Bolsa de Nueva York

De Wikipedia
Saltar a navegación Saltar a la gueta


Bolsa de Nueva York
bolsa de valores
NY Stock Exchange logo.svg
Nyse 2009g.JPG
Llocalización
PaísBandera de Estaos Xuníos d'América Estaos Xuníos d'América
EstaosBandera de Nueva York (estáu) Nueva York (estáu)
Ciudá globalFlag of New York City.svg Nueva York
Sede New York Stock Exchange Building (es) Traducir
Direición Estaos Xuníos
Coordenaes 40°42′25″N 74°00′40″O / 40.70683°N 74.01103°O / 40.70683; -74.01103Coordenaes: 40°42′25″N 74°00′40″O / 40.70683°N 74.01103°O / 40.70683; -74.01103
Bolsa de Nueva York alcuéntrase en los EE.XX.
Bolsa de Nueva York
Bolsa de Nueva York
Bolsa de Nueva York (los EE.XX.)
Historia
Pánico financiero de 1907 (es) [[File:Noun Project label icon 1116097 cc mirror.svg
Crac del 29
Lunes negro (es) [[File:Noun Project label icon 1116097 cc mirror.svg
Orixe del nome Nueva York
Wall Street
Organigrama
Presidente Jeffrey C. Sprecher (2013)
Participación empresarial
Propietariu de
Web oficial
Cambiar los datos en Wikidata

La Bolsa de Nueva York (inglés: New York Stock Exchange, a menudo denomada poles sos sigles, NYSE, o'l so nomatu, The Big Board)[1] ye una bosa de valores asitiada nel Distritu Financieru (Financial District) del Lower Manhattan, na fastera meridional de la islla homónima de la ciudá norteamericana de Nueva York. Ye, con gran diferencia sobre la segunda[2][3], la mayor bolsa de valores del mundu en términos de capitalización de mercáu: el valor conxuntu de les compañíes llistaes nella yera de 30,1 billones de dólares en febreru de 2018[4]. El valor mediu de les transacciones diaries nella yera de 169.000 millones de dólares en 2013. El so mercáu de corros desarróllase na so sede, l'edificiu New York Stock Exchange Building, que ye un edificiu catalogáu como Fitu Históricu Nacional asitiáu nel 11 de la cai Wall (11 Wall Street) y el 18 de la cai Broad (18 Broad Street); anantes había un mercáu de corros adicional, nel 30 de la cai Broad (30 Broad Street), pero peslláronlu en febreru de 2007.

La bolsa de Nueva York ye propiedá, de magar 2013, de la empresa Intercontinental Exchange[5]. Primero d'eso formaba parte del consorciu NYSE Euronext, formáu tres de la fusión, en 2007, del NYSE con Euronext, una bolsa paneuropea que xestiona ocho mercaos nesi continente y ellabora l'índiz Euronext 100.

Historia[editar | editar la fonte]

Bolsa de Valores, asitiada nel 10-12 de la cai Broad (10-12 Broad Street), nuna ilustración de Hughson Hawley (1882).

Los oríxenes del comerciu directu de valores, cara a cara ente los axentes, na ciudá de Nueva York remóntase al alcuerdu Buttonwood. Esti documentu, firmáu el 17 de mayu de 1792 por 24 axentes, ye consideráu pola propia bolsa como'l so documentu fundacional. Primero d'eso, sicasí, ya había intercambiu de valores, pero facíase por intermediación de subasteros, que subastábanlos como un productu más ente otros (trigu, tabacu). L'alcuerdu Buttonwood estableció una tasa de comisión poles transacciones, a pagar polos clientes, y comprometía a los firmantes a dar prioridá a los otros firmantes del alcuerdu cuando tuvieran valores pa vender. Los primeros valores intercambiaos na bolsa foron mayormente valores del gobiernu, como bonos de guerra pa financiar la guerra d'independencia y acciones del Primer Bancu de los Estaos Xuníos (First Bank of the United States) o del Bancu d'América del Norte (Bank of North America), pero non esclusivamente estes: les acciones del Bancu de Nueva York (Bank of New York), un bancu priváu, tamién foron mercaes y vendíes nos primeros díes de funcionamientu del sistema[6].

En 1817 los axentes de bolsa qu'operaben siguiendo les cláusules del alcuerdu Buttonwood introducieron una serie de reformes. Tres de mandar una delegación a Filadelfia pa ver cómo s'organizaben los axentes d'esa ciudá, estableciéronse restricciones al comerciu manipulativu y creáronse muérganos formales de gobiernu. Tres de reformase y formar el Conseyu de la Bolsa (New York Stock and Exchange Board) la organización, decidió alquilar un espaciu propiu pa dedicalu esclusivamente al comerciu de valores. Esa sede foi treslladándose delles vegaes ente 1817 y 1865, cuando llegó a la so ubicación actual[7].

La invención del telégrafu eléctricu ayudó a consolidar los mercaos de valores, y Nueva York, tres de soportar delles situaciones de pánicu financieru meyor que los sos competidores, foi ganando puxu a costa de Filadelfia. En 1864 formose na ciudá'l Conseyu Abiertu d'Axentes d'Acciones (Open Board of Stock Brokers) pa competir cola Bolsa (NYSE). La primera axuntaba a 354 miembros (la Bolsa tenía 533), y afirmaba "usar un sistema de comerciu modernu y continuu, superior al sistema del NYSE, que facía dos sesiones de compra-venta al día". Dambes entidaes fusionáronse en 1869. La fusión fizo medrar tanto'l númberu d'axentes como'l volume de comerciu de la Bolsa "nún momentu nel qu'había docenes de mercaos rexonales de valores competíen cola NYSE por facese colos clientes potenciales. Toos, compradores, vendedores y axentes, queríen completar les transacciones de la forma más rápida y barata que la tecnoloxía permitiera, y eso facíalos buscar los mercaos con más volume de comerciu o más liquidez. Minimizar la competición yera esencial pa poder tener un gran númberu d'órdenes de compra y venta, y la fusión ayudó al NYSE a mantener la so reputación de ser capaz de proporcionar una liquidez superior[8]". L'accesu a nuevos axentes al Conseyu pesllóse en 1869, y solo aumentó de forma esporádica de magar. Dende esi momentu, y demientres el restu del sieglu, el comerciu de valores medró muncho y rápido[9].

El comerciu de valores, neto a finales del sieglu XIX que a entamos del XX, taba espuestu a situaciones de pánicu y quiebra financiera. Entamó a vese como necesaria la regulación gubernamental del comerciu de valores, especialmente dempués de qu'un gran crac, el de 1929, provocara la Gran Depresión. Asina, la propia Bolsa presentó, el 31 d'ochobre de 1938, un programa de 15 puntos destináu a ameyorar la protección de los inversores. Primero d'eso, el 1 d'ochobre de 1934, la Bolsa foi rexistrada, na Comisión de Bolsa y Valores, como una bolsa nacional de valores, con un presidente y un conseyu de gobiernu con 33 miembros. El 18 de febreru de 1971 la NYSE convirtióse nuna corporación ensin ánimu de lucru, y reduciose'l númberu de miembros del so conseyu a 25.

El 21 d'abril de 2005 la NYSE anunció los sos planes pa fundise con Archipelago, nún intentu de reorganizar la NYSE pa poder sacala a bolsa. El conseyu de gobiernu de la NYSE votó a favor de la fusión el 6 d'avientu de 2005, y esta convirtióse núna corporación pública qu'entamó a funcionar, col nome NYSE Group, el 8 de marzu de 2006. El 4 d'abril de 2007 el grupu completó la so fusión con Euronext, el mercáu combináu de bolsas de valores européu, formándose asina NYSE Euronext, la primer bolsa de valores tresatlántica. En 2013 el holding empresarial Intercontinental Exchange fízose col control de la NYSE.

Referencies[editar | editar la fonte]

  1. «Merriam-Webster Dictionary's definition of "Big Board"», Merriam-Webster, http://www.merriam-webster.com/dictionary/big%20board, consultáu 'l 6 d'avientu de 2012 
  2. «The NYSE Makes Stock Exchanges Around The World Look Tiny».
  3. «Is the New York Stock Exchange the Largest Stock Market in the World?».
  4. «2016».
  5. ICE completes takeover of NYSE, noticia na web de l'axencia Reuters (12 de payares de 2013).
  6. Pound, Richard W. (2005). Fitzhenry and Whiteside: Fitzhenry and Whiteside Book of Canadian Facts and Dates.
  7. New York Stock Exchange, entrada na web del Serviciu Nacional de Parques de los Estaos Xuníos.
  8. «The NYSE's Long History of Mergers and Rivalries». Bloomberg News. 8 de xineru de 2013. https://www.bloomberg.com/view/articles/2013-01-08/nyse-s-long-history-of-mergers-and-rivalries. Consultáu 'l 30 de xineru de 2021. 
  9. «NYSEData.com Factbook: Chronology of New York Stock Exchange (1792–1929)».

Enllaces esternos[editar | editar la fonte]