Megalópolis del Noreste

La Megalópolis del Noreste, tamién conocida como Boston–Washington corridor o Bos-Wash corridor^[1], ye una megalópolis asitiada nel noreste d'Estaos Xuníos. Ye, colos sos 50 millones d'habitantes, la aglomeración más fuertemente urbanizada de los Estaos Xuníos, la segunda de mayor población del país y la de mayor potencia económica del mundu^[2]. Allugada na costa del océanu Atlánticu, nel Noreste de los Estaos Xuníos, estiéndese, en direición noreste-suroeste, dende los suburbios septentrionales de la ciudá de Boston hasta los suburbios meridionales de Washington DC, nel norte del estáu de Virxinia^[3]. Compriende cinco grandes megaciudaes, Boston, Nueva York, Filadelfia, Baltimore y Washington DC^[4], xunto coles sos árees metropolitanes y suburbios. Dellos autores inclúin nucleos urbanos menores asitiaos fuera de les llendes qu'acabamos de definir, como Richmond y Norfolk, en Virxinia, al sur, y Portland, en Maine, al norte^[5].

La megalópolis estiéndese, grosso modo, a lo llargo del percorríu d'una parte de la autopista U.S. Route 1. En 2010 vivíen nella más de 50 millones de persones, el 17% de la población estauxunidense, nún área territorial de menos del 2% del total nacional, con una densidá de población de 390 hab/km²^[6]. Les proyecciones de población calculen qu'en 2025 la megalópolis ha tener una población de 58,1 millones d'habitantes^[5].

El términu foi popularizáu pol xeógrafu francés Jean Gottmann na so obra de 1961 Megalopolis: The Urbanized Northeastern Seaboard of the United States. Esti autor conclúi, nel so estudiu, que les ciudaes de la rexón, magar que tán claramente diferenciaes, tán venceyaes unes con otres per aciu del amiestu de les sos zones suburbanes, adquiriendo con ello delles característiques que la convierten núna única y xigantesca ciudá: una megalópolis.

Nel territoriu d'esta megalópolis alcontramos cientos d'universidaes, ente elles ocho de les diez meyores d'Estaos Xuníos y de les meyores del mundu: Universidá de Harvard, Universidá de Princeton, Universidá de Columbia, Institutu Teunolóxicu de Massachusetts, Universidá de Yale, Universidá Johns Hopkins, Universidá de Georgetown y Universidá de Pennsylvania^[7].

Xeografía[editar | editar la fonte]

La megalópolis compriende el Distritu de Columbia y territoriu, parte o tou, d'once estaos: de sur a norte Virxinia, Maryland, Delaware, Pennsylvania, Nueva Jersey, Nueva York, Connecticut, Rhode Island, Massachusetts, New Hampshire y Maine. Ta xunida por dos carreteres, la Interstate 95 y la U.S. Route 1, que nacen respectivamente en Miami y Cayo Hueso, en Florida, y muerren en Maine, na frontera con Canadá, y pol corredor ferroviariu del noreste, que ye la llinia de pasaxeros con más usuarios del país. Compriende toles árees estadístiques metropolitanes contigues ente Washington y Boston, magar que'l territoriu nun ta uniformemente pobláu. Asina, hai rexones que nominalmente pertenecen al corredor que, pola so llonxanía coles principales llinies de comunicación quedaron al marxen del proceso d'urbanización, como la nomada «esquina tranquila» (Quiet Corner) de Connecticut.

La rexón concentra'l 20% del productu interior brutu d'Estaos Xuníos. Nella tienen la so sé la Bolsa de Nueva York, el NASDAQ, la Casa Blanca, el Capitoliu de los Estaos Xuníos, les Naciones Xuníes y munchos de los principales medios de comunicación del país: ABC, NBC, CBS, NPR, Fox, Comcast, The New York Times Company, USA Today, and The Washington Post. Tamién tienen la so sé equí munches de les principales compañíes financieres del país (JP Morgan Chase, Citigroup, Goldman Sachs, Fannie Mae, Freddie Mac y Fidelity), y 162 de les 500 mayores corporaciones mundiales según el llistáu Fortune Global 500.

Población[editar | editar la fonte]

Principales árees estadístiques combinaes incluyíes na megalópolis del Noreste
Ránking (nos EE.XX.)	Área estadística combinada	Población en 2018 (estimación)	Población nel censu de 2010
1	AEC de Nueva York-Newark	22.679.948	22.255.491
4	AEC de Washington-Baltimore-Arlington	9.778.360	9.032.651
6	AEC de Boston-Worcester-Providence	8.285.407	7.893.376
8	AEC de Filadelfia-Reading-Camden	7.204.035	7.067.807
40	AEC de Hartford-West Hartford	1.473.084	1.486.436
97	AEM de Salisbury-Cambridge	409.979	373.802
TOTAL		49.830.813	48.109.563

El conceptu de megalópolis[editar | editar la fonte]

Jean Gottmann construyó la so obra más famosa, Megalopolis, alredor de la teoría de que les ciudaes ente Washington DC y Boston formaben una suerte de "superciudá" cohesionada ya integrada. El nome que-y dio, megalópolis, tomolo d'una pequeña ciudá griega que, na época clásica, fundóse cola esperanza de que se convirtiera na mayor de les ciudaes griegues. Pese a qu'entá esiste, ye una pequeña comunidá agrícola; el sueño de los fundadores de la Megalopolis orixinal, argumentaba Gottmann, realizárase nel noreste de los Estaos Xuníos en 1960^[8].

Gottmann definió dos criterios pa poder considerar a un grupo de ciudaes como una verdadera megalópolis: estructura polinuclear y concentración múltiple, esto ye, la presencia de múltiples nucleos urbanos qu'esisten independientemente unos d'otros pero pese a ello tán integraos d'una forma especial con otros más o menos cercanos. Acordies con estos criterios les ciudaes ximielgues nun son verdaderes árees megalopolitanes una y bones dambes ciudaes, magar que tienen llendes urbanes clares y distritos financieros propios. D'otra banda hai poblaciones suburbanes de ciudaes mayores, como Bethesda (Maryland) con respectu a Washington DC, que son árees claramente diferenciaes d'elles y pueden incluso tener los propios suburbios. Sicasí, nun pueden considerase en denguna forma independientes del so nucleu principal, porque son suburbios que nun se tendríen desarrollao de la forma que lo ficieron ensin la presencia del nucleu urbanu central, nesti casu Washington DC.

Les grandes ciudaes de la megalópolis del Noreste son toes ciudaes distintes ya independientes unes d'otres, pero tán estrechamente comunicaes poles redes de tresporte y telecomunicaciones. Neil Gustafson amosó, ya en 1961, que la gran mayoría de les llamaes telefóniques feches dende la rexón teníen como destín poblaciones de la mesma, y que namái una minoría d'elles empobinábense pal restu d'Estaos Xuníos o a otros países^[9]. La interconexón de la rexón al traviés del tresporte profundízase añu a añu, con vuelos de corta distancia ente Boston, Nueva York y Washington DC cada media hora, trenes express y llinies d'autobús que ufren un tresporte económicu ente les distintes ciudaes, lo que non solo indica la dualidad nucleos independientes-sistema interconectado sinón el ampliunivel de comprensión del conceptu por parte del públicu y la so capitalización poles empreses.

El conceptu de Gottmann va siendo aceptáu nos ámbitos académicos. Asina, la National Geographic Society espublizó en 1994 un mapa de la rexón de los tiempos de la guerra de independencia y de la dómina actual, nel que tomó emprestáu, citándolu, el títulu del llibru de Gottmann, y en 2007 John Rennie Short espublizó un llibru que yera una amplia puesta al día de la obra de Gottmann, que tituló Liquid City: Megalopolis and the Contemporary Northeast. El términu BosWash, por últimu, foi inventáu, en referencia a la zona que Gottmann definiera como megalopolis, polos futuristes Herman Kahn y Anthony Wiener^[10].

Referencies[editar | editar la fonte]

↑ Swatridge LA, The Bosnywash Megalopolis. McGraw Hill, 1971. ISBN 0-07-092795-2
↑ Florida R, The Real Powerhouses That Drive the World’s Economy, na web citylab.com (28 de febreru de 2019).
↑ Gottmann J, Megalopolis: The Urbanized Northeastern Seaboard of the United States, p. 3. New York, The Twentieth Century Fund, 1961.
↑ Gottmann J, "Megalopolis or the organization of the Northeastern seaboard". Economic Geography 1957;33(3):189-200. doi:10.2307/142307.
↑ ^5,0 ^5,1 Northeast, na web america2050.org.
↑ Short JR, Liquid City: Megalopolis and the Contemporary Northeast, p. 23. Washington DC, Resources for the Future, 2007.
↑ National University Rankings, na web del U.S. News & World Report.
↑ Gottmann J, Megalopolis: The Urbanized Northeastern Seaboard of the United States, p. 4. New York, The Twentieth Century Fund, 1961.
↑ Gottmann J, Megalopolis: The Urbanized Northeastern Seaboard of the United States, p.583-593. New York, The Twentieth Century Fund, 1961.
↑ El términu BosWash apaez por primer vegada nuna publicación de 1967 que facía predicciones sobro'l futuru espublizada pol Hudson Institute. Kahn H, Wiener A, The year 2000: a framework for speculation on the next thirty-three years, p. 61. Macmillan, Nueva York, 1967. ISBN 978-0-02-560440-7.

[1] Swatridge LA, The Bosnywash Megalopolis. McGraw Hill, 1971. ISBN 0-07-092795-2

[2] Florida R, The Real Powerhouses That Drive the World’s Economy, na web citylab.com (28 de febreru de 2019).

[3] Gottmann J, Megalopolis: The Urbanized Northeastern Seaboard of the United States, p. 3. New York, The Twentieth Century Fund, 1961.

[4] Gottmann J, "Megalopolis or the organization of the Northeastern seaboard". Economic Geography 1957;33(3):189-200. doi:10.2307/142307.

[:0-5] 5,0 ^5,1 Northeast, na web america2050.org.

[6] Short JR, Liquid City: Megalopolis and the Contemporary Northeast, p. 23. Washington DC, Resources for the Future, 2007.

[7] National University Rankings, na web del U.S. News & World Report.

[8] Gottmann J, Megalopolis: The Urbanized Northeastern Seaboard of the United States, p. 4. New York, The Twentieth Century Fund, 1961.

[9] Gottmann J, Megalopolis: The Urbanized Northeastern Seaboard of the United States, p.583-593. New York, The Twentieth Century Fund, 1961.

[10] El términu BosWash apaez por primer vegada nuna publicación de 1967 que facía predicciones sobro'l futuru espublizada pol Hudson Institute. Kahn H, Wiener A, The year 2000: a framework for speculation on the next thirty-three years, p. 61. Macmillan, Nueva York, 1967. ISBN 978-0-02-560440-7.

[1]

[2]

[3]

[4]

[5]

[6]

[7]

[8]

[9]

[10]