Botsuana

De Wikipedia
(Redirixío dende Botswana)
Saltar a: navegación, buscar
Botsuana
Republic of Botswana (Inglés)
Lefatshe la Botswana (Tswana)
Flag of Botswana.svg Coat of arms of Botswana.svg
Bandera de Botsuana Escudu de Botsuana
Lema nacional Pula
Himnu nacional Fatshe leno la rona
Alministración
Capital Gaborone
Ian Khama
Presidente de Botsuana Ian Khama
Llingües oficiales inglés
División
Xeografía
Coordenaes 24°40′00″S 25°55′00″E / -24.666666666667, 25.916666666667Coordenaes: 24°40′00″S 25°55′00″E / -24.666666666667, 25.916666666667
Location Botswana AU Africa.svg
Superficie 581737 km² (puestu 48)
% agua 2,6%
Costes Nun tien
Llendes 4.013 km
Llenda con Namibia, Sudáfrica, Zambia y Zimbabue
Puntu más altu Cerro Otse
Demografia
Población 2 021 144 hab. (2013)
Densidá 3,47 hab/km²
Xentiliciu botsuanianu y botsuaniana
Economía
Moneda pula
PIB nominal 15 813 364 345 (2014)
PIB per cápita 6360,14
Más información
Dominiu d'Internet .bw
Códigu telefónicu +267
Códigu ISO 072 / BWA / BW
Estaya horaria UTC+02:00 y Horariu del África Central
www.gov.bw
Cambiar los datos en Wikidata

Botsuana [1] nomada oficialmente República de Botsuana (en tswana: Lefatshe la Botswana), ye un país interior del África meridional. Correspuende al antiguu protectoráu británicu de Bechuanalandia, y tomó'l so nome actual nel momentu de la so independencia, el 30 de setiembre de 1966. De magar entós tien un réxime políticu democráticu y parllamentariu.

Botsuana ye un país llanu, y tien un 70% del so territoriu ocupáu pol desiertu de Kalahari. Llenda cola República Sudafricana al sur y sureste, con Namibia al norte y l'oeste y con Zimbabue al noreste. Llenda tamién al norte, magar que sólo comparte con ella unos cientos de metros de llende cerca de Kazungula, con Zambia. De tamañu mediu, los sos dos millones aprosimaos d'habitantes faen d'elli ún de los países con menor densidá de población del mundu.

Botsuana yera, nel momentu la so independencia, ún de los países más probes d'África, con un PIB per cápita de malpenes 70 dólares norteamericanos. De magar sufrió una gran tresformación: la de so ye una de les economíes de más rápidu crecimientu nel mundu, con un PIB (PPA) per cápita en 2012 d'alredor de 16.800 dolares[2]

Mapa de Botsuana.

Historia[editar | editar la fonte]

Artículu principal: Historia de Botsuana

Botsuana primero de la llegada los europeos[editar | editar la fonte]

En dalgún momentu ente'l añu 200 y el 500 de la nuesa era xentes de llingua bantú que vivíen na rexón de Katanga (en territoriu actual de la República Democrática d'El Congo y Zambia) cruciaron el ríu Limpopo, ocupando la fastera más meridional del continente dientro del procesu de migraciones conocíu como espansión bantú. Les foles migratories principales foron la de los Nguni y de los Sotho-Tswana. Los primeros asentáronse nes rexones costeres del este del África del Sur, mentanto que los caberos posaron primero no qu'anguaño se conoz como Highveld, la gran meseta central d'África del Sur.

P'hacia l'añu 1000 la colonización bantú de la metá este d'África del sur completárase. Esti pueblu tenía un modelu d'organización social feudal, mui descentralizáu y organizáu a partir de kraals (clanes grandes o tribus) dirixíos por un xefe, que-y debía cierta llealtá al xefe de la nación bantú. Caltuvieron esa organización, y un mou de vida basáu na agricultura y la ganadería, hasta qu'aportaron los europeos.

El protectoráu de Bechuanalandia[editar | editar la fonte]

Nel tercer cuartu del sieglu XIX entamaron les lluches ente los habitantes de lo qu'agora ye Botsuana y tribus Ndebele qu'aportaron al territoriu dende'l desiertu de Kalahari. Tamién empezó a haber problemes con colonos boers qu'aportaban dende Transvaal. La petición de los líderes batswana Khama III, Bathoen y Sebele d'axuda a Gran Bretaña fizo que'l gobiernu d'este país punxera a Bechuanalandia embaxu la so protección el 31 de marzu de 1885. La parte septentrional del territoriu permaneció embaxu esa forma alministrativa y dio llugar a l'actual Botsuana, mentanto que la fastera meridional axuntose a la Colonia del Cabu y ye anguaño parte de la Northwest Province (provincia noroccidental) de la República Sudafricana. Allí vive agora la mayoría de la población falante de la llingua setswana. Les tierres de la Concesión Tati, que primero yeren parte del reinu Matabele, foron alministraes pol protectoráu de Bechuanalandia dende 1893, y incorporáronse formalmente a elli en 1911.

Cuando, en 1910, formose la Unión de Sudáfrica a partir de les principales colonies britániques de la rexón, el protectoráu de Bechuanalandia, como Batusoland (anguaño Lesothu) y Suazilandia, nun foron incluyíos, magar que taba prevista la so incorporación posterior. Sicasí, cola escusa de tener de consultar primero a los sos habitantes, los británicos foron retrasando la tresferencia d'esos territorios, que, pesie a la insistencia de los socesivos gobiernos sudafricanos, remanecieron británicos hasta la so independencia. La xubida al gobiernu sudafricanu del National Party, qu'instituyó l'apartheid, en 1948, y l'abandonu de la República Sudafricana de la Commonwealth en 1961 acabaron colos proyectos d'incorporar estes tierres a la república.

El desarrollu de l'autoridá británica y la evolución del gobiernu tribal ficieron que, en 1920, s'establecieran dos conseyos consultivos representando a los europeos y los africanos. En 1951 formose un únicu conseyu consultivu européu-africanu, y la constitución de 1961 fizo d'elli un conseyu llexislativu consultivu.

Botsuana independiente[editar | editar la fonte]

En xunu de 1964 Gran Bretaña aceptó les propuestes d'autogobiernu democráticu que-y llegaben de Botsuana. La sede del gobiernu del protectoráu camudose dende Mafikeng (República Sudafricana) pa Gaborone, que d'aquella yera namái un pequeñu asentamientu alministrativu colonial, en 1965. Nesi mesmu añu redactose una constitución, que dio pasu a les primeres elecciones xenerales y a la independencia el 30 de setiembre de 1966. Seretse Khama, cabezaleru del movimientu pola independencia y aspirante llexítimu a la xefatura de los Ngwato, foi escoyíu como primer presidente del país. Foi reelexíu dos veces, y siguía siendo presidente cuando morrió en 1980. Sucediolu'l so vicepresidente, Ketumile Masire, que foi elexíu otra vuelta en 1984, y tamién posteriormente en 1989 y 1994. Retiróse del cargo en 1998, y foi sustituyíu pol so vicepresidente, Festus Mogae. Esti tamién ganó les elecciones de 1999, y llueu les de 2004. N'abril de 2008 retiróse, y el so sucesor foi el vicepresidente y teniente xeneral del exércitu Seretse Khama Ian Khama, conocíu como Ian Khama y fíu del primer presidente del país.

Política[editar | editar la fonte]

Botsuana ye una república democrática parllamentaria representativa multipartidista, na que'l presidente ye al empar xefe del estáu y xefe del gobiernu. El poder executivu exércenlu'l presidente y el so gobiernu, y el llexislativu conxuntamente pol gobiernu y el parllamentu. El sistema de partíos ta domináu, de magar la independencia, pol Botsuana Democratic Party (Partíu Democráticu de Botsuana, BDP), que tien ganao toles elecciones celebraes nel país. Tocántenes al sistema xudicial, ye independiente dafechu del executivu y el llexislativu.

Botsuana ye formalmente una democracia constitucional multipartidista, con elecciones llibres cada cinco años. Amás del partíu nel gobiernu, que lleva nelli ininterrumpidamente dende 1966, hai otros dos partíos políticos importantes, amás d'un númberu d'otros más pequeños, nos qu'alcuentren calce pa la espresión de les sos idees polítiques la minoría blanca y otres minoríes del país. Esta estabilidá y tresparencia del sistema políticu del país ye ún de los factores que favorecen el granible crecimientu económicu del país.

Edificiu de l'Asamblea Nacional de Botsuana.

El poder llexislativu exércelu un parllamentu bicameral[3].

L'Asamblea Nacional de Botsuana tien anguaño 63 miembros; el so númberu aumenta cuando lo fai la población, revisándose'l so númberu cada 10 años, cuando se completa'l censu. De los 63 actuales, 57 son elexíos pol pueblu, ún por cada ún de los 57 distritos parllamentarios nos que se divide'l país. El partíu cola mayoría de los votos populares escueye otros cuatro, y el presidente y el fiscal xeneral formen parte d'ella automáticamente al acceder a esi cargu. Ye l'Asamblea la que decide quien va ser el presidente del país nel quinqueniu siguiente.

La segunda cámara, consultiva, ye nomada House of Chiefs (Casa de los Xefes), y tien 15 miembros. Ocho d'ellos son los xefes de les principales tribus del país, que formen parte del conseyu con calter permanente. Los otros siete tienen mandatu pa cinco años, y son cuatro subxefes tribales y trés miembros más que son escoyíos por alcuerdu de los otros 12. Cualesquier llei o decretu de l'Asamblea Nacional qu'afecte a les tribus tien de consultase a esta cámara.


Tocántenes al poder xudicial, hai tribunales tradicionales dirixíos por los cabezaleros de las tribus, magar que toles persones que se someten a ellos tienen el derechu de pidir que'l so casu seya xulgáu nel sistema xudicial tradicional, basáu nel modelu inglés, que ye l'oficial nel país.

Dixebra alministrativa[editar | editar la fonte]

Ver tamién: Ciudaes de Botsuana
División alministrativa de Botsuana.

Botsuana ta xebráu en 9 distritos (districts)

  1. Central
  2. Ghanzi
  3. Kgalagadi
  4. Kgatleng
  5. Kweneng
  6. Noreste
  7. Noroeste
  8. Sureste
  9. Sur

El distritu noroeste resulta de la fusión de los antiguos distritos de Chobe y Ngamiland, que tuvo llugar en 2001.

Economía[editar | editar la fonte]

Artículu principal: Economía de Botsuana
Mina de diamantes de Jwaneng, la mayor del mundu

La economía de Botsuana esperimentó variaciones bien grandes demientres los más de 40 años que pasaren dende la independencia. De la que se dixebró del Reinu Xuníu el país yera ún de los 25 más probes del planeta. Sicasí, gracies a la bayura de minerales del so subsuelu (perricu en diamantes) y a la xestión del so gobiernu el país ameyoró enforma. Ye'l país d'África con menor percepción de la corrupción, según Tresparencia Internacional[4], y ye, pesie a ser un país interior y con namái un 5% del so territoriu útil pal cultivu, una de les economíes más puxante y competitiva del continente.

Asina, Botsuana ye l'únicu país del mundu que tuvo un crecimientu económicu mediu del 7.5% demientres el periodu 1961-1997[5] y, magar que nos caberos años esta tasa menguó, en 2006-07 tovía yera del 4,7%[6]. A resultes d'ello, la deuda esterna del país ye muncho menor que la de los países de la rodiada, a los que supera por embargu en renta per cápita.


L'agricultura entá ye'l mediu de subsistencia del 80% de la población, magar que namái ye quien a cubrir la mitá de les necesidaes alimentaries del país y representa malpenes un 3% del PIB. L'actividá más espardida ente la población ye'l cultivu de pequeñes lloses y la cría del ganáu, poco productivos por culpa l'irregular réxime de lluvies y la probitú de los suelos. El turismu, pela so banda, va garrando puxu nos últimos años. Tocántenes a la minería, alcontráronse importantes xacimientos minerales nos años 70 del sieglu XX; a resultes d'ello, el sector mineru pasó de representar el 25% del PIB en 1980 al 38% en 1998. La so importancia, amás, aumentará una y bones, dempués de l'aprobación del proyectu Orapa 2000, la principal mina de diamantes del país ha doblar la so capacidá. La tasa de desempléu oficial ye del 21%, magar que fuentes non oficiales dicen que la cifra avérase al 40%. En 2003 un 30,3% de la población vivía perbaxo l'umbral de la probeza[7].

Demografía[editar | editar la fonte]

El país tien, según la estimación pa xunetu del añu 2012, 2.098.018 habitantes[8].

Bosquimanos (basarwa) faciendo fueu.

El grupu étnicu mayoritariu nel país (79%) ye'l de los tswana. El restu la población pertenez a otros grupos tribales de raza negra, amás de a les minoríes india y blanca. Tocántenes a los primeros, destaca la población de la tribu kalanga (11%) y basarwa (3%); otros grupos tribales de raza negra son les tribus bayei, bambukushu, basubia, baherero y bakgalagadi. Los indios, que son un 3% de la población, son principalmente indio-africanos, descendientes d'indios pero qu'aportaron al país dende Mozambique, Kenia, Tanzania, Mauriciu o la República Sudafricana; sicasí, hai tamién dellos inmigrantes indios de primer xeneración. La población blanca (3%) ye de llingua inglesa o afrikaner. Nótase tamién, dende 2000, un aumentu del númberu d'inmigrantes de Zimbabwe per aciu la mala situación económica y social nel país vecín.

Queden entá nel país menos de 10.000 bosquimanos (basarwa) que caltienen, mayormente na fastera desértica del país, el so estilu tradicional de vida, basáu na caza y na collecha de frutes silvestres, pesie a los intentos del gobiernu, denunciaos poles Naciones Xuníes, de quita-yos los sos derechos dientro d'una política d'ameyoramientu de la situación de la etnia tswana a costa de los grupos étnicos minoritarios[9].

Llingües[editar | editar la fonte]

La llingua oficial de Botsuana ye l'inglés, que por embargu ye la llingua materna de namái el 2,1% de la población. Los más de los botsuanianos (78,2%) falen en setswana. Una peculiaridá d'esta llingua ye la importancia que tienen nella los prefixos:"bo" fala de país, "ba" de la xente, "mo" fai referencia a una persona y "se" a la llingua. Asina, Botsuana ye'l país de los tswana, qu'en conxuntu formen la tribu de los batswana; caún d'ellos ye un motswana, y la llingua que falen ye'l setswana.

Otres llingües falaes nel país inclúin el kalanga o sekalanga (7,9% de la población), el sekgalagadi (2,9% de la población) y otres como l'ndebele. Parte de la población blanca tien como llingua materna l'afrikaans.

Relixón[editar | editar la fonte]

El 70% de la población del país identifíquense como cristianos. Los más d'ellos son anglicanos, metodistes y siguidores de la Ilesia Congregacional Xunida de Sudáfrica, magar que hai tamién luteranos, adventistes del séptimu día, baptistes, miembros de la Ilesia Reformada Holandesa, menonites, mormones, testigos de Xehová... La minoría católica del país organízase na diócesis de Gaborone, que la catedral de Cristu Rei ye la so ilesia principal, y nel vicariatu apostólicu de Francistown[10].

Según el censu del 2001 un 20,6% de la población diz nun tener relixón denguna[11]. Amás d'un 6% de siguidores de relixones tradicionales (badimo), hai alredor de 5.000 musulmanes, 3.000 hinduístes y 700 siguidores de la fe bahá'í, llegaos los más d'ellos del sur d'Asia.

Tresportes y comunicaciones[12][editar | editar la fonte]

Botsuana tenía, el día la so independencia, malpenes 12 km de carreteres asfaltaes. Esa precariedá, y el fechu de que, al ser un país interior, depende totalmente de les sos víes de comunicación pa la salida y entrada de productos nos países vecinos, tien fecho que, dende los primeros años d'independencia, la política de tresportes seya una parte importante del programa de desarrollu económicu impulsáu pol gobiernu central del país. Entá güei el país sigue desendolcando polítiques desarrollistes del tresporte nacional, ya que la falta d'infraestructures afayadices sigue torgando la diversificación de la producción y les esportaciones.

El desarrollu de les principales víes de comunicación (por exemplu, la carretera Trans-Kalahari, financiada pol Bancu Africanu de Desarrollu) dependió en xeneral de l'ayuda financiera esterna. Sicasí, el 15-20% del gastu públicu del país destínase a inversiones d'ameyoramientu de les infraestructures viaries. Asina, en 2003 asfaltáronse 9.000 km de carreteres de les que comuniquen el país con Zambia y Zimbabwe, tentando de reducir la importante dependencia del pais respectu a les carreteres de la República Sudafricana. Pesie a ello el gastu en mantenimientu de carreteres sigue siendo escasu; bona amuesa d'ello ye'l fechu de que les cuatro rutes que xunen el país con Sudáfrica nun permiten el pasu de tráficu pesáu.[13]. El total de km de la rede de carreteres (2011) ye de 17.916. 8.916 d'ellos (6.116 asfaltaos y 2.800 non asfaltaos) pertenecen a la rede estatal, y los otros 9.000 tán al cuidáu de los niveles inferiores de l'alministración.

Un avión de Air Botswana nel aeropuertu de Johannesburgu

Tocántenes al ferrocarril, la llinia principal del país ye una sección de la proyectada por Cecil Rhodes y nunca acabada llinia Ciudá del Cabu-El Cairu, que xune la ciudá sudafricana con Bulabayo (Zimbabue) tres travesar Lobatse, Gaborone y Francistown. Va poco que se-y añedieron a esta llinia dos ramales pa dar serviciu a los xacimientos de carbón de Morupule y de cobre y níquel de Selebi-Phikwe. Los 888 km de la rede siguen calteniendo, como herencia británica, la vía estrecha (la nomada trocha angosta, con una distancia ente víes de 1.067 mm).

No que cinca al tresporte aereu, hai 76 aeropuertos y aeródromos nel país; namái 10 d'ellos tienen la pista d'aterrizaxe asfaltada[14]. L'aeropuertu de Gaborone ye l'únicu que tien tráficu internacional, y hai otros dos, los de Maun y Kasane, que presten servicios a nivel rexonal. L'aerollinia de bandera ye Air Botswana, que xune los aeropuertos del país colos países vecinos (Zambia, Zimbabue y República Sudafricana).

Referencies[editar | editar la fonte]

Enllaces esternos[editar | editar la fonte]



África
Angola | Arxelia | Benín | Botsuana | Burkina Fasu | Burundi | Cabu Verde | Camerún | República Centroafricana | Chad | Comores | El Congu | República Democrática d'El Congu | Costa de Marfil | Eritrea | Etiopía | Exiptu | Gabón | Gambia | Ghana | Guinea | Guinea-Bisáu | Guinea Ecuatorial | Kenia | Lesothu | Liberia | Libia | Madagascar | Malaui | Malí | Marruecos | Mauriciu | Mauritania | Mozambique | Namibia | Níxer | Nixeria | Ruanda | Santu Tomé y Príncipe | Seixeles | Senegal | Sierra Lleona | Somalia | Suazilandia | Sudáfrica | Sudán | Sudán del Sur | Tanzania | Togu | Tunicia | Uganda | Xibuti | Zambia | Zimbabue

Dependencies: Islles Kerguelen | Mayotte | Reunión | Sáhara Occidental | Socotra | Tromelin