Tierra de Miranda

Tierra de Miranda

La Tierra de Miranda ye un territoriu históricu asitiáu al noroeste de Portugal, na frontera con España y na so mayor parte pobláu polos falantes del mirandés. Tien alrodiu de 700 km² dividíos en 27 freguesíes repartíes ente'l conceyu de Miranda de l Douro, y una pequeña parte de los de Bumioso, Mogadouro y Bergancia.

Historia

Artículu principal: Historia de la Tierra de Miranda

Prehistoria y romanización

Na edá del fierro tenemos constancia de la presencia de la tribu ástur de los zoeles al traviés d'altares, tables y esteles. Los romanos conquistaron el territoriu haza'l sieglu I influyendo enormemente na cultura de los habitantes.

Edá Media y Moderna

Los asentamientos más vieyos conocíos asitiaos na Tierra de Miranda remóntense ente los sieglos V y VI, baxo'l dominiu suevu. Formaría parte del Reinu de Lleón hasta un tratu ente Alfonso I de Portugal y Fonsu VII de Lleón nel que pasó a formar parte d'un nuevu reinu peninsular, Portugal. Igualmente siguiría tando baxo'l dominiu del conventu d'Astorga. Nos tiempos de la espansión haza'l sur de los reinos cristianos, llegaron órdenes militares portugueses como foi'l casu de los Templarios de Mogadouro o de los Hospitalarios d'Algoso, asina como los Templarios d'Alcanhiças y los frailes de Moreiruola y de San Martin de Castaneda.

Foron d'especial trescendencia les guerres de los sieglos XVII y XVIII. En 1762, l'exércitu español atravesó la frontera, arrasó'l castiellu y llevó a parte la población como cautiva haza Pamplona. La feria de Samiguel, una de les mayores del norte portugués, celebrada cada añu'l 29 de setiembre nel llocal llamáu Bal de S. Miguel, dexó de facese en Bumioso. Esta feria, qu'atrayía a pertueses y españoles, pasó a la ciudá de Zamora onde güei tovía se realiza.

Sieglu XIX endelantre

La Tierra de Miranda vivó un períodu d'aisllamientu hasta 1955, cuando la contrucción del embalse y l'aprovechamientu hidrollétricu del ríu Dueru fexo resurdir a poblaciones como Miranda o Picuote. Nel sieglu XX, tuvieron llugar delles foles migratories que llevaron a gran parte de la población a Brasil (hasta a la década de 1960) y pa Europa (principalmente pa Francia), provocando la desertifición xeneral de les llocalidaes.

Xeografía

L'embalse de Miranda de l Douro

El relieve arispiu d'esti territotiu reflexa enforma la dureza del llabor nel campu y de les principales actividaes económiques des les que depende la so población.

Asina, carauterizamos la so morfoloxía pola erosión pliocénica de la meseta norte inferior y pola esistencia de crestes cuarcítiques nel postreru norte y a la vera de la frontera que los axentes erosivos nun algamaron a destruyir a cuenta de la so dureza. Los suelos tán constutuyíos principalmente por esquistos y en dellos casos por granitos. Miranda tamién se carauteriza polos sos beyos (las arribas), encaxaos y de difícil accesu, que favorez el predominiu de ciertes especies que d'otra forma taríen estintes.

Clima

La Tierra de Miranda asítiase nel noreste tresmontanu, aproximadamente na llatitú 41º 30'N y na llonxitú 6º 17'O. Debío a la so situación xeográfica, el clima d'esta zona ye mui particular, ello que que los mirandeses lu carautericen citando un sabiu refrán "En Miranda hai nueve meses d'iviernu y trés d'infiernu". L'iviernu en Miranda ye fríu, siendo la temperatura mínima media del mes más fríu de 2 graos 30 díes/añu, anque la temperatura pue baxar a los 0º C y inclusu llegar a graos negativos. Per otra parte, el branu ye dafechu opuestu; caliente y secu, siendo la temperatura máxima media del més más caliente 32º C.

Natura

Ver tamién: Parque Natural del Dueru Internacional

No que cinca a la fauna, la Tierra de Miranda poseye uma escomanada bayura y diversidá faunística y cinexética. De fechu ye ún de los últimos refuxos de distintess especies animales rares o amenazaes d'estinción, qu'equí alcuentren bones condiciones pa vivir y reproducise. Ente elles destaquen: la cigüeña negra, l'águila real, la utre, nel casu de les aves y la llebre, el xabaril, l'algaire, el raposu o'l llobu ente los mamíferos.

Na flora destaca la presencia de carrasqueos, rebollales, alceos y sufreres nos terrenos más interiores, mentes que nes zones de riberes alcontramos salgueros, fresnos, llameres y umeros.

Llocalidaes

Esti territoriu compónse por 27 llocalidaes o freguesíes:

Abelhanoso Anfainç Anguirra Atanor Augas Bibas Bal de Frailes Bila Chana de Barceosa Bilar Seco Caçarelhos Campo de Bíboras Cicuiro Cunstantin Dues Eigreijas

Malhadas Miranda L Douro Palaçuolo Paradela Picuote Pruoba Ruolos San Martico de Angueira Sendin Silba Trabanca Uba Zenízio

Habría que sumar dos llocalidaes de cultura asturiano-lleonesa que son:

• Deilon
• Riodonor

Cultura

Representación de los Pouliteiros de Miranda en Lisboa.

Gracies a les sos carauterítiques históriques y orográfiques la cultura mirandesa desenrollóse con una cierta independencia a lo llargo de los sieglos, anque con un claru clater fronterizu.

Idioma mirandés

Na Tierra de Miranda fálase una variedá enmarcada dientro del dominiu asturlleonés conocida como mirandés. Los drechos de los falantes (ente 7000 y 15000) tán reconocíos pola llei 7/99, de xineru del añu 1999.

Los Pouliteiros

Símbolu de la rica y singlar cultura de la Tierra de Miranda son los grupos de pouliteros. Éstos se componen por ocho danzadores y trés músicos (gaita, bombarda y xiblata), el grupu danza faciendo chocar unos palos de 45 cm, d'ehí'l so nome. Créyese que'l so orixe ta nes ancestrales dances guerreres que les tribus ástures prauticaben de manera ritual.

Fiestes

• El 10 de xunetu, a costafecha del día de la ciudá de Miranda, celébrense dellos eventos organizaos pa espardir la cultura mirandesa como son:
• Festival de la canción mirandesa.
• Feria del llibru mirandés.
• Festival de dances mirandeses.
• Festival de Pouliteiros.
• El 14 de xunetu tien llugar el "die de la lhengua Mirandesa", onde s'homenaxea al idioma cola presencia de pouliteiros, gaites o cantares o recitales tradicionales.
• L'últimu domingu de xunetu tien llugar la fiesta n'honor de Santa Llucía, en Miranda L Douro.

Races autóctones

La milenaria adaptación de los animales domésticos al paisaxe mirandés orixinó les siguientes races:

• Raza Bovina Mirandesa
• Raza Churra Gallego-Mirandesa
• Raza Asinina Mirandesa
• Perru de Ganáu Tresmontanu

Turismu

El turismu en Miranda podemos atopar:

• Turismu natural: Destaquen Miradouros y la Tierra de Miranda, dende onde observar el Dueru.
• Turismu comercial: Debío a la cercanía con España y a los precios más baxos. Sicasí, esta actividá tien cada vez menos importancia pola igualación del nivel de vida ente españoles y portugueses, favorecida en parte gracies a l'apertura les fronteres europees.

Enllaces esternos

• Ethnologue report for Miranda do Douro (Mirandese)
• Partidu de la Lhiberdade de l Praino Mirandés
• Comissão Pró-Autonomia do Nordeste Transmontano