los Cubi de David Smith y los trabayos n'aceru, trabayáu mediante soldadura, d'Anthony Caro y otros munchos escultores, les escultures feches a partir de pieces de coches de desguace de John Chamberlain y les pieces de gran tamañu ellaboraes con diversos materiales de desechu, ensamblaos munches veces cola axuda d'una grúa, de Mark di Suvero. Ente los autores minimalistes podemos citar a Tony Smith, Donald Judd, Robert Morris, Anne Truitt, Giacomo Benevelli, Arnaldo Pomodoro, Richard Serra, Dan Flavin, Carl Andre y John Safer, qu'añedió movimientu y monumentalidá a la pureza de llínies que caracteriza a esi movimientu artísticu.

Demientres les décades del 1960 y 1970 la tradición d'escultura figurativa, fecha por artistes modernistes con formes estilizaes, ta representada por autores como Leonard Baskin, Ernest Trova, George Segal, Marisol Escobar o Paul Thek, con figures singulares como Robert Graham, autor de bien d'escultures de gran tamañu en bronce cola figura humana como base, o Fernando Botero, que treslladó les característiques figures de persones con sobrepesu de la so pintura al mundu de la escultura monumental.


Galería d'escultura modernista[editar | editar la fonte]

Movimientos escultóricos contemporáneos[editar | editar la fonte]

Referencies[editar | editar la fonte]

  1. Diccionariu de la llingua asturiana. Uviéu, 2000, Academia de la Llingua Asturiana, p. 538.
  2. Robertson, p. 9.
  3. Painted sculpture, de Morris Cox (na web flashpointmag.com)
  4. Cook, R.M., Greek Art, Penguin, 1986, p. 147. ISBN 0140218661
  5. Técniques d'escultura (Victoria and Albert Museum, Londres).
  6. Rawson, Jessica (ed). The British Museum Book of Chinese Art, 2007 (2ª ed), British Museum Press. pp. 140-44. ISBN 9780714124469.
  7. Robertson, p. 9.
  8. Rawson, Jessica (ed). The British Museum Book of Chinese Art, 2007 (2ª ed), British Museum Press, pp. 134-5. ISBN 9780714124469
  9. Mellars, P., Archeology and the Dispersal of Modern Humans in Europe: Deconstructing the Aurignacian, Evolutionary Anthropology, vol. 15 (2006), pp. 167–182.
  10. Cook, J. Ice Age art: arrival of the modern mind, The British Museum, 2013. ISBN 978-0714123332
  11. Sandars, pp. 8-16, 29-31.
  12. Sandars, pp. 37-40.
  13. Sandars, pp. 75-80, 183-5, 253-7.
  14. Frankfort, pp. 24-37.
  15. Frankfort, pp. 61-66.
  16. Frankfort, capítulos 2-5.
  17. Frankfort, pp. 110-2.
  18. Frankfort, pp. 66-74.
  19. Frankfort, pp. 141-193.
  20. Smith, p. 33.
  21. Smith, pp. 12–13 y nota 17.
  22. Smith, 21–24.
  23. Smith, pp. 170–178 y 192–194.
  24. Smith, pp. 102–3 y 133–4.
  25. Smith, pp. 4–5 y 208–209.
  26. Smith, pp. 89–90.
  27. Muyer tocando l'arpa (imáxenes en Wikipedia Commons).
  28. Cook, pp. 72, 85–109; Boardman, pp. 47–59.
  29. Cook, pp. 119–131.
  30. Cook, pp. 131–141.
  31. Green P., Alexander The Great and the Hellenistic Age, p. XIII. ISBN 978-0-7538-2413-9
  32. Cook, pp. 142–156.
  33. Cook, pp- 142–154.
  34. Strong, pp. 58–63; Hennig, pp. 66-69.
  35. Henig, p. 24.
  36. Henig, pp. 66–69; Strong, pp. 36–39 y 48.
  37. Henig, pp. 23–24.
  38. Henig, pp- 66–71.
  39. Henig, pp. 73–82; Strong, pp. 48–52, 80–83, 108–117, 128–132, 141–159, 177–182 y 197–211.
  40. Henig, capítulu 6; Strong, pp. 303–315.
  41. Kitzinger, p. 9; Strong, pp. 250–257, 264–266 y 272–280.
  42. Strong, pp. 287–291, 305–308 y 315–318; Henig, pp. 234–240.
  43. Robinson, p. 12 y 15.
  44. Calkins, pp. 79–80 y 90–102.
  45. Calkins, pp. 115–132.
  46. Honour and Fleming, pp. 297–300; Henderson, pp. 55 y 82-84.
  47. Olson, pp. 11–24; Honour and Fleming, p. 304; Henderson, p. 41.
  48. Snyder, pp. 65-69.
  49. Snyder, pp. 305-311.
  50. Cherry, pp. 25-48; Henderson, pp. 134-141.
  51. Olson, pp. 41–46 y 62–63.
  52. Olson, pp. 45–52.
  53. Olson, pp. 114–118 y 149–150.
  54. Olson, pp. 149–150.
  55. Olson, pp. 103–110 y 131–132.
  56. Olson, pp. 179-81.
  57. Olson, pp. 179–182.
  58. Olson, pp. 183–187.
  59. Olson, pp. 194–202.
  60. Boucher, pp. 134-142.
  61. Boucher, pp. 16–18.
  62. Honour and Fleming, p. 450.
  63. Honour and Fleming, pp. 460-467.
  64. Boardman, pp. 370–378; Harle, pp. 71–84
  65. Boardman, pp. 370–378; Sickman, pp. 85–90; Paine, pp. 29–30
  66. Rawson, capítulu 1, y pp. 135–136.
  67. Rawson, p. 138.
  68. Rawson, pp. 135–145; 145–163.
  69. Rawson, capítulos 4 y 6.
  70. Rawson, p. 135.
  71. Paine & Soper, pp. 30–31.
  72. Paine & Soper, p. 121.
  73. Harle, pp. 17-20.
  74. Harle, pp. 22-24.
  75. Harle, pp. 26-38.
  76. Harle, pp. 26-38.
  77. Harle, pp. 301-310.
  78. Harle, pp. 276–284.
  79. Honour & Fleming, pp. 196–200.
  80. Piotrovsky & Rogers, pp. 23, 26-27, 33-37.
  81. Piotrovsky & Rogers, pp. 23, 33-37.
  82. Honour & Fleming, 557
  83. Honour & Fleming, pp. 559–561.
  84. Honour & Fleming, pp. 556–561.
  85. Castedo, Leopoldo, A History of Latin American Art and architecture. Nueva York, Frederick A. Praeger Publisher, 1969.
  86. Honour & Fleming, pp. 553–556
  87. Elsen, Albert E. (2003). Rodin's Art: The Rodin Collection of the Iris & Gerald B. Cantor Center for the Visual Arts. Oxford: Oxford University Press. ISBN 0-19-513381-1.
  88. Curtis, Penelpoe, Taking Positions: Figurative Sculpture and the Third Reich. Londres, Henry Moore Institute, 2002
  89. Lucie Smith, Edward, Visual arts in the 20th century.Harry N. Abrams, 1997. ISBN 978-0-8109-3934-9
  90. Morgan, Ann Lee, The Oxford dictionary of American art and artists. Oxford University Press, 2007. ISBN 0-19-512878-8, ISBN 978-0-19-512878-9

Obres de referencia[editar | editar la fonte]

  • Boardman, John (ed.), The Oxford History of Classical Art. Oxford University Press, 1993. ISBN 0198143869.
  • Boucher, Bruce, Italian Baroque Sculpture. 1998, Thames & Hudson (World of Art), ISBN 0500203075.
  • Calkins, Robert G. Monuments of Medieval Art, Dutton, 1979, ISBN 0525475613.
  • Cherry, John. The Holy Thorn Reliquary. 2010, British Museum Press (British Museum objects in focus), ISBN 0-7141-2820-1.
  • Cook, R.M., Greek Art. Penguin, 1986 (reimpresión de la obra orixinal, de 1972), ISBN 0140218661.
  • Frankfort, Henri, The Art and Architecture of the Ancient Orient, en Pelican History of Art, (4ª ed.). Penguin, 1970, ISBN 0140561072.
  • Harle, J.C., The Art and Architecture of the Indian Subcontinent, (2ª ed.). 1994, Yale University Press (Pelican History of Art), ISBN 0300062176.
  • Henderson, George. Gothic, 1967, Penguin, ISBN 0-14-020806-2.
  • Henig, Martin (ed.), A Handbook of Roman Art, Phaidon, 1983, ISBN 0714822140.
  • Honour, Hugh, and Fleming, John, A World History of Art, 1ª ed. Macmillan, Londres, 1982. ISBN 0333371852.
  • Kitzinger, Ernst, Byzantine art in the making: main lines of stylistic development in Mediterranean art, 3rd–7th century, 1977, Faber & Faber, ISBN 0571111548.
  • Olson, Roberta J.M., Italian Renaissance Sculpture. 1992, Thames & Hudson (World of Art), ISBN 978-0-500-20253-1.
  • Paine, Robert Treat, en: Paine, R. T. & Soper A, The Art and Architecture of Japan, (3ª ed.). 1981, Yale University Press Pelican History of Art, ISBN 0140561080.
  • Piotrovsky M.B. and Rogers, J.M. (ed.), Heaven on Earth: Art from Islamic Lands. 2004, Prestel, ISBN 3791330551
  • Rawson, Jessica (ed.), The British Museum Book of Chinese Art (2ª ed.). 2007 , British Museum Press, ISBN 9780714124469.
  • Robertson, Martin, A shorter history of Greek art. Cambridge University Press, 1981, ISBN 978-0-521-28084-6.
  • Robinson, James, Masterpieces of Medieval Art, 2008, British Museum Press, ISBN 978-0-7141-2815-3.
  • Sandars, Nancy K., Prehistoric Art in Europe, en Pelican History of Art. Penguin, 1968.
  • Sickman, Laurence, en: Sickman L & Soper A, The Art and Architecture of China, Pelican History of Art, (3ª ed.). 1971, Penguin , LOC 70-125675.
  • Smith, W. Stevenson, y Simpson, William Kelly. The Art and Architecture of Ancient Egypt, (3ª ed), 1998. Yale University Press (Penguin/Yale History of Art), ISBN 0300077475.
  • Snyder, James. Northern Renaissance Art, 1985, Harry N. Abrams, ISBN 0136235964.
  • Strong, Donald, et al., Roman Art, 1995 (2ª ed.), Yale University Press (Penguin/Yale History of Art), ISBN 0300052936.