Wangari Maathai

Premiu Nobel de la Paz

Wangari Maathai
Minister of Environment of Kenya (en) xineru 2003 - payares 2005 Miembro de la Asamblea Nacional (es) 2002 - 2007
Vida
Nacimientu	Nyeri, 1 d'abril de 1940
Nacionalidá	Colonia y Protectorado de Kenia Kenia
Residencia	Nairobi
Muerte	Nairobi, 25 de setiembre de 2011 (71 años)
Causa de la muerte	cáncer d'ovariu
Familia
Casada con	Mwangi Maathai (en) ( – 1978)
Fíos/es	Wanjira Mathai
Estudios
Estudios	Loreto High School, Limuru (en) Universidá de Giessen Universidá de Munich Universidá de Pittsburgh 1966) Benedictine College (en) Universidá de Nairobi 1971)
Nivel d'estudios	bachiller de ciencies maestría en ciencies Philosophiæ doctor
Llingües falaes	inglés suaḥili Idioma kikuyu
Oficiu	bióloga, profesora, veterinaria, política, ambientalista, activista
Emplegadores	Yale
Premios	ver Medalla Nichols-Chancellor NAACP Image Award – Chairman's Award caballeru de la Lexón d'Honor Right Livelihood Award  (1984) Premiu Goldman pal mediu ambiente  (1991) Edinburgh Medal  (1993) Dorothy McCluskey Visiting Fellowship in Conservation  (2000) Premiu Nobel de la Paz  (2004) Premiu Sofía  (2004) Petra-Kelly-Preis  (2004) Premiu Jawaharlal Nehru  (2005) honorary doctor of Waseda University  (2006) Premiu Indira Gandhi  (2006) World Citizenship Award  (2007) Premio Elizabeth Blakwell  (2008) Gran Cordón de la Orden del Sol Naciente  (2009)
Miembru de	Alpha Kappa Alpha (es) Nobel Women's Initiative (en)
Creencies
Relixón	Ilesia Católica
Partíu políticu	Mazingira Green Party of Kenya (en)
IMDb	nm2214860

Wangari Muta Maathai (1 d'abril de 1940, Nyeri – 25 de setiembre de 2011, Nairobi) foi una activista política y ecoloxista keniana de la etnia kĩkũyũ, y la primer muyer africana en recibir el Premiu Nobel de la Paz en 2004 por "la so contribución al desenvolvimientu sostenible, la democracia y la paz". En 1977 fundó'l Movimientu Cinturón Verde (Green Belt Movement), pol que llogró en 1986 el Premiu al Sustentu Bien Ganáu. Foi escoyida miembru del Parllamentu de Kenia (Cámara Baxa de l'Asamblea Nacional) onde exerció como ayudante del ministru de Mediu Ambiente y Recursos Naturales mientres el gobiernu del presidente Mwai Kibaki ente xineru de 2003 y payares de 2005. Tamién formó parte del Conseyu d'Honor del World Future Council. Finó en 2011 de cáncer d'ovariu.

Infancia y educación

Maathai nació'l 1 d'abril de 1940 nel pueblu d'Ihithe del distritu de Nyeri, nes tierres altes centrales Kenia, entós colonia británica. La so familia yera kĩkũyũ, el grupu étnicu más numberosu de Kenia, y vivién na rexón dende faía delles xeneraciones. La familia de Maathai treslladóse en 1943 a una granxa de propietarios blancos nel Valle Rift cercana al pueblu de Nakuru, au el so pá atopó trabayu. A finales de 1947 Maathai tornó a Ihithe con so ma, yá que dos de los sos hermanos diben a la escuela primaria nel pueblu y na granxa nun podíen ser escolarizaos. El so padre quedóse na granxa trabayando. Poco dempués, con ocho años, empezó a dir a la escuela primaria d'Ihithe xunto colos sos hermanos.

Maathai incorporóse a los once años a la escuela primaria entemedia Santa Cecilia, un internáu de la Misión Católica Mathari en Nyeri, au permaneció cuatro años. Mientres esti tiempu deprendió a falar inglés con fluidez y convirtióse al catolicismu. Interesóse pola Lexón de María, que los sos miembros intentaben "sirvir a Dios, sirviendo a los seres humanos". Al estudiar en Santa Cecilia, Maathai tuvo a salvu de la sulevación Mau Mau en cursu qu'obligó a la so madre a treslladase a un abellugu d'emerxencia nel pueblu d'Ihithe. Terminó los sos estudios en 1956 la primera de la so clas y foi almitida nel Loreto High School de Limuru, qu'entós yera la única escuela preparatoria católica de muyeres en Kenia.

Sicasí, el fin del colonialismu n'África Oriental taba cerca, y políticos kenianos como Tom Mboya proponíen formes de faer accesible la educación de les naciones occidentales a los estudiantes promesa africanos. L'entós senador de los Estaos Xuníos John F. Kennedy alcordó financiar el programa al traviés de la Fundación Joseph P. Kennedy Jr., empecipiando lo que se conoció como Kennedy Airlift o Airlift Africa ("la ponte aérea d'África"). Maathai foi una de los trescientos kenianos escoyíos en setiembre de 1960 pa dir estudiar a Estaos Xuníos.

Nun hai nada más guapo que cultivar la tierra al anochecer. Nesi momentu del día nes tierres altes, l'aire y la tierra son frescos, el sol ta poniéndose, la lluz del sol ye dorao sobre los cordales y les copes de los árboles, y suel sentise l'oral. Mientres retires les yerbes y primes la tierra alredor de los cultivos tas lleu, y deseyaríes que la lluz perdurara pa poder cultivar más. La tierra y l'agua, l'aire y el fueu menguante del sol combínense pa formar los elementos esenciales de la vida y revélenme el mio parentescu cola tierra. Cuando yera neña dacuando concentrábame tantu trabayando nos campos col mio machete, que nun me decataba del final del día, hasta que taba tan escuro que nun podía estremar les meruxes de los cultivos. Nesi momentu sabía que yera hora de tornar a casa, poles estreches siendes que travesaben los campos y ríos y arbolees. —Wangari Muta Maathai – Unbowed, p. 47.

Llogró una beca pa estudiar nel Mount St. Scholastica College (Benedictine College na actualidá), n'Atchison, Kansas, au se graduó en Bioloxía (major) con especialidaes (minors) en Química y Alemán. En llogrando'l so Bachelor of Science en 1964, estudió la maestría en Bioloxía na Universidá de Pittsburgh financiada pol Institutu Africanu-Americanu, y mientres la so estancia en Pittsburgh esperimentó per vegada primera una restauración medioambiental cuando ecoloxistes llocales propunxéronse llimpiar l'aire de la ciudá. En xineru de 1966 Maathai llogró la so Maestría en Ciencies Biolóxiques, y foi propuesta pa ocupar un puestu como asistente investigador d'un profesor de Zooloxía de la Escuela Universitaria de Nairobi.

Al so regresu a Kenia, Maathai dexó d'usar el so apellíu yá que prefería que la llamaren pol so nome de pila, Wangari Muta. Cuando llegó a la universidá pa empezar el so nuevu trabayu, informóse-y de que'l puestu fuéra-y dau a otru. Maathai pensó qu'ello debíase a prexuicios de xéneru y tribales. En buscando trabayu mientres dos meses, el Profesor Reinhold Hofmann de la Universidá de Giessen n'Alemaña ufiertó-y trabayu como ayudante d'investigación na seición de microanatomía del acabante crear Departamentu d'Anatomía Veterinaria na Escuela de Medicina Veterinaria de la Universidá de Nairobi. N'abril de 1966 conoció a Mwangi Mathai, otru kenianu qu'estudiara n'América, que darréu convertiríase nel so maríu. Arrendó un pequeñu llocal na ciudá y punxo una tienda onde trabayaron les sos hermanes. En 1967, animada pol Profesor Hofmann, viaxó a la Universidá de Giessen n'Alemaña pa estudiar un doctoráu, que fizo nesa universidá y na Universidá de Múnich.

Na primavera de 1969, Maathai tornó a Nairobi pa siguir los sos estudios na Universidá de Nairobi como profesora axunta. En mayu d'esi añu casóse con Mwangi Mathaiy y pocu dempués quedóse embarazada del so primer fíu, al empar que'l so home presentábase al Parllamentu, perdiendo per un pequeñu marxe. Nel intre de les eleiciones, Tom Mboya, que fuera crucial pa la creación del programa que lu unvió al estranxeru, foi asesináu. Esto llevó al presidente Jomo Kenyatta a terminar cola democracia multipartidista en Kenia. Poco dempués nació Waweru, el so primer fíu. En 1971 convirtióse na primer muyer d'África Oriental n'algamar un doctoráu, nel so casu d'Anatomía veterinaria de la Escuela Universitaria de Nairobi, que convertiríase na Universidá de Nairobi al añu siguiente. Presentó la so tesis sobre'l desenvolvimientu y diferenciación de les gónaes bovines. La so fía Wanjira nació n'avientu d'esi mesmu añu.

Activismu y vida política 1972–1977

Maathai siguió enseñando en Nairobi, convirtiéndose en profesora axunta d'anatomía en 1975, xefa del Departamentu d'Anatomía Veterinaria en 1976 y profesora acomuñada en 1977. Foi la primer muyer en Nairobi n'algamar estos puestos. Mientres esti tiempu, Maathai promovió campañes a favor de la igualdá de beneficios pa les muyeres que trabayaben na Universidá, llegando al puntu d'intentar convertir l'asociación del personal académicu nun sindicatu al envís d'axustar les prestaciones. Los xulgaos negaron esta posibilidá, pero munches de les sos demandes d'igualdá llográronse darréu. Arriendes del so trabayu na Universidá de Nairobi, Maathai arreyóse a delles organizaciones cíviques a principios de los años 70. Foi miembru de la delegación en Nairobi de la Sociedá de la Cruz Roxa de Kenia, convirtiéndose na so direutora en 1973. Tamién foi miembru de l'Asociación Keniana de Muyeres Universitaries. Tres la fundación del Centru Ambiental Liason en 1974, convidáronla a formar parte de la xunta llocal, llegando a convertise na so presidenta. El Centru Ambiental Liason trabayó pa promover la participación d'organizaciones non gubernamentales nel Programa de les Naciones Xuníes pal Mediu Ambiente (UNEP), que les sos oficines centrales abriéranse en Nairobi tres la Conferencia de les Naciones Xuníes sobre'l Mediu Humanu celebrada n'Estocolmu en 1972. Maathai tamién formó parte del Conseyu Nacional de Muyeres de Kenia (NCWK). Al traviés del so trabayu como voluntaria nes diverses asociaciones, resultó-y evidente que'l raigañu de la mayoría de los problemes de Kenia yera la degradación medioambiental.

En 1974, la familia de Maathai creció cola nacencia del so tercer fíu, Muta. El so maríu realizó nuevamente campaña política pa llograr un puestu nel Parllamentu, esperando representar al distritu eleutoral de Lang'ata, y ganó. Mientres esa campaña prometió aumentar los emplegos en Kenia. Estes promeses fixeron que Maathai coneutara les sos idees de recuperacióm ambiental cola necesidá de dar emplegu a los paraos, lo que conduxo a la fundación de Envirocare Ltd., una empresa dedicada a la reforestación, implicando a ciudadanos comunes nel procesu. Esto llevó a crear el so primer ivernaderu nel monte Karura. Envirocare tuvo múltiples problemes, sobremanera rellacionaos col financiamientu, y el proyeutu fracasó. Sicasí, gracies a les conversaciones calteníes sobre Envirocare y al so trabayu nel Centru Ambiental Liaison, el UNEP consiguió que Maathai asistiera a la primer Conferencia de Naciones Xuníes sobre asentamientos humanos, conocida como Habitat I, que tuvo llugar en Vancouver, Canadá, en xunu de 1976.

En 1977, Maathai faló ante'l Conseyu Nacional de muyeres de Kenia (NCWK) sobre la so asistencia a Habitat I. Propunxo impulsar la reforestación, a lo que'l conseyu accedió. El 5 de xunu de 1977, el día Mundial del Mediu Ambiente, el NCWK fizo una marcha dende'l Centru Internacional de Conferencies en Nairobi hasta'l parque Kamukunji nes contornes de la ciudá, onde llantaron siete árboles n'honor a líderes históricos de la comunidá. Esti foi'l primer "Cinturón Verde", conocíu primeramente como "Salvar la Tierra Harambee" que darréu convirtióse nel Movimientu Cinturón Verde (Green Belt Movement). Maathai afaló a les muyeres de Kenia a crear ivernaderos per tol país, buscando granes en montes cercanos pa semar árboles naturales de la zona. Maathai alcordó pagar a les muyeres una pequeña remuneración per cada pebidal que fora llantáu darréu n'otros llugares.

Problemes personales 1977–1979

Maathai y el so maríu, Mwangi Maathai, dexaron de convivir en 1977. Tres una llarga separación, Mwangi pidió'l divorciu en 1979. Dicíase que Mwangi pensaba que Wangari "tenía una mentalidá demasiáu fuerte pa ser muyer" y que él yera "incapaz de controlala". Amás de llamala "cruel" mientres el xuiciu, acusóla públicamente d'adulteriu con otru miembru del parllamentu, lo que provocaría la so alta presión sanguíneo, y el xuez falló a favor de Mwangi. Poco dempués del xuiciu, nuna entrevista cola revista Viva, Maathai refirióse al xuez como un incompetente o corruptu. La entrevista fizo que'l xuez llevantara cargos per desacatamientu al tribunal. Foi declarada culpable y sentenciada a seis meses de cárcel. En pasando tres díes na prisión femenina de Lang'ata en Nairobi, el so abogáu fixo una declaración que'l tribunal consideró abondu pa dar en lliberala. Poco dempués del divorciu, el so ex-esposu unvió una carta per mediu del so abogáu au esixía que Maathai dexara d'usar el so apellíu. En cuenta de faelo, ella amestó-y una "a".

El divorciu foi caru, y coles minutes d'abogaos y la perda d'ingresos del so maríu, Maathai afayó que col so salariu universitariu nun podía asumir los sos gastos y los de los sos fíos. Surdió-y la oportunidá de trabayar na Comisión Económica pa África al traviés del Programa de les Naciones Xuníes pal Desenvolvimientu. Esti trabayu riquía viaxar per África y la base taba en Lusaka, Zambia, polo que nun podía llevar a los sos fíos con ella y decidió unvialos col so exmaríu y aceptar l'emplegu, magar que visitábalos regularmente. Los neños vivieron col so padre hasta 1985.

Problemes políticos 1979–1982

En 1979, pocu dempués del so divorciu, Maathai presentóse pal puestu de presidenta del Conseyu Nacional de Muyeres de Kenia (NCWK), una organización paragües que consistía na xunión de munches organizaciones de muyeres del país. L'entós recién eleutu Presidente de Kenia Daniel arap Moi trató de llindar la influencia de la etnia kĩkũyũ nel país, incluyíes les organizaciones civiles como'l NCWK. Maathai perdió les eleiciones por trés votos, pero foi escoyida vicepresidenta de la organización por mayoría. Al añu siguiente Maathai presentóse de nuevu a la presidencia del NCWK y volvió perder, según pensaba, por culpa del gobiernu. Nel momentu que rescampló que Maathai diba ganar les eleiciones, Maendeleo Ya Wanawake, miembru d'una organización que representaba a la mayoría de les muyeres del mediu rural de Kenia y que la so líder yera cercana a Daniel arap Moi, retiróse de la NCWK. Maathai foi escoyida presidenta de la NCWK ensin oposición. Sicasí, foi Maendeleo Ya Wanawake quien recibió la mayoría del sofitu financieru pa programes d'ayuda a les muyeres nel país, y la NCWK foi práuticamente llevada a la bancarrota. Magar que la recaldación de fondos fíxose más difícil, el NCWK sobrevivió faciendo énfasis nel mediuambiente y faciendo visible la so presencia y trabayu. Maathai siguió y foi reelixida como presidenta de la organización cada añu hasta que se retiró en 1987.

Llueu fízose obviu que la política taba en xuegu de nueves. El partíu nel poder nun me quería nel parllamentu ya inxeniaron una manera d'evitar que llegara hasta ende. Decidí lluchar de nuevu llevando a xuiciu a les autoridaes y desafiando los sos motivos pa descalificame, yá que sabía que yeren dafechu illegales. El tribunal aconceyó a les nueve en puntu de la mañana un sábadu, pero pidióseme que llevara los papeles de la mio candidatura pela tarde d'esi mesmu día a Nyeri, que ta a trés hores en coche dende Nairobi. Viendo que diba seme imposible tar a tiempu pa la hora llende si diba en coche, unos amigos contrataron un avión pa llevame a Nyeri asina'l xulgáu diera'l so veredictu. Cuando'l xuez dictó la so sentencia final, incapacitándome pa presentame al parllamentu, yá yera casi mediu día. Inclusive n'avión y con un veredictu favorable, llegara a Nyeri enforma tarde. El mio casu, como munchos otros, amosaba la falta de xusticia que yera frecuente nesi momentu en Kenia, lo qu'empobinome a implicame nel movimientu prodemocracia. Una vegada más, perdiera nel xulgáu. Nun diba poder ser candidata. —Wangari Muta Maathai – Unbowed, páxs. 161.

En 1982, el puestu parllamentariu en representación de la so rexón de residencia, Nyeri, taba vacante, y Maathai decidió faer campaña pal mesmu. Como dictaba la llei, arrenunció al so puestu na Universidá de Nairobi pa faer la so campaña. Los tribunales decidieron que nun podía ser escoyida por cuenta de que nun se volviera rexistrar na última eleición presidencial en 1979. Maathai creía qu'esto yera falso ya illegal y llevó l'asuntu a xuiciu. El tribunal aconceyóse a les nueve de la mañana y si ella llograba una resolución favorable, tenía de presentar los papeles pa la so candidatura en Nyeri a les trés de la tarde del mesmu día. El xuez descalificó la so candidatura por un teunicismu. Cuando pidió ser readmitida nel so trabayu, refugóse-y. Como vivía na residencia universitaria y yá nun yera parte de la so plantía, foi desallugada.

Movimientu Cinturón Verde

Maathai treslladóse a una pequeña casa que mercara años enantes y centróse nel NCWK mientres buscaba trabayu. Tando nel NCWK púnxose en contautu con ella Wilhelm Elsrud, direutor executivu de la Sociedá Noruega de Silvicultura, que quería acomuñar col Movimientu Cinturón Verde y ufiertó-y el puestu de coordinadora. Emplegada de nuevu, Maathai entornó los sos esfuercios nel Movimientu Cinturón Verde. Amás de la Sociedá Noruega de Silvicultura, el movimientu tamién recibió "capital inicial" del Fondu Voluntariu pa Muyeres de Naciones Xuníes. Estos fondos permitieron la espansión del movimientu, la contratación d'emplegaos adicionales pa llevar les sos operaciones a otres partes del mundu y siguir pagando una pequeña contribución a les muyeres que llantaben árboles per tol país. Esto dexó-y redefinir les operaciones del movimientu, y pagar un pequeñu estipendiu a los maríos y fíos de les muyeres que taben alfabetizados y yeren capaces de caltener un rexistru precisu de les plántules semaes.

Magar ser una muyer con educación superior, nun me paeció nunca raru trabayar coles mios manes, de cutiu de rodíes nel suelu, xunto con llabradores. Dellos políticos y otres persones nos años ochenta y noventa facíenme risión por faelo, pero yo nun tenía nengún problema y los llabradores aceptaben y apreciaben que tuviera trabayando con ellos p'ameyorar les sos vides y el mediuambiente. Dempués de too, yo yera una neña más de la mesma tierra. La educación, si daqué supón, nun tendría d'alloñar a les persones de la tierra, sinón inculca-yos más respetu por ella, porque les persones educaes tán en posición d'entender lo que se ta perdiendo. El futuru del planeta conciérnenos a toos y tenemos de faer lo que podamos pa protexelu. Como-yos dicía a los silvicultores y a les muyeres, nun precisáis un diploma pa llantar un árbol. —Wangari Muta Maathai – Unbowed, páxs. 137–138.

Naciones Xuníes celebró la tercer conferencia de muyeres en Nairobi. Maathai entamó mientres la conferencia seminarios y presentaciones pa esplicar el trabayu de la Cinturón Verde en Kenia. Acompañó a delegaos pa conocer los ivernaderos. Conoció a Peggy Snyder, líder de la UNIFEM, y a Helvi Sipilä, la primer muyer nomada Secretariu Xeneral Axuntu de Naciones Xuníes. La conferencia ayudó a espandir la recaldación de fondos pal Movimientu Cinturón Verde y a que s'afitara fuera de Kenia. En 1986, con financiamientu de la UNEP, el movimientu espandióse per toa África y conduxo a la fundación de la Rede Pan-Africana del Cinturón Verde. Cuarenta y cinco representantes de quince países africanos viaxaron a Kenia mientres los siguientes trés años pa deprender a facer programes asemeyaos nos sos países pa combatir la desertificación, la deforestación, la crisis d'agua y la fame nel mundu rural. L'atención que'l movimientu recibió nos medios fizo que Maathai fora gallardoniada con diversos premios. El gobiernu de Kenia, sicasí, solicitó que'l Movimientu Cinturón Verde se dixebrara del NCWK, al pensar que la organización tendría d'enfocase namái nos asuntos de les muyeres, non en temes ambientales. Por ello en 1987 Maathai cesó na presidencia del NCWK y centróse na so nueva organización non gubernamental.

Cuando veo'l Parque Uhuro y miro'l so significáu, siéntome obligada a lluchar por él, asina los mios nietos seique compartan esi suañu y esi gozu por ser llibres al caminar dalgún día per ende. —Wangari Muta Maathai – Unbowed, p. 192.

Intervención gubernamental

Na segunda metá de los años 80, el gobiernu kenianu volvióse escontra Maathai y el Movimientu Cinturón Verde. El réxime unipartidista opúnxose a munches de les postures del movimientu sobre derechos democráticos. El gobiernu invocó una llei de la dómina colonial que prohibía a grupos de más de nueve persones xuntase ensin primero llograr una llicencia gubernamental. En 1988, el movimientu convocó actividaes en favor de la democracia, como rexistrar votantes pa la eleición y primir pa una reforma constitucional y pola llibertá d'espresión. El gobiernu fizo un fraude eleutoral nes eleiciones pa caltener el poder, según Maathai.

N'ochobre de 1989, Maathai opúnxose a un plan pa construyir el complexu de 60 plantes Kenia Times Media Trust nel Parque Uhuru. El complexu pretendía allugar les oficines centrales de KANU, el periódicu Kenia Times, un centru de negocios, oficines, auditoriu, galeríes, centru comercial y aparcamientu pa 2.000 vehículos. El plan tamién incluyía una estatua del presidente Daniel arap Moi. Maathai escribió munches cartes de protesta a Kenia Times, la Oficina del Presidente, la Comisión de la Ciudá de Nairobi, el Comisionáu Provincial, el Ministru de Mediu Ambiente y Recursos Naturales, los direutores executivos del UNEP y el Centru Ambiental Liaison, el Direutor Executivu de la UNESCO, el Ministru d'Obres Públiques y el Secretariu Permanente nel departamentu de Seguridá Internacional y Alministración. Escribió a Sir John Johnson, l'Altu Comisionáu Británicu en Nairobi, encamentándo-y a falar con Robert Maxwell, el mayor accionista del proyeutu, oldeando la construcción d'una torre nel Parque Uhuru con una construcción asemeyada nel Hyde Park o en Central Park y sosteniendo qu'eso sería intolerable. Plantía:CiQuote box El gobiernu refugó contestar a les sos protestes y solicitúes, y nel so llugar respondió a los medios que Maathai yera una "lloca"; negando que'l proyeutu nel Parque Uhuru fora a ocupar más qu'una pequeña parte del parque públicu y proclamando que'l proyeutu yera un "magníficu trabayu d'arquiteutura" al que s'oponía solo la "minoría inorante". El 8 de payares de 1989, el parllamentu espresó la so indignación poles aiciones de Maathai, quexándose de les cartes a organizaciones estranxeres y calificando al Movimientu Cinturón Verde d'organización fraudulenta y a los sos miembros de "un montón de divorciaes". Suxirieron que si Maathai taba tan cómoda escribiendo a los europeos, quiciabes tendría de vivir n'Europa.

Magar les oxeciones de Maathai y a les crecientes protestes por tola ciudá, la escavación nel Parque Uhuru pa la construcción del complexu empezó'l 15 de payares de 1989. Maathai solicitó una orde xudicial énte l'Altu Tribunal de Kenia pa detener les obres, pero'l casu foi sobreseyíu'l 11 d'avientu. Nes sos primeres declaraciones públiques sobre'l proyeutu, el presidente Daniel arap Moi señaló que quien s'oponíen al mesmu teníen "inseutos na cabeza". El 12 d'avientu nel Parque Uhuro, mientres el discursu de celebración de la independencia británica, el presidente Moi suxirió a Maathai que fora una muyer acorde a les tradiciones africanes, que respetara a los homes y que «tuviera callada». El gobiernu obligó a desallugar la so oficina y el movimientu Cinturón Verde treslladóse a la so casa. El gobiernu entós auditólu nun intentu aparente de desanicialu. Con too y con eso, les sos protestes, la rempuesta del gobiernu —y la cobertoria que llogró nos medios— llevó a los inversores estranxeros a atayar el proyeutu en xineru de 1990.

En xineru de 1992 Maathai y otros activistes prodemocracia conocieron la esistencia d'una llista de persones señalaes pa ser asesinaes y que yera posible que se tratara d'un golpe promovíu pol gobiernu. El nome de Maathai taba na llista. El grupu a favor de la democracia conocíu como'l Foru de Restauración Democráticu (FORD), presentó esta información a los medios, reclamando eleiciones xenerales. Esi mesmu día Maathai recibió l'alerta de qu'unu de los sos miembros fora arrestáu, y decidió zarrase na so casa. Poco dempués la policía llegó y arrodió la casa. El sitiu duró tres díes hasta que los policíes tayaron los barrotes qu'instalara nes ventanes, entraron y arrestáronla. A ella xunto colos otros activistes prodemocráticos arrestaos acusóse-yos d'espublizar rumores malintencionaos, de sedición y de traición. Tres día y mediu na cárcel foron llamaos a audiencia y puestos en llibertá so fianza. Delles organizaciones internacionales y ocho senadores estauxunidenses (ente ellos Al Gore y Edward M. Kennedy) primieron al gobiernu de Kenia por que o retiraba los cargos escontra los activistes prodemocracia o arriesgábense a perxudicar les rellaciones colos Estaos Xuníos. En payares de 1992, el gobiernu retiró los cargos.

El 28 de febreru de 1992, tando en llibertá condicional, Maathai participó xunto con otros na fuelga de fame nun rincón del Parque Uhuru al que llamaron el Rincón de la Llibertá, pa primir al gobiernu a lliberar a los prisioneros políticos. Tres cuatro díes d'ayunu, el 3 de marzu de 1992 la policía desallugó pola fuercia a los manifestantes. Maathai y otres trés persones foron cutíes hasta cayer inconscientes y tuvieron que ser hospitalizaes El Presidente Daniel arap Moi llamóla "lloca" y "una amenaza pal orde y la seguridá del país". L'ataque recibió crítiques internacionales. El Departamentu d'Estáu de los Estaos Xuníos declaró tar "fondamente esmolecíu" pola violencia y el desagospiu forzosu de los manifestantes. Al nun ser lliberaos los presos políticos, los manifestantes —madres na so mayoría de los presos— treslladaron la protesta a la Catedral All Saints, sede del Arzobispáu Anglicanu en Kenia. La protesta siguió ellí, siendo frecuentes les contribuciones de Maathai, hasta que los prisioneros foron lliberaos a principios de 1993.

Mientres esi periodu Maathai foi reconocida con dellos premios internacionales, pero'l gobiernu de Kenia nun apreciaba'l so llabor. En 1991 llogró'l Premiu Ambiental Goldman en San Francisco y en Londres el Premiu al Lideralgu n'África de The Hunger Project. La CNN emitió un fragmentu de trés minutos rellacionáu col premiu Goldman, pero esi corte desanicióse na emisión de Kenia. En xunu de 1992 mientres la protesta nel parque Uhuro siguía, Maathai y el presidente arap Moi viaxaron a Rio de Janeiro p'asistir a la Cume de la Tierra. El gobiernu de Kenia acusó a Maathai d'afalar y animar a les muyeres a engarrar nel Rincón de la Llibertá, encamentando a que nun se-y dexara falar na conferencia. Magar ello, Maathai foi escoyida vocera principal del cume.

Impulsu de la democracia

Mientres les primeres eleiciones multipartíu en Kenia en 1992, Maathai lluchó por xunificar la oposición y porque hubiera eleiciones xustes. El Foru pa la Restauración de la Democracia biforcárase en FORD-Kenia (lideráu por Oginga Odinga) y FORD-Asili (lideráu por Kenneth Matiba); Mwai Kibaki, la exvicepresidenta, abandonara'l partíu nel poder, Kenia African national Union (KANU), y formara el Partíu Democráticu. Maathai y munchos otros creyeron qu'esa quebra traería que KANU retuviera'l control del país, polo que formaron el Middle Ground Group, nun esfuerciu por axuntar a la oposición. Maathai foi escoyida la so presidenta. Tamién mientres les eleiciones Maathai xunto con otros miembros de la oposición allegaos formaron el Movimientu pa les Eleiciones Llibres y Xustes. A pesar de los sos esfuercios la oposición nun se xunió y el partíu nel poder KANU usó la intimidación y los medios de comunicación estatales pa ganar les eleiciones, calteniendo'l control del parllamentu.

De normal ye difícil describir a los que viven nuna sociedá llibre cómo ye la vida nun réxime autoritariu. Nun sabes en quién confiar. Esmolezte que tu, la to familia o los tos amigos seyan arrestaos y encarcelaos ensin el procesu dalgunu. El mieu a la violencia política yá seya por asesinatos direutos o blancos "accidentales" ye constante. Esi yera'l casu de Kenia, especialmente mientres la década de 1990. —Wangari Muta Maathai – Unbowed, p. 206.

Al añu siguiente hubo enfrentamientos étnicos per toa Kenia. Maathai creía que yeren afalaos pol gobiernu, quien sollertara de les consecuencies d'una democracia multipartíu. Maathai viaxó xunto con compañeros y la prensa a les zones de violencia col fin de promover el fin de la llucha. Xunto col Movimientu Cinturón Verde llantó "árboles de paz", pero al poco tiempu'l gobiernu opúnxose a les sos aiciones. Les zones en conflictu etiquetáronse como "zones de non accesu", y en febreru de 1993, el presidente dixo que Maathai entamara la distribución de panfletos afalando a Kikuyus p'atacar a Kalenjins. Tres d'el secuestru del so amigu y compañeru Dr. Makanga, Maathai decidió escondese. Tando escondida, Maathai foi convidada a una xunta en Tokiu de la Cruz Verde Internacional, una organización ambiental apocayá formada pol ex-líder soviéticu Mikhail Gorbachev. Cuando Maathai respondió que nun podía asistir a la xunta, yá que nun creía que'l gobiernu fora dexala salir del país y ella taba escondida, Gorbachev primió al gobiernu de Kenia por que la dexaren viaxar llibremente. El presidente arap Moi negó que se-y llindara viaxar, y permitióse-y dexar el país, magar qu'enforma tarde pa la xunta en Tokiu. Maathai foi reconocida internacionalmente de nuevu, y voló a Escocia pa recibir la Medaya d'Edimburgu n'abril de 1993. En mayu foi a Chicago a recibir el Premiu Internacional al Lideralgu Femenín Jane Addams y en xunu asistió a la Conferencia Mundial de Derechos Humanos de les Naciones Xuníes en Viena.

Mientres les eleiciones de 1997, Maathai trató de xunir de nuevu a la oposición pa ganar al partíu nel poder. En payares, a menos de dos meses de les eleiciones decidió que diba presentase al parllamentu y tamién a presidenta pol Partíu Lliberal. Les sos intenciones foron bien cuestionaes pola prensa; munchos crecíen que tenía de quedase dirixendo'l Movimientu Cinturón Verde y nun entrar en política. El día de les eleiciones espublizóse nos medios el rumor de que Maathai retirárase y ratificara a otru candidatu. Maathai llogró pocos votos y perdió les eleiciones.

El branu de 1998, Maathai enteróse d'un plan del gobiernu pa privatizar grandes árees de tierra pública nel Monte Karura pela rodiada de Nairobi, pa da-yosles a partidarios políticos. Maathai manifestó la so protesta per aciu cartes al gobiernu y a la prensa. Foi col Movimientu Cinturón Verde a Karuna, a llantar árboles y a manisfestase escontra la destrucción del monte. El 8 de xineru de 1999, un grupu de manifestantes, incluyida Maathai, seis miembros del parllamentu na oposición, periodistes, observadores internacionales y miembros de la Cinturón Verde tornaron al monte a llantar un árbol en protesta. La entrada al monte taba escoltada por un grupu ampliu d'homes. Cuando trató de llantar un árbol nuna zona que fuera específicamente estenada pa un campu de golf, el grupu foi atacáu. Munchos de los manifestantes resultaron mancaos, incluyendo a Maathai, cuatro parllamentarios, dalgunos de los periodistes y ambientalistas alemanes. Cuando informó del ataque a la policía, ésta negóse a allegar al monte p'arrestar a los sos atacantes. Sicasí, l'ataque fora filmáu por dellos siguidores de Maathai y el sucesu provocó indignación internacional. Protestes estudiantiles surdieron per Nairobi y dalgunos d'esos grupos foron desallugaos violentamente pola polícia. Les protestes siguieron hasta'l 16 d'agostu de 1999, cuando'l presidente anunció que prohibía cualquier axudicación de tierra pública.

En 2001, el gobiernu entamó de nuevu axudicar tierra pública a los sos partidarios. El 7 de marzu de 2001 Maathai foi nuevamente arrestada por protestar por ello y recoyer robles n'escontra, siendo puesta en llibertá ensin cargos al otru día tres les munches protestes populares ya internacionales. El 7 de xunetu del 2001, pocu dempués de llantar árboles nel Rincón de la Llibertá del parque Uhuru, foi arrestada de nueves y puesta en llibertá a les poques hores tamién ensin cargos. En xineru de 2002, Maathai tornó a la enseñanza como Profesora Convidada de Caltenimientu de Dorothy McChliskey na Escuela de Ciencia Forestal y estudios Medioambientales de la Universidá de Yale. Ellí permaneció hasta xunu 2002 impartiendo un cursu sobre desenvolvimientu sostenible centráu nel trabayu de la Cinturón Verde.

Eleición al Parllamentu

Al so regresu a Kenia, Maathai fizo otra campaña pa entrar al parllamentu mientres les eleiciones de 2002, esta vegada como candidata de la Coalición Nacional Arcoiris, la organización xeneral que finalmente unificó a la oposición. El 27 d'avientu de 2002, la Coalición Arcoiris ganó al partíu nel poder (Unión Nacional Africana Keniana) y Maathai ganó con un 98% de los votos nel distritu eleutoral de Tetu. En xineru de 2003, foi nomada ayudante del ministru de Mediu Ambiente y Recursos Naturales, cargu qu'exerció hasta payares 2005. Fundó en 2003 el Partíu Verde Mazingira de Kenia, pa dexar los candidatos dir nuna plataforma de caltenimientu encarnáu pol Movimientu Cinturón Verde. El partíu ye miembru de la Federación de Partíos Verdes d'África y de los Verdes Globales.

Premiu Nobel de la Paz 2004

Wangari Maathai foi condecorada col Premiu Nobel de la Paz de 2004 pola so "contribución al desenvolvimientu sostenible, la democracia y la paz". Recibió la llamada d'Ole Danbolt Mjos, presidente del Comité Noruegu Nobel, el 8 d'ochobre informándo-y de la noticia. Convirtióse na primer muyer africana y la primer ambientalista en ganar el premiu.

Nun taba preparada pa saber que ganara'l Premiu Nobel; entrúgome si daquién dalguna vegada lo ta. La noticia cutióme como un rayu. ¿Cómo tenía de remanalo? ¿Cómo asocediera? ¿Cómo atoparen a una persona como yo? Malpenes podía creelo. Taba claro agora porqué l'embaxador noruegu llamara. "Toi siendo informada de que gané'l Premiu Nobel de la Paz", díxime a mio mesma y a los que taben al mio alredor nel coche con una sorrisa, mientres separtaba'l celular de la mio oreya y volvía falar colos mios pasaxeros. Sabíen que nun yera una chancia porque la felicidá taba escrita per tola mio cara. Pero coles mesmes, les llárimes cayeron de los mios güeyos a les mios mexelles mientres me volvía pa velos. Ellos, tamién, sonríen agora, dellos aplaudiendo y abrazándome tantu pa confortame como pa felicitame, dexando les mios llárimes cayer nos sos costazos y escondiendo la mio cara del mio equipu, que sentíen que nun teníen de veme llorar. ¡Pero eses yeren llárimes de gran allegría y felicidá nun momentu d'estraordinaria emoción!" —Wangari Muta Maathai – Unbowed, p. 291-292.

Maathai opúnxose valientemente al réxime opresor en Kenia. Les sos formes d'aición úniques contribuyeron a llamar l'atención sobre la opresión política —nacional ya internacional. Ella sirvió d'inspiración pa munchos na llucha polos derechos democráticos y afaló especialmente a les muyeres p'ameyorar la so situación.

El Comité Noruegu del Nobel, nel comunicáu anunciando que yera la ganadora del Premiu Nobel de la Paz 2004

SIDA/VIH

El discutiniu amenóse cuando The Standard espublizó que Maathai dixera que'l SIDA/VIH fuera "creáu deliberadamente por científicos occidentales p'abrasar la población africana". Maathai negó faer les acusaciones, pero The Standard caltuvo la so versión.

Nuna entrevista en 2004 cola revista Time, en respuesta a les entrugues sobre esta tema, Maathay respondió: "Nun tengo idea de quien creó'l SIDA, y si ye una enfermedá biolóxica o non. Pero sé que coses como esa nun vienen de la lluna. Siempres pensé que ye importante dicir la verdá a la xente, pero supongo qu'hai delles verdaes que nun tienen de tar bien al descubiertu". Cuando se-y entrugó a que se refería con eso, siguió: "Toi refiriéndome al SIDA. Toi segura de que la xente sabe d'aú surdió. Y toi bastante segura de que nun surdió de los monos". En rempuesta llanzó la siguiente declaración:

Alvertí a la xente sobre les falses creencies y la desinformación, como atribuyir la enfermedá a una maldición de Dios o creer que dormir con una virxe cura la infeición. Estes creencies prevalecen na mio rexón y llevaron a un aumentu de les violaciones y la violencia escontra los neños. Ye nesti contestu, complicáu pola perspeutiva cultural y relixosa, nel que falo de cutiu. Sorprendióme l'alderique xeneráu polo que supuestamente dixi. Ye por tanto importante pa mi declarar que nin digo nin creo que'l virus fora desenvueltu por blancos o radicales blancos pa destruyir al pueblu africanu. Esos puntos de vista son malvaos y destructivos.

2005–2011

Maathai en Nairobi col Canciller d'Erariu (y dempués Primer Ministru) Gordon Brown en 2005

Maathai y l'entós Senador Norteamericanu Barack Obama en Nairobi en 2006

El 28 de marzu de 2005, Maathai foi escoyida la primer presidenta de la Xunión Económica Africana, el Conseyu Social y cultural nomar embaxadora de bona voluntá pola iniciativa llanzada pa protexer l'ecosistema forestal de la Cuenca del Congo. En 2006 foi una de les abanderaes na ceremonia d'apertura de los Xuegos Olímpicos d'Iviernu de Turín 2006. Tamién en 2006, el 21 de mayu, dióse-y un doctoráu honoríficu pola Universidá de Connecticut. Sofitó l'Añu Internacional de los Desiertos y el programa de Desertificación. En payares de 2006, lideró la campaña de les Naciones Xuníes Plantemos pal Planeta. Maathai foi una de les fundadores de la Iniciativa de les Muyeres Nobel, xunto coles tamién gallardoniaes col Nobel de la Paz Jody Williams, Shirin Ebadi, Rigoberta Menchu Tum, Betty Williams y Mairead Corrigan Maguire. Seis muyeres representando a Norteamérica y Suramérica, Europa, Oriente Mediu y África decidieron xunir les sos esperiencies nun esfuerciu conxuntu pola paz con xusticia y equidad. La meta de la Iniciativa de les Muyeres Nobel ye ayudar a fortalecer el trabayu fechu en sofitu de los derechos de les muyeres en tol mundu.

N'agostu de 2006, l'entós senador norteamericanu Barack Obama viaxó a Kenia. El so padre estudiara n'América al traviés del mesmu programa que Maathai. El senador y ella tuvieron un alcuentru y plantaron un árbol xuntos nel Parque Uhuru de Nairobi. Obama pidió que la llibertá de prensa fuera respetada, diciendo "La llibertá de prensa ye como curiar un xardín: de cutio ha de ser alimentada y cultivada. La ciudadanía tien que valorala porque ye una d'eses coses que pueden pasase si nun tamos vixilantes". Llamentó tamién les perdes económiques, señalando la negativa del Presidente George W. Bush a xunise a la Convención Marcu de les Naciones Xuníes sobre'l Cambéu Climáticu (UNFCCC) y la so subsidiaría, el Protocolu de Kioto.

Maathai foi derrotada nes eleiciones primaries del Partíu d'Unidá Nacional en payares de 2007 y escoyó faer la so candidatura nun partíu más pequeñu. Perdió nes eleiciones parllamentaries de 2007. Pidió un recuentu de votos na eleición presidencial (ganada oficialmente por Mwai Kibaki, pero disputada pola oposición) na so circunscripción, argumentando que dambos llaos tendríen de considerar la resultancia xusta y qu'había nicios de fraude.

En xunu de 2009, Maathai foi nomada una de los primeros héroes de PeaceByPeace.com Hasta la so muerte en 2011, Maathai sirvió na Xunta de Conseyu Eminente de l'Asociación de Parllamentarios Europeos con África (AWEPA).

Wangari Maathai morrió'l 25 de setiembre de 2011 por cuenta d'entueyos derivaos del cáncer d'ovariu mientres recibía tratamientu nun hospital de Nairobi.

Premiu Wangari Maathai Paladines del Monte

En 2012, l'Asociación de Collaboración en materia de Montes Archiváu 2019-06-27 en Wayback Machine ACB, un consorciu internacional de 14 organizaciones, secretariaos ya instituciones trabayando en problemes forestales internacionales, instauró'l Premiu Wangari Maathai paladines del Monte Archiváu 2018-10-18 en Wayback Machine pa honrar la so memoria.

El primer gallardoniáu foi Narayan Kaji Shrestha pola so defensa del movimientu de silvicultura en Nepal, y Kurshida Begum llogró una Mención Honorífica pol so llabor en defensa del Santuariu de Vida Montesa de Tenkaf en Banglasdesh.

En 2014 la ganadora foi Martha Isabel Pati Ruiz Corzo pol so llabor na Reserva de la Biosfera de Sierra Gorda en Méxicu, y La Mención Honorífica recayó en Chut Wutty en reconocencia a la so defensa de los montes de Camboya.

En 2015 l'activista ugandesa Gertrude Kabusimbi Kenyangi recibió'l gallardón en presencia de la fía de Maathai, Wanjira Maathai, na ceremonia que tuvo llugar mientres el XIV Congresu Forestal Mundial, en Durban, Sudáfrica.

Reconocencies post mortem

El xardín y los árboles en memoria de Wangari Maathai na Universidá de Pittsburgh

El 1 d'abril de 2013, el día en que cumpliría 73 años, Maathai foi póstumamente honrada con un Doodle de Google.

El 25 de setiembre de 2013, dedicóse-y un un pequeñu xardín na Catedral d'Aprendizaxe de la Universidá de Pittsburgh. El Xardín y los Árboles Wangari Maathai inclúin dos pládanos coloraos simbolizando'l "compromisu pol medioambiente de Maathai, la fundación del Movimientu Cinturón Verde y los sos raigaños en Kenia y Pittsburgh" y un xardín de flores en forma circular representando la so "visión global y dedicación a les muyeres y neños del mundu" con un pládanu ornamental nel centru señalando "cómo una pequeña grana puede camudar al mundu".

En 2014, na que fuera la so xunta de 50 años colos sos compañeros de Mount St. Scholastica y la Universidá Benedictine, afayóse una estatua nel so honor nel campus Atchinson en Kansas.

Publicaciones escoyíes

• (2004) Lantern Books: The Green Belt Movement: Sharing the Approach and the Experience. ISBN 978-1-59056-040-2.; (1985)
• The bottom is heavy too: even with the Green Belt Movement : the Fifth Edinburgh Medal Address (1994)
• Bottle-necks of development in Africa (1995)
• The Canopy of Hope: My Life Campaigning for Africa, Women, and the Environment (2002)
• Unbowed: A Memoir (2006) ISBN 9780307492333
• Reclaiming rights and resources women, poverty and environment (2007)
• Rainwater Harvesting (2008)
• State of the world's minorities 2008: events of 2007 (2008)
• (2010) Anchor Books: The Challenge for Africa. ISBN 978-0-307-39028-8.; (2009)
• Moral Ground: Ethical Action for a Planet in Peril. (2010) chapter Nelson, Michael P. and Kathleen Dean Moore (eds.). Trinity University Press, ISBN 978-1-59534-066-5
• Replenishing the Earth (2010) ISBN 978-0-307-59114-2

Reconocencies

• 1984: Premiu al Sustentu Bien Ganáu
• 1986: Sociedá Meyor Mundu
• 1987: Cuadru d'Honor Global 500

• 1991: Premiu Goldman pal Mediu Ambiente
• 1991: Premiu Lideralgu Africanu del Proyeutu pa la Fame
• 1993: Medaya Edimburgu (por "Escepcional contribución a la Humanidá al traviés de la Ciencia")
• 1993: Premiu Jane Addams de Lideralgu
• 1993: Medaya Offeramus del Colexu Universitariu Benedictine

• 1994: Premiu Arca d'Oru
• 2001: El Premiu Juliet Hollister

• 2003: Premiu Ambiente Global, Asociación Mundial d'Organizaciones Non Gubernamentales
• 2004: Premiu Científicu Conservador de la Universidá de Columbia
• 2004: Premiu J. Sterling Morton
• 2004: Premiu Petra Kelly
• 2004: Premiu Sophie
• 2004: Premiu Nobel de la Paz
• 2006: Légion d'honneur
• 2006: Doctor de Serviciu Públicu (Grau honorariu), de Pittsburgh
• 2007: Premiu Ciudadanu del Mundu
• 2007: Medaya Livingstone de la Real Sociedá Xeográfica Escocesa.

• 2007: Premiu Indira Gandhi
• 2007: Cruz de la Orde de San. Benedict
• 2008: Premiu Elizabeth Blackwell de los Colexos Hobart y William Smith
• 2009: Premiu Imaxe NAACP- Premiu Presidente de Conseyu (con Al Gore)
• 2009: Grand Cordon de la Orde del Sol Naciente de Xapón
• 2011: Medaya del Canciller Nichols de la Universidá Vanderbilt

Ver tamién

• Furoshiki
• Mottainai
• Muyeres ganadores del Premiu Nobel

Referencies

• Wangari Maathai, Unbowed: A Memoir, Knopf, 2006. ISBN 0-307-26348-7
• Wangari Maathai, The Greenbelt Movement: Sharing the Approach and the Experience, Lantern Books, 2003. ISBN 1-59056-040-X
• Wangari Maathai, The Canopy of Hope: My Life Campaigning for Africa, Women, and the Environment, Lantern Books, 2002. ISBN 1-59056-002-7
• Wangari Maathai, Bottom is Heavy Too: Edinburgh Medal Lecture, Edinburgh UP, 1994. ISBN 0-7486-0518-5
• Picture book (fr.), Franck Prévot (text) & Aurélia Fronty (illustrations), Wangari Maathai, la femme qui plante des millions d'arbres, Rue du monde, 2011 (ISBN 978-2-35504-158-7)

Enllaces esternos

• Wikiquote tien frases célebres suyes o que faen referencia a Wangari Maathai.

• Wikimedia Commons tien conteníu multimedia tocante a Wangari Maathai.
• Maathai Nobel Prize lecture
• Video entrevista con Dra Wangari Muta Maathai en Poznan, Polonia, dieciembre 2008
• Wangari Maathai presents a talk as a part of the Architecture and Climate Change lecture series held by the Royal Institute of British Architects
• Audiu: Wangari Maathai in conversation on the BBC World Service discussion programme The Forum
• Video: Wangari Maathai tells the story of the Hummingbird Archiváu 2014-02-15 en Wayback Machine
• Wangari Maathai — Planting the Future Archiváu 2016-04-07 en Wayback Machine, On Being, 29 September 2011
• Obres de, o tocante a, Wangari Maathai en biblioteques (catálogu WorldCat)
• Taking Root: The Vision of Wangari Maathai documentary filme
• Official Site: The Green Belt Movement and Wangari Maathai
• Wangari Maathai and the Billion Tree Campaign Archiváu 2009-07-07 en Portuguese Web Archive
• Feature on Wangari Maathai by the International Museum of Women
• The Lantern Books Blogue: Lantern and Wangari Maathai (Video)
• Seeds of change planting a path to peace Archiváu 2021-02-25 en Wayback Machine
• [http://www.nobelwomensinitiative.org Nobel Women's Initiative
• Wangari Maathai - Páxina de los Premios Nobel.
• Wangari Maathai - Páxina de la UNESCO Wangari Muta Maathai: El Viveru de la Democracia.
• I Certame de Rellatos `Wangari Maathai´ (enllaz rotu disponible n'Internet Archive; ver l'historial y la última versión).

• Datos: Q46795
• Multimedia: Wangari Maathai
• Cites famoses: Wangari Maathai