Antilles Menores

Antilles Menores
Situación
Tipu	archipiélagu
Asitiáu en	Océanu Atlánticu
Coordenaes	14°13′59″N 61°21′00″O
Antilles Menores Antilles Menores (Tierra)
Datos
Altitú media	1467 m
Superficie	14 364 km²

Les Antilles Menores (n'español, Antillas Menores; en francés, Petites Antilles; en papiamentu, Antias Menor; y en neerlandés Kleine Antillen) son un grupu d'islles allugaes nel mar Caribe. Les islles formen parte d'un llargu arcu d'islles volcániques, la mayoría de los cuales atópase alredor de la parte oriental desi mar, na so llende col océanu Atlánticu, al este de Puertu Ricu; les otres asítiense na fastera sureste d'esi mesmu mar, xusto al norte d'América del Sur, frente a la mariña occidental de Venezuela. Les Antilles Menores más o menos coinciden col cantu esterior de la Placa del Caribe, y munches de les islles formáronse como resultáu de la subducción producida cuando una o más plaques del Atlánticu esmuciéronse perbaxu de la placa del Caribe. Les Antilles Menores, xunto coles Antilles Mayores, formen la unidá xeográfica nomada Les Antilles. Estes, xunto col archipiélagu de les Lucayes (Les Bahames), formen la unidá xeográfica conocida como Indies Occidentales.

Historia tres de la llegada de los europeos

Los españoles foron los primeros europeos n'aportar a estes islles. En 1493 Cristóbalo Colón, nel so segundu viaxe, aportó a esta fastera del mar Caribe, y navegó per ella, descubriendo delles isles del archipiélagu de les Antilles Menores: nomó Deseada a la primera d'elles nes que tomó tierra. Llueu los españoles reclamaron pa sigo la islla de Dominica, y tomaron posesión d'ella, a la que nomaron Marigalante. Dempués colaron, fondiando a la vera la islla que llamaron Guadalupe. Finalmente, visitaron Montserrat, Antigua y San Cristóbal, p'acabar el viaxe cruzando l'archipiélagu que nomaron de les Once Mil Vírxenes.

Nos sieglos vinientes, españoles, franceses, daneses, neerlandeses ya ingleses habríen lluchar pola posesión de delles de les isles.

Martinica fora cartografiada por Colón en 1493, pero los españoles nun teníen interés n'ella. Pierre Belain d'Esnambuc, un comerciante y aventureru francés, llegara al Caribe en 1625 cola intención de fundar un asentamientu francés na islla de San Cristóbal. Foi nomáu gobernador de la islla, pero foi espulsáu d'ella polos ingleses en 1635 y coló pa Martinica. Desembarcó nel puertu de San Pedru con 80-150 colonos, reclamó la islla pal rei francés Lluis XIII y la Compañía de les Islles d'América (Compagnie des Îles de l'Amérique) y fundó l'asentamientu de Saint-Pierre.

Castiellu colonial español na islla de Margarita (Nueva Esparta, Venezuela).

La islla de Margarita, anguaño parte de Venezuela, foi descubierta el 15 d'agostu de 1498, nel tercer viaxe de Colón, xunto coles actuales islles de Coche y Cubagua. Les trés formen l'estáu Nueva Esparta, mentantu que les otres islles ya isllotes de la costa caribeña de Venezuela formen les Dependencies Federales de Venezuela.

Los españoles crearon nel sieglu XVI la provincia de Trinidad, con capital en San Xosé d'Oruña, na islla homónima. Sicasí, demientres les guerres napoleóniques, en febreru de 1797, soldaos ingleses desembarcaron nel territoriu, ocupándolu. El tratáu d'Amiens (1802) dio naturaleza llegal a la ocupación, una y bones tresfirió la soberanía del archipiélagu al Reinu Xuníu.

En 1917 los Estaos Xuníos compraron les islles Vírxenes daneses, que pasaron a ser les islles Vírxenes Americanes. Y más sero la mayoría de les colonies britániques convirtiéronse n'estaos independientes. No que cinca a les Antilles Neerlandeses, que yeren un país constituyente del Reinu de los Países Baxos, entamaron a disolvese en 1986, cuando Aruba formó'l so propiu estáu, miembru constituyente del reinu citáu, y dexaron d'esistir como entidá única en 2010, cuando los territorios que les integraren formaron unidaes estatales que caltienen estremaos tipos de rellación institucional cola antigua metrópolis.

No que cinca a les colonies franceses, hai dos departamentos franceses d'ultramar: Guadalupe y Martinica. San Martín y Saint-Barhélemy, que pertenecíen al departamentu de Guadalupe, decidieron, nún referéndum cellebráu en 2003, dixebrase d'elli. Actualmente tienen l'estatus xurídicu de coleutividaes d'ultramar.

Xeografía

Les islles de les Antilles Menores divídense en dos grupos: les islles de Barloventu y les islles de Sotaventu. Esiste una importante diferencia, según l'ámbitu llingüisticu de caúna de les potencies europees que colonizaran la zona, na considerancia de cuáles islles pertenecen al grupu de Barloventu o Sotaventu.

Idiomes	Islles de Barloventu	Islles de Sotaventu
Inglés	Windward Islands	Leeward Islands
Español, francés y neerlandés	Îles du Vent- islles de Barloventu	Îles Sous-le-Vent-islles de Sotaventu

La estensión total de tierra non sumerxida de la rexón ye de 14.364 km2, y la población total rondaba, en 2006, los 4 millones d'habitantes. El país más pobláu ye Trinidá y Tobagu (1.367.558 habitantes según la estimación de 2021. El picu más altu ye La Soufrière (1467 m) asitiáu na islla de Basse-Terre, nel archipiélagu de Guadalupe, y la fuexa oceánica más fonda (8800 m) ye la fuexa de Puertu Ricu, asitiada nel océanu Atlánticu, a lo llargo de les Islles Vírxenes Americanes

Xeoloxía

Estremu meridional de Martinica.

Les Antilles Menores coinciden más o menos col cantu esterior de la placa del Caribe. Munches de les islles formáronse como resultáu de la subducción de la corteza oceánica del Atlánticu perbaxu de la placa del Caribe, na conocida como zona de subducción de les Antilles Menores. El procesu ta en marcha, y ye responsable de l'actividá sísmica y volcánica de la rexón. Les islles asitiaes a lo llargo la costa suramericana son, en xeneral, el resultáu de la interacción de la placa sudamericana y la placa del Caribe, un procesu principalmente eslizante pero qu'inclúi un componente de compresión.

Xeolóxicamente, l'arcu insular de les Antilles Menores estiéndese dende Granada, al sur, hasta Anguila, al norte. Les islles Vírxenes y la islla Sombrero formen parte, xeolóxicamente, de les Antilles Mayores, mentantu que Trinidá ye parte d'América del Sur y Tobagu ye un restu d'un arcu insular diferente. Les islles más averaes a Venezuela formen otru arcu más, estremáu de los anteriores, que ta averándose a América del Sur.

Clima

El clima tropical templáu ye agradablemente templáu polos vientos alisios más o menos constantes mientres tol añu. Estos vientos son solo atayaos por delles nubes sobre l'océanu Atlánticu. Nel interior, el clima ye llixeramente más caliente, y esfrezse, cola altitú, y a midida que aumenta'l mugor tamién.

Sicasí estrémense dos tipos d'estaciones:

• La temporada frío y seco (avientu a xunu), periodu conocíu como la Cuaresma.
• La húmeda y caliente (xunu-avientu) llamada temporada de furacanes.

Xeografía política

Les Antilles Menores divídense en ocho naciones independientes y numberosos estaos dependientes y non soberanos (que tán asociaos políticamente col Reinu Xuníu, Francia, Paises Baxos y los Estaos Xuníos). Alredor de la tercera parte de la población del archipiélagu viven en Trinidá y Tobagu, un estáu soberanu allugáu nes islles de Sotaventu.

Pigeon Point (Trinidá y Tobagu).

Estaos soberanos

Nome	Sodivisiones alministratives	Área (km²)	Población estimada (1 de xunetu de 2005)	Densidá de población (hab/km²)	Capital
Antigua y Barbuda	Antigua	440	85.632	195	San Xuan
	Barbuda	161	1.370	9,65	Codrington
	Redonda	2	0	0	---------------
Barbados		431	284.589	660	Bridgetown
Dominica		754	72.660	96,3	Roseau
Grenada		344	110.000	319,8	San Xurde
Saint Kitts y Nevis	Saint Kitts	261	42.696	163,5	Basseterre
	Nevis	93	12.106	130,1	Charlestown
Saint Lucia		616	173.765	282	Castries
San Vicente y les Granadines		389	110.000	283	Kingstown
Trinidá y Tobagu	Trinidá	5.131	1.405.953	253,3	Port of Spain
	Tobagu	300	60.000	180	Scarborough
Total		8367	2 179 295	260.5

Playa na islla de Saint-Barthélemy.

Estaos non soberanos y territorios

Nome	Estáu al que pertenecen	Área (km²)	Población estimada (1 de xunetu de 2005)	Densidá de población (hab/km²)	Capital
Aruba	Países Baxos	193	103.065	534,0	Oranxestad
Anguila	Reinu Xuníu	91	13.600	149,4	The Valley
Bonaire	Países Baxos	288	14.006	48,6	Kralendijk
Islles Vírxenes Britániques	Reinu Xuníu	153	27.000	176,5	Road Town
Curaçao	Países Baxos	444	180.592	406,7	Willemstad
Guadalupe	Francia	1.780	440.000	247,2	Basse-Terre
Martinica	Francia	1.128	400.000	354,6	Fort-de-France
Montserrat	Reinu Xuníu	120	4.655	38,8	Brades
Saba	Países Baxos	13	1.424	109,5	The Bottom
Saint-Barthélemy	Francia	21	7.448	354,6	Gustavia
San Martín	Francia	53	35.000	660,4	Marigot
San Eustaquiu	Países Baxos	34	3.100	91,2	Oranxestad
Sint Maarten	Países Baxos	34	40.917	1,203,4	Philipsburg
Islles Vírxenes Españoles (Puertu Ricu)	Estaos Xuníos	165,1	11.119	67,35	Culebra
Islles Vírxenes Americanes	Estaos Xuníos	346	108.448	313,4	Carlota Amalia
Nueva Esparta	Venezuela	1.150	491.610	427,5	La Asunción
Dependencies Federales de Venezuela	Venezuela	342	2.155	6,3	Gran Roque
Total		5997	1 769 955	320.1

Referencies

• Datos: Q93259
• Multimedia: Lesser Antilles