Mufrid

De Wikipedia
Saltar a navegación Saltar a la gueta
Mufrid
Mufrid
Constelación Boötes
Ascensión reuta α 13h 54min 11,08s
Declinación δ +18º 23’ 51,8’’
Distancia 37 ± 0,3 años lluz
Magnitú visual +2,68
Magnitú absoluta +2,58
Lluminosidá 9 soles
Temperatura 6100 K
Masa 1,6 - 1,7 soles
Radiu 2,7 soles
Tipu espectral G0IV
Velocidá radial -0,1 km/s
Otros nomes HD 121370 / HR 5235
HIP 67927 / SAO 100766

Mufrid o Muphrid (η Bootis / η Boo / 8 Bootis)[1] ye la tercera estrella más brillosa de la constelación de Boötes dempués d'Arturu (α Bootis) y Izar (ε Bootis). Con magnitú aparente +2,68, nel cielu apaez mui cerca d'Arturu y de fechu dambes tán a una distancia casi idéntica de la Tierra —37 años lluz—, tando dixebraes namái 3,24 años lluz ente sigo.

Nome[editar | editar la fonte]

L'orixe del nome de Mufrid ye inciertu. Paez que originariamente foi utilizáu pa designar a Arturu y darréu sirvió pa nomar otres estrelles de la so redolada.[2]La estrella apaez citada nel sieglu XV pol astrónomu Ulugh Beg como Al Mufrid al Ramih, «la estrella solitaria del llanceru».[3]

Otru nome que recibe la estrella ye Saak, del árabe Al-Sak, «el güesu de la espinía»; sicasí, na figura actual de la constelación, Mufrid apaez asitiada enriba de la rodía esquierda. En astronomía china, xunto a υ Bootis y τ Bootis, constituyía Yew She Ti, l'oficial asitiáu a la derecha del emperador.[3]

Carauterístiques físiques[editar | editar la fonte]

Mufrid ye una estrella subxigante mariella de tipu espectral G0IV y 6100 K de temperatura superficial, daqué más caliente qu'el Sol. Ye una estrella que remató la fusión de hidróxenu nel so nucleu y ta abandonando la secuencia principal nel so camín pa convertise nuna xigante colorada. La so lluminosidá ye 9 vegaes mayor que la del Sol, con un radiu 2,7 vegaes más grande qu'el radiu solar. Destaca pola so alta metalicidá —conteníu en elementos más pesaos qu'el heliu—, el doble que la solar.[2] Más nuevu qu'el Sol, tien una edá entendida ente 2400 y los 2700 millones d'años.[4][5]

Mufrid paez ser una estrella binaria espectroscópica con un periodu orbital de 1,355 años; la escentricidá de la órbita (ε = 0,26) fadría que la separación ente los dos componentes bazcuyara ente 0,03 y 0,52 UA, tando inclináu'l planu orbital 157º al respective de la Tierra.[6] Sicasí, la so naturaleza binaria nun pudo ser confirmada por interferometría de moteáu. La estrella acompañante pue ser una nana colorada, y nesi casu sería de tipu M7 o posterior,[7] o bien una nana blanca.[2]

Ver tamién[editar | editar la fonte]

Referencies[editar | editar la fonte]