Arxelia

De Uiquipedia
Saltar a: navegación, buscar
الجمهورية الجزائرية الديمقراطية الشعبية
(Al-Yumhūriyya al-Yazāiiriyya ad-Dīmuqrā‏iyya ash-Sha`biyya)
Bandera d'Arxelia Escudu d'Arxelia
(Bandera d'Arxelia) (Escudu d'Arxelia)
Lema nacional: (torna): La revolución pol pueblu y pal pueblu
Himnu nacional: Kassaman
[[1]]
Situación d'Arxelia
Capital
 • Población
 • Coordenaes
Arxel
3.415.811 (2008)
36°47′ N 3°4′ E
Mayor ciudá Arxel
Idiomes oficiales * francés
* tamazight
* árabe
Forma de gobiernu República democrática
Abdelaziz Bouteflika
Abdelaziz Belkhadem
Independencia
 • Declarada
De Francia
5 de xunetu de 1962
Superficie
 • Total
 • % agua
Llendes
Costes
Puestu 11º
2.381.740 km²
Insignificante
6.343 km
998 km
Población
 • Total
 • Densidá
 • Densidá
Puestu 34º
38.087.812 (xunetu de 2013, est.)
15,99 ab./km²
15,99 hab/km²
PIB (PPA)
 • Total (2012)
 • PIB per capita
Puestu 49º
US$ 277.400 millones
US$ 7.600
Moneda Dinar arxelín (DZD)
Xentiliciu arxelín, -ina, -ino
Zona horaria UTC+1
Dominiu d'Internet .dz
Códigu telefónicu +213
Prefixu radiófonicu 7RA-7RZ, 7TA-7YZ
Códigu ISO 012 / DZA / DZ
Miembru de: ONX, XA, OPEP, Lliga d'Estaos Árabes, Xunión del Magreb Árabe
Sitiu web del Gobiernu:
{{{web_gobiernu}}}
{{{notes}}}

Arxelia (n'árabe: الجزائر‎, al-Jazā'ir; en tamazight: Dzayer, ⴷⵣⴰⵢⴻⵔ; y en francés: Algérie), oficialmente República Democrática Popular d'Arxelia, ye un país del norte d'África, na costa del mar Mediterraneu. La so capital y mayor ciudá ye Arxel. Arxelia ye una república semi-presidencialista, que'l so territoriu divídese en 48 provincies y 1.541 conceyos. Con una población de más de 38 millones d'habitantes, ye'l trixésimu cuartu país más pobláu del mundu[1]. Con una economía basada na esplotación de los hidrocarburos, el so sector manufactureru padez lo que se conoz n'economía como mal holandés[2]. La so compañía estatal d'hidrocarburos, Sonatrach, ye la mayor compañía de tol continente. Arxelia tien el segundu mayor exércitu, y el mayor presupuestu de defensa, de tol continente. El país tuvo tamién un programa nuclear con fines pacíficos na década del 1990.

Arxelia ye'l país más grande d'África y de toa la cuenca mediterránea, y el décimu más estensu del mundu[3]. Llenda al noreste con Túnez, al este con Libia, al oeste con Marruecos, al suroeste col Sáhara Occidental, Mauritania y Mali, al sureste con Níxer y al norte col mar Mediterraneu. Ye miembru de la Xunión Africana, la Lliga Árabe, la OPEP y la Organización de les Naciones Xuníes, y ye una de les naciones fundadores de la Xunión del Magreb Árabe.

Les tierres qu'anguaño son arxelines foron el llar de bien de cultures prehistóriques, como l'ateriense y la capsiense. Na época histórica el so territoriu foi controláu por dellos imperios y dinastíes, como los numidios, los cartaxineses, los romanos, los vándalos, los bizantinos, los omeyas, los fatimíes, los almorávides, los almohávides y los turcos otomanos.

Historia[editar | editar la fonte]

Historia antigua[editar | editar la fonte]

Los primeros restos humanos atopaos nes tierres qu'anguaño son d'Arxelia tán dataos alredor del 200.000 edC, y alcontráronse na rexón d'Ain Hanech, na provincia de Saïda[4]. Más lluéu, hai restos de materiales del home de Neanderthal; asina, alcontráronse brueses de manu, d'estilos levalloisiense y musteriense y asemeyaes a les del Oriente Próximu, dataes nel 43.000 edC.

Dellos milenios después, nel Paleolíticu mediu, Arxelia foi el sitiu nel qu'algamó'l mayor desarrollu la técnica de fabricación de lasques. Los aperios más antiguos d'esta cultura, nomada ateriense (nome deriváu del del xacimientu arqueolóxicu de Bir el Ater, al sur de la provincia de Tébessa), tán dataos alredor del añu 30.000 edC.

Una de les pintures na roca afayaes na cordillera de Tassili n'Ajjer

La primer cultura que fabricó llámines de piedra nel norte d'África ye la llamada ibero-mauritana. Esta cultura, que los sos xacimientos arxelinos concéntrense na rodiada d'Orán, estendiose peles rexones costeres del Magreb, de Marruecos a Tunicia, ente'l 15.000 y el 10.000 edC. La civilización neolítica, la primera que desarrolló l'agricultura y domesticó dellos animales, desarrollose nel territoriu del país ente los años 6.000 y 2.000 edC. Esta forma de vida, que ta documentada nos más de 15.000 petroglifos y pintures atopaes na rexón de Tassili n'Ajjer, ye la que hebo n'Arxelia hasta'l periodu clásicu. L'amiestu de los pueblos del norte d'África demientres estos milenios dio como resultáu un grupu étnicu qu'entamó a ser conocíu como bereber. Los bereberes son los pobladores indíxenes del norte d'África[5]

Los cartaxineses espardiéronse, dende'l so principal centru de poder na ciudá de Cartago, peles costes del norte d'África, creando pequeños puestos comerciales a lo llargo d'elles. Asina, pal 600 edC esti pueblu feniciu tenía establecíose en Tipasa, n'Hippo Regius (anguaño Annaba) y Rusicade (anguaño Skikda). L'espoxigue del poder de Cartago afectó enforma, nos sieglos vinientes, a la población indíxena, que taba organizada políticamente en varios estaos. Los llazos comerciales ente los cartaxineses y los bereberes del interior del territoriu medraron, pero la expansión territorial de los primeros acabó cola esclavización de dalgunos bereberes, l'enrolamientu nel exércitu cartaxinés d'otros y el pagu de tributos por otros más. Pa entamos del sieglu IV edC los bereberes yeran la etnia más numerosa de l'exércitu cartaxinés.

Na revuelta de los mercenarios, del 241 al 238 edC, soldaos bereberes rebeláronse porque nun-yos pagaben tres la derrota de Cartago frente a los Imperiu romanu|romanos na Primera Guerra Púnica. Consiguieron controlar bona parte del territoriu cartaxinés del norte d'África y acuñaron monedes nes que se facíen llamar libios (que yera'l nome qu'usaben los griegos pa referise a los pobladores norteafricanos).

La ciudá de Cartago foi destruyida el 146 edC, pero ya anantes el decayimientu del poder cartaxinés permitió que, nel interior del país, surdieran dellos reinos bereberes. En Numidia, al sur de les zones costeres controlaes por Cartago, había dos, y otros en Mauritania, al oeste de Numidia. El puntu cimeru de la civilización bereber, que nun volvió a igualase hasta la llegada de los almorávides y almohades un mileniu dempués, algamose demientres el reináu del primer rei de Numidia, Massinissa, que creó al entamar el sieglu II edC, col sofitu de los romanos, un reinu cola so capital na actual Constantina. Dempués de la so muerte, el 148 edC, el reinu foi dividíu y reaxuntáu delles veces. La so dinastía sobrevivió hasta que, el 24 edC, los territorios bereberes foron ocupaes polos romanos.

L'Imperiu romanu gobernó Arxelia demientres varios sieglos. Allí producíense, como nel restu del so territoriu africanu, cereales y otros productos agrícoles que yeren esportaos a la metrópolis. Los romanos foron espulsaos de la zona polos vándalos que, dirixíos por Xensericu, pasaron al norte d'África en 429 y teníen conquistada, pal 435, la zona costera de Numidia[6]. Por embargu, nun s'asentaron nel territoriu, y esto permitió que fora reconquistáu pol Imperiu Romanu d'Oriente, que lu controló hasta la llegada de los conquistadores árabes.

Edá Media[editar | editar la fonte]

Considérase qu'esti periodu abarca, na historia arxelina, el mileniu que llega dende la llegada de l'Islam a estes tierres, a mediaos del sieglu VII, hasta el sieglu XVII. La llegada de l'Islam, contrariamente a lo que pasara coles anteriores cultures y relixones invasoras, iba resultar perduradera en tol territoriu norteafricanu. Los invasores árabes nun traxeron namái una nueva relixón, sinon toa una cultura qu'acabó por sustituyir les práctiques relixoses y sociales tradicionales de los bereberes por nueves normes sociales y formes polítiques. Por embargu, la islamización y arabización de la rexón foi un procesu lentu y abegosu. Magar que los bereberes nomadas convirtiéronse bien ceo y entamaron a collaborar colos invasores árabes, nun va ser hasta'l sieglu XII, cola dinastia almohade, cuando les comunidaes cristianes y xudíes queden definitivamente marxinaes.

El califatu omeya[editar | editar la fonte]

Les primeres espediciones árabes al Magreb procudiéronse ente 642 y 669. Eses primeres incursiones dende Exiptu foron más el resultáu de la iniciativa de los cabezaleros llocales que la rempuesta a una orde del califatu. Por embargu, cuando la sé del califatu pasó de Medina a Damascu, la dinastía omeya (que dirixió los destinos del Islam de 661 a 750) decatose de la necesidá estratéxica d'asegurase'l dominiu de la cuenca del Mediterráneu. En 670 un exércitu árabe mandáu por Uqba ibn Nafi creó la ciudá de Al Qayrawan, unos 160 km de l'actual Túnez, y emprincipió a usala como base para les sos espediciones militares. Asina, el sucesor de Uqba, Abu al Muhajir Dinar, esploró les tierres occidentales y llegó a un alcuerdu de cooperación con Kusayla, cabezaleru d'una gran confederación de bereberes cristianos. Kusayla, que tenía la so capital en Tilimsan (anguaño Tlemcen), convirtiose al islamismu y movió'l so cuartel xeneral a Takirwan, cerca Al Qayrawan.

L'harmonía duró poco, pero foi provechosa. En 711 los soldaos omeyes, axudaos por bereberes convertíos al islam, teníen conquistao tol norte d'África. Los gobernadores enviaos polos califes omeyes controlaben el territoriu dende Al Qaywaran, convertida en capital de la nueva wilaya (provincia) d'Ifriqiya, que comprendía Tripolitania (la parte occidental de l'actual Libia), Tunicia y l'este d'Arxelia.

Ruines de la mezquita de Mansourah, en Tlemcen

La conversión de los bereberes a l'islam, por embargu, nun garantizó el so sofitu incondicional a los califes árabes. Les élites árabes punxéron-yos munchos impuestos, tratábenlos como musulmanes de segunda clas y incluso, delles veces, esclavizáronlos. De resultes d'ello los bereberes, que abrazaron en bon númeru les idees igualitaries del ḥarixismu, rebeláronse en 739-40 escontra los árabes. Tres de la revuelta los ḥarixíes crearon un bon númberu de reinos tribales, d'esistencia percurtia los más d'ellos.

Pa 750 los abbásides, que sustituyeron a los omeyes como cabezaleros del Islam, llevaron la sé del califatu pa Bagdad y recuperaron el control de la provincia d'Ifriquiya. Polo menos nominalmente, pues el gobernador qu'unviaron, Ibrahim ibn al Aghlab, y los sos socesores hasta 909, magar que reconocíen obediencia teórica al califa, dirixeron al so petite los destinos del país.

El califatu fatimí[editar | editar la fonte]

Nes caberes décades del sieglu IX los bereberes teníen sío convertíos al ismailismu, una secta xií. Rebeláronse escontra los gobernadores suníes de Al Qayrawan y ficiéronse col control del territoriu. L'imán ismailí Ubaydallah proclamose califa, dando entamu a la dinastía fatimí. En 911 conquistaron l'imanatu de Tahert, que tenía controlao por 150 años la metá occidental de l'actual Arxelia, y tentaron bien de tiempu conquistar Marruecos. Sicasí, el so principal enfotu yera conquistar les tierres del este, el Mashriq, qu'inclúi Exiptu y les tierres del Oriente Próximu. Consiguiéronlo na segunda metá del sieglu X, y en 972 llevaron la so capital pa El Cairo. Dexaron al cargu de les tierres arxelines a la dinastía bereber de los ziríes.

Estensión del califatu fatimí en 969

Estos gobernaron tol territoriu d'Arxelia ente 972 y 1148, y fundaron ciudaes como Miliana, Médéa o Arxel. Al entamu del sieglu XI, por embargu, tuvieron que ceder el control de les tierres asitiaes al oeste d'Ifriquiya a una rama de su familia, los hamidíes. Estos tuvieron nel poder ente 1011 y 1151, y ficieron de Béjaïa el puertu más importante del norte d'África. El repartu, sicasí, nun foi pacíficu. Los hamadíes refugaron l'ismailismu y negáronse a tar sometíos a los fatimíes, lo que-yos llevó a engarrase colos ziríes. Entamó entonces una llucha sangrina ente les dos grandes confederaciones de bereberes, los Sanhaja y los Zenata, que debilitó enforma el gobiernu del territoriu. Aprovechando la inestabilidá saquiadores de Xénova, Pisa y Sicilia atacaron los puertos. Too axuntáu acabó faciendo que les rutes comerciales esviaren los sos trayectos, evitando'l pasu pol actual territoriu arxelinu. Pa enriba beduinos árabes, quiciás unviaos polos fatimíes pa debilitar a los ziríes, invadieron el país dende la primer metá del sieglu XI. Pa 1057 teníen derrotao a ziríes y hamadíes y saquearon Al Qayrawan; dexaron les ciudaes en ruines, y espulsaron pa les montañes a los agricultores de las fértiles llanaes costeres. Los que quedaron, tres de pidir protección a los nuevos dirixentes hilalíes, comenzaron a usar l'árabe como la so llingua habitual por primer vegada na zona.

Los almorávides y los almohades[editar | editar la fonte]

El movimientu almorávide nació a primeros del sieglu XI ente los bereberes Sanhaja del Saḥara occidental. Ún de los sos cabezaleros, Ibrahim al Jaddali, de la tribu Lamtuna, decidió aumentar el nivel de conocimientu y práctica del islam de la so xente. Pa ello traxo con elli, cuando volvió de peregrinar a La Meca en 1048-49, un sabiu marroquín, Abd Allah ibn Yasin al Juzuli. Este encargose, nos primeros tiempos, d'imponer disciplina moral y de xixilar pol estrictu cumplimientu de los mandaos del islam. Poco dempués, en 1054, los lamtuna, dirixíos primero por Yahya y dempués pol so hermanu Abu Bakr, entamaron a esparder el so dominiu, dominando toes les tierres arxelines al este d'Arxel. El reinu almorávide reconocía l'autoridá espiritual del califa abbasí de Bagdad, polo que demientres un tiempu (hasta 1147) toa la comunidá islámica volvió a tar xunida.

Los almohades tamién tuvieron na reforma relixosa la so primera inspiración. El so cabezaleru espiritual, Muhammad ibn Abdallah ibn Tumar, ponía un gran énfasis na so enseñanza na xunidá de Dios. Espulsáu de Marrakech, volvió a la so tribu, los Mamsuda, y allí declarose mahdi, imam y masum (persona infalible unviada por Dios). Consultaba les sos decisiones con un conseyu formáu por diez de los sos primeros discípulos, y creó dempués una asamblea tribal de 50 miembros. La esitosa revuelta pa espardir la so visión del islam entamó en 1125, magar que elli malpenes foi testigu d'ello, una y bones morrió en 1130. El so sucesor, Abd al Mumin, autonomose califa y punxo a los sos familiares al mandu, fundando asina una especie de monarquía.

Los almohades teníen conquistao Marruecos pa 1146, conquistaron Arxel en 1151 y pa 1160 controlaben tol territoriu de l'actual Arxelia. El restu del sieglu foi una edá d'oru pal territoriu, con gran desarrollu económicu y cultural. Nel sieglu viniente, en 1229, la corte almohade renunció a les enseñanzas d'Ibn Tumart, y pronto entamó la so decadencia. L'últimu califa almohade foi derrocáu en 1269.

El final de la Edá Media[editar | editar la fonte]

Tres de la derrota almohade el territoriu arxelinu repartiose ente los hafsidíes, que pretendíen ser los llexítimos sucesores de los almohades n'Ifriqiya, y los ziyánides, bereberes que dirixeron el reinu de Tlemcen y que dicíen ser, tamién, sucesores de los almohades. Demientres trés sieglos, hasta la llegada de los turcos nel sieglu XVI, los ziyánides llograron sobrevivir, cuando dependiendo de los mariníes o los hafsidíes y cuando n'alianza con España. Munches ciudaes costeres, pela so banda, desafiaron a dambes dinastíes y convirtiéronse nuna suerte de repúbliques municipales, que taben gobernaes poles oligarquíes comerciales, por xefes tribales de la so rodiada o por pirates que ficieron d'elles sos puertos de refuxu.

El final del reinu de Granada tamién tuvo influyencia nel norte d'África. A lo llargo de los sieglos XV y sieglu XVI|XVI España foi faciéndose, mediante la construcción de fortificaciones (nomaes presidios) y la esixencia de tributos a les ciudaes costeres, col control de la costa del Magreb. Asina, dominó Mers el Kebir en 1505, Orán en 1509 y Tlemcen, Mostaganem y Ténès en 1510. Esi mesmu añu los mercaderes d'Arxel cedieron ún de los isllotes que hai nel puertu de la ciudá pa que los españoles ficieran un fuerte nelli. Pesie a ello, la espansión por mediu de presidios demostró ser una forma cara y inefectiva de controlar la zona, y nun pudo asegurar la preeminencia de los mercaderes españoles. Nos munchos puertos llibres qu'había n'Arxelia facíase la mayor parte del comerciu, y a ellos llegaben, amás de mercaderes españoles, otros de Inglaterra, Portugal, Holanda, Francia, Italia...

L'Arxelia otomana (1516-1830)[editar | editar la fonte]

En 1516 los hermanos corsarios musulmanes Aruj y Hayreddin Barbarroxa, que operaban nes tierres de los hafsidíes, establecieron la so base d'operaciones n'Arxel. Cuando Aruj morrió en 1518, demientres la invasión de Tlemcen, el so hermanu sucediolu como comandante militar d'Arxel. El sultán otomanu dió-y el títulu de beylerbey (xefe de xefes) y un exércitu de 2.000 xenízaros. Al mando d'ellos Hayreddin dominó'l territoriu costeru ente Constantina y Orán, esceutu esta cabera ciudá, que siguió siendo española hasta 1791.

Hayreddin Barbarroxa, fundador de la rexencia d'Arxel

Hayreddin foi sucedíu como beylerbey pol so fíu Hasan en 1544. Hasta 1587 el territoriu foi gobernáu por funcionarios que nun teníen afitao un intervalu temporal pal desempeñu de les sos funciones. De magar esi añu el gobiernu del territoriu taba, demientres trés años, en manes d'un gobernador nomáu pasha; ayudábenlu los xenízaros, nomaos ojaq n'Arxelia y mandaos por un agha. Estos ojaq, descontentos porque nun cobraben la paga puntualmente, entamaron a rebelase de siguío escontra los pasha a mediaos del sieglu XVII. Finalmente, en 1659, l'agha, acusando al pasha de corruptu y incompetente, fízose col poder. P'aquella la peste ya entamara a diezmar la población de les ciudaes del norte d'África. Asina, Arxel perdió de 30.000 a 50.000 habitantes na epidemia de 1620-21, y padeció tamién gran mortandá nes epidemies de 1654-57, 1665, 1691 y 1740-42[7].

En 1671 los nativos rebeláronse, mataron al agha y punxeron a ún d'ellos al mandu col títulu de dey. Dende 1689 el derechu d'escoyer al dey pasó al divan, un conceyu de sesenta personaxes importantes del territoriu. El conceyu, a lo primeru, taba domináu polos ojaq, pero pal sieglu XVIII quedaría sol mandu del dey. Primero d'eso, en 1710, el dey convenció al sultán pa que lu reconociera a elli y a los sos sucesores como rexentes en nome d'elli, faciendo desapaecer con ello la figura del pasha. Asina, magar qu'Arxel siguió siendo parte nominal del imperiu otomanu, el sultán dexó de tener capacidá real de gobiernu na zona.

El dey yera, verdaderamente, un autócrata. Yera, como viemos, escoyíu pal cargu, que yera vitaliciu. Sicasí, nos 159 años nos que sobrevivió'l sistema (1671-1830) 14 de los 29 qu'ocuparon esi cargu morrieron asesinaos. Por embargu, pesie a los rexicidios de manes d'usurpadores, los golpes militares y a motines ocasionales de la población, el sistema rexía con bastante orde los asuntos del territoriu. El dey tentaba d'apoyase nos xefes tribales y favorecelos, pesie a lo cual nun tenía un sofitu unánime ente la población, que protestaba dacuando polos escesivos impuestos. Toleraba la esistencia de miniestaos tribales cuasimente autónomos na Cabilia, y namái de ralo en ralo aplicaba efectivamente la so autoridá sobre ellos[8].

El tiempu de los corsarios[editar | editar la fonte]

Los pirates berberiscos actuaron demientres trés sieglos (del XVI al XIX) escontra los barcos cristianos y otros non musulmanes na zona occidental del mar Mediterráneu. Saquiaben los barcos, y les más de les veces apresaben a los sos pasaxeros y la so tripulación pa usalos como esclavos o pa viendelos nos mercaos d'esclavos del norte d'África y l'Imperiu Otomanu. Delles veces, cuando los pasaxeros yeren xente notable, pidíen rescate por ellos. Y tamién atacaben ciudaes costeres d'Europa, tamién pa saquiales y apresar cautivos pa vender como esclavos[9].

En 1544 Hayreddin Barbarroxa, por exemplu, conquistó la islla de Ischia, llevándose 4.000 prisioneros, y esclavizó a cuasi toos los 9.000 habitantes de Lipari. En 1551 Turgut Reis esclavizó la población entera de la islla maltesa de Gozo, ente 5.000 y 6.000 persones, que foros treslladaes a Libia. En 1554 los corsarios saquiaron la ciudá de Vieste, al sur d'Italia, y marcharon con 7.000 cautivos. Cuatro años dempués, en 1558, Ciudadela (Menorca) foi destruyida; nel ataque morrieron la mayoría de los sos habitantes, y los 3.000 sobrevivientes foron llevaos pa Estambul. Otres ciudaes de les islles Baleares recibíen con frecuencia la visita de los corsarios, lo que fizo que se llevantaran fortificaciones nes islles y qu'inclusu la islla de Formentera fora abandonada pola so población.

Al sieglu siguiente, ente 1609 y 1616, Inglaterra perdió 466 barcos a manes de los pirates. Y muncho dempués, nel sieglu XIX, los corsarios berberiscos formalizaron un alcuerdu con xentes de la zona del mar Caribe, a los que pagaben pa que-yos dieren abellugu seguru nos sos puertos[10]. Hai testimoniu, amás, d'un esclavu americanu qu'afirmaba que los arxelinos esclavizaran 130 marinos americanos nel Mediterráneu y nel Atlánticu ente 1785 y 1793[11].

Estos ataques a navíos estaunidenses nel Mediterráneu llevaron a los Estaos Xuníos a llevar alantre la primer (1801-1805) y segunda (1815) guerres berberisques. A resultes d'elles el poder arxelín debilitose, y una flota anglo-holandesa dirixida pol marinu británicu Lord Exmouth atacó la ciudá d'Arxel. Dempués de nueve hores de bombardéu consiguieron que'l dey roblara un tratáu que reafirmaba les condiciones impuestes pol comandante estaunidense Stephen Decatur, poles qu'almitía pagá-yos tributos, y pol que se comprometía tamién a dexar d'esclavizar cristianos[12]

L'Arxelia francesa (1830-1962)[editar | editar la fonte]

Los franceses invadieron y capturaron Arxel en 1830, col pretestu de que-y teníen faltao al respetu al so cónsul. La conquista del territoriu arxelinu, qu'entamó a continuación cola escusa de "civilizar" el país, fue sangrina enforma; tantu, que fizo, xunto con delles epidemies, que la población indíxena menguara nún terciu ente 1830 y 1872. Una población indíxena que, según dellos historiadores arxelinos, nun había por qué "civilizar", una y bones la tasa d'alfabetización de la población en 1830 (cuasi'l 50%) yera mayor que la de Francia[13]. Los franceses, demientres ocuparon el país, favorecieron el desarrollu d'una élite indíxena educada en francés, formada mayormente por bereberes de la Cabilia de resultes de l'aplicación de la política francesa de "dividir pa reinar". El so gobiernu favoreció sistemáticamente a los cabileños[14], pa los que, por exemplu, construyéronse el 80% de toes les escueles del país.

Evolución de la estensión de l'Arxelia francesa demientres la ocupación

Dende 1848 hasta la independencia arxelina Francia alministró la rexón como una parte integral de la nación francesa, de la que yera un departamentu. El llargu periodu d'ocupación fizo d'Arxelia el destinu de cientos de miles d'inmigrantes europeos (50.000 franceses aportaron a la zona ente 1825 y 1847), que yeren conocíos primeru como colonos y dempués como pied-noirs (pies negros). Los colonos beneficiáronse de la política del gobiernu francés, que confiscaba tierres comunales de les tribus pa dá-yosles. Dempués, l'aplicación de técniques agrícoles modernes ameyoraba la calidá de la tierra, aumentando la cantidá de tierres afayaíces pa los cultivos.

Poco a poco foi medrando'l descontentu ente la población musulmana, marxinada política y económicamente embaxu'l sistema colonial, y entamaron les demandes de consiguir una mayor autonomía política pal territoriu. Les tensiones ente los dos grupos de población (colonos y indíxenes) entamaron en 1954, cuando entamaron les primeres engarradielles de lo que dempués se conocería como guerra d'Arxelia. Los historiadores tienen estimao qu'ente 30.000 y 150.000 harkis (musulmanes arxelinos lleales a Francia que servíen como soldaos ausiliares del exércitu francés n'Arxelia) morrieron de manes del Front de Libération Nationale (FLN) o en disturbios[15]. El FLN entamó a facer atentaos terroristes n'Arxelia y Francia como parte de la so estratexa de llucha, y los franceses respondieron aumentando la represión nel territoriu. La guerra finó en 1962, cuando, tres la firma de los acuerdos d'Evian en marzu de 1962 y la cellebración d'un referéndum d'autodeterminación en xunetu d'esi mesmu añu Arxelia convirtiose nún país independiente.

Los primeros años d'independencia[editar | editar la fonte]

El primer presidente de l'Arxelia independiente foi el cabezaleru del FLN, Ahmed Ben Bella. Tevo que facer frente al intentu marroquín de recuperar delles zones del oeste del país, que foran incorporaes pelos franceses a l'Arxelia francesa, na que se conoz como Guerra de les Arenes (ochobre de 1963). Ben Bella foi depuestu en 1965 por el so antiguu aliáu y ministru de defensa Houari Boumediene. El gobiernu, que yá demientres el gobiernu de Ben Bella diba tomando un calter cada vegada más socialista y autoritariu, siguió pel mesmu camín col nuevu gobernante. Esti, por embargu, sofitó'l so poder principalmente nes fuerces armaes, dexando'l partíu únicu ensin poder real. Colectivizó l'agricultura y punxo en marcha un importante procesu industrializador. Amás, nacionalizó les instalaciones d'estracción de petróleu, lo que foi perprovechosu pa les élites que gobernaben el país luego de la crisis del petróleu de 1973.

Boumediene foi sucedíu nel poder, en 1979, por Chadli Bendjedid. Esti camudó la política económica del país, introduciendo delles midíes lliberalizadores, y promovió una política arabizadora de la sociedá y la vida pública del país. Maestros de llingua árabe, qu'aportaron d'otros países musulmanes, espardieron la ideoloxía islamista radical nes escueles, semando así la simiente del islamismu políticu.

La economía arxelina fízose cada vuelta más dependiente del petróleu, lo que produció graves problemes cuando'l preciu d'esta materia prima amenorgó enforma na década de 1980[16]. La recesión económica provocó revueltas, y al final de la década Bendjedid viose obligáu a permitir la creación de nuevos partíos políticos. Ún d'ellos, formáu por una coalición de grupos islamistes, foi el Frente Islámicu de Salvación (FIS).

La Guerra Civil y les sos repercusiones[editar | editar la fonte]

N'avientu de 1991 el FIS dominó les dos primeres vueltes de les elecciones llexislatives. Por mieu a que se formara un gobiernu islamista les autoridaes intervinieron el 11 de xineru de 1992, anulando les elecciones. Bendjedid dimitió, y formose un Conseyu d'Estáu pa exercer la presidencia. Esti conseyu ilegalizó el FIS, provocando al facelo l'españíu de los enfrentamientos ente'l brazu armáu del FIS, el Grupu Islámicu Armáu (GIA), y les fuerces armaes. La guerra, na qu'hebo más de 100.000 muertos, tuvo en dellos momentos gran repercusión internacional, especialmente dempués del secuestru del vuelu 8969 d'Air France por miembros del GIA. Esta organización declaró una tregua en ochobre de 1997.

Abdelaziz Bouteflika

En 1999 hebo elecciones, nes que ganó'l presidente Abdelaziz Bouteflika. El so principal enfotu nos primeros tiempos de gobiernu foi llevar la estabilidá política al país. Pa ello propuso, y vio aprobáu en referéndum, un programa de midíes destinaes a favorecer la reconciliación del país. Asina, lliberose a prisioneros políticos y concedióse-yos a varios miles de miembros de los grupos armaos islamistes la posibilidá de nun ser xulgaos si dexaben les armes primero del 13 de xineru de 2000. Estes midíes ficieron baxar enforma'l nivel de violencia, magar qu'una escisión del GIA, el Groupe Salafiste pour la Prédication et le Combat (GSPC), entamó una campaña terrorista escontra'l gobiernu.

Bouteflika foi reelexíu n'abril de 2004, tres proponer na campaña el desendolcu d'un ampliu programa de reconciliación nacional. Esti incluyía reformes económiques, institucionales, polítiques y sociales empobinaes a modernizar el país y facer medrar el so nivel de vida; y tamién una segunda amnistía, aprobadada en referéndum en setiembre de 2005, que perdonaba los delitos de los miembros de les guerrilles y de les fuerces de seguridá del estáu.

En payares de 2008 el parllamentu aprobó una enmienda constitucional que permitía al presidente tener más de dos mandatos consecutivos. Bouteflika, poro, pudo presentase a les elecciones d'abril de 2009, nes que foi reelexíu. Na campaña prometió continuar col programa de reconciliación nacional, y poner en marcha un ambiciosu programa d'inversiones pa crear trés millones d'empleos, construyir un millón de viviendes y continuar cola modernización de les infraestructures del país.

Nel contestu de les revueltes populares del Oriente Prósimu y el norte d'África qu'españaron per esi tiempu, entamaron les protestes populares n'Arxelia el 28 d'avientu de 2010. De resultes d'elles, el 24 de febreru de 2011 el gobiernu sacó al país del estáu d'emerxencia, nel que llevaba 19 años[17]. El gobiernu, d'alcuerdu colos partíos políticos, reformó delles lleis, incluyíes les que regulaben les elecciones y la representación de la muyer en política[18]. N'abril de 2011 el presidente anunció nueves reformes polítiques y constitucionales.

Xeografía[editar | editar la fonte]

Arxelia tien una estensión de 2.381.741 km². Asítiase nel norte d'África, ente Marruecos y Tunicia, y ye'l país más grande del continente. El so nome árabe, Al Jazair (les islles), derívase del nome de su capital Arxel (Al Jazair n'árabe), así nomada poles pequeñes islles qu'había nel so puertu. Tien cuasi 1.000 km de costes nel mar Mediterraneu, o por meyor dicir, nel mar d'Alborán, que ye'l nome que recibe l'estremu más occidental d'esi mar. La faza más septentrional del so territoriu, una tierra con montañes, valles y mesetes asitiada ente'l mar y el desiertu del Sáḥara, forma parte de la rexón norteafricana conocida como Magreb, que compriende, amás del territoriu septentrional d'Arxelia, Marruecos, Tunicia y la fastera noroccidental de Libia, nomada históricamente Tripolitania. Al sur ta'l desiertu, qu'ocupa más de les 4/5 partes de la estensión del país.

Rexones xeográfiques[editar | editar la fonte]

Atlas Tellianu, Hauts Plateaux y Atlas Saḥarianu[editar | editar la fonte]

Mapa físicu d'Arxelia

L'Atlas Tellianu, que s'estiende dende la llende con Marruecos y inclúi la cordillera de Djebel Babor, ye la cadena montañosa más importante de la fastera noroccidental d'Arxelia. Al sur d'ella, separtándola del Atlas Saḥarianu, estiéndense les mesetes conocíes como Hauts Plateaux (mesetes altes), llanaes ondulaes y con vexetación esteparia que formen una meseta de 600 km. El so altor va menguando, siendo d'ente 1.100 y 1.300 m na fastera más occidental, na llende con Marruecos, y namái de 400 nel este. El so clima ye perseco, tantu que delles veces considérase que son parte del desiertu del Sáḥara, y ta cubierta de materiales aluviales resultáu de la erosión de les montañes.

La cordillera nomada Atlas Saḥarianu, al sur de la formación anterior, ta formada por trés macizos: el de Ksour, cerca la llende con Marruecos; el d'Amour; y el d'Ouled-Naïl, al sur d'Arxel. Les montañes, que reciben más lluvia añalmente que la meseta asitiada al norte d'ella, tienen zonas útiles pa la ganadería. Los ríos y regatos de la so fastera meridional desaparecen nel desiertu, pero valen pa enllenar munchos oasis (Biskra, Laghouat, Béchar...) de la faza más septentrional del desiertu.

El noreste d'Arxelia[editar | editar la fonte]

L'este d'Arxelia ye un área perirregular, con una socesión de montañes, llanures y cuenques fluviales, cola singularidá de que, al contrario de lo que pasa nel oeste del país, los cumales de más altor nun s'asitien paralelos a la costa. La parte más meridional d'esti sector ye peraccidentada: lo abegoso d'atravesar la cordillera d'Aurès tien influyíu enforma na historia d'esta parte del Magreb dende la dómina de los romanos. Más al norte, el ríu Soummam ye'l que separta la cordillera Grande Kabylie, la más oriental del Atlas Tellianu, de la cordillera Petite Kabylie, que yá pertenez a esta rexón xeográfica.

Nesti territoriu les montañes aporten a la costa, na que hai por embargu pequeñes llanaes na rodiada de les ciudaes portuaries de Béjaïa, Skikda y Annaba. Nel interior, pela so banda, hai grandes llanaes alredor de les ciudaes de Sétif y Constantina, que foron desarrollaes polos colonizadores franceses y son anguaño les principales zones de cultivu de cereal del país.

Detalle del relieve del norte d'Arxelia

El desiertu del Sáhara[editar | editar la fonte]

La parte arxelina d'esti desiertu estiéndese al sur del Atlas Saḥarianu, a lo llargo de 1.500 km, hasta les llendes con Níxer y Mali. Ye un mundu aparte hasta pa los propios arxelinos, que malamente piensen nelli como una parte del so país. Pesie a la imaxe prototípica d'elli, la so xeografía nun ye pa nada homoxénea. Hai, d'una banda, zones perestenses de dunes nomaes areg (en singular, erg), qu'ocupen un 25% de la zona desértica. La mayor d'elles ye'l Gran Erg Oriental, una socesión casi inacabable de dunes de dos a cinco metros d'altor espaciaes cada 40 m. Bona parte del resto del territoriu desérticu ocúpenlo plataformes rocoses nomadas humud (en singular, hamada), y na fastera más suroriental del mesmu alcontramos dos mesetes, les d'Ahaggar y Tassili n'Ajjer,con partes d'ellas a más de 2000 m d'altor sobro'l nivel de la mar. Arrodiando l'Ahaggar hai llanaes d'arena, cortaes por foces perprofundes poles que tiempu atrás pasaben los ríos de la zona, y más al oeste, hasta la llende con Mali, un desiertu de regodones.

Magar que too parez igual, na realidá pueden estremase un sector septentrional y otru meridional, asemeyaos n'estensión, na parte arxelina del Saḥara. El septentrional, menos áridu, ye l'asientu de les poques persones que viven nel desiertu, y tamién de la mayoría de los oasis. Ye una zona con bayura de dunes de sable, magar que hai tamién, ente'l Gran Erg Oriental y el Gran Erg Occidental y estendiéndose haza'l norte hasta'l Atlas Saḥarianu, una zona de mesetes qu'inclúi una zona rica en caliza, el M'zab, na que viven los beréberes m'zabites. La fastera meridional, pela so banda, ye totalmente árida, y namái viven nellos dellos tuareg nómades y, de poco p'acá, los trabayadores de los campos de petróleu.

Demografía[editar | editar la fonte]

Arxelia ye'l segundu mayor país d'África, pero bona parte del so territoriu ye desértico. Poro, la densidá de población nun ye mui alta (15,4 hab/km²), y la mayoría de los sos 34.574.000 habitantes viven nes zones más averaes a la costa. No que cinca a la distribución por sexos, el 50,46% de la so población son homes, y el 49,54% restante muyeres (datos del añu 2005). La so población, con una tasa de población urbana del 60%, ye xoven: el 61,8% de los sos habitantes tienen menos de 29 años (2005), mentantu que namái un 6,4% son mayores de 60 años.

Tocántenes a la composición étnica de la población, nel añu 2000 el 59,1% yeren árabes arxelinos. Había, tamién, un 26,2% de bereberes, de los qu'un 3% yeren bereberes arabizaos, y un 14,5% d'árabes beduinos. Cuasi toos los sos habitantes (99,7%) son de relixón musulmana, con un 99,1% de musulmanes sunníes y un 0,6% d'ibadíes; el restante 0,3% de la población son cristianos.

Les ciudaes más grandes del país (2008) son les que vienen darréu:

Política[editar | editar la fonte]

Arxelia ye, nominalmente, una república presidencial multipartidista, na que'l presidente del país ye'l xefe del estáu y el primer ministru el xefe del gobiernu. El poder executivu ye exercíu pol gobiernu, que comparte coles dos cámares del parllamentu, nomaes Asamblea Nacional Popular y Conseyu de la Nación, el poder llexislativu. Sicasí, el poder real ye exercíu, según los politólogos, por un grupu de xente (décideurs, los que deciden) qu'inclúi a los altos cargos del exércitu y a un grupu de civiles que controlen los principales resortes económicos del país. Según los analistes de la política arxelina son eses persones, conocíes popularmente como le pouvoir (el poder), son los que tomen les principales decisiones polítiques del país y determinen quien ha ser el presidente.

La estructura política del país ríxese pela Constitución de 1976. Según ella el país ye un estáu multipartidista, nel que la creación de un partíu políticu ha ser aprobada pol ministeriu del interior, que nun permite que haiga partíos de base relixosa, llingüística, racial, de xéneru o rexonal. Actualmente (2013) hai más de 40 partíos políticos reconocíos.

El xefe del estáu ye'l presidente de la República, elexíu por sufraxu universal pa cinco años. Hasta l'añu 2008, nel que foi enmendada la constitución, namái podía ser reelixíu una vez, mentantu qu'agora puede selo indefinidamente. A él-y correspuende presidir el Conseyu de Ministros y el Conseyu de Seguridá Nacional, y proponer un candidatu pa xefe de gobiernu.

El poder llexislativu exércelu, conxuntamente col gobiernu, un parllamentu bicameral, formáu por: l'Asamblea Nacional Popular, con 389 miembros elixíos por sufraxu universal pa cinco años; y el Conseyu de la Nación, que tien 144 miembros, de los que 48 son designaos pol presidente y los otros 96 elixíos poles asamblees llocales y rexonales.

División alministrativa[editar | editar la fonte]

Arxelia ta sodividida en 48 wilaya (provincies), 553 daïra (condaos) y 1.541 baladiyah (conceyos). El so nome ye'l de la so capital, que ye siempres la mayor de les poblaciones del territoriu d'una unidá alministrativa.

Acordies cola constitución arxelina una wilaya ye una colectividá territorial qu'esfruta de llibertá económica y diplomática. Los sos asuntos son dirixíos pol parllamentu provincial, nomáu APW poles sigles del so nome en francés, (Assemblée Populaire Wilayale), que los sos miembros son elixíos por sufraxu universal. L'asamblea ta dirixida pol wali (gobernador), designáu pol presidente del país.

Los númberos de les 31 primeres provincies son los de les provincies que se crearon nel país, tres de la independencia, cola sodivisión de los quince departamentos nos que los colonizadores franceses teníen dividíu el territoriu, ordenaos n'orde alfabéticu n'árabe. En 1983 creáronse 17 provincies nueves, que foron ordenadas tamién por orde alfabéticu n'árabe pa dá-yos un númberu del 32 al 48. Los nomes y números oficiales de les 48 provincies arxelines son los que vienen darréu:

Mapa de les provincies d'Arxelia numberaes según el orde oficial
1 Adrar
2 Chlef
3 Laghouat
4 Oum el-Bouaghi
5 Batna
6 Béjaïa
7 Biskra
8 Béchar
9 Blida
10 Bouira
11 Tamanghasset
12 Tébessa
13 Tlemcen
14 Tiaret
15 Tizi Ouzou
16 Arxel
17 Djelfa
18 Jijel
19 Sétif
20 Saïda
21 Skikda
22 Sidi Bel Abbes
23 Annaba
24 Guelma
25 Constantina
26 Médéa
27 Mostaganem
28 M'Sila
29 Mascara
30 Ouargla
31 Orán
32 El Bayadh
33 Illizi
34 Bordj Bou Arréridj
35 Boumerdès
36 El Taref
37 Tindouf
38 Tissemsilt
39 El Oued
40 Khenchela
41 Souk Ahras
42 Tipasa
43 Mila
44 Aïn Defla
45 Naama
46 Aïn Témouchent
47 Ghardaïa
48 Relizane

Defensa[editar | editar la fonte]

L' Armée nationale populaire ye l'exércitu de la República Democrática Popular d'Arxelia. Por esti nome, inspiráu nos de los países socialistes del este d'Europa, conócense dende la independencia del país les sos fuerces armaes, de bon tamañu y razonablemente bien equipaes. L'Armée inclúi fuerces de tierra (Forces Terrestres), mar (Marine de la Republique Algerienne) y aire (Al-Quwwat al-Jawwiya al-Jaza'eriya), y tamién un comandu de defensa aérea. L'Armée ye la socesora directa de l' Armée de Libération Nationale, rama militar del FLN que lluchó escontra la ocupación colonial francesa na guerra d'Arxelia. El país tien tamién un cuerpu paramilitar, la Gendarmerie Nationale, que fai les veces de policía nes zones rurales.

Rexones militares d'Arxelia

El númberu de tropes estimábase, en 2011, en 127.000 soldaos activos. Había, amás, 150.000 reservistes (2010) y 187.000 miembros de la Gendarmerie (2008)[19]. En Arxelia esiste'l serviciu militar obligatoriu; dura 18 meses, con seis d'instrucción militar y 12 de trabayu en proxectos civiles. El gastu militar del país varía, según les fontes consultaes, ente'l 2,7% y el 3,3% del so PIB[20]. Concretamente, el so presupuestu militar pa 2012 foi de 8.170 millones de dólares[21].

Dende'l puntu de vista militar el país divídese en 6 rexones militares, caúna con un cuartel xeneral d'operaciones:

  • La primer rexón militar (Blida).
  • La segunda rexón militar (Orán).
  • La tercer rexón militar (Béchar).
  • La cuarta rexón militar (Ouargla).
  • La quinta rexón militar (Constantina).
  • La sesta rexón militar (Tamanghasset).

Economía[editar | editar la fonte]

Arxelia ye considerada pol Bancu Mundial como un país d'ingresos medios-altos[22]. La so economía sigue siendo firmemente dependiente del sector públicu como resultáu del modelu económicu socialista adoptáu pol país dempués de la so independencia. D'alcuerdu con elli, l'estáu tien paralizao nos caberos años la privatización de delles industries de propiedá estatal, y tien puesto restricciones al accesu de capitales foriatos a la economía del país [23].

El país tien intentao desarrollar industries al marxe de la de los hidrocarburos, pero l'altu coste y les inercies de la burocracia estatal ficieron que los resultaos nun tengan sío mui bonos, y el gobiernu nun foi entá quién a atayar problemes endémicos del país como la escasez de vivienda o l'eleváu paru xuvenil. Amás d'esos, el país tien d'enfrentar abondos problemes nel cortu y mediu plazu, que precisen pa la so solución midíes como la diversificación de la economía, el desarrollu de reformes polítiques, económiques y financieres y la reducción de les desigualdaes ente les rexones[24].

Gráficu de les esportaciones arxelines por sectores, qu'amuesa la so dependencia de los hidrocarburos

La economía del país creció un 2,6% (4,8% si nun incluyimos nos datos el sector de los hidrocarburos) en 2011, principalmente gracies al gastu públicu n'infraestructures y a la creciente demanda interna. La medría esperada pa 2012 yera del 3,1%, y un 4,2% pal 2013. La tasa d'inflación foi del 3,9%, con un déficit presupuestariu del 3% del PIB. El superávit por cuenta corriente estímase nún 9,3% del PIB, y a finales de 2011 tenía unes reserves, según datos oficiales, de 182.200 millones de dólares[25]. La so deuda esterna, pa finar, ye namái d'un 2% del PIB.

Sicasí,la economía ye perdependiente de la evolución del preciu de los hidrocarburos, y pesie a que les sos reserves bástarían-y pa pagar demientres trés años toes les importaciones del país, el crecimientu actual del gastu públicu dexen el presupuestu públicu del país espuestu al riesgu d'una baxada del preciu de los hidrocarburos[26]. Mentantu qu'eso ocurre, el gobiernu aprovecha los beneficios del comerciu d'hidrocarburos p'aumentar el gastu públicu n'ayuda alimentaria, creación d'empleo, aumentu de los salarios públicos... midíes coles qu'intenta apaciguar el creciente descontentu de la población.

Esti ye importante porque la tasa de paru del país ye alta, especialmente pa dellos grupos. Magar que la tasa media de desempléu yera del 10% en 2011, esta ye enforma mayor nel grupu d'edá de 15-24 años (21,5%) y nes muyeres. Pa lluchar escontra'l paru l'estáu reforzó en 2011 los programes d'axuda a los desempleaos que busquen trabayu, nomaos DAIP (Dispositif d'Aide à l'Insertion Professionnelle) y entamaos en 1988[27].

Hidrocarburos[editar | editar la fonte]

Arxelia ye miembru de la OPEP dende 1969. La so producción de petróleu ye d'alredor de 1,1 millones de barriles al día, y ye tamién un gran productor y esportador de gas natural. Los hidrocarburos suponen aprosimadamente'l 60% de los ingresos públicos del país, un 30% de su PIB y los responsables del 95% del valor y el 98% del volume de les esportaciones del país. No que cinca al gas natural, Arxelia ye'l sestu país del mundu que más gas esporta, y el décimu coles mayores reserves estimaes. Según la U.S. Energy Information Administration estes ascendíen, en 2005, a 4,5 billones de metros cúbicos. Ye, tamién, el decimosestu país del mundu con más reserves de petróleu[28].

La compañía petrolera nacional arxelina ye Sonatrach, que controla toles cuestiones referentes a los asuntos del gas y el petróleu del país. Ye obligáu pa les empreses foriates trabayar en comuña con ella, siendo lo avezao que se formen, pa la esplotación de determinaos xacimientos, empreses mistes nes que Sonatrach caltién la mayoría del accionariáu.

Turismu[editar | editar la fonte]

El turismu representa namái alredor del 1% del PIB d'Arxelia. El país ta perretrasáu nel desarrollu del sector turísticu con respeutu a los sos vecinos Marruecos y Tunicia; malpenes recibía, en 2008, 200.000 turistes y visitantes al añu, principalmente ciudadanos franceses d'etnia arxelina y dalgunos tunecinos[29].

El sodesarrollu del sector turísticu arxelinu puede atribuyise a la combinación de delles causes: la escasa infraestructura hotelera, l'amenaza terrorista y el anticuáu sistema de concesión de visaos, d'estilu soviéticu, que dificulta la entrada del país. Sicasí, el gobiernu tien un plan, nomáu Horizon 2025, pa desarrollar les infraestructures hoteleres. Asina, dellos grupos hoteleros tienen planes pa construyir dellos hoteles, principalmente na fastera costera del país, y hai planes pa desarrollar el turismu d'aventura nel sur desérticu del país[30].

Infraestructures de tresporte[editar | editar la fonte]

No que cinca al tresporte per carretera, la rede de carreteres arxelines ye la mayor del continente. Tien una estensión aprosimada de 180.000 km, asfaltaos nun 85%. Ente elles destaca l'Autopista Este-Oeste, entá en construcción, una autopista de trés carriles en cada sentíu que ha xunir, al traviés de los sos 1.216 km de llonxitú, la ciudá d'Annaba, na llende este del país, cola de Tlemcen, la más occidental del mesmu[31]. La so construcción, que forma parte del proyectu pa xunir per autopista El Cairu (Exiptu) y Dakar (Senegal), tien asignáu un coste de 11.200 millones de dólares, entamó en 2007 y pesie a que tenía que tener acabaose en 2010 entá nun tien una fecha d'acabación. Otra carretera importante nel país ye la nomada Autopista Tressaḥariana, un proyectu multinacional que tien l'oxetivu d'asfaltar la carretera que, xuniendo Arxel cola ciudá nixeriana de Lagos, sigue'l recorríu d'una de les rutes tradicionales del comerciu al traviés del desiertu del Sáḥara. El tramu de la mesma que atraviesa Arxelia de norte a sur yá ta completamente asfaltáu.

L'Autopista Este-Oeste

El ferrocarril, pela so parte, tien una estensión de 3.973 km, con dos anchos de vía distintos. La compañía estatal STNF (Société Nationale des Transports Ferroviaires) xestiona el tresporte, y la recientemente creada Anesrif xestiona les infraestructures. Hai, tamién, una llínia de tranvía y otra de metro n'Arxel, y proyectos pa construyir llínies de tranvía n'Orán y Constantina.

Tocántenes al tresporte aéreu, el país tenía 137 aeropuertos y aeródromos y un helipuertu. 52 d'ellos teníen la pista asfaltada en 2005. El principal d'ellos ye l'aeropuertu internacional Houari Boumedienne, asitiáu a unos 20 km d'Arxel.Constantina, Annaba, Tilimsen y Orán tienen tamién aeropuertos preparaos pa recibir vuelos internacionales. La compañía de bandera del país ye Air Algérie.

El tresporte marítimu, pela so banda, cuenta con 16 puertos nel mar Mediterráneu[32]. Los mayores d'ellos son los d'Arxel y Bejaia. La flota de mercantes del país inclúi[33] 41 barcos de más de 1.000 TRB (tonelaes de rexistru brutu). D'ellos 20 son cargueros, 4 barcos mistos pa carga y pasaxeros y los demás barcos cisterna pal tresporte de petróleu, gas o productos químicos.

Puertu d'Arxel

Capítulu aparte merecen los oleoductos y gasoductos. El país tien, nel so territoriu, 456 km de tuberíes pal tresporte de crudu, 298 km pal tresporte de petróleu refináu y 2.948 km pal tresporte de gas natural. Amás, el país ta conectáu per aciu de cuatro gasoductos (dos en funcionamientu y dos en construcción) con Europa:

  • El gasoductu Magreb-Europa, de 1.620 km de llonxitú, que lleva'l gas dende'l centru de distribución d'hidrocarburos de Hassi R'mel, atravesando Marruecos y l'estrechu de Xibraltar, hasta la ciudá española de Córdoba.
  • El gasoductu Tresmediterráneu, de 2.475 km de llonxitú, que lleva'l gas dende Hassi R'mel, atravesando Tunicia y el mar Mediterráneu, a Sicilia y el norte d'Italia, con un ramal que llega a Eslovenia.
  • El gasoductu Medgaz, de 757 km y entá en construcción, que ha xunir Hassi R'mel cola ciudá española d'Almería.
  • El gasocutu GALSI, de 1.505 km y entá en construcción, que ha conectar Hassi R'mel, atravesando el mar Mediterráneu y Cerdeña, cola rede italiana de gasoductos na Toscana.

Hai, tamién, un proyectu pa construyir un gasoductu Tressaḥarianu, de 4.128 km de llonxitú, que xuniría Hassi R'mel cola rexón nixeriana de Warri.

Cultura[editar | editar la fonte]

Arte[editar | editar la fonte]

Dellos pintores arxelinos, como Mohamed Racim o Baya, intenten revivir el prestixosu pasáu artísticu de l'Arxelia anterior a la colonización francesa, contribuyendo con ello a la conservación de los valores arxelinos tradicionales. Nesta llínia de trabayu Mohamed Temam o Abdelkhader Houamel retraten escenes de la historia del país, los vezos del pasáu y el paisaxe rural arxelinu. Hai, sicasí, otres corrientes artístiques más allonxaes de la pintura figurativa clásica. Asina, Mohammed Khadda y M'hamed Issiakhem, ente más otros, siguen una llínia artística cola que busquen adaptar l'arte arxelinu modernu a las nueves realidaes del país.

Lliteratura[editar | editar la fonte]

La lliteratura arxelina moderna ta fuertemente influenciada pola reciente historia del país. Ente los poetes modernos rescamplen les figures de Moufdi Zakaria y Mohammed Al Aid, de mediaos del sieglu XX, y les d'Achour Fenni y Azrag Omar dende la década del 1980. Dellos novelistes famosos del sieglu XX inclúin a Mohammed Dib, Albert Camus, Kateb Yacine, Ahlam Mosteghanemi y Assia Djebar. Hai que citar tamién los nomes de Rachid Mimouni, qu'amás d'escritor foi vicepresidente d'Amnistía Internacional, y Tahar Djaout, que foi asesináu por un grupu islamista en 1993 poles sos idees secularistes. Nel campu de la filosofía y les humanidaes rescampla la figura de Jacques Derrida, pa de la deconstrucción, nacíu n'El Biar (Arxel). Otres figures contemporánees modernes son Malek Bennabi y Frantz Fanon, autores d'obres influyentes sobro los procesos de descolonización.

Tocántenes a la lliteratura de sieglos anteriores, Agustín d'Hipona nació en Tagaste (anguaño nomada Souk Ahras); y Ibn Jaldún, magar que nació en Tunicia, escribió la so famosa obra Muqaddima cuando vivía n'Arxelia. Tamién nació n'Arxelia, concretamente en Madaurus (anguaño Mdaourouch), l'autor llatinu Apuleyu.

Música[editar | editar la fonte]

Hai dellos estilos de música tradicional arxelina que ye bueno conocer:

  • La música Chaâbi ye un xéneru musical típicu de la zona qu'arrodia Arxel, caracterizáu pola combinación de ritmos musicales preestablecíos y la presencia de lletres basaes en poemes populares, nomaos Qacidate, escritos nel dialectu árabe del país. Ente los sos intérpretes rescampla la figura d'El Hadj M'Hamed El Anka.
  • La música Malouf ye típica de la rexón de Constantina. Ente los sos intérpretes rescampla Mohamed Tahar Fergani.
  • La música beduina, con canciones poétiques basaes en poemes llargos nomaos kacida.
  • La música de la Kabilia, que sonoriza poesíes y vieyos cuentos que pasaron oralmente de xeneración en xeneración.
  • La música Shawiya y Rahaba, propies de la rexón de les montañes Aures, nel noreste del país.
  • La música Tergui, cantada en llingües tuaregs, cola banda Tinariwen como intérpretes más destacaos.
  • La música Staïfi, propia de la rexón de Sétif.

No que cinca a la música moderna, hai que nomar la música Raï, un estilu típicu del oeste del país; y tamién el rap, de reciente introducción nel país, que tien un ésitu creciente ente los más mozos.

Bibliografía[editar | editar la fonte]

  • Encyclopaedia Britannica Almanac 2010. Chicago, 2009.

Referencies[editar | editar la fonte]

  1. Llistáu de los países del mundu ordenaos por población. CIA World Factbook
  2. Poverty and Macroeconomic Development in Algeria: What is the contribution of Oil Revenues?. Ponencia de Mohamed Benbouziane y Abderrezak Benhabib na Octava Conferencia Internacional sobre la Economía y les Finances de los Países Islámicos.
  3. Llistáu de los países del mundu ordenaos por estensión. CIA World Factbook
  4. «The Site of Ain Hanech Revisited: New Investigations at this Lower Pleistocene Site in Northern Algeria». Journal of Archaeological Science. Consultáu'l 26 d'agostu de 2013.
  5. Brett, Michael; Fentress, Elizabeth. Berbers in Antiquity en The peoples of Africa. The Berbers. Wiley-Blackwell,1997.
  6. Cameron, Averil; Ward-Perkins, Bryan. Vandal Africa, 429-533 en The Cambridge Ancient History.Cambridge University Press, 2001
  7. Davis, Robert C. Christian Slaves, Muslim Masters: White Slavery in the Mediterranean, the Barbary Coast and Italy, 1500–1800. Palgrave McMillan, 2003
  8. «Los conteníos d'esti apartáu tán tomaos d'Ottoman Rule, capítulu del llibru sobro Arxelia espublizáu pola Federal Research Division de la biblioteca del Congresu de los Estaos Xuníos». Consultáu'l 7 de setiembre de 2013.
  9. «British slaves of the Barbary Coast, por Robert Davis». Consultáu'l 7 de setiembre de 2013.
  10. Mackie, Erin Skye. Welcome the Outlaw: Pirates, Maroons, and Caribbean Countercultures. Cultural Critique 59 (1): 24–62
  11. «Barbary Pirates. Artículu de la Enciclopedia Britannica de 1911». Consultáu'l 7 de setiembre de 2013.
  12. Littell, Eliakim. The Museum of foreign literature, science and art (1836). p. 231.
  13. Ruedy, John D. Modern Algeria: The Origins And Development of a Nation. Indiana University Press, 2005
  14. Alec G. Hargreaves, Alec G; Mark McKinney, M. Post-Colonial Cultures in France. Psychology Press, 1997
  15. ^"French 'Reparation' for Algerians". BBC News, 6 d'avientu de 2007.
  16. Prochasta, D., That was then, this is now: The battle of Algiers and after. Radical History Review, númberu 85, páx. 133-149
  17. Llevántase l'estau d'emerxencia n'Arxelia. CNN.com
  18. Información sobre Arxelia nel African Economic Outlook
  19. Datos sobro'l potencial militar d'Arxelia na web globalfirepower.com
  20. Información sobre Arxelia nel CIA World Factbook
  21. Datos sobro'l potencial militar d'Arxelia na web globalfirepower.com
  22. «Llistáu cola calificación de les economíes de los países según el Bancu Mundial». World Bank (Xineru 2011). Consultáu'l 23 d'agostu de 2013.
  23. Información sobre Arxelia nel CIA World Factbook
  24. Información sobre Arxelia nel African Economic Outlook
  25. Información sobre Arxelia nel African Economic Outlook
  26. Informe sobre Arxelia del Fondu Monetariu Internacional (2011)
  27. Información sobre Arxelia nel African Economic Outlook
  28. Información sobre Arxelia nel CIA World Factbook
  29. Perfil d'Arxelia na web de la Federal Research Division de la Biblioteca del Congresu de los Estaos Xuníos
  30. Perfil d'Arxelia na web de la Federal Research Division de la Biblioteca del Congresu de los Estaos Xuníos
  31. Detalle del proyectu de l'Autopista Este-Oeste
  32. Llocalización de los puertos arxelinos. Worldportsource.com
  33. Información sobre Arxelia nel CIA World Factbook


Arxelia
Wikimedia Commons tien archivos rellacionaos con:


África
Angola | Arxelia | Benín | Botswana | Burkina Faso | Burundi | Cabu Verde | Camerún | República Centroafricana | Chad | Islles Comores | El Congo | República Democrática d'El Congo | Costa de Marfil | Djibouti | Eritrea | Etiopía | Exiptu | Gabón | Gambia | Ghana | Guinea | Guinea-Bissau | Guinea Ecuatorial | Kenya | Lesotho | Liberia | Libia | Madagascar | Malawi | Mali | Marruecos | Mauriciu | Mauritania | Mozambique | Namibia | Níxer | Nixeria | Islles Seychelles | Sudáfrica | Tanzania | Rwanda | São Tomé y Príncipe | Senegal | Sierra Leone | Somalia | Sudán | Sudán del Sur | Swazilandia | Togo | Túnez | Uganda | Zambia | Zimbabwe

Dependencies: Islles Kerguelen | Mayotte | Reunión | Sáhara Occidental | Socotra | Tromelin


Bandera de la OCI Organización pa la Cooperación Islámica Bandeira de la OCI
Afghanistán | Albania | Arabia Saudita | Arxelia | Azerbaiján | Bahrain | Bangladesh | Benín | Brunéi | Burkina Faso | Camerún | Chad | Costa de Marfil | Djibouti | El Líbanu | Emiratos Árabes Xuníos | Exiptu | Gabón | Gambia | Guinea | Guinea-Bissau | Guyana | Indonesia | Irán | Iraq | Kazakhstán | Kirguistán | Kuwait | Islles Comores | Libia | Malasia | Maldives | Mali | Marruecos | Mauritania | Mozambique | Níxer | Nixeria | Omán | Palestina | Pakistán | Qatar | Senegal | Sierra Leone | Siria |Somalia | Sudán | Surinam | Tajikistán | Togo | Túnez | Turkmenistán | Turquía | Uganda | Uzbekistán | Xordania | Yemen

Países observadores: Bosnia y Hercegovina | República Centroafricana | República Turca de Xipre del Norte | Thailandia | Rusia


Logo de la OPEP Organización de Países Esportadores de Petroleu (OPEP)
Arxelia | Arabia Saudita | Emiratos Árabes Uníos | Indonesia | Irán | Iraq | Kuwait | Gabón | Libia | Nixeria | Qatar | Venezuela