Antiglobalización

De Uiquipedia
Saltar a: navegación, buscar
Manifestación en Xénova escontra'l G8

El movimientu antiglobalización (tamién nomáu altermundista, alterglobalización o movimientu de resistencia global) ye un movimientu de protesta internacional que refuga'l capitalismu y la globalización impuesta pol modelu neolliberal. Ye un movimientu nel qu'andechen decenes de grupos como; anticapitalistes, ecoloxistes, antimilitaristes, sindicatos, ONG's, indixenistes etc. Estos grupos, ensin ser un movimientu mui bien encadarmáu, nel que nun hai cabezaleros, lleven más d'una década trabayando en cuestiones venceyaes a los problemes que remanecen de la globalización de la economía mundial. Son munches les campañes qu'organizaron pa la condonación de la delda esterna de los países probes, o pa'l remocique del Bancu Mundial y del FMI.

Magar que tienen una trayeutoria d'años de trabayu, los antiglobalistes acapararon espaciu nos medios de comunicación y dende les instancies internacionales por mor de la presencia de los sos simpatizantes n'actos paralelos a los grandes aconceyamientos económicos y políticos internacionales. La protesta de Seattle, qu'algamó albortar la xunta de la Organización Mundial del Comerciu, supunxo un puntu d'inflexón na hestoria del movimientu.

L'anuncia de la presencia de más de 50.000 simpatizantes foi reproducida nos medios de comunicación de tol mundu. Les engarradielles qu'ellí asocedieron dieron una imaxe de violencia mui alloñada de los braeros oxetivos de los organizadores.

Oxetivos[editar | editar la fonte]

Los activistes antiglobalización esixen una sociedá más xusta, el remanamientu del poder illimitáu de les multinacionales, la democratización de les instituciones económiques mundiales y la distribución más equitativa de la riqueza. Los sos enemigos cimeros son les multinacionales y les grandes organizaciones económiques y polítiques internacionales, sobremanera'l Bancu Mundial y el Fondu Monetariu Internacional.

La condonación de la delda esterna ye una de les esixencies d'esti movimientu y les campañes sobre l'asuntu foron el so entamu. El Bancu Mundial y el FMI son, pa los grupos antiglobalización, los responsables de l'asfixante situanza na que s'alcuentren la mayor parte de los países probes, incapaces d'alfrontar la delda qu'en munchos casos supera'l so PIB (Productu Interior Brutu). Les instituciones monetaries, fíes del Bretton Woods, concedieron créitos masivos a los gobiernos de los estaos probes demientres los años 70 y 80, esixéndo-yos a cambeu la reestructuración de les sos economíes y imponiendo reformes qu'implicaben un altu coste social y que s'amosaron económicamente contraproducentes.

Esisten discrepancies dientro'l movimientu ente aquellos que consideran que'l BM y el FMI han desapaecer y la corriente más moderada que puxa por una reforma de les mesmes.

Les multinacionales como McDonald's o Nike son blancu de los grupos antiglobalización, que tilden d'amorales les práutiques de la compañía, especialmente la esplotación de trabayadores del Tercer Mundu, na so mayoría muyeres y neños. El desaniciu de los símbolos o propiedaes d'estes empreses ye la bandera de los seutores más radicales.

Hestoria[editar | editar la fonte]

Añu 1999[editar | editar la fonte]

París[editar | editar la fonte]

El 28 de payares más de 15.000 personas manifiestense na ciudá a la escontra de la OMC y baxo'l lema "El mundu nun ye una mercancía".

Seattle[editar | editar la fonte]

Grupu de xente del Black Bloc

Demientres la cume de la OMC en Seattle, dende'l 30 de payares al 3 d'avientu de 1999, 50.000 persones se desplazaron pa rispir de mena pacífica escontra la cume. Sicasí, les primeres informaciones sobre los movimientos antiglobalización coyeron a los medios de comunicación despreveníos. La desinformación dafechu de la so composición y intereses finaron centrando l'interés mediáticu nes protestes violentas, llevaes a cau pol conocíu Black Block, un grupu non organizáu d'anarquistes d'estremada violencia.

Añu 2000[editar | editar la fonte]

Washington[editar | editar la fonte]

El 17 d'abril onde 10.000 manifestantes bloquearon los accesos a los aconceyamientos de primavera que cellebren el FMI y el BM na ciudá.

Praga[editar | editar la fonte]

Activistes Tute Bianche o monos blancos

El 1 de payares u 12.000 manifestantes antiglobalización tomaron les cais de la ciudá, onde'l FMI y el BM cellebraben los aquelarres financieros, con un total de 422 deteníos.

Niza[editar | editar la fonte]

El 6 d'avientu del añu 2000. Más de 50.000 persones manifiestense en Niza "por una Europa del plenu emplegu y de los drechos sociales". La "euromanifestación" tien llugar el día enantes de la obertura de la cume europea, organizada pola Confederación europea de los sindicatos. Más de 2.000 italianos y 2.000 españoles foron inmovilizaos na llende'l país.

Añu 2001[editar | editar la fonte]

Porto Alegre[editar | editar la fonte]

Del 26 al 31 de xineru demientres la primer edición del Foru Social Mundial foi organizada una contra-cume na ciudá autoxestionada más famosa del mundu, gobernada pol Partido dos Trabalhadores, aconceyó a más de 1.000 ONGs, y foi considerada como un importante ésitu políticu y mediáticu.

Quebec[editar | editar la fonte]

El 20 d'abril desendolcose nel centru de la ciudá, que daquella yera sée de la "III Cumbre de las Américas", ye escenariu de duros choques ente la policía y los manifestantes. La xunta aconceya a 34 xefes d'estáu de tol continente, ente ellos el presidente d'Estaos Xuníos, George W. Bush. Los manifestantes oponense a una zona de llibre comerciu qu'acomuñe a tolos países americanos.

Barcelona[editar | editar la fonte]

El 19 de mayu'l Bancu Mundial refuga facer la so conferencia sobre desendolque qu'había cellebrase en Barcelona en xunu pa torgar altercaos.

Gotemburgu[editar | editar la fonte]

El 15 de xunu Gotemburgu resultó un espectáculu bochornosu pa los neolliberales. Les movilizaciones escontra la cume de llíderes de la UE tornóse especialmente violenta por mor de l'actuación d'un grupu incontroláu. La policía sueca disparó con fueu real, feriendo de gravedá a una bayura manifestantes.

Barcelona[editar | editar la fonte]

Magar que nun cellebró l'aconceyamientu del Bancu Mundial el 24 de xunu unes 25.000 persones (8.000 según la policía y 50.000 según los organizadores) participen en Barcelona nuna manifestación antiglobalización. La protesta se desendolca ensin torgues pero a la fin de la marcha rexistrense graves engarradielles cola policía. Axentes infiltraos prautiquen detenciones con barres nes manes anque'l Gobiernu ñegó que foren los causantes de los primeros incidentes.

Más tarde (el 1 de xunetu) fexose una manifestación "pola represión policial y la criminalización de los movimientos sociales" na que participaron ente 8.000 y 10.000 persones na ciudá de Barcelona ensin nengún incidente.

Xénova[editar | editar la fonte]

Del 20 de xunetu al 22 de xunetu siñose'l puntu d'inflexón na hestoria del movimientu. La perdura represión, por parte de los carabinieri italianos, foi ampliamente difundida polos medios de comunicación de mases. El brutal ataque policial a Indymedia prevocó una foleada d'indignación en tol mundu. En Xénova morrió, por un tiru de bala na tiesta disparáu por un policia italianu, Carlo Giuliani, un xoven que participaba nes engarradielles caixeres y amás produxéronse 230 feríos ente manifestantes, policíes y periodistes.

Laeken[editar | editar la fonte]

El 13 d'avientu demientres la cume semestral de la UE fecha nel castiellu belxicanu de Laeken, na redolada de Bruseles, aconceya a unes 100.000 persones nuna protesta paralela enpuercada por pequeños incidentes.

Añu 2002[editar | editar la fonte]

Porto Alegre[editar | editar la fonte]

La contra-cume del 31 de xineru en Porto Alegre foi, fasta agora, la cume alternativa más importante enxamás fecha. Algamó quita-y portaes y 'prime time' televisivu a la cume del Foru Económicu Mundial, organizada esta vez en Nueva York. Una cume, la de Nueva York, que quedaba n'evidencia por unes descomanaes midíes de seguridá n'espera d'unos altercaos que cásique nun se produxeron. Al segundu Foru Social Mundial dirixeronse importantes personalidaes de la política y la intelectualidá mundiales, como'l xuez Baltasar Garzón, l'escritor José Saramago, el periodista Ignacio Ramonet o'l llingüista norteamericanu Noam Chomsky, ente otros. La eleición de Porto Alegre como sé del Foru Social Mundial nun ye casual. Tratase d'una ciudá autoxestionada, gracies a la victoria nes urnes del Partido dos Trabalhadores. Esti nun ampliu númberu de poblaciones brasilanes, con Porto Alegre como ciudá cimera. Dende fines del 2000, decenes de cargos de la formación recibieron menacies de muerte. A fines d'ochobre de 2001, el prefeutu de Campinas, Antonio da Costa Santos, foi asesináu. Cuatro meses depués, el 20 de xineru de 2002, s'alcontraba'l cuerpu ensin vida del alcalde de Santo André, Celso Daniel. En toos estos casos, la responsabilidá recai sobre una desconocida banda d'estrema esquierda, el Frente de Ação Revolucionária Brasileira. Sicasí, espertos en terrorismu afirmen que se trata d'un montaxe, tres el que s'escondería la estrema drecha o grupos de pistoleros contrataos polos terratenientes brasilanos. En tolos casos, la inhibición de la policía brasilana foi manifiesta.

Barcelona[editar | editar la fonte]

Unes 100.000 persones participen en Barcelona'l 14 de marzu na manifestación convocada polos sindicatos europeos baxo'l lema "Más Europa con plenu emplegu y drechos sociales". La capital catalana acueye fasta'l 16 de marzu la cume europea, na que participen los Quince y los países aspirantes a entrar na UE. L'ésitu de la manifestación de Barcelona, pa reclamar postures alternativas a la cume de la UE, ye doblemente hestóricu: los convocantes llogren aconceyar a más de 300.000 persones, no que ye la mayor protesta antiglobalización fasta la fecha, y la marcha se desendolca de mou pacíficu, namái empañada por pequeños incidentes al final del recorríu.

La Gran Aición Global 2007[editar | editar la fonte]

Pa'l día 7 de xunu del 2007 hai convocada una gran aición global escontra'l capitalismu que pretende descentralizar la llucha antiglobalización del llugar onde se cellebre l'aconceyamientu del G8, esti añu Alemaña, y facela visible en toles ciudaes del mundu. Esti ye'l manifiestu convocante:

[1]

Esti branu del 6 al 8 de Xunu el "G-8" tornará aconceyae n'Alemaña. Una nueva cume pa continuar col control del so mundu.

Pero los ciudadanos del mundu vamos camudar el rumbu de la hestoria.

El 7 de xunu de 2007 podemos facer qu'esti mundu absurdu, sosteníu por nós, caiga.

El 7 de xunu nun trabayes, nun consumas, toma la cai. Organiza la to rabia, llibera los tos suaños.

El 7 de xunu vemonos nes cais.

Esta protesta xeneral escontra los causantes de les inxusticies globales que carez el ser humanu y la natura, se fadrá'l 7 de xunu de 2007 día intermediu del próximu aconceyamientu del "G-8". Una protesta qu'encamienta a un paru d'un día tanto nel trabayu como nel consumu, pa qu'estos gobiernos integrantes del "G-8" vean como coles nueses aiciones tamién podemos influyir nes sos economíes neolliberales y esclavizadores. Amosaremos que, como diz José Saramago, “hay dos superpotencias en el mundo: una es EEUU y otra eres TU”.

Puxa col to esfuerciu pol espardimientu d'esta aición global per tolos medios de que dispongas, d'ello dependerá que puea tener una repercusión global y realmente tresformadora de la inxusta realidá que presenciamos y fasta favorecemos cola nuesa pasividá.

Antiglobalización n'Asturies[editar | editar la fonte]

El 12 y 13 d'abril de 2002 cellebrose n'Uviéu un aconceyamientu del ECOFIN esti fechu provocó que se convocaren seis marches antiglobalización dende varios puntos d'Asturies que confluyíen n'Uviéu, y onde varios miles de persones se manifestaron escontra l'aconceyamientu informal del Conseyu de Ministros d'Economía y Finances de la UE.

Les marches a pie surdieron de Xixón, Avilés, Llangréu, Siero y Mieres, a les que se xunió otra que salió d'Uviéu pa entrar xuntos na capital, tres una gran pancarta na que se lleía'l lema "contra la Europa del capital y la guerra, otro mundo es posible".

Los manifestantes aportaron a la capital ensin que se rexistraren incidentes y, baxo una intensa lluvia, aniciaron la manifestación na estación de Renfe, dende onde teníen previsto desplazase a la Plaza la Catedral al traviés de les cais céntriques en metanes d'un descomanáu dispositivu de la policía, qu'incluyía un siguimientu permanente de la marcha dende un helicópteru policial.

Los manifestantes glayaron consignes escontra la globalización y el sistema capitalista, amás de crítiques a la Unión Europea y al Gobiernu d'Israel pola situación qu'altraviesen los palestinos nos territorios ocupaos, asina como escontra'l despliegue de seguridá puestu en marcha.

Na movilización tuvieron presentes tamién los participantes nel denomáu Maratón d'Espresión Antiglobalización, que tenía previstu desendolcar delles actividaes circenses na ciudá coincidiendo col Ecofin, anque finalmente nun pudieron instalase nos llugares previstos nun entamu al nun disponer de los permisos afayadizos de la Casa Conceyu.

Ver tamién[editar | editar la fonte]

Enllaces esternos[editar | editar la fonte]

  1. [1]