Kan (títulu)

De Uiquipedia
Saltar a: navegación, buscar

Kan ye n'orixe un títulu turcu-mongol que significa máximu gobernante. Pospónse al nome. Davezu alcontrámoslu trescritu como khan (/ ˈxan /; trescripción inglesa o francesa, darréu qu'estes llingües como l'asturianu nun tienen el soníu "/ x /"). L'Academia de la Llingua Asturiana recueye el términu kan, pero hai de dexar claro que'l soníu más asemeyáu n'asturianu ye'l de *"ḥan" d'acordies cola pallabra orixinal. En turcu modernu escríbese han.

Nel sieglu XI, probablemente por una confusión col términu kagán, que designaba a los soberanos nes llingües de la familia altaica, Kan acabó volviéndose un títulu nobiliariu, equivalente al d'emperador. Recibíen esti tratamientu los soberanos mongoles que reinaron sobre China, Mongolia y delles naciones de les estepes d'Asia central.

Nel casu de varios príncipes mongoles, como Xenxis Kan y Cublai Kan, el títulu formaba parte del nome propiu.

A partir del sieglu XIII, el términu kan enraigonó en varios idiomes, y los reis de Persia o los sultanes selyúcides y otomanos adoptaron esti tratamientu. Nel sieglu XX, tovía usaben el títulu de Kan dellos gobernantes republicanos en países como Afghanistán, Pakistán o Uzbekistán.