Xuegos Olímpicos d'Atenes 1896

De Wikipedia
Xuegos Olímpicos d'Atenes 1896
Xeneral
Tipu de competición Xuegos Olímpicos de branu
País Reinu de Grecia
Historia
Desapaición 15 d'abril de 1896
Competición
Participantes 14 estáu nos Xuegos Olímpicos
241 Atleta Olímpico (es) Traducir
ensin valor Xuegos Olímpicos d'Atenes 1896 Xuegos Olímpicos de París 1900
Web oficial
Cambiar los datos en Wikidata

Los Xuegos Olímpicos d'Atenes 1896, conocíos oficialmente como Xuegos de la I Olimpiada, celebráronse n'Atenes, Grecia, ente'l 6 y el 15 d'abril de 1896. Participaron 241 atletes masculinos —nun hubo participación femenina— de 14 países, qu'apostaron en 43 competiciones de 9 deportes. Fueron los primeros Xuegos Olímpicos de la Dómina Moderna.

A pesar de les munches torgues y reveses, los Xuegos Olímpicos de 1896 fueron reconocíos como un gran ésitu. Tuvieron la mayor participación internacional nun eventu deportivu hasta esa fecha. L'Estadiu Panathinaikó, que foi'l primer gran estadiu del mundu modernu, vio degolada la so capacidá col ensame de persones más grande que s'axuntara enxamás pa ver un eventu deportivu.[1] Lo más sobresaliente pa los griegos foi la victoria del so compatriota Spiridon Louis nel maratón. El competidor más esitosu foi'l lluchador y ximnasta alemán Carl Schuhmann, que ganó cuatro medayes d'oru.[2]

De magar entós, cada cuatro años, deportistes de tolos países axúntense pa competir ente ellos. Namái les grandes guerres del sieglu XX torgaron la fechura de los Xuegos Olímpicos, pero al rematar éstes, siguióse cola tradición. Grecia entamó de nuevo los Xuegos Olímpicos en 2004.

Antecedentes[editar | editar la fonte]

Mientres el sieglu XVIII, dellos festivales deportivos a pequeña escala a lo llargo d'Europa denomináronse Xuegos Olímpicos Antiguos. El barón Pierre de Coubertin tuvo la idea d'alicar los antiguos Xuegos Olímpicos, pero en forma d'un eventu multideportivu ya internacional —los antiguos Xuegos fueron en ciertu mou internacionales, yá que delles polis y colonies griegues tuvieron representación, pero namái se-yos dexó participar a los homes llibres d'orixe griegu—, inspirándose nos xuegos entamaos pol home de negocios Evangelos Zappas en Grecia.[3][1]

El 18 de xunu de 1894, Coubertin entamó un congresu na Universidá de la Sorbona, en París, pa presentar los sos planes a los representantes de sociedaes deportives d'once países. Dempués de l'aprobación de la idea per parte del congresu, empezó la escoyeta d'una fecha y un llugar. Coubertin suxurió que los Xuegos trescurrieren en 1900, coincidiendo cola Esposición Universal de París, pero como una espera de seis años podía facer menguar l'interés del públicu, los miembros del congresu optaron por llevar a cabu los Xuegos inaugurales en 1896. El procesu d'eleición de la sede ye inda un misteriu por cuenta de les versiones contradictories qu'esisten. El 23 de xunu de 1894 Demetrius Vikelas propunxo oficialmente Atenes y como Grecia foi'l llugar onde nacieron los Xuegos Olímpicos, la propuesta foi aprobada unánimemente. Vikelas amás foi escoyíu presidente del acabante crear Comité Olímpicu Internacional.[1]

Organización[editar | editar la fonte]

Panorámica del Estadiu Panathinaikó.
Sellu de la primer serie de sellos olímpicos.

La noticia de que los Xuegos Olímpicos diben tornar a Grecia foi recibida favorablemente pol públicu, los medios y la familia real griega. Según Coubertin, «el príncipe herederu Constantino recibió con gran prestu que los Xuegos s'inauguren n'Atenes».[1]

Sicasí, Grecia tenía problemes financieros y había muncha inestabilidá política. Nos últimos años del sieglu XIX, el puestu de Primer Ministru fuera alternáu ente Charilaos Trikoupis y Theodoros Deligiannis. Por cuenta d'esta inestabilidá política y económica, mesmo'l primer ministru Trikoupis como Stephanos Dragumis creyíen que Grecia nun podría realizar l'eventu.[4] A finales de 1894, el comité organizador presentó un informe qu'afirmaba que'l costu sería trés veces mayor a lo envalorao orixinalmente por Coubertin, concluyendo que los Xuegos nun se realizaríen. El costu total de los Xuegos yera de 3.740.000 dracmes, aproximao 448.000 dólares d'Estaos Xuníos.[5]

Demetrius Vikelas, el primer presidente del COI.

Cola perspeutiva d'alicar les Olimpiaes bien en dulda, Coubertin y Vikelas empecipiaron una campaña pa caltener el Movimientu Olímpicu con vida. Los sos esfuercios remataron el 7 de xineru de 1894, cuando Vikelas anunció que'l príncipe Constantín asumiría la presidencia del Comité Organizador. La so primer responsabilidá foi la de llograr los fondos necesarios pa realizar los Xuegos col enfotu de que'l patriotismu del pueblu griegu motivára-y a financiar l'eventu.[1] Vikelas y los demás griegos fixeron casi tol trabayu, nel que Coubertin tuvo bien poca participación.[4] L'entusiasmu de Constantín encendió una fola de contribuciones del públicu griegu y los primeros esfuercios consiguieron 330.000 dracmes. Emitióse una edición especial de sellos postales, consiguiendo 400.000 dracmes en ventes, y cola venta de boletos llográronse 200.000 dracmes adicionales. Y a pidimientu de Constantín, l'home de negocios griegu George Averoff llegó a pagar la restauración del Panathinaiko, donando cerca d'un millón de dracmes pa esti proyeutu.[6] Como tributu a la so arrogancia, foi construyida una estatua d'Averoff, presentada'l 5 d'abril de 1896 nes contornes del estadiu, ónde entá sigue.[7]

Munchos de los atletes que participaron nos Xuegos taben de vacaciones o por motivos llaborales n'Atenes cuando estos celebraron dellos competidores británicos trabayaben pa la Embaxada Británica, por casu—. Nun se designó una Villa Olímpica pa los atletes hasta los Xuegos Olímpicos de 1932, polo que los atletes debíen costease los sos gastos.

Los Xuegos fueron un ésitu. Participaron catorce países y 241 atletes. Dempués de la so finalización, el barón de Coubertin propunxo que rotaren per tol mundu. Esta idea nun foi del gustu de los organizadores griegos qu'imaxinaren una cita mundial n'Atenes cada cuatro años, pero dexó que la tradición empecipiada con estos Xuegos siguiera hasta l'actualidá.

La primer regulación votada pol COI en 1894 foi dexar namái la participación d'atletes amateur nos Xuegos. Díxose que Coubertin usó esta restricción namái por considerancies táctiques, pa consiguir la reintroducción de los Xuegos de manera más rápida.[8] Les regles y regulaciones de los deportes nun yeren uniformes, asina que'l Comité Organizador tuvo qu'escoyer ente los códigos de les distintes asociaciones atlétiques nacionales. El xuráu, los árbitros y el direutor de xuegu teníen los mesmos nomes que na antigüedá (Ephor, Helanodic y Alitarc). El rei Xurde I de Grecia actuó como árbitru final y según Coubertin, «la so presencia dio pesu y autoridá a les decisiones de los xueces».[9]

Desendolcu[editar | editar la fonte]

Calendariu[editar | editar la fonte]

   ●    Ceremonia d'apertura    ●    Clasificatories    ●    Eventos finales    ●    Ceremonia de pieslle
Abril 6 7 8 9 10 11 12 13 14 15
Ceremonies
Atletismu ● ● ● ● ● ● ● ● ● ● ● ● ● ● ●
Ciclismu ● ● ●
Esgrima ● ●
Ximnasia ● ● ● ● ● ● ● ●
Halterofilia ● ●
Llucha
Natación ● ● ● ●
Tenis ● ●
Tiru ● ● ●
Abril 6 7 8 9 10 11 12 13 14 15

Ceremonia d'Apertura[editar | editar la fonte]

Ceremonia d'Apertura nel Estadiu Panathinaikó.

El 6 d'abril25 de marzu según el calendariu xulianu— inauguráronse los Xuegos de la I Olimpiada. Yera llunes de Pascua mesmo pal cristianismu occidental como pa la ilesia ortodoxa y, amás, yera l'aniversariu de la guerra d'independencia de Grecia.[9] Aproximao 80.000 espectadores asistieron al Estadiu Panathinaikó, incluyíu'l rei Xurde I de Grecia, la so muyer Olga y los sos fíos. La mayoría de los atletes alliniáronse nel verde del estadiu, arrexuntaos por países. Dempués del discursu del presidente del comité organizador, el príncipe herederu Constantín, so padre abrió oficialmente los Xuegos coles pallabres:[10]

Proclamo l'apertura de los primeros Xuegos Olímpicos internacionales n'Atenes. Llarga vida a la Nación. Llarga vida al pueblu griegu.

Dempués d'esto, nueve bandes y 150 coristes interpretaron un Himnu Olímpicu, compuestu por Spyridon Samaras y escritu pol poeta Kostis Palamas. A partir d'entós, distintos músiques sonaron nes ceremonies d'apertura de los Xuegos hasta 1960, fecha en que la composición de Samaras y Palamas se convirtió nel Himnu Olímpicu oficial (decisión tomada na sesión del COI de 1958). Otros elementos de l'actual ceremonia d'apertura empecipiáronse más tarde: la llapada Olímpica encendióse per primer vegada en 1928, el xuramentu de los atletes fízose per primer vegada en 1920 y el de los xueces en 1972.[10]

Deportes[editar | editar la fonte]

Nel I congresu del Comité Olímpicu Internacional de 1894 na Sorbona, salió escoyíu como primer presidente'l comerciante griegu Demetrius Vikelas, que dos años más tarde en 1896, sería sustituyíu pol Barón Coubertin. Suxuriéronse una gran cantidá de deportes pal programa d'Atenes, y como resultáu'l primer anunciu oficial alrodiu de los eventos que se desenvolveríen incluyó deportes como fútbol y críquet. Estos planes nun se concretaron y non tolos deportes anunciaos primeramente tuvieron na llista final, tan solu once deportes fueron incluyíos nel programa de los xuegos, cola disputa de 43 pruebes, y el remu y la vela fueron incluyíos pero tuvieron que ser atayaos por cuenta de los fuertes vientos el día de la competición.[11]

Deportes nos Xuegos Olímpicos d'Atenes 1896
[[Atletismu]] | [[Ciclismu]] | [[Esgrima]] | [[Ximnasia]] | [[Halterofilia]] | [[Llucha]] | [[Natación]] | [[Tenis]] | [[Tiru]]

Atletismu[editar | editar la fonte]

L'atleta estauxunidense James Connolly foi'l primer campeón olímpicu de la hestoria.

Los eventos d'atletismu teníen mayor algame internacional que cualesquier otru deporte. James Connolly de los Estaos Xuníos ganó'l triple saltu'l 6 d'abril de 1896 convirtiéndose nel primer Campeón Olímpicu en 1503 años.[2] Terminó tamién segundu en saltu altu y terceru en saltu llargu.[11] El viaxe hasta Atenes fízose en barcu de carga y tren.

Lo más destacao foi'l maratón, lleváu a cabu per primer vegada nuna competencia internacional. Spiridon Louis, un desconocíu acarretador d'agua, ganó l'eventu convirtiéndose nel únicu campeón d'atletismu de Grecia y nun héroe nacional.[2] Anque Grecia yera favorita pa ganar en llanzamientu de discu y llanzamientu de pesu, los atletes griegos meyor clasificaos terminaron detrás del estauxunidense Robert Garrett en dambos eventos. Garrett entrenárase con un discu bien pesáu y al llegar a la competición decatóse que'l discu utilizáu na xusta Olímpica sería más llixeru.[1]

Nun s'impunxo nengún récor mundial por cuenta de que bien pocos competidores internacionales fueron escoyíos pa participar. Amás, les curves na pista yeren bien pronunciaes faciendo bien difícil algamar altes velocidaes nes carreres de pista. A pesar d'esto Thomas Burke, de los Estaos Xuníos, ganó la competencia de 100 m en 12,0 segundos y la de 400 m en 58,4 segundos.[11] Burke foi l'únicu n'usar l'estilu d'arranque agacháu (poniendo la so rodía nel suelu), confundiendo a los xueces. Finalmente, foi-y dexáu empezar d'esta "incómoda" posición.[12]

El chilenu Luis Subercaseaux Errázuriz compitió nos 100 metros llisos y foi l'únicu participante iberoamericanu en tolos xuegos olímpicos, magar que nun hubo una autorización oficial del so país d'orixe, lo que motivó que Chile seya incluyíu nestos xuegos delles vegaes y otres non.[13][14] L'australianu Teddy Flack ganó los 800 m y los 1500 m.[2] Ellery Clark de los Estaos Xuníos ganó'l saltu altu y el saltu llargu.[2]

Ciclismu[editar | editar la fonte]

Los franceses Léon Flameng (izq.) y Paul Masson ganaron cuatro eventos de ciclismu.

Nes competiciones de ciclismu utilizaron les regles de l'Asociación Internacional de Ciclismu.[8] Los eventos de ciclismu en pista celebráronse nel nuevu Velódromu Neo Phaliron. Namái hubo una prueba de carretera, una carrera dende Atenes hasta Maratón, ida y vuelta (unos 87 quilómetros).[11][2]

Nos eventos de pista, el meyor ciclista foi'l francés Paul Masson, quien ganó los eventos de velocidá y los 10.000 metros.[11] Na carrera de 100 quilómetros, Masson entró como marcapasos del so compatriota Léon Flameng. Flameng ganó l'eventu, dempués de recuperase d'una cayida y dempués de detenese a esperar a que'l so oponente, el griegu Georgios Kolettis, reparara un problema mecánicu. L'esgrimista austriacu Adolf Schmal ganó la carrera de 12 hores, que namái completaron dos ciclistes, ente que l'eventu en carretera ganolu Aristidis Konstantinidis.[8][11]

Esgrima[editar | editar la fonte]

L'esgrimista Leonidas Pyrgos convirtióse nel primer campeón olímpicu griegu de la era moderna, al ganar la competencia de Florete Profesional.

Los eventos d'esgrima desendolcáronse nel Zappeion, que construyíu col dineru qu'Evangelos Zappas invirtiera p'alicar los antiguos Xuegos, nun viera nunca antes nengún eventu atléticu.[1] A diferencia d'otros deportes, nos que namái se dexó la participación d'amateurs, n'esgrima sí se-yos dexó participar a los deportistes profesionales, anque nun eventu separáu.[9]

Orixinalmente planiáronse cuatro eventos, pero'l d'espada foi atayáu por razones desconocíes. En florete'l ganador foi'l francés Eugène-Henri Gravelotte, quien ganó al so compatriota Henri Callot na final.[1] Dos atletes griegos ganaron los otros dos eventos, sable y florete profesional. Leonidas Pyrgos, quien ganó en florete profesional, convirtióse nel primer campeón olímpicu griegu de la era moderna.[11]

Ximnasia[editar | editar la fonte]

Los campeones individuales alemanes: Schuhmann, Flatow, y Weingärtner.

Les competencies de ximnasia celebráronse nel Estadiu Panathinaikó. Alemaña, qu'unviara un equipu d'once homes, ganó cinco de los ocho eventos, incluyendo los dos n'equipos. Nel eventu de barra fixa por equipu los alemanes nun tuvieron oponente. Trés alemanes tamién ganaron títulos individuales: Hermann Weingärtner ganó en barra fixa individual, Alfred Flatow en barres paraleles individual y Carl Schuhmann, que tamién compitió en llucha, ganó en saltu de potru.[11] Louis Zutter, un ximnasta suizu, ganó l'eventu de potru con argolles, mientres los griegos Ioannis Mitropoulos y Nikolaos Andriakopoulos fueron los ganadores de los eventos d'argolles y esguilada de cuerda, respeutivamente.[1]

Halterofilia[editar | editar la fonte]

El deporte d'halterofilia entá yera mozu en 1896 y les regles yeren distintes a les que s'usen güei. Les competencies yeren al campu, nel campu del estadiu principal y nun había llendes de pesu. El primer eventu foi nun estilu que güei se llama "de dos tiempos". Dos competidores participaron: l'escocés Launceston Elliot y Viggo Jensen de Dinamarca. Dambos llevantaron el mesmu pesu; pero'l xuráu, col rei Xurde I de Grecia como xefe, decidió que Jensen lo fizo con un meyor estilu. La delegación británica, que nun taba acostumada a esta regla de desempate, protestó la decisión. Los atletes entós fixeron nuevos intentos pero nengunu llogró ameyorar la so marca, colo que Jensen foi declaráu campeón.[11]

Elliot tuvo una segunda oportunidá nel eventu de llevantamientu de pesu con una mano, que se celebró darréu dempués del de dos manes. Jensen mancárase levemente nos sos últimos intentos a dos manes polo que nun foi rival pa Elliot. Mientres l'eventu asocedió un incidente: un sirviente foi encargáu de retirar les peses, lo que paeció bien difícil pa él. El rei Xurde entós foi ayudalu, llevantó la pesa y tiróla a una considerable distancia con facilidá, pal deliriu del ensame.[11]

Llucha[editar | editar la fonte]

Carl Schuhmann (izq.) y Georgios Tsitas salúdense antes de la prueba final de llucha.

Les competencies de llucha fueron llevaes a cabu nel Panathinaiko. Nestes nun esistieron categoríes por pesu, lo que significó que solo hubo un ganador ente tolos competidores. Les regles usaes yeren asemeyaes a la llucha grecorromana moderna, anque nun había llende de tiempu y nun taba prohibíu sostener al rival peles piernes.

Sacante los dos competidores griegos, tolos demás yá participaren n'eventos d'otros deportes. El campeón d'halterofilia Launceston Elliot enfrentó al campeón de ximnasia Carl Schuhmann. Esti postreru ganó y avanzó a la final, onde enfrentó a Georgios Tsitas, que ganara a Stephanos Christopoulos. La escuridá obligó a suspender la llucha final dempués de 40 minutos. Foi siguida a otru día, cuando Schuhmann solo precisó 15 minutos p'acabala.[11]

Natación[editar | editar la fonte]

Alfréd Hajós, el primer campeón olímpicu de natación.

Les competencies de natación desendolcáronse en mar abiertu porque los organizadores refugaron la construcción d'un estadiu especializáu, por cuenta de los costos. Cerca de 20.000 espectadores alliniáronse na Badea de Zea fuera de les mariñes d'El Pireo pa ver los eventos. L'agua na badea taba fría, y los atletes sufríen mientres les sos carreres. Hubo trés eventos abiertos, 100 metros estilu llibre, 500 metros estilu llibre y 1200 metros estilu llibre, amás d'otru eventu de 100 metros estilu llibre namái pa marineros griegos. Tolos eventos celebraron el mesmu día, 11 d'abril.[8]

P'Alfréd Hajós d'Hungría, esto significó que namái podría competir en dos de los eventos, porque se diben a celebrar con bien pocu tiempu ente ellos, lo que nun-y daría tiempu abondu pa recuperase afechiscamente. Sicasí, ganó los dos eventos en que participó, 100 y 1200 metros estilu llibre.[11] Pa esta última carrera los nadadores fueron tresportaos en barcu, dexándolos tornar solos hasta la vera. Al terminar la carrera Hajós afirmó que más lo impulsó'l so deséu de sobrevivir que'l de ganar la carrera. L'eventu de 500 metros estilu llibre ganólu l'austriacu Paul Neumann quien sacó a los sos oponentes más de minutu y mediu de ventaya.[11]

Tenis[editar | editar la fonte]

A pesar que'l tenis yá yera un deporte popular a finales del sieglu XIX, nengunu de los grandes xugadores de la dómina participó nel tornéu d'Atenes. La competencia celebróse nes canches del Club de Tenis d'Atenes y nel campu del velódromu usáu pa los eventos de ciclismu. John Pius Boland quien ganó l'eventu, entró a la competencia gracies a un compañeru so na Universidá d'Oxford; el griegu Konstantinos Manes. Como miembru del subcomité de tenis de los Xuegos, Manes trató, cola asistencia de Boland, de reclutar competidores pa los xuegos ente los círculos deportivos d'Oxford. Na primer fase Boland venció a Friedrich Traun, un prometedor tenista d'Hamburgo, que fuera esaniciáu na carrera de 100 metros. Boland y Traun decidieron facer equipu pal eventu de dobles nel que llegaron a la final y vencieron a los sos oponentes dempués de perder el primer set.[15]

Tiru[editar | editar la fonte]

Celebrada nun ranchu en Kallithea, la competencia de tiru consistió en cinco eventos, dos usando rifle y trés con pistola. El primer eventu, rifle militar 200 metros, foi ganáu por Pantelis Karasevdas, l'únicu competidor que dio al blancu en tolos disparos. El segundu eventu, pistola militar 25 metros, foi ganáu por dos hermanos estauxunidenses: John y Sumner Paine, que se convirtieron nos primeros hermanos en terminar primeru y segundu nel mesmu eventu. Con cuenta de nun avergoñar a los sos anfitriones, los hermanos decidieron que namái unu d'ellos competiría nel siguiente eventu, pistola militar 50 metros. Sumner Paine ganó esi eventu y convirtióse amás nel primer pariente d'un campeón olímpicu en ser tamién campeón.[11]

Los hermanos Paine nun completaron l'eventu de pistola rápida 25 metros porque los xueces determinaron que les sos armes nun yeren del calibre requeríu. Na so ausencia'l ganador foi Ioannis Phrangoudis. L'últimu eventu, rifle militar 300 metros, empezó esi mesmu día, sicasí nun pudo ser completáu por cuenta de la escuridá y remató la mañana siguiente, cuando Georgios Orphanidis foi coronáu campeón.[11]

Ceremonia de pieslle[editar | editar la fonte]

Na mañana del domingu 12 d'abril, el rei Xurde entamó una llacuada pa los oficiales y atletes (anque dalgunos yá nun taben ellí). Mientres el so discursu dexó claro que, no qu'a él correspondía, los Xuegos teníen de desenvolvese n'Atenes siempres. La ceremonia de pieslle oficial celebróse'l miércoles siguiente, dempués de ser aplazada'l martes por cuenta de l'agua.[9]

Al igual que na ceremonia d'apertura, la familia real presidió'l pieslle, que foi abiertu pol himnu nacional de Grecia y una composición en griegu antiguu de George S. Robertson, un atleta británicu. Darréu'l rei apurrió los premios a los ganadores: medaya de plata, caña d'olivar y diploma a los primeres y medaya de cobre, caña de lloréu y diploma a los segundos; los clasificaos en tercer llugar nun recibieron medayes. Spyridon Louis guió a los medayistes nuna vuelta d'honor alredor del estadiu mientres s'entonaba l'Himnu Olímpicu. Dempués el rei anunció oficialmente que la primer Olimpiada rematara y abandonó l'estadiu mientres la banda de música tocaba l'himnu nacional griegu y la xente aplaudía.[9]

Países participantes[editar | editar la fonte]

El conceutu d'equipos nacionales nun foi una parte importante del movimientu Olímpicu hasta los Xuegos Intercalaos de 1906, anque munches fontes llisten la nacionalidá de los competidores en 1896 y cunten les sos medayes, con conflictos importantes en rellación a qué naciones compitieron.

El Comité Olímpicu Internacional reconoz la participación de catorce países, anque ensin llistalos.[16] Delles fontes llisten dolce, escluyendo a Bulgaria y Chile; ente qu'otres llisten 13, incluyendo a estos dos y escluyendo a Italia. Exiptu ye incluyíu delles vegaes pola participación de Dionysios Kasdaglis y Bélxica y Rusia inscribieron competidores qu'acabaron retirándose. Los catorce países siguientes son reconocíos pol COI:

Países participantes.

Medayeru[editar | editar la fonte]

Medaya de plata de los Xuegos.
Ver medayeru completu en Medayeru de los Xuegos Olímpicos d'Atenes 1896

Mientres los eventos de la primer olimpiada apurrióse una medaya de plata, una caña d'olivar y un diploma a los ganadores del primer puestu en cada eventu.[11] Pal segundu llugar apurrióse una medaya de cobre, una caña de lloréu y un diploma.[11]

Na medaya apaez la cara del dios Zeus sosteniendo na so mano un globu sobre'l cual pósase la victoria con ales. Na parte inferior lleese en griegu la pallabra «Olympia». Nel aviesu amuésase l'acrópolis y el testu en griegu: Xuegos Olímpicos Internacionales n'Atenes 1896.[11]


Predecesor:
-
I Xuegos Olímpicos de Branu
Xuegos Olímpicos d'Atenes 1896 Grecia
Socesor:
Xuegos Olímpicos de París 1900  Francia

Referencies[editar | editar la fonte]

  1. 1,0 1,1 1,2 1,3 1,4 1,5 1,6 1,7 1,8 Young, David C. (1996). The Modern Olympics: A Struggle for Revival. Baltimore: Johns Hopkins University Press. ISBN 0-801-87207-3.
  2. 2,0 2,1 2,2 2,3 2,4 2,5 John E. Findling; Kimberly D. Pelle (2004). Encyclopedia of the modern Olympic movement. Greenwood Publishing Group. ISBN 0-313-32278-3.
  3. Kyle, Donald G. (2007). Sport and Spectacle in the Ancient World: Early Sport and Spectacle. Blackwell Publishing. ISBN 0-631-22970-1.
  4. 4,0 4,1 Young, David C. (2004). A Brief History of the Olympic Games. Oxford: Blackwell. ISBN 1-405-11130-5.
  5. Zarnowski, C. Frank (verano de 1992).
  6. Darling, Janina K. (2004). Architecture of Greece. Greenwood Publishing Group. ISBN 0-313-32152-3.
  7. George Averoff Dead.
  8. 8,0 8,1 8,2 8,3 Lennartz, Karl; Wassong, Stephen (2004). John E. Findling, Kimberly D. Pelle: Encyclopedia of the Modern Olympic Movement. Greenwood Publishing Group. ISBN 0-313-32278-3.
  9. 9,0 9,1 9,2 9,3 9,4 Coubertin, Pierre de; Hambidge, Jay (Payares de 1896).
  10. 10,0 10,1 Comité Olímpicu Internacional. «Athens 1896–Games of the I Olympiad». Consultáu'l 24 d'agostu de 2009.
  11. 11,00 11,01 11,02 11,03 11,04 11,05 11,06 11,07 11,08 11,09 11,10 11,11 11,12 11,13 11,14 11,15 11,16 11,17 Coubertin, Pierre de; Timoleon J. Philemon, N.G. Politis and Charalambos Anninos (1897). The Olympic Games: BC 776 – AD 1896 (PDF), Athens: Charles Beck. Consultáu'l 25 de xunetu de 2008.
  12. Sears, Edward S. (2001). Running through the Ages. McFarland. ISBN 0-786-40971-1.
  13. Lamatta, María José y Figueroa, Eduardo.
  14. Chile nos Xuegos Olímpicos d'Atenes 1896
  15. Gillmeister, Heiner (1998). Tennis: a Cultural History (PDF), Continuum International Publishing Group. ISBN 0-718-50195-0.
  16. Comité Olímpicu Internacional (COI), ed (s/f). «Athens 1896 Summer Olympic Games: More About - Games reborn» (inglés). www.olympic.org. Consultáu'l 12 d'agostu de 2012. «The Games attracted athletes from 14 nations»
  17. Mallon, Bill y Ture Widlund (1998). The 1896 Olympic Games. Results for All Competitors in All Events, with Commentary (PDF) (n'inglés), Jefferson: McFarland & Company, Inc., Publishers, páx. 39. ISBN 0-7864-0379-9. «Across the field, in answer to the Herald's trumpet, come two Hungarians, a Chilian, a Frenchman, a German, an Englishman and an American, to run the 100-meters race»
  18. Olympic Games Museum (2011). «Participating Countries - Olympic Games Athens 1896» (inglés). olympic-museum.de. Consultáu'l 22 de mayu de 2011. «1. Australia, 2. Austria, 3. Bulgaria, 4. Chile, 5. Denmark, 6. France, 7. Germany, 8. Great Britain and Ireland, 9. Greece, 10. Hungary, 11. Italy, 12. Sweden, 13. Switzerland, 14. United States»
  19. McBride, Scott (26 de xunetu de 2010). «1896 Athens Olympics» (inglés). www.aboutolympics.co.uk. Consultáu'l 21 de febreru de 2011. «Fourteen nations were represented - Australia, Austria-Hungary, Bulgaria, Chile, Denmark, Egypt, USA, France, Germany, Great Britain, Greece, Italy, Sweden and Switzerland»