David Carradine

De Uiquipedia
Saltar a: navegación, buscar
David Carradine
DavidCarradineSept06.jpg
David Carradine en setiembre del 2006
Nacencia 8 d’avientu de 1936
Hollywood, California (Estaos Xuníos d'América
Muerte 3 de xunu de 2009
Bangkok, Thailandia
Sitiu web http://www.david-carradine.com

David Carradine (8 d’avientu de 1936 – 3 de xunu de 2009), nacíu John Arthur Carradine, foi un actor americanu, perconocíu pol so papel de Kwai Chang Caine na serie de televisión de los años 1970 Kung Fu, y la so derivación de los años 1990, Kung Fu: La Lleenda Sigue, arriendes del telefilme de 1986 Kung Fu: La Película. Foi miembru d'una granible dinastía familiar d'actores qu'entamó con so padre, John Carradine. La so carrera como actor, qu'incluyó tanto papeles importantes como menores na escena, na televisión y nel cine, duró cuatro décades. Foi un productible actor de “serie B”, qu'apaeció en más de 100 llargumetraxes y foi nomáu cuatro veces al Premiu Golden Globe. L'últimu nomamientu foi pol so papel central en Kill Bill, de Quentin Tarantino.

Datos biográficos[editar | editar la fonte]

Carradine yera fíu del actor John Carradine, hermanu de Bruce, hermanascu de Keith y Robert Carradine y de Michael Bowe, y tíu de les actrices Ever Carradine y Martha Plimpton. Estudió arte dramáticu na Universidá Estatal de San Francisco enantes de trabayar como actor de cine y televisión.

El 4 de xunu de 2009, Carradine foi alcontráu muertu nun cuartu del hotel Park Nai Lert en Bangkok (Thailandia). Anque los medios llocales informaron de mano que Carradine se suicidara aforcándose nel escusáu del so cuartu nel hotel, el so axente afirmó llueu que la muerte del actor produxérase por causes naturales. Informaciones posteriores indicaron que la muerte nun foi por causes naturales nin tampoco un suicidiu, sinón una muerte accidental por asfixa autocausada al envís d'aumentar la so escitación demientres se masturbaba.

Carrera como actor[editar | editar la fonte]

Aparte del so renomáu papel como Kwai Chang Caine en bien dellos episodios, Carradine algamó nomadía como 'Big' Bill Shelly nel filme El tren de Bertha (Martin Scorsese, 1972), como'l cantante folk Woody Guthrie n'Esta tierra ye mio tierra (Hal Ashby, 1976, como Abel Rosenberg nel filme El güevu de la culiebra (Ingmar Bergman, 1977), como Cole Younger en Foraxíos de lleenda (Walter Hill, 1980), como Bryant en Ríu abaxo (José Luis Borau, 1984), o como Bill en Kill Bill vol. 1 (2003) y Kill Bill vol. 2 (2004), dambos dirixíos por Quentin Tarantino.

Apaeció tamién en numberosos telefilmes, como en Tú y Yo (1975) o Americana (presentáu al Festival de Cannes en 1981), dambos dirixíos por él mesmu; o Norte y Sur (1985).

Carradine ye tamién conocíu por producir y interpretar dellos vídeos nos qu'enseñaba les artes marciales del Tai chi y Qi Gong.

Como artista marcial[editar | editar la fonte]

Carradine nun sabía un res de la práutica del kung fu cuando lu escoyeron pal papel de Kwai Chang Caine, pero enfotóse empara na so esperiencia como baillarín. Tamién tenía dalguna esperiencia n'esgrima, en boxéu y en llucha caleyera. Pa la primer temporada de la serie orixinal, David Chow facilitó-y asistencia téunica en kung fu. Dempués foi Kam Yuen el que-y aportó los sos conocimientos. Solo cuando quitaron la serie empecipió Carradine a estudiar artes marciales, primero con Kam Yuen y más tarde con Rob Moses, un estudiante de Yuen. Nunca se consideró a sí mesmu como un maestru del arte, sinón más bien como un divulgador del kung fu. Pal 2003 yá algamara abonda esperiencia nes artes marciales como pa producir y protagonizar dellos videos instructivos sobre Tai chi y Qi Gong. Nel 2005, Carradine visitó'l Monesteriu Shaolin d'Henan, China, como parte de los conteníos estra de la tercera temporada de los DVD de Kung Fu. Nesta visita l'abá, Shi Yongxin, dixo que reconocía la importante contribución de Carradine al espardimientu del Monesteriu Shaolin y la cultura del kung fu, a lo qu'él retrucó "Toi encantáu de ser útil."[1]

Carrera musical[editar | editar la fonte]

Arriendes de la so carrera como actor, David Carradine foi un músicu talentosu. Cantaba y tocaba'l piano, la guitarra y la flauta, ente otros instrumentos.[2] Los sos talentos musicales integrólos de cutiu nes sos actuaciones tres la pantalla. Fixo delles canciones de Woody Guthrie pa la película Esta tierra ye mio tierra. Pa la serie Kung Fu fixo flautes de bambú qu'incluyó ente los preseos que salíen en pantalla. Dempués fixo delles flautes pa la película El círculu de fierro, y una d'elles había sacala más tarde en Kill Bill. Carradine escribió y cantó los temes principales de polo menos dos películes nes que participó, Americana y Sonny Boy. La primer llinia del tema de Sonny Boy, Paint, qu'escribió cuando facía Americana en Drury, Kansas, en 1973, ta grabada na so sepultura.[3] Escribió y cantó delles canciones p’American Reel (2003) y fixo la partitura de Tú y Yo. Xunto col so hermanu Robert tocaba tamién con una banda, el Cosmic Rescue Team (tamién conocíos como Soul Dogs), qu'actuaba sobre too en pequeños llocales.

Curiosures[editar | editar la fonte]

  • Carradine apaez nun episodiu de la serie de Disney, Lizzie McGuire. Nesti episodiu, nuna película de Jet Li tán buscando rapacinos de la edá del hermanu de Lizzie, Matt, pal papel coprotagonista. Carradine interpreta a un vieyu collaciu del padre de Lizzie, Sam McGuire, qu'apriende a Matt dellos movimientos de Kung fu pal so videu de l'audición. Cuando-y entruguen cómo conoz al personax de Carradine, el señor McGuire respuende crípticamente: "Ye como un hermanu pa mi." Ye una broma del actor qu'interpreta a Sam McGuire (Robert Carradine), que ye hermanastru de David Carradine na vida real. Amás, una gran parte del episodiu ta ocupada pol asonsañamientu de Kung Fu (el proyeutu más famosu de Carradine dempués de Kill Bill).
  • David Carradine participa tamién nel videu Burning'Up colos Jonas Brothers. Equí interpreta tamién a un profesor de Kung fu qu'aida a Kevin a salvar a la guapa mocina en peligru.

Referencies[editar | editar la fonte]

  1. "David Carradine's Shaolin Diaries: Back to the Beginning", Season 3 DVD. Warner Video (2005)
  2. Carradine Leaves Behind a Musical Legacy
  3. David Carradine Grave Marker

Bibliografía[editar | editar la fonte]

  • David Carradine, Endless Highway, Boston, Journey Editions, 1995.
  • Herbie J. Pilato, The Kung Fu Book of Caine: The Complete Guide to TV's First Mystical Eastern Western, Boston, Charles A. Tuttle, 1993.

Enllaces esternos[editar | editar la fonte]