Napoleón Bonaparte

De Uiquipedia
Saltar a: navegación, buscar
Gtk-find-and-replace.svg
Esti artículu necesita una revisión por un correutor qu'ha d'ameyorar la so ortografía, la so gramática, la so sintaxis o'l so vocabulariu. Tamién, iguar les referencies o semeyes o con enllaces francíos.
(ver la llista completa d'artículos pa correxir)
Uiquipedia:Llista d'artículos que toa Wikipedia tien que tener
Uiquipedia:Artículos destacaos
Napoleón nel so estudiu, obra de Jacques-Louis David (1812)

Napoleón Bonaparte (15 d'agostu de 1769 - 5 de mayu de 1821) foi emperador de Francia, militar y home d'estáu pertenecíente a la Casa de los Bonaparte. Xeneral na dómina de la Revolución Francesa, foi artífiz del golpe d'Estáu de 18 de Brumario convirtiéndolu en gobernante de Francia como Primer Cónsul de la República dende Payares de 1799 a mayu de 1804, pa convertise posteriormente n'Emperador y Rei d'Italia dende mayu de 1804 a abril de 1814 y nuevamente por pocu tiempu dende marzu hasta xunu de 1815.

Napoleón ye consideráu un xeniu militar, encabezando campañes béliques glorioses, asina tamién como derrotes escandaloses. Les sos guerres de conquista convirtiéronse nes mayores guerres conocíes hasta entóncenes n'Europa, involucrando a un númberu de soldaos enxamás visto nos exércitos hasta esi momentu.

Nel periodu de poco más d'una década, algamó'l control de casi tol occidente y parte central d'Europa por conquistes o aliances y solo foi tras la so derrota na Batalla de les Naciones cerca de Leipzig n'ochobre del 1813 que se viere obligáu a abdicar unos meses depués. Tornó a Francia na dómina nomada como los Cien Díes y foi decisivamente derrotáu na Batalla de Waterloo en Bélxica, el 18 de xunu de 1815, siendo exiliáu a la islla de Saint Helena onde morrió.

Aparte de les sos proeces militares, a Napoleón tamién se lu conoz pol establecimientu del Códigu Napoleónicu y ye consideráu por dalgunos un «monarca illumináu» pola so estraordinaria capacidá de trabayu; taba en varios llugares casi al mesmu tiempu. La so memoria prodixosa y la so inigualable llucidez, permitíen-y conocer y recordar el más mínimu detalle. Nun dexaba nada al azar y nun consentía que naide improvisare. Otros, ensin embargu, considerábenlu un dictador tiránicu cuyes guerres causaron la muerte de millones de persones. Ensin llugar a dubia, ye'l personaxe que marcó l'aniciu del sieglu XIX y la posterior evolución de la Europa d'anguaño.

Primeros años[editar | editar la fonte]

Ñacíu en Ajaccio, Córcega, foi bautizáu col nome de Napoleone Buonaparte (Nabolione o Nabulione en corsu), namás un añu depués de que Francia comprara la islla a la República de Xénova. Napoleone años depués camudo'l so nome pol más francés de Napoléon Bonaparte. El rexistru más antiguu d'esti nome atópase nun informe oficial fecháu el 28 de marzu de 1796.

La so familia formaba parte de la nobleza llocal. So pa, Carlo Bonaparte, abogáu, foi nomáu en 1778 representante de Córcega na corte de Lluis XVI, llugar onde permaneció por dellos años.

So ma, María Letizia Ramolino foi la figura fundamental na so infancia. Avanzada a la so dómina, exixía a los sos ocho fíos que se bañaren diariamente, cuando lo común yera bañase, llegao'l casu, una vegada al mes. Napoleón, de carácter foín y atristayáu, caltúvose apartáu de los sos collacios. Gustaba-y tar solu pa meditar y sentía fonda aversión hacia los franceses, a los qu'acusaba de caltener la opresión escontra los corsos. Nun yera bon estudiante y sólo-y preocupaben les matemátiques, ciencia na que progresaba asombrosamente. Tamién se dedicó a la llectura d'obres de la lliteratura clásica como Hestoria Universal de Polibio; Vides Paraleles de Plutarco o Espedición d'Alexandro d'Arriano de Nicomedia, obres que tuvieron una fonda influencia nel so espíritu.

So pá algamó a que Napoleón y el so hermanu Xosé se treslladaren a la Francia continental, pa estudiar na escuela militar francesa de Brienne-le-Château a la edá de 10 años. Enantes d'entrar debía deprender francés, idioma que faló con un marcáu acentu italiano pol restu de la so vida. Algamó notes destacaes en matemátiques y xeografía, consiguiendo tamién les notes necesaries p'aprobar les demás materies. Tres la so graduación en 1784, foi almitíu na École Royale Militaire de París. Anque buscara nun principiu una formación naval, terminó estudiando artillería na École Militaire. Depués de la so graduación en setiembre de 1785, foi comisionáu como teniente segundu d'artillería. Tomó les sos nueves obligaciones en xineru de 1786, a la edá de 16 años.

Napoleón sirvió na guarnición de Valence y d'Auxonne hasta l'españíu de la Revolución Francesa (anque se tomó casi dos años de llicencia en Córcega y París). Poco depués d'entamar la revolución, Napoleón alcontrábase en Córcega. Dio'l so sofitu a la faición xacobina y algamó'l rangu de comandante segundu de la Guardia Nacional de Voluntariu de la isla. Depués d'entrar en conflictu col líder nacionalista Pasquale Paoli (antiguu héroe de Napoleón), Bonaparte y la so familia escaparen a Francia, onde aportaron en xunu de 1793.

Campañes d'aniciu[editar | editar la fonte]

A traviés del gabitu dau pol so collaciu Saliceti, algamó'l rangu en comandante d'artillería nes fuerces franceses de Toulon que s'amotinaren escontra'l Réxime del terror. Una vegada que la ciudá foi ocupada por tropes britániques, iguó un plan que resultó exitosu. Colocando los sos cañones estratéxicamente obligó a la flota inglesa a abandonar el puertu, lo que-y permitió l'asaltu y ocupación de la ciudá, en cuya aición Bonaparte resultó feríu de poca consideración. Esta aición fizo-y ganar el puestu de xeneral de brigada. Cuando foi mandáu a Xénova por órdenes superiores nuna misión secreta hacia xunetu de 1794, muerre Maximilien Robespierre, convertiéndose Napoleón en blancu de sospeches orixinaes pola so amistá íntima con Augustin Robespierre, hermanu menor de Maximilien. Por esti fechu foi arrestáu por dos selmanes, siendo lliberáu por falta de pruebes.

En 1795 Bonaparte alcontrábase en París cuando'l 3 d'ochobre, realistes y contra-revolucionarios entamaron una protesta armada escontra la Convención. A Bonaparte encomendaron-y dirixir a un improvisáu exércitu na defensa de la Convención nel Palaciu de les Tulleríes. Consiguió dalgunes pieces d'artillería col gabitu d'un xoven oficial de caballería, Joachim Murat, que posteriormente convertiríase nel so cuñáu, y llogró repeler a los insurxentes. Esti trunfu dio-y una gran fama y poder sobre'l nuevu Directoriu, de mou particular sobre'l so líder, Barras. Poques selmanes depués, el 9 de marzu de 1796, cásase cola amante de Barras, Joséphine de Beauharnais.

La campaña d'Italia de 1796-97[editar | editar la fonte]

Díes depués del so casamientu, Bonaparte tomó'l mandu del Exércitu d'Italia, al qu'encabezó exitosamente na invasión de dichu país. Enantes de partir, emponderó a les sos tropes con nestes pallabres: Soldaos: tais mal vestios y mal alimentaos. El gobiernu débevos muncho. Grandes provincies y ciudaes sedrán vueses. Ellí tendréis gloria y riqueza. Por aquella dómina ganó'l nomatu de «pequeñu cabu» en virtú de la so camaradería coles tropes. Llogró sacar a les fuerces austriaques de Lombardía y derrotó al exércitu de los Estaos Papales. A raíz de que'l Papa Pío VI protestare pola execución del rei Lluis XVI, Francia arrespondió anexionándose dos pequeños territorios papales. Ensin embargu, Bonaparte ignoró les órdenes del Directorio de marchar escontra Roma y destronar al Papa. Nun foi sinon un añu depués que'l Xeneral Berthier atropó Roma y apresó al Papa, quien posteriormente morrió por una enfermedá en cautiveriu. En 1797, Bonaparte al mandu del exércitu derrotó sucesivamente a cuatro xenerales austriacos cuyes tropes yeren superiores en númberu y forzó a Austria a firmar un acuerdu de paz. El resultante Tratáu de Campoformio dio-y a Francia'l control de la mayoría del norte d'Italia, asina como'l de los Países Baxos y l'área del Rín. Una cláusula secreta prometía otorgar Venecia a Austria. Bonaparte marchó escontra Venecia ocupándola y finando con más de 1.000 años d'independencia. Posteriormente, en 1797, Bonaparte organizó los territorios ocupaos n'Italia no que se nomó como la República Cisalpina.

Napoleón Bonaparte foi un estratega brillante. Llogró absorber los conocimientos militares esenciales de la so dómina y aplicalos exitosamente. Como planificador nel campu de batalla foi bien conocíu pola so creatividá nes táctiques de movilización de l'artillería. Ensin embargu'l so ésitu non se debía únicamente al so carácter innovador, sinon al so fondu conocimientu y intelixente aplicación de les táctiques convencionales militares. Como él dicía: «Lluché en sesenta batalles y nun aprendí nada que nun supiere anteriormente». Como oficial d'artillería, desarrolló nueves táctiques y emplegó l'artillería como una fuerza móvil pa espaldar los ataques d'infantería , beneficiándose de la ventaya teunolóxica de Francia en materia d'armamentu. Foi conocíu como un comandante agresivu, que cuntaba cola llealtá de soldaos altamente motivaos. Tamién foi'l primeru que fizo uso de sistemes de telecomunicaciones, la nomada llinia Chappe de semáforos, implantada en 1792. Tamién foi un mayestru en materia d'espionaxe y d'engañu. Frecuentemente ganó batalles al conocer d'antemano'l movimientu de les tropes enemigues.

Na campaña d'Italia Bonaparte convirtióse nuna figura influyente na política francesa. Espublicó dos periódicos, d'aniciu pa les sos tropes, pero circulaben tamién por Francia. En mayu de 1797 fundó un tercer periódicu espublicáu en París nomáu «Le Journal de Bonaparte et des hommes vertues». Les eleiciones de 1797 dieron-yos a los realistes mayor poder, lo qu'alarmó a Barras y a los sos aliaos nel Diretoriu. Los monárquicos, pola so parte, entamaron a criticar a Bonaparte acusándolu d'haber saquiao Italia y d'habese excedío na so autoridá al negociar con Austria (lo cuál n'ambos casos yera cierto). Bonaparte mandó con prontitú al Xeneral Augereau a París pa encabezar un golpe d'estáu el 4 de setiembre, eliminando políticamente a los realistes. Esto devolvió nuevamente a Barras el control, pero agora dependía de Bonaparte pa permanecer nel so cargu. Depués de finar les negociaciones con Austria, Napoleón tornó a París n'avientu siendo recibíu como un héroe conquistador y la fuerza dominante nel gobiernu, muncho más popular que los Direutores.

La espedición a Exiptu[editar | editar la fonte]

Napoleón colos apestaos de Jaffa

En marzu de 1798 Bonaparte propuso llevar a cabu una espedición pa colonizar Exiptu, entóncenes una provincia Otomana, col oxetivu de protexer los intereses comerciales franceses y cortar la ruta de Gran Bretaña a la India. El Direutoriu, preocupau pol alcance y el costu de la espedición, aprobó aína la empresa dao que significaba sacar a Bonaparte del centru de poder.

Dalgo poco habitual de dicha espedición ye la inclusión duun bon númberu de científicos, lo cuál, según dalgunos, reflexaba la devoción de Bonaparte a los principios y idees del entóncenes periodu de Ilustración. Otros, ensin embargo, viéronlo como una maniobra propagandística que sólo diba a la gueta d'esconder les intenciones imperialistes de Napoleón. Bonaparte tamién emitió proclames nes cuáles representábase como lliberador del pueblu exipcianu, sometíu pol xugu Otomanu y allabando los preceptos del Islam. Esta maniobra nun foi exitosa dao que'l pueblu exipcianu siempre vio a los franceses como una fuerza d'ocupación.

La espedición de Bonaparte tamién conquistó Malta y desembarcó n'Alexandría el [1 de xunetu] de 1798, eludiendo temporalmente a l'Armada Británica . Aunque los franceses ganaron la decisiva batalla de les Pirámides (con un exércitu de 25.000 homes enfrentaos a 100.000 del enemigu), la flota francesa viose arrasada polos buques del Almirante Nelson na Batalla del Nilu. L'oxetivu de Bonaparte de fortalecer el Mediterraneu viose frustráu, si bien llogró consolidar el so poder n'Exiptu, non ensin sofocar enantes diverses revueltes populares. Bonaparte ordenó que n'Exiptu la servidumbre y el feudalismu fueren abolíos y los derechos básicos de los ciudadanos garantizaos. La situación propició'l desarrollu d'importantes estudios sobre el Antiguu Exiptu ente los que destaco'l descubrimientu de la Piedra de Rosetta. Por otra parte l'exércitu francés fracasó nel so intentu por colonizar Siria en 1799, pero llogró la vitoria sobre los otomanos en Aboukir.

La Francia napoleónica[editar | editar la fonte]

El golpe d'estáu del 18 de Brumario[editar | editar la fonte]

Napoleón abucheáu na xunta de los quinientos, con motivu del golpe d'estáu del 18 de brumario

Tando n'Exiptu al frente del exércitu francés, Bonaparte siguió de cerca los asuntos europeos, axenciando información principalmente de los periódicos y despachos que-y llegaben a tumbos. El 23 d'agostu decide por sorpresa embarcase hacia Francia, aprovechando una calma temporal del bloquéu a los puertos franceses por parte de la flota británica.

Aunque posteriormente foi acusáu polos sos oponentes políticos d'abandonar a les sos tropes, la so marcha foi autorizada pol Direutoriu, que sufriera una serie de derrotes militares escontra les fuerces de la Segunda Coalición, formada pola alianza de Gran Bretaña con Austria, Rusia, Nápoles y Portugal, atarreciendo una inminente invasión.

Cuando llegó a París nel mes d'ochobre, la situación militar había meyorao tras varies victories sobre l'enemigu. La República, ensin embargu, taba en bancarrota y el Direutoriu, corruptu y ineficiente, taba nel so nivel más baxu de popularidá.

Un de los Direutores, Sieyes, pidió a Bonaparte'l so sofitu pa executar un golpe d'estáu escontra la Constitución esistente. L'entramáu involucraba tamién al hermanu de Bonaparte, Lucien, quien desempeñaba como cabezaleru del Conceyu de los Quinientos, a otru Direutor, Roger Ducos y a Talleyrand. El 9 de payares (18 de Brumario) y nel día siguiente, tropes dirixíes por Napoleón tomaron el control y espardieron los conseyos llexislativos, quedando Bonaparte, Sieyes y Ducos como Cónsules provisionales que rexiríen el gobiernu. Si bien Sieyes pretendía dominar al nuevu réximen, Bonaparte adelantóse redactando la Constitución del Añu VIII, asegurando la so eleición como Primer Cónsul. Esto convirtiólu na persona más poderosa de Francia, poder que s'incrementaría na Constitución del Añu X, cuando llogró nomase Primer Cónsul vitaliciu.

El Primer Cónsul[editar | editar la fonte]

Napoleón Primer Cónsul

Bonaparte instituyó diverses y importantes reformes, incluyendo la centralización de l'alministración de los Departamentos, la educación superior, un nuevu códigu tributariu, un bancu central, nueves lleis y un sistema de carreteres y cloaques. En 1801 negoció con la Santa Sede un Concordatu, diendo a la gueta de la reconciliación ente'l pueblu católicu y el so reximen. Nel añu 1804 dictóse'l Code civil des Français o tamién conocíu como Códigu Napoleónicu, que consiste na redacción d'un cuerpu únicu qu'unificare les lleis civiles franceses. El Códigu foi preparáu por comités d'espertos llegales baxo supervisión de Jean Jacques Régis de Cambecéres, desempeñándose ésti como Segundu Cónsul dende 1799 a 1804; Bonaparte, ensin embargu, participaba activamente nes sesiones del Conceyu d'Estáu onde se revisaben les propuestes de lleis. Esti códigu influyó de mou trascendental nel mundiu xurídicu, siendo la piedra angular del procesu de codificación. Otres normes dictaes na rexencia de Napoleón fueron el Códigu Penal de 1810 y el Códigu de Comerciu de 1807. En 1808 foi promulgáu'l Códigu d'Instrucción Criminal, estableciendo regles y procedimientos xudiciales precisos nesta materia. Si bien los estándares modernos consideren que dichos procedimientos favorecíen a la parte acusadora, cuando fueron promulgados yera intención de los llexisladores resguardar les llibertaes personales y remediar los abusos que normalmente ocurríen nos tribunales europeos. Si bien ye verdá que Bonaparte yera un rexente autoritariu, nun ye menos cierto que'l restu d'Europa taba gobernada por rexímenes dictatoriales. Bonaparte trató de restaurar la llei y l'orden depués de los escesos causaos pola Revolución, al mesmu tiempu que reformaba l'alministración del Estáu.

Un interludiu de paz[editar | editar la fonte]

Napoleón atravesando los Alpes, obra de Jacques-Louis David

En 1800 Bonaparte tornó a Italia, la cuál fuera reconquistada por Austria durante la so ausencia n'Exiptu. Cruzó coles sos tropes los Alpes en primavera (si bien montaba sobre una mula, y non nel caballu blancu col que lu pintó David). Al principiu de la campaña non foi perbien, pero más alantre asestó una rotunda derrota a los austriacos, la cuála llevó a la firma d'un armisticiu. L'hermanu de Napoleón, Joseph, principal negociador del armisticiu, algamó que debío a l'alianza ente Austria y Gran Bretaña, Austria nun podía reconocer nengún territoriu conquistáu por Francia. Les negociaciones volviéronse más y más errátiques hasta que Bonaparte ordenó al Xeneral Moreau atacar a Austria nuevamente. Moreau llevó al exércitu francés a la victoria d'Hohenlinden y a la fin l'armisticiu foi firmáu en Lunéville en febreru de 1801, baxo'l cuál reafirmábase a Francia'l so dominiu sobre los territorios ocupaos nel Tratáu de Campoformio. Los británicos tamién firmaron un acuerdu de paz médiante'l Tratáu d'Amiens en marzu de 1802, baxo'l cuál Malta paso a ser territoriu francés.

El Concordatu de 1801 col Papa Pío VII, finó col enfrentamientu cola Ilesia Católica orixináu pol aniciu de la Revolución.

La paz ente Francia y Gran Bretaña yera mui precaria. Les monarquíes llexítimes d'Europa taben reacies a reconocer la república, teniendo llercia de que la idea de la revolución fuera esportada a los sos países. En Gran Bretaña, l'hermanu de Lluis XVI foi recibíu con honores de güéspede d'estáu a pesar de que los británicos ya reconocieren a la república francesa. D'otra miente, Gran Bretaña nun desocupara ni Malta ni Exiptu, como prometiera y protestó escontra l'anexu de Piedmont y l'Actu de Mediación de Suiza, si bien nengún d'éstes árees taben contemplaes nel Tratáu d'Amiens.

En 1803, l'exércitu de Bonaparte foi derrotáu en Santu Domingu, combinándose la fiebre mariella conl tesón de la resistencia de Touissant L'Ouverture. Ante l'escenariu d'indefensión de les posesiones franceses en Norteamérica, Napoleón decide la venta de Louisiana, un territoriu d'aproximadamente 2 millones de km² pertenecíente a Francia. Estaos Uníos diba a la gueta, pola so parte, del mou de controlar la navegación sobre'l ríu Mississippi. La Merca de Louisiana foi un de los fechos más significativos qu'asocedieron durante'l gobiernu napoleónicu, aunque nel so momentu pasó relativamente inadvertíu. El preciu establecíu foi de $ 7,40/km².

Coronación de Napoleón

Nel añu X (1802), otra constitución dictada por Napoleón dio carácter vitaliciu al so consuláu y valió como entamanamientu pa la so autoproclamación como monarca del Primer Imperiu Francés. Sofitáu por bona parte de l'aristocracia, nuna ceremonia realizada na Catedral Notre Dame de París (1804) ante la presencia del Papa Pío VII. Napoleón coronóse a sí mesmu, lo cuál dio aniciu a la creencia popular de qu'esti actu foi una demostración de negazu a l'autoridá pontificia, lo cuál nun yera cierto. La ceremonia taba acordada col Papa de forma anticipada.

Napoleón reorganizó l'alministración del estáu, reorganizó'l sistema xudicial, tipificó la llexislación civil francesa col Códigu Napoleónicu y con otros seis códigos que garantizaben los derechos y llibertaes conquistaos nel periodu revolucionariu, asina como la igualdá ante la llei y la llibertá de cultu. Tamién sometió les escueles a un control centralizáu.

El famosu y temperamental compositor alemán Ludwig van Beethoven taba ente les personalidaes d'aquella dómina qu'admiraben a Napoleón polo que simbolizaba políticamente: los ideales democráticos y republicanos de la Revolución Francesa. Al paecer por una suxerencia del embaxador francés en Viena, Jean-Baptiste Bernadotte, entamó a componer la so Tercera Sinfonía, que titularía Eroica (Heroica en italiano). Ensin embargu, cola auto-coronación de Napoleón, Beethoven decepciónose y retiro-y la dedicatoria colocando como subtítulu: Sinfonía eroica, composta per festeggiare il sovvenire d'un grand'uomo (Sinfonía Heroica, compuesta pa festexar el recuerdu d'un gran home)

Les guerres de conquista[editar | editar la fonte]

Batalla de Marengo
La Carga los Mamelucos

Gran Bretaña reanudó la guerra naval con Francia n'abril de 1803. Dos años depués, Rusia y Austria uniéronse a Gran Bretaña na Tercera Coalición. Napoleón descartó'l so plan d'invadir Inglaterra tras la dramática derrota naval de Trafalgar, onde la flota británica encabezada pol Almirante Nelson estrozó gran parte de les flotes de Francia y España y dirixó los sos exércitos escontra les fuerces austro-ruses, a les que derrotó na batalla d'Austerlitz el 2 d'avientu de 1805. Conquistó'l reinu de Nápoles en 1806 y nomó rei al so hermanu mayor, Xosé; autoproclamándose Rei d'Italia (1805), desintegró les Provincies Uníes, qu'en 1795 había instaurao como República de Batavia, y fundó'l Reinu d'Holanda, al frente del cuál asitió al so hermanu Lluis, y estableció la Confederación del Rin (qu'agrupaba a la mayoría de los estaos alemanes) que quedaron baxo la so protección.

Prusia y Rusia forxaron una nueva alianza (Cuarta Coalición) y atacaron a la Confederación. Napoleón derrotó al exércitu prusianu en Jena y Auerstädt (1806) y al rusu en Friedland. En Xunetu de 1807 estableció'l Tratáu de Tilsit col Zar Alexandro I pol cuál apoqueciose'l territoriu de Prusia. Amás, Westfalia, gobernáu pol so hermanu Xerónimo, y el Gran Ducáu de Varsovia ente otros estaos pasaron a formar parte del Imperiu.

Napoleón en Wagram

Nun habiendo podío vencer a los británicos militarmente, Napoleón impuso'l bloquéu sobre les mercancíes ingleses col propósitu d'arruinar el so comerciu. Portugal foi una de les naciones que nun se plegaron al bloquéu, razón pola cuál Napoleón foi a la gueta d'una alianza con España pa invadir a Portugal. Negándose España, a escontra de la voluntá de dalgunos de los sos Xenerales, el mesmu Napoleón encabezó les fuerces qu'invadieron España y derrotaron al exércitu d'esti país. Tamién derrotó al exércitu inglés que vinieron a echar un gabitu a España. Finalmente conquistó Portugal en 1807 y en 1808 colocó al so hermanu Xosé nel tronu d'España, dexando Nápoles como una monarquía manexada pol so cuñáu, Joachim Murat. Tres la partida de Napoleón, el pueblu español sublevóse, dando entamu a la guerra ente les tropes franceses y les españoles (sofitaes por Gran Bretaña), teniendo un papel fundamental la llucha de guerrilla. Esti conflictu supuso un gran desgaste humanu (estimándose en 300.000 baxes) y económicu pa Francia. Calcúlase que'l 10% de les baxes tanto del llau español como'l francés ocurrieron durante los dos sitios a la ciudá de Zaragoza, ente el 15 de xunu de 1808 y el 21 de febreru de 1809. D'otra miente, Austria rompió'l pactu con Francia y Napoleón viose obligáu a encabezar les sos fuerces nos frentes del Danubio y Alemaña. Na batalla d'Aspern-Essling (mayu 21-22,1809) cerca de Viena, Napoleón tuvo a puntu de perder el so exércitu, ensin que l'enemigu tampoco llograre'l triunfu. Tras una tregua de casi dos meses, nuevamente enfrentáronse ambos exércitos, pero esta vegada l'exércitu francés derrotó al austriacu na batalla de Wagram, el 6 de xunetu de 1809.

Napoleón entrando en Berlín

Tras esti triunfu, Francia convertió los territorios conquistados nes Provincies Iliries (na actualidá parte d'Eslovenia, Croacia, Bosnia y Hercegovina, Serbia y Montenegro) y conquistó los Estaos Pontificios. Tras aliase nuevamente con Austria, Napoleón casóse con María Lluisa, fía del monarca austriacu, Francisco I d'Austria, pertenecíente a la casa d'Habsburgo, una vegada repudiada Xosefina al nun poder da-y un herederu. Con esti enllaz vinculaba la so dinastía a la más antigua de les cases reales d'Europa, cola esperanza de qu'un fíu, ñacíu en 1811 y al cuál otorgó-y el títulu de Rei de Roma como herederu del Imperiu, fuera meyor aceptáu poles monarquíes reinantes. L'Imperiu algamó la so máxima amplitú en 1810 cola incorporación de Bremen, Lübeck y otros territorios del norte d'Alemaña, asina como col reinu d'Holanda, depués d'obligar a abdicar al so hermanu qu'había adoptao'l títulu de Lluis I Bonaparte.

Implicaciones fuera de Francia[editar | editar la fonte]

La Europa napoleónica[editar | editar la fonte]

El Códigu Napoleónicu foi introducíu en tolos nuevos Estaos creaos baxo l'Imperiu Francés. Aboliéronse el feudalismu y la servidumbre y establecióse la lliberta de cultu (salvo en España). Foi-y otorgada a caún de los Estaos una constitución na que concediase el sufraxu universal masculín, una declaración de derechos y la creación d’un parlamentu. Foi instauráu'l sistema alministrativu y xudicial francés; les escueles quedaron supeditaes a una alministración centralizada y amplióse'l sistema educativu llibre de mou que cualesquier ciudadanu pudiere acceder a la enseñanza secundaria ensin que se tuviere en cuenta la so clase social o relixón. Ca Estáu disponía d’una academia o institutu destináu a la promoción de les artes y les ciencies, al tiempu financiábase'l trabayu de los investigadores, principalmente'l de los científicos. La creación de gobiernos constitucionales siguió siendo solo una promesa, pero'l progresu y eficacia de la xestión fueron un llogro real.

La intervención en América[editar | editar la fonte]

Pa América Llatina, la figura de Napoleón ye fundamental. La so intervención en España, les abdicaciones de Carlos IV d'España y Fernando VII d'España, la entrega del tronu español al so hermanu Xosé, la promulgación de la Constitución de Bayona en 1808 que reconocía l'autonomía de les provincies americanes del dominiu español y les sos pretensiones de reinar sobre aquellos inmensos territorios cuyos habitantes enxamas quixeren aceptar los planes y deseyos del emperador, son elementos básicos pa entender los movimientos d'emancipación.

Nel restu del continente, la Merca de Louisiana y el manexu que-y dio Francia al procesu d'independencia de Haití tuvieron una influencia descomanada nel desarrollu del continente.

Ocasu y caída de Napoleón[editar | editar la fonte]

El Congresu d'Erfurt había conservao l'alianza ente Napoleón y el zar Alexandro I, en 1811 les tensiones escomenzaron nuevamente a medrar ente ambes naciones. A pesar de ser un fiel almirador de Napoleón dende'l so alcuentru en 1807, Alexandro I taba siendo apretáu pola aristocracia rusa pa frañer dicha alianza, al ser considerada un aviesu pal orgullu rusu.

La primera seña de que l'alianza taba frayándose foi'l mou non mui entusiasta y débil col que Rusia aplicó'l Bloquéu Continental. Esto engrifó a Napoleón el cuál tamién tenía simpatía hacia'l Zar, y fizo qu'esti sintiérase defraudáu y traicionáu. En 1812 los conseyeros del Zar indicaron-y qu'una vasta revolución taba fermentando por too Alemaña y qu'ési yera'l momentu propiciu para atacar al imperiu francés y recuperar Polonia.

Gran númberu de tropes desplazaronse a la frontera con Polonia (más de 300.000 soldaos d'un exércitu total de 410.000). Napoleón, ensin embargu, anticipóse a esta maniobra y escomenzó a espander el so exércitu hasta llograr un continxente de 600.000 homes (adicionalmente a los 300.000 que s'alcontraben na Península Ibérica). Napoleón ignoró los conseyos de nun invadir suelu rusu y el 23 de xunu de 1812 entamó la invasión.

Napoleón cerque de Borodino

Nun esfuerciu por ganar l'apoyu de los nacionalistes y patriotes polacos, denominó a la guerra como la "segunda guerra polaca" (la primera guerra polaca yera la lliberación de Polonia de Rusia, Prusia y Austria). Los patriotes polacos deseaben incorporar la parte rusa de Polonia al Gran Ducadu de Varsovia y crear un nuevu Reinu de Polonia, ensin embargu esta idea foi refugada por Napoleón, camentando que pudiere enrifar a Prusia y Austria a declarar la guerra a Francia. Napoleón tamién refugó lliberar a los siervos rusos, pues camentaba qu'esto pudiere provocar una reacción conservadora a les sos espaldes.

Tierra arrasada

Técnica militar qu'usaron los rusos, consistente en retroceder y nun pelear de frente colos soldaos de la gran armèe. El zar nun contentu de que los franceses tuvieren en tierra rusa destituyo a Mikhail Bogdanovich Barclay de Tolly, y remplazolu pol Xeneral Smoronski, el 16 d'agostu cayó Smolensk y, tras otres victories, los franceses siguieron el so avance. Los rusos evitaron batallar en repetíes oportunidaes escontra la Grande Armée, aínda en dalgunos casos sólo porque Napoleón dudó n’atacar cuando la oportunidá se-y presentó

Otra batalla de la campaña de Rusia foi la Batalla de Borodino la cuál significó un gran trunfu pa los franceses en lo que bien podría ser el día más sangrientu de la hestoria humana, foi nomada la guerra de los 3 reis.

Napoleón retirándose de Moscú

Los rusos replegáronse nuevamente y Napoleón entró en Moscú asumiendo qu'Alexandro I negociaría la paz. Ensin embargu, les órdenes del gobernador del exércitu de la ciudá y comandante en xefe, Fyodor Rostopchin, yera la de prender la ciudá. Tras un mes, camentáu de perder el control en Francia, Napoleón decidió salir de Moscú.

Los franceses sufrieron descomanadamente na so retirada de Rusia al puntu que de los 650.000 homes que la invadieron, sólo 40.000 cruzaron el ríu Berezina en payares de 1812. En total estimase que nesta campaña, 570.000 homes del exércitu francés morrieron y 400.000 del exércitu rusu, a lo cuál hai que sumar cientos de miles de baxes na población civil.

L'enviernu de 1812–13 foi calmáu, mientres rusos y franceses intentaben recuperase de les sos masives pérdides. Un pequeñu exércitu rusu atormentó a los franceses en Polonia, y eventualmente 30.000 tropes franceses debieron retirase hacia los estaos alemanes pa unise coles fuerces estacionaes ellí, algamando los 130.000 homes, colos refuerzos de Polonia, cifra que crecería cuando Napoleón llegó.

Tras esti fracaso, Prusia uníose a la coalición, la cuál agora incluyía Rusia, el Reinu Uníu, España y Portugal. Aínda, Napoleón asumió nuevamente l'urden en Alemaña, y causó una serie de derrotes a los Aliaos, que finen na Batalla de Dresde el 26 d'agostu de 1813, onde les tropes aliaes sufrieron baxes de más de cien mil soldaos.

Si bien paecía que Napoleón diba a resurdir, uniéronse a la Coalición Austria y Suecia, y a la fin na Batalla de les Naciones en Leipzig, el 16 d'ochobre los franceses fueron derrotaos nun enfrentamientu en que los aliaos contaben col doble de tropes que Napoleón. Depués d'esta batalla onde morrieron más de 120.000 soldaos d'ambos llaos, Napoleón replegose a Francia, pero'l so exércitu ,d'apenes 100.000 homes, ya nun yera capaz de resistir l'emburrión de la Coalición, que contaba con más de mediu millón de soldaos.

Los Cien Díes[editar | editar la fonte]

París foi ocupáu'l 31 de marzu de 1814. Napoleón abdicó baxo la presión de los sos mariscales el 6 d'abril en favor del so fíu. Sicasí, los aliaos apertáronlu pola rindición incondicional y Napoleón abdicó nuevamente, de mou incondicional, el 11 d'abril. Los vencedores acordaron nel Tratáu de Fontainebleau exiliálu a la islla d'Elba, una islla pequeña a 20 km de la costa italiana, manteniendo'l so títulu d'emperador, pero restrinxeron el so imperiu a dicha islla.

El Congresu de Viena (1814-1815) dispuso'l nuevu urden na Europa post-napoleónica. En Francia, los realistes instalaron nel poder a Lluis XVIII. María Lluisa y el so fíu quedaron baxo la custodia del pa d'ésta, l'emperador Francisco I, y Napoleón nun volvieron a vese enxamás. Consciente de los deseos de los ingleses de esterralu a una islla remota nel atlánticu y de la refuga del pueblu francés a la restauración borbónica, escapó d'Elba en febreru de 1815 y desembarco n'Antibes el 1 de marzu dende onde preparóse pa tornar a Francia.

El Rei Lluis XVIII unvió al Quintu Reximientu encabezáu por Delessart, qu'había servio anteriormente a Napoleón en Rusia. Al alcontralu en Grenoble, Napoleón acercóse solu al reximientu, apeóse del so caballu y, cuando taba na llinia de fueu del capitán Randon, glayó "Soldaos del Quintu, vosotros conocéisme. Si dalgún home quier disparar sobre'l so emperador, pue facelo agora". Tres un breve silenciu, los soldaos glayaron ¡"Vive L'Empereur"! y marcharon xunto con Napoleón pa París. Aportó'l 20 de marzu, ensin disparar nin un solu tiru y aclamáu pol pueblu, llevantando un exércitu regular de 140.000 homes y una fuercia voluntaria que aína ascendió a alredor de 200.000 soldaos. Yera l'aniciu de los Cien Díes.

La Batalla de Waterloo, óleo de William Sadler

Establecíu de nuevu en París, promulgó una nueva constitución, de calter más democráticu y lliberal que la vixente demientres l'imperiu. Munchos veteranos acudieron al so llamamientu, entamando de nuevo l'enfrentamientu escontra los aliaos. El resultáu foi la campaña de Bélxica, que finó cola derrota na batalla de Waterloo'l 18 de xunu de 1815.

El pueblu de París sofitábalu na llucha pero los políticos retiraron-y el so sofitu, polo qu'abdicó en favor del so fíu Napoleón II. Coló a Rochefort onde capituló énte'l capitán del buque británicu Bellerophon.

Exiliu en Santa Helena y muerte[editar | editar la fonte]

Napoleón Bonaparte en Santa Helena
Repatriación de les cenices de Napoleón a bordu de La Belle Poule, el 15 de Ochobre de 1840, 1842, Óleo sobre lienzu (369 x 238 cm). Castiellu de Versalles. Pintura de Eugène Isabey

Napoleón foi apresáu y esterráu polos británicos a la islla de Santa Helena nel Atlánticu, el 15 d'ochobre de 1815. Ellí, con un pequeñu grupu de siguidores, dictó les sos memories y criticó a los sos captores.

Enfermo del estómagu demientres muncho tiempu, aquexáu d'una continua pesadez y un dolor nel costáu derechu, los médicos creyíen que yera una afeición hepática, pero él sospechó inmediatamente que taba atacáu de la mesma dolencia del so pa, un cirru nel píloru o cáncer d'estómagu. Ensin embargu, a naide-y dixo hasta que nun tuviere él mesmo perseguru de qu'asina fuere (tamién sospechábase que pudo ser envenenáu con arsénicu). Napoleón Bonaparte morrió'l 5 de mayu de 1821. Les sos últimes pallabres foron: "France, armée, Joséphine", o, según la versión de les memories de Santa Helena "...tête...armée...Mon Dieu !". Tenía entóncenes cincuenta y dos años.

Tumba de Napoleón Bonaparte en "Los Inválidos" (París)

Napoleón estipulara nel so testamentu'l deséu de ser enterráu a les orielles del Sena, pero dieron-y sepultura en Santa Helena. En 1840, a instancies del gobiernu de Lluis Felipe I, los sos restos foron repatriaos. Treslladaos na fragata Belle-Poule, depositáronse en Les Invalides (París). Cientos de millones de persones visitaron la so tumba dende esa fecha.

Enllaces esternos[editar | editar la fonte]

Napoleón Bonaparte
Wikimedia Commons tien archivos rellacionaos con: