Voltinismu

De Wikipedia
Artículu revisáu
La parafusa del xeraniu ye una caparina polivoltina.

En bioloxía, entiéndese por voltinismu el númberu de xeneraciones d'un organismu qu'apaecen nun añu.

Son especies univoltines les que completen un únicu ciclu vital a lo llargo del añu. Pue ser que'l ciclu vital completu nun se desenvuelva nun añu natural, como por casu la caparina Parnassius apollo, que deposita la puesta mientres el branu, a los pocos díes nacen les canesbes que van envernar. Al añu siguiente van completar el so ciclu, alimentándose mientres la primavera y faciendo la metamorfosis a principiu del branu. O'l casu del venáu (Cervus elaphus) que se reproduz na seronda y pare na primavera siguiente.

Si completen dos ciclos vitales nun añu, apaecen dos xeneraciones cada añu, van denominase bivoltines, por exemplu la caparina Papilio machaon, que los sos adultos depositen los güevos a finales de la primavera y estos completen la so maduración pa volar nel branu tardíu, depositando de nuevu güevos y envernando en forma de crisálida.

Otres especies pueden tener delles xeneraciones nun mesmu añu, entós denominense polivoltines o multivoltines, como la caparina Cacyreus marshalli.

Que sían especies uni, bi o polivoltines pue depender del área de distribución, de les condiciones meteorolóxiques añales y, polo xeneral, de diversos factores qu'afecten a la disponibilidá de recursos necesarios pa la reproducción. Especies univoltines en climes fríos pueden ser bivoltines en climes templaos. 

Referencies[editar | editar la fonte]

  • Aguado Martín, O. L. (2007). Las mariposas diurnas de Castilla y León (Lepidópteros ropalóceros) Especies, biología, distribución y conservación. Valladolid: Junta de Castilla y León. ISBN 978-84-9718-474-8.
  • Aulagnier, S, et ál. (2009). Mamíferos de Europa, Norte de África y Oriente Medio. Bellaterra: Lynx Edicions. ISBN 978-84-96553-52-1.
  • Kowalski, K. (1981). Mamíferos. Manual de Teriología. Madrid: H. Blume Ediciones. ISBN 84-7214-229-9.
  • Nieto Nafría, J. M. y Mier Durante, M. P. (1985). Tratado de Entomología. Barcelona: Omega, S.A.. ISBN 84-282-0748-8.