Ava Gardner

De Wikipedia
Saltar a navegación Saltar a la gueta
Ava Gardner
Ava Gardner
Studio publicity Ava Gardner.jpg
Vida
Nome completu Ava Lavinia Gardner
Nacimientu Condado de Johnston Traducir24  d'avientu de 1922
Nacionalidá Bandera de Estaos Xuníos d'América Estaos Xuníos
Residencia Kingston House estate, London Traducir
Fallecimientu

Londres25  de xineru de 1990

(67 años)
Causa de la muerte Neumonía
Familia
Casáu/ada con Mickey Rooney  (1942 -  1943)
Artie Shaw  (1945 -  1946)
Frank Sinatra  (1951 -  1957)
Estudios
Estudios Barton College Traducir
Llingües inglés
Oficiu
Oficiu actriz, modelu, autobiógrafa, actriz de cine y actriz de televisión
Premios
Nominaciones
Xéneru artísticu Jazz
Creencies
Relixón ateísmu
Partíu políticu Partíu Republicanu de los Estaos Xuníos
IMDb nm0001257
Cambiar los datos en Wikidata

Ava Lavinia Gardner (Brogden, Carolina del Norte, 24 d'avientu de 1922 - Ciudá de Westminster, 25 de xineru de 1990) foi una actriz de cine clásicu estauxunidense nomada a los Premiu Óscar, considerada una de les grandes estrelles del sieglu XX y como unu de los mitos del Séptimu Arte. Conocida pol so exuberante y fotoxénica guapura, d'ella dixeron que foi "l'animal más bellu del mundu".[1]

Infancia y mocedá[editar | editar la fonte]

Ava Gardner nació en 1922 na pequeña comunidá rural de Brogden, nel estáu de Carolina del Norte. Creció nel ambiente d'aldea, nel senu d'una familia bien probe de llabradores del tabacu y l'algodón, xuntu colos sos seis hermanos, de los cualos ella yera la menor. La so madre, Molly, yera una muyer bautista d'oríxenes irlando-escoceses y ingleses ya'l so padre, Jonas Bailey Gardner, yera un home católicu d'ascendencia irlandesa y amerindia. Cuando los hermanos entá yeren pequeños, la familia Gardner perdió la propiedá que tenía en Brogden y Jonas Gardner viose obligáu a trabayar como serrador y la so madre, Molly, como cocinera y ama de llaves nel colexu mayor de Brogden.

Al cumplir Ava 13 años, tola familia treslladóse a Newport News, nel estáu de Virxinia, esperando ameyorar la so suerte. Pero, en poco tiempu, ante les dificultaes d'atopar emplegu, tuvieron que volver a mudase a Rock Ridge, un barriu de Wilson (Carolina del Norte). L'añu 1935 el so padre, Jonas Gardner, morrió de bronquitis y Ava y dalgunos de los sos hermanos decidieron allegar a la escuela de Rock Ridge col fin de graduase. D'esta forma, Ava pudo dir darréu a clases de secretariáu nel Atlantic City Christian College.

Carrera cinematográfica[editar | editar la fonte]

Entamos nel séptimu arte[editar | editar la fonte]

Con 18 años, Ava convertiérase nuna guapa moza de güeyos verdes y una preciosa melena de color castañu. Asina, l'añu 1941, mientres taba visitando a la so hermana Beatriz en Nueva York, l'home d'ésta, que yera fotógrafu, pidió-y si podía fae-y delles semeyes y, satisfechu cola resultancia, decidió colgar nel escaparate del so Estudiu Fotográficu de la Quinta Avenida.

Dio la casualidá de que, mientres les fotografíes taben espuestes nel establecimientu del so cuñáu, Barnard "Barney" Duhan, un cazatalentos de los estudios Metro-Goldwyn-Mayer, vióles y decidió ponese en contautu con ella. Duhan entró na tienda y pidió el so númberu de teléfonu, pero nun consiguió que-y lu diera naide. Finalmente, foise comentando que "daquién tenía qu'unviar información d'ella a la MGM" lo que fexo darréu la so hermana. En poco tiempu, Ava, qu'entá yera una estudiante del Atlantic Christian College, viaxó nuevamente a Nueva York pa entrevistase colos direutivos que la MGM tenía nes oficines de la ciudá y aquel mesmu añu ufiertóse-y un contratu de siete años cola compañía. En 1941 dexó la escuela pa dir a Hollywood cola so hermana Beatriz y lo primero que fixo foi dir a clases d'arte dramáticu y de dicción yá que'l so acentu de Carolina del Norte yera práuticamente incomprensible.

Foi nel añu 1942 cuando empezó a intervenir como protagonista en películes y nos siguientes años actuó en numberoses producciones de modestu presupuestu como La casa encantada (1943), una comedia de mieu que pertenez a la etapa de decadencia del gran Béla Lugosi, o Three men in white de 1944, una comedia-drama de médicos na qu'interveníen tamién Van Johnson y Lionel Barrymore.

Los años doraos[editar | editar la fonte]

Ava Gardner xunto a Burt Lancaster en The Killers (1946).

La so gran oportunidá llegó en 1946 con dos títulos: el thriller Whistle stop, nel que tien un papel principal xuntu al míticu -y güei escaecíu- George Raft; y el drama negru basáu nuna hestoria d'Ernest Hemingway Los asesinos, onde se llucía al pie de un tamién bien mozu Burt Lancaster y al siempres escelente Edmond O'Brien. Esta última película va ser la que la punxo nel mapa dientro de la industria de Hollywood.

Nos siguientes años espunta en The hucksters (xuntu a Clark Gable), Venus yera muyer (comedia más simple enforma, pero simpática) y Sobornu (1949), estupendu thriller dramáticu onde actúa xunto a Robert Taylor, según la lleenda otra de les sos conquistes amoroses.

A partir d'equí, empieza'l so reináu encadenando producciones de munchos medios pa los grandes estudios, y realizando grandes interpretaciones. Sobresalen: El gran pecador (drama moral -que non moralista- con grandes trabayos de Gregory Peck y Ethel Barrymore y un guión impecable), Mundos opuestos (1949, onde l'actriz trabaya en pantalla xunto a James Mason, Barbara Stanwyck y Van Heflin), Pandora y l'holandés errante (1951), drama oníricu-vanguardista, onde Ava actuaba con James Mason y otra de les sos sonaes conquistes, el toreru Mario Cabré, rodando'l filme parcialmente n'España y enllenando los titulares de la prensa de la dómina. Nesta etapa empiecen les sos escales en Madrid, les sos estancies n'España y los sos amores (con Luis Miguel Dominguín, etc).

Rodó Magnolia, remake d'una llexendaria obra musical de Broadway, finalmente los productores decidieron que nun utilizara la so propia voz nes partes cantaes. Trabayó con Howard Keel y Agnes Moorehead. Depués actuó en El mio pasáu prohibíu xunto con Robert Mitchum (1951), con quien caltuvo otru de los sos affaires. Siguieron les películes: Les nieves del Kilimanjaro (la so segunda obra de Hemingway, n'África y xunto a Gregory Peck y Susan Hayward) y Mogambo (1953), película d'inesperada popularidá dirixida por John Ford y onde Ava actúa cola guapa Grace Kelly, al llau d'un pimpanu Clark Gable.

Tres Los caballeros del rei Arturo, clásicu del cine d'aventures medievales, con Robert Taylor y Mel Ferrer en lluxosa producción de la Metro, Ava empieza a travesar dellos problemes personales y de salú. Inda relluma en La condesa descalza, nun papel inspiráu na vida de Rita Hayworth, onde da lo meyor de sigo mesma y llogra una de les sos meyores carauterizaciones -si non la meyor-, acompañada por Humphrey Bogart, Edmond O´Brien, Rossano Brazzi y Valentina Cortese.

Depués lleguen películes de menor ésitu y/o entidá: el drama románticu-d'aventures Destinos cruzaos (xunto a Stewart Granger), la comedia d'orixe teatral La cabana (xuntu a David Niven), el so tercer Hemingway llamáu n'España Fiesta (al llau de Tyrone Power nuna de les sos últimes interpretaciones), la biografía de la Duquesa d'Alba en La Maja Desnuda (1958; con Tony Franciosa encarnando a Goya) y el drama On the Beach ( La hora final, n'España), sobre les consecuencies de la esplosión d'una bomba nuclear, que Stanley Kramer rodó en 1959 xunto con Gregory Peck y Fred Astaire.

Mientres tou esti tiempu, l'actriz foi encasillada como estrella de gran curiosu físicu, calificada pola publicidá del so estudiu como «l'animal más guapu del mundu», eslogan qu'Ava tarrecía.

Años de maduror[editar | editar la fonte]

Los años 60 van camudar too esto, tanto porque Ava Gardner va avieyando como porque camuden los gustos del públicu. En 1960 actúa en L'ánxel vistía de colloráu xunto col so amigu Dirk Bogarde, película que tuvo que ser rodada n'Italia, magar tar ambientada mientres la Guerra civil española.

Alcuentra una mayor dificultá p'atopar papeles d'altor, o al refugar títulos memorables como Duce páxaru de mocedá, La Pantera Rosa o El Graduáu, ente otros. Sicasí, tres películes sobresalen d'esta etapa: en 55 díes en Beixín (1963), realiza una memorable encarnación d'una condesa arruinada metanes una revolución anticolonial, con Charlton Heston y David Niven al so llau. Siete díes de mayu (1963) ye casi la meyor película estauxunidense de fonderada política de la década, y una de los meyores del so direutor -John Frankenheimer- onde Ava compartía cartelu con Burt Lancaster, Kirk Douglas y Fredric March. A lo último, en 1964 protagonizó La nueche de la iguana (dirixida por John Huston y basada na obra teatral de Tennessee Williams), onde destacó xunto a Richard Burton y Deborah Kerr.

Sicasí, merecen recordase tamién les sos apaiciones en películes que nun tuvieron tanta fortuna comercial o artística: La Biblia (1966), superproducción dirixida por John Huston, y Mayerling (1968), na que trabayó con Omar Sharif y Catherine Deneuve.

A partir de 1969 Gardner instalóse'n Londres, onde vivió parcialmente retirada. Equí actúa a les ordes del actor direutor Roddy McDowall nel filme La balada de Tam Lin onde McDowall rínde-y un homenaxe a la so guapura. Esta película foi reeditada y llanzada en 1972 sol títulu La vilba diabólica.

Dos películes de los años 70, El xuez de la forca (1972) y Terremotu (1974) fueron grandes ésitos, cintes dignes y abondo apreciables y bones interpretaciones de Ava y el so arrogante maduror físicu. Tamién destaca nun entreteníu thriller británicu de 1975 onde l'actriz compartía protagonismu col inolvidable Dirk Bogarde y con Timothy Dalton: L'home que decidía la muerte. A lo último, Gardner destacó na fantasía de fondu fracasu comercial El páxaru azul (1976), xunto con Elizabeth Taylor, Jane Fonda y Cicely Tyson, primera coproducción en plena guerra fría ente EE.XX. y l'ex Xunión Soviética.

Darréu intervieno nel filme de xéneru de catástrofes La ponte de Cassandra (1977) xunto a Sophia Loren, Burt Lancaster, Richard Harris, Martin Sheen y O.J. Simpson, na interesante cinta de mieu La centinela (al llau de Christina Raines y Chris Sarandon) (1977), en Ciudá en llapaes (1979) y nun drama d'intriga onde yá realizaba un papel bien secundariu pero inda granible: El secuestru del presidente (1980), onde esti yera'l notable Hal Holbrook). Actuó tamién nel filme biográficu del escritor D.H. Lawrence, El sacerdote del amor (1981), xunto a Ian McKellen y John Gielgud.

El so últimu trabayu pal cine foi en 1982 en Regina, xunto a Anthony Quinn, rodada íntegramente en Cinecittá, onde componía a una mamma posesiva y tirana. Esta película nun foi estrenada comercialmente, y foi conocida al traviés del VHS.

Intervieno más tarde en delles producciones pa la televisión, como Harem, xunto a Omar Sharif, y Knots Landing. Tamién participaría na serie Anno Domini, onde interpreta a Agripina, la inescrupulosa madre del emperador Nerón, y nuna nueva versión de El llargu y templáu branu, xunto a Jason Robards, Don Johnson y Cybill Shepherd. El so últimu trabayu como actriz realizólu nel pilotu d'una serie televisiva xunto a Stefanie Powers, titulada Maggie, que nun llegó a estrenase.

Vida sentimental y muerte[editar | editar la fonte]

  • Ava Gardner foi pretendida obsesivamente pol escéntricu millonariu Howard Hughes al que siempres refugó les sos propuestes de matrimoniu, magar nunca refugó nengún de los sos arrogantes regalos.
  • Tuvo casada tres veces, toes elles con actores conocíos. El so primer matrimoniu foi col actor Mickey Rooney, que duró menos d'un añu; foi la única muyer que nunca-y pidió compensación pol divorciu.
  • El segundu, col míticu músicu Artie Shaw, foi igual de curtiu.
  • El so tercer home foi el llexendariu cantante y actor Frank Sinatra, col que tuvo casada seis tormentosos años ente 1951 y 1957, relación que fixo correr ríos de tinta, y que foi de xuru l'amor de la so vida, lo mesmo qu'ella'l d'él. Cúntase qu'entá na so vieyera, escuchaba na so casa los discos de Frank.
  • Sufrió de cáncer uterín y sometióse a una intervención onde-y prauticaron una histerectomía.
  • Morrió en Londres d'una neumonía a los 67 años d'edá, el 25 de xineru de 1990.
  • Ta soterrada nel Sunset Memorial Park de Smithfield, en Carolina del Norte.

Filmografía[editar | editar la fonte]

Ava Gardner en Encruz de destinos (1956).

Premios[editar | editar la fonte]

Premiu Óscar[editar | editar la fonte]

Categoría Película Resultancia
Meyor Actriz Mogambo Nomada

Globos d'Oru[editar | editar la fonte]

Categoría Película Resultancia
Meyor Actriz - Drama La Nueche de la Iguana Nomada

Premios BAFTA[editar | editar la fonte]

Categoría Película Resultancia
Meyor Actriz Bohwani Junction Nomada
Meyor Actriz La Hora Final Nomada
Meyor Actriz La Nueche de la Iguana Nomada

Festival Internacional de Cine de San Sebastián[editar | editar la fonte]

Categoría Película Resultancia
Meyor Actriz La Nueche de la Iguana Ganadora

Llibros[editar | editar la fonte]

  • Gardner, Ava ([1990] 1995): Ava, cola so propia voz / traducción y prólogu de Lucía Graves - Barcelona : Grijalbo Mondadori, 1995 - ISBN 84-253-2746-6 - Traducción de: Ava, My Story. London : Bantam Press, 1990.
  • Juan Carlos Prats - "Ava Gardner, la diosa descalza" / editorial JC Clémentine (Madrid, 2000)
  • Serrano Cueto, José Manuel: Ava Gardner. De l'A a la Z - Madrid: Xaguar, 2007.
  • "Bebese la vida, Ava Gardner n'España", de Marcos Ordóñez, 2004, editorial Aguilar, Madrid
  • "Ava", una biografía de Roland Flamini, 1983, Coward, McCann & Geoghegan Publishers
  • "Los homes de Ava", de Jane Ellen Wayne, 1990
  • "Ava Gardner, beautiful, wild, innocent", 2002, de Gilles Dagneau, Editorial Gremese
  • "Grabtown Girl", 2001, de Doris Rollins Cannon, Editorial Down Home Press
  • "Mitos de Cano" 2009, Paco Cano y Andrés Amoros edt: Rom editors

Referencies[editar | editar la fonte]

Enllaces esternos[editar | editar la fonte]