Artes marciales de China
| Artes marciales de China |
|
| Llista de les artes marciales de China |
|---|
| Términos |
| Llugares históricos |
|
| Personaxes históricos |
|
| Figures llexendaries |
|
| Rellacionáu |
Les artes marciales de China, conocíes tamién pol términu chinu mandarín de wushu (武術, 武术, wǔshù) y pol más popular de kung fu (功夫, gōngfu), son una riestra d'estilos de llucha qu'aniciaron en China a lo llargo de sieglos.
Terminoloxía
[editar | editar la fonte]Kung fu y wushu son términos mui utilizaos pa referise a les artes marciales chines, pero'l términu chinu qu'equival lliteralmente a “arte marcial chinu” ye Zhongguo wushu (中國武術, zhōngguó wǔshù).
Wushu significa lliteralmente "arte marcial". Ta formáu por dos pallabres: 武, que significa "marcial" o "militar", y 術, que se traduz por "disciplina", "habilidá" o "métodu."
Wushu tamién val pa nomar el modernu deporte del wushu, un deporte d'exhibición y de contautu con formes (套路, tàolù) de mano vacía y d'armes, adaptaes y xulgaes según una riestra de criterios estéticos pa puntuar, desarrolláu dende 1949 na República Popular China.
En cuantes a kung fu, en China pue usase tamién en contestos dafechu estremaos de les artes marciales, y refierse coloquialmente a l'habilidá o talentu individual resultáu de trabayar duro munchu tiempu. Asina que wushu ye un términu más precisu p'actividaes marciales en xeneral.
Historia
[editar | editar la fonte]L'orixe de les artes marciales chines atribúise a la necesidá de la defensa personal, a les téuniques de caza y al entrenamientu militar na antigua China.
Según la lleenda, les artes marciales chines aniciaron na semi-mítica Dinastía Xia hai más de 4000 años. Dizse que l'Emperador Mariellu Huangdi (sieglu XXVII e.C.) foi l'introductor de los primeros sistemes de llucha en China. Descríbese al Emperador Mariellu como un famosu xeneral que, enantes de llegar a ser el cabezaleru de China, escribió llargos trataos de melecina, astroloxía y artes marciales. Ún de los sos principales oponentes foi Chi You, el creador del jiao di, un precursor del modernu arte del shuai jiao.
Historia temprana
[editar | editar la fonte]El Shoubo prauticáu na dinastía Shang (1766–1066 e.C.), y el Xiang Bo (asemeyáu al Sanda) del sieglu VII e.C., son dos exemplos d'antigües artes marciales chines. Nel 509 e.C. Confuciu aconseyó al duque Ding de Lu que'l pueblu prauticara les artes marciales amás de les artes lliteraries; d'esta miente les artes marciales empezaron a prauticase pola xente común al marxe de la milicia o les sectes relixoses. Un sistema de llucha llibre llamáu jueli o jiaoli ye mentáu nel Clásicu de los Ritos (sieglu I e.C.). Esti sistema de llucha inclúi téuniques como golpes, proyeiciones, remanamientos d'articulaciones (Chin Na), y ataques a puntos de presión. El Jiao Di convirtióse nun deporte en tiempos de la Dinastía Qin (221–207 e.C.). El Llibru de Han rexistra que contra los Han Antiguos (206 e.C. – 8 d.C.) estremábase la llucha llibre ensin armes, a la que llama shoubo, pa la que yá había manuales d'instrucción, de la llucha deportiva que llamaben daquella jueli o jiaoli. La llucha ta tamién documentada nel Shǐ Jì, Archivos del Gran Historiador, escritu por Sima Qian (ca. 100 e.C.).[1]
Una teoría del combate a mano vacía, incluyendo la noción de téuniques "dures" y "suaves", espónse na hestoria de la Moza de Yue nos Anales de Primavera y Seronda de Wu y Yue (sieglu V e.C.).[2]
Na Dinastía Tang, los poemes de Li Bai inmortalizaron descripciones de dances con espades. Nes dinastíes Song y Yuan, les cortes imperiales sofitaron competiciones. Los modernos conceutos de wushu foron desendolcaos a fondu haza les dinastíes Ming y Qing.
Influencies filosófiques
[editar | editar la fonte]Les idees asociaes coles artes marciales chines cambiaron cola evolución de la sociedá china y col tiempu adquirieron delles bases filosófiques. Pasaxes del Zhuangzi, un testu taoísta, tán rellacionaos cola filosofía y la práutica de les artes marciales. Créyese que'l so famosu autor, Zhuangzi, vivió nel sieglu IV e.C. El Tao Te Ching, davezu atribuyíu a Lao Zi, ye otru testu taoísta que contién principios aplicables a les artes marciales. Según ún de los testos clásicos del confucianismu, Zhou Li, l'arquería y el manexu de carros foron parte de les "seis artes" de la Dinastía Zhou (1122–256 e.C.) que tamién incluíen los ritos, la música, la caligrafía y les matemátiques) L'Arte de la Guerra, escritu nel sieglu VI e.C. por Sun Tzu, ocúpase direutamente de les téuniques militares de guerra pero contién idees que s'usen nes artes marciales chines.
Los taoístes prauticaben Tao Yin, exercicios físicos asemeyaos al Qigong, ún de los proxenitores del Tai Chi Chuan, polo menos dende'l 500 e.C.[3] En 39–92 d.C., los "Seis Capítulos de la Llucha a Mano Vacía ", fueron incluyíos nel Han Shu (historia de la Dinastía Han Antigua), escritu por Pan Ku. Asina mesmo, el famosu médicu Hua Tuo fixo'l "Xuegu de los Cinco Animales "—tigre, venáu, monu, osu y páxaru— alredor del 220 e.C. La filosofía taoísta y el so enfoque de la salú y l'exerciciu influyeron hasta ciertu puntu nes artes marciales chines. Pue atopase una referencia direuta a conceutos taoístes n'estilos como los "Ocho Inmortales" qu'emplega téuniques de llucha atribuyíes a les carauterístiques de cada inmortal.[4]
Artes marciales de Shaolin
[editar | editar la fonte]L'estilu Shaolin de wushu considérase que ta ente les primeres artes marciales chines institucionalizaes. El primer resclavu de la participación de Shaolin en combate ye una llábana del 728 d.C. qu'atestigua dos ocasiones: una defensa del Monesteriu Shaolin de los bandíos alredor del 610 d.C., y el so posterior papel na derrota de Wang Shichong na Batalla de Hulao nel 621 d.C.. De los sieglos VIII al XV nun se conserven documentos que prueben la participación de Shaolin en combate. Sicasí ente los sieglos XVI y XVII hai como poco cuarenta fontes que dan testimoniu de que los monxos de Shaolin nun solo prauticaben artes marciales, sinón que la práutica marcial llegara a ser un elementu integral de la vida monástica de Shaolin hasta'l puntu de qu'a los monxos abultó-yos necesario xustificalo creando un nuevu canon budista.[5] En dellos xéneros lliterarios de los últimos Ming apaecen referencies de la práutica de les artes marciales en Shaolin: epitafios de los monxos guerreros de Shaolin, manuales d'artes marciales, enciclopedies militares, escritos históricos, rellaciones de viaxes, ficción y poesía. Ensin embargu estes fontes nun nomen dengún estilu específicu orixináu en Shaolin.[6] Éstes, en contraste coles del periodu Tang, refiérense a los métodos Shaolin de combate con armes, incluyendo una habilidá pola que los monxos de Shaolin algamaron sonadía: el palu (gun; gwan en cantonés). El xeneral Ming Qi Jiguang incluyó la descripción del Shaolin Quan Fa ("métodos de boxéu de Shaolin") y téuniques de palu nel so llibru Ji Xiao Xin Shu, que pue traducise como "Nuevu Llibru de Rexistru de Téuniques Efeutives". Cuando esti llibru s'espardió pel este d'Asia, tuvo bien d'influyencia nel desarrollu de les artes marciales en rexones como Okinawa y Corea.
La era moderna
[editar | editar la fonte]Los estilos de llucha que se prautiquen güei foron esporpollando colos sieglos, dempués d'amestar formes que nacieron más serondamente. Hai que citar por exemplu'l Bagua, Boxéu Borrachu, Garra d'Águila, Cinco Animales, Hsing I, Hung Gar, Lau Gar, Monu, Bak Mei Pai, Mantis Relixosa, Grulla Blanca de Fujian, Wing Chun y Tai Chi Chuan.
En 1900-1901 la Sociedá de la Xusta Harmonía llevantóse contra los ocupantes estranxeros y los misioneros cristianos en China. Esta refrontada conozse n'Occidente como Rebelión Boxer por mor de les artes marciales y exercicios prauticaos polos rebeldes. Anque a lo primero rebalbiaben contra la Dinastía Qing manchú, la Emperatriz Dowager Cixi fíxose col control de la rebelión y tentó d'usala contra les potencies foriates. El fracasu de la rebelión traxo diez años más tarde la cayida de la Dinastía Qing y la creación de la República de China.
La visión actual de les artes marciales chines ta fuertemente influyida polos fechos del periodu republicanu (1912–1949), cuando les artes marciales foron faciéndose más accesibles al públicu en xeneral y munchos artistes marciales foron afalaos a abrir la enseñanza del so arte. Daquella dalgunos consideraron les artes marciales como un mediu de promover l'arguyu nacional y construir una nación fuerte. De resultes publicáronse munchos manuales d'entrenamientu, creóse una academia de formación, organizáronse dos esámenes nacionales y equipos de demostración viaxaron al estranxeru, y per tola China y en varies comunidaes chines del esterior formáronse numberoses asociaciones d'artes marciales. L'Academia Central Guoshu (Zhongyang Guoshuguan), creada pol gobiernu en 1928, y l'Asociación Atlética Jing Wu, fundada por Huo Yuanjia en 1910, son exemplos d'organizaciones que promovíen una sistematización de les artes marciales chines. El gobiernu republicanu entamó a partir de 1932 una serie de competiciones provinciales y nacionales pa promover les artes marciales de China. En 1936, nos XXI Xuegos Olímpicos de Berlín, un piñu d'artistes marciales chinos demostró'l so arte énte una audiencia internacional per primer vez. Col tiempu estos fechos habíen llevar a la consideranza popular de les artes marciales como deporte.
Col fin de la Guerra Civil China y la fundación de la República Popular China el 1 d'ochobre de 1949, les artes marciales chines ensamaron rápido pel mundu. Munchos artistes marciales famosos escoyeron desarreyase de la RPC y degolar a Taiwán, Ḥong Kong,[7] y otres partes del mundu. Estos maestros principiaron a enseñar nel sen de les comunidaes chines del esterior, pero col tiempu ensamaron les sos enseñances pa incluyir xente d'otros grupos étnicos.
Dientro China torgóse la práutica de les artes marciales tradicionales nos años gafos de la Revolución Cultural China (1969–1976). Lo mesmo que munchos otros aspeutos de la vida tradicional, les artes marciales sufrieron na República Popular China una tresformación radical col envís d'alliniales cola doctrina revolucionaria maoísta. La RPC promovió'l deporte estatalizáu del Wushu, pa sustituyir a les escueles independientes d'artes marciales. Con esti nuevu deporte de competición desaniciábense lo que se consideraben aspeutos potencialmente soversivos de la defensa personal y de los llinaxes familiares de les artes marciales chines. Tamién afalaben l'usu del términu Kuoshu (o Guoshu, que significa "les artes de la nación"), en vez del más coloquial de gongfu, nun esfuerciu p'asociar más ciñidamente les artes marciales col arguyu nacional más que colos llogros individuales. En 1958 el gobiernu estableció l'Asociación de Wushu de Toa China como organización reguladora del entrenamientu de les artes marciales. La Comisión Estatal China d'Educación Física y Deportes dirixó la creación d'un sistema nacional de Wushu qu'incluyía formes estándar, currículum d'enseñanza y niveles d'instrucción. Introdúxose'l Wushu tanto na escuela secundaria como na universidá. El desaniciu de la enseñanza tradicional afloxó na Era de Reconstrucción (1976–1989), cuando la ideoloxía comunista volvióse más bonaz pa con otros puntos de vista. En 1979 la Comisión Estatal d'Educación Física y Deportes creó un grupu operativu especial pa reevaluar la enseñanza y la práutica del Wushu. En 1986 fundóse l'Institutu Nacional Chinu d'Investigación del Wushu como autoridá central pa la investigación y alministración de les actividaes de Wushu na República Popular China. Los cambeos nes polítiques y actitúes gubernamentales haza los deportes en xeneral empobinaron a pesllar la Comisión Estatal de Deportes (l'autoridá cimera nesa materia) en 1998. Esti piesllu viose como un intentu de despolitizar parcialmente los deportes organizaos y enveredar les polítiques deportives chines a un enfoque más orientáu al mercáu. De resultes d'estos factores sociolóxicos cambiantes en China, el gobiernu chinu ta afalando los puntos de vista de los estilos de Wushu tanto tradicionales como modernos.[8] Les artes marciales chines son agora un elementu integrante de la cultura china.
Estilos
[editar | editar la fonte]Ver tamién: Llista de les artes marciales de China
China tien una llarga historia de tradiciones marciales qu'inclúi cientos d'estilos diferentes. Nos últimos dos mil años espoxigaron munchos estilos, caún col so particular conxuntu de téuniques ya idees. Hai tamién temes que son comunes a los diferentes estilos, que davezu se clasifiquen en "families" (家, jiā), "sectes" (派, pai) o "escueles" (門, men). Hai estilos con movimientos miméticos d'animales y otros inspiraos en varies filosofíes, mitos y lleendes de China. Dellos céntrense sobre too nel aprovechamientu del qi, mientres qu'otros fáenlo na competición.
Les artes marciales chines pueden dixebrase en categoríes pa diferenciales. Por exemplu hai artes marciales esternes y internes. Tamién pueden categorizase por fasteres, como en nortices y sureñes, según la parte de China u s'orixinaren, al norte o al sur del Ríu Yangtze (Chang Jiang); inclusive pueden clasificase según la provincia o la ciudá. La diferencia que más rescampla ente los estilos nortizos y sureños ye que los nortizos tienden a centrase en pataes rápides y potentes, saltos y movimientos en xeneral fluidos y rápidos, mentanto los sureños dan-y más importancia a unes téuniques fuertes de mano y brazu, a postures estables y fites y a desplazamientos rápidos. Exemplos d'estilos nortizos son el changquan y el xingyiquan. Exemplos d'estilos sureños son el Bak Mei, Choy Li Fut y Wing Chun. Les artes marciales chines pueden tamién clasificase según la relixón, los estilos d'imitación, y los estilos familiares como'l Hung Gar. Estrémense tamién los entrenamientos de los diferentes grupos de les artes marciales chines al marxe del tipu de clasificación. Pero pocos artistes marciales con esperiencia faen una distinción clara ente estilos internos y esternos, o suscriben la idea de que los sistemes nortizos básense sobre too en pataes y los sureños más en téuniques potentes coles estremidaes superiores. La mayoría de los estilos contienen elementos tanto duros como suaves, al marxe de qué nome reciban. Analizando les diferencies acordies colos principios del yin y el yang, los filósofos dicen que la falta de cualquier d'ellos desequilibra les habilidaes del prauticante o les fai deficientes, darréu que'l yin y el yang por sí solos namái que son la metá d'un completu. Si eses diferencies esistieron alcuando, esborráronse dempués.
Entrenamientu
[editar | editar la fonte]L'entrenamientu de les artes marciales chines consta de los siguientes componentes: bases, formes, aplicaciones y armes; los distintos estilos dan-y distinta importancia a cada componente. Además la mayoría de les artes marciales chines tienen mui en cuenta la filosofía, la ética y incluso la práutica médica. Un sistema d'entrenamientu completu tien que tener tamién en consideranza les actitúes y cultura de China.
Bases
[editar | editar la fonte]Les bases son una parte cimera de cualquier entrenamientu marcial, yá qu'ensin elles un estudiante nun ye quien a progresar a les téuniques más avanzaes. Les bases constrúinse de cutiu con téuniques rudimentaries, incluyendo guardies, y exercicios de condicionamientu. L'entrenamientu básicu pue incluyir movimientos simples que se faen repetidamente; otros exemplos d'entrenamientu básicu son los estiramientos, meditación, golpes, proyeiciones, o blincos. Ensin músculos fuertes y flexibles, el manexu del Qi o respiración, y la mecánica corporal correuta, faise imposible qu'un estudiante progrese nes artes marciales chines. Un dichu común sobre l'entrenamientu nes artes marciales chines reza: “L'entrenamientu esternu inclúi les manes, los güeyos, el cuerpu y les guardies. L'entrenamientu internu inclúi'l corazón, l'espíritu, la mente, l'aliendu y la fuercia.”
Formes
[editar | editar la fonte]Formes, o taolu (套路, tào lù), son series de movimientos predeterminaos combinaos pa poder prauticalos como un conxuntu llinial de movimientos. Les formes teníen n'orixe l'envís de caltener el llinax d'una rama particular d'un estilu, y enseñábense davezu a estudiantes avanzaos que fueren escoyíos pa caltener el llinax del arte. Les formes taben diseñaes pa contener exercicios concretos, representativos y orientaos al acondicionamientu, que pudieren estrayese, probase y entrenase polos estudiantes en sesiones de sparring.
Güei munchos consideren que les formes son una de les más importantes práutiques nes artes marciales chines. Tradicionalmente xugaron un papel más pequeñu nel entrenamientu de l'aplicación en combate, y foron clisaes pol sparring, l'exercitamientu y l'acondicionamientu. Les formes van construyendo adulces la flexibilidá del prauticante, la fuercia interna y esterna, la velocidá y la forma física, y aprienden equilibriu y coordinación. Munchos estilos contienen formes qu'usen una bona riestra d'armes de tamañu y tipu variaos, usaes a una o dos manes. Tamién hai estilos que se centren nun determináu tipu d'arma. Les formes pensáronse pa ser práutiques, utilizables y aplicables, asina como p'amenar la fluidez, la meditación, la flexibilidá, l'equilibriu y la coordinación. Óyese de cutiu a los maestros dicir: “entrena la to forma como si fuera sparring, y fai sparring como si fuera una forma."
Xeneralmente hai dos tipos de formes nes artes marciales chines. Les más comunes fáense en solitariu por un únicu estudiante. Tamién hai formes de "sparring", que son conxuntos de llucha coreografiaos fechos por dos o más persones. Les formes de sparring diseñáronse pa familiarizar a los lluchadores principiantes coles midíes y conceutos básicos del combate, y pa valir como arbíes d'exhibición de la escuela. Les formes de sparring qu'empleguen armes son especialmente útiles p'aprender a los estudiantes el llargor, l'espaciu y la téunica requeríos pa remanar un arma.
Aplicación
[editar | editar la fonte]Aplicación refierse a la utilización práutica de téuniques marciales. Idealmente les artes marciales chines básense na eficiencia y na eficacia. L'aplicación inclúi exercicios non cooperativos, como les manes qu'emburrien en munches artes marciales internes, y el sparring que se fai con variedá de niveles de contautu y regles.
Cuándo y cómo s'enseñen les aplicaciones difier en cada estilu. Anguaño munchos estilos empiecen a aprender a los nuevos estudiantes con exercicios nos que cada estudiante dispón d'una mena predeterminada de téunica y combate pa usar; estos exercicios son davezu semi-cooperativos, ello ye qu'un estudiante nun ufre resistencia activa a la téunica col envís de permitir la so execución demostrativa y clara. N'exercicios más práuticos, aplíquense unes poques regles y los estudiantes prautiquen cómo reaicionar y responder. 'Sparring' refierse al aspeutu más importante del entrenamientu d'aplicación, asemeyando una situación de combate qu'inclúi normes y regles col aquel d'amenorgar el riesgu de dañu importante pa los estudiantes.
Les competiciones de sparring nes artes marciales chines inclúin les tradiciones de Lei tai (llucha en plataforma elevada) y Sanda o sanshou. Los leitai yeren combates públicos de desafíu qu'apaecieron pela primer vez na Dinastía Song. L'oxetivu yera sacar al oponente d'una plataforma elevada por cualesquier mediu. San Shou y Sanda representen la evolución moderna d'esos torneos de Lei Tai, pero con regles pa reducir el riesgu de mancadures series. Munches escueles d'artes marciales chines enseñen o trabayen coles normes de San Shou y Sanda, faciendo por incorporar los movimientos, carauterístiques y teoría del so estilu. Los artistes marciales chinos tamién compiten en deportes de combate non chinos o mistos, como boxéu, kickboxing y artes marciales mistes.
Entrenamientu d'armes
[editar | editar la fonte]La mayoría de los estilos chinos tamién entrenen un ampliu arsenal d'armes p'acondicionar el cuerpu y pa exercitar la coordinación y la estratexa. L'entrenamientu d'armes (qìxiè 器械) faise xeneralmente dempués de que l'estudiante seya amañosu nes bases, formes y entrenamientu de les aplicaciones. La teoría básica del entrenamientu d'armes considera que l'arma ye una estensión del cuerpu, y que tien los mesmos requisitos de desplazamientu y coordinación corporal que les bases. El procesu del entrenamientu d'armes entama con formes, formes por pareya, y dempués aplicaciones. La mayoría de los sistemes tienen métodos d'entrenamientu pa caúna de les dieciocho armes del wushu arriendes de preseos especializaos propios del sistema.
Ética
[editar | editar la fonte]Les escueles chines tradicionales d'artes marciales, como los famosos monxos de Shaolin, avezaben tratar l'estudiu de les artes marciales non solo como un mediu de defensa personal o entrenamientu mental, sinón tamién como un sistema éticu. Wude (武德) pue tornase como "moralidá marcial" y constrúise coles pallabres "wu" (武), que significa marcial, y "de" (德), que significa moralidá. Wude ocúpase de dos aspeutos: "moralidá nel actuar" y "moralidá de pensamientu". La moralidá nel actuar refierse a les rellaciones sociales; la moralidá de pensamientu significa cultivar l'harmonía interior ente la mente emocional (Xin, 心) y la mente intelixente (Hui,慧). La fin última ye algamar la “non polaridá” (Wuji, 無極, mui rellacionáu col conceutu taoísta de wu wei), onde intelixencia y emoción tán n'harmonía.
Cultura popular
[editar | editar la fonte]Na cultura popular pueden atopase referencies a los conceutos y usu de les artes marciales chines. Históricamente la influyencia de les artes marciales chines pue atopase en llibros y nes artes de representación específiques d'Asia. Estes influyencies aportaron va poco a les películes y a la televisión, que lleguen a muncha más audiencia. De resultes les artes marciales chines trescendieron les sos fontes étniques y tienen un interés global.
Les artes marciales xueguen un papel cimeru nel xéneru lliterariu conocíu como wuxia. Esti tipu de ficción básase en conceutos chinos de fidalguía, una sociedá d'artes marciales dixebrada (wulin) y un tema central qu'inclúi les artes marciales. Atópense hestories wuxia tan ceo como nos sieglos II y III e.C., pa la Dinastía Tang empiecen a ser populares y pa la Dinastía Ming evolucionen a la forma de noveles. Esti xéneru ye tovía bien popular en bona parte d'Asia y ye la principal influyencia pa la perceición pública de les artes marciales.
Pueden tamién atopase influyencies de les artes marciales na ópera china, de la que la ópera de Pekín ye ún de los exemplos más conocíos. Esta forma popular de drama naz na Dinastía Tang y sigue siendo un exemplu de la cultura china. Na ópera china pueden atopase dellos movimientos d'artes marciales, y tamién hai artistes marciales qu'actúen en óperes chines.
Modernamente les artes marciales chines dieron llugar al xéneru cinematográficu conocíu como cine d'artes marciales. Les películes de Bruce Lee fueron responsables del inicial españíu de la popularidá de les artes marciales n'Occidente nos años 1970.
Artistes marciales y actores como Jet Li y Jackie Chan caltienen vivu l'interés poles películes d'esti xéneru. Los filmes chinos d'artes marciales avecen conocese como "películes de kungfu", y tovía tienen dalguna sonadía.
N'Occidente'l kung fu llegó a ser un productu común nel xéneru d'aición, y apaez en munchos filmes que xeneralmente nun se consideren d'artes marciales. Por exemplu la triloxía Matrix, Kill Bill, y Transporter.
Los temes d'artes marciales tamién pueden alcontrase nes cadenes de televisión. Una serie de televisión de los Estaos Xuníos de principios de los 1970 llamada Kung Fu tamién sirvió pa popularizar les artes marciales chines en televisión. Con 60 episodios a lo llargo de tres años, foi unu de los primeros espectáculos televisivos norteamericanos n'intentar sopelexar la filosofía y la práutica de les artes marciales chines. L'emplegu de téuniques de les artes marciales chines pue atopase agora na mayoría de les series televisives d'aición, anque solo de cuando en vez ye retratada a fondo la filosofía de les artes marciales de China.
Referencies
[editar | editar la fonte]- ↑ «Academia Encounters the Chinese Martial arts». China Review International 6 (2): páxs. 319–332. Fall 1999. http://muse.jhu.edu/demo/china_review_international/v006/6.2henning.pdf.
- ↑ trans. and ed. Zhang Jue (1994), páxs. 367–370, cited after Henning (1999) p. 321 and note 8.
- ↑ «The Evolution of T'ai Chi Ch'uan». The International Magazine of T'ai Chi Ch'uan (Wayfarer Publications) 21 (2). April 1997.
- ↑ «Druken Fist». Black Belt (Active Interest Media): p. 77. September 2004. https://books.google.ca/books?id=wtsDAAAAMBAJ&pg=PA80&dq=eight+immortals+kung+fu&lr=&cd=3#v=onepage&q=eight%20immortals%20kung%20fu&f=false.
- ↑ «Epigraphy, Buddhist Historiography, and Fighting Monks: The Case of The Shaolin Monastery». Asia Major Third Series 13 (2): páxs. 15–36. 2000.
- ↑ «Ming-Period Evidence of Shaolin Martial Practice». Harvard Journal of Asiatic Studies (Harvard-Yenching Institute) 61 (2): páxs. 359–413. December 2001. http://jstor.org/stable/3558572.
- ↑ Amos, Daniel Miles (1983) "Marginality and the Hero's Art: Martial artists in Hong Kong and Guangzhou (Canton)", University of California at Los Angeles (US), July 1984, UM 8408765
- ↑ Minutes of the 8th IWUF Congress, International Wushu Federation, December 9, 2005
| Control d'autoridaes |
|
|---|
Datos: Q3705105
Multimedia: Martial arts of China