Península Escandinava

De Wikipedia
Saltar a navegación Saltar a la gueta
Península Escandinava
Scandinavia.TMO2003050.jpg
Alministración
Xeografía
Coordenaes 63°N 14°E / 63°N 14°E / 63; 14Coordenaes: 63°N 14°E / 63°N 14°E / 63; 14
Superficie 750000 km²
Puntu más altu Galdhøpiggen
Demografía
Cambiar los datos en Wikidata

La Península Escandinava (en suecu: Skandinaviska halvön; en noruegu: Den skandinaviske halvøy; en finlandés: Skandinavian niemimaa; y en rusu: Скандинавский полуостров, Skandinavsky poluostrov) ye una península del norte d'Europa. Ye, colos sos 1.850 km de llargor y un anchor variable, d'ente 370 y 805 km, la mayor de les penínsules del continente, y compriende'l territoriu continental de Suecia, el de Noruega (sacante una pequeña área costera na llende con Rusia), la fastera noroccidental de Finlandia y una faza estrecha de tierra del oeste del distritu rusu de Pechengsky.

El nome de la península derívase de la pallabra Escandinavia, que fae referencia a la rexón cultural formada por Dinamarca, Noruega y Suecia. Esti nome, pela so banda, deriva del d'Escania, la rexón más meridional de la península, perteneciente anguaño a Suecia pero que perteneció, delles veces a lo llargo de la historia a Dinamarca y que ye, amás, la rexón d'orixe de los daneses. El términu "escandinavos" úsase tamién pa denomar a los pueblos xermánicos que falen les llingües escandinaves, que son consideraes un continuu dialectal deriváu del nórdicu antiguu. Les llingües escandinaves presentes n'Escandinavia son el danés, el noruegu y el suecu; el feroés ya l'islandés pertenecen tamién al mesmu grupu llingüísticu, pero nun son parte del continuu dialectal escandinavu modernu, y nun son mutuamente intelixibles con eses otres llingües.

Demientres les glaciaciones el nivel del océanu Atlánticu baxó tanto qu'el mar Bálticu, el golfu de Botnia y el golfu de Finlandia desapaecieron, y los países qu'anguaño los rodeen (Escandinavia, les repúbliques báltiques, Polonia y Alemaña) taben xuníes per tierra.

Xeografía[editar | editar la fonte]

El glaciar Jostedalsbreen, el mayor de la Europa continental.

La Península Escandinava, de 1.850 km de llargu y con un anchor que varía ente los 370 y los 805 km, ye la mayor península d'Europa. Ta atravesada, de noreste a sureste, por una cordelera, los Alpes escandinavos, que marquen la llende ente Noruega y Suecia, y ta arrodiada polos siguientes mares:

- el mar de Barents al norte
- el mar de Noruega al oeste
- el mar del Norte y el mar Bálticu al sur
- el mar Bálticu, el llagu Inari y los ríos Kemijoki y Paatsjoki al este.

El so puntu más altu marcábalu'l picu Glittertinden, en Noruega, de 2.470 m d'altor sobre'l nivel de la mar, pero'l desxelu parcial del glaciar del so cumal fae qu'anguaño'l picu más altu, con 2.469 m d'altor, seya'l Galdhøpiggen, tamién en Noruega. Nestes montañes alcuéntrase tamién el mayor glaciar de la Europa continental, el Jostedalsbreen.

Aprosimadamente un 25% de la so superficie ta más al norte del Círculu polar árticu. El so puntu más septentrional ye'l cabu Nordkyn, en Noruega.

El clima varía enforma a lo llargo la península. Alcontramos clima de tundra (Köppen: ET) y clima subárticu (Dfc) nel norte, clima subpolar oceánicu (Cfc) nes zones costeres del noroeste hasta la llatitú de Lofoten, clima hemiboreal ensin estación seca (Dfb) na zona central y clima oceánicu (Cfb) nel sur y suroeste. La península ye rica en madera, fierro y cobre, y hai bona tierra de llabor nel sur de Suecia. Hai, tamién, nes agües territoriales noruegues del mar del Norte y el océanu Atlánticu, importantes xacimientos de petróleu y gas natural.

La mayoría la población de la península concéntrase na so fastera más meridional, la más favorable pa l'agricultura. Les ciudaes con mayor población son, por esti orde, Estocolmo (Suecia), Oslo (Noruega), Göteborg (Suecia), Malmö (Suecia) y Bergen (Noruega).

Xeoloxía[editar | editar la fonte]

Mapa de relieve de la Península Escandinava.

La península ocupa parte del Escudu Bálticu, un segmentu de corteza terrestre mui grande y estable formá por roques metamórfiques cristalines pervieyes. La mayoría del suelu que recubre esti substratu foi rabuñada polos glaciares nes distintes glaciaciones de l'antigüedá, especialmente nel norte d'Escandinavia, nel que l'Escudu ta menos profundu y más averáu a la superficie del terrenu. Por aciu d'esti procesu, l'altor de les tierres sobre'l nivel de la mar y lo riguroso del clima, namái un pequeñu porcentaxe de la tierra de la península ye afayaíza pa l'agricultura[1]

Les glaciaciones tamién provocaron l'afondamientu de munchos de los valles fluviales; cuando'l xelu fundió foron invadíos pol mar, creando los perfamosos fiordos noruegos. Los glaciares posaron gran cantidá de materiales de les sos morrenes terminales na fastera meridional de la península, dando llugar a la configuración d'un paisaxe caóticu[2]. Estes morrenes cubrieron tol territoriu qu'anguaño ye Dinamarca.

Magar qu'el Escudu Bálticu y xeolóxicamente estable, y poro resistente a les influyencies de les formaciones tectóniques vecines, el pesu de los cásique cuatro quilómetros de xelu que tenía enriba demientres les glaciaciones fizo qu'el suelu de la península fundiera. De magar el xelu desapaeció l'escudu entamó a ganar altor otra vuelta, y entá sigue faciéndolo a un ritmu d'alredor d'un metru por sieglu[3]. Pa compensar la parte meridional de la península tiende a fundir, lo que causó la inundación de los Países Baxos y Dinamarca.

El substratu cristalinu del terrenu y la falta de suelu dexaron na superficie depósitos de minerales metálicos: fierro, cobre, níquel, cinc, plata y oru. Los más valiosos d'ente ellos fueron los depósitos de mineral de fierro del noroeste de Suecia. Nel sieglu XIX la so esplotación llevó a construyir un ferrocarril que xunía la zona col puertu noruegu de Narvik, al traviés del cual embarcábase hacia'l sur de Suecia, Alemaña, el Reinu Xuníu y Bélxica pa ser procesáu; esti ferrocarril ye l'únicu d'esta parte d'Escandinavia.

Población[editar | editar la fonte]

La presencia humana más antigua conocida remóntase 12.000 años atrás, con asentamientos na fastera meridional de la península y en Dinamarca[4]. Una y bones, terminada la cabera glaciación, la retirada del xelu permitió la formación d'un bioma de tundra qu'atraxo a cazadores de grandes herbívoros (renos). El clima foi caleciendo gradualmente, permitiendo'l crecimientu d'arboleda, primero de fueya perenne y lluéu de fueya caduco, que traxo a la península animales como los uros. Grupos de cazadores-recolectores entamaron a habitar el área dende'l Mesolíticu (c. 8200 e.C.), y siguieron faciéndolo hasta la llegada de l'agricultura nel Neolíticu (3200 e.C.).

Referencies[editar | editar la fonte]

  1. Hobbs, J.J., Salter, C.L., Essentials Of World Regional Geography,p. 108. Thomson Brooks/Cole, 2005. ISBN 0-534-46600-1.
  2. Ostergren, R.C., Rice, J.G. The Europeans. Guilford Press, 2004. ISBN 0-89862-272-7.
  3. Ostergren, R.C., Rice, J.G. The Europeans. Guilford Press, 2004. ISBN 0-89862-272-7.
  4. Tilley, C.Y. Ethnography of the Neolithic: Early Prehistoric Societies in Southern Scandinavia, p. 9. Cambridge University Press. 2003. ISBN 0-521-56821-8.