Lliteratura del Romanticismu en Francia
El Romanticismu ye una corriente artística d'Europa occidental qu'empecipió a lo llargo del sieglu XVIII en Gran Bretaña (Outre-Enllordie) y n'Alemaña (Outre-Rhin), estendiéndose hasta Francia, Italia y España nel sieglu XIX. En Francia, desenvolvióse mientres la Restauración, como reaición contra les normes del Clasicismu y el Racionalismu filosóficu de los sieglos anteriores.
El Romanticismu básase na vindicación de lo particular frente a lo colectivo, y na rebeldía creadora per parte de los poetes, que quieren terminar coles normes pa la creación lliteraria que prescribe'l Clasicismu, les normes aristotéliques como la regla de les trés unidaes (tiempu, espaciu y aición). Trátase pos d'un movimientu qu'aboga pola llibertá del arte. El Romanticismu caracterízase por una voluntá d'esplorar toles posibilidaes artístiques con un fin espresivu. Asina, puede falase d'una reaición de los sentimientos contra la razón, y contra l'empirismu qu'apondera'l misteriu y lo sobrenatural y que busca un escape nel suañu, la fantasía, lo mórbidu y lo exótico. Los valores estéticos y morales del Romanticismu, les sos idees y tópicos nuevos nun tardaron n'influyir sobro otros ámbitos sobremanera la pintura y la música.
El Romanticismu en Francia representó un movimientu de reaición contrariu a la lliteratura nacional, apoderada por un Clasicismu que yá nun yera esautamente un modelu d'imitación de los clásicos. Nes lliteratures inglesa y alemana el Clasicismu nun calara con tanta intensidá como en Francia o España, anque esta corriente foi predominante nesti sieglu. En Francia, país de tradición grecollatina, la lliteratura siguió siendo clásica hasta muncho depués del Renacimientu.
El pensamientu románticu empezó a formase escontra 1750 y algamó el so términu aproximao un sieglu más tarde. Cuayóse yá nel sieglu XVIII, foi conteníu y hasta refugáu mientres la Revolución y el Primer imperiu, llegó al maduror namái so la Restauración y el so trunfu confirmóse escontra 1830, na Batalla d'Hernani.