Moscú

De Uiquipedia
Saltar a: navegación, buscar
Uiquipedia:Wikipedia:Llista d'artículos que toa Wikipedia tien que tener/Archivu
Italian traffic signs - old - lavori in corso.svg

Artículu en desendolcu. Polo menos hai un wikipedista trabayando nel desendolcu d'esti artículu. Puen alcontrase errores y nun s'encamienta tenelu como referencia. Enantes de facer un cambéu bultable del artículu notifícalu nel alderique.


Moscú
Bandera deMoscú Escudu deMoscú
(En detalle) (En detalle)
Moscow In Europe.png
Europa
País Flag of Russia.svg Rusia
Coordenaes 55° 45′ N 37° 37′ E
Población (2015) 12.197.596 habitantes
Superficie 2.511 km²


Moscú (en rusu: Москва, treslliteráu como Moskvá) ye la capital y suxetu federal más pobláu de Rusia. Importante centru políticu, económicu, cultural y científicu de Rusia y del contiente européu, ye la megaciudá más septentrional de la Tierra, la segunda ciudá más poblada d'Europa dempués d'Estambul[1] y la octava más poblada del planeta, siendo la mayor de toes les asitiaes en países desarrollaos. Ye una ciudá global alpha nel ránking ellaboráu pol think tank Globalization and World Cities Research Network, y ún de los destinos turísticos con más crecimiento en númberu de visitantes. En ella podemos alcontrar la torre Ostankino, la mayor torre de comunicaciones d'Europa (540 m d'altor); la Mercury City Tower, el mayor rascacielos de continente (338,8 m); y el distritu comercial Moskow International Business Center. La so población ye de 12.197.596 habitantes (Rosstat, 2015)[2] Per aciu de la so espansión territorial al suroeste del óblast de Moscú, a partir del 1 de xunetu de 2012 la ciudá aumentó la so área 2,5 vegaes (pasó de 1.000 km² a 2.511 km²) y ganó una población adicional de 230.000 habitantes[3]

La ciudá asítiase a la vera'l ríu Moscova, nel Distritu Federal Central de la Rusia europea, y ye la mayor del mundu que nun ta a la vera la mar. Rescamplen nel so paisaxe urbanu dellos edificios históricos, como'l Kremlin, una ciudá-fortaleza medieval que ye anguaño la residencia del presidente del país, o la catedral de San Basiliu. Tien un 40% del so territoriu de zona verde, y inclúi la mayor viesca urbana del mundu. A lo llargo la so historia tien sío capital de dellos estaos, dende'l Gran Ducáu de Moscú na Edá Media hasta la Rusia zarista o la Xunión Soviética. Considérasela'l centru de la cultura rusa, y nella vivieron y trabayaron a lo llargo los sieglos munchos de los más prestixosos artistes, científicos y deportistes rusos atrayíos pola bayura de museos, teatros ya instituciones académiques y polítiques de la ciudá. Ye la sé del gobiernu de Rusia, una y bones el presidente vive nella y tamién nella tienen la so sé les dos cámares del parllamentu rusu, la Duma Estatal y el Conseyu de la Federación.

La ciudá ye un importante ñudu de comunicaciones, con cuatro aeropuertos internacionales, nueve estaciones de ferrocarril, tranvía, un sistema de monoraíl y ún de los mayores sistemas de metro más importantes del mundu. El Metro de Moscú ye'l cuartu con más kilómetros de rede y el que más pasaxeros mueve añalmente fuera d'Asia. Ye, amás, ún de los iconos arquitectónicos y turísticos de la ciudá pola riqueza decorativa de les sos 194 estaciones.

Historia[editar | editar la fonte]

La ciudá recibe'l so nome del ríu que la traviesa; en rusu antiguu гра́д Моско́в significa la ciudá a la vera'l ríu Moscova. La primer referencia escrita a la ciudá remóntase a 1147, cuando Yuri Dolgorukiy, príncipe del Rus de Kiev, llamó al príncipe de Novgorod-Severski a que se reuniera con elli en Moscú[4]. Nueve años dempués, en 1156, ordenó la construcción d'una muria de madera, el Kremlin, qu'hebo de ser reconstruyido munches vegaes, p'arrodiar y protexer la nueva ciudá[5]. Dempués del saquéu de 1237-1238, cuando los mongoles arrasaron completamente la ciudá y mataron a tolos sos habitantes, Moscú foi reconstruyida, y convirtiose na capital del nuevu principáu de Vladimir-Suzdal en 1327. La so favoratible posición estratéxica, na cabecera del ríu Volga, fizo que fora medrando de forma constante. El so principáu, nomáu Gran Ducáu de Moscú, desarrollose y convirtiose nún territoriu estable y prósperu al qu'aportaben refuxaos d'otres partes de Rusia.

Ataque tártaru sobre Moscú.

Embaxu'l gobiernu d'Iván I de Moscú la ciudá sustituyó a Tver como centru políticu del principáu de Vladimir-Suzdal, y centralizose nella la recoyida d'impuestos pal Imperiu mongol, soberanu de facto del territoriu. A cambiu de pagar grandes tributos Iván consiguió una importante concesión del emperador mongol (Khan): el derechu a que a la so muerte el principáu moscovita pasara íntegru al so primoxénitu y nun se dividiera, como yera vezu, ente tolos fíos de so. Al empar, la oposición escontra la dominación mongola foi garrando puxu. En 1380 el príncipe Dmitry Donskoy llideró un exércitu conxuntu de dellos principaos rusos que consiguió una gran victoria sobre los tártaros (mongoles) na batalla de Kulikovo. Por embargu, la batalla nun foi decisiva, y dos años dempués el khan Tokthamysh saqueó Moscú. El principáu consiguió llibrase finalmente del control tártaru en 1480, y Moscú, embaxu'l gobiernu d'Iván III, convirtiose nel centru d'un imperiu que comprendía tolos territorios actuales de Rusia y delles tierres más[6] El so sucesor, Iván IV, asumió en 1547 el títulu de zar.

En 1571 los tártaros de Crimea atacaron y saquearon otra vuelta Moscú, prendiendo fuéu a tol so caseríu sacante'l Kremlin[7]

Demientres la guerra polaco-rusa (1605-1618), en 1609, un exércitu suecu, dirixíu pol conde Jacob de la Gardie y Evert Horn salió de Novgorod hacia Moscú p'axudar al zar Vasili Shuiski. Entró na ciudá y sofocó la rebelión popular escontra elli, colando bien ceo. En 1611, tres de la batalla de Klushino, el comandante militar (hetman) polacu Stanisław Żółkiewski ocupó la ciudá. Nun había ser el caberu llevantamientu popular del sieglu: hebo ún en 1612 pa echar de la ciudá a los invasores polacos y lituanos, otru en 1662 en protesta pol emprobecimientu de l'aleación de la moneda (el nomáu motín del cobre) y otru en 1682, tres de la muerte del zar Alexis I. La ciudá viose asolada tamién, nesos sieglos, por delles epidemies de peste en 1570-71, 1592 y 1654-56[8]

La fundación de San Petersburgu por Pedru el Grande en 1703, na costa del mar Bálticu, fizo que Moscú dexara de ser la capital de Rusia (sacante un breve periodu ente 1728 y 1732) dende 1712. A finales d'esi sieglu sofrió otra vegada los rigores de la peste: la plaga de 1771 mató a 100.000 moscovites.

Vista de Moscú nel sieglu XVII (dibuxu de 1922 d'Apollinary Vasnetsov)

Cuando Napoleón Bonaparte y los sos soldaos invadieron Rusia en 1812 los moscovites prendieron fuéu a la ciudá y colaron d'ella el 14 de setiembre. La Grande Armée napoleónica, diezmada pola fame, el fríu y el mal aprovisionamientu, tuvo que retirase, y foi cuasimente aniquilada pol devastador inviernu rusu, al que se sumaben ataques ocasionales de los soldaos del zar. Casi 400.000 de los sos miembros morrieron en tierra rusa[9].

En xineru de 1905 creose la figura del gobernador de la ciudá o alcalde. Alexander Adrianov foi el primer alcalde de la ciudá que, el 12 de marzu de 1918[10], tres del trunfu de la Revolución rusa de 1917, convirtiose na capital de la República Socialista Federativa Soviética Rusa, y de la Xunión Soviética menos de cinco años dempués. Tamién instalaron la so sé allí, demientres la Segunda Guerra Mundial (nomada en Rusia la Gran Guerra Patriótica) y tres de la invasión alemana, el Comité Estatal de Defensa Soviéticu y el cuartel xeneral del Exércitu Bermeyu.

En 1941 los moscovites formaron 16 divisiones de voluntarios nacionales (más de 160.000 persones), amás de 25 batallones (18.500 soldaos) y cuatro reximientos d'inxenieros. Cola so axuda, en payares, l'exércitu alemán foi forciáu a detenese nes afueres de la ciudá, entamando así la batalla de Moscú. Les fábriques, y la mayoría del gobiernu, foron evacuaos, y la ciudá declarose n'estáu de sitiu dende'l 20 d'ochobre. Los habitantes que quedaron nella construyeron y supervisaron les defenses antitanque en mediu de los bombardeos de la Luftwaffe. Stalin refugó abandonar Moscú, obligando al facelo a que quedaran ellí tamién el cuartel xeneral del exércitu y el conseyu de comisarios del pueblo. Pesie al sitiu y los bombardeos la construcción del metro nun se detuvo pola guerra, y al acabar esta inauguráronse delles llínies nueves del ferrocarril metropolitanu.

Muyeres moscovites caven trincheras antitanque na rodiada de Moscú (1941).

La batalla de Moscú acabó con un saldu, según los autores, d'ente 248.000 y 400.000 alemanes y 650.000 y 1.280.000 rusos muertos o firíos. El 1 de mayu de 1944 creose una medalla honorífica pa premiar a los defensores de Moscú, y otra en 1947 pa cellebrar el octocentésimu aniversariu de la fundación de la ciudá. Nel vixésimu aniversariu de la derrota nazi, el 8 de mayu de 1965, Moscú foi una de les doce ciudaes ruses a les que se-yos concedió'l títulu de Ciudá Heroica.[11][12]

En 1980 la ciudá foi la sé de los Xuegos Olímpicos de veranu, que foron boicoteaos por Estaos Xuníos y otros países occidentales en protesta pola intervención soviética na guerra d'Afghanistán. En 1991 la ciudá foi l'escenariu del intentu fallíu de güelpe d'estáu de los miembros del gobiernu contrarios a les reformes de Mikhaíl Gorbachov. Cuando la URSS disolviose al acabar el añu, Moscú caltúvose como la capital de Rusia. De magar, la emerxencia d'una economía de mercáu en Rusia espéyase na so capital, enllena de tiendes, servicios, edificios y estilos de vida copiaos de los occidentales.

Xeografía y clima[editar | editar la fonte]

Moscú asítiase nes riberes del ríu Moscova, un cursu d'agua de 500 km que traviesa la llanura europea oriental en Rusia central anantes de desembocar nel ríu Oka, afluente del Volga. El ríu y los sos canales pueden travesase, dientro de les llendes de la ciudá, por 49 pontes. La ciudá ta asitiada a una altura de 156 m sobro'l nivel de la mar; a esi altor allúgase la principal estación meteorolóxica de la ciudá. El puntu más altu de la mesma ye la colina Teplostanskaya, con 255 m. L'anchor de la ciudá d'este a oeste ye de 39,7 km, y el so llargor de norte a sur 51,8 km.

La ciudá ye'l puntu de referencia del fusu horariu usáu na Rusia central y Bielorrusia. Esa hora aveza a llamase Moscow Standard Time (MSK, мск), y va trés hores per delantre del tiempu universal coordináu (UTC+3). Nesi fusu nun se fai cambéu horariu n'iviernu como notros del continente européu.

Clima[editar | editar la fonte]

Moscú tien un clima continental húmidu, con iviernos llargos y fríos que van dende mediaos de payares hasta'l fin de marzu, y veranos templaos. La temperatura presenta oscilaciones pergrandes, pudiendo alcanzar n'iviernu dende los -25ºC a los 0º y en veranu dende los 15ºC a los 30ºC. Nos meses centrales del veranu (xunu, xunetu y agostu) la temperatura oscila ente los 20 y los 26ºC, pero durante les foles de calor qu'aporten a la rexón ocasionalmente ente mayu y setiembre la temperatura sobrepasa los 30ºC, a veces durante una o dos semanes siguíes. N'iviernu les temperatures medies sitúense alredor de los -10ºC, magar que tolos iviernos hay temporaes más caldies, con temperatures diurnes perriba de los 0ºC, y otres más fríes nes que la temperatura baxa perbaxu los -30ºC de nueche. La ñeve, que cubre la ciudá una media de cinco meses al añu, aveza a entamar a cayer a mediaos d'ochobre, tapez la ciudá en payares y entama a desxelase a primeros d'abril.

La ciudá tien una media de 1.731 hores de sol al añu, magar que nel periodu 2004-2010 observose cómo la media aumentaba hasta les 1.800-2.000 hores como resultáu de l'aumentu de les hores de sol nos meses del branu.

Demografía[editar | editar la fonte]

Composición étnica de la población de Moscú nel sieglu XX
Grupu étnicu
1897[13]
1939[14]
1959[15]
1970[16]
1979[17]
1989[18]
2002[19]
Rusos 987.044 3.614.430 4.507.899 6.301.247 7.146.682 7.963.246 8.808.009
Ucranianos 4.478 90.479 115.489 184.885 206.875 252.670 253.644
Tártaros 4.288 57.687 80.489 109.252 131.328 157.376 166.083
Armenios 1.604 13.682 18.379 25.584 31.414 43.989 124.425
Azeríes 677 2.528 9.563 7.967 20.727 95.563
Xudíos 5.070 250.181 239.246 251.350 222.900 174.728 79.359
Bielorrusos 1.016 24.952 34.370 50.257 59.193 73.005 59.353
Xeorxianos 4.251 6.365 4.195 12.180 19.608 54.387
TOTAL 1.038.591 4.137.018 5.009.630 7.061.008 7.931.602 8.875.579 10.382.754

Acordies col censu de 2015 la población de Moscú ye de 12.197.596 habitantes[20]. Esto compriende namái la xente qu'el censu clasifica como residentes permanentes. Según del Serviciu Federal de Migraciones rusu na ciudá viven tamién 1,8 millones de persones que tienen una residencia temporal a base de visaos u otra documentación, y estímase qu'el númberu de persones indocumentaes ye d'un millón mas. Estos últimos proceden, principalmente, de les repúbliques del Asia central.

Na población de la ciudá predominen los ciudadanos d'etnia rusa (cuasi'l 92% del total de la población), siguíos polos ucranianos y los tártaros (alredor de un 1,5% del total d'habitantes son de caún d'estos grupos) y minoríes d'otres zones de l'antigua Xunión Soviética. Na tabla qu'hai a la vera d'estes llínies puede observase la evolución del númberu de miembros de los diferentes grupos étnicos que conviven na ciudá a lo llargo'l sieglu XX.

Relixón[editar | editar la fonte]

El cristianismu ye la relixón predominante na ciudá, con gran mayoría de fieles de la Ilesia Ortodoxa rusa. Moscú ye un centru perimportante d'esa relixón, la tradicional del país, que foi reconocida como parte de la herencia histórica rusa nuna llei aprobada en 1997[21] . Otres relixones practicaes na ciudá inclúin al catolicismu, budismu, Islam, xudaísmu y protestantismu, y hai tamién miembros de la Ilesia Apostólica Armenia, los Vieyos Creyentes (un grupu separtáu de la Ilesia ortodoxa nel sieglu XVII) y neopaganos.

Nueva catedral de Cristo Salvador.

El Patriarca de Moscú ye'l llíder de la Ilesia, y vive nel monasteriu de Danilov. Moscú yera conocida, primero de la revolución de 1917, la ciudá de les 40 veces 40 ilesies (город сорока сороков церквей). En 1918 el gobiernu bolchevique declaró que Rusia yera un estáu secular, lo que na práctica significó que la relixón foi reprimida y la sociedá foi forciada a volvese ateísmu|atea. Nes décades de 1920 y 1930 demoliéronse munches ilesies, siendo les más destacaes d'elles: el monasteriu de Chudov, del sieglu XIV, que taba dientro del Kremlin; la catedral Kazansky na Plaza Bermeya; o la catedral de Cristo Salvador, llevantada nel sieglu XIX pa conmemorar la victoria sobre l'exércitu de Napoleón. La destrucción continuó dempués de la Segunda Guerra Mundial. Pesie a que se suavizó la persecución contra la relixón, la mayoría de les ilesies y monasterios qu'entá esistíen foron desacralizaos y usaos como clubs, oficines, fábriques o almacenes. De magar la desintegración de la URSS en 1991 munches d'eses ilesies restauráronse, y les relixones tradicionales van garrando nuevu puxu. Ente les ilesies reconstruyíes nestos años rescampla la nueva catedral de Cristo Salvador, que vuelve a ser un fitu destacáu del paisaxe urbanu moscovita. Pa facela, nel sitiu aú taba l'antigua, hebo que demolar una xigantesca piscina que los soviéticos construyeran allí.

Los musulmanes, qu'acuden a rezar a dalguna de les cuatro mezquites de la ciudá, son el 14% de la población.

Paisaxe urbanu[editar | editar la fonte]

L'arquitectura de Moscú ye singular, con dellos edificios que son conocíos perende: el Kremlin, que la so construcción remóntase al sieglu XII; la catedral de San Basiliu, coles sos elegantes cúpules en forma de cebolla; la catedral de Cristo Salvador, y los rascacielos de Stalin (Stalinskie Vysotki), ente más otros.

El diseñu del Moscú medieval basábase en muries concéntriques alredor d'una fortaleza, el Kremlin, nes que converxíen delles carreteres radiales. Sobre esta base, y col condicionamientu de los ríos que cuerren pela ciudá, foi llevantándose la traza urbana del Moscú de los sieglos siguientes.

El Kremlin reconstruyose nel sieglu XV. Les sos torres, y dalgunes de les sos iglesies, foron llevantaes por arquitectos italianos, que-y emprestaraon a la ciudá daqué d'aire renacentista. Dende finales d'esi sieglu, amás, la ciudá aguapeció cola construcción de nuevos monasterios, palacios, muries, torres y ilesies. La so apariencia, demientres los sieglos de la Edá Moderna, nun camudó muncho. Cases de madera de pinu o pícea, con teyaos de teyes cubiertes por yerba o fechos de madera de bidul, dominaben el paisaxe urbanu. Asina foi hasta la segunda metá del sieglu XVIII, cuando los incendios constantes, y tamién les nueves necesidaes d'habitación de la nobleza, forciaron el cambeu, y la mayoría de los edificios de madera foron sustituyíos por otros de piedra[22].

Demientres los sieglos el panorama urbanu de la ciudá tevo domináu poles ilesies ortodoxes. Esto camudó drásticamente na dómina soviética, y especialmente a partir de la decisión de Stalin de modernizar la ciudá. Los sos planes incluyíen una red d'anches avenides y carreteres d'hasta diez carriles d'anchu que, magar que facilitaron la movilidá na ciudá, ficiéronlo a costa d'esbarrumbar gran cantidá d'edificios y barrios históricos. Ente les víctimes de les demoliciones tuvieron la torre Sukharev, una torre conmemorativa n'estilu barrocu (finales del sieglu XVII) que yera ún de los emblemes de la ciudá, y munches mansiones y edificios comerciales qu'estorbaben pa enanchar les cais. Moscú camudó la so naturaleza pa pasar a ser la capital d'un estáu secular y totalitariu, lo que punxo a toes les ilesies en peligru de demolición. Munches, incluyíes dalgunes de les más antigües y arquitectónicamente destacables, foron destruyíes, y magar que dempués de 1990 les más señalaes d'elles (catedrales de catedral de Kazan (Moscú)|Kazan o Cristo Salvador) munches ilesies más pequeñes perdiéronse pa siempres.

Detalle del techu de los grandes almacenes GUM, obra de Vladimir Shukhov (1919-1922).

Sicasí, nun too foi destrucción na época soviética. Los años de Stalin llendaron muncho la creatividá y la innovación arquitectónica, pero los años previos a la so llegada al poder hebo una esplosión de nuevos edificios con propuestes radicales. Rescamplen ente ellos los que ficieron los arquitectos constructivistes asociaos a la Vkhutemas (escuela estatal d'arte y técnica), responsables ente otres obres del mausoléu de Lenin. Otru arquitectu señaláu foi Vladimir Shukhov, famosu poles sos torres hiperboloides; la más famosa ye la torre Shukhov, llevantada como torre de tresmisión pa una emisora de radio ente 1919 y 1922[23]. Otra obra de so de gran influyencia na arquitectura constructivista de la dómina yeren les sos espacioses galeríes comerciales de forma allargada. La más importante foi el centru comercial GUM, llevantáu na Plaza Bermeya, que cubrió con una cúpula de metal y cristal pernovedosa nel so tiempu[24].

La contribución arquitectónica más emblemática del periodu estalinista, nostante, son los nomaos rascacieles de Stalin, un conxuntu siete rascacielos espardíos pela ciudá a una distancia asemeyada del Kremlin llevantaos ente 1947 y 1953 cola mesma tecnoloxía de los rascacielos estaunidenses con una decoración esterior qu'amestaba elementos del góticu ya'l barrocu rusu. Estos fitos del panorama urbanu (skyline)|skyline moscovita inspiráronse na forma del Manhattan Municipal Building de Nueva York, y el so estilu, que combina fachaes esteriores de diseñu complexu con una llarga aguya central que fai d'exe de simetría y cumal del edificiu, recibe'l nome de arquitectura estalinista. Les siete torres pueden vese dende cualquiera de les colines de la ciudá, una y bones tán ente les construcciones más altes de la ciudá.

Referencies[editar | editar la fonte]

  1. Ránking de les ciudaes más poblaes d'Europa na web blatantworld.com (n'inglés).
  2. Población de les distintes unidaes territoriales de Rusia na web de Rosstat (en rusu).
  3. Espansión de les llendes de Moscú pa facilitar el so desarrollu harmoniosu, na web itar-tass.com (n'inglés).
  4. Comins-Richmond, Walter. The History of Moscow. Occidental College.
  5. Russia Engages the World: The Building of the Kremlin, 1156–1516. The New York Public Library (n'inglés).
  6. [https://web.archive.org/web/20060107213535/http://www.iusb.edu/~journal/2002/vogel_2/vogel.html Vogel, Michael. The Mongol Connection: Mongol Influences on the Development of Moscow. Indiana University South Bend (n'inglés).
  7. John F. Richards, The Unending Frontier: An Environmental History of the Early Modern World. University of California Press, 2006, p.260. ISBN 0-520-24678-0.
  8. John T. Alexander, Bubonic plague in early modern Russia: public health and urban disaster. Oxford University Press US, 2002, p.17. ISBN 0-19-515818-0.
  9. Albert Seaton, Michael Youens, The Russian Army of the Napoleonic Wars, 1979, p.29. ISBN 0-88254-167-6.
  10. Lenine's migration, a queer scene, artículu del The New York Times del 16 de marzu de 1918 (n'inglés).
  11. Moscow Encyclopedia, ed. Great Russian Encyclopedia, Moscú, 1997, na entrada La batalla de Moscú.
  12. John Erickson, Barbarossa: The Axis and the Allies, tabla 12.4.
  13. Первая всеобщая перепись населения Российской Империи 1897 г.
  14. Всесоюзная перепись населения 1939 года
  15. Всесоюзная перепись населения 1959 года
  16. Всесоюзная перепись населения 1970 года
  17. Всесоюзная перепись населения 1979 года
  18. Всесоюзная перепись населения 1989 года
  19. Composición por nacionalidaes de la población de les rexones de la Federación Rusa (n'inglés)
  20. Población de les distintes unidaes territoriales de Rusia na web de Rosstat (en rusu).
  21. Bell, Imogen (2003). Eastern Europe, Russia and Central Asia. Taylor & Francis. ISBN 978-1-85743-137-7.
  22. Schmidt, Albert J. The architecture and planning of classical Moscow: a cultural history. American Philosophical Society, 1989, pp. 5–25.
  23. [http://web.archive.org/web/20080527154019/http://www.stako.ru/static.php?&id=mem_shukhov&lang=eng&data=mem_shukhov Biografía de Shukhov na web del Melnikov Institute (n'inglés).
  24. [http://web.archive.org/web/20080527154019/http://www.stako.ru/static.php?&id=mem_shukhov&lang=eng&data=mem_shukhov Biografía de Shukhov na web del Melnikov Institute (n'inglés).


Moscú
Wikimedia Commons tien archivos rellacionaos con: