Defensa personal

De Wikipedia

La defensa personal ye un conxuntu de midíes en visu a la defensa d'unu mesmu o de les sos propiedaes, o a protexer a otros de l'agresión física que los amenaza. L’usu del conceutu de llexítima defensa como xustificación llegal del usu personal de la fuercia énte’l peligru pue atopase en munchos códigos llegales[1], pero la so interpretación estrémase de manera. Xeneralmente pa ser esculpáu de cualesquier clas de delitu que pudiera provocar lesiones (como asaltu, asaltu con violencia y homicidiu) usando la xustificación de la defensa personal, ye menester que’l defensor pruebe la esistencia d'agresión illexítima o estáu de necesidá, ello ye que taba nuna circunstancia na que nun defendese nel intre había llevalu de secute a la muerte, o a daños graves a la so persona o propiedá, y qu'emplegara pa torgalo medios proporcionales.

En política, el conceutu de defensa nacional o coleutiva pa responder a una agresión armada refierse a una guerra defensiva entamada pol estáu, y ye ún de los posibles criterios de la teoría de la “guerra xusta”.

Defensa personal física[editar | editar la fonte]

Componentes[editar | editar la fonte]

La defensa personal física tien tres componentes: téuniques, métodos d'entrenamientu y estratexes. Les téuniques consisten en movimientos, bloqueos y contrataques. El movimientu primariu ye fuxir primero de lluchar, y, cuando nun queda otro, bloquiar tolos golpes que se pueda y cutir darréu en partes vitales del cuerpu. Los métodos d'entrenamientu son les habilidaes que los estudiantes de defensa personal prautiquen pa deprender a usar les téuniques. Y la estratexa refierse a la planificación de cómo y cuando usar les téuniques. Ensin estos tres componentes en xunto, la defensa personal física ye fácil que falle.

Ensin armes[editar | editar la fonte]

Munchos estilos d'artes marciales prautíquense pa la defensa personal o inclúin téuniques de defensa personal. Dellos estilos entrenen sobre too con esti oxetivu, mientres qu'otros pueden tener una aplicación eficaz pa la defensa personal. Pa meyor valir pa esti fin, munches escueles modernes d'artes marciales usen una combinación d'estilos y téuniques de les artes marciales, y davezu diseñen a midida l'entrenamientu pa l'autodefensa al envís d'axustalu a los moos de vida, ocupación, edá, xéneru, y capacidaes físiques y mentales de los prauticantes.

De cutiu les téuniques de defensa a mano vacía más eficaces son un puñáu d'habilidaes executaes de forma cenciella y ensin procuru que s’usen pa “dar y marchar”, más qu'habilidaes percomplexes y precises qu'avecen esteriorase baxo presión. El deprendimientu d'estes téuniques de defensa a mano vacía céntrase n’aumentar la confianza y la conciencia, non en vencer a un oponente. Una bona enseñanza nesti tipu de defensa va aportar téuniques simples y d'altu impautu en visu a distrayer momentáneamente o a desequilibrar al atacante pa que la víctima pueda fuxir. Otra téunica, peligrosa si nun ye mui espertu’l prauticante, empara de namái pegar golpiando rápido, ye esperar a que l'otru faiga un movimientu y entós usar un contrataque básicu que lu dexe ensin proteición. Les táutiques de combate cuerpu a cuerpu, como’l Kapap o’l Krav Maga, aprienden ataques preventivos pa cuando yá ta claro que la situación tresllomba’l puntu de non retornu y l'amarraza ye inminente. Siempre ye meyor atacar primero, solmenando un refileru de golpes escomanaos nel menor tiempu posible, y escapar.

Con armes[editar | editar la fonte]

En dellos países ye llegal usar o llevar armes (por exemplu cuchiellos, armes de fueu o palos) en visu a la defensa personal. Pero n’otros esto pue ser illegal o riquir una llicencia[2], o bien pue ser llegal llevar encima unos oxetos ensin llicencia, mientres qu'otros, sobre too armes de fueu, non. Les torgues pal usu d'armes pa la defensa personal son una fonte d'alderique en dellos países, oponiéndose los derechos a la defensa propia escontra los esfuercios pa combatir el crime violento per aciu de restrinxir l'accesu a les armes comunes.

Los oxetos cotidianos, como bates de béisbol o espráis, pueden usase tamién como armes improvisaes pa la defensa personal, pero nun son seique tan efeutives como les armes construyíes pa esti propósitu. Delles armes non mortales, como’l Kubotan, diseñáronse tamién p'asemeyar oxetos cotidianos, como los llaveros[3].

Los espráis de pimienta y les pistoles d'electrochoque son alternatives non mortales pa la defensa personal, llegales en dellos países. Los espráis de pimienta lleguen a alcanzar los 6 metros, y actúen esquitando un líquidu o espluma que contién axentes químicos altamente irritantes. Les pistoles d'electrochoque de bolsu funcionen provocando un choque llétricu incapacitante, y pa que sían eficaces tienen que facer contautu col asaltante, quitando los “tasers”, qu'empleguen electrodos refundíos por gas coneutaos al “taser” por unos alambres conductores que tresmiten el choque.

Otres formes[editar | editar la fonte]

Esfrecimientu del conflictu[editar | editar la fonte]

La “defensa personal verbal”, que dalgunos autores llamen “yudu verbal”[4], refierse a usar les pallabres pa prevenir, esfrecer, o torgar un intentu d'asaltu. Ye una manera d'usar les pallabres como armes. Esti tipu de resolución de conflictos remana l'usu de la voz, el tonu y el llinguax corporal pa calmar una situación potencialmente violenta enantes de que la violencia se faiga real. Davezu esto inclúi téuniques como dir a un requexu que facilite’l tiempu muertu, y empobinar la espirica a individuos del grupu que tean más tranquilos.

Katy Mattingly define la “defensa personal verbal” nel sen de simplemente dicir non o refugar repetidamente un pidimientu o dicir lo que se quier de daquién que trespasa una llende, o pue suponer un escenariu más complicáu nel que ye menester refugar engarrase verbalmente con daquién lladín, poner llendes y finar la espirica.[5]

Suzette Haden Elgin, autora de “L’Arte Suave de la Defensa Personal Verbal”, opina que la defensa personal verbal funciona contra los ocho tipos más comunes de violencia verbal, y guía y refuga potenciales amarraces verbales. [6]

Escape[editar | editar la fonte]

Pa la defensa personal ye perimportante ser conscientes de les situaciones potencialmente peligroses y evitales. Los atacantes avecen ser más altos y más fuertes, y normalmente o van armaos o tienen un cómpliz. Estos factores faen que davezu nun seya posible vencer en combate al atacante. Al envís d'atacar, un enemigu pue considerar tres elementos: deséu, distancia y decisión. Si ún d'estos elementos pue desaniciase, un ataque pue evitase ensin recurrir a la defensa personal física.[7] Cuando nun ye posible evitar l'amarraza, alcuéntrase davezu una oportunidá meyor lluchando pa escapar. Estos métodos llámense de cutiu “téuniques de fuximientu”.[8]

Alarmes personales[editar | editar la fonte]

Les alarmes personales son una forma de defensa personal pasiva. Una alarma personal ye un aparatu pequeñu, de bolsu, qu'emite soníos fuertes, altos y de llargu alcance, pa refugar a los atacantes por mor de que’l ruíu va llamar l'atención de los pasiantes. Les alarmes de los nácaros tamién pueden funcionar como llocalizadores o aparatos d'alarma, como los que provoquen alerta nes piscines, que s’usen p'aidar a prevenir situaciones peligroses arriendes d'alloñar a posibles agresores.[9]

Galería[editar | editar la fonte]

Referencies[editar | editar la fonte]