El Bierzu

El Bierzu

Población: 134.738 INE (2007) hab.  Soperficie: 2.828 km²  Densidá: 44,32 hab./km²

Llocalidá destacada pola so mayor:  Población: Ponferrada  Soperficie: Ponferrada  Densidá: Ponferrada

Conceyos de la comarca Conceyu Población km² Hab/km² Arganza 806      Balboa 417      Barxas 313      Bimbibre 10.053  62,69  160,45  Benuza 697      Berlanga 420      Borrenes 436      Cabanas Raras 1.224      Cacabelos 5.350      Camponaraia 4.035      Candín 361      Carracedelo 3.614      Caruceu 689      Castrupodame 1.851      Congostu 1.773      Corullón 1.090      Cubiellos 1.603      El Fabeiru 5.324  58,06  104,2  Folgosu 1.249      Igüeña 1.500  206,25  8,25  Molinaseca 822      Ñuceda 829      Oencia 496  98,77  4,92  Palacios de Sil 1.275      Páramu de Sil 1550  170,3  9,14  Peranzanes 319      Ponferrada 66.824  283  233,15  Priaranza 914  33,70  27,24  La Ponte de Domingu Frórez 1.819      Sanceu 576      Sobráu 455 (año 2.006)      Torenu 3.836    36,71  Torre 2.714      Trabadelo 496      Veiga d'Espinareda 2.560      A Veiga do Valcarce 735      Vilacanes-Toural dos Vaos 2.180      Vilafranca 3.533  183  20,27  [[{{{38Poblacion}}}]]  || ||  [[{{{39Poblacion}}}]]       [[{{{40Poblacion}}}]]       [[{{{41Poblacion}}}]]       [[{{{42Poblacion}}}]]       [[{{{43Poblacion}}}]]       [[{{{44Poblacion}}}]]       [[{{{45Poblacion}}}]]       [[{{{46Poblacion}}}]]       [[{{{47Poblacion}}}]]       [[{{{48Poblacion}}}]]       [[{{{49Poblacion}}}]]       [[{{{51Poblacion}}}]]       [[{{{52Poblacion}}}]]       [[{{{53Poblacion}}}]]       [[{{{54Poblacion}}}]]       [[{{{55Poblacion}}}]]       [[{{{56Poblacion}}}]]       [[{{{57Poblacion}}}]]       [[{{{58Poblacion}}}]]       [[{{{59Poblacion}}}]]       [[{{{60Poblacion}}}]]       Totales 134.738 INE (2007)  2.828  44,32

El Bierzu ye una comarca de Castiella y Llión (España) allugada na Provincia de Llión .

Entamu

El Bierzu ye la única comarca alministrativa reconocida por llei na Comunidá Autónoma de Castiella y Llión. La sé'l Conseyu Comarcal ta en Ponferrada. Abargana 38 conceyos.

Ye, xunto L'Alfoz, la comarca más dinámica de Llión, poseyendo abonda autonomía al traviés del Conseyu Comarcal del Bierzu. Hai de sorrayar que, amás de la comarca d'El Bierzu, nesta división alministrativa hai conceyos d'otres comarques que, por decisión propia y democrática, decidieron facer parte d'esta comarca; ensin perder concexa de ser culturalmente parte d'otra, como nos casos de Benuza (La Cabreira), Páramu de Sil (Altu Sil) o Peranzanes (Forniella).

Na so bandera recuéyese la Cruz de San Andrés remanada de la cruz de San Andrés del hestóricu Pendón de la milicia ponferradina na Guerra de Independencia Española. La bandera tamién incorpora l'azul y el blancu adicando a los cullores del bercianismu políticu na presente estada democrática, y que representen el riéu Sil.

La llingua predominante ye'l castellán. Nun reyuelu l'Oeste de la comarca, la llingua tradicional ye'l gallegu. Nel restu la comarca la llingua tradicional ye'lasturllionés. La mestura de dambes, dio llugar al Dialeutu bercianu. D'otra miente, munchos de los valles o comarques que formen El Bierzu caltienen significatives pecuñariedaes nel so falaxe.

Formó parte de la Provincia del Vierzo, na dixebra territorial de 1822, demientres el Trieniu Lliberal. Dimpués en 1833, tres la dixebra territorial de 1833 la provincia del Vierzo foi dixebrada en dos partes: El Bierzu, d'anguañu, na Provincia de Llión y Valdiorras na Provincia d'Ourense, tres numberosos intentos de recuperar la desaniciada provincia, intentos que continuaron produciéndose posteriormente.

Xeográficamente ye un pozu ente los Montes Aquilianos y los Montes de Llión, que fai que disfrute dún microclima mediterraniu, resultáu de la combinación del clima atlánticu y del mediterraniu continental. Destaca la so producción agrícola con delles denominaciones d'orixe y una gran calidá como nes peres, manzanes, castañes, zreixes o uva. Por esta pecuñar forma munchos vieron nel nome del Bierzu reminiscencia col so significáu de -trubiecu-; magar que la so procedencia seya del términu Bergidum, qu'apaez pela primer vegada nos importantes escritos llioneses del monesteriu de San Pedru de Montes en 1243 na forma que güei conocemos.

Arriendes dún incipiente turismu rural cincáu na belleza de les sos paisades naturales como los Ancares, o criyaos pol home como Las Médulas, un españamientu d'oro realizáu polos romanos y agora declaráu Padrimoniu de la Humanidá; asina como'l Camín de Santiago. N'El Bierzu puédense afayar delles de les más importantes amueses del arte mozárabe como la illesia de Santiagu de Peñalba y la de Santu Tomás de las Ollas. Tamién somos a alcontrar ente'l so enantáu padrimonniu hestórico-artísticu importantes amueses de tolos períodos artísticos, románicu, góticu, barrocu,...

Conceyos d'El Bierzu

El prencipal riéu de la comarca ye'l Sil, afluente'l Miño. Un dichu popular diz «el Sil lleva l'augua y el Miño, la fama».

Hestoria

Dende cuantayá esta zona individualizárase polos sos cálteres propios y va poseyer siempres una consideración señorial y alministrativa cincada nel so desllinde xeográficu y la so importancia estratéxico como llugar de pasu (Tomás Mañanes)

Paleolíticu y Neolíticu

Hendedor afayáu n'El Bierzu

Esiste una gran desconocencia de la prehestoria y protohestoria n'El Bierzu únicamente sopiada, en parte, gracies a puntuales llabores arqueolóxicos y la epigrafía. Fasta aportar a la dómina prerromana, de la qu'habemos una conocencia más preciso. Los afayos correspondientes a la Edá del Bronce o anteriores foren casuales y non frutu de vistigaciones o escavaciones arqueolóxiques. Esa ausencia de prospeuciones arqueolóxiques motivó que dellos autores afirmarán qu'El Bierzu tevo despobláu nel Paleolíticu y nel Neolíticu, afirmación desmentida, anguañu, con afayos que permiten certificar un doblamientu prehestóricu d'El Bierzu. Alcontrárense numberoses pieces nes terraces del riéu Cúa catalogaes ente'l 300.000 y el 100.000 a. C. (la abegosa orografía berciana debió dificultar la comunicación y el comerciu que n'otres zones, el casu de la Meseta, foi más habitual, dificultando la datación cronolóxico de les pieces). Esisten dellos afayos correspondientes al neolíticu, sobremanera brueses pulimentaes n'estremaos llugares d'El Bierzu (Ancares, Ponferrada, Corbón del Sil).

Calcolíticu y Edá del Bronce

Pintures rupestres prieto de San Pedro Mallo

Tiesta de bronce afayada en Castru Bergidum

Afáyense restos d'esta dómina, cerámica precampaniforme, na Cabuerna de las Tres Ventanas (Toral de los Vados) y destacar les pintures rupestres afayaes nes arredolaes de Sésamu y Llibrán, posiblemente pertenecientes a esta dómina.

Esisten estremaos afayos correspondientes a la Edá del Bronce (puntes de llancia, ferramientes, cerámica,…), correspondientes a toles sos estaes entemedies. Nesta estada tamién dátense, mayoritariamente, los Ídolos de Noceda y Vilafranca, manque hai dubies sobro tala datación.

Les carauterístiques siguin siendo les duna economía de subsistencia que mui d'a poco reciben enfluyencies foriates, que va desenrrollándose na dómina siguiente.

Edá del Fierro

Castru Bergidum. Muria oeste

N'El Bierzo, como nel restu'l Norte peninsular desenrrólase la cultura castreña L'incipiente aperturismu nos sos arreyamientos comerciales, avistáu na anterior estada, vese curtiáu tres la invasión romana de la Meseta nel sieglu II a. C.

Son munchos les yaceés y los afayos correspondientes a esta dómina. Exemplos de castros son, Castru Bergidum (prieto de Cacabelos) y el Castru del L.lanu (L.lanu, Fornela) ente otros munchos y ente los afayos estramaos utensilios pétreos y metálicos destinaos a estremaes funciones y ayalguines como la del Castru de L.lanu.

Dómina romana

La inserción d'El Bierzu nel mundiu romanu féxose celerina y xabazmente, resultando de les doyures auríferes de la rexón berciana (Las Médulas ente otros españamientos auríferos) milenta cambeos tanto na organización social como na económica y na xeográfica, desplazándose noyos de población y criyándose nueves ciodaes (Interamnium Flavium).

Españamientos auríferos romanos de Las Médulas

Esti procesu nun foi continuu ensinón que desenrrollose n'estremaes estaes, tornándose El Bierzu nuna cantera abierta, coles consiguientes infracadarmes empobinaes a tal fin ensin que la cultura romana llegara a ser más que un barniz que desapaecería al cayer l'Emperiu Romanu.

Son numberosos los les yaceés arqueolóxiques correspondientes a está dómina, destacar les yaceés auríferes de Las Médulas (padrimoniu de la humanidá), Castropodame, y Paradaseca, ente otros, la romanización de numberosos castros como'l Castrelín de San Juan de Paluezas y ciudaes como Bergidum (zona de La Edrada, Cacabelos) asina como numberosísimos afayos: utensilios, epigrafíes (ara de San Pedro de Trones) y un afayu de singular importancia, l'Edictu d'Augustu, más conocíu como Bronce d'El Bierzu (edicto en Bronce del Emperador Augusto) que ha permitido un mayor conocimiento de los arreyamientos y pautos del Emperiu Romanu coles tribus indíxenes. L'anguañu comarca d'El Bierzu perteneció al Conventus Asturicensis, con capital n'Asturica Augusta, el cual formaba parte a la provincia Tarraconensis. Por sida de les reformes de Dioclecianu, nel sieglu III, dichu conventu foi asiñáu a Gallaecia, provincia de nueva creyación arrincada de la Tarraconensis..

Alta Edá Media

Tres la entrada de los pueblos xermanos napenínsula, los suevos y los vándalos asdingos (que posteriormente treslladaríen a la Bética) istalaren naprovincia de Gallaecia na que s'inclúi El Bierzu. La información sobro la dómina sueva ye mui escasa, sábese qu'El Bierzu taba dientro d'esi territoriu pol Parrochiale Suevum y dellos afayos arqueolóxicos.

Peñe de güesu de la dómina sueva, probable entecambéu comercial. Perteneciente a la cultura Tchernjahov-Sîntana Mures afayáu en Castru Bergidum

El domeñu suevu sobro El Bierzu fina tres una riestra de sucesos qu'entamen nel llevantu d'Aspidiu escontra'l rei visigodu Leoviguildu, sofitáu aquelli pol rei suevu Miru que muerre tres sofitar al fíu de Leoviguildu, Hermeneguildu escontra'l so pa. Tres 177 años los visigodos afecharon col reinu suevu. Del domeñu visigodu d'El Bierzu esiste mayor información, proporcionada ésta tanto por fontes escrites, como por exemplu la Vida de San Fructuosu, escrita, probablemente por San Valeriu, y otres obres d'esti Santu y estremaos restos arqueolóxicos y afayos numismáticos de importancia como son dos monedes, una que correspuende al rei Sisebutu en cuyu anversu pue lleese Bergio Pius, faciendo referencia a Castru Bergidum onde esistió un enclave visigodu y un tremisse alcontráu nel Castiellu de Ponferrada de Recesvintu.

Gracies a la Vida de San Fructuosu conocemos que'l padre d'éste yera dux de Gallaecia y que munches de les sos propiedaes alcontrábase nuna zona d'esa provincia llamada el Bergidensis territori (territoriu Bergidensi).

Cruz de Peñalba (Santiagu de Peñalba). Simbolu d'El Bierzu

Lo más destacáu d'esta dómina ye la creyación de la denominada Tebaida Berciana, un florecimientu monésticu n'El Bierzu que llevo a numberoses fundaciones, siendo'l so prencipal artífiz San Fructuosu, entamando pol desapaecíu Monesteriu de Compludu, destacando asinamesmo la fundación del Monesteriu de San Pedru de Montes. Gracies a la fundación d'estos noyos monacales escomencipia a resurdir un texíu cultural que continuará nos sieglos posteriores.

Desconocemos la evolución de les ciudades y los pueblos bercianos, probablemente les escavaciones arquiolóxiques qu'anguañu rialícense en Castru Bergidum contribuyan a esclarialo, recadando que nesi emplazamientu allúgase, a priori una ceca visigoda llamada Bergium.

De la dominación musulmana, tres la invasión de la península ibérica nel 711, poseyemos poca información, suponse que tres la celerina acupación peninsular por parte musulmana, afincaríense guarniciones encargaes de cobrar tributos.

Interior Illesia de Santu Tomás de las Ollas

Tres la Batalla de Cuadonga los reis asturianos, tres controlar gran parte de Galicia intenten rializar lo mesmu en territoriu bercianu. Bermudu I (o Vermudu I) cai derrotáu na batalla del Burbia (Vilafranca), escontra'l 791, y abdica voluntariamente. Los monarques asturianos nun percanciaríen un domeñu so El Bierzu fasta los reinaos d'Alfonsu II y de Ramiru I, teniendo enantes pasáu de manes musulmanes a cristianes, alternativamente'l territoriu bercianu. D'esta dómina fínquen-nos testimonios, más o menos llexendarios, sobro estremaes batalles asitiaes n'El Bierzu, destacar ente elles la toma del Castiellu de Sarracín (Vega de Valcarce) heroicamente, fechu que fincara reflexáu nel escudu de dichu conceyu.

Ye nesta dómina, reináu de Ramiru I (842-850) cuando El Bierzu entama a tar baxo domeñu de condes, siendo'l primer d'ellos Don Llorienzu y el más conocíu el Conde Gatón que repuebla numberoses zonas al Este d'El Bierzu. Nel reináu d'Alfonsu II, el domeñu so El Bierzu por parte de los monarques asturianos parez asentáu.

El resurdimientu'l monacatu bercianu tres el paréntesis de la invasión musulmana ye un fechu, destacando les fundaciones y refundaciones llevaes a cabu por San Xenadiu de Santiagu de Peñalba y del Monesteriu de San Pedru de Montes. Los mrnumentos y restos arquiolóxicos que conocemos son mui numberosos y l'arte sagru bercianu ye mui destacáu, como exemplos la Cruz de Peñalba y el Cáliz y la Patena del Abade Pelayu.

El Bierzu feudal

Esta dómina de transición abargana dende caberos del sieglu IX fasta'l sieglu XIII, inclusive.

Illesia del Monesteriu de San Pedru de Montes

Ente'l períodu Alto medieval y el Baxo medieval d'El Bierzu viénse distinguiendo, de cutio, polos hestoriadores, una estada denominada, El Bierzu Feudal.

Trátase duna denominación socio-económica, na que unos gurupos poseen la tierra y otros la españen, cincándose la economía nel españamientu agrario y ganadero. Namái a partir del sieglu XII prodúzse una progresiva diversificación de la economía, eantándose a la minería y tresformación de los recursos minerales (ferreríes), la pesca y entamando a desenrrollase'l comerciu al traviés de feries y mercaos y pequeños "empresarios" dedicaos a la compra-venta-tresporte de mercaderíes.

La propiedá concéntrase en poques manes rializándose una distinción ente propiedaes de cálter eclesiásticu, cuyos prencipales esponentes son los Monesterios de San Pedru de Montes y de San Andrés de Vega d'Espinadera (benedictinos) y el Santa María de Carracedo y de San Miguel de las Dueñas (cistercienses), y propiedaes de realengu y nobiliar, ensin escaecer el papel desempeñáu poles órdenes militares de Santiagu, l'Hospital y el Temple. L'analís del sistema de propiedaes y su evolución ye sumamente estensu y complexu, ya imposible de resumir en poques pallabres. Sorrayar que los enterrios ente los conceyos y los siñores, ensin importar qu'éstos seyan eclesiásticos o nobiliares.

Alministrativamente, El Bierzu, fasta l'añu 910, como endiciáremos yá, integrábase nel reinu d'Asturies, y nel de Llión ente el 910 y el 1037, a partir d'esi añu inclúise na Corona de Castiella y Llión, pa tornar al de Llión nel 1157 y terminar nel 1230 de nuéu na Corona de Castiella y Llión. A partir de 1187 El Bierzu pasa a ser siñorío, y tien por tal a D. Velasco Fernández, pasando, a entamos del sieglu XII a tener gobernadores, ún de los más conocíos foi D. Gonzalo Peláez y nel añu 1243 aparez, como merín d'El Bierzu, D. García Carnota. El Bierzu nesta estada encadármase en tenencies (Ancares, Ulver, Boeza, Aguiar, Valcarce, y tenencies dún ámbetu territorial más reducíu nes que podemos encluyir les villes) dientro d'otra mayor (Tenencia mayor). A partir de mediaos del sieglu XIII estes tenencias dan pasu a les merindaes mayores que terminarán tornándose, posteriormente, n'adelatamientos.

Numberosos exemplos artísticos finquen d'esta dómina, destacando'l Monesterio de Santa María de Carracedo y el Castiellu de Ponferrada (nes partes que correspuenden a esti períodu) y la bellísima illesia de San Miguel de Corullón, en cuantes a edificaciones y numberoses representaciones marianes y de crucificaos de gran valir artístico como'l Calvariu de Corullón.

Baxa Edá Media

La Baxa Edá media n'El Bierzu se carauterízase, prencipalmente, pola crisis de los señoríos monésticos y l'auxe, munches veces a costa d'éstos, de los llaicos, personificaos na fegura de ciertos nobles qu'empleguen la encomienda como istrumentu pa usurpar munchos de los bienes de los señoríos monésticos.

Castiellu de Balboa. Balboa (El Bierzu)

Destacar ente los señoríos llaicos el de Bembibre, entamando en 1304 por Alfonso de la Cerda (bicácanu d'Alfonso X), integráu, al entamu, na Casa de Medinaceli; y el de Vilafranca que correspuende a la familia de los Osorio, "integráu" nel Condáu de Lemos, posteriormente tornóse en marquesáu.

Numebrosos enterrios sociales, producíos por esti cambéu, asoceden. Destacar la Revuelta Irmandiña que causó nun pocos enterrios armaos y la guerra civil de la década de los ochenta del sieglu XV.

Alministrativamente debemos haber en cuenta que, El Bierzu que pasa, a mediaos del XIII, de les tenencies a les Merindaes Mayores la fragmentación territorial que supoón los señoríos de la que se llibra la villa de Ponferrada, comprada polos Reis Católicos en 1486, constituyéndose en Correximientu en 1494 fasta l'añu 1780.

Como espresión de la singularidá d'El Bierzu, y la so fuerte identidá dende antiguu sorrayar la carta dumbieada al ayuntamientu de la ciodá de Llión, en 1567, y que continua una correspondencia d'avientu 1563 de semeyante intención solicitando que la provincia d'El Bierzu (sic) dixébrese del Adelantamientu de Llión, argumentando tal pretensión na llontananza xeográfico, pidiendo que l'audiencia (de los negocios d'El Bierzu) atiéndanse na presona del Correxidor de Ponferrada y pa facelo pretenden pedilo "por capítulu de Cortes".

Nel apartáu artísticu, les edificaciones militares tienen una importancia relevante dao el poder de los señoríos. Destacar ente ellos el de Ponferrada, que medra enormemente en tamañu calteniendo gran parte de les sos muries orixinales templaries (sieglos XI-XII), Castiellu de Cornatel, de Sarracín de Autares, Balboa,…

L'Antigu Régimen

Esti períodu abargana dende'l sieglu XVI fasta entamos del XIX. Diérase-y en llamar, tamién, feudalismu desenrrolláu ya que caltién munches de les carauterístiques medievales.

Ferrería de Llinares. Antigua ferrería del Monesteriu de San Pedru de Montes

N'El Bierzu asoceden socesivos cambeos demográficos a lo llargo d'esti períodu, estaes de medría, estancamientu y descensu, por mor de les respeutives estaes de bonanza y crisis económiques, producíes éstes por males colleches y pestes, y ye qu'El Bierzu sigui siendo prencipalmente agrariu, siendo la vide'l so prencipal produtu, y nes estayes montesines ganaderu, heriedando del períodu medieval el minifundismu y la gran cantidá de tierres en manes d'eclesiásticos. Destacar la introducción nesti períodu (sieglu XVII) d'ún de los produtos que tendrá mayor sonadía y calidá, el pemientu.

El comerciu continua nún espoxigue incipiente. Feries y mercaos marquen l'autividá comercial nes prencipales villes (Ponferrada, Bembibre, Vilafranca y Cacabelos) nes qu'existen tenderos y dalgún mercader espoxigando'l comerciu ambulante gracies a ancareses y fornelos pesie de la precariedá de les víes de comunicación y los impuestos al treviesar les llendes internes, llamaos equí pontazgos (protalgos), y dalgún otru d'estremada natura.

Na estaya industrial destaca la industria testil, manque numberoses veces nun tapez más que l'autoabastimientu. En Bembibre y na merindá de Cornatel ellaboraben unos paños de llienzu blanco llamaos bierzos que tovieron gran éxitu y reconocimientu y comercializaron fuera d'El Bierzu con gran demanda. Tamién destaquen les numberoses ferreríes, delles con una produción significativa que llevó a intentar producir aceru ya inclusive una fábrica d'armes, en 1779, en Vilafranca.

Escudu de los Caruxu. Familia que tevo numberosos ñembros de gran enfluyencia n'autividá política y económica d'El Bierzu nos sieglos modernos, establecida nel Bierzu Baxu. Semeya tomada de la casa de los Caruxu, en San Llorienzu del Bierzu (Ponferrada)

La sociedá taba organizada en tres estamentos: cleru, ñobleza y el pueblu llanu o Estáu llanu. El primer, el cleru, aparte de la so gran enfluyencia ideolóxica y cultural , acentuada pola so doyura padrimonial, tán exentos de pagar impuestos y la so gran cantidá proporcional, respeutu al restu de la sociedá, de presones que formen parte d'esti estamentu, unas 1000 pa caberos del sieglu XVIII, refuercia'l so poder y enfluyencia.

El casu de la ñobleza ye distintu, ya que nesti estamentu cueyen dende los Grandes d'España, la que podríamos llamar, ñobleza más "alto" , fasta los fidalgos, l'aviesu, nesti caberu gurupu, el de los fidalgos ye especialmente significativu el gran númberu de presones que formaben parte d'elli nesta rexón pa caberos del sieglu XVIII, albídrase que n'El Bierzu el 50% de les presonas incluyíense nesti estamentu, y d'ellos, de los más, fidalgos. Sicasí, dellos, ensinón munchos d'estos fidalgos, malvivíen de pequeños españamientos agrarios de cuasi subsistencia, amatando esi allugamientu baxo esi titulu de "baxa" ñobleza.

L'Estáu llanu, el tercer estamentu, fromábenlu, aproximadamente, pa caberos del sieglu XVIII, el 38% de la sociedá (ensin cuntar parte de los fidalgos que, como endiciáremos, tendríen más que ver con esti estamentu que col de la ñobleza). Encadarmábenlu llabraores, artesanos y comerciantes sobreviviendo magüer sofrir les mayores cargues impositives.

El Partíu de Ponferrada.

Mapa de la Provincia del Vierzo (1786) de D. Tomás López

Demientres los sieglos modernos y fasta les reformes del sieglu XIX, El Bierzu formó parte duna enantada Intendencia-Provincia integrada pol Partíu de Llión, el Principáu d'Asturies y el Partíu de Ponferrada. No tocántenes a El Bierzu d'anguañu, incluyíase dientro'l Partíu de Ponferrada el cual incluyía otres zones que güei nun formen parte d'El Bierzu: merindá d'Aguiar, anguañu comarca de Valdiorras y la xurisdición de Lluciellu. Esti Partíu yera gobernáu dende Ponferrada, villa realenga, por un correxidor de nomamiento rial, subdividiéndose El Bierzu en merindaes, cuetos, conceyos, xurisdiciones. Inda dependiendo'l noyu "central", Ponferrada, estes subdivisiones yeren, na práutica, cuasi autónomes, siendo señoríos llaicos o eclesiásticos na so mayoría y unos pocos percaciaren xurisdición propia.

Les comarques y subcomarques

Atendiendo a las pecuñariedaes hestóriques, xeográfiques y culturales d'esta gran comarca, compuesta por 37 conceyos, nun se podría dicir que ye una comarca xunitaria, cuásique podría dicise que ye una provincia dientro la Rexón de Llión.

• Comarques: Nel Bierzu tan engadíes otres comarques propiamente diches por circustancies hestóriques y tradicionales como son:.

1. 1. Los Ancares: los conceyos de Valboa, Candín (considerada la capital de la comarca), y la parte ocidental de Vilafranca y La Veiga d'Espinareda.
   2. Altu Sil: conceyu de Páramu de Sil, hestóricamente lligáu a L.laciana ya incluyíu nuna ensame colos Cuatru Val.les.
   3. Benuza, esti conceyu nun ye nenguna comarca pero forma parte de La Cabreira Baxa manque tea incluyíu dientro del Bierzu, por tolos aspeutos nun pue coxitase bercianu ensinón cabreirés.
   4. Forniella: conceyu de Peranzanes.
   5. Bueza: conceyos de Bimbibre, Noceda, Castrupodame, Molinaseca, Torre/Conceyu de Montes, Folgosu la Ribeira, Congostu ya Igüeña. La so capital ye Bimbibre.

La dixebra tradicional del Bierzu cíncase nel altor medio de los sos conceyos, y amás dicha dixebra ye atalantada como tala polos sos habitantes:

1. 1. Altu: conceyos con un altor cimero a 700 metros y la so capital ye Torenu.
   2. Baxu: conceyos con un altor inferior a 700 metros y la so capital ye Vilafranca.
   3. Valdueza, incluyida nel conceyu de Ponferrada sedría una dixebra subcomarcal tradicional.

Ye importante sorrayar qu'esta comarca nun entendiéu de divisiones atendiendo a les llingües falaes nun conceyu u otru, dao que les sodivisiones siñalaes enantes incluyen conceyos del domeñu llingúísitu gallegu y astur.

Tamién débese endiciar que, anque dacuando se nome a L.laciana y Cabreira como bercianas, dambes les dos tan estrenchamente arreyaes con otres estayes xeohestóriques de la rexón; poseyendo, amás, una perfuerte personalidá cultural ya identitaria.

Llingüística

La llingua predominante ye'l castellán, pero con importantes enfluyencies del gallegu y del llionés que van aduciendo sigún vase d'oriente a occidente y el norte reupectivamente. L'emplegu del gallegu y del llionés nel usu de cutio tien suertes dispares, magar que dambos gociaren duna reciente revitalización per aciu'l llabor d'estramaes asociaciones que promueven el so usu y estudiu, siendo, el gallegu'l más favorecíu, enantándose'l so emplegu na so zona d'enfluyencia, y el llionés continúa sofriendo un usu mui llimitáu.

Coxitárase siempres a El Bierzu como una ponte ente'l gallegu y el llionés; pero con cálteres propios mui estremaos, que llevaron a encartichar esi falaxe d'El Bierzu como dialeutu bercianu nel sieglu XIX recoyíu posteriormente en diverses espublizaciones.

Una llende imaxinaria que parte del Altu Cúa fasta parte del anguañu conceyu de Ponferrada (Fontesnuevas y Dehesas) dixebra los territorios llingüísticos. Dende antiguu dambos foren la fala o falaxe de cutio o tradicional. Güei, evitando les poblaciones más urbanes, onde lo llariegu, llingüísticamente falando, práuticamente desaniciara, nótase como hibrídense, dacuando, y como mesturen resultados fonéticos gallegos y llioneses (y entá castiellanos) coesistiendo dambes formes en dellos casos. D'otra miente, munchos de los valles o comarques que formen El Bierzu caltienen significatives pecuñariedaes na so fala, surdiendo asina xergues como'l burón (xerga de los vendedores y albarderos ambulantes de Fornela), y el dialeutu ancarés.

Economía

Esiste una gran autividá fabril na comarca alrodiu les estayes del carbón emplegáu pa la produción de lletricidá, n'El Bierzu fundó L'Estáu ENDESA en 1944 pa la produción d'enerxía lléctrico y continúa presente al tresvel del Compostilla II, la segunda central termolléctrica más grande d'España (5 gurupos térmicos) , la estaya siderúrxica (Roldán), eólicu (Comonor, LM), la estración de cayuela (numberoses emprese), y presencia nes estayes del vidriu, el cementu (Cosmos) y la costruición (Martínez Nuñez, Begar). Asinamesmo posee un texíu de pequeñes empreses nes tres estayes. La estaya servicios al empar que nel restu'l país va alquiriendo más pesu de la que se desmantela la estaya secundaria. Tou ello xuníu a una industria agroalimentaria en progresión tantu en cantidá como en calidá y prestixu(vinu, industries cárniques,hortofrutícoles).

Pendón de llancies cola Cruz de San Andrés. Ispiración de la bandera d'anguañu d'El Bierzu (Muséu d'El Bierzu, Ponferrada)

Agricultura

El clima bercianu posibilita una produción perbona de frutes y berces. Asina como una magnífica variedá de vinos, ente los que destaquen los que tán iscritos na Denomación d'Orixe d'El Bierzu.

L'agricultura berciana duxñebrase en dos partes, la del Bierzu Altu y la de la Zona baxa de la Comarca. El Bierzu Altu pecuñarízase pola abundancia d'agricultura de tipu tradicional y a tiempo parcial. Magüer, na Zona baxa, desenrróllase una agricultura moderna cincada nel regadíu y cultivos con bona salida nel mercáu.

Denomaciones d'orixe

• Vinu.
• Manzana Reineta.
• Pera conferencia.
• Pemientu Asáu.
• Castaña.
• Botiellu d'El Bierzu.

Minería

Empreses como Minero Siderurgica de Ponferrada, Uminsa, HCCSA, Grupo Alto Bierzo, Carbones Arlanza, Minas de Valdeloso tienen los sos noyos de trabayu nel Bierzu y na vecina comarca de L.laciana.

Costruición

Trubiecu de los dos prencipales gurupos empresariales de Castiella y Llión. Begar (Begar, UFC, Televisión Castilla y León, Punto Radio y l'antigua empresa de cable Retecal, alquirida ONO) de la mán de José Luis Ulibarri, y del Grupo Martínez Núñez (Teconsa, Proinsa, La Estrella, GH, La Cronica de León) propiedá de José Martínez Nuñez.

Gastronomía

Delles de les sos más típiques bayures culinaries son el botiellu, l'androlla, los pemientos, la manzana reineta, la pera conferencia, les castañes, les zreces y los sos vinos de la variedá mencía baxo la Denominación d'Orixe Bierzu.

Les Médules

Cultura y medios de comunicación

La comarca posee un texíu cultural del que podríase destacar el Campus del Bierzu en Ponferrada, perteneciente a la Universidá de Llión y los movimientos culturales xeneraos por iniciativa del ayuntamientu ponferradín (per aciu de los museos conceyiles y de la Casa de la Cultura), la Obra Social de Caxa España, Ediciones Hontanar ya l'Istitutu d'Estudios Bercianos. Asinamesmo, n'El Bierzu tán presentes les emisores de radio: Ondacero, RNE, Onda Bierzo-Punto Radio, COPE, Radio Bierzo-Cadena Ser, Fórmula Hit; la prensa escrita: Diario de León, La Crónica del Bierzo, Bierzo 7, asina como estremaos medios de prensa dixital y televisiones locales y por Internet: InfoBierzo.com, El Bierzo Digital, Bierzo TV.

Personalidaes

Orixinarios d'El Bierzu son:

• D. Pedro Álvarez Osorio, Conde de Lemos
• Amparo Carballo Blanco, escritora y editora.
• Ramón Carnicer Blanco, escritor.
• Antonio Fernández Morales, escritor.
• Pascual Fernández Baeza, poeta , magistrado y senador.
• San Fructuoso de Braga, santo, patriarca del monacato español, obispo de Dumio y arzobispo de Braga
• El Conde Gatón, primer conde bercianu.
• Enrique Gil y Carrasco, escritor.
• Severo Gómez Núñez, xeneral, diputado, defensor y divulgador d'El Bierzu.
• Jan (Juan López Fernández), dibuxante.
• Álvaro de Mendaña, descubridor de les Islles Marqueses.
• Roberto González-Quevedo sacratariu de la ALLA
• Eva González, escritora del surdimientu asturllionés; en patsuezu.
• Luis del Olmo, periodista.
• Amancio Prada, músicu y compositor
• Antonio Pereira, escritor.
• Valentín García Yebra, filólogu, tradutor y ñembru de la Rial Academia Española de la Llingua.
• Martín Sarmiento, escritor.
• Sampiro, notario, cronista, hestoriador y Obispu d'Astorga.
• Valerio del Bierzo, santu y ermitañu cristianu (s. VII).

En Vilafranca pasa delles estaes el compositor Cristóbal Halffter. Ye a sorrayase que l'enfluyente políticu del sieglu XIX José María Queipo de Llano llevó'l títulu de la llocalidá berciana de Torenu, siendo conocíu na hestoria como Conde de Torenu.

En Páramu del Sil, pasó tres años de la so vida alitándose de tuberculosis, el poeta Ángel González.

Enllaces internos

Dialeutu bercianu

Enllaces esternos

Wikimedia Commons tien archivos rellacionaos con:

El Bierzu

• Conseyu Comarcal del Bierzu
• Hestoria d'El Bierzu
• Istitutu d'Estudios Bercianos
• Cancios tradicionales d'El Bierzu