Elizabeth Taylor

De Uiquipedia
Saltar a: navegación, buscar
Elizabeth Taylor
Taylor, Elizabeth posed.jpg
Nacencia 27 de febreru de 1932
Flag of England.svg Hampstead, Londres, Inglaterra
Muerte 23 de marzu de 2011 (79 años)

Elizabeth Rosemond "Liz" Taylor (Hampstead, Londres, 27 de febreru de 1932; Los Ángeles, California, 23 de marzu de 2011[1]) foi una actriz inglesa. Ente los múltiples premios que ganó pol so trabayu nel cine atópense: l'Óscar, el Globu d'oru, el BAFTA y el David de Donatello. Gracies a una condecoración de la reina Isabel II de Inglaterra (Dama Comandante del Imperiu Británicu) recibía'l tratamientu de Dame (Dama), equivalente del masculín Sir. Col pasu de los años amenorgó la so actividá artística y convirtióse n'activista a favor de causes humanitaries, especialmente la llucha contra'l sida.

Reconocida pola so espectacular y rellumante guapura y les sos actuaciones en películes como Cleopatra o ¿Quién teme a Virginia Woolf?, dende los años 50 entainó a convertise nunu de los Mitos del Séptimu Arte. Foi tamién súmamente popular pola so tormentosa vida privada y la so pasión poles xoyes.

En 1999 l'American Film Institute nomóla como la sétima meyor estrella femenina de los primeros cien años del cine norteamericanu.[2]

Carrera artística[editar | editar la fonte]

Elizabeth Taylor yera fía d'emigrantes estaunidenses nel Reinu Xuníu, colos que tornó a América poco anantes de la Segunda Guerra Mundial. So padre yera marchante d'arte y so madre, una actriz retirada.

So madre siempre quiso que fuera una estrella, daba igual de lo que fuese, asina que dende bien neña llevóla a grabar anuncios, cameos en películes, etc. D'ahí que Taylor siempre dixera qu'ella nun quiso facer una carrera como actriz, sinon qu'ésta-y foi impuesta.

Depués de participar en delles comedies de ruina calidá, fízose famosa a la edá de 12 años cola película de tema hípicu National Velvet (1944) con otres dos figures emerxentes: Mickey Rooney y Angela Lansbury. Yera una estrella yá na adolescencia; con 14 años rodó El coraje de Lassie, y poco depués una versión de Mujercitas. El so siguiente gran ésitu sería El padre de la novia (1950), xunto a Spencer Tracy y con dirección de Vincente Minnelli.

Consagración: 1950-70[editar | editar la fonte]

Elizabeth Taylor na película Cat on a Hot Tin Roof (1959).

Les perspectives de la carrera de Taylor meyoraron colos sos trabayos en Un lugar en el sol (1951) con Montgomery Clift, Ivanhoe (1952) con Robert Taylor y Joan Fontaine, y especialmente cuando foi elixida p'actuar, xunto con James Dean y Rock Hudson, na película Gigante (1956). Darréu foi nominada al Premios Oscar na categoría de "Meyor actriz", pol so trabayu en El árbol de la vida (1957), ambiciosa producción qu'intentó igualar l'éxitu de Lo que el viento se llevó.

Protagonizó xunto a Paul Newman el drama románticu Cat on a Hot Tin Roof (La gata sobre el tejado de zinc, 1958), film qu'adaptaba la obra teatral homónima de Tenessee Williams; recibió crítiques positives de munches fontes. La so interpretación fízola acreedora a la so segunda nominación al premiu Oscar por «Meyor actriz» y la so primera candidatura al gallardón BAFTA como «Meyor actriz británica».

Demientres les décaes de 1950 y 1960 convirtióse nuna de les mayores estrelles del firmamentu de Hollywood gracies a la so presencia nos títulos citaos y n'otros como Suddenly, Last Summer (De repente el último verano, 1959) xunto a Katharine Hepburn y Montgomery Clift (que-y proporcionaría'l so primer Globu d'oro y otra nominación al Oscar). Taylor y Clift mantuvieron una estrencha amistá hasta la muerte del actor en 1966.

Con Una mujer marcada (1960), na qu'interpreta'l papel d'una prostituta de lluxu, Elizabeth Taylor llevaríase'l so primer Óscar a la meyor actriz, depués de sumar cuatro nominaciones n'años consecutivos, un récor sólo igualáu por Marlon Brando. A finales de la década de 1950 acentuóse la so rivalidá con Marilyn Monroe, la otra gran estrella de los estudios 20th Century Fox, anque s'especializaron en diferentes tipos de personaxes: Taylor optó por papeles atormentaos, temperamentales y problemáticos, y Marilyn fízose famosa como prototipu de sex symbol, mayormente en comedies.

La so categoría d'estrella quedó reforzada cola película más cara na historia hasta aquel momentu: Cleopatra (1963). Por esta película, Elizabeth Taylor foi la primer actriz que firmó un contratu pola cantidá (p'aquella dómina astronómica) d'un millón de dólares. Sicasí, varies peripecies lleváronla a superar esti récor: los múltiples retrasos y contratiempos del rodaxe, y un porcentaxe de la taquilla contempláu nel so contratu, motivaron qu'ella terminase cobrando'l so sueldu multiplicáu por siete. Foi nel rodaxe d'esta película onde conoció a Richard Burton; entamando un romance tando los dos casaos, lo que provocó un enorme escándalu.

Elizabeth Taylor interpretando a Cleopatra na película homónima estrenada en 1963.

A partir de mediaos de la década de 1960 la so participación nel cine foi perdiendo puxu, anque tovía tuvo ocasión d'intervenir en varies películes de relieve, como La mujer indomable (dirixida por Franco Zeffirelli), Reflejos en un ojo dorado con Marlon Brando (baxo la dirección de John Huston) y ¿Quién teme a Virginia Woolf?, de la que se diz que ye la so meyor interpretación, al llau del so maríu Richard Burton. Por esti trabayu, qu'en cierta manera reflexaba les desavenencies reales de los sos personaxes, Taylor recibió'l so segundu Óscar a la meyor actriz.

Declive nel cine[editar | editar la fonte]

A partir de la década de los 70 la carrera de Liz Taylor nel cine decayó nidiamente. Dellos críticos acháquenlo a que l'actriz prefería películes onde pudiese trabayar cola so pareya Richard Burton y anteponía esta condición a la calidá del guión. Ente los sos trabayos más reseñables pue citase una adaptación del rellatu Bajo el bosque lácteo (1972) con Burton y con Peter O'Toole.

Xunto a Ava Gardner y Jane Fonda participó n'El pájaro azul (1976), fallida película pal públicu infantil dirixida por George Cukor, y tampoco consiguió trunfar cola adaptación al cine de la obra musical A Little Night Music (Dulce Viena), na que sufrió bruscos cambios de pesu a lo llargo del rodaxe pola so delicada salú. Depués centraríase na televisión participando en varies series.

La película El espejo roto (1980), basada nun rellatu d'Agatha Christie, foi una superproducción típica d'aquellos años, d'ampliu repartu y correuta fechura, que consiguió rellanzar fugazmente a Taylor nel cine. Participaron nella otres estrelles veteranes como Angela Lansbury, Tony Curtis, Kim Novak y unu de los grandes amigos de Liz, Rock Hudson.

Última etapa: series de TV[editar | editar la fonte]

Taylor dando un discursu en 1981.

A partir de la década de 1980, les apariciones de Taylor na televisión medraron notablemente, siendo invitada pa participar en diversos programas como General Hospital, Hotel y All My Children. Posteriormente protagonizó, xunto con Jane Alexander, la película pa televisión Malice in Wonderland, de 1985. Allí fizo'l papel de la periodista Louella Parsons.

En 1985 participó brevemente na serie Norte y Sur, exitosa superproducción ambientada na Guerra de Secesión con un bayurosu repartu con xente como Patrick Swayze, Kirstie Alley, David Carradine, Olivia de Havilland, Robert Mitchum y Gene Kelly.

Asinamesmo participó en varies obres de teatru, como The Little Foxes, llevada a cabu nes ciudaes de Londres y Nueva York (en Broadway); y Private Lives, con dirección de Noel Coward y col so ex esposu Richard Burton como protagonista.

Depués de participar nos telefilmes There Must Be a Pony (1986) y Poke Alice (1988), actuó nuna adaptación de la novela Dulce pájaro de juventud (1989). Esta versión, rodada pa la televisión según la novela homónima de Gavin Lambert, nun algamó la calidá de la protagonizada décades anantes por un mozu Paul Newman. Aquí Liz Taylor foi dirixida por Nicolas Roeg y compartió escena con Mark Harmon, Valerie Perrine, Ronnie Claire Edwards y Rip Torn.

L'actriz tamién puso la so voz en delles series animaes; en The Simpsons punxo-y la voz a Maggie en 1992 y interpretóse a sigo mesma en 1993, mientres qu'en Captain Planet and the Planeteers fizo'l papel de la Srta. Andrews.

En 1994 actuó na so última película cinematográfica: Los Picapiedra, de Brian Levant, taquillera adaptación de la serie de dibuxos animaos que contó cola actuación de John Goodman, Rick Moranis, Elizabeth Perkins, Rosie O'Donnell, Kyle MacLachlan y Halle Berry nos papeles principales. La so interpretación recibió crítiques mayoritariamente negatives. Depués d'interpretase a sigo mesma na comedia de situación The Nanny (1996), retiróse de l'actuación col tele-filme These Old Broads, de 2001, dirixida pola actriz Carrie Fisher (La guerra de las galaxias) y con un repartu nel que participaben Debbie Reynolds, Shirley MacLaine y Joan Collins.

Muncho más qu'«una actriz»[editar | editar la fonte]

Liz Taylor debió una parte non menor de la so sonadía a la so vida privada, pero la so carrera actoral ye de gran valir por sigo mesma. Recibió dos premios Óscar: por Una mujer marcada (1960) y por ¿Quién teme a Virginia Woolf] (1966), arriendes de tres nominaciones más, toes elles na categoría de meyor actriz principal. La so primer nominación foi pola película El árbol de la vida en 1957 y tuvo nominada los siguientes tres años, hasta qu'en 1960-y lu concedieron. Algamó'l récor de cuatro nominaciones n'años consecutivos, como l'actor Marlon Brando.

Foi una estrella calificada polos medios anglosaxones como «bigger than life»: una estrella mayor que la vida mesma.

Supo sacar provechu con maestría del so turbador y innegable atractivu sexual y dio que falar a través de los sos romances polémicos. Como consecuencia del so romance con Richard Burton (tando casaos con otres pareyes) un periódicu del Vaticanu acusóla de «vagar erótico», frase qu'inundó los titulares de tol mundu. Burton salió na so defensa, afirmando d'ella que tuviera solamente cinco pareyes, toes conocíes, mientres qu'otres estrelles de Hollywood acostábense con cualquiera na primera nueche (si bien manteniéndolo en secreto). Otres fontes allegaes a l'actriz coinciden al describila como abondo convencional nel amor: dicen que, si se casó n'ocho ocasiones, foi porque nun yera proclive a aventures fugaces y quería formalizar cada nueva rellación con una boda.

Ye, probablemente l'actriz que foi declarada «la más guapa del mundu» en más ocasiones que ninguna otra, incluso superando al llamáu «animal más guapu del mundu», Ava Gardner. La so cara convirtióse en símbolu de perfección a lo llargo de décaes, dende la so mocedá nos años 40 hasta la so madurez bien entrada la década de los 70.

Tan famosa pola so carrera cinematográfica como pola so vida sentimental, Liz Taylor foi oxetu de la prensa rosa polos sos habituales divorcios y matrimonios y polos sos problemas de salú: consumu abondosu d'alcohol, obesidá (llegó a pesar 150 kilos, a pesar de la so curtia estatura), una lesión de columna que requirió diverses operaciones y un tumor cerebral. Nos sos últimos años acudía a actos públicos en siella de ruedes.

Tamién algamó sonadía polos sos llabores humanitarios na llucha contra'l sida dende la muerte del so amigu Rock Hudson, collaboró con una sociedá dedicada a la llucha y la investigación d'esti grave síndrome. Foi por esti motivu pol que la fundación que presidía, Fundación Americana pa la Investigación sobre'l Sida, foi gallardonada col Premiu Príncipe d'Asturies de la Concordia en 1992. Arriendes d'eso, esi mesmu añu participó nel conciertu en tributu a Freddie Mercury, falando acerca de la prevención necesaria pa combatir el SIDA.

Matrimonios y xoyes[editar | editar la fonte]

Taylor en setiembre de 1985.

Elizabeth Taylor debió parte de la so notoriedá mundana a los sos ocho matrimonios, no que rivalizó con otra actriz, Zsa Zsa Gabor.

A los dieciocho años casóse con Conrad Nicholas Hilton, col que taría sólo un añu casada.

El so segundu matrimoniu foi a los venti años, col actor británicu Michael Wilding, col que tuvo dos fíos. A los 24 años yá taba separada nuevamente.

El so tercer matrimoniu foi col productor de cine Mike Todd, qu'un añu depués morrería nun acidente aereu (1958). Con Mike tuvo a la so tercera fía.

Depués de seis meses de viudez conoció, en 1959, al meyor amigu de Mike Todd, el cantante Eddie Fisher, casáu n'aquel tiempu cola so meyor amiga Debbie Reynolds. La so rellación foi nun entamu amistosa, pero Fisher enamoróse d'ella y decidió abandonar a la so muyer. La nueva pareya casaríase en medio d'unu de los escándalos más sonaos de la dómina. Liz Taylor foi tachada de «roba-maridos», si bien yá na so madurez, ella y Debbie Reynolds terminaríen reconciliándose.

En 1962, na filmación de Cleopatra, Taylor conoció al actor Richard Burton, que sería'l so gran amor, col que se casaría y se divorciaría en dos ocasiones y col qu'adoptaría a la so cuarta fía. Les sos constantes discusiones, y les sos polémicas declaraciones fueron la causa de grandes escándalos, los más grandes de los que se tenga conocimientu. Ríos de tinta corrieron dende l'entamu de la publicitada película, hasta'l so divorciu en 1974, la so reconciliación en 1975 y el so nuevu divorciu en 1976. Burton regaló-y grandes xoyes, como'l diamante amariellu Krupp y la Perla Pelegrina, que perteneciera a Felipe II y foi reproducida por Velázquez en varios retratos reales. Cuando esta xoya salió a la venta y la compró Richard Burton, dende España intentóse torgar la operación, afirmando que yera falsa. Pero ye ensin dulda más famosu'l diamante Taylor-Burton de 69 quilates, compraáu en 1969 por 1,2 millones de dólares. Ya nos años 80, l'actriz lu revendió pol triple y destinó'l dineru a fines benéficos n'África.

El so sétimo matrimoniu foi col senador John W. Warner, col que tuvo un matrimoniu infeliz que la llevó al alcoholismu. Elizabeth tuvo a puntu de casase con un abogáu mexicanu, Víctor Luna, que desapareció díes anantes d'asistir al rexistru civil.[3]

N'últimu llugar, casaríase con Larry Fortensky, un obreru de la construcción al que conociera nel Centry Betty Ford demientres una cura de desintoxicación. Casaríense nel Ranchu Neverland de Michael Jackson en 1991, y terminaron divorciándose en 1996.

Notes[editar | editar la fonte]