San Vicente y les Granadines

De Wikipedia
(Redirixío dende San Vicente y Les Granadines)
Saltar a navegación Saltar a la gueta


San Vicente y les Granadines
Saint Vincent and the Grenadines
Flag of Saint Vincent and the Grenadines.svg Coat of arms of Saint Vincent and the Grenadines.svg
Bandera de San Vicente y les Granadines Escudu de San Vicente y les Granadines
Himnu nacional Saint Vincent Land so Beautiful
Alministración
Nome oficial Saint Vincent and the Grenadines
Capital Kingstown
Forma de gobiernu Monarquía constitucional y parlamentu
Monarca de San Vicente y les Granadines Sabela II del Reinu Xuníu
Primer Ministru de San Vicente y les Granadines Ralph Gonsalves
Llingües oficiales inglés
División
Xeografía
Coordenaes 13°10′00″N 61°14′00″O / 13.166666666667°N 61.233333333333°O / 13.166666666667; -61.233333333333Coordenaes: 13°10′00″N 61°14′00″O / 13.166666666667°N 61.233333333333°O / 13.166666666667; -61.233333333333
VCT orthographic.svg
Superficie 389 km² (puestu 206)
Costes 84 km
Llendes 0 km
Llenda con Venezuela
Puntu más altu La Soufrière Traducir
Puntu más baxu Mar Caribe
Demografia
Población 109 373 hab. (2013)
Densidá 281,16 hab/km²
Xentiliciu de San Vicente y les Granadines
Economía
Moneda Dólar del Caribe Oriental
PIB nominal 789 629 629,62963 (2017)
PIB per cápita 7145 (2017)
Más información
Dominiu d'Internet .vc
Códigu telefónicu +1784
Códigu ISO 670 / VCT / VC
Estaya horaria UTC−04:00
www.gov.vc
Cambiar los datos en Wikidata

San Vicente y les Granadines[1] (de nome oficial Saint Vincent and the Grenadines) ye un país isleñu na cadena de les Antilles Menores del mar Caribe. Asítiase na fastera meridional de les islles de Barlovento, nel estremu meridional del borde oriental del mar Caribe, aú esti s'axunta col océanu Atlánticu.

Los sos 389 km² d'estensión repártense ente la islla de Saint Vincent, la principal del país, y les dos terceras partes más septentrionales del archipiélagu de les Granadines, una cadena de 32 islles ya isllotes. Dellos tán habitaos: Bequia, Mustique, Union Island, Canouan, Palm Island, Mayreau y Young Island. Les Granadines ensin población estable son, ente más otres, Tobago Cays, Petit Saint Vincent, Baliceaux, Bettowia, Quatre, Petite Mustique, Savan y Petit Nevis.

Artículu revisáu

El país ta arrodiáu al norte por Santa Llucía, al este por Barbados y al sur por Granada. Tien, según la prospección de les Naciones Xuníes pa 2017, una población de 109.642 habitantes, que fain d'elli un país con una densidá de población (más de 300 hab/km²) elevada. La so capital, y principal puertu, ye Kingstown. Antigua colonia británica, forma parte de la Mancomunidá Británica de Naciones, l'Alianza Bolivariana pa los Pueblos de La nuesa América, la Organización de los Estaos del Caribe Oriental, la Comunidá d'Estaos Llatinoamericanos y Caribeños y la CARICOM.

Etimoloxía[editar | editar la fonte]

Cristóbalo Colón, el primer européu n'aportar a la islla, púnxo-y el so nome n'honor de San Vicente de Huesca, que yera'l santu del día nel que la descubrió (22 de xineru de 1498).[2]

Historia[editar | editar la fonte]

Periodu precolonial[editar | editar la fonte]

Nun hebo asentamientu européu inmediatamente dempués del descubrimientu de la islla de San Vicente. Primero de qu'estos, y los esclavos africanos que traxeron pa trabayar, aportaran al país, dellos grupos amerindios asentáronse nel archipiélagu: ciboney, arahuacos, caribes[2]... L'actual islla de San Vicente fue conocida como Youloumain pol grupo de caribes autodenomaos kalina o carina.

La llegada de los europeos. L'entamu de la dómina colonial[editar | editar la fonte]

Dende'l descubrimientu de la islla hasta 1719 los caribes que l'habitaban defendiéronla con ésitu de los intentos d'asentamientu européu. Nesi intre formose na islla una comunidá afrocaribeña, una y bones esclavos africanos afuxíos d'otres islles o sobrevivientes de naufraxos acabaron habitándola: eran los nomaos caribes prietos o garifuna[3].

La colonización francesa y británica. La Primera Guerra Caribe[editar | editar la fonte]

Dellos intentos de británicos y holandeses d'ocupar la islla y reclamala pa sigo fallaron, y sedríen los franceses los primeros capaces de colonizar la islla, fundando l'asentamientu de Barrouallie en 1719[3]. Con ellos traxeron esclavos africanos pa trabayar nes plantaciones de zucre, café, índigo, tabaco, algodón y cacáu[4].

Demientres la Guerra de los Siete Años los británicos capturaron la islla y espulsaron a los franceses de Barrouallie; la so conquista de la islla foi confirmada pol tratáu de París de 1763[3]. Fundaron Fort Charlotte, y traxeron, como los franceses, los sos propios esclavos africanos. Los caribes, sicasí, opunxéronse con fuercia a la presencia británica y rebeláronse escontra ellos: foi la Primer Guerra Caribe (1772-1773)[3].

Demientres la Guerra Anglofrancesa, en 1779, los franceses reconquistaron la islla, pero les cláusules del tratáu de Versalles de 1783 devolvieron la islla a la soberanía británica[2][3].

La colonización británica. La Segunda Guerra Caribe[editar | editar la fonte]

La paz ente británicos y caribes franciose otra vuelta y, ente 1795 y 1796, tuvo llugar la Segunda Guerra Caribe[3]. Los caribes taben dirixíos pol garifuna Joseph Chatoyer, y foron sofitaos polos franceses de la Martinica. La revuelta foi finalmente resuelta pol xeneral británicu Sir Ralph Abercromby, y firmose un tratáu de paz pol que cuasi 5.000 caribes negros, foron esiliaos en Roatán, una islla frente a la costa d'Hondures, y a la islla de Baliceaux, nes Granadines[2].

Volcán de La Soufrière, na islla de San Vicente. Les sos erupciones periódiques causaron estrozos importantes a lo llargo de la historia contemporánea del país.

El sieglu XIX entamó cola finalización, en 1806, de la construcción de Fort Charlotte, y cola violenta erupción, en 1812, del volcán La Soufrière[5]. La esclavitú foi abolida en toes les Indies Occidentales Britániques, a les que pertenecía San Vicente, en 1834, añu nel qu'entamó un periodu de transición hasta 1838[2]. La lliberación definitiva de los esclavos esi últimu añu provocó una falta de trabayadores que foi suplida pola llegada de trabayadores inmigrantes, portugueses de la islla de Madeira a finales de la década de 1840 ya indios ente 1861 y 1888[3]. Les condiciones de trabayu siguieron siendo abegoses, neto pa los antiguos esclavos que pa los nuevos trabayadores agrícoles, porque la baxada del preciu del zucre nel mercáu mundial caltuvo estancada la economía de la islla hasta final del sieglu. Nesi contestu munchos propietarios abandonaron les sos propiedaes y dexaron la tierra pa que fora cultivada polos esclavos lliberaos.

El rei Jaja, de los opobo de Nixeria, foi esiliáu a la islla tres de ser arrestáu en 1887 polos británicos por unviar cargamentos d'aceite de palma directamente a Liverpool ensin la intermediación, obligatoria, de la Royal Niger Company.


Sieglu XX[editar | editar la fonte]

El volcán La Soufrière volvió entrar n'erupción en 1902, causando ente 1.500-2.000 muertos, estrozando muncha tierra agrícola y afectando seriamente a la economía insular[2][5].

San Vicente y les Granadines camudaron d'estatus delles vegaes embaxu'l dominiu británicu. En 1776 estos autorizaron la creación d'una asamblea representativa; el territoriu convirtiose nuna colonia de la corona en 1877, concedióse-y en 1925 la creación d'un conseyu llexislativu con poderes limitaos, y en 1951 estableciose'l sufraxu universal[3]. Demientres esti periodu, amás, los británicos tentaron de xunir la islla con otres del archipiélagu de les islles de Barlovento nuna entidá única, col envis de facér más cenciellu el control de les sos posesiones caribeñes al traviés d'una alministración única[3]. El intentu más seriu fízose na década de 1960; al entamu d'esta formose la Federación de les Indies Occidentales, que nun duró más que hasta 1962[3].

En 1969, el 27 d'ochobre, concedióse-y al país l'estatus d'estáu asociáu a Gran Bretaña, con un control completu sobre los sos asuntos internos[3]. N'abril de 1979 La Soufrière entró una vegada más n'erupción, y magar que nun causó muertos volvió a afectar seriamente a les esplotaciones agrícoles[5]. El 27 d'ochobre de 1979 San Vicente y les Granadines convirtiéronse nes caberes de les islles de Barlovento n'obtener la independencia[2]. El recién creáu estáu decidió remanecer, na Mancomunidá Británica de Naciones, de forma que la reina d'Inglaterra, representada por un gobernador xeneral, caltién la xefatura del estáu.

Dómina post-independencia[editar | editar la fonte]

James Mitchell, primer ministru del país ente 1984 y 2000.

Milton Cato, del Partíu Llaborista de San Vicente (Saint Vincent Labour Party, SVLP), de centru-izquierda, foi el primer primer ministru del país, y permaneció nel cargu hasta la so derrota, nes eleiciones xenerales de 1984, a manes de James Fitz-Alllen Mitchell, del Nuevu Partíu Democráticu (New Democratic Party, NDP), de centru-derecha[3]. Demientres el mandatu de Cato, n'avientu de 1979, hebo una rebelión na islla Union, dirixida por Lennox Charles. Inspirándose na reciente revolución en Granada, Charles llevantose escontra'l gobiernu denunciando el so abandonu de la islla. La revuelta foi rápidamente controlada, y Charles unviáu a prisión[6]. A primeros de la década de 1980 hebo tamién una fola de fuelgues[2].

James Mitchell foi primer ministru hasta l'añu 2000, ganando tres eleiciones consecutives[3], y nel so mandatu puxó delles vegaes pa llograr una mayor integración rexonal de les islles de Barlovento. En 1980 y 1987 dos furacanes dañaron munches plantaciones de bananes y cocos, y el furacán Lenny, en 1999, causó estrozos importantes na fastera occidental de la islla.

Nel añu 2000, tres la decisión de Mitchell de retirase, el so socesor al frente del NDP, Arnhim Eustace, convirtiose'n primer ministru, cargu del que foi apartáu nes eleiciones de 2001 por Ralph Gonsalves, del Partíu Llaborista de Xunidá, socesor del SVLP[3]. Gonsalves, conocíu como "Camarada Ralph" poles sos idees izquierdistes, tien criticao la política d'Estaos Xuníos escontra Venezuela[7] y Cuba[8], y considera que les naciones europees habíen de pagá-yos reparaciones a les naciones caribeñes pol so papel nel mercáu d'esclavos[9]. El 25 de payares de 2009 el gobiernu convocó a los ciudadanos pa qu'aprobaran en referéndum una nueva constitución. Esta proponía convertir al país nuna república, sustituyendo a la reina d'Inglaterra por un presidente ensin poderes executivos como xefe del estáu, y taba sofitada por Gonsalves. La so aprobación necesitaba de l'aprobación de dos tercios de los votantes, y al nun consiguise esi resultáu la propuesta nun entró en vigor[10].

Xeografía[editar | editar la fonte]

San Vicente y les Granadines asítiase al oeste de Barbados, al sur de Santa Llucía y al norte de Granada, nes islles de Barlovento de les Antilles Menores, un arcu insular del mar Caribe. El país compriende la islla de San Vicente, con 344 km² d'estensión, y les dos terceras partes más septentrionales del archipiélagu de les Granadines, una cadena de 32 islles, isllotes y cayos que tienen una estensión conxunta de 45 km2. Ocho d'estes (Young Island, Bequia, Mustique, Canouan, Union Island, Mayreau, Petit St Vincent y Palm Island) tienen población; d'ente les deshabitaes rescamplen Petit Nevis, usada por balleneros, y Petit Mustique, que foi el centru d'una importante estafa urbanística a entamos de la década de 1990.

La capital del país ye Kingstown, asitiada na islla de San Vicente[11]. Esta mide 26 km de llargor y 15 km d'anchor, con un área total de 344 km2. Les 32 islles granadines que pertenecen al país espárdense nuna distancia, del puntu más septentrional d'elles al más meridional, de 60,4 km, y tienen una estensión conxunta de 45 km2.

La islla de San Vicente, volcánica, ta cubierta de viesques, y hai perpocu terrenu llanu nella[11]. La costa oriental ye pindia y rocosa, concentrándose les playes y badeas na occidental. El picu más altu de la islla ye'l volcán de La Soufrière, de 1.234 m d'altor[11]. Otres montañes importantes, de norte a sur, son el picu Richmond, el monte Brisbane, el monte Colonarie, el Grand Bonhomme, el Petit Bonhomme y el monte Saint Andrew.

Gobiernu y política[editar | editar la fonte]

Ralph Goncalves, primer ministru de San Vicente y les Granadines dende 2001.

San Vicente y les Granadines ye una democracia parllamentaria y una monarquía constitucional, con Sabela II d'Inglaterra como reina. Esta nun reside nes islles, y ye representada nella pol gobernador xeneral. La so oficina tien funciones principalmente ceremoniales, qu´inclúin l'apertura de la llexislatura nel parlamentu y el nomamientu de varios cargos del gobiernu. El control del gobiernu, y el so exerciciu efectivu, ta en manes del primer ministru y el so gabinete. El primer ministru ye (en 2019) Ralph Goncalves, que xubió al cargu en 2001 como candidatu del Partíu Llaborista de Xunidá.

El poder llexislativu tienlu l'Asamblea de San Vicente y les Granadines, un parllamentu unicameral formáu por 21 miembros, 15 que representen distritos xeográficos y seis designaos, que son conocíos como senadores. Les eleiciones llexislatives cellébrense cada cinco años, magar qu'el primer ministru puede convocalas cuando quiera. El poder xudicial compónese de tribunales de distritu, con la Suprema Corte del Caribe Oriental como tribunal supremu y el Conseyu Priváu (Privy Council) de Londres como tribunal d'última instancia.

Los dos partíos políticos con representación parllamentaria son el Nuevu Partíu Democráticu y el Partíu Llaborista de Xunidá. El cabezaleru del partíu menos votáu de los dos ye'l xefe de la oposición; el actual (2019) ye Godwin Friday. No que cinca al exércitu, el país nun tiene talo. La so policía tien una unidá especial, y hai una milicia qu'apoya a la policía si ye necesario.

Organización territorial[editar | editar la fonte]

Mapa políticu de San Vicente y les Granadines.

Alministrativamente, San Vicente y les Granadines ta dixebráu en seis parroquies, tando cinco en San Vicente, y formando les islles de les Granadines la sexta.

  1. Carlota (Parish of Charlotte)
  2. San Andrés (Parish of Saint Andrew)
  3. San David (Parish of Saint David)
  4. San Jorge (Parish of Saint George)
  5. San Patriciu (Parish of Saint Patrick)
  6. Granadines (Parish of the Grenadines)


Economía[editar | editar la fonte]

La agricultura, na que rescampla la producción de banana, ye'l sector más importante de la economía del país. Síguelu n'importancia el sector servicios, basáu principalmente nel turismu. El gobiernu fracasó relativamente nos sos intentos pa traer pal país nuevas industrias, de forma qu'el paru ye altu: 19,8% en 1991 y 15% en 2001[11]. El principal pilancu al desarrollu económicu del país ye la so dependencia continuada d'un únicu cultivu, porque les tormentes tropicales estropien munchos años una parte importante de les bananes producíes.

Hai un sector manufactureru pequeñu, y tamién un garapiellu d'empreses financieres qu'aprovechen les lleis de secretu bancariu del país pa ofrecer servicios de intermediación financiera. Los nativos de Bequia, amás, tienen permisu pa cazar cuatru ballenes añalmente dientru de les cuotes de subsistencia pactaes na Organización Ballenera Internacional.

El turismo, pela so banda, tien un potencial de desarrollu considerable. La medría nel númberu de visitantes, favorecida pola filmación de la serie de películes Pirates del Caribe na islla, tien estimulao los sectores de la construcción y los servicios turísticos. Ente estos podemos citar el nuevu aeropuertu internacional del país, Argyle, abiertu al tráficu aéreu el 14 de febreru de 2017[12].

Demografía y cultura[editar | editar la fonte]

La población del país estímase, en 2019, en unos 111.000 habitantes[13]. El 66% d'ellos son d'ascendencia africana,un 6% d'ascendencia india, un 4% europea (principalmente portugueses), un 2% son nativos caribes y el restu de la población ye mestizo[11]. Hai tamién una población creciente d'orixe chinu.

El inglés ye l'idioma oficial, magar que la mayoría de la población fala criollo de San Vicente[14]. El inglés úsase na educación, el gobiernu, los ritos relixosos y otres estayes formales, mentantu qu'el criollu (el dialectu, como dicen los nativos) predomina nes situaciones informales

No que cinca a la relixón, el 81,5% de la población definíase como cristiana nel censu de 2001. D'ellos el grupu más numberosu ye'l de los anglicanos, con un 17,8% de la población, siguíu pol de los pentecostales (17,6%). Son metodistes el 10,9% de los habitantes del país, adventistes un 10,2%, baptistes un 10% y católicos un 7,5%. Ente los grupos non cristianos destaquen los rastafaris (1,5%) de la población, y pequeñes minoríes hinduistes y musulmanes[15].

Referencies[editar | editar la fonte]

  1. Academia de la Llingua Asturiana (2010). Cartafueyos Normativos. Nomes de los países del mundu y de les sos capitales y xentilicios. ISBN 987-84-8168-500-8.
  2. 2,0 2,1 2,2 2,3 2,4 2,5 2,6 2,7 Historia de St. Vincent and the Grenadines, na web de The Commonwealth.
  3. 3,00 3,01 3,02 3,03 3,04 3,05 3,06 3,07 3,08 3,09 3,10 3,11 3,12 3,13 Entrada St. Vincent and the Granadines na web de la Enciclopedia Británica.
  4. St. Vincent timeline, na web svgancestry.com
  5. 5,0 5,1 5,2 Pyle D, A volcanic retrospective: eruptions of the Soufrière, St. Vincent. Blog de The European Geosciences Union.
  6. St. Vincent Surppresses Short‐Lived Rebellion On Isle in Grenadines. Artículu de The New York Times (9 d'avientu de 1979).
  7. R. Goncalves criticises Trump's failed bid to isolate Venezuela. Artículu na web TeleSur English (25 de marzu de 2019).
  8. PM Ralph Goncalves highlights Cuba's role in Caribbean integration. Artículu del periódicu dixital periodico26.cu (6 de xunetu de 2018).
  9. Caribbean nations consider push for slavery reparations. Reuters, 6 de marzu de 2014.
  10. Constitutional reform referendum defeated in St. Vincent & the Grenadines. Artículu na web antillean.org, 26 de payares de 2009.
  11. 11,0 11,1 11,2 11,3 11,4 Saint Vincent, na web del CIA World Factbook.
  12. Argyle International Airport to open February 14. Artículu de The Daily Observer, 29 d'avientu de 2016.
  13. World Population Prospects 2019, na web de la División de Población de les Naciones Xuníes.
  14. Vincentian Creole English, na web ethnologue.com.
  15. St. Vincent and the Granadines Population and Housing Census Report 2001.

Enllaces esternos[editar | editar la fonte]


Países d'América
Antigua y Barbuda | Arxentina | Les Bahames | Barbados | Belize | Bolivia | Brasil | Canadá | Chile | Colombia | Costa Rica | Cuba | Dominica | República Dominicana | Ecuador | Estaos Xuníos d'América | Granada | Guatemala | Guyana | Haití | Hondures | Méxicu | Nicaragua | Panamá | Paraguái | Perú | El Salvador | Saint Kitts y Nevis | Saint Lucia | San Vicente y les Granadines | Surinam | Trinidad y Tobago | Uruguái | Venezuela | Xamaica

Dependencies: Anguilla | Les Bermudes | Islles Caimán | Clipperton | Guadalupe | Guyana Francesa | Groenlandia | Islles Malvines | Islles Turques y Caicos | Montserrat | Martinica | Puertu Ricu | Shag Rocks | Xeorxa del Sur y Sandwich del Sur