Área estadística metropolitana

De Wikipedia
Saltar a navegación Saltar a la gueta

Nos Estaos Xuníos nómase área estadística metropolitana (Metropolitan Statistical Area, MSA) a una rexón xeográfica con una densidá de población relativamente alta nel so centru y que forma una entidá con llazos económicos importantes. Estes rexones nun formen una ciudá per sigo mesmes, nin son divisiones alministratives afitaes como los condaos nin entidaes separtaes como los estaos. Esto fai que la definición de cualisquiera d'elles pueda variar según qué entidá la faga. Un área metropolitana típica tien como centru una gran ciudá qu'exerce una influyencia sustancial sobre la so rodiada (como Chicago o Atlanta). Por embargu, delles árees metropolitanes contienen más d'una gran ciudá y nun hai preeminencia de denguna d'elles; asina asocede, por exemplu, na metroplex Dallas-Fort Worth o na Minneapolis-Saint Paul.

Les árees estadístiques metropolitanes son definíes pola Oficina d'Alministración y Presupuestu (Office of Management and Budget, OMB), y utilizaes pola Oficina del Censu (U.S. Census Bureau) y otres axencies gubernamentales federales pa la ellaboración de les sos estadístiques.

Mapa[editar | editar la fonte]

Mapa de les árees estadístiques metropolitanes d'Estaos Xuníos y Puertu Ricu en febreru de 2013. Les 374 árees estadístiques metropolitanes apaecen en collor verde escuru. Les 581 árees estadístiques micropolitanes apaecen en collor verde claro.

Definiciones[editar | editar la fonte]

Les estadístiques de la Oficina del Censu referíes a les árees metropolitanes ellabórense acordies coles siguientes definiciones.

La Oficina d'Alministración y Presupuestu define un conxuntu d'árees estadístiques basaes nún nucleu (Core Based Statistical Areas, CBSAs) al traviés de tol país. Les CBSAs defínense sobro la base d'un área urbana central o d'una agrupación urbana, esto ye, d'un área contigua con una densidá de población relativamente alta. Les CBSAs tán formaes por condaos y entidaes equivalentes a ellos. Los condaos incluyíos nel área urbana central nómense condaos centrales de la CBSA. Los demás condaos de la rodiada, nomaos condaos periféricos, inclúyense na CBSA si caltienen llazos sociales y económicos fuertes colos condaos centrales, dalgo que s'oxetiva estudiando la cantidá de los sos habitantes que viaxen a ellos pa trabayar. Un condáu periféricu inclúyese na CBSA si la midida del intercambiu d'empléu, esto ye, el porcentaxe de xente emplegao que se desplaza a los condaos centrales a trabayar ye del 25% o más, magar qu'esto faise de forma estimao y almítense esceiciones a esta cifra, porque, por exemplu, puede haber fasteres d'esos condaos periféricos que seyan, por paisaxe y distribución de la población, totalmente rurales. Les árees estadístiques basaes nún nucleu pueden ser, amás d'árees estadístiques metropolitanes, árees estadístiques micropolitanes (Micropolitan Statistical Area, μSAs) en base a la población de l'área urbana central. Si cumplen determinaes condiciones una o más CBSAs d'ún o de dambos tipos pueden ser agrupaes pa formar una entidá estadística mayor, l'área estadística combinada.

Nos estaos de Nueva Inglaterra les ciudaes (towns) tienen más preponderancia alministrativa que los condaos, y ellí les árees estadístiques defínense en términos d'unidaes que tomen como base les ciudaes: son les nomaes NECTAs (New England City and Town Areas).

Ver tamién[editar | editar la fonte]

Referencies[editar | editar la fonte]

Enllaces esternos[editar | editar la fonte]