Michael Jackson

De Uiquipedia
Saltar a: navegación, buscar
Michael Jackson
Jackson in 1984
Jackson in 1984
Información personal
Nome {{{Nome_de_nacimientu}}}
Nomatu {{{Nomatu}}}
Nació 29 d'agostu de 1958
Morrió 25 de xunu de 2009 (50 años) (Los Ánxeles, California)
Información musical
Orixe Gary, Indiana, Estaos Xuníos
Xéneru Pop, Disco, Dance Pop, Funk, Soul
Ocupación {{{Ocupación}}}
Instrumentos {{{Instrumentu}}}
Actividá 1963 - 2009
Discográfiques Motown, Epic, Sony Music, Universal
Rellacionáu con {{{Artistes_rellacionaos}}}
Páxina web

Michael Joe Jackson (Gary, Indiana, 29 d'agostu de 1958-Los Ánxeles, California, 25 de xunu de 2009) conocíu a cencielles como Michael Jackson, foi un célebre cantante, compositor y baillarín estaunidense de Música Pop.

Conocíu como'l "Rei del Pop", Jackson cultivó a lo llargo de la so carrera estilos musicales variaos, como'l Funk, la Música Disco, el Synth Pop, el Dance Pop, el Rhythm & Blues, el Soul ya inclusive les balaes, y popularizó un ritmu llamáu "Breakdance", de moda nos años 80.

Carrera musical[editar | editar la fonte]

Jackson foi incluyíu nel "Llibru Guinness de los récords" en numberoses ocasiones, ente ellos: por ser l'artista musical más premiáu de la hestoria, con cientos de galardones, ente ellos 15 premios Grammy; el vocalista más nuevu en liderar la llista de senciellos nos Estaos Xuníos, con 11 años d'edá; el primer vocalista n'entrar na llista de senciellos directamente nel númberu 1, con «You're Not Alone»; mayor númberu de selmanes nel númberu 1 de la llista d'álbumes (ensin incluyir bandes sonores) n'Estaos Xuníos, con Thriller, mientres 37 selmanes; videoclip más esitosu, Michael Jackson's Thriller, con alredor de 1 millón d'unidaes vendíes; primer animador en ganar más de 100 millones de dólares nun añu; animador meyor pagu de tolos tiempos (125 millones de dólares na llista Forbes de 1989); y animador más esitosu de tolos tiempos. Amás foi'l primer y únicu artista que llogró empezar y terminar l'añu con un álbum nel númberu 1 (Thriller) y el primer y únicu artista de la hestoria en llograr númberos 1 nes décades de 1960, 1970, 1980 y 1990.

La so contribución a la música contemporánea, al baille y a la moda, amás de la so espublizada vida personal convirtiéron-y nuna figura de la cultura popular.

Empezó la so carrera artística colos sos hermanos na banda The Jackson 5 a mediaos de los años 1960, nel cual publicó al pie de ellos diez álbumes hasta 1975.

En 1971 empecipió la so carrera en solitariu, anque siguió perteneciendo a la banda de los sos hermanos. Debíu al estraordinariu impactu del so álbum Thriller (1982), el discu más vendíu de la hestoria de la música (entá en 2013), convirtióse na mayor estrella de la música pop nesi momentu. Dalgunos de los sos álbumes publicaos, como Off the Wall (1979), Bad (1987), Dangerous (1991) o HIStory: Past, Present and Future, Book I (1995), figuren ente los álbumes más vendíos de tolos tiempos, lo que sirvióle pa entrar nel "Rock and Roll Hall of Fame".

Per otra parte, trelce de los 98 senciellos de Jackson algamaron el primer llugar de la llista "Billboard 100". Envalórase que Michael Jackson vendió ente 350 a más de 400 millones de les sos producciones musicales, lo que conviértelo n'unu de los músicos con mayores vientes de los últimos tiempos.

Vida privada, personalidá y discutinios[editar | editar la fonte]

La so madre, Katherine Esther Scruse, yera una devota testigu de Jehová, y el so padre, Joseph Walter "Joe" Jackson, trabayaba nuna fábrica y cantaba nun conxuntu musical llamáu The Falcons. Michael tuvo trés hermanes: Rebbie, La Toya y Janet, y seis hermanos: Jackie, Tito, Jermaine, Marlon, Brandon (mellizu de Marlon que morrió pocu dempués de nacer) y Randy.

Mientres la so infancia vivió nuna casa na so tierra natal de Gary, Indiana, colos sos padres y los sos ocho hermanos, onde creció nun ambiente de maltratos continuos, por cuenta de los abusos que sufrió per parte del so padre Joe, como confirmó'l so hermanu Tito. Ésti aseguró que, en delles ocasiones, el cantante «lloraba enforma por cuenta de los golpes del so padre ya intentaba escondese d'él», y que, cuando nun podía, Joe ríase de Michael. El so padre cometió adulteriu delles vegaes, y nuna d'eses tuvo una fía. Esi tipu de relación fixo que la pareya nun se sintiera a gustu cola so relación matrimonial, polo que dende 2005 la pareya decidió dexar de vivir xunta y n'agostu de 2010 anunciaron la so separación, dempués de 60 años de matrimoniu.

A principios de los años 1980, Jackson empezó a realizar una estricta dieta vexetariana, porque deseyaba tener un "cuerpu de baillarín". Allegaos al artista afirmaben que n'ocasiones sufría de mareos por cuenta del so baxu pesu, y que tamién sufrió d'anorexa nerviosa. Nesa década, dellos periódicos publicaron una semeya na que l'artista taba recostao dientro d'una cámara d'osíxenu y que, según ellos, dormía ellí pa evitar avieyar, rumor que depués foi desmentíu por él mesmu.

En 1986, diagnosticóse-y vitíligo, polo que la so piel foi perdiendo pigmentación, esta enfermedá fixo que tuviera qu'evitar la esposición ante la lluz solar: pa poder da-y un tonu más homoxéneu a la so piel, recurrió al maquillaxe. La estructura de la so cara tamién camudó, y munchos ciruxanos especularon con que Jackson operóse la ñariz, los llabios y los pómulos.

Jackson en 2003

En 1988 Jackson publicó la so primer autobiografía, titulada "Moonwalk", que vendió doscientos mil exemplares, y convirtióse n'unu de los llibros más vendíos d'esi añu, según el periódicu "The New York Times". Nél, Jackson reconoció que sometióse a una rinoplastia y a una mentoplastia, anque desmintió los rumores qu'indicaben que realizóse otru tipu de ciruxíes faciales.

Nel branu de 1993, el cantante foi acusáu d'abusar sexualmente de Jordan Chandler, unu de los munchos neños que solía acoyer na so casona de Neverland, per parte del neñu y del so padre, Evan Chandler. Jordan, quien entós tenía trece año d'edá, acusólo d'habelo besáu, masturbáu, y de sometelo a sexu oral; el consiguiente escándalu repercutió gravemente nel estáu d'ánimu y l'imaxe pública del cantante, y por tantu na so carrera.

Por pidimientu de la xusticia, el so ranchu de Neverland, en California, foi inspeccionáu y dellos neños y families acusaron al cantante de ser un pedófilu. La so hermana mayor, La Toya, tamién llamólo pedófilu, anque tiempu dempués retratóse de lo dicho. Na so casona, Michael Jackson tuvo de sometese a una revisión médica pa poder acotar les descripciones que Jordan fixera de los xenitales del artista. A pesar de que topáronse ciertes semeyances nes descripciones feches pol acusador, esto nun foi abondu pa que Jackson fuera declaráu culpable. Magar tola repercusión mediática del casu, Jackson siguió sosteniendo la so inocencia.

En mayu de 1994, Jackson casóse cola cantautora Lisa Marie Presley, fía d'Elvis Presley. La pareya conocióse en 1975, cuando Michael y la so familia moraben nel "MGM Grand Hotel and Casino", de Las Vegas, onde l'agrupación The Jackson 5 realizaba conciertos. Sicasí, Jackson y Presley divorciáronse dos años más tarde, anque en bonos términos.

En noviembre de 1996, cuando la so xira "HIStory World Tour" pasaba per Australia, Jackson sosprendió nuevamente a la opinión pública al contraer matrimoniu con una enfermera del so dermatólogu habitual: Debbie Rowe, a quien conocía dende la década anterior. Debbie daría a lluz a los dos primeros fíos del cantante, Michael Joseph Jr (conocíu tamién como Prince) y Paris-Michael Katherine, por aciu inseminación artificial. La pareya divorcióse en 1999, pero permanecieron como amigos y Rowe otorgó-y la custodia de dambos neños al cantante.

En 2002 nació'l tercer fíu de Jackson, Prince Michael Jackson II. Según el cantante, el neñu foi concebíu al traviés d'inseminación artificial, utilizando'l so semen y un úteru d'arriendu. En noviembre d'esi añu l'artista volvió ser noticia cuando amosó al so fíu al traviés del balcón del Hotel "Adlon", en Berlín, totalmente tapáu con un cobertor, actitú que resultó ser bien criticada nos medios de comunicación.

En 2003 Jackson brindó una serie d'entrevistes al periodista Martin Bashir, que depués fueron arrexuntaes nun documental tituláu "Living with Michael Jackson". N'unu d'estos reportaxes, el cantante apaeció de la mano d'un adolescente de trece años llamáu Gavin Arvizo, unu de los tantos neños enfermos que visitaben con frecuencia la so casona, quien dixo que solía quedase a dormir na habitación del cantante ensin qu'a él -y fadiara. Esto espertó una gran polémica, y más tarde, esti mozu acusó a Michael Jackson d'habelo enfiláu y violáu. Jackson negó esta acusación, y otres que sumáronse a ella, col argumentu de qu'eses actitúes nun formaben parte de la so naturaleza. El xuiciu empecipió'l 31 de xineru de 2005 en Santa María, California, y remató nel mes de mayu. El 13 de xunu del mesmu añu Jackson foi declaráu inocente de tolos cargos.


Sicasí, y como contrapartida a estes situaciones sórdides y pocu clares, Jackson dedicó gran parte de los sos esfuerzos y recursos económicos a l'ayuda humanitaria, y foi reconocíu mundialmente poles sos acciones filantrópiques y poles donaciones millonaries: donó 300 millones de dólares a causes benéfiques.

Muerte[editar | editar la fonte]

Na mañana del 25 de xunu de 2009, l'artista sufrió una parada cardiorrespiratoria na so casona arrendada de Holmby Hills. Los miembros del serviciu llamaron al teléfonu d'emerxencia 911 pa solicitar auxiliu a les 12:21, los paramédicos llegaron nueve minutos dempués, y atopáronse col cantante ensin pulsu nin respiración, polo que-y aplicaron reanimación cardiopulmonar. Jackson foi treslladáu al "Ronald Reagan UCLA Medical Center", en Los Ánxeles, a la 1:14 pm, pero a pesar de los esfuerzos de los médicos foi declaráu muertu a les 2:26 pm. El primer informe oficial calificó la so muerte como "provocada pola combinación de calmantes", nel que'l principal sospechosu ye'l so médicu personal, Conrad Murray.

Discografía[editar | editar la fonte]

  • Got to Be There (1972)
  • Ben (1972)
  • Music and Me (1973)
  • Forever, Michael (1975)
  • Off the Wall (1979)
  • Thriller (1982)
  • Bad (1987)
  • Dangerous (1991)
  • HIStory: Past, Present and Future, Book I (1995)
  • Blood on the Dance Floor: HIStory in the Mix (1997)
  • Invincible (2001)
  • This Is It (2009)
  • Michael (2010)

Referencies[editar | editar la fonte]