Qigong

De Wikipedia
Demostración de Qigong.

Qigong ye un términu mandarín usáu pa describir dellos sistemes chinos d'entrenamientu físicu y mental empobináu a la salú,[1] les artes marciales[2] y el desarrollu personal.[3]

Qigong, o Chi Kung (términu equivalente según la romanización Wade-Giles), ye una romanización de dos caráuteres chinos: (气, 氣) y Gōng (功). La definición que suel atopase nos diccionarios de la pallabra “qi” inclúi los significaos d'“aliendu”, “aire”, “gas” y “vapor”, pero pue tamién usase nun contestu de descripción de la rellación ente materia, enerxía y espíritu.[4] La definición del diccionariu pa “Gong” (功) ye davezu “realización”, “ésitu”, “bon resultáu” (referío a trabayu, exerciciu, disciplina). Les dos pallabres combínense pa describir sistemes y métodos de “trabayu enerxéticu” y remanamientu de la enerxía intrínseco a los organismos vivientes.[5]

Xeneralidaes[editar | editar la fonte]

Esisten bien delles téuniques diferentes de qigong. El qigong pue prauticase col cuerpu relaxáu o en movimientu, y prever movimientos predeterminaos o non (qigong espontaneu). En China, munches formes tradicionales de qigong tán rellacionaes cola medicina, con corrientes de pensamientu espiritual o relixoso como'l Taoísmu, el Budismu y el Confucianismu, asina como coles artes marciales.

Sicasí los principios referenciales cambien acordies cola finalidá cola que se prautica'l qigong. Pa fines terapéuticos o hixénicos, el qigong vencéyase a los principios de la medicina tradicional china. Si se prautica con fines espirituales, básase nos principios rellacionaos cola alquimia china y coles indicaciones del pensamientu espiritual o relixoso al que sirve. Ensin embargu nel casu de la práutica como arte marcial, munchos estilos de qigong refiérense a les correspondientes corrientes espirituales y culturales de pensamientu nes que se desendolca l'usu marcial d'esta disciplina.

Les reaiciones énte la práutica del qigong son perestremaes. La mayoría de los médicos occidentales, una parte de los médicos tradicionales chinos y el mesmu gobiernu chinu, consideren el qigong principalmente dende'l puntu de vista del exerciciu físicu, viéndolu como una práutica conxunta de téuniques de control de la respiración y del movimientu que pue contribuyir a caltener la forma y la condición física. Otros siguen un puntu de vista más metafísicu, llegando a caltener que la respiración y los exercicios de movimientu tienen una importante influyencia sobre les fuercies del universu; y este aspeutu del qigong tovía vien xeneralmente considerándose como una creyencia.

Historia[editar | editar la fonte]

El qigong nun foi creáu por un solu individuu, sinón que ye'l resultáu de milenta años d'esperiencia de los chinos nel usu de la enerxía pa tratar malures, promover la salú y la llonxevidá, ameyorar les habilidaes de llucha, espander la mente, algamar diferentes niveles de consciencia y desarrollar la espiritualidá. Les diferentes téuniques de qigong desendolcáronse separadamente en diferentes partes de China, pero en munchos casos influyéronse mutuamente.

Cachos del esbozu atopáu nuna tumba de la dinastía Han na ciudá de Ma Wang Tui, qu'escurque representen formes de qigong.

Deriváu d'antigües téuniques conocíes como Tao Yin, el qigong talu como se conoz güei data de la Dinastía Han (206 aC - 220 dC), cuando entamó a sistematizase. Ún de los documentos históricos más antiguos que reflexen lo qu'anguaño conocemos como qigong ye l'esbozu pintáu en seda atopáu nun enterramientu de la ciudá china de Ma Wang Tui, que data de la época de la dinastía Han. Sicasí l'usu mesmu del términu qigong ye relativamente recién, darréu que data de principios del sieglu XX, siendo actualmente utilizáu pa referise a bon númberu d'exercicios físicos destinaos a desendolcar la fuercia (física, enerxética, mental o espiritual) o pa fines terapéuticos, per aciu de la utilización de la enerxía vital Chi, o Qi.

Actualmente tan realizándose dellos estudios científicos sobro la eficacia de les práutiques de qigong y sobro los sos principios. A principios de la década de 1970 lleváronse a cabu nueves investigaciones que demostraron a traviés de métodos científicos occidentales los efeutos del qigong nel cuerpu humanu y la esistencia del "Qi". D'ente elles destaca la de Gu Hansen y Lin Houshen, del Institutu de Qigong y Medicina China de Shanghai, que demostraron que'l Qi pue midise con sensores infrarroxos, con resultaos aldericaos y aceutaos con entusiasmu pola mayoría de la comunidá científica internacional. Tamién foron anovadores les investigaciones del maestru Yan Xin.

Magar qu'entá ye una práutica vista con escepticismu por munchos miembros de la comunidá médica n'Occidente, la Organización Mundial de la Salú (OMS) incluyóla ente les formes de Medicina Tradicional China qu'encamienta incluyir nos sistemes de salú.

Práutiques[editar | editar la fonte]

Qigong ye un términu que nun pue venceyase a una determinada práutica. El so significáu ye tan ampliu como'l de la pallabra ximnasia n'Occidente, pudiendo aplicase a práutiques con carauterístiques bien estremaes. Poro, hai milenta variantes d'estes práutiques que bramente pueden llamase "qigong".

Ún de los criterios pa la so clasificación dixebren estes práutiques en dos llinies principales: estátiques y dinámiques. Dambes tienen en común la busca de la unidá de cuerpu y mente nun equilibriu harmoniosu.

Per otra parte delles formes de qigong empléguense non sólo como una forma terapéutica p'ameyorar la salú del prauticante, sinón tamién como un preséu pa tratar la salú d'otres persones. La forma más común d'esti últimu usu valse de la “imposición de manes” y de la intención del terapeuta d'empobinar o tresmitir della enerxía propio al paciente.

La práutica del qigong vencéyase tamién a delles artes marciales chines, como'l Tai Chi. Nesti sen, arriendes de ser una forma d'ameyorar la salú del prauticante de Tai Chi, el qigong pue emplegase como métodu de defensa o d'ataque.

Los diferentes tipos de qigong pueden tamién clasificase en cinco escueles principales, según los sos propósitos o les influyencies que recibieren:

  • Escuela Terapéutica (Yi Jia): busca'l fortalecimientu del cuerpu y de la mente, el tratamientu de malures y la llonxevidá.
  • Escuela Marcial (Wu Jia): busca tanto'l fortalecimientu del cuerpu y de la mente como'l desarrollu de les habilidaes marciales.
  • Escuela Taoísta (Tao Jia): el so oxetivu principal ye'l desarrollu espiritual a traviés del control de la respiración y la visualización.
  • Escuela Budista (Fo Jia): busca sobre too'l desarrollu espiritual a traviés de la meditación.
  • Escuela Confucianista (Ru Jia): el so oxetivu principal ye'l desarrollu mental/inteleutual.

En cuantes a práutiques concretes, ente les más conocíes anguaño destaquen les siguientes:

  • Baduanjin (八段錦): ocho pieces de bordáu.
  • Zhan Zhuang (站樁): tar quietu como un árbol.
  • Yijinjing (易筋經): anovar músculos y tendones.
  • Wuqinxi (五禽戲): xuegu de los cinco animales.
  • Lian Gong
  • Chan Si Gong (纏絲功): endolcar el filu de seda.

Referencies[editar | editar la fonte]

  1. Krapp, Kristine M.; Jacqueline L. Longe. “The Gale Encyclopedia of Alternative Medicine: Volume 3”. Gale Group 2001. Isbn=0787650021
  2. Yang, Jwing-Ming. “Chi Kung: health & martial arts”. Yang's Martial Arts Association, 1987. Isbn=0940871009
  3. Liang, Shou-Yu; Wen-Ching Wu, Denise Breiter-Wu. “Qigong empowerment: a guide to medical, Taoist, Buddhist, and wushu energy cultivation”. Way of the Dragon Pub, 1997. Isbn=1889659029
  4. Ho, Peng Yoke. “Li, Qi, and Shu: An Introduction to Science and Civilization in China”. Dover Publications, 2000. Isbn=0486414450
  5. Cohen. K. S. “The Way of Qigong: The Art and Science of Chinese Energy Healing”. Random House of Canada, 1999. Isbn=0345421094

Ver tamién[editar | editar la fonte]

Bibliografía[editar | editar la fonte]

  • Chuen, Lam Kam. “El camino de la energía. Dominar el arte chino de la fuercia interna con el ejercicio chi kung. Barcelona: Oasis. Producciones generales de comunicación, SL, 1993. Isbn: 84-7901-067-3. ”El camino del Qigong. El arte y la ciencia de la curación energética china.” Barcelona: La liebre de Marzo, SL, 2004. Isbn: 84-87403-70-0.
  • Cohen, K. S. “The Way of Qigong: The Art and Science of Chinese Energy Healing.” Random House of Canada, 1999. Isbn: 0345421094.
  • Compilación. “Wuqinxi. Ejercicios para el fortalecimiento físico a la manera de los cinco animales. Madrid: Miraguano Ediciones, 1989. Isbn: 84-7813-046-2.
  • Despeux, Catherine. “La Moelle du Phénix Rouge. Santé & longue vie dans la Chine du XVIè siècle.” Paris, Francia: Éditions de la Maisnie, 1988. Isbn: 2-85707-281-3.
  • Dong, Liu. ”Qi Gong. La vía del sosiego.” Barcelona: Editorial Kairós, SA, 2001. Isbn: 84-7245-474-6.
  • González, Sebastián. “Qigong. Caminando hacia la armonía.” L'Hospitalet: Ediciones Indigo, 2004. Isbn: 84-96381-17-X.
  • Ho, Peng Yoke. “Li, Qi, and Shu: An Introduction to Science and Civilization in China”. Dover Publications. Isbn: 0486414450.
  • Requena, Ives. “La gimnasia de la eterna juventud. Guía fácil de Qi Gong.” Barcelona: Ediciones Robinbook, SL, 1996. Isbn: 84-7927-192-2
  • The People's Sports Publishing House, Pekín. Wushu. Gimnasia china para la salud de la familia. Barcelona: Círculo de lectores, SA, 1982. Isbn: 84-226-1482-0.
  • Yang, Jwing Ming. “La raíz del chi kung chino.” Málaga: Editorial Sirio, SA, 2003. Isbn: 84-7808-393-6.
  • Yang, Jwing Ming. “Qigong. El secreto de la eterna juventud. Tratados del cambio de músculo/tendón y lavado de médula/cerebro, de Da Mo.” Málaga: Editorial Sirio, SA, 2004. Isbn: 84-7808-411-8.
  • Yang, Tian Cheng. “Conocer el Taoísmo. Historia, filosofía y práutica. Chi Kung, Tai Chi, Feng Shui, Meditación, Masaje Taoísta.” Barcelona: Editorial Kairós, SA, 2003. Isbn: 84-7245-531-9.
  • Yu, Wen-Mei. “Liangong. Healing exercises for better health.” Burbank, California (USA): CFW Enterprises, Inc., 2003. Isbn: 0-86568-199-6

Enllaces esternos[editar | editar la fonte]