Clark Gable

De Wikipedia
Saltar a: navegación, buscar
Clark Gable
Clark Gable
Clark Gable - publicity.JPG
Clark Gable en 1940
Nome real William Clark Gable
Nacencia 1 de febreru de 1901
Bandera de Estaos Xuníos d'América Cádiz, Ohio, Estaos Xuníos
Nacionalidá Estaunidense
Muerte 16 de payares de 1960
(59 años)
Bandera de Estaos Xuníos d'América Los Angeles, California,
Estaos Xuníos
Otros nomes Gabe
Fíu/os Judy Lewis (1935-(†) 2011)
John Clark Gable (1961)
Ficha en IMDb
Clark Gable signature.svg

William Clark Gable (Cádiz, Ohio, Estaos Xuníos, 1 de febreru de 1901 - Los Angeles, California, Estaos Xuníos, 16 de payares de 1960) foi un actor estaunidense. Ganador d'un Óscar al meyor actor principal, ye consideráu unu de los mitos del cine clásicu.

Carrera[editar | editar la fonte]

Nació en Cádiz, Ohio, en 1901. La so madre morrió cuando tenía namái siete meses d'edá. A los 16 años dexó'l colexu y foise a trabayar a una fábrica. Dempués d'asistir a una función teatral na que vio una obra que lu impresionó, Gable decidió convertise n'actor. Empezó a realizar xires con compañíes teatrales de segunda fila, y trabayó tamién como vendedor y en distintes industries pa ganase'l sustentu.

En 1924 foi a Hollywood cola ayuda financiera d'una axente de teatru, Josephine Dillon, que se convirtió nel so manager y tamién na so esposa, a pesar de que yera 10 años mayor qu'él. Gable pasó dellos años actuando en pequeños papeles de películes y apaeciendo tamién de nuevu n'obres teatrales. En 1930 pudo roblar finalmente un contratu cola Metro-Goldwyn-Mayer. A partir d'entós intervieno en delles películes.

Gable ganó un Óscar al meyor actor principal por Asocedió una nueche, película de 1934. A pesar d'ello conózse-y más pol so papel de Rhett Butler nel clásicu del cine Lo que'l vientu llevóse, filme rodáu en 1939. En 1935 tamién fuera nomáu al Óscar pola so intervención en Mutiny on the Bounty (Rebelión a bordu).

Dende los sos primeros papeles, demostró tener un «gabitu» poco común na pantalla, que más tarde se convertiría nel so reconocíu carisma pa la interpretación de personaje tipo galán, con un llau escuru qu'allugaba ciertu cinismu.

Tráiler de la película Lo que'l vientu llevóse (1939), qu'amuesa a Clark Gable nel so papel de Rhett Butler. Foi probablemente'l que más fama -y otorgó na so carrera, y valió-y otra nominación al Óscar como meyor actor.

Trabayó con dalgunos de los meyores direutores de la dómina dorada de Hollywood: Ernst Lubitsch, Frank Lloyd, Clarence Brown, Robert Z. Leonard, Sam Wood, George Cukor, King Vidor, John Ford, Raoul Walsh, W. S. Van Dyke, etc., y llegó a compartir película con actrices de la talla de Joan Crawford, Greta Garbo, Claudette Colbert, Hedy Lamarr, Vivien Leigh, Constance Bennett, Jean Harlow, Rosalind Russell, Barbara Stanwyck, Clara Bow, Lillian Gish, Doris Day , Myrna Loy, Loretta Young (cola que tuvo una fía ilexítima, Judy Lewis), Jeannette MacDonald, Lana Turner, Greer Garson, Ava Gardner, Marilyn Monroe o Gene Tierney.

El so momentu de rellumanza fueron los años 30, dende les taquillaes de Los seis misteriosos (George Hill) o Una alma llibre en 1931 hasta la so consagración definitiva como gran estrella en 1939 con Lo que'l vientu llevóse, y primeros 40, hasta la so participación na Segunda Guerra Mundial. Nos 50, la so estrella caltúvose gracies a dellos ésitos especialmente nel western o la comedia, ente los que se destacar Mogambo, y el mesmu actor declaraba qu'esperaba la oportunidá de poder cerrar la so carrera con una gran película. Nun la atopó hasta qu'en 1960 protagonizó'l so últimu papel nuna película mítica por munches razones: Vides rebalbes, xuntu a Marilyn Monroe y Montgomery Clift. El so rodaxe concluyó'l 4 de payares de 1960, 12 díes enantes de la muerte de Gable. La película estrenó'l 1 de febreru de 1961.

Compartió cartelu en seis causes cola primer roxa que se convirtió nun mitu de Hollywood, Jean Harlow, hasta la muerte d'ésta mientres el rodaxe de Saratoga en 1937, y formó tándem en tres películes con Spencer Tracy, hasta qu'ésti últimu decidió romper con Gable por motivos profesionales.

Vida personal[editar | editar la fonte]

El matrimoniu de Gable cola so tercer esposa, l'actriz Carole Lombard, foi la dómina más feliz de la so vida, según numberoses fontes. La pareya casóse en 1939, pero la relación terminó de forma tráxica, cuando Carole Lombard morrió nun accidente d'aviación en 1942. Gable quedó fondamente afectáu y decidió ingresar nes fuerces aérees.

Cuando tornó del serviciu na Segunda Guerra Mundial volvió al cine con una película, Adventure, que nun tuvo ésitu. El Metro nun-y anovó'l contratu considerando'l so eleváu sueldu. Nos siguientes diez años Gable intervieno en películes que na so mayoría fueron mediocres.

Gable casóse dos veces más: primero con Sylvia Ashley, modelu y actriz inglesa vilba del actor Douglas Fairbanks Sr., y dempués con Kay Williams, una ex modelo y actriz de repartu, divorciada y con dos fíos que foi la madre del so únicu fíu lexítimu, nacíu unos meses dempués de la so muerte (tenía una fía mayor, Judy Lewis, nacida de la so relación adúltera con Loretta Young).

La so última película foi The Misfits (Vides rebalbes), dirixida por John Huston y co-protagonizada por Montgomery Clift y Marilyn Monroe, pa la cual foi tamién la so última película; dos díes depués de rematar el rodaxe Gable sufrió una trombosis coronaria y tres una aparente recuperación, la repetición del ataque cardiacu diez díes más tarde provocó'l so fallecimientu'l 16 de payares de 1960 en Los Angeles, a la edá de 59 años. Foi soterráu al pie de la so esposa Carole Lombard nel campusantu Forest Lawn Memorial Park de Glendale, en Los Angeles.

Filmografía[editar | editar la fonte]

Bibliografía[editar | editar la fonte]

  • Harris, Warren G. (2005). Clark Gable: A Biography, 416 página (en inglés), Nuevu York: Crown Publishing Group. ISBN 978-0-307-23714-9.
  • Spicer, Chrystopher J. (2002). Clark Gable: Biography, Filmography, Bibliography (en inglés). ISBN 0-7864-1124-4.

Enllaces esternos[editar | editar la fonte]