Santu Tomé y Príncipe

De Uiquipedia
Saltar a: navegación, buscar
República democrática de São Tomé e Príncipe
Bandera de Santu Tomé y Príncipe Escudu de Santu Tomé y Príncipe
(Bandera de Santu Tomé y Príncipe) (Escudu de Santu Tomé y Príncipe)
Lema nacional: Unidade, Disciplina, Trabalho (portugués: «Xunidá, Disciplina, Trabayu»)
Himnu nacional: Independência total
Situación de Santu Tomé y Príncipe
Capital
 • Población
 • Coordenaes
Santu Tomé
56.156 hab. (2005)
0° 20’ N 6° 44’ E
Mayor ciudá Santu Tomé
Idiomes oficiales portugués
Forma de gobiernu República
Fradique de Menezes
Tomé Vera Cruz
Independencia
- fecha
de Portugal
12 de xunetu de 1975
Superficie
 • Total
 • % agua
Llendes
Costes
Puestu 185º
1.001 km²
despreciatible
nun tien
209 km
Población
 • Total
 • Densidá
 • Densidá
Puestu 174º
193,413
170 ab./km²
170 hab/km²
PIB (PPA)
 • Total (2005)
 • PIB per capita
Puestu 187º
US$ 268'000.000
US$ 1.638
Moneda Dobra (STD)
Xentiliciu (de Santu Tomé y Príncipe)
Zona horaria UTC
Dominiu d'Internet .st
Códigu telefónicu +239
Prefixu radiófonicu S9A-S9Z
Códigu ISO 678 / STP / ST
Miembru de: ONX, XA, CPLP
Sitiu web del Gobiernu:
{{{web_gobiernu}}}

La República Democrática de Santu Tomé y Príncipe (en portugués: República Democrática de São Tomé e Príncipe, pronunciación: /sɐ̃w̃ tu.'mɛ i 'pɾı̃.sɨ.p(ɨ)/), ye un país africanu de fala portuguesa asitiáu nel golfu de Guinea. Ta formáu por dos islles mayores, nomaes Santu Tomé (São Tomé) y Príncipe, y por un garapiellu d'isllotes. Santu Tomé ta asitiada a unos 250 km de la costa noroccidental de Gabón, y Príncipe a unos 225; la distancia ente elles ye d'unos 140 km. La islla de Santu Tomé, la más meridional de les dos, ta allugada xustu al norte de l'ecuador, y forma parte, xunta la de Príncipe, d'una cadena montañosa d'orixe volcánicu. Con una población d'alredor de 163.000 habitantes (2010) el país ye'l segundu con menor población d'África.

Mapa de Santu Tomé y Príncipe

Organización territorial[editar | editar la fonte]

Santu Tomé ye una nación constituyida por dos islles, y ta dividida alministrativamente en siete distritos.

  • La islla de Santu Tomé, la mayor, tien una superficie de 859 km², y ta dividida en seis distritos: Água Grande, Cantagalo, Caué, Lembá, Lobata y Mé-Zóchi. Nella vivíen, nel 2004, 133.000 habitantes. La capital del país, Santu Tomé, ta nel primero de los distritos citaos, qu'ocupa 17 km² de la fastera más noroccidental de la islla.
  • La islla de Príncipe, que la so capital ye Santo António, tien una estensión de 142 km² y una población de 5.400 habitantes (2004). Forma un distritu únicu, nomáu Pagué, y tien la consideración alministrativa de rexón autónoma dende'l 29 d'abril de 1995.

Gobiernu y política[editar | editar la fonte]

Santu Tomé y Príncipe ye, de magar s'aprobara una nueva constitución en 1990, una república democrática de tipu semipresidencialista. Asina, el presidente ye'l xefe del estáu, mentanto que'l primer ministru ye'l xefe del gobiernu.

  • El poder executivu correspuénde-y al presidente de la república, elixíu cada cinco años por sufraxu universal. El presidente puede ser reelexíu por dos quinquenios consecutivos. Los candidatos a la presidencia son escoyíos na conferencia nacional de los distintos partíos políticos, anque pueden presentase tamién candidatures independientes. Fai falta, pa ser presidente, ganar les elecciones por mayoría absoluta, seya na primer o na segunda vuelta de les eleiciones. Una y bones llega al poder, el presidente tien el poder pa escoyer al primer ministru. Sicasí, como'l nomamientu tien de ser aprobáu pol partíu mayoritariu na Asamblea Nacional, ye vezu que'l presidente-y proponga a ésta trés nomes pa qu'escueya d'ente ellos. El primer ministru, ratificáu pola Asamblea, noma los catorce ministros del so gabinete.
  • El poder llexislativu compártenlu'l gobiernu y l'Asamblea Nacional, formada por 55 miembros que son escoyíos en representación de los siete distritos del país.
  • El poder xudicial correspuénde-y al Tribunal Supremu. Enantes de que s'aprobara la constitución de 1990 dependía de l'Asamblea Nacional; de magar ye un muérganu independiente dafechu.


Xeografía[editar | editar la fonte]

Santu Tomé y Príncipe ye una pequeña nación formada por un archipiélagu allugáu na fastera ecuatorial del océanu Atlánticu. L'archipiélagu ta asitiáu nel golfu de Guinea, a unos 300 km de la costa de Gabón y al sur de la islla de Fernando Poo, y ta formáu por dos islles mayores, Santu Tomé y Príncipe, que-y dan el so nome al país, y seis islles menores: les islles Tinhosa Grande y Tinhosa Pequena y los isllotes Bombom, Caroço, das Cabras y das Rólas. Les coordenaes xeográfiques del país son 1°00′N de llatitú y 7°00′E de llonxitú.

Les dos islles mayores tienen, en conxuntu, una llinia de costa de 209 km. Dambes pertenecen a un cordal d'orixe volcánicu, anguaño inactivu, que inclúi tamién la islla de Bioko (Guinea Ecuatorial) al norte o'l Monte Camerún al oeste. Santo Tomé tien 50 km de llargor y 30 d'anchor, y ye la más montañosa de les dos. El so puntu cimeru ye'l picu de São Tomé, de 2.024 m d'altor. Príncipe, pela so banda, tien 30 km de llargor y 6 d'anchor, y el so puntu cimeru ye'l picu de Príncipe, de 948 m d'altor. Les dos islles tán xustu perriba l'ecuador, que atraviesa l'isllote das Rólas.

Na islla de Santu Tomé, concretamente nes coordenaes 0°7′0″N 6°34′00″E, hai un picu volcánicu con forma d'aguya, el picu Cão Grande (Perru Grande), que ta 300 m perriba del terrenu que lu arrodia, con un altor sobro'l nivel de la mar de 663 m.


Tocántenes al clima, al nivel de la mar ye tropical, húmedu y caldiu y con temperatures medies añales de 27º, con poca variación de temperatura nes distintes hores del día. Nes tierres interiores, a más altor, la temperatura media añal ye de 20º, y equí sí que la temperatura baxa pela nueche. La cantidá de lluvia añal varía permuncho, dende los 5.000 mm de les rimaes de la zona suroccidental de Santu Tomé fasta los 1.000 mm que se recueyen nes llanaes del norte de la islla. La estación de les lluvies va d'ochobre a mayu.

El Picu Cão Grande

Economía[editar | editar la fonte]

La economía del país ta basada, dende'l sieglu XIX, na agricultura de plantación. Cuando'l país algamó la independencia (1975) el 90% de les tierres cultivables taben ocupaes por plantaciones con un amu portugués. Eses tierres quedaron, al independizase'l país, nes manes de delles empreses agrícoles de propiedá estatal. Los principales cultivos son el cacáu (que representa'l 95% de les exportaciones), el café, la nuez de palmera y la copra. L'abondancia de cultivos pa la esportación fai qu'el país tenga d'importar alimentos pa cubrir les necesidaes de la so población. Pa lluchar escontra esa situación tienen desarrolláose, nos caberos años, dellos proyectos, mayormente pagaos por donantes foriatos, pa esparder el cultivu de productos agrícoles pal consumu internu.

Amás de l'agricultura, otra de les principales actividaes económiques ye la pesca. Hai, tamién, un sector industrial pequeñu, que se dedica al procesamientu de productos agrícoles y a la producción de bienes de consumu pal mercáu llocal. Les islles tienen, sicasí, un gran potencial turísticu, y el gobiernu ta intentando ameyorar la infraestructura turística del país, perprobe anguaño. D'otra banda, l'alministración pública da trabayu al 11% de la población.

Tocántenes al sistema económicu del país, cuando la independencia el país tenía una economía planificada, con una mayoría de les empreses nes manes del estáu. Y ello magar que la constitución que'l país tenía daquella garantizaba la esistencia d'una economía amestada, con un sector públicu fuerte y delles cooperatives de propiedá privada. Nes décades de los 80 y los 90 del sieglu XX la economía del país pasó un momentu permalu. La economía estancose, por culpa principalmente de la cayida de les esportaciones de cacáu y del preciu d'esti. Consecuencia d'ello, el déficit públicu medró enforma.

Pa pagar les sos deudes l'estáu pidió-y un préstamu al Fondu Monetariu Internacional, que lu obligó a tomar una serie de midíes qu'aumentaron el pesu del sector priváu na economía. Les privatizaciones sucediéronse nel sector agrícola, comercial, bancariu y turísticu, de forma qu'anguaño la economía productiva ta mayormente en manes privaes.

Demografía[editar | editar la fonte]

El primer censu del país foi fecho en 2011 cola ayuda del Institutu Estadísticu Nacional (INE) de Cabu Verde.[1].

La población estimao del país, según el so Instituto Nacional de Estatística, yera en 2010 de 163.784 habitantes.[2]. Los más d'ellos (157.500) viven en Santu Tomé, y los 6.000 restantes en Príncipe. Toos son descendientes de dellos grupos étnicos que foron llegando al archipiélagu dende 1485. Siete d'ellos son identificables:

  • Mestiços, mestizos descendientes de los colonos portugueses y los esclavos africanos que llegaron, dende Benín, Gabón y El Congo nos primeros años del asentamientu portugués nes islles. Esti grupu ye nomáu tamién filhos da terra (fíos de la tierra).
  • Angolares, que dicen ser descendientes de esclavos d'Angola que sobrevivieron a un naufraxu en 1540 y que viven de la pesca.
  • Forros, descendientes d'esclavos llibertaos cuando la esclavitú foi abolida.
  • Serviçais, trabayadores que viven temporalmente na islla. Los más d'ellos vienen d'Angola, Mozambique y Cabu Verde.
  • Tongas, fíos de los anteriores que nacieron nes islles.
  • Europeos, portugueses los más d'ellos.
  • Asiáticos, mayormente d'orixe chinu. Esti grupu inclúi xente que llegó de Macau y tien ascendientes portugueses y chinos.

Nos años setenta del sieglu XX hebo dos movimientos migratorios importantes. D'una banda, la mayoría de los 4.000 portugueses que vivíen nel país colaron d'elli; d'otra, aportaron al archipiélagu dellos cientos de refuxaos procedentes d'Angola.

La cultura de los diversos grupos étnicos ye luso-africana. Tocántenes a la so relixón, la mayoría son católicos o protestantes (evanxélicos, adventistes del séptimu día...), magar que hai una pequeña población musulmana. Tocántenes a la llingua, fálanse cuatro nel país: el portugués, oficial, falao pol 95% de la población; el forro, llingua criolla basada nel portugués, falao pol 85% de la población; l'angolar, llingua criolla basada nel portugués y nun dialectu bantú del interior d'Angola, falao pol 3% de la población; y el principense, falao namái pol 0,1% de la población. Una y bones el país ye miembru de l'asociación de países francófonos (Francophonie) los neños nes escueles aprienden tamién francés.

Referencies[editar | editar la fonte]

  1. «Cabu Verde ayuda a Santu Tomé y Príncipe a facer el so censu de población». Inforpress (6 April 2011).
  2. Población estimao del país (INE)

Enllaces esternos[editar | editar la fonte]


África
Angola | Arxelia | Benín | Botswana | Burkina Faso | Burundi | Cabu Verde | Camerún | República Centroafricana | Chad | Islles Comores | El Congo | República Democrática d'El Congo | Costa de Marfil | Djibouti | Eritrea | Etiopía | Exiptu | Gabón | Gambia | Ghana | Guinea | Guinea-Bissau | Guinea Ecuatorial | Kenya | Lesotho | Liberia | Libia | Madagascar | Malawi | Mali | Marruecos | Mauriciu | Mauritania | Mozambique | Namibia | Níxer | Nixeria | Islles Seychelles | Sudáfrica | Tanzania | Ruanda | Santu Tomé y Príncipe | Senegal | Sierra Lleona | Somalia | Sudán | Sudán del Sur | Suazilandia | Togo | Túnez | Uganda | Zambia | Zimbabwe

Dependencies: Islles Kerguelen | Mayotte | Reunión | Sáhara Occidental | Socotra | Tromelin