Morihei Ueshiba

De Uiquipedia
Saltar a: navegación, buscar
Morihei Ueshiba
Nome de nacencia: 植芝 盛平 Ueshiba Morihei
Fecha de nacencia: 14 d’avientu de 1883
Llugar de nacencia: Tanabe, Wakayama, Xapón
Fecha de defunción: 26 d’abril de 1969 (85 años)
Nacionalidá: Xaponés
Conocíu por: Fundador del Aikido
Morihei Ueshiba, fundador del Aikido.

Morihei Ueshiba (植芝 盛平, Ueshiba Morihei) foi un famosu artista marcial y fundador del arte marcial xaponés del Aikido. Los prauticantes d’esti arte avecen llamalu Kaiso (開祖, "el fundador") o, más de cutiu, Ō Sensei (大先生/翁先生, "Gran Maestru").

Biografía[editar | editar la fonte]

Morihei Ueshiba nació na actual Tanabe (Xapón) el 14 d’avientu de 1883 (16 de payares según el calendariu llunar xaponés que rexía daquella). Yera l’únicu fíu home de los cinco que tuvieron Yoroku y Yuki Ueshiba. Foi un neñu de constitución feble y morrinosu davezu, pero mui intelixente. Estudió chinu y relixón budista con un sacerdote shingon, y llegó a amosar un gran enclín pola oración y la meditación. Pa qu’espoxigara físicamente, so padre púnxolu a prauticar el sumo y la natación desque tenía 10 años.

En 1901 marchó a Tokio, onde abrió una llibrería y papelería, en realidá un simple puestu ambulante. Ellí estudió’l jujutsu del koryu Tenshin Shinyo Ryu, baxo la direición de Tokusaburo Tozawa. Amaló otra vez y tornó pa casa, a Tanabe. Dempués obligóse a forxar un cuerpu nuevu y fuerte prauticando los exercicios físicos más duros. Dalgún tiempu dempués, casó con Hatsu Itogawa.

A los 20 años arreglóse p’allistase nun reximientu d’infantería magar la so talla escasa (1,56 m.) Aprendió ende’l jukenjutsu (combate a la bayoneta). Participó na guerra ruso-xaponesa en Manchuria. Dexó l’exércitu en 1906 y volvió a Tanabe.

En 1910 el gobiernu xaponés entama un proyeutu pa repoblar Hokkaido. En 1912 Ueshiba decidió marchar p’allí cola so familia y un piñu de 80 persones, coles que funden la ciudá de Shirataki. La vida ye mui dura, l’iviernu perllargu, les colleches males. Pero’l determín d’Ueshiba afala a los colonos.

Daquella conoz Ueshiba a Sokaku Takeda, Soke (cabezaleru propietariu) de la escuela de Daito-ryu Aikijujutsu, heriede del jujutsu del clan Takeda. Ueshiba convídalu a quedar en ca d’él pa convertise nel so discípulu, y Takeda apriénde-y el so arte.

En 1919 entérase de que so padre ta permalu. Dexa les tierres al maestru Takeda y degola pa Tanabe, anque nun llega a tiempu de ver con vida a Yoroku. Pero nesi viax oye falar d’Onisaburo Deguchi, una personalidá mui importante nel Xapón de primeros de sieglu que yera sacerdote y cabezaleru de la nueva secta o relixón sincrética denomada Omoto-kyo.

Morihei Ueshiba abrió más tarde’l dojo “Ueshiba Juku” pa los siguidores d’esta relixón. Allí va desendolcar la so propia idea de budo. La so nomadía agrándase, y el so arte va conociéndose colos nomes socesivos de Daitoryu jujutsu, Daitoryu aiki jujutsu, y, en 1922, aikijujutsu. Daquella visitábalu dacuando’l maestru Takeda.

En 1924, Morihei Ueshiba decidió siguir al maestru Deguchi a Mongolia pa entamar una comunidá utópica, un centru espiritual pal amor y la fraternidá universales, acordies colos principios de la Omoto-kyo. Foi entós cuando tuvo la so primer illuminación (satori): paez-y sentir los golpes primero de que-y los dean, na forma d’un rellumu blancu. Escurque'l nivel de dominiu de les artes marciales qu'algamara-y permitía nun dexar abertura dala na so actitú, y anticipar cuasi instintivamente los ataques que-y llanzaben, lo qu’atestigüen numberosos testimonios. Seis meses más tarde, dempués de bien d’entueyos, el gobiernu chino encarcelólos y hubo afusilalos. Evitáronlo gracies a la intervención del gobiernu xaponés.

Otra vuelta en Xapón Ueshiba recobra los entrenamientos y sigue desendolcando’l so arte, el Ueshiba Aiki Jujutsu, qu’en 1930 renoma Aikibudo. La so nomadía espárdese per tol país. Grandes maestros de les artes marciales van velu pa desafialu. Jigoro Kano, el fundador del Yudu, unvia a los sos meyores estudiantes pa estudiar esi arte marcial qu’en 1942 convertiráse por fin nel Aikido. A Ueshiba invítenlu a facer mui bien delles demostraciones en tol Xapón, inclusive delantre de la familia imperial. Tamién da clases na Academia de la Policía Militar.

A principios de la guerra del Pacíficu, en 1942, el maestru Ueshiba marcha pa Iwama, cerca de Tokio. Allí dedícase a prauticar l’agricultura y a perfeicionar l’arte marcial nel so dojo, l’Aiki Dojo. Tamién fai llevantar un santuariu pal aikido, l’Aiki Jinja, que güei ta catalogáu como monumentu históricu.

En 1948 los ocupantes americanos, que torgaren toles práutiques marciales xaponeses, autoricen que se vuelva a enseñar Aikido, pol so calter pacíficu y de busca de la verdá. El 9 de febreru abre oficialmente la Fundación Aikikai, dirixida por Kisshomaru Ueshiba, tercer fíu del fundador. El dojo central de l'Aikikai, en Tokio, llámase Hombu Dojo.

Entós escomienza’l desarrollu de l’Aikido en tol mundu, aguiyáu pol espíritu abiertu de la disciplina y polos munchos contautos d’alumnos nel estranxeru. Koichi Tohei, 9u Dan y prauticante de los primeros tiempos, foi unviáu a los Estaos Xuníos a enseñar l’arte. Munchos profesores siguiéronlu n’otros países.

El maestru Ueshiba recibió’l títulu d’Ō Sensei (“Gran Maestru”) y siguió perfeicionando l’Aikido n’Iwama, onde desendolca la última evolución de la disciplina, tresformando un arte de guerra nun arte de paz.

En 1969, el maestru Ueshiba cai malu y muerre’l 26 d’abril d’un cáncanu pergafu. Dos meses más tarde muerre la muyer, Hatsu. En 1970’l so fíu Kisshomaru foi escoyíu pol Aikikai pa suceder a so padre col títulu de Doshu (“Maestru de la Vía”), y a la muerte d’ésti en 1999 socediólu’l so fíu y nietu del fundador, Moriteru Ueshiba.

Moriteru Ueshiba, l’actual Doshu, sigue desendolcando l’Aikido cola aidanza de grandes maestros de tol mundu, espardiendo l’espíritu d’Ō Sensei nel so mensax de paz.

Del “Aiki jujutsu” al “Aikido”[editar | editar la fonte]

De los años 1920 a mediaos de los 1930 Morihei Ueshiba enseñó’l sistema aiki jujutsu, con llicencia concedida por Sokaku Takeda. Nesta disciplina taben titulaos los estudiantes más antiguos d'Ueshiba.

Esta forma temprana d’entrenar con Ueshiba carauterizábase pol usu ampliu de golpes a puntos vitales (atemi), un programa muncho más ampliu que’l d’años más tarde, un usu mayor d’armes, un enfoque más llinial de la téunica que’l que diben tener les formes tardíes del Aikido. Estos métodos consérvense nes enseñances de los sos alumnos primeros: Kenji Tomiki, fundador del Shodokan Aikido, a veces llamáu Tomiki-ryu; Noriaki Inoue (Shinei Taido), Minoru Mochizuki (Yoseikan), Gozo Shioda (Yoshinkan) y Morihiro Saito (Iwama-ryu). Munchos d’estos estílos considérense "estilos de pre-guerra", anque dalgunos d’estos maestros siguieron en contautu y baxo la influyencia d’Ueshiba después de la Segunda Guerra Mundial.

Morihei Ueshiba siempre fomentó l’empobinamientu al sentimientu relixosu shintoísta y espresó esplícitamente la so vocación por cautivar la propia espiritualidá de xeitu mui personal, con rituales y práutiques shintoístes que teníen raigaños antiguos y que yeren davezu abegoses d’entender hasta polos sos estudiantes y amigos de más ciñu.

Pero foi de la que tuvo n’Ayabe, pero sobre too polo que sufrió cuando so padre morrió ensin qu’él pudiera velu otra vuelta, cuando la vida del fundador del Aikido esperimentó una tresformación espiritual decisiva pola mor del alcuentru con Onisaburo Deguchi. Ueshiba conviértese nel so amigu y discípulu, y esta rellación tien una importancia fundamental pal desarrollu de la conceición del Aikido de Morihei Ueshiba.

A los 36 años Ueshiba dexóse amenar por Deguchi pa siguilu nos sos proyeutos venturiegos, si non llocos, pa esparder fuera de les llendes del Xapón la influyencia de la ideoloxía social de la Omoto. Tres marchar al continente aportaron a Mongolia, onde dieron en güesu y tal aventura socio-política, con pilpayos relixosos, fracasó ensembre y cuasi-yos cuesta la vida, porque les autoridaes chines prindáronlos polos entamos de fazañes y fechos ablucantes de combate per Asia y condérgaronlos a muerte. Salieron con bien de lo que yá paecía’l final solamente pola intervención milagrosa “in extremis” del consuláu xaponés, qu’intervieno nel últimu momentu.

Dempués de talos estremismos, a los acérrimes del "partíu" Omoto punxéronlos nel puntu mira per un tiempu en Xapón, y tamién los arrequexaron socialmente, pero nun paez qu’eso-y cincara muncho al fundador del Aikido, porque dempués d’esi paréntesis alloñóse permanentemente de la política pa somorguiase dafechu na busca espiritual.

Esta evolución d’Ueshiba fixo que tamién fuera estremándose adulces de Sokaku Takeda. Entós escomenzó a amestar más cambios al arte marcial. Estos cambios van espeyándose nos diferentes nomes que diba poniendo al arte: primero aiki jujutsu, dempués Ueshiba-ryu, Asahi-ryu, aiki budo, y finalmente aikido.

Cuando Ueshiba yera más vieyu, más habilidáu, y con un puntu de vista más espiritual, el so arte siguía cambiando, volviéndose más flexible y más circular. Les téuniques de golpiar volviéronse menos importantes, y el currículum formal volvióse más cenciellu. Na so propia espresión del arte había más énfasis no que se llama kokyu nage, o "proyeiciones cola respiración", suaves y combinaes, utilizando’l movimientu del oponente al envís de valtalu. Munches d’estes téuniques tán enraigonaes nes partes aiki-no-jutsu del currículum del Daito-ryu empara de les téuniques más direutes de mañes sobre les articulaciones al xeitu del jujutsu.

Bibliografía[editar | editar la fonte]

Enllaces esternos[editar | editar la fonte]