Melanesia

Coordenaes: 7°26′59″S 157°43′13″E / 7.449814°S 157.720169°E / -7.449814; 157.720169
De Wikipedia
Melanesia
Melanesia (en)
Situación
Tipu rexón xeográfica
Parte de Oceanía
Asitiáu en Océanu Pacíficu
Coordenaes 7°26′59″S 157°43′13″E / 7.449814°S 157.720169°E / -7.449814; 157.720169
Melanesia alcuéntrase n'Oceanía
Melanesia
Melanesia
Melanesia (Oceanía)
Datos
Población 11 122 989[1]
Cambiar los datos en Wikidata
Estensión xeográfica de Melanesia.

Melanesia[2] ye una subrexón d'Oceanía, que s'estiende dende la islla de Nueva Guinea, na fastera suroccidental del océanu Pacíficu y el mar d'Arafura, al oeste, hasta Islles Fixi, que marca la so llende oriental.

La rexón inclúi cuatro estaos independientes (Vanuatu, islles Salomón, Fiji y Papúa Nueva Guinea), amás de la coleutividá especial francesa de Nueva Caledonia, y la rexón indonesia de Nueva Guinea Occidental. La mayoría la rexón pertenez al Hemisferiu Sur, sacante unes poques islles de la fastera noroccidental de Nueva Guinea Occidental, que tán asitiaes perriba la llinia l'ecuador.

El nome de la rexón utilizolu per primer vegada Jules Dumont d'Urville en 1832 pa denomar un grupu d'islles qu'elli consideraba que los sos habitantes teníen carauterístiques étniques estremaes de les de los habitantes de Polinesia y Micronesia.

Etimoloxía[editar | editar la fonte]

El nome Melanesia (del griegu μέλας, negru, and νῆσος, islles) significa "islles de los negros", en referencia al color de la piel de los sos habitantes.

La idea de que Melanesia yera una rexón diferenciada foi apareciendo ente los europeos a midida que les sos esploraciones foron esplorando y cartografiando la rexón del océanu Pacíficu. Los esploradores europeos notaron dende mui ceo les diferencies físiques ente los diferentes grupos de nativos de les islles del Pacíficu. En 1756 Charles de Brosses teorizó que tenía esistío una "antigua raza negra" nel Pacíficu que foi conquistada o derrotada poles poblaciones de lo qu'anguaño llamamos Polinesia, qu'elli consideraba xentes de piel más claro[3]. Na segunda metá del sieglu XIX Jean Baptiste Bory de Saint-Vincent y Jules Dumont d'Urville identificaron a los melanesios como un grupu racial estremáu[4]

Col pasar del tiempu, nostante, los europeos entamaron a percibir Melanesia como un área cultural, más que racial, estremada, con unes llendes poco definíes y oxeto de discusión ente los estudiosos. Nel sieglu XIX el misioneru inglés Robert Codrington escribió una serie de monografíes sobro "los melanesios" a partir de les esperiencies de los munchos años que viviera na zona. En llibros como The Melanesian Languages (1885) and The Melanesians: Studies in Their Anthropology and Folk-lore (1891) Codrington definió una Melanesia que comprendía Vanuatu, les islles Salomón, Nueva Caledonia y Fiji, na que non incluyía les islles de Nueva Guinea porque namái parte de la so población yeren melanesios. Neto que Bory de Saint-Vicent, escluyía Australia del territoriu melanesiu[5]. Estos foron los llibros qu'introducieron el conceptu cultural de mana na Europa occidental.

Flauta de Pan de les islles Salomón (sieglu XIX).

La indefinición sobre les llendes y la definición precisa de lo que ye Melanesia continúa. Hai consensu anguaño, ente los antropólogos, pa incluyir Nueva Guinea en Melanesia. Asina, Ann Chowning escribió en 1977, que nun hai consensu xeneral, inclusive ente los antropólogos, sobro cuáles son les llendes xeográfiques de Melanesia. Dellos apliquen el términu namái a les islles pequeñes, sin incluyir Nueva Guinea; Fiji ye tratada a menudu como una rexón de frontera, o inclusive incorporada a Polinesia; y los habitantes de les islles del estrechu de Torres son, davezu, clasificadas simplemente como aboríxenes australianos[6]. Pela so banda Paul Sillitoe, en 1998, escribió que nun ye fácil definir con precisión, neto nel ámbitu xeográficu como'l cultural, el xeográficu o cualesquier otru, aú acaba Melanesia y aú entamen les rexones vecines, y conclúi que la rexón ye una categoría histórica qu'evolucionó nel sieglu XIX a partir de los descubrimientos fechos nel Pacíficu y que dempués foi llexitimada pol usu y la posterior investigación sobro la rexón. El términu inclúi poblaciones que tienen cierta afinidá llingüística, biolóxica y cultural, una uniformidá mal definida que va diliéndose nes fasteres más perifériques[7]. Lo mesmo Sillitoe que Chowning inclúin la islla de Nueva Guinea en Melanesia, de la que dambos esclúin Australia.

La mayoría de los pueblos melanesios establecieron países independientes, pero dalgunes islles siguen alministraes por Francia o formen parte d'Indonesia. Nestes caberes hai movimientos independentistes activos, de los que dalgunos adoptaron el términu Melanesia como una fonte d'identidá. Stephanie Lawson afirma que'l términu pasó de ser un términu despectivu pa tener connotaciones afirmatives, proporcionando una base positiva pa una identidá subrexonal y como elemento que puede facilitar la organización formal d'estos estaos[8]. Asina, el términu tien afitaose con connotaciones xeopolítiques. Por exemplu, ye'l marcu xeográficu del Melanesian Spearhead Group, un tratáu de comerciu rexonal firmáu por Vanuatu, les islles Salomón, Papúa Nueva Guinea y Fiji.

Historia[editar | editar la fonte]

Navegantes melanesios nel océanu Pacíficu, 1846.

Los habitantes de Melanesia tienen unos ancestros comunes. Xunto colos habitantes aboríxenes d'Australia, percréese que descienden de los proto-australoides qu'emigraron d'África hace 50.000-100.000 años y dispersáronse pela fastera meridional d'Asia, dando llugar a poblaciones de raza australoide qu'anguaño habiten el sur de la India, Sri Lanka, les islles Andamán, les Filipines... La llende oriental d'esta antigua migración marcola Sahul, el continente formáu pola xunión d'Australia y Nueva Guinea, xuníos por una ponte de tierra pola mor del baxu nivel de les agües oceániques. La primer migración hacia Sahul data d'hace unos 40.000 años, mentantu que la espansión poles islles orientales de Melanesia foi perposterior, quiciás alredor del 4.000-3.000 e.C.

Estos proto-australoides que migraran hai unos 3.000 años[9] entraron en contautu, especialmente a lo llargo la costa septentrional de Nueva Guinea y nes islles al norte y al este d'esa islla, coles poblaciones preexistentes, de llingua papuana. A finales del sieglu XX dellos autores teorizaron sobro la esistencia d'un llargu periodu d'interacción ente los dos grupos, que resultó en grandes cambios xenéticos, llingüísticos y culturales na rexón[10]. Esta teoría polinesia, por embargu, contradícenla los resultaos d'un estudiu xenéticu publicáu pola Universidá de Temple en 2008. Esti alcontró que nin polinesios nin micronesios tienen muncha rellación xenética colos melanesios. Aparentamente, y tres del desarrollu de les sos canoes carauterístiques, los antepasaos de los polinesios emigraron dende l'este d'Asia, cruciaron rápidamente Melanesia y asentáronse más al este, en Polinesia, dexando perpocu rastru xenéticu en Melanesia[9].

Llingüística[editar | editar la fonte]

La mayoría de les llingües falaes en Melanesia pertenecen a les families llingüístiques papuana y austronesica. Na rexón, pese a la so escasa estensión territorial, fálense 1.319 llingües, lo que da una proporción de 716 km² por llingua. Una densidá llingüística que triplica la de Nixeria, un país famosu pol gran númberu de llingües que se falen nún área compacta[11].

A ellos hai qu'añedir los pidgin y llingües criolles que se desarrollaron, de resultes de sieglos d'interacción cultural y comercial. Rescamplen, ente ellos, el Tok Pisin y el Hiri motu, dos llingües criolles de Papúa Nueva Guinea. L'usu del Tok Pisin ta medrando, y ye, especialmente en families multiculturales, aprendíu polos neños como so primer llingua. Otres llingües criolles de la zona son la llingua pijin de les islles Salomón, el bislama y el papuanu malayu.

Xeografía[editar | editar la fonte]

Monte Tavurvur, en Papúa Nueva Guinea.
Vista aérea de les Islles Salomón.
Llanada de ceniza nel monte Yasur (Vanuatu).
Nueva Caledonia

Suele facese una distinción ente la islla de Nueva Guinea y lo que se conoz como Melanesia Insular, formada por la cadena d'archipiélagos, islles, atolones y arrecifes que formen les llendes esteriores del Mar del Coral[12]. Esto inclúi al archipiélagu de Les Luisiades (que pertenecen a Papúa Nueva Guinea), l'archipiélagu Bismarck (compartíu por Papúa Nueva Guinea y Islles Salomón), les islles Santa Cruz (que pertenecen a Islles Salomón). Tamién al país nomáu Vanuatu, formáu pola cadena d'islles nomada Nueves Hébrides, y a Nueva Caledonia, dependencia francesa formada por una islla principal y dellos archipiélagos menores, como les islles de la Llealtá. La nación de Fiji comprende dos islles principales, Viti Levu y Vanua Levu, y delles islles ya isllotes más, como les islles Lau.

Los nomes de les islles en Melanesia son, delles veces, confusos. Hai nomes indíxenes ya europeos pa elles, hai archipiélagos nos que les islles pertenecen a países diferentes... y los nomes de les xunidaes polítiques cambiaron delles veces a lo llargo'l tiempu, incluyendo delles veces términos xeográficos na nomenclatura. Asina, la islla de Makira foi conocida primero como San Cristóbal, el nome que-y dieron los conquistadores españoles, y pertenez a Islles Salomón, que ye un estáu nación y non un archipiélagu d'islles contigües. La llende ente Papúa Nueva Guinea ya Islles Salomón separta la islla de Bougainville d'otres cercanes como Choiseul, magar que Bougainville forma xeográficamente parte de la cadena qu'inclúi a Choiseul y la mayoría de les Salomón.

Amás de toles islles yá mencionaes, hai otres islles menores y atolones en Melanesia. Podemos citar, ente más otres:

La islla de Norfolk, mencionada anantes, tien evidencia arqueolóxica de poblamientu polinesiu más que melanesiu, pese a la so situación xeográfica; y Rotuma presenta tamién grandes afinidaes culturales y etnolóxiques con Polinesia.

D'otra banda, y atendiendo namái a factores etnolóxicos, delles islles al oeste de les Moluques, como Nusa Tenggara, Célebes, Luzón, Visayas, Mindanao, Borneo, Palawan, Malaka, Xava, Sumatra y Pantar pueden ser consideraes parte de Melanesia. Sicasí, la mayoría de la población d'esta zona nun s'identifiquen con esi términu nin lu usen na so fala diaria.

Referencies[editar | editar la fonte]

  1. URL de la referencia: https://www.populationpyramid.net/melanesia/2020/.
  2. Esti términu apaez nel Diccionariu de l'Academia de la Llingua Asturiana. Ver: melanesiu, -a, -o
  3. Tcherkezoff, S., A Long and Unfortunate Voyage Toward the Invention of the Melanesia-Polynesia Distinction 1595–1832. Journal of Pacific History, 2003;38(2):175-96. doi:10.1080/0022334032000120521
  4. Durmont D'Urville, J., On The Islands of The Great Ocean. Pacific History, 2003;38(2):163-74. doi:10.1080/0022334032000120512
  5. Codrington, R., Entrada "Melanesians" na Encyclopedia of Religion and Ethics, páxs. 528-35. Edimburgu, T & T Clark, 1915.
  6. Chowning, A., An Introduction to the Peoples and Cultures of Melanesia. Menlo Park, Cummings Publishing Company, 1977.
  7. Sillitoe, P., An Introduction to the Anthropology of Melanesia. Nueva York, Cambridge University Press, 1998.
  8. Lawson, S., 'Melanesia': The History and Politics of an Idea. Journal of Pacific History, 2013;48(1):1-22. doi=10.1080/00223344.2012.760839
  9. 9,0 9,1 "Genome Scans Show Polynesians Have Little Genetic Relationship to Melanesians", Press Release, Temple University, 17 de xineru de 2008.
  10. Spriggs, M, The Island Melanesians. Blackwell, 1997. ISBN 0-631-16727-7.
  11. Landweer, M.L., Unseth, P, An introduction to language use in Melanesia. International Journal of the Sociology of Language, 2012;214:1-3. doi=10.1515/ijsl-2012-0017
  12. Moore, C., New Guinea: Crossing Boundaries and History. Honolulu, University of Hawaii Press, 2003.