Estilu Chen de tai chi chuan
L’Estilu Chen de tai chi chuan (陳式太極拳) ye’l más antiguu y el padre de los cinco estilos tradicionales de Tai Chi Chuan. Ye’l tercer estilu en cuantes a popularidá en tol mundu. L’estilu de la familia Chen carauterízase poles postures más baxes, polos sos “enduvellamientos de seda” (chan si jin) y polos sos puxones esplosivos (fa jin).
Aniciu[editar | editar la fonte]
Les respuestes a la cuestión del aniciu del Tai Chi Chuan varien según los espertos, y dan llugar a alderiques d'escueles y estilos.
Sicasí, el fundador xeneralmente reconocíu sería Chen Wanting (1600-1680), perteneciente a la novena xeneración del llinax de Chen Bu. Vivió a mediaos del sieglu XVII na aldea de Chenjiagou (distritu de Wenxian, provincia de Henan, en China), onde s’atopen los primeros escatafinos históricos de la so esistencia n’anales escritos. Un orixe más míticu manga la so fundación al sieglu XII o al XV, al ermitañu taoísta Zhang Sangfen.
El nome, entós, del estilu cuéyese de la familia Chen.
Otramiente considérase que l'estilu Chen ta nel orixe del estilu Yang. L’estilu Wu ye descendiente del Yang, y el Sun provién del Yang y del Chen.
Según los historiadores chinos, tanto téuniques de Kung fu] de delles escueles de la dómina, como téuniques terapéutiques (Tuna, trabayu respiratoriu, y Daoyin, arte de la llarga vida, con oríxenes históricos certificaos nel sieglu V), axuntaríense na creación del Tai Chi Chuan.
Principios téunicos[editar | editar la fonte]
L’estilu Chen tradicional caltuvo de xuru un espíritu marcial más evidente que’l que pue atopase nos estilos derivaos d'él. Tien sobre too dos elementos distintivos: el “chansi jin” y el “fa jing”.
El chansi jin ye una forma particular d'usar la fuercia, a traviés de movimientos n’espiral. Dizse que la fuercia flui pel cuerpu como un filu de seda que s’enrolla y se desenrolla del capullu. En particular el chansi jin funciona con un efeutu de llátigu sobre cualesquier enerxía empobinada a la so escontra, que camuda per aciu de la circularidá la direición del puxu recibíu del oponente. Col envís de facese con esti principiu codificáronse cinco exercicios qu'hai que completar de siguío hasta algamar la capacidá d'actuar en trayeutories circulares. Estos exercicios llámense tamién "chansi jin".
El fa jing ye una téunica pa usar la fuercia interna (劲, jin) d'una manera esplosiva, per mediu de la coordinación de la respiración col movimientu, qu'ha tar mui relaxáu. El chi, allugáu davezu nel dantian, a traviés de la coordinación de los movimientos flui peles estremidaes al envís de llegar al cabu (manes, pies, costazos, etc) y surdir xenerando una fuercia muncho mayor que la simple fuercia muscular.
Metodoloxía[editar | editar la fonte]
Les arbíes tradicionales de deprendimientu del estilu Chen de Tai Chi Chuan son sobre too trés: los exercicios básicos, les formes (taolu) y les “manes qu'emburrien” (tuishou).
Los primeros son secuencies prefixaes de movimientos, coles que’l cuerpu s’aveza a movese acordies colos principios d'esti arte marcial, arriendes de fortalecese. Recordemos los cinco "chansi jin".
Los segundos, los taolu, nos que se basa principalmente la práutica del estilu, combinen los principios xenerales nuna secuencia ordenada d'aiciones circulares qu'aprienden a los alumnos a enfotase nel propiu cuerpu, la propia enerxía y el propiu equilibriu. Poro, el deprendimientu de les formes rique munchos años d'estudiu y exercitamientu. Nel estilu Chen recuéyense les dos formes principales: Di yi Lu y Er Lu.
- Di yi lu – 1ª secuencia (de 74 movimientos). Tamién conocida como Zhangquan o "Puñu Llargu".
- Er lu – 2ª secuencia. Tamién conocida como Paochui o "Puñu Cañón".
Estrémense dos versiones de Di yi lu:
- Lao jia (forma antigua)
- Xin jia (forma nueva), espardida por Chen Fake.
Nestes formes la secuencia tien los mesmos movimientos y los xestos son calcaos, pero la utilización (aplicaciones marciales) de los movimientos ye davezu bien diferente.
Hai tamién mui bien delles “formes de síntesis”, atalantaes xeneralmente pa la competición o como elementu pedagóxicu (creaes por dellos maestros contemporáneos como Wang Xian, Chen Zheng Lei, Chen Xiao Wang...)
Ensin embargu l'estudiu de los 15 primeros movimientos del "Di yi lu" ye la base del trabayu. Atópense nestos 15 primeros movimientos tolos principios y cambeos (direiciones) que se desenrollen de siguío na forma. Tamién se diz que’l primer movimientu (El Guardia Celestial Maya’l Morteru) ye la “base de la base”, y que ye imprescindible pa una bona progresión executalu correutamente primero de siguir.
.jpg)
Tradicionalmente, sólo dempués de dominar bien el Di yi lu se pue escomenzar el deprendimientu del tuishou y de les armes (espada, sable, llanza llarga, palu, alabarda...), y del Er lu pao chui
La segunda secuencia, Er lu, ye carauterística del estilu Chen (nun l'hai asemeyada n’otros estilos). Trátase d'un trabayu “esplosivu”, qu'amuesa a les clares l'orixe y el trabayu marcial. La diferencia ente les dos secuencies a mano vacía pue resumise d'esta miente:
- pal Di yi lu ye'l cuerpu'l que manexa la mano
- pal Er lu ye la mano la que manexa'l cuerpu
Lo que significa que l'estudiu de la primer secuencia ye una escucha (intención) llevada al interior (trabayu proprioceutivu), mientres que la segunda secuencia faise pa llevar la intención al esterior (l'aplicación marcial).
En tercer llugar ta'l Tuishou, del que se diz que ye’l tercer taolu, porque tamién ye una secuencia codificada en distintos niveles, y que pue trabayase solu. Les “manes qu'emburrien” son un conxuntu d'exercicios atalantaos como sistema didáuticu de preparación pal combate llibre (Sanshou). La execución d'estos exercicios desarrolla munches cualidaes, en primer llugar la suavidá y la capacidá de "ceder", que ye utilizar la fuercia del contrariu a favor de nueso y ensin oponer resistencia. Los principios básicos d'esta práutica son: espander, tirar, estrangular, achaplar.
Neto qu'en munches artes marciales chines, tamién nel Tai Chi Chuan hai formes con armes. Les armes tradicionales que más s’usen son la espada, el sable, l'alabarda o “guandao”, y la llanza.
La práutica del Tai Chi Chuan] como arte marcial rique polo xeneral munchos años d'estudiu.
Filosofía[editar | editar la fonte]
Anque los oríxenes históricos del Tai Chi Chuan afonden na filosofía del Budismu (dada la vecindá xeográfica y estilística col templu de Shaolin) col tiempu esti arte atraxo munchos aspeutos del Taoísmu.
El mesmu nome, taijiquan, apella al conceutu d'un principiu supremu (太极, taiji) que pue identificase col Dao (道).
Un símbolu clave d'esti arte marcial ye de fechu’l taijitu (太极图), famosu diagrama que representa un círculu dixebráu en dos formes, asemeyaes a pexes, una blanca y otra negra. Estes figures simbolicen el Yin y el Yang, los dos polos opuestos pero complementarios de la cosmogonía taoísta.
Asina que tolos movimientos del Tai Chi Chuan siguen l'alternancia de los contrarios, y esti mou d'actuar constitúi tamién la base del sistema marcial: nun hai necesidá d'oponese “dafechu” a un ataque, sinón qu'hai que ceder, emplegando la fuercia del contrariu en ventaya d'ún.
El Tai Chi Chuan tamién se basa na sabiduría de la medicina tradicional china, utilizando los conceutos de la "enerxía vital" (气, qi) y de los "meridianos" (“nadi”).