Rexón de Llión

De Uiquipedia
(Redirixío dende Rexón de Lleón)
Saltar a: navegación, buscar
Llión
Bandera de Llión Escudu de Llión
Bandera de Llión Escudu de Llión
 
Mapa del País Llïonés.svg
 
Estáu España España
Capital
 • Población
Llión
225.391 (2011)
Ciudá principal Salamanca
Llingües
 • Oficiales
Castellanu, asturianu, gallegu
Castellanu 1
Estatus
 • Presidente
Xunta de Castiella y Lleón
Juan Vicente Herrera (PP)
Creación
30 de payares de 1833
Superficie
 • Total
 • % auga
Fronteres
Costes

38.491,95 km²

n/d km
0 km
Población
 • Total
 • Densidá

1.039.049 (2011)
26 hab./km²
Xentiliciu lleonés, -esa, -és (-eso)
Fusu horariu
 • en branu
UTC+1
UTC+2
Dominiu d'Internet .es
Códigu ISO ES-O

1 Lleonés y gallegu tienen especial proteición d'acuerdu col Estatutu d'Autonomía

Subdivisiones d'España

Llión o Lleón ye una rexón histórica d'España allugada nel noroeste de la península Ibérica. Definida dende la división territorial de Javier de Burgos en 1833 la so referencia histórica ye tradicionalmente'l Reinu de Llión.

El so cuerpu territorial abarca la mayor parte de les provincies de Llión, Salamanca y Zamora, anque por razones históriques o culturales suelen incluyise dalgunes árees de la provincia de Valladolid o la Tierra de Miranda. En dalgunos periodos de los sieglos XIX y XX, llegaron a incorporase tamién les provincies castellanes de Palencia y Valladolid.

Nel contestu de la Transición Española Carlos Cabañas acuña'l términu País Llionés pa denomar a esti territoriu. Esta voz tendrá más tarde un usu estendíu n'aquellos movimientos sociales cercanos al llionesismu.

Toponimia[editar | editar la fonte]

Llión tien orixe na pallabra llatina legio, que fai referencia a la llexón VII Gemina, que fundó un campamentu no que güei ye la ciudá de Llión. Na documentación medieval puen alcontrase les formes Leio o Leionem, qu'evolucionaríen haza'l nome actual de Llión o Lleón.

Historia[editar | editar la fonte]

Artículu principal: Historia de Llión
Reconstrucción del estandarte de la corona de Llión, en tiempos d'Alfonsu VII. Según estudios vexilolóxicos, la disposición de la figura del lleón evolucionaría dende la "pasante" orixinal, hasta la posición "rampante".[1]
Les rexones españoles en 1770.
Prefectures Napoleóniques en 1810.
División provincial y rexonal d'España de 1833.
Mapa territorial en puxu na Segunda República Española.

El territoriu que güei ocupa Llión foi conquistáu pol Imperiu Romanu ente los años 61 y 19 edC, formando parte de les provincies de Lusitania y Tarraconense; nel sieglu V la Tarraconense foi invadida por suevos y godos incluyéndose más llueu nel Reinu de Toledo. Nel añu 712 los musulmanes derroten a los godos y ocupen el so reinu, anque alcuentren resistencia nel norte peninsular per parte de los pueblos ástures. Éstos últimos fundaríen el Reinu d'Asturies, qu'avanzaría contra'l valle del Dueru hasta que nel añu 910 el rei García I tresllada finalmente la capital d'Uviéu a la ciudá de Llión, fundando asina'l Reinu de Llión. Ordoñu II confirma la capitalidá llionesa y fomenta rellaciones cordiales col Reinu de Pamplona. Pel reináu d'Alfonsu V promúlgase'l Fueru de Llión, el primer fueru conceyeru del que tolos demás puen considerase derivaos o variantes. Mentanto, el rei navarru Sancho III el Mayor busca espandise a costa del territoriu oriental del Reinu de Llión, convirtiéndose en Conde de Castiella y con pretensiones sobre la Tierra de Campos.

Tres varios sieglos d'independenca, Fernando III une en 1230 la Corona de Llión cola Corona de Castiella. Esta unión dinástica nun supunxo la desapaición de los reinos, ya que caún d'ellos caltuvo les sos propies instituciones polítiques, territoriales, económiques y sociales al marxe de tar gobernaes por un mesmu rei. Concretamente, el Reinu de Llión siguió celebrando les sos propies Cortes especíques hasta 1349, tamién siguió existiendo l'Adelantamientu Mayor del Reinu de Llión (que sostituyía a les Merindaes Mayores del sieglu XII, independientes tamién en cada reinu) que caltenía la figura del Defensor del Reinu de Llión, continuó acuñando moneda propia hasta'l sieglu XIV (como'l maravedí llionés -o longo), y nel planu universitariu llegóse a un acuerdu d'alternancia pa que'l rector de la Universidá de Salamanca fora un añu d'orixe llionés y al otru castellanu.

Na Edá Moderna los más de los mapes oficiales constaten esa división territorial ente Llión y Castiella. Una división estrapolada a la colonización d'América como lo amuesa la creación del Nuevu Reinu de Llión (sustratu del actual Estáu de Nuevo León, en México) dientro del Virreinatu de Nueva España per parte de Felipe II.

Nel sieglu XIX l'artículu 10 de la primer Constitución española surdida de les Cortes de Cádiz promulgaba:

Cquote1.svg El territoriu español abarca na Península coles sos poseciones y islles adegañes: Aragón, Asturies, Castiella la Vieya, Cataluña, Córdoba, Estremadura, Galicia, Granada, Jaén, Llión (...) Cquote2.svg

Pente medies d'un decretu en payares de 1833, el so secretariu d'estáu de Fomentu, Javier de Burgos, creó un Estáu centralizáu dividíu en 49 provincies. Les provincies recibieron el nome de les sos capitales (sacante cuatro d'elles, que conservaron les sos vieyes denomaciones: Navarra, con capital en Pamplona, Araba con Vitoria, Gipuzkoa con Donostia y Bizkaia con Bilbao). El proyectu ye prácticamente'l mesmu que'l de 1822, pero ensin les provincies de Calatayud, Bierzu y Xàtiva; amás, otres provincies camuden de nome al cambiar de capital.

Cquote1.svg Real Decretu de 30 de payares de 1833.

Artículu 1. El territoriu español na Península y Islles adegañes queda de magar agora dividíu en cuarenta y nueve provincies que tomarán el nome de les sos capitales respectives sacante les de Navarra, Araba, Gipuzkoa y Bizkaia, que conserven les sos denomaciones actuales.

Artículu 2. L'Andalucía, que compriende los reinos de Córdoba, Granada, jaén y Sevilla, divídese nes ocho provincies siguientes: Córdoba, Jaén, Granada, Almería, Málaga, Sevilla, Cádiz y Huelva. El d'Aragón divídese en trés provincies, a saber: Zaragoza, Huesca y Teruel. El Principáu d'Asturies forma la provincia d'Uviéu. Castiella la Nueva continúa dividida nes cinco provincies de Madrid, Toledo, Ciudad Real, Cuenca y Guadalajara. Castiella la Vieya divídese n'ocho provincies, a saber: Burgos, Valladolid, Palencia, Ávila, Segovia, Soria, Logroño y Santander. Cataluña divídese en cuatro provincies: Barcelona, Tarragona, Lleida y Girona. Estremadura divídese nes de Badajoz y Cáceres. Galicia nes d'A Coruña, Lugo, Ourense y Pontevedra. El Reinu de Llión nes de Llión, Salamanca y Zamora. El de Murcia nes de Murcia y Albacete. El de València nes de València, Alacant y Castelló de la Plana. Pamplona, Vitoria, Bilbao y San Sebastián son les capitales de les provincies de Navarra, Araba, Bizkaia y Gipuzkoa. Palma la de les Islles Baleares. Santa Cruz de Tenerife la de les Islles Canaries..

Cquote2.svg

Les provincies ascribíense de xeitu nominal a rexones históriques, que carecíen de competencies y de muérganos comunes pa les provincies qu'axuntaben, teniendo un simple calter clasificatoriu, ensin pretensiones d'operatividá alministrativa. A la rexón de Llión ascribíense les provincies de Lleón, Salamanca y Zamora. Esta reforma llevada a cabu en 1833 caltúvose prácticamente ensin cambeos hasta l'actualidá.

Sicasí, les provincies de Valladolid y Palencia apaecerán en dalgunos mapes posteriores al decretu formando parte de la rexón denomada Reinu de Llión, como s'atopaba nel Mapa general de España, dividido en sus provincias actuales de Tomás López, 1802, quien incluyía amás el Principáu d'Asturies na rexón llionesa.[2] Asina na Geografía general de España: comparada con la primitiva, antigua y moderna de Juan Bautista Carrasco (1861) el vieyu Reinu de Llión, con tola tierra «conquistada polos reis d'Uviéu», comprendía les «Nueves provincies creaes en 1833» de Llión, Palencia, Salamanca, Valladolid y Zamora, en tanto'l Reinu de Castiella, «comarca que güei se distingue por Castiella la Vieya, llibre de los Árabes nel sieglu IX», incluyía les nueves provincies d'Ávila, Burgos, Logroño, Santander, Segovia y Soria.[3]

Na división territorial provisional de 1873, na Primer República Española, inoróse la rexón llionesa. Esti fechu motivó'l requerimientu d'un estáu federal llionés per parte de la Comisión Provincial de Llión (equivalente a la Diputación):

Cquote1.svg La provincia de Llión, Títulu y Cuna del primer Reinu de la reconquista, (...) pola so situación topográfica, poles sos producciones, poles sos costumes, nun pertenez, nin pue considerase como una parte de Castiella la Vieya; y [...] cuenta con elementos más que suficientes pa constituyir por sigo mesmu un Estáu prósperu, [polo que] nun debe nin pue ser engullada por otru, seya cualquiera'l so nome, y col que nun la unirán seguramente rellaciones de nenguna triba. Cquote2.svg

La rexón llionesa figura nel actículu 10 del Tribunal de Garantíes Constitucionales, un muérganu constitucional español de la Segunda República Española (1931-1939) antecedente del actual Tribunal Constitucional. Según la correspondiente llei orgánica (14 de xunu de 1933), ente los vocales electivos que componíen el tribunal, existíen 14 representantes rexonales. Cada rexón autónoma tenía derechu a nomar un vocal que la representase, que debía ser escoyíu pola so asamblea llexislativa. Pa que'l restu del país tuviere representación nel Tribunal de Garantíes Constitucionales (entóncenes Cataluña yera la única rexón autónoma) disponíase lo siguiente:[4]

Cquote1.svg Consideraránse como rexones les siguientes:

Andalucía (provincies d'Almería, Cádiz, Córdoba, Granada, Huelva, Jaén, Málaga y Sevilla y les ciudaes autónomes de Ceuta y Melilla).
Aragón (provincies de Huesca, Teruel y Zaragoza).
Asturies (provincia d'Uviéu).
Baleares (provincia del so nome).
Canaries (provincies de Las Palmas y Santa Cruz de Tenerife).
Castiella la Nueva (provincies de Ciudad Real, Cuenca, Guadalajara, Madrid y Toledo).
Castiella la Vieya (provincies d'Ávila, Burgos, Logroño, Palencia, Santander, Segovia, Soria y Valladolid).
Estremadura (provincias de Badajoz y Cáceres).
Galicia (provincies d'A Coruña, Lugo, Ourense y Pontevedra).
Llión (provincies de Llión, Salamanca y Zamora).
Murcia (provincies d'Albacete y Murcia).
Navarra y Vascongaes (provincies d'Araba, Gipuzkoa y Bizkaia).

Valencia (provincies d'Alacant, Castelló y València) Cquote2.svg

La dictadura franquista caltuvo ensin alteraciones la división provincial de Javier de Burgos, coles sos diputaciones provinciales y los gobernadores civiles al frente de cauna d'elles, como delegáu permanente del gobiernu y primer autoridá de la provincia según el Reglamentu d'Organización, Funcionamientu y Réxime Xurídicu de les Corporaciones llocales, aprobáu por Decretu de 17 de mayu de 1952, y el posterior de 10 d'ochobre de 1958 pel que se regulaben les sos atribuciones.[5] Les rexones, como nel decretu de 1833, carecíen de personalidá xurídica y de funciones polítiques o alministratives, polo qu'en dalgunos mapes y llibros de testu podíen alcontrase ascrites por razones históriques a la rexón llionesa les provincies de Palencia y Valladolid. Asina, na popular Enciclopedia Álvarez, obra del pedagogu zamoranu Antonio Álvarez, d'usu común nes escueles ente 1954 y 1965, dicíase qu'España atopábase dividida en 15 rexones que «por ser mui antigües llámense históriques», subdividíes al empar en cincuenta provincies y ente elles la de Llión, formada por cinco provincies: Llión, Zamora, Salamanca, Valladolid y Palencia.[6] Peles mesmes feches, l'Atlas Universal y de España de la editorial Edelvives presentaba por embargu la rexón de Llión reducida a les trés provincies de la división territorial de Javier de Burgos.[7]

L'aprobación por referéndum de la Constitución española de 1978 plantega'l marcu pa la descentralización territorial del Estáu al traviés de comunidaes autónomes.

Nel procesu preautonómicu, surdieron bien de grupos llionesistes que reivindicaron la creación d'una comunidá autónoma que comprendiere Llión, Zamora y Salamanca: en Zamora Ciudadanos Zamoranos (CC.ZZ.), en Salamanca el Grupu Rexonalista Salmantín (GRES), y en Llión el Conceyu Abiertu Llionés (CALL), Xóvenes Nacionalistes Llioneses (XNLL), l'Asamblea Independiente Llionesa (AILL), el Grupu Autonómicu Llionés (GALL) o l'Asamblea Rexonalista Llionesa.

Amás, per esos años y el restu de la década de 1980, empiecen a organizase los primeros partíos políticos propiamente llionesistes, como'l Bloque Autonomista del País Llionés, el Partíu Nacionalista Llionés (P.N.L.L), el Partíu Rexonalista del País Llionés (PREPAL), cola so organización moza Xuventúes Llionesistes (XX.LLLL.), el Bloque Agrariu (BA), o la Unión Llionesista (UNLE).

Apruébase'l réxime pre-autonómicu de Castiella y Llión formáu al entamu poles provincies que s'ascribieron a Llión na reforma de 1833 (Salamanca, Zamora y Llión) y les ascrites a Castiella La Vieya (Santander, Logroño, Palencia, Valladolid, Segovia, Soria, Ávila y Burgos). Posteriormente, Santander y Logroño devincularíense, formando comunidaes uniprovinciales. N'acuerdu adoptáu'l 31 de xunetu de 1981, la Diputación Provincial de Segovia decide exercitar la iniciativa pa que Segovia pudiere constituyise en comunidá autónoma uniprovincial, pero nos conceyos de la provincia la situación taba igualada ente los partidarios de la autonomía uniprovincial o col restu de Castiella. Finalmente, la provincia de Segovia incorporóse a la nueva comunidá autónoma al traviés de la Llei Orgánica 5/1983 por «motivos d'interés nacional». A esto súmase-y la resolución del Tribunal Constitucional en la Sentencia 89/1984 de 28 de setiembre, onde s'anulaba la revocación de la Diputación de Llión (13 de xineru de 1983) del so acuerdu primixeniu sobre'l muérganu preautonómicu de Castiella y Lleón.

Coincidiendo con aquella sentencia, produxéronse en Llión diferentes manifestaciones, que según dalgunes fontes[8] axuntaron a un númberu cercanu a los 90.000 asistentes.

El reinu o rexón histórica de Llión apaez referenciada de contino nel preámbulu del Estatutu d'Autonomía de Castiella y Llión, una vuelta creada:

Cquote1.svg La Comunidá Autónoma de Castiella y Llión surde de la unión moderna de los territorios históricos que componíen y dieron nome a les antigües corones de Llión y Castiella. Cquote2.svg

Magar, tres esta unión, los grupos llionesistes que reivindiquen la so postura autonómica nun desapaecen, sinón que coexisten colos partíos estatales. Tienen presencia nes trés provincies llioneses.

Xeografía física[editar | editar la fonte]

El Llambrión, una de les mayores elevaciones del Cordal Cantábricu.
Vista de la Meseta nel área de la vega del Esla.
El llagu de Senabria, d'orixe glaciar.
Las Arribas del ríu Dueru, el más importante de Llión.

Llión tien una superfície aproximada de 38.491,95 km². Llenda al norte col Principáu d'Asturies, al oeste con Galicia y Portugal, al sur con Estremadura y al este con Castiella. La so situación xeográfica favoreció históricamente les comunicaciones humanes y económiques col sur de la Península al traviés de la Vía de la Plata y col este de la Meseta.

Cerca del 49,4% del territoriu llionés dedícase a superficie forestal; el 24,7% a cultivu y paciones y el 2,27% a árees urbanes o d'usu artificial del suelu.

Topografía[editar | editar la fonte]

Existen dos elementos xeográficos con relevancia dientro de Llión:

  • Árees montesines

- Cordelera Cantábrica: Una muria vertical resultáu de la oroxenia hercínico-alpina de la que destaca'l conxuntu de los Picos d'Europa y les cangues de la so rede fluvial (con foces fondes, como Los Beyos y la Garganta del Cares) y onde atopamos cumes que perpasen de los 2.500 metros d'altor, como La Torre Cerréu (2.648 m) o Torre Llambrión (2.642 m). Les formes verticales, los circos glaciares, los complexos kársticos, les gargantes, los neveros, les llombes y les cuenyes son los elementos más significativos.

- Macizu galaico-llionés: Na zona occidental alcontramos un abombamientu del macizu paleozoicu que fendió n'unidaes distintes: la sierra de Xistréu, col picu Catoute (2.117 m), los Montes de Llión, col Telenu (2.188 m), La Cabreira, col Vizcudiello (2.121 m) y los montes occidentales como los Ancares, col Cuiña (1.992 m), y el Caurel, col Montouto (1.541 m). Nel centru de toes elles formóse'l fuexu d'El Bierciu, carauterizáu por un paisaxe de campes y vegues. Los cumes son aplanaos, interrumpíos por alliniamientos de crestes de cuarcites (picos, altos, peñes), y les formes glaciares manifiéstense con exemplos de valles n'U o con llagos como los de Trueitiellas y Lla Baña. Na zona noroccidental los alliniamientos empobínentes d'oeste a este, dexando corredores fluviales que, nel casu de los ríos Ḷḷuna y Oumaña, abrieron les depresiones que conformen les comarques de Babia y Oumaña. Nel sector central, distintos cursos d'agua abieron valles tresversales de disposición norte-sur, llegando a formar en dalgunes ocasiones gargantes como les Foces de Veigacerveira o les Foces de Valdeteya. El modeláu glaciar y el modeláu kársticu dexaron el so niciu con formaciones como la Cueva de Valporquero.

- Sistema central: Faciendo de frontera sur del país, trátase d'un acortamientu de la Placa Ibérica pol choque de les plaques Euroasiática y Africana. El sistema llevantóse na oroxenia alpina, nel Cenozoicu, anque los materiales sobre los que s'asienta (el plataforma granítica meseteña) seyan anteriores. Les sierres más importantes son les de Francia, Las Quilamas y Gata. Los picos mas altos son La Ḥastiala (1.735 m), la Peña Francia (1727 m) o la Mesa del Francés (1.638 m).

  • La Meseta

Esta gran llanera ocupa la parte central del país, con una altitú media d'ente 700 y 1.000 metros. Ye un relieve cuasi horizontal de páramos y ondulaciones seles interrumpíes dacuando por terraces y interfluvios. A estos relieves planos y elevaos conózselos llocalmente como chanes o páramos de rañes. En delles zones, sobre los materiales sedimentarios la erosión creó valles amplios con interfluvios que malapenes destaquen. Nes llaneres ondulaes, al entrar en contautu colos páramos de les cuenques hidrográfiques, dexen de ser espacios abiertos al tar chiscaes por cerros testigu, tesos o talayes.

Hidrografía[editar | editar la fonte]

Ríos

Ver tamién: Ríos de Llión.

Los ríos más importantes son aquellos ascritos a la cuenca hidrográfica del Dueru. Dende'l so nacimientu nos Picos d'Udrión, en Soria, hasta la so muerte na ciudá portuguesa d'Oporto, el Dueru percuerre 897 km. Del norte descienden los ríos Valderaduéi y l'Esla, a esti últimu vierten el so caudal afluentes como'l Porma, el Bernesga, el Cea o l'Órbigu. Los afluentes más importantes del Dueru pela oriella izquierda son el Tormes, el Güebra, l'Águeda, o'l Yeltes, toos procedentes del Sistema Central.

Menos importancia supón la cuenca hidrográfica del Texu, del que destaca especialmente'l ríu Alagón.

Llagos

La rexón lleonesa acueye gran cantidá de llagos y llagunes, anque los más importantes alcuéntrense nel norte de la rexón, como ye'l casu del llagu Ausente, l'Isoba, el llagu de Lla Baña, el llagu de Trueitiellas, el Pozu Cheirosu, la llaguna de Villadangos, la llaguna de Cal o la de Chozas d'Arriba. L'únicu llagu de relevancia fuera de la provincia de Llión ye'l de Senabria, d'orixe glaciar, ún de los más importantes de la Península Ibérica.

Embalses

Creaos pol home pa la obtención d'enerxía eléctrica, los más importantes son los asitiaos na cuenca del Dueru, los de Barrios de Ḷḷuna, Casares, Porma o Riaño, usaos davezu pa la práutica de deportes náuticos. Nel centru, destaca la que foi una de les primeres centrales hidroeléctriques d'España, la d'El Porvenir en San Román de los Infantes. Tamién destaquen los de San Sebastián, Pías y nel sur del país son de relevancia la presa d'Aldeadávila, Águeda, Irueña, Navamuño, Santa Teresa, Saucelle o Yecla de Yeltes.

Clima[editar | editar la fonte]

El clima predominante na rexón llionesa ye'l mediterraneu continentalizáu, anque con traces en delles zones. Trátase d'un clima secu y con temperatures baxes n'iviernu, cálides en branu y seles nes estaciones intermedies.

Son frecuentes les xelaes que persisten nes zones montesines. El noroeste y les sierres del Sistema Central tien una clara influyencia atlántica, pero ye evidente la presencia del clima alpín nes cotes más elevaes. En xeneral ye mui carauterística la enorme amplitú térmica (dende los -10 a los 35°C).

Les precipitaciones repártense de forma irregular a lo llargo del añu y dependiendo de la zona. Asina nel norte y noroeste algámense los 1.500 mm añales mentes que nel centru y sur lléguense a los 500 mm. Diches precipitaciones concéntrense sobre manera pela seronda y la primavera con un mínimu en branu, acentuáu especialmente na llanera, y en forma de ñeve pel iviernu.

Política y gobiernu[editar | editar la fonte]

Organización territorial[editar | editar la fonte]

La Rexón de Llión, intégrase na comunidá autónoma de Castiella y Llión a partir de les provincies de Llión, Salamanca y Zamora. La so unidá territorial básica -dempués del conceyu- ye la comarca. Lleón compónse de más de 65 comarques tradicionales de les que solo una, El Bierciu, tien reconocimientu oficial. El Conseyu Comarcal d'El Bierciu creóse en 1991 y abarca dellos conceyos históricamente ascritos a otres comarques.

Comarques de Llión.
Comarques de Lleón
Comarca Capital Xentiliciu
Alfoz de Toro Toro Cermeñu/a
Aliste Alcañices Alistanu/a
Altu Alagón Los Santos Alagonés/a
Ancares Candín Ancarés/a
Babia Cabriḷḷanes Babianu/a
Cabreira Encinéu Cabreirés/a
Cea Almanza de Cea
Cepeda Magaz Cepedanu/a
Ciarrodrigu Ciarrodrigu de Ciarrodrigu
Cistierna Cistierna de Cistierna
Coyanza Coyanza Coyantín/a
Curueñu Valdepiélagu de Curueñu
El Bierciu Ponferrada Bercianu/a
El Campu Charru Salamanca Salmantín/a, Charru/a
El Campu d'Argañán La Aldea del Obispo Argañán/a
El Campu de Malvarín Fuenteguinaldo Malvarín/a
El Campu de Yeltes La Fuente de San Esteban de Yeltes
El Páramu Santa María Paramés/a
El Rebollal Robrea Rebollanu/a
Furniella Pranzáis Furniellu/a
Gordón La Pola Gordonés/a
La Calería Linares Caleru/a
La Carbayeda Mombuéi Carbayés/a
La Guareña Fuente del Sabuco de Guareña
La Güebra Tamames Güebreñu/a
La Ramayería Guadramiro Ramayeru/a
La Ribeira Carrizu Riberanu/a
La Ribera (Salamanca) Aldeadávila Ribereñu/a
La Veiga Veguellina Veigueñu/a
L'Abadengu Lumbrales de L'Abadengu
L'Armuña La Vellés Armuñés/a
Las Bardas La Sierpe de Las Bardas
Las Matas Santas Martas de Las Matas
Las Villas Villoria de Las Villas
Ledesma Ledesma Ledesmín/a
Ḷḷaciana Viḷḷablinu Ḷḷacianiegu/a
Ḷḷuna Sena Ḷḷuniegu/a
L'Órbigu Benavides de L'Órbigu
Los Agadones Serradilla Agadonés/a
Los Argüeyos Cármenes Argoyán/a
Los Oteros Cabreros Oterín/a
Montemayor Montemayor del Río Montemayorín/a
Oumaña Las Murias Oumañés/a
Porma Boñar de Porma
Riaño Riaño Riañés/a
Ribas del Sil Palacios del Sil de Ribas del Sil
Rueda Valdepolo de Rueda
Salvatierra Guijuelo Salvaterreñu/a
Sayagu Bermillo Sayagués/a
Senabria A Puebla Senabrés, a
Somoza Estorga Somozanu/a
Tierra d'Alba (Zamora) Carbayales Albarín/a
Tierra d'Alba (Salamanca) Alba de Tormes Albarín/a
Tierra de Benavente Benavente Benaventanu/a
Tierra de Campos Mayorga Campesín/a
Tierra de Peñaranda Peñarada de Bracamonte Peñarandín/a
Tierra de Tábara Tábara Tabarés/a
Tierra del Pan Zamora de Tierra del Pan
Tierra del Vinu Corrales de Tierra del Vinu
Tierras de Llión Llión Llionés/
Valdeiría Castrocalbón de Valdeiría
Valdexamuz Santa Elena de Xamuz de Valdexamuz
Valduerna La Bañeza de Valduerna
Valle de Bueza Bimbibre de Bueza
Vitigudino Vitigudino de Vitigudino

Instituciones[editar | editar la fonte]

Juan Vicente Herrera, presidente de Castiella y Llión.

Pente medies de les lleis autonómiques 13/1987 y 14/1987, aprobaes al tiempu, decidióse establecer respectivamente que la Xunta de Castiella y Llión -el gobiernu de la Comunidá-, el so Presidente, y les Cortes -el muérganu llexislativu- tuvieren la so sede na ciudá de Valladolid.

Instituciones autonómiques allugaes en Castiella la Vieya:

Instituciones autonómiques allugaes na Rexón de Llión:

Cortes de Castiella y Llión[editar | editar la fonte]

Hemiciclu de les Cortes de Castiella y Llión.

Na primer llexislatura'l PSOE foi'l partíu con más representación nes Cortes, siendo'l primer presidente de la comunidá'l socialista Demetrio Madrid. De magar la década de los 90 la política autonómica viose enmarcada nuna serie de mayoríes absolutes del PP, que güei sigue gobernando cómodamente. Otros partíos de calter estatal con presencia na comunidá, seya yá a nivel llocal o autonómicu, son IX (previamente como PCE) y UPyD, con una presencia importante nes provincies de Ávila y Burgos. Previamente'l CDS d'Adolfo Suárez llogró tamién tar na vida política autonómica ocupando'l centru reformista del fexe políticu.

El llionesismu al traviés de la UPL, el castellanismu al traviés de Partíu de Castiella y Llión, previamente Tierra Comunera o partíos llocalistes como Solución Independiente, Agrupación d'Eleutores Independientes Zamoranos o Iniciativa pol Desarollu de Soria tvieron tamién la so presencia, anque a menor nivel.

Anguaño la comunidá ta gobernada por Juan Vicente Herrera, del Partíu Popular. Dichu partidu obtuvo mayoría absoluta nes últimes eleiciones autonómiques a les Cortes de Castiella y Llión en 2011. El Partíu Socialista de Castiella y Llión-PSOE alcuéntrase na oposición. El líder de la oposición ye Óscar López. Namás dos partíos más obtuvieron representación parllamentaria, la Unión del Pueblo Llionés (UPL) y Izquierda Xunida de Castiella y Llión, con un procurador cauna.

Composición de les Cortes de Castiella y Llión na llexislatura 2011-2015:

   Partíu Popular (53 procuradores).

   Partíu Socialista (29 procuradores).

   Izquierda Xunida (1 procurador)

   Unión del Pueblu Llionés (1 procurador).

Sacante na primer llexislatura, que cuntó con presidente socialista, la presidencia tuvo ocupada siempre por miembros del Partíu Popular o del so antecesor, Alianza Popular:

Nu Nome Aniciu Fin Partíu políticu
1. Demetrio Madrid López 1983 1986 PSOE
2. José Constantino Nalda García 1986 1987 PSOE
3. José María Aznar López 1987 1989 AP-PP
4. Jesús Posada Moreno 1989 1991 PP
5. Juan José Lucas Jiménez 1991 2001 PP
6. Juan Vicente Herrera Campo 2001 - PP

Dende la constitución de la comunidá autónoma de Castiella y Llión, en 1983, realizáronse ocho elecciones a les Cortes de Castiella y Llión, consiguiéndose los siguientes resultaos:

Representación de los partíos nes Cortes de Castiella y Llión

Partíu 1983 1987 1991 1995 1999 2003 2007 2011
Partíu Popular (PP) 39a 32b 43 50 48 48 48 53
Partíu Socialista Obreru Español (PSOE) 42 32 35 27 30 32 33 29
Unión del Pueblu Llionés (UPL) 2 3 2 2c 1
Izquierda Xunida (IX) 1 5 1 1
Tierra Comunera-Partíu Nacionalista Castellanu (TC-PNC) 1
Centru Democráticu y Social (CDS) 2 18 5
Partíu Demócrata Lliberal (PDL) 1
Partíu Demócrata Popular (PDP) a 1
Solución Independiente (SI) 1

Economía[editar | editar la fonte]

Indicadores económicos[editar | editar la fonte]

Empreses según sector económicu (2009)[9]
Númberu d'empreses Porcentaxe
TOTAL 50.180 100%
Agricultura 20.602 41,05%
Industria 3.269 6,51%
Construcción 4.207 8,39%
Servicios 22.102 44,04%
Trabayadores nos distintos sectores (2009)[10]
Númberu de trabayadores Porcentaxe
TOTAL 325.380 100%
Agricultura 20.603 6,33%
Industria 39.814 12,24%
Construcción 28.777 8,84%
Servicios 236.186 72,79%

Ver tamién[editar | editar la fonte]

Referencies[editar | editar la fonte]

  1. La bandera medieval del reinu de Llión, Ricardo Chao Prieto. Banderas, númb. 98, Sociedad Española de Vexilología.
  2. Tomás López, Mapa xeneral d'España..., Biblioteca Nacional de España.
  3. Carrasco, José Manuel, Geografía general de España: comparada con la primitiva, antigua y moderna, Madrid, 1861, páx. 623.
  4. Llei Orgánica de Creación del Tribunal de Garantíes Constitucionales. Artículos 10-11
  5. Xefes políticos y gobernadores civiles, Diputación Provincial d'Albacete.
  6. Enciclopedia Álvarez, trecer grau, Edaf, Madrid, 2009 (25ª edición), ISBN 84-414-0244-7, páx. 334.
  7. Atlas Universal y de España, Zaragoza, Edelvives, 1959, depósitu llegal: Z-249-1958.
  8. Diario de León, 5 de mayu de 1984.
  9. Fonte: Datos tomaos del Anuariu Estadísticu d'Asturies 2006. [1]
  10. Fonte: Datos tomaos del Anuariu Estadísticu d'Asturies 2006. [2]