Cangas del Narcea

De Wikipedia
Saltar a: navegación, buscar
Wikipedia:Artículos destacaos
Cangas del Narcea
Bandera de Cangas del Narcea Escudu de Cangas del Narcea
(Bandera de Cangas del Narcea) (Escudu de Cangas del Narcea)
Cangas del narcea ayuntamiento.JPG
Casa del conceyu de Cangas del Narcea
Llocalización
Coordenaes 43°7′1.2″N 6°34′44.4″W
Cangas del Narcea Asturies map.svg
Abreviatura: Cn
Xentiliciu: cangués, -esa, -eso
Xeografía
Comunidá Flag of Asturias.svg Asturies
Comarca Fontes del Narcea
Mancomunidá Suroccidental
Partíu xudicial Cangas del Narcea
Capital
 • Población
Cangas del Narcea
6.757
Parroquies 52 parroquies
Fundación
Superficie
 • Total
 • % agua

823,57 km²
n/d
Población
 • Total
 • Densidá

13.213 (2016)
16,04 hab./km²
Mayor altitú El Cuetu d'Arbás 2.007 msnm
Menor altitú Ríu Narcea 260 msnm
Códigu postal 33800-33819
Fiestes mayores Fiestes del Carme (xunetu)
Patrón Santiago Apóstol
Patrona San Xuan Bautista
Política (2015)
Alcalde/esa José Víctor Rodríguez Fernández (PSOE)
Presupuestu n/d
Sitiu web oficial
http://www.ayto-cnarcea.es/ -
Subdivisiones d'Asturies

Cangas del Narcea, n'asturianu simplemente Cangas, ya'l mayor conceyu d'Asturies ya ún de los mayores d'España. Ta al.lugáu nu sudoeste asturianu. La súa capital ya Cangas del Narcea, que ta travesada pol ríu Narcea del que remanez el sou nome (garganta del Narcea) ya pol ríu Naviegu. L.lenda'l norte con Allande ya Tinéu, al oeste con Ibias, al sur con Degaña ya'l conceyu llionés de Ḷḷaciana, ya pol este con Somiedu.

Tien una población de 15.437 habitantes, con capital na vil.la de Cangas, ya las suas poblaciones con mayor númaru d'habitantes son por esti orde, la capital Cangas, Courias, Ḷḷumés, Mual, El Ḷḷanu, El Pueblu y Xedré. La súa capital ta a una distancia de 90 quilómetros d'Uviéu, ya la súa principal vía de comunicación ya la carretera autonómica de la chamada corredoira del Narcea.

Xeografía[editar | editar la fonte]

El Plan d'Ordenación de los Recursos Naturales d'Asturies (Porna), pretende un emplegu l.lendáu ya con xeitu del territoriu cangués pa la conservación de los sous ecosistemas. Nesti plan contémplase la creación del Parque Natural de las Fontes del Narcea ya d'Ibias, con una superficie de 555 km², ya nas súas l.lindes incluinse: La Reserva Natural de Munieḷḷos, que tien la mayor masa forestal de carbayos ya rebol.los de tola Cornisa Cantábrica, ya la Reserva del Cuetu d'Arbas.

El picu cimeiru ya'l Cuetu d'Arbas, con 2007 metros d'altor, asitiáu nu Puertu, ou puertu de Lleitariegos, otru picu d'interés ya El Cabril, con 1925 metros d'altor.

Hidrografía[editar | editar la fonte]

Dáu'l sou relieve accidentáu con val.les zarraos orixinaos pol ríu Narcea, ya una gran rede d'afluentes, ente los que rescamplan el Coutu, l'Irrondu ya'l Naviegu, la súa rede hidrográfica (que ronda los 300 km³ de caudal), ya perfeuta pa la práutica de la pesca.

Azor nalando.

Clima[editar | editar la fonte]

El so clima ya templáu ya chuviegu. Teniendo una vexetación au predomina una masa forestal propia con abondos carbayos, castaños, rebol.los ya fayas. Enguanu bona parte de estas viescas tán medrando ya recuperando tarrén pol abandonu rural.

Cangas tién un microclima gracias a la influyencia continental, polo que los sous iviernos carauterízanse por ser fríos con mínimas absolutas de hasta -19ºC. Los branos al aviesu del restu d'Asturies son calurosos nos que son muitos los días con máximas alrodiu ou superiores a 30ºC, llegando del.los días del branu a marques superiores o mui cercanas a los 40ºC. Yá que a la zona chegan los frentes menos cargaos d'humedá ya la disposición del val.le del Narcea (norte-sur) ta escontra los frentes ñubosos (oeste-leste), prodúzse nel conceyu l'efeutu foehn, colo que las chuvias rexistradas son sensiblemente menores a las del restu d'Asturies, alrodiu los 900mm por anu, un 30% menos que nu restu la Comunidá. Amás la radiación de la zona ya sensiblemente superior yá que los días soliaos son claramente superiores al restu'l país. Toos estos rasgos climatolóxicos repercuten na vexetación, polo que la presencia de fayas, dependiendo de la orientación de cada val.le, se dividen el espaciu conos rebol.los Quercus pyrenaica, Quercus petraea ya Quercus orocantabrica. El vinu atopa en Cangas un sitiu afayaizu tanto n'aspeutu edáficu como climatolóxicu con variedades adaptadas a las particularidades climáticas del surdoccidente asturianu.

Fauna[editar | editar la fonte]

Nu conceyu podemos atopar bayura d'aves rapiegas, ente las qu'hai del.las asiduas como'l gavilán, l'azor, el morzacu, dellos tipos d'aiglas, del.las curuxas, arriendas d'outras que chegan eventualmente comu la utra exipcia ou la utra rubia qu'agora tien los sous níus nu vecín Somiedu anque tamién tuvienon zonas de cría en Cangas nu SXX. Tamién atopamos perdices, esistiendo principlamente dos menas de perdiz na zona, la especie mediterránea de perdiz bermeya, ya la eurosiberiana perdiz de gancéu, nos altos ya penaubales.

Hai muitos Mustélidos, que muran nos soutos ya tamién nas l.lindes de los ríos: melandru, muniel.la, fuina, furón, l.lóndrigas, ya un vivérridu: xeneta. Tamién el endemismu peninsular toupu fediondu. Esti conceyu tien un centenar de quilómetros de riberas, principalmente las del ríu Narcea, calteniendo asina una rica fauna fluvial, destacando la truita. Anantias de que l.levantaran los banzaos de Pilutuertu ya Calabazos, el salmón ya l'anguila caltenían importantes poblaciones, siendo la última muito importante na gastronomía canguesa, destacando la empanada d'anguila como pratu típicu cangués que güei solo recuerdan las xeneraciones previas a los grandes banzaos. Hai una gran diversidá d'anfibios asociada a viescas, l.lagunas, regueiros ya ḷḷamargales nu conceyu cumu la sacavera cantábrica (Salamandra salamandra bernardezi), l'ascurpión (Triturus marmoratus), la sacavera de braña (Ichthyosaura alpestris cyreni) ya la sacavera d'augua ibérica (Lissotriton boscai). Na redolada los ríos tán aves como'l páxaru d'augua, el martín pescador ou la mariquita.

Historia[editar | editar la fonte]

Prehistoria ya dómina romana[editar | editar la fonte]

El conceyu nun tien una asemeyadura n'esquicios del paleolíticu colos conceyos vecinos que sí los tienen, asina los tumulos que nos conceyos llendantes son bayurosos, eiquí malpenas hailos.

Los más arcaicos ḷḷugares onde fonon atopaos restos correspuenden a la Edá de Fierro ya la Cultura Castreña, que ta representada con más de venti asitiamientos de gran importancia, con abondantes restos del trabayu del ouru que se puen agrupar en tres conxuntos: en primer ḷḷugar el del vaḷḷe del ríu Eirrondu, en segundu ḷḷugar cerca del caudal del Narcea ya un tercer ḷḷugar xuntu al ríu Ibias, onde s'atopanon restos de monedas ya xarros que completan las pruebas de la presencia romana nesta estaya. Cangas taba ocupada polos astures pésicos, que ocupaban igualmente los outros conceyos d'Asturias onde güei se fala asturianu occidental.

Despuéis de la caida del Imperiu, hai yá un ermu que chega deica'l medievu, onde yá entamamos a alcontrar noticias d'esti territoriu, inda conocíu nestoncias como parte de la Rexón Pésica, con una configuración territorial muito diferente de la que tien anguanu'l conceyu, yá que nun primer momentu la so estensión acotábase al vaḷḷe del ríu Naviegu. D'outra miente creese que nos sieglos X y XI había nesta zona abonda aristocracia con grandes propiedades que fundanon monesterios. Toos estos pequenos monesterios caenon baixo'l predominiu del de Courias, que tuvo una gran influyencia na historia d'esti conceyu. Foi fundáu polos condes Piñolo ya Aldonza, pertenecientes a la más influyente nobreza asturiana, con una gran fortuna tanto en tierras como en cuartos.

Edá media ya moderna[editar | editar la fonte]

Nu sieglu XIII, foi Alfonsu X el que conu sou programa de repoblación, funda una puebla que chaman Cangas de Sierra en 1255, centralizándose ehí l'actividá alministrativa ya económica d'esta faza.

La baixa Edá Media trouxo pal conceyu de Cangas el pasu por muitas manos señoriales, como un xeitu de traer el sofitu d'éstos a la corona. Foi Alfonsu XI el que dou una serie de privilexos a la xente de la zona yal monesteriu de San Xuan de Courias, pa torgar el despoblamientu de la fastera.

Los sieglos XIV y XV, tán marcaos por estremadas menas de ḷḷuitas, hasta cayer el conceyu en manos de la poderosa familia Quiñones, siendo restituyíu más tarde a la corona por Enrique III, pero inda asina houbo garradieḷḷas ente los correxidores mandaos pola corona ya la familia Quiñones, qu'agora tinían el condáu de L.ḷuna, qu'acaba nun pleitu que sedría iguáu en 1553 a favor del rei, algamando Cangas la súa autonomía, con xurisdicción ordinaria de realengu.

La Edá Moderna trairá grandes cambeos, tanto territoriales como alministrativos, rescamplando la desamortización de Felipe II que nun foi a esbarrumbar el podeiríu del monesteriu de San Xuan de Courias, que yá fuera perdiendo influyencia ya deḷḷas tierras nos anos anteriores, pero que siguía teniendo influyencia sobre un territoriu muito grande.

Nos sieglos XVI y XVII, el conceyu de Cangas pasa a formar parte de la Xunta Xeneral. Nesti sieglu, la dedicación del conceyu ye principalmente ganadera ya agrícola.

Nel sieglu XVIII, hai que rescamplar una actividá antiseñorial polos abusos cometíos pola nobleza, mandando un memorial al rei con tolas queixas, esti foi un ḷḷargu procesu que continuará na Audiencia d'Ouviéu ya nel Conseyu de Castieḷḷa, hasta algamar el desaniciu de tolos dreitos señoriales.

Sieglu XIX n'adelantre[editar | editar la fonte]

Vista de Cangas del Narcea.

El sieglu XIX, trai la guerra de la Independencia Española yal conceyu foi invadíu dúas vegadas, cona queima del sou archivu ya Casa Conceyu. Pero lo más importante d'esta dómina foi la desamortización de Mendizábal, qu'acabóu dafeitu conu monesteriu de San Xuan de Courias, vendiéndose tol sou patrimoniu ya quedando'l monesteriu abandonáu demientres treinta anos, hasta que foi outra vuelta ocupáu por una comunidá de dominicos. Nesti sieglu Cangas siguía dientro del so tradicional aisḷḷamientu, enantáu pola falta del ferrocarril, anque la viḷḷa de Cangas emprecipió a medrar por mor d'outra mena de comunicación como fonon las carreteras: La Espina-Ponferrada, Cangas-Ouviñana, ya la Ponte Nueva.

El sieglu XX, traerá nos sos comienzos un cambéu de nome: la corporación de Cangas de Tinéu camúdala por Cangas del Narcea, yá que la viḷḷa ya yá'l centru de tou esti territoriu ya nun quier tener una dependencia de Tinéu. La guerra civil española nun influyóu en Cangas tanto como la posguerra, porque nestos ḷḷugares las partidas de guerrilleros republicanos siguiríen resistiendo. De magar los años cincuenta esti conceyu desendolcará la sua actividá minera produciendo más de la metá de la producción asturiana d'antracita, que nas décadas caberas d'esti sieglu trouxo un fuerte recorte na sua producción, chegándose a un amenorgamientu del 50% nel 2005 polos planes de reconversión ya la situación actual na que solo una mina sigue abierta.

Cadarma político-alministrativa[editar | editar la fonte]

Política[editar | editar la fonte]


PSOE AP/PP PCE/IX-BA UCD/CDS URAS PAS UCA Otros Total
1979 1 3 2 9 - - 5 1 21
1983 7 5 6 - - - - 3 21
1987 10 3 3 5 - - - 0 21
1991 11 6 3 0 - 1 - 0 21
1995 8 6 2 0 - 1 - 1 17
1999 9 5 1 - 1 0 - 1 17
2003 7 7 2 - 1 0 - 0 17
2007 8 6 3 - 0 - - 0 17
2011[1] 4 5 6 - 0 - - 2 17

Nel conceyu de Cangas del Narcea, dende 1979, el partíu que más tiempu tien gobernao ye'l PSOE de la mano de José Manuel Cuervo Fernández, que gobernó dende 1983 hasta 2007 (ver Llista d'alcaldes de Cangas del Narcea). En 2007, llegó a l'alcaldía IX, el grupu con menos representación política del conceyu. Esti fenómenu, diose gracies al sofitu de los 6 conceyales del PP, que sumaos a los 3 de IX, superaben a los 8 del PSOE. José Manuel Cuervo Fernández, candidatu del PSOE y ex-alcalde, dende'l primer momentu manifestó la so intención de gobernar en solitariu, anque darréu d'ello empezara a negociar con IX pero ensin enfotu, rompiéndose les negociaciones al poco, lo que-y acabaría costando'l bastón de mandu. Esti inesperáu pautu punxo en riesgu les negociaciones p'algamar un gobiernu de coalición ente IU y PSOE na Xunta Xeneral, (anque finalmente nun se fexo) y motivó la espulsión del partíu del candidatu d'IX y a los otros dos compañeros de partíu, tal como esixó'l PSOE pa retomar les negociaciones a nivel autonómicu, anque dichu partíu aprovecharía esta situación pa romper unes negociaciones que se taben llevando a disgustu de Javier Fernández (secretariu xeneral de la FSA). Esti nuevu gobiernu parte con bastantes torgues al ser gobernáu cásique n'esclusiva polos 3 ex-conceyales d'IX y tener que contar col sofitu de los 6 rexidores del PP p'aprobar les sos propuestes.

Fontes: Ministeriu d'Interior Español y Federación Asturiana de Concejos

Parroquies[editar | editar la fonte]

El conceyu de Cangas del Narcea ta xebráu en 54 parroquies:

Flag of Asturias (indoor).svg Parroquies de Cangas del Narcea Escudo de Cangas de Narcea.svg
Adralés | Ambres | Abanceña | Auguera | Bergame | Berguñu | Bimeda | Bisuyu | Brañas | Cangas del Narcea | Carbachu | Carceda | Castañéu | Cibea | Cibuyu | Courias | Fontes de Corveiru | Larna | Las Montañas | La Riela | Ḷḷarón | Ḷḷinares | Ḷḷumés | Maganes | Mieldes | Monesteriu d'Ermu | Naviegu | Noceda | Oubachu | Ounón | Piñera | Pousada de Rengos | Robléu de Teinás | Samartín de Sierra | San Cristóbal | San Pedru d'Arbas | San Pedru Culiema | Santiáu de Sierra | Santianes | Santa Marina | Santolaya | San Xulianu | Trones | Tubongu | Veiga de Rengos | Veigaḷḷagar | Viḷḷacibrán | Viḷḷalái | Viḷḷarmental | Viḷḷatexil | Xarceléi | Xedré | Xinestosu | Xichón

Demografía[editar | editar la fonte]

Gráfica de población de Cangas del Narcea (Asturies)
Fonte: Instituto Nacional de Estadística d'España - Fechura de la gráfica por Wikipedia


Tien les mesmes carauterístiques que munchos conceyos rurales asturianos, como pue ser la so incapacidá pa caltener la so población y un éxodu hacia les zones industrializaes del centru d'Asturies.

Esti conceyu tien una peculiaridá y ye qu'al tar tan separtáu del centru, el so éxodu rural nun comenzara cuando yá taba entamada n'otros conceyos, polo qu'equí se retrasa ya incluso foi munchu más lentu, llegando la so capital a tolo contrariu, na década de los 70 amparada pola so actividá minera, que taba en gran auxe daquella. Incluso anguaño la so capital sigue medrando llegando a tener más de 9.000 habitantes y rondando la categoría de pequeña ciudá, anque xeográficamente se pue considerar como tal yá que pertien tolos servicios d'una gran ciudá (hospital, xulgáu, facienda, conseyeríes...), la capital ye un puru núcleu de servicios asitiáu ente los 10 núcleos mas urbanos y grandes d'Asturies, actúa como una auténtica capital del suroccidente, encadarmando esti y llegando a ser el núcleu urbanu más grande del occidente, Cangas capital estiende'l so arcu d'influyencia pol restu del occidente asturianu y la comarca de Ḷḷaciana. La capital tien cuadruplicada la so población en contraposición col restu del conceyu que foi teniendo una emigración hacia estremaos puntos como foron Arxentina, Madrid y el centro industrial d'Asturies.

Anguaño güeyase ciertu retornu de los emigraos, especialmente de los madrilanos tres la xubilación. Rescamplar que'l númberu d'habitantes del conceyu sigue baxando (actualmente a un ritmu normal) y espérase que práuticamente s'estabilice nos prósimos años, a pesar del baxón esperimentáu calificáu por dalgunos seutores como allarmante nun pue ser calificáu como tal yá qu'otros conceyos mineros de la cuenca minera central tien esperimentao un despoblamientu mayor tando entá munchu más cerca o incluyíos nel área metropolitana central asturiana.

Con too esto, Cangas del Narcea tien una cadarma demográfica de les más moces y con una tasa de natalidá que ye de les más altes d'Asturies, siendo tou esto por mor de la so esplotación minera qu'anque ta en fuerte retrocesu proporciona más del 30% del emplegu, anque ta previsto que pal 2005 habrá un amenorgamientu del 50% de puestos de trabayu polos nuevos planes de reconversión.

Economía[editar | editar la fonte]

Arriendes del seutor mineru, Cangas del Narcea pertien un importante seutor ganaderu y agrícola, siendo tamién de mención la so producción vinícola de fechura artesanal, pero que, nel casu de la industria agropecuaria, tamién ta en retrocesu.

Nun ye asina'l casu del seutor vitivinícola que tien apostao por una producción de calidá basada nes variedaes tradicionales d'uva.

El futuru económicu de Cangas del Narcea depende de la cada vegada mayor afluencia de turistes que visiten les cais de la Villa amás del bayurosu patrimoniu cultural y ecolóxicu repartíu a lo llargo de tol conceyu.

Como cumal d'esti xiru hacia'l turismu alcontramos la inauguración del Parador Nacional de Courias que se fadrá nel añu 2010 y del que les obres yá entamaron, sedrá'l mayor parador d'Asturies.


Emplegaos nos diversos sectores económicos (añu 2010)
Númberu de trabayadores Tantu por cientu
TOTAL 4.876 100
Agricultura, ganadería y pesca 982 20,14
Industria 446 9,15
Construcción 633 12,98
Servicios 2.815 57,73
* Datos tomaos del Anuariu Estadísticu d'Asturies 2010, SADEI


Usos del suelu del conceyu (añu 2010)
Usu Superficie (km²)
Tierres de llabrantíu 4,25
Praderíes 180,75
Terrenu forestal 426,37
Otros usos (industrial, residencial, tierra ermo...) 212,20
* Datos tomaos del Anuariu Estadísticu d'Asturies 2010, SADEI


Carauterístiques del sector primariu (añu 2010)
Ganaderíes de bovín 991
Cabeces de ganáu bovín 24.300
Cabeces de ganáu ovín 1.843
Cabeces de ganáu cabrín 604
Ganaderos con cuota llechera 2
Quilos de cuota llechera 156.547
Metros cúbicos de madera valtao 5.691
* Datos tomaos del Anuariu Estadísticu d'Asturies 2010, SADEI

Cultura[editar | editar la fonte]

Arte y patrimoniu[editar | editar la fonte]

Tien bayura monumentos, repartíos entre ilesies, palacios, y casones, ente les que rescamplen:

  • La colexata de Santa María Magdalena, allugada na villa de Cangas del Narcea, d'estilu barrocu. La fachada da idea de superficie plana rematada por dos torres con teyáu de pizarra. La portada principal con arcu de mediu puntu y con una fornina que tien la imaxe de la Madalena, fina nun tímpanu col escudu del fundador, l'arzobispu de Granada nacíu en Cangas, don Fernando de Valdés. L'interior ye d'una sola nave, con capielles llaterales, cruceru y cabecera plana. Ta abovedada dafechu y con cúpula nel centru del cruceru.
  • El palaciu d'Omaña, ta asitiáu na villa xuntu a la Plaza Mayor, ye del sieglu XVI, siendo reformáu posteriormente. De la so cadarma orixinal conserva la puerta con arcu de mediu puntu y los escudos familiares. Nos sieglos XIX y XX, foi modernizáu con ventanes, un mirador y dos puertes.
  • El palaciu de los Llano. De finales del sieglu XVIII rescampla polos balcones en púlpitu qu'ornien la so fachada principal. Otros elementos d'interés del Palaciu de los Llano ye'l gran salón na primer planta y les puertes en madera llabrao y policromao de les sos dependencies.
  • El Monesteriu de Courias, edificiu grandiosu tamién nomáu l'Escorial Asturianu, ye Monumentu Histórico-Artísticu. La so creación remontase al sieglu XI, d'esa primer construcción queden dellos restos, pero foi nel sieglu XVII, onde se reemplaza por un gran templu renacentista d'estilu herrerianu, fechu por Domingo de Mortera. Ye de planta de cruz llatina con llarga nave, capielles llaterales, cruceru y ampliu presbiteriu. Nes intersecciones ente nave y cruceru hai una cúpula sobre pechines iluminada por una llinterna. El so interior ye severu pero con un guapu tratamientu colorista qu'estrema los elementos estructurales y les zones cubiertas con cal. Tamién equí hebo una evolución d'estilos pasando de l'austeridá del clasicismu al recargu del barrocu y esto vese nes capielles, el coru, los presbiterios y en xeneral en tol templu de Courias, enllenándose los altares de talles de madera, retablos, silleríes, etc. El so retablu mayor y los sos llaterales considerense ún de los meyores del barrocu n'Asturies. El monesteriu sufrió un fueu y foi reconstruyíu en 1763, por Miguel Ferro faciendo un gran edificiu rectangular de mena neoclásica, distribuyendo toles sos dependencies alredor de dos patios, quedando la ilesia oculta nún de les sos ales, namás resaltando n'altura'l frontón de la so fachada, que ye de cuatro altures, onde se repiten de forma monótona balcones y ventanes. El monesteriu foi restauráu de nuevo en 1986.
  • Hai más ilesies dientro de lo que se llama románicu en Cangas del Narcea, ente les que nomaremos: San Vicente de Naviego, San Salvador de Cibuyo, San Pedro de Coliema, Santa María del Carballo, Nuestra Señora de Acebo, etc.

Ente los palacios y casonas rurales destacaremos:

  • El palaciu de Sierra en Llamas del Mouro, del sieglu XVII, ye de cadarma cuadrada en tornu a un patiu, con tres torres, dos torres a los llaos de la fachada y la tercera na parte trasera. La fachada principal ye de dos pisos que ta recorrida por una balconada sobro la que apaecen los escudos familiares. Al llau izquierdu ta la capiella a la que s'accede dende l'esterior, o al traviés d'una tribuna que comunica col palaciu.
  • El palaciu de Sierra en Xarceḷḷéi, ye de cadarma simétrica, con dos cuerpos llaterales. La fachada principal tien una gran balconada y nel centru l'escudu d'armes. La parte trasera ye de dos pisos, l'inferior formáu por arcos de piedra y el superior con una gran galería sustentada por columnes.


Otros monumentos[editar | editar la fonte]

  • Palaciu de Peñalba.
  • Capiella del Santísimu Cristu del Hospital.
  • Teatru Toreno.
  • Barriu d'Entrambasaguas y ponte "romana".
  • Santuariu del Acebu.

Patrimoniu[editar | editar la fonte]

Gastronomía[editar | editar la fonte]

La cocina canguesa ye abondo enerxética y ta sofitada nos productos de la tierra:

  • Embutíos
    • Andoya (llombu de gochu)
    • Butiellu
    • Choscu
  • La caza tien tamién bona fama y cada vuelta son más importantes les Xornaes Gastronómiques, que se celebren ellí.
  • No tocante al pexe, el platu estrella ye la trucha fresca frita o n'escabeche.
  • Nos postres:
    • El Quesu de Xenestosu merez especial mención, ta fechu con lleche de vaca y que se reconoz poles marques de los moldes d'espartu qu'empleguen pa la so fechura.
    • Feixulos y feixueles (feches con sangre de gochu).

Vinu[editar | editar la fonte]

El vinu cangués ye percuriosu pol fechu de qu'ésti ye l'únicu conceyu d'Asturies onde se cultiva la vide. La llarga tradición de la vide retórnase a la dómina romana y foi afalada dempués polos monxos benedictinos de magar el sieglu XI. La so ellaboración nes vieyes bodegues caltién entá los métodos tradicionales. La uva plantase n'espaldera, lloñe del suelu, y nos llugares más pindios. Al igual qu'otros vinos del norte como'l chacolí o'l ribeiro, resulta ácidu en comparanza col restu de vinos de la península, más asemeyáu en realidá a los vinos centroeuropeos qu'a los mediterráneos. Les variedaes d'uva autóctona son les de carrasquín, berdexu y albarín, cuntando con una mayor producción les de mencía, introducida a fines del sieglu XIX, tres la plaga de la filoxera. La vendimia constitúi un auténticu acontecimientu folixeru y social. Carauterízase por ser un vinu xoven, tintu, de baxa gradación, llixeru, con gustu bonu y con una cierta acidez. EL vinu de Cangas tien de se tastiar nos tradicionales cachos, cuencos de madera que cuécense en tintes de madera nes que fermenta'l mostu.

Xornaes[editar | editar la fonte]

  • Xornaes Gastronómiques del xabalín, caza y vinu de Cangas: Avientu.
  • Xornaes del salmón y la carne de raza asturiana: Abril.

Folixes[editar | editar la fonte]

Cangueses célebres[editar | editar la fonte]

Referencies[editar | editar la fonte]

  1. Resultados provisionales

Enllaces esternos[editar | editar la fonte]


 
Conceyos d'Asturies
Amieva | Avilés | Ayande | Ayer | Balmonte | Bimenes | Bual | Cabrales | Cabranes | Candamu | Cangas del Narcea | Cangues d'Onís | Caravia | Carreño | Castrillón | Castropol | Casu | Colunga | Corvera | Cuaña | Cuideiru | Degaña | Eilao | El Franco | Gozón | Grandas de Salime | Grau | Ibias | Illas | Llanera | Llanes | Llangréu | Llaviana | Ḷḷena | Mieres | Morcín | Muros | Nava | Navia | Noreña | Onís | Parres | Pezós | Piloña | Ponga | Pravia | Proaza | Quirós | Les Regueres | Ribedeva | La Ribera | Ribeseya | Riosa | Salas | Samartín d'Ozcos | Samartín del Rei Aurelio | Santalla d'Ozcos | San Tiso d'Abres | Santo Adriano | Sariegu | Siero | Sobrescobiu | Somiedu | Sotu'l Barcu | Tapia | Taramundi | Teberga | Tinéu | Uviéu | Valdés | El Valle Altu | El Valle Baḥu | A Veiga | Vilanova d'Ozcos | Villaviciosa | Villayón | Xixón | Yernes y Tameza