Shotokan

De Wikipedia
Shotokan
(松濤館)


Tamién Shotokan-ryu (松濤館流), Kárate Shotokan, Shotokan Karatedo
Fecha de fundación 1939
País d'orixe  Xapón
Fundador Gichin Funakoshi (1868–1957)
Yoshitaka Funakoshi (1906–1945)
Artes enseñaes Kárate
Ancestros Artes marciales d'Okinawa
Escueles proxenitores Shorei-ryu, Shorin-ryu
Escueles derivaes Wado-ryu, Shotokai, Chito-ryu, Shindo Jinen-ryu, Yoseikan Karate, Kyokushinkai
Prauticantes Hidetaka Nishiyama, Masatoshi Nakayama, Hirokazu Kanazawa, Taiji Kase, Tsutomu Oshima
Deporte olímpicu Non
Caligrafía "Shotokan".

Shotokan (松濤館流, Shōtōkan-ryū) ye un estilu de kárate, nacíu de la xuntura de delles escueles antigües y de la influencia d'otres artes marciales como'l Kendo. Foi fundáu pol maestru Gichin Funakoshi (1868-1957) y organizáu pol so fíu, el maestru Yoshitaka Funakoshi (1906-1945). Ye ún de los estilos tradicionales de kárate xunto col Goju-ryu, Shito-ryu, Shorin-Ryu y Wado-ryu.

El maestru Gichin Funakoshi ye universalmente reconocíu por esportar y esparder el kárate dende’l so bierzu na islla d'Okinawa a tol Xapón. Ta consideráu por ello como’l padre del Kárate modernu, anque dellos importantes maestros de la mesma época, como Kenwa Mabuni y Choki Motobu, yá enseñaben kárate abenayá.

A pesar de qu'escomenzó como una escuela de kárate única, desarrollada nel sen de l'Asociación Xaponesa de Kárate (JKA), anguaño’l Shotokan ta dixebráu en delles organizaciones independientes.

Orixe[editar | editar la fonte]

Shoto (松濤, shōtō), que significa "ruxerrux nel pinal" (o más precisamente "pinos qu'ondulen"), yera’l nomatu que’l maestru Funakoshi usaba pa firmar los poemes y escritos de so. La pallabra xaponesa kan (馆), que significa casa o cuartu, refierse al dojo. N’honor al Maestru, los estudiantes de Funakoshi fixeron un cartelu onde se lleía Shoto-kan ("La Casa de Shoto"), que punxeron enriba la entrada del dojo onde él enseñaba. Esi primer "Shotokan" había esbarrumbalu una bomba na Segunda Guerra Mundial.

En realidá’l maestru Funakoshi nun dio nunca un nome al so estilu, llamándolu primero kárate-jutsu y llueu cenciellamente "kárate". Sensei Funakoshi prauticara de primeres les dos escueles dominantes n'Okinawa: Shorei-ryu (antiguu Naha-te) y sobre too Shorin-ryu (antiguu Shuri-te). Dempués de prauticar duramente estos estilos, Funakoshi foi quien a desarrollar una nueva forma de karate-do siguiendo un modelu más simple, combinando les idees del shorei-ryu y del shorin-ryu. El kárate qu'aprendió a los sos alumnos espeyaba los cambeos fechos endenantes pol so maestru Anko Itosu, incluyendo la riestra de kates Heian/Pinan. Funakoshi cambió enforma los nomes de los kates del so programa d'estudios, que taben daquella en dialeutu okinawense, nun esfuerciu por facer que los nomes “foriatos” d'Okinawa sonaren más prestosos a los oyíos de los xaponeses.

El fíu de Gichin Funakoshi, Yoshitaka (1906-1945), foi’l principal responsable de configurar el Shotokan como'l Budo modernu que conocemos güei. Amás d'introducir les pataes altes (nun s’emplegaben enantes, como se ve nos kates), faciéndoles inclusive más complexes, y l'usu los cadriles pa xenerar potencia, baxó y allargó considerablemente les posiciones básiques ya introduxo’l kumite a 1, 3 o 5 pasos heredáu del Kendo. Amás promovió’l kumite llibre, qu'años dempués había llevar al kumite de competición con regles deportives.

Carauterístiques[editar | editar la fonte]

L’estilu Shotokan carauterízase por bases fuertes y golpes en tol cuerpu, con munchu usu del xiru y el puxu del cadril pa producir potencia nos ataques y nes defenses. Los xiros sobre’l calcañu en posición baxa dan fluyidez al movimientu, y cada movimientu entama con una defensa que s'executa de manera que valga d'ataque al empar. Trátase d'un estilu nel que les posiciones tienen un centru de gravedá perbaxu, y onde la peculiar téunica d'un “simple” golpe direutu, solmenada con un poder enorme, domínase sólo con munchos años d'entrenamientu. Les posiciones llargues y baxes en kihon y kata nun namás fornen estabilidá, sinón que tamién permiten movimientos potentes y fortalecen les piernes. Les téuniques de kumite espeyen estes posiciones y movimientos de base, pero cola esperiencia vuélvense más flexibles y fluyíes.

Les posiciones fundamentales nesti estilu son: zenkutsu dachi, kokutsu dachi y kiba dachi.

Nel kárate Shotokan tómense bien en serio actitúes como la concentración y l'estáu de la mente, porque ensin concentración y un estáu de mente sele pero determináu, la téunica ye de pocu valir. Estos dos atributos hai que los desendolcar cola práutica y el determín.

Filosofía[editar | editar la fonte]

El maestru Gichin Funakoshi espunxo los 'Venti Principios del Kárate' (Niju Kun), que constituyeron la base de la disciplina enantes de que los sos estudiantes fundaren la JKA. Nestos principios, basaos en gran midida nel bushido y nel zen, ta contenida la filosofía del estilu Shotokan. Inclúinse conceutos d'humildá, respetu, compasión, paciencia y calma tanto interior como esterior. El maestru Funakoshi creyía qu'a traviés de la práutica del kárate y la observación d'estos principios, el karateca yera quien a ameyorar.

Munches escueles de Shotokan tamién reciten entá’l Dojo Kun al final de cada entrenamientu, al envís d'atopar y enantar la motivación y l'espíritu.

El mesmu maestru Funakoshi escribió: "L’oxetivu últimu del kárate nun ta na victoria o na derrota, sinón nel perfeicionamientu del calter de los prauticantes".

Los Venti Principios del Kárate (Niju Kun)[editar | editar la fonte]

  1. El Kárate entama y fina col saludu (一、空手は礼に初まり礼に終ることを忘るな 。)
  2. Nun hai primer ataque en Kárate (Karate ni sente nashi), (二、空手に先手無し。).
  3. El Kárate ye derechura, agradecimientu, y siguir el camín de la xusticia (三、空手は義の補け。).
  4. El Kárate ye sobre too conocese a unu mesmu, y llueu a los demás (四、先づ自己を知れ而して他を知れ。).
  5. Nel Kárate l'espíritu ye lo primero; la téunica ye’l fin últimu (五、技術より心術。).
  6. El Kárate ye llealtá y espontaneidá; tate siempre preparáu pa lliberar la to mente (六、心は放たん事を要す。).
  7. El Kárate enseña que l'adversidá vien cuando arrenunciamos (七、禍は懈怠に生ず。).
  8. El Kárate nun se vive sólo nel dojo (八、道場のみの空手と思うな。).
  9. El Kárate ye pa la vida (九、空手の修行は一生である。).
  10. L’espíritu del Kárate tien qu'inspirar toles nueses aiciones (十、凡ゆるものを空手化せ其処に妙味あり。).
  11. El Kárate hai que lu mantener vivu col fueu de l'alma; ye como l'agua caliente, requier de calor constante o quedará frío (十一、空手は湯の如く絶えず熱を与えざれば元の水に返る。).
  12. El Kárate nun consiste en vencer, sinón na idea de nun perder (十二、勝つ考えは持つな、負けぬ考えは必要。).
  13. La victoria ta na to habilidá pa distinguir los puntos febles de los fuertes (十三、敵に因って転化せよ。).
  14. Concentración y relaxación tienen qu'atopar el so sitiu nel momentu xustu; muévete según lo fai’l to oponente (十四、戦は虚実の操縦如何にあり。).
  15. Les manes y los pies son como espaes (十五、人の手足を劔と思え。).
  16. Piensa que’l to adversariu pue tar uquiera (十六、男子門を出づれば百万の敵あり。).
  17. La guardia pa los principiantes, la posición natural pa los espertos (十七、構えは初心者に、あとは自然体。).
  18. El kata ye perfeicionar l'estilu, pero la so aplicación ye otra cosa (十八、型は正しく、実戦は別もの。).
  19. Netu que l'arcu, el prauticante tien qu'usar la contraición, la espansión, la velocidá y, harmónicamente, la relaxación, la concentración, la lentitú (十九、力の強弱、体の伸縮、技の緩急を忘るな。).
  20. Fai que’l to espíritu s’alce a lo cimero (二十、常に思念工夫せよ。).

Dojo Kun[editar | editar la fonte]

  • Hitotsu, Jinkaku Kansei ni Tsutomuru Koto - Lo primero, busca ameyorar el calter
  • Hitotsu, Makoto no Michi o Mamoru Koto - Lo primero, percorri la vía de la sinceridá
  • Hitotsu, Doryoku no Seishin o Yashinau Koto - Lo primero, fortalez incansablemente l'espíritu
  • Hitotsu, Reigi o Omonnzuru Koto - Lo primero, observa un comportamientu impecable
  • Hitotsu, Kekki no Yu o Imashimuru Koto - Lo primero, refuga la violencia y domínate a ti mesmu

Términos comunes[editar | editar la fonte]

Bien de términos usaos nel kárate Shotokan vienen de la cultura xaponesa. Mentanto dellos son nomes comunes (por exemplu yame,gankaku), otros son esclusivos de les artes marciales (por exemplu kata, kumite). Hailos que sólo s’usen raramente na vida cotidiana (por exemplu zenkutsu dachi), mientres qu'otros apaecen de cutiu (por exemplu,rei).

Esta terminoloxía xaponesa caltiénse inclusive nes escueles de fuera de Xapón, col envís de caltener la cultura orixinal d'Okinawa y la filosofía del maestru Funakoshi.

Graduaciones[editar | editar la fonte]

El grau úsase nel kárate pa indicar esperiencia, arte, y en menor midida, antigüedá. Como en munchos estilos de les artes marciales, el Shotokan usa un sistema de cintos de color pa indicar el grau. La mayor parte de les escueles de Shotokan usen el sistema Kyu/Dan. L’orde de los colores varia enforma d'una escuela a otra, pero los Kyu esprésense con cintos de colores qu'en delles escueles van siendo más escuros según l'estudiante va aproximándose al Shodan. Los cintos de los niveles Dan son siempre negros, anque hai escueles qu'usen franxes pa indicar los diferentes graos de cintu negru.

Kates[editar | editar la fonte]

Sensei Gichin Funakoshi faciendo Kanku dai.

Básicos non oficiales[editar | editar la fonte]

  • 太極初段 Taikyoku Shodan
  • 太極二段 Taikyoku Nidan
  • 太極三段 Taikyoku Sandan
  • 点の型表 Ten No Kata Omote
  • 点の型裏 Ten No Kata Ura

Básicos oficiales[editar | editar la fonte]

  • 平安初段 Heian Shodan
  • 平安二段 Heian Nidan
  • 平安三段 Heian Sandan
  • 平安四段 Heian Yondan
  • 平安五段 Heian Godan

Avanzaos[editar | editar la fonte]

  • 披塞大 Bassai Dai
  • 披塞大 Bassai Sho
  • 観空大 Kanku Dai
  • 観空小 Kanku Sho
  • 鉄騎初段 Tekki Shodan
  • 鉄騎二段 Tekki Nidan
  • 鉄騎三段 Tekki Sandan

Superiores[editar | editar la fonte]

  • 珍手 Chinte
  • 燕飛 Empi
  • 岩鶴 Gankaku
  • 五十四歩大 Gojushiho Dai
  • 五十四歩小 Gojushiho Sho
  • 岩鶴 Hangetsu
  • 慈陰 Jiin
  • 燕飛 Jion
  • 十手 Jitte
  • 明鏡 Meikyo
  • 二十四歩 Nijushiho
  • 壯鎭 Sochin
  • 雲手 Unsu
  • 王冠 Wankan

Kumite[editar | editar la fonte]

El kumite ye l'aplicación del kihon (téuniques básiques) per aciu de la confrontación con un adversariu. Una de les regles más importantes d'esta aplicación ye l'autocontrol. Ensin autocontrol nun ye posible facer combate con seguranza, darréu que podía resultar en daños graves (p.ex. francedures). En cambéu l'oxetivu ye espresase cola máxima enerxía, rapidez y potencia nel ataque, cola cuenta de que seya lo más real posible, pero col máximu control, especialmente a nivel de la cara. A los prauticantes avanzaos permítese-yos dél contautu llixeru a nivel del troncu. Del mesmu mou’l que defende tien que ser lo más áxil y eficaz como pueda pa parar o safar los golpes y contratacar a la so vez.

El kumite pue presentar diverses formes; ente otres munches:

Kihon Kumite[editar | editar la fonte]

Son formes de combate qu'utilicen téuniques básiques determinaes previamente, tanto pal ataque como pa la defensa. Anque igual varien daqué d'escuela a escuela, son por exemplu:

  • 1. Kihon Ippon Kumite: consta d'un ataque y la so correspondiente defensa.
  • 2. Kihon Nippon Kumite: l'atacante fai 2 ataques arreblagando.
  • 3. Kihon Sanbon Kumite: l'atacante fai 3 ataques arreblagando.
  • 4. Kihon Gohon Kumite: l'atacante fai 5 ataques, caún dando un reblagu.

Jiyu Kumite[editar | editar la fonte]

Son combates fechos con una escoyeta llibre de téuniques non apautada. Por exemplu:

  • 1. Jiyu Ippon Kumite: l'atancate fai un solu ataque llibre con un solu reblagu.
  • 2. Jiyu Ippon dende 3 metros: netu que l'anterior, sólo que l'atacante ta a tres metros del defensor y tien qu'avanzar dende ehí.
  • 3. Jiyu Nippon (o Jiyu Sambon) Kumite: l'atacante fai dos (o tres) ataques llibres.
  • 4.Jiyu kumite: los adversarios lluchen moviéndose llibremente pel espaciu, ensin predeterminar los ataques nin, poro, les defenses (kumite llibre).

Shiai Kumite[editar | editar la fonte]

Combate según regles deportives de competición.

El Shotokan nel mundu[editar | editar la fonte]

Na primera metá de los años sesenta, los cabezaleros de l'Asociación Xaponesa de Kárate, principalmente’l maestru Masatoshi Nakayama, decidieron que llegara la hora de llevar el “so” kárate al mundu. Con esta sida unviaron a los Estaos Xuníos y a Europa a dellos xóvenes profesores qu'habíen ser col tiempu finxos del kárate internacional: Hidetaka Nishiyama y Hirokazu Kanazawa nos EXA, Taiji Kase en Francia, Hiroshi Shirai n'Italia, Keinosuke Enoeda n'Inglaterra, Hideo Hochi n'Alemaña. Dende estos países l'ensame foi ampliu, no se dexó nada al debalu: cursos, competiciones, seminarios, y una perfeuta organización, fixeron qu'en pocos años el kárate Shotokan abellugara a millones de prauticantes en tol mundu.

Organizaciones del estilu Shotokan[editar | editar la fonte]

Llistaes según el so nome oficial n'inglés, les principales son:

  • Japan Karate Association
  • Shotokan Karate of America
  • Shotokan Karate-do International Federation
  • International Shotokan Karate Federation
  • Japan Karate Shotorenmei
  • Japan Shotokan Karate Association
  • Karatenomichi World Federation
  • World Shotokan Karate-Do Federation

Bibliografía[editar | editar la fonte]

  • Harry Cook. Shotokan Karate: A Precise History.
  • Gichin Funakoshi. Karate-do Nyumon: The Master Introductory Text.
  • Masatoshi Nakayama. Dynamic Karate.
  • Bruce Clayton. Shotokan's Secret: The Hidden Truth Behind Karate's Fighting Origins.
  • Randall G. Hassell. Shotokan Karate: Its History and Evolution (Damashi, 1984). ISBN 0-911921-05-2.
  • Teruyuki Okazaki. Perfection of Character: Guiding Principles for the Martial arts & Everyday Life.
  • Rob Redmond. Kata: The Folk Dances of Shotokan.
  • Gichin Funakoshi. Karate-do Kyohan: The Master Text.
  • John Sells. Unante: The Secrets of Karate (Panchita S. Hawley, 2nd ed. 2000) ISBN 0-910704-96-1.

Enllaces esternos[editar | editar la fonte]


Referencies[editar | editar la fonte]

Enllaces esternos[editar | editar la fonte]