Minoru Mochizuki

De Uiquipedia
Saltar a: navegación, buscar
Minoru Mochizuki
Nome de nacencia: 望月 稔 Mochizuki Minoru
Fecha de nacencia: 7 d’abril de 1907
Llugar de nacencia: Shizuoka, Xapón
Fecha de defunción: 30 de mayu de 2003 (96 años)
Nacionalidá: Xaponés
Conocíu por: Fundador del Yoseikan Dojo

Minoru Mochizuki (nació’l 7 d’abril de 1907 y morrió’l 30 de mayu de 2003) foi un renomáu artista marcial xaponés reconocíu mundialmente como ún de los más importantes budoques del sieglu XX. Prauticó colos meyores maestros de Xapón, como Morihei Ueshiba (creador del aikido), Gichin Funakoshi (creador del karate-do modernu, y del estilu shotokan), Nakayama Hakudo (precursor del kendo modernu y maestru de kenjutsu, iaido y jodo), Jigoro Kano (creador del yudu) o Kyuzo Mifune (maestru del yudu como arte marcial), ente otros. De magar terminó esta formación Mochizuki Sensei creó’l famosu dojo Yoseikan.

Biografía[editar | editar la fonte]

Minoru Mochizuki nació en Shizuoka, Xapón el 7 d’abril de 1907, descendiente d’una familia de samuráis; esto-y facilitó apenzar dende bien neñu la práutica de les artes marciales. A los cinco años empezó a prauticar yudu nel dojo’l güelu, pero al abulta-y fácil esti arte marcial decidió empezar a prauticar tamién Kendo (esgrima xaponesa) y l’estilu Gyokushin de Jujutsu (llucha cuerpu a cuerpu). Con 19 años entró nel Kodokan a estudiar Yudu con Jigoro Kano y Kyuzo Mifune, y al poco diéron-y el grau de “sandan” (3er Dan), tou un llogru daquella.

Kano Sensei tenía rocea de que les artes artes marciales tradicionales fueren desapaecer y, poro, propunxo l’entamu de la Kenkyukai, una sociedá creada pa velar poles artes marciales tradicionales. Conque decidió mandar a estudiar a los sos meyores alumnos colos antiguos maestros de Koryu Budo y de Gendai Budo. Minoru foi a estudiar Kobudo col maestru Gichin Funakoshi. Finalmente n’ochobre de 1930, dempués de presenciar una demostración de jujutsu en Meijiro, Kano unviólu a estudiar col maestru Morihei Ueshiba la disciplina del Daito-ryu aiki-jutsu, a la qu’Ueshiba había dar un enfoque non bélicu conocíu anguaño como Aikido.

Por aciu de la esperiencia que Mochizuki tenia en budo convertióse nel principal alumnu d’Ueshiba, siendo cabezaleru de los “uchideshi” (alumnos internos) y acompañándolu per tou Xapón faciendo demostraciones. La so amistá llegó al estremu de qu’Ueshiba-y pidió que casara cola so fía pa ser asina fíu adoptivu suyu y convertise nel so socesor, ufierta que refugó Mochizuki. Al poco Mochizuki amaló y tuvo que tornar pa la so casa en Shizuoka. Dempués d’una temporada nel hospital, abrió un dojo na so ciudá natal cola aida del so hermanu y dellos amigos. Na inauguración tuvieron presentes grandes personalidaes como’l maestru Morihei Ueshiba, el xeneral Miura y políticos y militares de nomadía.

Pocu tiempu dempués Mochizuki foi unviáu Mongolia como gobernador de la provincia de Karachi, onde introduxo les artes marciales nel sistema educativu mongol arriendes d’estudiar el sistema de kungfu/kempo de la provincia. Pese a ser parte de les fuercies invasores xaponeses, simpatizó colos mongoles al llevar la educación y enantar la rede de servicios públicos. Ocho años más tarde tornó pa Xapón. Los sos conocimientos de boxéu chinu y de kárate xaponés diba axuntalos nos sos kates.

En 1951 viaxó a Francia pa enseñar yudu, aikido ,kárate y iaido. Desa conoció al espía arxelín de nacionalidá francesa Jim Alcheik, que se convertió nel so alumnu y dempués nel so primer socesor n’Europa. En 1954 tornó pa Xapón xunto con Alcheik pa fundar el Yoseikan Hombu Dojo na so ciudá natal, onde sigue abiertu actualmente. Siguió calteniendo un contautu candial con Morihei Ueshiba, la so familia y l’Aikikai, la principal organización mundial d’Aikido, hasta la muerte d’Ueshiba en 1969. Dempués los fíos de Mochizuki asumieron el lideralgu del Hombu Dojo.

Títulos[editar | editar la fonte]

Dellos de los rangos qu’algamó nes artes marciales fueron: 10u Dan d’Aikido, 9u Dan de Jujutsu, 8u Dan d’Iaido, 8u Dan de Tenshin Shoden Katori Shinto-ryu, 8u Dan de Yudu, 5u Dan de Kendo, 5u Dan de Kárate, 5u Dan de Jojutsu, arriendes d’otres titulaciones n’escueles tradicionales como Gyokushin-ryu Jujutsu, Daito-ryu Aiki-jujutsu, etc.

Estilos y sistemes fundaos polos sos alumnos[editar | editar la fonte]

Jim Alcheik y Ronald Hernaez desendolcaron el sistema Nihon Tai-jitsuu, y Jan Jansessens y Alain Floquet los sistemes d’Aikijujutsu Yoseikan y Aikibudo respeutivamente. El fíu de Mochizuki Sensei, Hiroo Mochizuki, desendolcó’l popular sistema deportivu Yoseikan Budo, que non solo inclúi les artes del Gendai Budo como l’aikido, el yudu y el kárate, sinón tamién el kobudo o manexu d’armes tradicionales, el jujutsu, el kickboxing, y hasta’l sistema d’equitación samurái o bajutsu, too aunío nun solu formatu.

Ver tamién[editar | editar la fonte]

Enllaces esternos[editar | editar la fonte]