Perú

De Uiquipedia
Saltar a: navegación, buscar
República del Perú
Bandera del Perú Escudu del Perú
Bandera del Perú Escudu del Perú
Lema nacional: Firme y feliz por la unión
Himnu nacional: Somos libres, seámoslo siempre
Situación del Perú
Capital
 • Población
 • Coordenaes
Lima
8.472.935 (2007)
12°02′ S 77°01′ O
Mayor ciudá Lima
Idiomes oficiales Español1
Forma de gobiernu República presidencialista
Ollanta Humala
Ana Jara
Independencia
 • Declarada
 • Consolidada
d'España
28 de xunetu de 1821
Avientu de 1824
Superficie
 • Total
 • % agua
Llendes
Costes
Puestu 19º
1.285.216 km² km²
0,4%
5.536 km
2.414 km
Población
 • Total
 • Densidá
 • Densidá
Puestu 38º
29.797.694 (2011 est.)
22 ab./km²
22 hab/km²
PIB (PPA)
 • Total (2010)
 • PIB per capita
Puestu 48º
US$153.802.000.000
US$5.205
Moneda Nuevo sol (S/.) (PEN)
Xentiliciu Peruanu, peruana
Zona horaria
 • en Branu
UTC-5
UTC-5
Dominiu d'Internet .pe
Códigu telefónicu +51
Prefixu radiófonicu OAA-OCZ 4TA-4TZ
Códigu ISO 604 PER PE
Miembru de: CSN, ONU, OEA, APEC, CAN, Mercosur2
Sitiu web del Gobiernu:
{{{web_gobiernu}}}
1 Reconócense tamién el quechua, l'aymara y les demás llingües llocales naquelles zones onde predominen.
2 Asociáu.

La República del Perú ye un país allugáu na parte occidental d' América del Sur. Llenda'l norte con Ecuador y Colombia, al este con Brasil y Bolivia, al sur con Bolivia y Chile y al oeste col Océanu Pacíficu.

Ye un país de gran riqueza cultural y antropolóxica, conocíu sobremanera por ser el berciu del imperiu inca.

Divisiones alministratives[editar | editar la fonte]

Pe-map.png

Dende 2002, Perú ta dividíu en 25 rexones, a les qu'hai qu'amestar la Provincia de Lima, que tien un réxime especial.

  1. Departemento de Amazonas, capital Chachapoyas
  2. Departemento de Ancash, capital Huaraz
  3. Departemento de Apurímac, capital Abancay
  4. Departemento de Arequipa, capital Arequipa
  5. Departemento de Ayacucho, capital Ayacucho
  6. Departemento de Cajamarca, capital Cajamarca
  7. Departemento de Cusco, capital Cusco
  8. Departemento de Huancavelica, capital Huancavelica
  9. Departemento de Huánuco, capital Huánuco
  10. Departemento de Ica, capital Ica
  11. Departemento de Junín, capital Huancayo
  12. Departemento de La Libertad, capital Trujillo
  13. Departemento de Ambayeque, capital Chiclayo
  14. Departemento de Lima, capital Lima
  15. Departemento de Loreto, capital Iquitos
  16. Departemento de Madre de Dios, capital Puerto Maldonado
  17. Departemento de Moquegua, capital Moquegua
  18. Departemento de Pasco, capital Cerro de Pasco
  19. Departemento de Piura, capital Piura
  20. Departemento de San Martín, capital Moyobamba
  21. Departemento de Puno, capital Puno
  22. Departemento de Tacna, capital Tacna
  23. Departemento de Tumbes, capital Tumbes
  24. Departemento de Ucayali, capital Pucallpa


Xeografía[editar | editar la fonte]

Perú ocupa una superficie de 1.285.220 km², y tien 2.414 km de costa. El país ta allugáu n'América del Sur, ente la llinia del Ecuador y el Trópicu de Capricorniu. Sicasí la so climatoloxía nun tien en tolos territorios les característiques de los trópicos lluviosos, al intervenir dos factores perturbadores, la corriente oceánica d'Humboldt y la Cordillera de los Andes.

Los Andes fraccionen el territoriu peruanu en tres macrorexones naturales, caúna cola so personalidá climática, morfolóxica y cultural: la costa, la sierra y la selva.

  • La costa ye la parte del territoriu peruanu ente la marina y la cordillera de los Andes. Les precipitaciones son escases y varíen ente 5 y 100 mm al añu (ente 50 y 2200 mm nel norte). Sicasí, cuando se presenta'l fenómenu climáticu conocíu como El Niño, son frecuentes les inundaciones. El carácter secu d'esta fastera queda matizáu pola presencia de 52 ríos que nacen nos Andes y desemboquen nel Océanu Pacíficu. Nos sos valles hai una importante producción agrícola.
  • La sierra tien un clima variáu que contrasta col de la costa. Según les diferentes altures y el relieve pue haber microclimes diferentes, con variaciones importantes del nivel de precipitaciones según les fasteres. La diferencia de tempertatura ente'l día y la nueche ye enforma grande. Delles fasteres, como la que se conoz col nome de Cordillera Blanca, tienen nieve perpetuo. Pola mor d'esta variedá de microclimes son frecuentes alternen les zones de gran vexetación con otres cubiertes de maleza o plantes como los cactus, o l'ichu, que resisten bien a les variaciones climátiques.
  • La selva tien un clima tropical, con precipitaciones alredor de 200 díes al añu y bastante calor. Hai una gran variedá d'árboles y plantes como les orquídees. Por exemplu nel Parque Nacional del Manu atopáronse nuna sola héctarea más de 250 especies d'árboles.

Un de los cuatro ríos más grandes del mundu, l'Amazones, naz en Perú, onde s'axunten el Marañón y l'Ucayali.

Otros ríos importantes son el Tambopata y l'Urubamba. Perú comparte con Bolivia'l llagu Titicaca, allugáu nos Andes a 3.815 m d'altura d'una superficie de 8.300 km².

Ente los recursos naturales, alcontramos el cobre, la plata, l'oru, el petroleu, el fierro, el carbón y los fosfatos. La pesca ye tamién un recursu natural importante.

Aparte de les inundaciones y los argayos provocaos pol fenómenu d'El Niño yá mentáu, el país ye propiciu a sufrir terremotos. En cambiu l'actividá volcánica ye pocu importante.

Historia[editar | editar la fonte]

El territoriu del actual Perú foi l'escenariu onde se desenvolvieron varies cultures pre-incaiques, como la Chavín, la Mochica, la Nasca la Chachapoyas, la Huari y la Tiahuanuco. Estes civilizaciones tuvieron gran influencia nos inques, que crearon el imperiu más importante d' América del Sur, con capital en Cusco.

La llegada en 1532 de Francisco Pizarro punxo fin al imperiu inca en malapenes tres años, cola batalla de Cajamarca y posterior asesinatu del emperador Atahualpa.

El sieglu XVII marca l'apoxéu del Perú colonial, cola creación del Virreinatu de Perú, que comprendía, amás de les audiencies de Lima, Santa Fe de Bogotá, Quito, Panamá, Chile, Buenos Aires y Charcas. Lima foi nesta dómina un de los centros de la cultura americana cola creación de la so universidá y de tres colexos reales. Mines como la de Potosí convirtieron al virreinatu na mayor fonte d'oru y plata del imperiu español y arriquecieron a la corte colonial.

Nel sieglu XVIII entamó la escayencia de Perú, col restablecimientu del virreinatu de Nueva Granada (1739) y la creación del de Río de la Plata (1776), que -y menguaron la importancia de Lima como capital. El fenómenu viose agraváu poles estroces provocaes por terremotos como'l de 1746. Nesti mesmu sieglu tienen llugar les revueltes indies de Juan Santos Atahualpa (1742-1756) y Túpac Amaru (1780)

Perú declarose independiente d'España el 28 de xunetu de 1821, gracies a una alianza ente los exércitos de José de San Martín y de Simón Bolívar.

Ente 1836 y 1839 Perú y Bolivia axuntáronse nuna confederación que se disolvió tres d'un conflictu armáu con Chile y Arxentina.

A finales del sieglu XIX, pola mor del Tratáu de defensa mutua robláu con Bolivia en 1873, Perú viose involucráu na guerra del Pacíficu ente Bolivia y Chile. Tres d'esta guerra, entamó una época de reconstrucción nacional y de calma relativa.

Nel sieglu XX, el país conoció golpes d'estáu y una gran inestabilidá económica y social.

Na década de 1980, tres doce años de réxime militar, Perú volvió a la democracia. Pero estos años tuvieron marcaos pola agravación de la economía y les acciones guerrilleres de Sendero Luminoso y del movimientu revolucionariu Tupac Amaru.

En 1990 la política d'austeridá Alberto Fujimori, elixíu presidente col 62.5 % de los votos frente a Mario Vargas Llosa, permitió'l crecimientu económicu del país. La so popularidá medró sobremanera tres de l'arrestu d'Abimael Gumán Reynoso, cabezaleru de Sendero Luminoso. Pero la corrupción del so gobiernu y l'autoritarismu lleváronlu a perder el poder en 2000. Sustituyólu l'economista Alejandro Toledo Manrique en 2001, Alan García Pérez en 2006 y Ollanta Humala en 2011.

En 2004 Perú foi l'anfitrión de la nacencia de la Comunidá Suramericana de Naciones.

Política y gobiernu[1][editar | editar la fonte]

La República del Perú tien una sistema de gobiernu presidencialista, unitariu y descentralizáu. La so Constitución democrática de 1979 foi suspendida de magar, el 5 d'abril de 1992, el presidente Alberto Fujimori, col sofitu de les fuerces armaes, peslló el Congresu bicameral, destituyó a los miembros del poder xudicial y a los de los organismos autónomos de control del estáu, y asumió tolos poderes como cabezaleru d'un gobiernu que denomó de Emerxencia y Reconstrucción nacional. El 22 de payares de 1992 escoyose'l denomáu Congresu Constituyente Democráticu, que desempeñó les sos funciones hasta xunetu de 1995, fecha na qu'acababa tamién el mandatu llegal de Fujimori, elexíu el 10 de xunu de 1990, como presidente. El 31 d'ochobre de 1993, col 52,9% de los votos a favor y el 47,1% en contra, aprobose en referéndum una nueva Constitución, que caltién el 65% de los artículos de l'anterior y presenta, como principales novedaes, la introducción de la pena de muerte pa los delitos de terrorismu, la posibilidá de reelección presidencial una única vegada y la conformación d'un congresu unicameral con 120 parllamentarios. Entró en vigor el 1 de xineru de 1994. Esta Constitución foi reformada dempués en 2000, 2004 y 2005. Nuna de les reformes inclúise la imposibilidá de la reelección presidencial inmediata.


El gobiernu del Estáu divídese en tres poderes:

  • El Presidente de la República, elixíu por periodos de 5 años, exerce'l poder executivu. Ta aidáu, pal desempeñu de les sos funciones, por un conseyu de ministros.
  • El poder llexilativu reside nel Congresu ( Congreso ), un parllamentu unicameral compuestu de 120 congresistes elixíos cada 5 años.
  • El poder xudicial ta constituíu pola Corte Suprema, con sede en Lima, les Sales Superiores (Sala superior) en cada distritu xudicial, los xueces de primera instancia ( juez de primera instancia ) en cada provincia y los xueces de paz ( juez de paz ) en cada distritu.


El presidente de la República ye, dende'l 28 de xunetu de 2011, Ollanta Humala. El presidente del congresu ye Ana María Solórzano y el del conseyu de ministros Ana Jara. Formen parte d'elli los siguientes ministerios y persones:

  • Economía y Finances: Luis Miguel Castilla Rubio.
  • Rellaciones Esteriores: Gonzalo Gutiérrez Reinel.
  • Defensa: Pedro Cateriano Bellido.
  • Interior: Daniel Urresti Elera.
  • Xusticia: Daniel Figallo Rivadeneyra.
  • Comerciu Esterior y Turismu: Blanca Silva Velarde-Álvarez.
  • Educación: Jaime Saavedra Chanduví.
  • Salú: Midoride Habich Rospigliosi.
  • Enerxía y Minas: Eleodoro Mayorga Alba.
  • Muyer y Desarrollu Social: María del Carmen Omonte Durand.
  • Producción: Piero Ghezzi Solís.
  • Trabayu y Promoción del Empléu: Fredy Otárola Peñaranda.
  • Tresportes y Comunicaciones: José Gallardo Ku.
  • Secretaría de la Infancia y la Adolescencia: Carlos Paredes Rodríguez.
  • Vivienda y Construcción: MiltonVon Hesse La Serna.
  • Agricultura: Juan Benites Ramos.
  • Mediu Ambiente: Manuel Pulgar-Vidal Otálora.
  • Cultura: Diana Álvarez Calderón Gallo.
  • Desarrollu Social y Inclusión: Paola Bustamante Suárez.


Los principales partíos políticos peruanos son :

  • El Partido Aprista Peruano (PAP) , tamién conocíu col nome antiguu de Alianza Popular Revolucionaria Amreicana (APRA), algamó 36 escaños nes mesmes eleiciones. Fundóse en 1924, y anguaño ta dirixíu pol actual presidente Alan García Pérez
  • Partido Nacionalista Peruano ( PNP ), "Gana Perú" que sacó 45 escaños nes eleiciones de 2011. Ye'l partíu de Ollanta Humala.
  • Unión por el Perú ( UPEP ), que sacó 45 escaños nes eleiciones de 2006.
  • Unidad Nacional , fundáu en 2000 por Lourdes Flores Nano, cuenta con 17 escaños.
  • Alianza por el Futuro, que sacó 13 escaños nes eleiciones de 2006. Ye'l partíu del ex-presidente, Alberto Fujimori.
  • Perú Posible ( PP ), que sacó 2 escaños nes eleiciones de 2006. Ye'l partíu del ex-presidente, Alejandro Toledo Manrique.

Demografía[2][editar | editar la fonte]

La población del país ye, según la estimación pal 2011 del Instituto Nacional de Estadística e Informática, de 29.797.694 habitantes. Según esi organismu, la distribución de la población por grupos étnicos nel 2007 yera la que vien darréu: mestizos, 57,6%; quechuas, 22,5%; blancos, 4,8%; aymarás, 2,7%; indíxenes de l'Amazonia, 1,7%; negros y mulatos, 1,5%; y xente d'otros grupos étnicos, 9,1%.

Les mayores ciudaes del país son les que vienen darréu. Toes les cifres correspuenden a la población del 2007, y la población recoyida embaxu l'epígrafe Lima compriende la población de la provincia de Lima y la Provincia Constitucional del Callao:

Ciudá Población
Lima 8.472.935
Arequipa 749.291
Trujillo 682.834
Chiclayo 524.442
Piura 377.496
Iquitos 370.962
Cusco 348.935
Chimbote 334.568
Huancayo 323.054
Tacna 242.451


Cultura[editar | editar la fonte]

Señor de los Milagros de Nazarenas

La cultura popular peruana ye'l resultáu de l'amestadura de diferentes cultures, principalmente la incaica y la hispánica. Pero esta cultura tamién arriqueció coles aportaciones d'otros pueblos asentaos nel país a lo llargo de la historia: africanos, asiáticos y otros países europeos.

Exemplos d'esta riqueza son la gastronomía, la música y la danza.

Gastronomía[editar | editar la fonte]

Perú cuenta con una de les gastronomíes más variaes del mundu. Por exemplu, na costa peruana hai más de 2.000 recetes diferentes de sopes, y en tol país conócense alredor de 250 postres tradicionales. Les causes d'esta gran variedá son la diversidá xeográfica de Perú, le mezcla de races y cultures y la adaptación la cocina moderna.

Ente les materies primeres usaes nesta cocina destaquen les que vienen darréu:

  • el pescáu ( Perú ocupa'l primer llugar mundial en variedá de pexes, con más de 2 000, ente especies marines y de ríu).
  • el maíz ( 35 ecotipos )
  • el tomate ( 15 especies )
  • la pataca (4 000 variedaes )
  • la batata ( Con más de 2000 variedaes, Perú produz el 65 % del total mundial).
  • les frutes ( más de 650 especies )
  • la mandioca.
  • la quinua.
  • l'amarantu.


Ente los platos más conocíos de la gastronomía peruana destaquen la pachamanca na fastera andina y el ceviche na costa.

Les bebíes típiques son el pisco, y la chicha. La principal zona productora de vinu ye la Rexón d'Ica .

Música y dances[editar | editar la fonte]

La riqueza cultural de perú vese tamién nes dances y na música. En delles rexones, como Cusco, la variedá ye tala, que cada pueblu tien el so baille típicu, na mayoría de los casos d'orixe precolombín.

La marinera, coles variantes de Lima y de Trujillo, ta considerada la danza nacional de Perú. El huayno (o huayñu ) ye la danza más conocida de los Andes .

Llingües de Perú[editar | editar la fonte]

Perú ye un país multillingüe. La Constitución reconoz como oficiales l'español, el quechua, l' aymara y les demás llingües autóctones nes fasteres onde son mayoritaries. Convien amestar a estes llingües les d'otres comunidaes d'emigrantes extranxeros asentaos nel país.

  • L'español ye anguaño l'idioma más estendíu en Perú. Nel país puen estrémense tres variedaes dialectales (peruanu ribereñu, andinu y amazónicu).
  • Delles llingües autóctones tienen gran vitalidá nos Andes centrales (quechua, aymara, jaqaru, kawki ) y na selva amazónica ( asháninka, aguaruna ). Anguaño considérase qu'esisten en Perú 14 families llingüístiques y varies llingües aislaes y inclasificables, munches d'elles en peligru d'estinción. Sicasí, esta cifra ye sólo una parte de les más de 3O0 que s'emplegaben nel territoriu antes de la Conquista.
  • Ente les Llingües foriates aportaes polos emigrantes destaquen el chinu ( dialectu cantonés), el xaponés y, en menor midida l'alemán, l'árabe y l'hindi ( dialectu urdú ).

Lliteratura[editar | editar la fonte]

La primera muestra de la lliteraria peruana ye la obra dramática Ollantáy, escrita en quechua y d'autor desconocíu.

Nel sieglu XVII, los Comentarios reales de los incas de Garcilaso de la Vega l'inca (1539-1616) son una prueba de la mestura entre la tradición autóctona y la cultura española. Nesti mesmu sieglu, en 1583 ta fecháu'l primer llibru impresu en Perú.

Nel sieglu XVIII, Pedro de Peralta Barnuevo ( 1663 - 1743) escribió la epopeya Lima fundada o Conquista del Perú ( 1711) y delles obres de teatru inspiraes de Corneille, Molière y Calderón.

Na época republicana alcontramos dellos narradores d'ideoloxía conservadora, como Felipe Pardo y José Antonio de Lavalle qu'evoquen el Perú colonial con una cierta señaldá. El tratamientu d'esta mesma época tien un calter más irónicu en Tradiciones peruanas de Ricardo Palma (1835-1919) .

Nel sieglu XX destaquen la figura del poeta César Vallejo (1892-1938) y les de los autores indianistes Ciro Alegría (1909 - 1967) y José María Arguedas (1911 - 1969).

Ente los narradores contemporáneos, los principales son Julio Ramón Ribeyro (1929 - 1994), Alfredo Bryce Echenique y Mario Vargas Llosa.

Economía[editar | editar la fonte]

Perú cuenta con importantes recursos naturales. La so economía ta basada na esplotación de minerales como la plata (tercer productor mundial), el cinc (cuartu pustu), l'estañu (quintu ) y el cobre (octavu).

En 1983 descubrióse en Camisea (rexón de Cusco ) un importante xacimientu de gas natural. Esti gas esplótase principalmente pa consumu internu, anque hai un proyectu de construcción d'un gaseoductu ente Pisco y Chile, que permitiría la esportación a otros países d'América.

La agricultura ta concentrada mayormente en delles zones fértiles de la costa. Los principales cultivos son la caña d'azucre y l'algodón. Na sierra destaca la producción de maíz, cereales , pataques y, en dellos valles, cacáu, , y café. La esplotación de la madera y del cauchu na selva vese dificultada pola falta d'accesos. Na costa destaca tamién l'actividá pesquera, na que Perú ocupa ún de los primeros puestos a nivel mundial.

L'actividá industrial ta concentrada nos alredores de Lima. Los sectores más importantes son el testil, la alimentación, los astilleros, los neumáticos el cementu y los productos farmacéuticos.

Los principales países destinatarios de les esportaciones peruanes son Estaos Uníos ( 25 % en 1997 ), China ( 8 %) y Xapón ( 7 % ).

Na década de 1990, Perú lliberalizó la so economía y privatizó les empreses mineres, eléctriques y de telecomunicaciones. Nos caberos años d'esta década, el país sufrió les repercusiones de la crisis asiática y del impactu del Niño na agricultura.

Nos últimos años, la economía peruana evolucionó favorablemente cola disminución de la inflacción y del déficit presupuestariu, l'aumentu de les esportaciones y l'alza del cursu mundial del oru y del cobre. Sicasí, el crecimientu de la economía creó pocos empleos y la probitú sigue afectando a bona parte de la población: según les cifres de 2001, el 54 % de los peruanos viven pembaxo del nivel de probitú y el 24 % na estrema probitú.

Enllaces esternos[editar | editar la fonte]

Perú
Wikimedia Commons tien archivos rellacionaos con:

Referencies[editar | editar la fonte]

  1. Los datos recoyíos nesti apartáu tán sacaos del Anuario Iberoamericano 2012 del Real Institutu Elcano y l'Axencia Efe. Disponible en http://www.anuarioiberoamericano.es/
  2. Los datos recoyíos nesti apartáu tán sacaos del Anuario Iberoamericano 2012 del Real Institutu Elcano y l'Axencia Efe. Disponible en http://www.anuarioiberoamericano.es/


Países d'América
Antigua y Barbuda | Arxentina | Islles Bahames | Barbados | Belize | Bolivia | Brasil | Canadá | Chile | Colombia | Costa Rica | Cuba | Dominica | República Dominicana | Ecuador | Estaos Xuníos d'América | Granada | Guatemala | Guyana | Haití | Hondures | México | Nicaragua | Panamá | Paraguay | Perú | El Salvador | Saint Kitts y Nevis | Saint Lucia | Saint Vincent y les Granadines | Surinam | Trinidad y Tobago | Uruguay | Venezuela | Xamaica

Dependencies: Anguilla | Islles Bermudes | Islles Caimán | Clipperton | Guadalupe | Guyana Francesa | Groenlandia | Islles Malvines | Islles Turques y Caicos | Montserrat | Martinica | Puerto Rico | Shag Rocks | Xeorxa del Sur y Sandwich del Sur