Wing Chun

De Uiquipedia
Saltar a: navegación, buscar
Wing Chun
Yip Man.jpg
Yip Man, maestru de Bruce Lee y aniciador de la familia más grande y esperdigada del Wing Chun.
Tamién Wing Chun Kuen, Wing Tsun, Ving Tsun y romanizaciones de toa triba (wing tsung, weng chun, ving tjun, wing tzun, etc.)
Enfoque Golpes, bloqueos, agarres
País d’orixe Flag of the People's Republic of China.svg China
Fundador Ng Mui acordies a la llenda más estendida
Prauticantes famosos Sum Nung, Yip Man, Bruce Lee
Artes descendientes Jeet Kune Do
Deporte olímpicu Non

El Wing Chun (詠春, pinyin: yǒng chūn, “cantar de primavera”), romanizáu tamién como Ving Tsun o "Wing Tsun" como formes más esitoses d’ente les munches que se-y tienen dao (y escritu delles veces colos caráuteres 永春, "primavera eterna") ye un arte marcial chinu y una forma de defensa personal qu’emplega tanto los golpes como los agarres y ta especializáu nel combate cuerpu a cuerpu.

Los caráuteres alternativos 永春 "primavera eterna" tán venceyaos tamién a otres artes marciales del sur de China, como’l Jee Shim Weng Chun Kung-fu (Yong Chun) y la Grulla Blanca Weng Chun (Yong Chun).

Hestoria[editar | editar la fonte]

Les menciones más tempranes del Wing Chun daten del periodu de Leung Jan (1826—1901).

La lleenda más conocida, popularizada por Yip Man, refierse a una moza llamada Yim Wing Chun, pela dómina que siguió a la destrucción pol gobiernu Qing del templu Shaolin del Sur y templos asociaos. Dempués de refugar la ufierta de casoriu del señor de la guerra llocal, esti díxo-y que solo zallaba si ella yera quien a vencelu nun combate d’artes marciales. Wing Chun pidió-y a una monxa budista llamada Ng Mui, una de les sobrevivientes de Shaolin, que-y deprendiera boxéu. El so estilu, inda ensin nome, llogró que Yim Wing Chun venciera al señor de la guerra. Más tarde casóse con Leung Bac-Chou y deprendió-y l’estilu, al qu’él punxo’l nome d’ella.

Como’l sistema se desendolcó demientres la resistencia Shaolin y Ming a la Dinastía Qing, foron munches les llendes sobre’l creador del Wing Chun sopelexaes al envís de tracamundiar al enemigu, incluyendo la hestoria de Yim Wing Chun. Quiciabes esto esplique por qué naide foi quien a determinar con tientu’l creador o creadores del Wing Chun.

Principios[editar | editar la fonte]

Los ocho principios del Wing Chun creen un sistema de defensa agresiva que consiste n’adautase darréu a los movimientos, la fuercia y la forma de lluchar d’un atacante. Estos principios son cenciellos enforma. Sicasí riquen d’años de práutica con un enseñante espertu tanto de les formes del Wing Chun, como del Luk Sao, del Chi Sao y sobre too del Go Sao, en visu a facer que’l cuerpu asimile reflexos condicionaos y seya a aplicar l’arte en situaciones reales.

Según Keith R. Kernspecht son los siguientes:

Principios de combate[editar | editar la fonte]

Si’l camín ta llibre avanza

Avanzar cubiertos haza l’oxetivu ye’l principiu básicu. Si l’adversariu nun ta bien cubiertu pola so propia guardia, será golpiáu de secute nos muérganos vitales.

Si’l camín ta zarráu “apégate” al adversariu

Si l’atacante tenta de reaicionar, nun hai que dexar pasar la oportunidá de francer y organizar un contrataque. Hai que s’apegar a él como un guante y, ensin dexa-y tiempu pa zallar y organizase, siguir atacándolu.

Si l’adversariu avanza, cedi

Normalmente un atacante ye físicamente más fuerte que la so víctima, y por ello nel Wing Chun s’entrena pa sacar lo meyor de nueso sobre fuercies que nos son superiores. El Chi sao apriende simplemente a "esvaciase" cuando un ataque ye demasiao fuerte, y a reaicionar cambiando’l propiu ángulu y la propia posición a respeutive l’adversariu.

Si l’adversariu marcha síguilu

Inclusive si un ataque de nueso ye refugáu, hai tiempu hasta’l que-y sigue. El Chi sao entrena los reflexos pa sentir nel actu cualesquier "buecu" na defensa del adversariu y p’aprovechalu darréu, ensin atetuyar.

Principios de fuercia[editar | editar la fonte]

Llibérate de la to fuercia

Hai que tar relaxaos, ensin tensión, pa movese con fluyidez y reaicionar a les aiciones del atacante. Suponiendo que nun podemos ganar l’amarraza colos músculos, la nuesa propia fuercia nun tien que convertise nun frenu, sinón que tenemos que dexar la musculatura relaxada, pa podese mover de la manera más continua y rápida posible.

Llibérate de la fuercia del adversariu

Esto ta bien esplicao nel tercer principiu de combate. Cuando un atacante tenta d’usar la fuercia pa imponese, nun hai qu’opone-y una fuercia asemeyada, sinón qu’hai que dir al vaciu de fuercia del ataque y usala darréu escontra d’él (como reza’l principiu siguiente).

Usa la fuercia del adversariu

Pola práutica se sabe que, per aciu d’absorber la fuercia del adversariu, el nuesu contrataque tien munchu más puxu, porque pierde la so enerxía nes nueses estremidaes que son como muelles que tán comprimíos y que, poro, son a devolver esa enerxía xusto cuando son lliberaos.

Suma la to fuercia a la fuercia del adversariu

Amás de la enerxía atropada pol contautu col atacante, nos nuesos golpes tovía descargamos tola fuercia que reservábamos.


Arriendes de los ocho principios esisten otros tamién fundamentales:

  • El principiu de la llinia central (“Zhengwuxian yuanli” o “Zhongxian lilun”).
El principiu de la llinia central
  • El principiu de la simultaneidá d’ataque y defensa (Shou gong tongqi, atacar y defender a un tiempu).
  • El principiu de la pina.
  • El principiu de la "rabasera continua".
  • El principiu del muelle.
  • El principiu de les cuatro puertes (Simen yuanli).
  • El principiu del coldu fixu ( Mai zheng lilun, teoría del coldu escondíu, y Shou zheng lilun, teoría del coldu recoyíu).

Dalgunos d’estos principios encaxen mutuamente. Dependiendo de la escuela d’orixe, dellos principios pueden caltenese y otros non, o pue que dalgunos tean conceutualmente comprendíos n’otros. Quiciabes los más conocíos, aceutaos y usaos son los tres primeros (Llinia central, Simultaneidá d’ataque y defensa, Pina).

Mirándolu de cerca, lo carauterístico del estilu son los principios. Estes "pautes" tienen na práutica del Wing Chun el mesmu valir que la correición de les téuniques. Nel Wing Chun nun pue haber téuniques ensin principios.

Les formes del Wing Chun[editar | editar la fonte]

Polo xeneral les formes del Wing Chun son 6, polo menos na corriente de Yip Man (qu’en realidá tamién inclúi otres, como la forma de piernes).

Les primeres tres apriéndense a mano vacía, la cuarta sobre’l moñecu de madera, la quinta cola piértiga, y la sesta colos llamaos “cuchiellos de caparina”.

Acordies cola escuela Leung Ting Wing Tsun son les siguientes, colos nomes emplegaos pola escuela y les sos derivaciones:

  1. Siu Nim Tau ("Pequeña Idea")
  2. Cham Kiu ("Brazos en Ponte")
  3. Biu Tze ("Deos que traviesen")
  4. Muk Yan Chong (Moñecu de madera)
  5. Luk Dim Boon Kwun (palu de 6 puntos y mediu)
  6. Bart Cham Dao (cuchiellos de caparina)

Como yá se dixo Yip Man enseñaba tamién la forma de piernes:

  • Sap Lok Gerk Fat (combinación de 16 pataes)

Pue sentise de cutiu que s’enseñen otres formes como les que faen usu del Qigong; por casu:

  • Cheun Quen (Puñu de flecha)
  • Sar Pao Quen (Sacu de paré)
  • Qigong tao quen (Qigong)

Términos del Wing Chun[editar | editar la fonte]

Trescripción
de la pronunciación cantonesa
Caráuteres simplificaos
Caráuteres tradicionales
Cantonés
(Trescripción en Yale)
Mandarín
(Trescripción en Pinyin)
Significáu
bong sao 膀手 (son iguales) bong2 sau2 bǎngshǒu manes d’ala
cham/jam sao 沈手 沉手 cham4 sau2 chénshǒu mano que caye, mano que pesa, mano fonda, mano que se funde
chi sao 黐手 (son iguales) chi1 sau2 chǐshǒu manes pegañoses, manes apegaes
fook sao 伏手 (son iguales) fuk6 sau2 fúshǒu mano de control/que controla, mano en ponte
gaun sao 耕手 (son iguales) gang1 sau2 gēngshǒu mano qu’esvía cortando
gerk geuk3 jiǎo Pierna
jut sao 窒手 (son iguales) jat6 sau2 zhìshǒu mano que resga
huen sao 圆手 圓手 yun4 sau2 yuánshǒu mano que fai un movimientu circular
kuen (son iguales) kyun4 quán puñu
lap sao 拉手 (son iguales) laap6 sau2 lāshǒu mano que tira agarrando
man sao 问手 問手 man6 sau2 wènshǒu mano que pescuda
pak sao 拍手 (son iguales) paak3 sau2 pāishǒu mano qu’esvía cutiendo
sao (son iguales) sau2 shǒu mano
sifu 师父 師父 si1 fu6 shǐfù maestru y padre, conectao a la idea de que’l propiu maestru se convierte en padre
si-hing hermanu mayor (títulu honoríficu)
tan sao 滩手 攤手 taan1 sau2 tānshǒu mano qu’esvía abriéndose/mano qu’esvía amosando
wu sao 护手 護手 wu6 sau2 hùshǒu mano que protexe/defende

Referencies[editar | editar la fonte]