Tai Chi Chuan

De Uiquipedia
Saltar a: navegación, buscar
Tai Chi Chuan
Tamién T'ai Chi Ch'üan, Taijiquan, 太極拳
País d'orixe Flag of the People's Republic of China.svg China
Fundador Créyese que Zhang Sanfeng
Artes enseñaes Formes tradicionales y de competición, con y ensin armes; contautu llixeru (manes qu'emburrien), contautu fuerte (golpes, pataes, proyeiciones, etc.)
Métodos téunicos Trabayu lentu de les formes, trabayu del qi
Escueles derivaes Estilos Chen, Yang, Wu/Hao, Wu y Sun ente otros
Prauticantes Chen Wangting, Chen Changxing, Yang Lu-ch'an, Wu Yu-hsiang, Wu Ch'uan-yu, Wu Chien-ch'uan, Sun Lu-t'ang, Yang Chengfu, Chen Fake, Wang Pei-sheng
Deporte olímpicu Exhibición

Tai chi chuan (chinu simplificáu: 太极拳; chinu tradicional: 太極拳; pinyin: tàijíquán; Wade-Giles :t'ai4 chi2 ch'üan2) (lliteralmente "Puñu Supremu Definitivu") ye un arte marcial internu de China prauticáu tanto pol so valir pa la defensa como polos sos beneficios pa la salú. De cutiu prautícase tamién por una variedá d’estremaes razones personales: les sos téuniques d’artes marciales dures y suaves, les competiciones de demostración, y la llonxevidá. De resultes, hai bayura de formes d'entrenar tanto tradicionales como modernes, que respuenden a esos oxetivos. Dalgunes d’eses formes de tai chi chuan son especialmente conocíes porque prautíquenles no que la mayoría la xente clasifica como movimientu lentu.

La mayoría de los estilos modernos de tai chi diz que guañó de siquier una de les cinco escueles tradicionales: Chen, Yang, Wu/Hao, Wu, y Sun.

Güeyada global[editar | editar la fonte]

El términu tai chi chuan traduzse como "puñu supremu definitivu ", "puñu ensin llendes", "boxéu de los grandes estremos", o cenciellamente "el definitivu" (hai que se decatar de que chi nesti casu ye la treslliteración Wade-Giles del pinyin , y de que ye distintu de ch'i / , que significa "fuerza vital" o "enerxía"). El conceutu del taiji ("supremu definitivu") apaez nes filosofíes chines taoísta y confuciana, onde representa la xunión del yin y yang nun únicu Definitivu representáu pol símbolu Taijitu.Conque la teoría y la práutica del tai chi evolucionaron acordies con munchos principios filosóficos chinos, incluyendo los del taoísmu y el confucianismu.

L’entrenamientu del tai chi implica cinco elementos, nei gung, tui shou (exercicios reactivos), sanshou (téuniques de defensa personal), armes, y rutines de mano vacía, conocíos como formes (套路 taolu). Mentanto la imaxe del tai chi chuan na cultura popular ye tipificada pol movimientu desaxeradamente lentu, munchos estilos de tai chi (incluyendo los tres más populares - Yang, Wu, y Chen) – tienen formes secundaries a un pasu más rápidu. Delles escueles tradicionales de tai chi enseñen exercicios por pareyes conocíos como "manes qu'emburrien", y aplicaciones marciales de les postures de les formes.

L'arte recibió'l so nome cuando Ong Tong He, un eruditu de la Corte Imperial, presenció una demostración de Yang Lu Chan ("L’Invencible Yang"). Ong escribió: "Garrando les manes el Taiji solmena’l mundu enteru, un pechu que guarda l'habilidá definitiva derrota una xunta d'héroes."

En China, el Tai chi chuan clasifíquenlu nel grupu Wudang de les artes marciales chines; ello ye, les artes que s’apliquen con poder internu (un términu incluso más ampliu p’abarcar les artes internes ye Neijia). A pesar de que’l Nome Wudang empobina falsamente a la xente a creer qu’estes artes aniciaren nel llamáu Monte Wudang, como sí lo fixeron dalgunes d'elles, ye cenciellamente una división pa estremar les habilidaes, teoríes y aplicaciones de les "artes internes" d'aquelles del grupu Shaolin, los estilos "duros" o "esternos" de les artes marciales.

Dende la primera promoción xeneralizada de los beneficios de salú del tai chi que fixeren Yang Shaohou, Yang Chengfu, Wu Chien-chuan, y Sun Lutang a principios del sieglu XX, desarrollóse per tol mundu un siguimientu de xente con pocu o dengún interés na práutica marcial, pol so beneficiu pa la salú y caltenimientu de la salú. Los estudios médicos sobre’l tai chi sofiten la so efeutividá como un exerciciu alternativu y una forma d’ arte marcial terapéutica.

Entiéndese que centrar la mente namái nos movimientos de la forma ayuda a algamar un estáu de claridá y calma mental. Xunto a los beneficios de salú xeneral y control de la tensión atribuyíos al entrenamientu del tai chi, enséñense aspeutos de la medicina tradicional china a los estudiantes avanzaos en delles escueles tradicionales.

Sicasí ye cuestionable si los beneficios de salú venceyaos al arte pueden consiguise namái col entrenamientu de la forma. Y les cinco escritures clásiques esenciales nun se refieren nenyures a les artes de curar. Tal paez que, sobre too dende los años 1990, el movimientu new age fíxose col arte y modificólu. El Tai Chi Chuan marcial orixinal tovía puede atopase pero, resalvando l’entrenamientu de la forma, malapenes s’atopen otros rasgos comunes.

Delles artes marciales, especialmente les artes marciales xaponeses, riquen que los estudiantes lleven un uniforme cuando prautiquen. Polo xeneral les escueles de tai chi chuan nun riquen un uniforme, pero tanto los profesores tradicionales como los modernos tan de cutiu pola ropa suelto y cómodo y poles zapatiyes de suela plana.

Les téuniques físiques del tai chi chuan descríbense nos clásicos del tai chi, un conxuntu d'escritures feches por maestros tradicionales, como carauterizaes pol usu del remanamientu de les articulaciones basáu más na coordinación y na relaxación que na tensión muscular, al envís de neutralizar o empecipiar ataques. El trabayu lentu y repetitivu implicáu nel procesu d'aprender cómo esi remanamientu ta xeneráu sele y midiblemente, enanta y abre la circulación interna (aliendu, calor corporal, sangre, linfa, peristalsis, etc.)

L'estudiu del tai chi chuan implica principalmente tres aspeutos:

  • Salú: Una persona amalucada o d’otramiente buiciega quiciabes atope difícil aportar a un estáu de calma o valise del tai chi como arte marcial. L’entrenamientu de la salú del tai chi, polo tanto, céntrase n’alliviar los efeutos físicos de la tensión nel cuerpu y la mente. P'aquellos que se centren na aplicación marcial del tai chi, un bon acondicionamientu físicu ye un pasu importante haza una defensa personal efeutiva.
  • Meditación: La concentración y la calma cultivaos pol aspeutu meditativu del tai chi vense como necesarios pa caltener una salú perbona (nel sen d’alliviar la tensión y caltener la homeostasis) y pa l'aplicación de la forma como arte marcial d’estilu suave.
  • Arte marcial: L'habilidá d'utilizar el tai chi como una forma de defensa personal en combate ye la prueba de la comprensión del arte pol estudiante. El Tai chi chuan ye l'estudiu de l'apropiada adaptación en respuesta a fuerces esteriores, l'estudiu de ceder y "apegase" a un ataque entrante más que de tentar topetalu con una fuerza contraria. L'usu del tai chi como arte marcial ye abondo desafiante y rique mui bien d’entrenamientu.

Hestoria y estilos[editar | editar la fonte]

Hai cinco estilos principales nel tai chi chuan, caún nomáu pola familia china de la que surdió:

  • Estilu Chen (陳氏) de Chen Wangting (1580–1660)
  • Estilu Yang (楊氏) de Yang Lu-ch'an (1799-1872)
  • Estilu Wu- o Wu/Hao (武氏) de Wu Yu-hsiang (1812-1880)
  • Estilu Wu (吳氏) de Wu Ch'uan-yu (1834–1902) y el so fíu Wu Chien-ch'uan (1870-1942)
  • Estilu Sun (孫氏) de Sun Lu-t'ang (1861–1932)

L’orde verificable de tiempu ye como se llista enriba. L’orde de popularidá (d’acordies col númberu de prauticantes) ye Yang, Wu, Chen, Sun, y Wu/Hao. Los estilos familiares principales comparten muncha teoría soxacente, pero estrémense nos sos enfoques práuticos.

Anguaño hai docenes d'estilos nuevos, estilos híbridos, y rames de los estilos principales, pero les cinco escueles familiares son los grupos reconocíos como ortodoxos pola comunidá internacional. Otros estilos importantes son Zhaobao Tai Chi, un primu cercanu del estilu Chen que ta recién reconocíu polos prauticantes occidentales como un estilu diferenciáu, y el estilu Fu, creáu por Fu Chen Sung, qu’evolucionó de los estilos Chen, Sun y Yang y tamién incorpora movimientos del Pa Kua Chang.

Tolos estilos esistentes pueden remontase al estilu Chen, que fuera tresmitíu como secretu familiar delles xeneraciones. Les cróniques de la familia Chen rexistren que Chen Wangting, de la 9.ª xeneración familiar, ye l'inventor de lo que se conoz güei como Tai Chi. Yang Lu-ch'an foi la primer persona de fuera de la familia n'aprender Tai Chi. El so ésitu en combate dio-y el nomatu de "Invencible Yang", y la so fama y esfuerzos n'enseñar contribuyeron enforma al espardimientu posterior de la conocencia del Tai Chi.

Cuando se rastrexen les influencies formatives del tai chi chuan nos monesterios taoístes y budistes, dende una perspeutiva histórica moderna paez poco más que dir a cuentos llexendarios, pero delles escueles tradicionales postulen la conexón práutica y dependencia del tai chi chuan de les teoríes del neoconfucianismu de la dinastía Sung (una síntesis intencionada de tradiciones taoístes, budistes y confucianes, especialmente les enseñances de Menciu). Estes escueles creyen que les teoríes y la práutica del Tai chi fueron formulaes pol monxu taoísta Zhang Sanfeng nel sieglu XII, pel mesmu tiempu que los principios de la escuela neoconfuciana caltriaben na vida intelectual china. Ensin embargu, la investigación moderna llanza duldes series sobre’l valir d'aquellos postulaos, sopelexando qu'una pieza del sieglu XVII llamada "Epitafiu de Wang Zhengnan" (1669), fecha por Huang Zongxi (1610-1695 d.C.), ye la referencia más temprana qu'indica cualquier conexón ente Zhang Sanfeng y les artes marciales en xeneral, pero que nun hai que la tomar lliteralmente sinón qu’hai que la entender como metáfora cortés. Les propuestes de conexones ente’l Tai Chi y Zhang Sanfeng nun apaecen enantes del sieglu XIX.

Entrenamientu y téuniques[editar | editar la fonte]

Símbolu Taiji (Taijitu, 太極圖), que representa les fuerces del yin-yang

Como’l nome "tai chi chuan" piénsase que deriva del símbolu Taiji (Taijitu o T'ai chi t'u, 太極圖), xeneralmente conocíu n’Occidente como’l diagrama "yin-yang", el tai chi chuan ye, poro, según se diz na lliteratura caltenida nes sos escueles más vieyes, un estudio de los principios yin (receutivu) y yang (activu), utilizando la terminoloxía atopada nos clásicos chinos, especialmente l' I Ching y el Tao Te Ching.

La práutica principal implica dos carauterístiques primaries: la primera ye la forma en solitariu (ch'üan o quán, 拳), una secuencia lenta de movimientos que sorraya un llombu derechu, respiración abdominal y una gama natural de movimientos; el segundu son diferentes estilos de manes qu'emburrien (tui shou, 推手) pa entrenar principios de movimientu de la forma con un compañeru y d’una manera más práutica.

La forma en solitariu tien que llevar a los estudiantes al traviés d'una gama completa y natural de movimientu sobre'l so centru de gravedá. La práutica curiosa y repetida de la rutina en solitariu dizse que corrixe la postura, afala la circulación, caltién la flexibilidá de les xuntes, y amás familiariza a los estudiantes coles secuencies d'aplicación marcial qu’impliquen les formes. Los estilos tradicionales más importantes del tai chi tienen formes que difieren daqué en cuantes a estética, pero hai tamién munches semeyances obvies qu’apunten al so orixe común. Les formes en solitariu –mano vacía y armes- son catálogos de movimientos que se prautiquen individualmente n'escenarios de manes qu'emburrien y aplicación marcial pa preparar a los estudiantes pal entrenamientu de la defensa personal. Na mayoría de les escueles tradicionales pueden prauticase les diferentes variaciones de les formes en solitariu: por exemplu rápido-lento, pequeñu círculu-gran círculu, cuadrao-rondo (que son espresiones distintes de remanamientu de les articulaciones), o sentase baxo/sentase alto (el grau al que doblen al facer la forma les rodíes qu'aguanten el pesu).

La filosofía del Tai Chi Chuan ye que si unu usa la durez p'aguantar la fuerza violenta, entós dambes partes mancaránse siquiera en dalgún grau. Tal dañu, según la teoría del tai chi, ye una consecuencia natural de topetar la fuerza bruta cola fuerza bruta. Asina qu’a los estudiantes apréndenlos non a lluchar direutamente o a resistise a una fuerza entrante, sinón a enfrentala con suavidá y a siguir el so movimientu mientres tan tovía en contautu hasta que la fuerza o ataque entrante escosa por sí mesmu o pueden redirixilu ensin peligru, enfrentando’l yang con yin. Si se fai correutamente, esti equilibriu yin/yang o yang/yin en combate, o nun sentíu filosóficu más ampliu, ye un oxetivu primariu del entrenamientu del tai chi chuan. Lao Tzu apurrió’l paradigma pa esto nel Tao Te Ching cuando escribió: "Lo blando y lo flexible derroten a lo duro y fuerte."

Estudiando les manes qu'emburrien

L'aspeutu marcial del tai chi enfótase na sensibilidá a los movimientos y al centru de gravedá del adversariu disponiendo respuestes apropiaes. L’estudiante de tai chi marcial entrena como oxetivu primariu alteriar eficazmente o "garrar" el centru de gravedá del adversariu darréu al contautu. La sensibilidá que se precisa pa facese col centru algámase con miles d'hores d’entrenamientu marcial de formes, manes qu'emburrien y sparring, primero yin (lentu, repetitivu, meditativu, baxu impactu), y añadiendo más tarde yang ("realista," activu, rápidu, altu impactu). El tai chi entrena en tres distancies básiques: cercana, media y llarga, y d’ehí tolo que quepa ente elles. Los emburriones y los golpes de mano abierta son más comunes que les puñaes, y les pataes son normalmente a les piernes y baxu cuerpu, nunca p’arriba del cadril, dependiendo del estilu. Los deos, puños, palmes, cantos de les manes, moñeques, antebrazos, coldos, costazos, llombu, cadriles, rodíes, y pies, son xeneralmente utilizaos pa cutir, con golpes a los güeyos, gargüelu, corazón, vería, y otros puntos de presión entrenaos polos estudiantes adelantraos. Tamién s’utilicen agarres de les xuntes, inmovilizaciones, y francedures (chin na). La mayoría de los maestros de tai chi esperen que los sos estudiantes apriendan ensembre habilidaes defensives o neutralizadores primero, y l’estudiante va tener que demostrar que ye afechiscu con elles enantes d’entrenar por estenso les habilidaes ofensives. Nes escueles tradicionales dase tamién importancia a esperar qu´unu amuese wu te (武德), virtú marcial o heroísmu, pa protexer a los indefensos, y qu’amuese piedá colos adversarios.

Arriendes de la forma física o marcial, les escueles de tai chi chuan tamién se centren en cómo la enerxía d'un golpe afeuta a la otra persona. Un golpe de palma que paez tener el mesmu movimientu puede executase de tal manera que tenga un efeutu dafechu distintu nel cuerpu del oxetivu. Un golpe de palma que cenciellamente podía emburriar a l'adversariu, podía en cambiu mangase de tal manera que llevantara al oponente de la tierra, rompiendo’l so centru de gravedá; o podía llevar la fuerza del golpe hasta dientro’l cuerpu de la otra persona col propósitu de causar un dañu internu.

Otros exercicios d’entrenamientu inclúin:

  • Entrenamientu d’armes y aplicaciones d’ esgrima emplegando la espada reuta conocida como jian, chien o gim (jiàn 劍); un sable curvu más pesáu, llamáu dacuando espada ancha o tao (dāo 刀, que ye de fechu consideráu un cuchiellu grande); el abanicu plegáu, tamién llamáu san; el palu de madera (2 m. de llargu) conocíu como kun (棍); la llanza de 7 pies (2 m) y la llanza de 13 pies (4 m) (dambes llamaes qiāng 槍). Armes más exótiques inda utilizaes por dalgunos estilos tradicionales son los grandes sables Dadao o Ta Tao (大刀) y Pudao o P'u Tao (撲刀); alabarda (jǐ 戟), cayáu, cuerda-dardu, bastón de tres seiciones, ruedes de vientu y fueu, llazu, llátigu, llátigu de cadena y llátigu d’aceru.
  • Tornéu de sparring de dos persones (como parte de les competiciones de manes qu’emburrien y/o sanshou 散手).
  • Exercicios respiratorios, nei kung (內功 nèigōng) o, más comúnmente, chi kung (氣功 qìgōng) pa espoxigar el chi (氣 qì) o "enerxía respiratoria" en coordinación col movimientu físicu y Zhan zhuang (“fitu como un poste”) o combinaciones de los dos. Estos aprendíenlos antaño namái a los discípulos como un sistema d’entrenamientu separáu o complementariu. Nos postreros 60 años vinieron ser meyor conocíos pol públicu en xeneral.

Tai chi modernu[editar | editar la fonte]

Al da-y importancia namái qu’a la salú, les clases de tai chi llegaron a ser populares n'hospitales, clíniques, y centros sociales y de mayores más o menos nos últimos venti años, cuando los representantes del baby boom maurecen y la reputación del arte como un entrenamientu de baxa tensión pa los vieyos vien siendo más conocida.

De resultes d’esta popularidá, hubo dalguna diverxencia ente los que dicen que prautiquen tai chi principalmente pa la defensa personal, los que lu prautiquen pola so atraición estética (ver wushu), y los que tan más interesaos nos sos beneficios pa la salú física y mental. L’aspeutu wushu ye principalmente pa espectáculu; les formes que s’enseñen pa esos propósitos tán diseñaes pa ganar puntos en competición y son na so mayor parte indiferentes a cualquier caltenimientu de la salú o habilidá marcial. Estilistes más tradicionales creyen que dambos aspeutos de salú y artes marciales son igualmente necesarios: el yin y yang del tai chi chuan. Les escueles "familiares" de tai chi, poro, inda presenten les sos enseñances nun contestu d'arte marcial, cualquiera que seya la intención de los sos estudiantes al estudiar l'arte.

Tai chi como deporte[editar | editar la fonte]

Con vistes a estandarizar el tai chi chuan pa xulgalu nos torneos de wushu, y darréu que munchos profesores de tai chi chuan o marcharen de China o fueren obligaos a parar d’enseñar dempués del establecimientu del réxime comunista en 1949, el gobiernu patrocinó'l Comité de Deportes Chinos, qu’axuntó a cuatro de los sos maestros de wushu pa encurtiar la forma de mano de la familia Yang a 24 posiciones en 1956. Quixeron retener l’aspeutu del tai chi chuan pero creando una rutina que fuera menos difícil d'enseñar y muncho menos difícil d'aprender que les formes de mano más llargues (polo xeneral, de 88 a 108 posiciones) y clásiques. En 1976 fixeron una forma llixeramente más llarga, tamién pa los propósitos de demostración, qu'inda nun implicaba l’alcordanza completa, equilibriu y requisitos de coordinación de les formes tradicionales. Tratóse de les 48 Formes Combinaes que crearon tres entrenadores de wushu al mandu del Profesor Men Hui Feng. Les formes combinaes basáronse en simplificar y combinar delles carauterístiques de les formes clásiques de cuatro de los estilos orixinales: Chen, Yang, Wu, y Sun. Cuando’l tai chi foi otra vegada popular nel continente, fixéronse formes más competitives que pudieren completase nun plazu máximu de seis minutos. A finales de los 1980, el Comité de Deportes Chinos estandarizó munches formes distintes de competición. Fixeron conxuntos pa representar a los cuatro estilos principales asina como formes combinaes. Estos cinco conxuntos de formes creáronlos equipos distintos, y más tarde aprobólos un comité d’entrenadores de wushu en China. Tolos conxuntos de formes creaos asina nomáronlos según el so estilu, por casu la Forma de Competición Nacional del Estilu Chen ye la Forma de 56, y asina. Les formes combinaes son la Forma de 42 o cenciellamente la Forma de Competición. Otra forma moderna ye la Forma Combinada de Tai-Chi Chuan de 67 Movimientos, creada nos años 1950; contién carauterístiques de los estilos Yang, Wu, Sun, Chen y Fu amestaes d’una forma combinada. L’entrenador de wushu Bow Sim Mark ye un esponente notable de la Combinada de 67.

Estes versiones modernes de tai chi chuan (dacuando escritu utilizando la romanización pinyin Taijiquan) son dende entós una parte integral de los torneos internacionales de competición wushu, y presentáronse en películes populares protagonizaes o coreografiaes por competidores perconocíos de wushu, como Jet Li y Donnie Yen.

Nos XI Xuegos Asiáticos de 1990, el wushu foi incluyíu per primer vegada como una seición de la competición, escoyendo la Forma de 42 pa representar al tai chi. La Federación Internacional de Wushu (IWUF) solicitó que’l wushu fuera parte de los Xuegos Olímpicos, pero ensin sumar medayes.

Los prauticantes tamién prueben les sos habilidaes marciales práutiques contra estudiantes d'otres escueles y estilos d'artes marciales na competición de manes qu'emburrien y sanshou.

Beneficios pa la salú[editar | editar la fonte]

Paisanos prauticando tai chi

Enantes de la introducción del tai chi a los estudiantes occidentales, los beneficios pa la salú del tai chi chuan esplicábense en gran parte al traviés de la lente de la medicina tradicional china, que ta basada nuna consideranza del cuerpu y de los mecanismos de xorrecimientu non siempre estudiada o sofitada pola ciencia moderna. Güei, el tai chi ta nel procesu de sometese a estudios científicos rigorosos n’Occidente. Agora que la mayoría de los estudios de salú amosó un beneficiu tanxible en delles estayes cola práutica del tai chi, hai profesionales de la salú que pidieron estudios más a fondu pa determinar factores d’alliviu talos como l'estilu más beneficiosu, la duración suxerida de práutica p'amosar les meyores resultancies, y si’l tai chi ye tan eficaz como otres formes d'exerciciu.

Ver tamién[editar | editar la fonte]

Enllaces esternos[editar | editar la fonte]

Taijiquan
Wikimedia Commons tien archivos rellacionaos con:
Videos de los estilos principales