Pieris brassicae

De Wikipedia
Saltar a navegación Saltar a la gueta
Commons-emblem-notice.svg
 
Caparina de la col
Large white spread wings.jpg
Clasificación científica
Reinu: Animalia
Filu: Arthropoda
Clas: Insecta
Orde: Lepidoptera
Suborde: Glossata
Infraorde: Heteroneura
División: Ditrysia
Seición: Rhopalocera
Familia: Pieridae
Xéneru: Pieris
Especie: P. brassicae
(Linnaeus, 1758)
[editar datos en Wikidata]

Pieris brassicae, caparina de la col o blanca de la col, ye una especie de lepidópteru ditrisio de la familia Pieridae, y foi descrita por Carlos Linneo en 1758.[1] La canesba  alimentase de fueyes de plantes de la familia Brassicaceae o crucíferas, especialmente de la col, llegando a constituyir una plaga pa los cultivos. Ye frecuente confundila cola caparina menor de la col (P. rapae), yá que tantu'l so aspeutu como los sos vezos son bien similares.[2][3]

La so distribución toma casi tol Paleárticu, esto ye, toa Europa, Norte d'África y gran parte d'Asia, hasta l'Himalaya, China, Colombia, Rusia y Xapón.[4] N'América del Norte apaecieron dellos exemplares, pero nun paez establecida. En 2010 atopóse'n Nelson, Nueva Zelanda.[5] Ellí considérase una plaga col potencial de causar serios problemes a les colleches.[6]

El so estáu de caltenimientu nun reviste esmolición y nun s'atopa incluyida na Llista colorada de la UICN.[7][8]

Descripción[editar | editar la fonte]

Los adultos miden ente 50 y 60 mm de valumbu, los machos menores que les femes. Son de color blancu, sacante un llurdiu negru na mariña o zona apical. Les femes estrémense fácilmente de los machos yá que tienen dos puntos negros en caúna de les sos nales anteriores. Nes nales posteriores tamién apaez un puntu nel so marxe anterior. Los llurdios negros de normal son más escures nes xeneraciones nacíes pel branu. Ventralmente son de color verde maciu de cuenta que queden mimetizadas cuando se posen ente los parrotales.[2]

Los güevos son allargaos y de color mariellu maciu. Nun devasen los 2 mm de llargu nin los 0,5 d'anchu. Les canesbes al nacer son de color abuxáu. Cuando crecen tienen la mayor parte del cuerpu de #un color gris verdosu, con tres línea marielles llonxitudinales bien marcaes; una asitiada na metá del envés y les otres dos enriba de los espiráculos. El so envés contién numberosos llurdios negros. Presenten numberoses cogordes a lo llargo de too el cuerpu. El so aspeutu, al pie de el so desagradable golor, sirven pa estornar a los depredadores.

Ciclu[editar | editar la fonte]

Bárabu y güevos

Ye una especie bivoltina (con dos xeneraciones per añu).[2] La dómina de reproducción empieza en primavera —primera xeneración— y toma tol branu —segunda xeneración—. La fema deposita ente 20 y 100 güevos nel fexe de les fueyes de plantes de la familia Brassicaceae, onde s'atopen numberosos cultivos d'agricultura y horticultura.

Antes de dos  selmanes los güevos eclosionen. Al contrariu qu'otres caparines de la familia, les canesbes viven en grupu. A partir de la primer muda les canesbes yá ocuparon tola planta, estremándose en grupos más pequeños. Con cada muda les canesbes aumenten de tamañu y riquen mayores cantidaes d'alimentu, lo cual puede causar graves perxuicios económicos si se atopa en terrenes cultivaos.

Pupa

Realicen la so crisálida nes plantes nutricies y a principios del branu eclosionen y apáriense. Esta nueva xeneración de gates aliméntense hasta los primeros díes fríos de seronda, momentu en que se camuden en crisálida pa pasar l'iviernu.[2]

Referencies[editar | editar la fonte]

Bibliografía[editar | editar la fonte]

  • Aguado Martín, L.O. (2007). Aguado Martín, L.O. (2007). Las mariposas diurnas de Castilla y León (Lepidópteros ropalóceros) Especies, biología, distribución y conservación I. Junta de Castilla y León, 1041. ISBN 978-84-9718-473-1.
  • Linneo, C. (1758). Linneo, C. (1758). «Systema naturae» (llatín). Consultáu'l 25 de marzu de 2014.
  • Savela, Markku (2014). Savela, Markku (2014). «Lepidoptera and some other *forms» (inglés). Consultáu'l 25 de marzu de 2014.