Kodokan

De Uiquipedia
Saltar a: navegación, buscar
Estatua de Jigoro Kano nel esterior del Kodokan

El Kodokan (講道館, Kōdōkan: “Escuela pal Estudiu de la Vía”) o Institutu Kodokan ye un dojo fundáu en 1882 por Jigoro Kano, el creador del Yudu. El presidente actual ye Haruki Uemura.

Hestoria[editar | editar la fonte]

El primer alumnu del Kodokan inscribióse’l 5 de xunu de 1882. Los primeros estudiantes teníen ente 15 y 18 años. Jigoro Kano agospiábalos y curiaba d’ellos como un padre. Yera un periodu emocionante, pero abegosu; el maestru, mozu daquella, taba ensin cuartos y el tapiz midía malpenes unos 20 m² (10 esteres de paya d’arroz, o “tatami”). Al añu viniente’l dojo enantárase hasta midir el tapiz cerca de 40 m² (20 esteres).

Dos años más tarde Jigoro Kano fixo construyir un dojo con un tapiz de cuasi 80 m². Los alcuentros ente distintes escueles de jujutsu multiplicábense. El Kodokan algamó la primer victoria en 1886 nun famosu tornéu celebráu nel dojo de la policía de Tokiu. La xoven escuela siguió ganando munchos otros, gracies sobre too a Shiro Saigo, ún de los alumnos más célebres de Jigoro Kano, que taba en Kodokan dende los 16 años. Daquella fundáronse seiciones del Kodokan en Nirayama.

Cuando Jigoro Kano realizó los sos primeros viaxes alredor del mundu, confió nos sos meyores alumnos la dirección del Kodokan.

En 1887 el gobiernu xaponés creó’l Butokukai, una escuela nacional de toles artes marciales. Magar que la dexaron nes manes de Jigoro Kano, esta escuela nun tardó en convertise en rival del Kodokan. Unos años más tarde apaeció’l Kosen, creáu pola Universidá Imperial de Tokiu.

A pesar de la competencia, el Kodokan siguió la so ascensión, siendo’l so últimu dojo’l más grande de Xapón: 185 m², una superficie que pocu tiempu dempués llegó al doble.

En 1909 el Kodokan convertióse n’institución pública. Daquella enseñábense los kates establecíos pol Butokukai. Posteriormente abrióse una seición femenina, y amás el Kodokan dotóse d’asociaciones culturales y xuntes d’investigación.

En 1934 el Kodokan allugóse nun nuevu edificiu de tres pisos, en total con 2.000 m² de “tatami”. Dicíase que’l Kodokan yera “la Meca del Yudu”. Dempués de la derrota del Xapón tres la Segunda Guerra Mundial, les autoridaes americanes d’ocupación torgaron toles actividaes inspiraes nel Bushido, como les artes marciales. Los profesores del Kodokan namái foron autorizaos a enseñar a les tropes americanes.

Más tarde permitióse’l yudu, pero cola denomación de deporte y non como arte marcial.

Hasta la fecha, 15 maestros xaponeses foron nomaos 10u Dan del Kodokan, 3 por Jigoro Kano, 9 pol so fíu y otros 3 pol so nietu. Ichiro Abe (10u Dan dende 2006), ún d’estos maestros, contribuyó a promover el Kodokan per Europa, principalmente per Francia.

Símbolu del Kodokan[editar | editar la fonte]

El símbolu del Kodokan ye’l yata no kagami (矢田はかがみ, lliteralmente Arcu de Yata). Ye un círculu bermeyu que representa al Sol (símbolu tamién del Xapón), nel centru d’una figura octogonal. Representa un "espeyu máxicu", col poder de revelar lo qu’hai nel alma del que lu mira. Ye una de les tres reliquies que los dioses tresmitieron al primer emperador xaponés, y significa sabencia o honestidá (la interpretación varia na lliteratura).

Nun hai que lu confundir cola sakura no hana (桜の花, lliteralmente Flor de Zrezal). La flor de la zrezal, arriendes de ser tamién ún de los símbolos del Xapón, ye representación xeneralmente de les escueles antigües de Jujutsu, lo que xustamente nun ye’l Kodokan. El diseñu del sakura no hana ye asemeyáu al del yata no kagami, estremándose malapenes porque aquel contién solamente cinco llaos, en cuenta de los ocho del símbolu del Kodokan.

Edificiu actual[editar | editar la fonte]

La direición del nuevu edificiu qu’acueye’l Kodokan dende 1958 ye 1-16-30 Kasuga, Bunkyō-ku, Tokiu 112-0003. Ye munchu más espaciosu y modernu que l’anterior. Posia un tatami inmensu (1.206 esteres) dividíu en cinco sales: principal, escuela, internacional, muyeres y neños; y hai sales especiales pa yudoques retiraos y pal estudiu de téuniques especiales.

Enllaces esternos[editar | editar la fonte]